Post: #1
Title: قــال لي.. هيفــاء وهبي.. بقــارية
Author: سجيمان
Date: 05-01-2005, 07:21 PM
Parent: #0
دعاء الدخول:-
اللهم... حنن علي قلب كل زول كايس لي وداير يطلعني عنصري....اللهم اقذف في قلوبهم الحب ويشوفوني رهاب رهاب..و.. مهمش مهمش.....اللهم خليهم يحلمو بي بلدي في الشمالية.. وبي تًُكُل عمتي ويشوفو كفتيرة الشاي... المن سنة 1940....وصحانة الطلص...وكوز الموية الجنب الجر.. المسوينو الحلب....والصدأ باني فيهو بي جوه وبي برة...وعتنيبة عمتي الاطرافا مهرية ومهرودة.. العتنبية الجابوها ليها مع الشيلة في العرس... والعرس كان سنة 1950....الغريبة جابو عتنية في الشيلة وعنقريب ما جابوهو...انا ما عارف جدي ما حلف طلاق انو العرس دا ما يتم علا يجيبو العنقريب عشان يفرشو فوقو العتنيبة..... قالو كان العنقريب قرب يكون سبب ازمة اجتماعية وطلاق...علا دخلو الاجاويد....والعريس التزم يجيب العنقريب بعد شهر.... وبعد شهر العريس طلع مستهبل ما جاب العنقريب ..جاب بنبر....وبرضو عمتى قالت بيختارو... بتتكرفس وترقد فوقو.. فوق البنبر....حلفت قالت البنبر شالا..وترقد كانت وتتمغا كمان...... اكان ما عجبك يا العفين.. العفين دا انا....
يعد الدعاء وحديث العتنيبة.....ندخل في الموضوع....واحد حلف لي بالتكسرو انو هيفاء بقارية.... ما فيها نضم.....لكن انا اشك في بقوريتا....لانها شينة والبقاريات سمحات....انا مصمم ومصّر انها شينة....وبستعمل حقي كامل في التعبير عن رأيي... اعتماد على دستور المكاواة والمرحلة الانتقالية.. القاعدين يسوو فيهو الجماعة.. اعتماد على منطوق المادة التالتة في حرية الرأي والتعبير....وانا ما داير من حرية الراي والتعبير علا اقول فلانة شينة وفلانة سمحة..وبس..... بالله شفتو انا مواطن صالح كيف؟.....بعد اقتناعي وعلى مضض انو هيفاء بقارية....اطالب برجوعا الي ربوع كردفان....حيث التبلدي...ويشدّو لها شبرية فوق البعيبيشة.....تمشي باللوال هناك وتغني..مافي زول حاميها.. علا ما تتفلهم....وما تلبس جنس اللابساهو دا.... الركوب فوق البعيبيشة بي يدور سترة...واطالبها بان تهيّف لنا الاغاني الكردفانية.....وتمتطي هيفاء تور جواميس....وتغني لي ابكر.......
ابكر حوش اسحق عني
ابكر اسحق.... جنني
ابكر يا عيب الشوم
رابط السكين في ضراعو
ابكر يا عيب الشوم
ليش ما يربطا في كراعو؟
و يتحنفش ابكر.... ويملص السكين من الضراع ويربطا في الكراع....ويعاين لي هيفاء ويحلف طلاق لو دايرة تور يربطو في كراعو ما عندو مانع.....اما اسحق الجنن هيفاء ان صبحت عليهو الواطا لوموني....وتتبسط هيفاء وتقول بعد تنهيده علي الموجة الطويلة... تسلم لي ها الديات"يعني يلسمو الايدين".....وها العيون الكحيلي....يعني عيون ابكر كحيلة... شفتو كضب الانتاية دي؟......
..وتتغزل هيفاء الكردفانية في الاخدر الليموني المشنق الطاقية.....
الاخدر الليموني مشنئا الطائية
....... يئبرني
اشيلو في عينا واحطو في عينا
...... يئبرني
ورجب طاير في الايبل الاربعة
شو.... أبيح
......وتغني لي ابكر....الشرب شربة.. وختا الجبال غربا وقام صوف ولبد تحت شُدرة....وتجري هيفاء الكردفانية وتقص دربو.....وتلقاهو قاعد تحت شدرة والشربة عاملة الهوايل.....وتقعد تغني ..موال ....
اووووف..اووووف....اووووف
بخاف عليك......... بخاف
الدنيا شوب...ويجيك جفاف ...." شوب=حر"
|
Post: #2
Title: Re: قــال لي.. هيفــاء وهبي.. بقــارية
Author: Abureesh
Date: 05-01-2005, 07:56 PM
Parent: #1
سجيمــان،
كيف حالك.. وإذا سـألتم عنا فلم بنا أى خلاف سوى عدم مشاهدتكـم.
صـورت نفس البيئـة التى ترعرعت فيهـا بكل تفاصيلهـا وألوانهـا.
ياخى إذا ما بديت فعلا، عليك الله اقيف شـويـة وأعمل ليك...
...
.. مسـرحيــة.. لا ......
روايـة!
أيواااااااااا
روايـة..
شفت كيف؟
وما فى شك النتيجـة حتكون (كويســة)
عارف أنا سمعت تحت تحت إنك من الجماعـة ياهـم إلا داسيهـا..
لكن هسى أقول ليك، ولكل من هب ودب، إنك ما ممكن تكون منهـم..
لأنو ما ممكن الزول يكون معاهـم ومبدع فى نفس الوكت.. ديل ناس أينشتاين قالوا ما ممكن علميــا.. وأسـبتوهـا.
فعليك الله روق المنقـة وأخـذ ليك شهـر سجن يمكن تطلع لينـا بروايـة جـديـدة بعـد أربعين سنـة من سنين القحط الفنى الماضيـة.
أتارى الغـربـة جات بخيرهـا..
هسـى لو سجيمـان دا كان وسـط الكتاحـة والسمـوم والكتمـة، كان نضـم جنس النضــم دا؟
ســؤال أخيـر:
هل طلعت شـوكـة من رجلك بشــوكـة تانيـة لما كان عمرك تماينـة سنــة؟
|
Post: #12
Title: Re: قــال لي.. هيفــاء وهبي.. بقــارية
Author: سجيمان
Date: 05-02-2005, 11:52 AM
Parent: #2
ابو الريش
| Quote: هل طلعت شـوكـة من رجلك بشــوكـة تانيـة لما كان عمرك تماينـة سنــة؟ |
ايوا يا ابو الريش.....ولبست نعلات صفق العشر.....وسكيت الكُدندارات في الشقيل...ورقدت فوق العتنية....واتمسحت بي دهينة قبل النوم
|
Post: #3
Title: Re: قــال لي.. هيفــاء وهبي.. بقــارية
Author: محجوب البيلي
Date: 05-01-2005, 10:34 PM
Parent: #1
الأخ سجيمان
ما أجملكّ!
|
Post: #16
Title: Re: قــال لي.. هيفــاء وهبي.. بقــارية
Author: سجيمان
Date: 05-03-2005, 03:50 AM
Parent: #3
محجوب البيلي
وما اروعك انت يابيلي
|
Post: #4
Title: Re: قــال لي.. هيفــاء وهبي.. بقــارية
Author: Tabaldina
Date: 05-02-2005, 00:35 AM
Parent: #1
..
.
صباح الخير بتوقيت قناة الرابعة اف ام..
طبعا لوماعندك خبر افيدك .. مش بقي عندنااتنين ام بي سي اف ام
واحدة تابعة لشركة البيبسي وآل ابرهيم مالك دى مانغو اف ام والتانية
دى الرابعة اف ام وتابعة للكوكاكولا وآل اسامة داؤود..
من راس تناشر لانناشر هاريننا هيفاء وهبى ونانسي واصالة وباسكال بالاضافة
لنايصين ديلاك ناس فلان وعلان الجانا والماجانا..
وياحلاة صوت نانسي ونجوى كرم.. لمن يقول مع كل غنية:
فيكم تسمعوا كل غنياتى على الرابعة..
وصحبتك هيفاء تردد : هيفة انا... اناهيفة انا اسمعونى على الرابعة..
والله جنس هيافه..
يمر يوم كامل وماتسمع مقطع لابو اللمين او وردى او حسن عطية وابوالسيد
والله استلاب ثقافى غريب دى بس الحاجة البتخلينى اتفق مع بشاشا..
آها نرجع لموضوعك شايفك دخلت اهلى الكردفانيين وكمان البقارة..
| Quote: بعد اقتناعي وعلى مضض انو هيفاء بقارية....اطالب برجوعا الي ربوع كردفان....حيث التبلدي...ويشدّو لها شبرية فوق البعيبيشة.....تمشي باللوال هناك وتغني..مافي زول حاميها.. علا ما تتفلهم....وما تلبس جنس اللابساهو دا.... الركوب فوق البعيبيشة بي يدور سترة...واطالبها بان تهيّف لنا الاغاني الكردفانية..... |
| Quote: ..وتتغزل هيفاء الكردفانية في الاخدر الليموني المشنق الطاقية..... |
صراحة نسب انا هيفة دى لينا ما ارتحت ليه..!!
وقد تكون اول قصة رمزية ليك ما قدرت استوعبها.. ممكن تفهمنى ..
السخانةهنا تلحموالفهم قسم يا دوك!! وعشان البلد كلها بقت بتشم.. اناالوحيد
الماشمام.. قصدى مداوم زيكم قلت اقعد القط الحروف حرف عشان اكتب ليك وتكتب لى واضيع الزمن حتى الرابعة.
آها بمناسبة الشم دى خلينى النونسك .. الناس طلعوا البحر والبيتش عشان يشموا والله البلد بقت بتشم وجنس شم يعنى لو انت فى الفردوس - دا حى- ماتفتكرهاالجنة والله تشم ناس الدوحة وبرضو حى.. عارف ناس الاحفاد قصدى بنيات الاحفاد ولا حنكوشات الاحفاد عملوا تخريج أبهة.. بس والله لوجيت كنت حتشم شم..جنس عطور ايف سان ودافنشى ..الخ والله البنات بقن ذوقن راقى فى الشم..
وقال كدا لو غشيت دوار العمدة ولا حديقة المريديان الخلفية والله تشم تفاح وعنب ويقدم فى نراجيل من فضة وحولك قوارير بيضاء وخضراء ممشوقى وقصار القامة يرتدون البلو جينز الاحمر ويقودون النوبيرات والاسكودات..
والله بنتتنا بقن راقيات بس ما عارف الجاهن شنو لمن اصبحوا بطيخات وشمامات !!
ياربي دا الانفتاح على القنوات ولا الاتفاقيات ولا تقصير الابهات..
آها قلت لى علاقة هيفه بكردفان والبقارة شنو!!?
ما تزوغ والله اشم ريحتك لو كنت فى أخر البورد..
Cu ya Doc
|
Post: #5
Title: Re: قــال لي.. هيفــاء وهبي.. بقــارية
Author: أيمن جبارة الله الخضر
Date: 05-02-2005, 01:04 AM
Parent: #4
Quote: واحدة تابعة لشركة البيبسي وآل ابرهيم مالك دى مانغو اف ام والتانية
دى الرابعة اف ام وتابعة للكوكاكولا وآل اسامة داؤود.. |
العزيز تبلدينا
إنت متأكد من معلوماتك دي؟ لأنو البعرفو إنو مانقو أنشأها الإخوة الأحباب زاهر تاج الدين ومكي محمود
والرابعة أنشأها محمد مراد رئيس مجلس إدارة استديوهات عجمان
|
Post: #9
Title: Re: قــال لي.. هيفــاء وهبي.. بقــارية
Author: Tabaldina
Date: 05-02-2005, 01:44 AM
Parent: #5
..
.
عزيزى/ايمن..
ولو قصدك بالانشأ: وضع الهيكلية الإداريةوالاسس ..
احتمال تكون معلومتك صحيحة .. اما ان كنت تقصد الملكية والتمويل
بل الأهداف والغرض الدعائى فانامتأكد مية المية من معلوماتى..
وازيدك من الشعر بيت ما بتتخيل حجم الجوائز اليومى للمسابقات,,
ارقام خرافية .. شئ تذاكر لحفلات كاظم وايهاب وجائزة 3 مليون دى يومى
وطبعا راعى حفل ايهاب توفيق هم ناس الكوكاكولا
خليك من من جوائز سيقا وميقا والبان كابو..الخ..
عارف يا ايمونى رغم انه دااسلوب دعائى ضخم للبزنس العالمى
لكن حركات وبذخ الرسمألية دا البجيب كلام جلابي وشمالى
ويدخلهم فى كستبانة.. مع عيال ام زرقة..وانحنا لا مع الكير ولا النفير
آها ما فضل الا بعملو لينا مدينة إعلامية زى حقتكم الفى دبي..
طبعا سمعت بدريم لاند>>> عصام الخواض..
يلا والله شميت ريحة نسكافه خلينى نعمل كباية ونجيكم
سلام..
يادوك انا شمام
|
Post: #25
Title: Re: قــال لي.. هيفــاء وهبي.. بقــارية
Author: سجيمان
Date: 05-04-2005, 03:09 AM
Parent: #5
ايمن جبارة
| Quote: والرابعة أنشأها محمد مراد رئيس مجلس إدارة استديوهات عجمان |
والبستي كولا؟؟؟... الأنشاءا منو؟
|
Post: #6
Title: Re: قــال لي.. هيفــاء وهبي.. بقــارية
Author: A.Razek Althalib
Date: 05-02-2005, 01:27 AM
Parent: #4
دكتور عادل المكي...
التحايا..
| Quote: وتلقاهو قاعد تحت شدرة والشربة عاملة الهوايل.....وتقعد تغني ..موال .... |
دكتور يمين ناس الخليفة التنمباك حرمو...
تقول لي.. شنو..؟
روابة.. حلال...
يا زول...
لا خميرة...
ولا موال...
تخريمة طويلة..
تبلدينا..
| Quote: صراحة نسب انا هيفة دى لينا ما ارتحت ليه..!! |
ولامن قالو النتن ياهو.. برضو نقر طنبورنا..
تفتكر هو زولنا...
بعدين الدكتور بيقصد إستفسار عن البقارة ديل ..
هل هم في كردفان ولا دار فور...
وإنت سيد العارفين...
في مسألة مسافة الوطن وجدان...
ودور البقارة في صناعة السودان المعاصر...
وبالمرة زيادة كوم إنو البقارة هم (التعايشة + الرزيقات + الهبانية + المسيرية) أبوهم أحمد ود حيمات..
والنسب الجاي بيقول ليك.. الساير عطية (العطاونة) والمقيم حيمات (أولاد الحيمات) والدخان المتلتل راشد الولاد.. (أولاد راشد)..
وكلهم يحترفون مهنة رعي الأبقار بصورة عامة...
والقول في خشم سيدو مليح...
يا دكتور .. بذمتك هيفاء وهبي بقارية...
مليحات وحلوات حلاتن...
هيفاء.. شو... آل...
د. سيجمان...
بنات البقارة..
|
Post: #10
Title: Re: قــال لي.. هيفــاء وهبي.. بقــارية
Author: Tabaldina
Date: 05-02-2005, 02:54 AM
Parent: #6
..
.
| Quote: الساير عطية والمقيم حيمات والدخان المتلتل راشد الولاد.. |
يا عبدالزارق ول عيسي ..على بالطلاق انت دا ودعمى لزم
باق انامن اولاد راشد.. لكن عاد نقدروا نقولوا لمن بخنقونا ن....!!
الجماعة خلونا نكرس ساي الا الصبر يوموالله نغير عليهم ضحى وقبال الشم
ماتقع الا نجيب خبرهم..
عساك طيب ول آبا.. فتك بعافية
..
.
|
Post: #37
Title: Re: قــال لي.. هيفــاء وهبي.. بقــارية
Author: سجيمان
Date: 05-05-2005, 11:04 AM
Parent: #10
| Quote: باق انامن اولاد راشد |
راشد آل مكتوم؟
|
Post: #27
Title: Re: قــال لي.. هيفــاء وهبي.. بقــارية
Author: سجيمان
Date: 05-04-2005, 07:22 AM
Parent: #6
عبد الرزاق
Quote: دكتور يمين ناس الخليفة التنمباك حرمو...
تقول لي.. شنو..؟ |
يا زول.. ناس ابكر..... بقو مطاااااااميس
|
Post: #24
Title: Re: قــال لي.. هيفــاء وهبي.. بقــارية
Author: سجيمان
Date: 05-03-2005, 01:46 PM
Parent: #4
تلبدينا
| Quote: آها قلت لى علاقة هيفه بكردفان والبقارة شنو!!? |
واحد قال لي .. اصلا هيفاء وهبي بقارية..... النضم دا ما قلتو انا.... وانا والله شايف البقاريات اسمح منها بي مراحل
|
Post: #7
Title: Re: قــال لي.. هيفــاء وهبي.. بقــارية
Author: ست البنات
Date: 05-02-2005, 01:34 AM
Parent: #1
سجيمان أخوة ،
كيف حالك بعد العودة من الرياض ?
ان شاء الله دعاء الدخول حقك دا يصيدنى انا كمان ! ما تقول حبوبتى الله يرحمها قصتها متل اللت حبوبتك دى ! عيللى ما فيها بنبر شى !
حبوبتى كان عندها برش وطرقى !
وجات من الربع الخالى ! ماب اعرفهم كانوا قاعدين ويين وكت هو خالى !!
وهسع كان صددونا ليهو ، أقولهم ماب أمشى عيللى تجيبوا رفات حبوبتى وبرشها معاى !
ست البنات .
|
Post: #30
Title: Re: قــال لي.. هيفــاء وهبي.. بقــارية
Author: سجيمان
Date: 05-04-2005, 12:30 PM
Parent: #7
ست البنوت لي حدهن
| Quote: ان شاء الله دعاء الدخول حقك دا يصيدنى انا كمان ! ما تقول حبوبتى الله يرحمها قصتها متل اللت حبوبتك دى ! عيللى ما فيها بنبر شى ! |
يعني حبوبتك.... شيلتها ناقصة كانت؟.... العرس دقّس الجماعة
|
Post: #8
Title: Re: قــال لي.. هيفــاء وهبي.. بقــارية
Author: حمزاوي
Date: 05-02-2005, 01:41 AM
Parent: #1
اخوي سجيمان ود عم بله
كيفنك يا جنا
يا تومي بيردا
الحلوات حلاتن بنات البقارة
. . .
شدوولها شبرية
فوق البعيبيشه
تتمايل تقدل
ذي ملكة بلقيسه
آآآآآآآآآآآآآهـ يا رجب
سوق ام دفسو
ورهيد البردي
|
Post: #11
Title: Re: قــال لي.. هيفــاء وهبي.. بقــارية
Author: A.Razek Althalib
Date: 05-02-2005, 05:56 AM
Parent: #8
حــمــزاوي
لا حولاآآآآآآآآآآ
ومن رهيد البردي ...
لوحة...
آآآآآآآه....
|
Post: #35
Title: Re: قــال لي.. هيفــاء وهبي.. بقــارية
Author: سجيمان
Date: 05-05-2005, 03:51 AM
Parent: #8
حمزاوي
Quote: سوق ام دفسو
ورهيد البردي |
خليت الحصاحيصا؟......
|
Post: #13
Title: Re: قــال لي.. هيفــاء وهبي.. بقــارية
Author: ست البنات
Date: 05-02-2005, 12:04 PM
Parent: #1
ويا سجيمان ،
قول ليهو طلعت الشوكى بى شوكة تمر ! ووكت أبت تمرق ، سويتلها وسخ
الأضان !
وبزققت لأبو الضبضوب عشان يمرق من الواطا !
وشركت لام قيردون والدباس !
ونمت فوق البرش وقت اتمسحت بى الديهينى !!!
ست البنات .
|
Post: #15
Title: Re: قــال لي.. هيفــاء وهبي.. بقــارية
Author: shazaly gafar
Date: 05-02-2005, 12:41 PM
Parent: #13
ازيكم يا رايعين
| Quote: وشركت لام قيردون والدباس |
ويا حلاة الدباسى وكتين تدودرا وتقولها:
أووو الدباسه
ام حلقاً مواسه
ادينا المريسه
نشرب نقوقى
البحر زلّوقى
أووو الدباسه
وهى تقدل قدامك ساااااااكت آحلالى
مى جايبه خبر لامن تلقى روحها فى الشرك(المطوطو)
مسكينة!
|
Post: #39
Title: Re: قــال لي.. هيفــاء وهبي.. بقــارية
Author: سجيمان
Date: 05-06-2005, 07:52 AM
Parent: #15
الشاذلي جعفر
الشاذلي....... يا دفعة....... حليل زمن الهنا
|
Post: #36
Title: Re: قــال لي.. هيفــاء وهبي.. بقــارية
Author: سجيمان
Date: 05-05-2005, 07:47 AM
Parent: #13
Quote: قول ليهو طلعت الشوكى بى شوكة تمر ! ووكت أبت تمرق ، سويتلها وسخ
الأضان ! |
آآآآآآآآآآآآآآه....... يا ست البنات... حليل الزمن الزين
|
Post: #14
Title: Re: قــال لي.. هيفــاء وهبي.. بقــارية
Author: zola123
Date: 05-02-2005, 12:40 PM
Parent: #1
سجيمان رفقا بالحناكيش!
رجاء ترجم التالي:
عتنيبة
تتمغا
شبرية
البعيبيشة
وقام صوف
ملاحظة: التكل ده عرفته براي 
|
Post: #40
Title: Re: قــال لي.. هيفــاء وهبي.. بقــارية
Author: سجيمان
Date: 05-06-2005, 12:06 PM
زولا 123
Quote: سجيمان رفقا بالحناكيش!
رجاء ترجم التالي:
عتنيبة
تتمغا
شبرية
البعيبيشة
وقام صوف
ملاحظة: التكل ده عرفته براي |
غايتو اتكيفت جدا.... انك عرفتي التكل براكي....
كدي حاولي في الباقيات.... وممكن تستعيني بصديق
|
Post: #17
Title: Re: قــال لي.. هيفــاء وهبي.. بقــارية
Author: serenader
Date: 05-03-2005, 09:05 AM
Parent: #1
يا عمو سجيمان
إنت قصدك هايفة (وليست هيفاء) وهبي بقرية، ولا بقّارية؟
مجرد سؤال؟
|
Post: #18
Title: Re: قــال لي.. هيفــاء وهبي.. بقــارية
Author: محمد حامد جمعه
Date: 05-03-2005, 09:18 AM
Parent: #17
اللهم... حنن علي قلب كل زول كايس لي وداير يطلعني عنصري....اللهم اقذف في قلوبهم الحب ويشوفوني رهاب رهاب..و.. مهمش مهمش.....
يا حليك يا دكتور دا كلو عشان عاوز تقول (بقارية ) هى يا مان هو انت ما عارف ولا شنو البقارة ما طلعوهم شوايقة الغرب .... الاسم الكودى جنجويد ... والجماعة الفى بالك ما بيجوك هنا عشان كدا ما تشيل هم واكتب كتابتك يا زول و(الحلوات بريدن بنات البقارة ) ... وانشاء الله تكون لمن مشسيت الرياض تكون زرت الاستاذ عبد الرحمن عبد الله (ود بارا ) والبقارى الترخيص والاصل شايقى على ما اعتقد ... ودا السودان
|
Post: #43
Title: Re: قــال لي.. هيفــاء وهبي.. بقــارية
Author: سجيمان
Date: 05-06-2005, 06:39 PM
Parent: #18
محمد حامد جمعة
| Quote: الاستاذ عبد الرحمن عبد الله (ود بارا ) والبقارى الترخيص والاصل شايقى على ما اعتقد ... ودا السودان |
عبد الرحمن اظنو محسي.... يا محمد حامد جمعه.... قلت لي اكتب ساكت؟
|
Post: #41
Title: Re: قــال لي.. هيفــاء وهبي.. بقــارية
Author: سجيمان
Date: 05-06-2005, 02:45 PM
Parent: #17
serenader
Quote: يا عمو سجيمان
إنت قصدك هايفة (وليست هيفاء) وهبي بقرية، ولا بقّارية؟
مجرد سؤال؟ |
بقارية.. بقرية دي لسه ينظر ويفاد
|
Post: #46
Title: Re: قــال لي.. هيفــاء وهبي.. بقــارية
Author: سجيمان
Date: 05-07-2005, 04:26 AM
Parent: #19
عوضناسا
شكرا للصورة............
|
Post: #20
Title: Re: قــال لي.. هيفــاء وهبي.. بقــارية
Author: الصادق خليفة
Date: 05-03-2005, 09:35 AM
Parent: #1
د. سجيمان
مين القال ليك ؟
|
Post: #44
Title: Re: قــال لي.. هيفــاء وهبي.. بقــارية
Author: سجيمان
Date: 05-06-2005, 08:05 PM
Parent: #20
الصادق خليفة
قال لي عوض جُمبُلوغ...... صاحبي
|
Post: #21
Title: Re: قــال لي.. هيفــاء وهبي.. بقــارية
Author: البحيراوي
Date: 05-03-2005, 10:42 AM
Parent: #1
الأخ سجيمان مساك الله بالخير
يا زول أنا متأكد مائة بالمائة إنة هيفاء أبوها شايقي
وأمها مصرية وقد أخذت الجنسية اللبنانية
بحيراوي
|
Post: #22
Title: Re: قــال لي.. هيفــاء وهبي.. بقــارية
Author: Abureesh
Date: 05-03-2005, 11:41 AM
Parent: #21
الأخ عوض ناسـا،
شكــرا على الصــورة، ولكنى لم أعرف أيهمـا عجـرم؟ بجــد.
|
Post: #45
Title: Re: قــال لي.. هيفــاء وهبي.. بقــارية
Author: سجيمان
Date: 05-07-2005, 01:17 AM
Parent: #21
بحيراوي
Quote: يا زول أنا متأكد مائة بالمائة إنة هيفاء أبوها شايقي
وأمها مصرية وقد أخذت الجنسية اللبنانية |
يا زول الخلاك كدي متوكد شنو؟؟؟؟؟
|
Post: #23
Title: Re: قــال لي.. هيفــاء وهبي.. بقــارية
Author: البحيراوي
Date: 05-03-2005, 12:08 PM
Parent: #1
أمانةً تجيك يا أبو الريش ما عرفت ياتي عجرم
إلا شوف العين ما بكتل غزال
بحيراوي
|
Post: #26
Title: Re: قــال لي.. هيفــاء وهبي.. بقــارية
Author: ابو جهينة
Date: 05-04-2005, 03:41 AM
Parent: #23
سي جي
| Quote: ..جاب بنبر....وبرضو عمتى قالت بيختارو... بتتكرفس وترقد فوقو.. فوق البنبر....حلفت قالت البنبر شالا..وترقد كانت وتتمغا كمان.... |
عمتك يا سي جي يا إما فيها جينات لاعبات السيرك الروسي يا إما مكتشفة رياضة اليوغا. 
|
Post: #28
Title: Re: قــال لي.. هيفــاء وهبي.. بقــارية
Author: عوض الله الفولانى
Date: 05-04-2005, 08:26 AM
Parent: #26
ذكر لى احد اصدقائى وهو لبنانى الجنسية و مهوس بهيفاء
ان عمليات التجميل التى عملتها فى انفها فقط اكثر من
عدد عمليات حزب الله الأنتحارية فى جنوب لبنان ايام ألأحتلال
ناهيك عمليات الشد و النفخ و شفط الدهون يعنى بصراحة
كده هيفاء دى لو شفتوها بدون مكياج تحلف مكتبة كاملة من
المصاحف و تقول بعاتية عدييييييل ويا ريت لو الزمن بيسمح
لسردت لك كمية هائلة من النكات التى تقال عنها فى بيروت
و ألأغرب من كدا تدعى انها مطربة بل فنانة و لها شعبيتها
كل اغانها غنج و ميوعة اكثر من الازم و كلمات ركيكة و الحان
ليس لها اى معنى ولا تطريب اللهم الا شكلها و تعريها و رقصها الفاضح
و بصرحة كدا بنات البقارة اجمل منها بكثير
الجمال فى كل مكان لكن الجمال ألأصلى فى السودان
ابشر بالخير يازول .... و بعشقك يا بنت بلدى
الفولانى
|
Post: #48
Title: Re: قــال لي.. هيفــاء وهبي.. بقــارية
Author: سجيمان
Date: 05-07-2005, 07:58 PM
Parent: #28
عبد الله الفولاني
| Quote: بصرحة كدا بنات البقارة اجمل منها بكثير |
يا زول انا عااااااارف النضم دا....واسمح من اسمح لبنانية
|
Post: #47
Title: Re: قــال لي.. هيفــاء وهبي.. بقــارية
Author: سجيمان
Date: 05-07-2005, 08:57 AM
Parent: #26
ابو جهينة الحبيب
| Quote: عمتك يا سي جي يا إما فيها جينات لاعبات السيرك الروسي يا إما مكتشفة رياضة اليوغا. |
نحن...اصلا...من ورا...رخويات
|
Post: #29
Title: Re: قــال لي.. هيفــاء وهبي.. بقــارية
Author: awadnasa
Date: 05-04-2005, 09:36 AM
Parent: #1
اخ ابو الريش
هذه الصورة جزء من خبر في البي بي سي ويقول الخبر انه تم تكريمها من قبل ولي عهد الكويت باعتباها واحدة من اكثر مائة شخصية عربية مؤثرة
مؤثرة موش ?????
|
Post: #31
Title: Re: قــال لي.. هيفــاء وهبي.. بقــارية
Author: ست البنات
Date: 05-04-2005, 01:07 PM
Parent: #1
شكرا يا الفولانى ، ولا فض فوهك .
لكن البيقنع سجيمان أخوى ، وراغب علامة شنو ??
ويا بنت بلدى ود البلد شخصية .
ست البنات .
|
Post: #49
Title: Re: قــال لي.. هيفــاء وهبي.. بقــارية
Author: سجيمان
Date: 05-08-2005, 07:29 AM
Parent: #31
ست البنوت
| Quote: لكن البيقنع سجيمان أخوى ، وراغب علامة شنو ?? |
انا بقتنع...امشو اقنعو راغب علامة
|
Post: #32
Title: Re: قــال لي.. هيفــاء وهبي.. بقــارية
Author: كبسيبة
Date: 05-04-2005, 01:53 PM
Parent: #1
سجيمان اللذيذذذذ
أزيك يا زول
يعني أنت ما مصدق
طيب هاك
أنزل تحت
كمان
لسة
شوية
|
Post: #33
Title: Re: قــال لي.. هيفــاء وهبي.. بقــارية
Author: Tabaldina
Date: 05-05-2005, 00:54 AM
Parent: #32
..
.
انت يا كبسه قلبتوعلى ناني..
الزولةدى ماكويسة.. ومتعاطفه مع قضايا الساعة
ياهو طقتها لدارفور لتدعم اخوانا الزغاوة..
ولا دا ما مندوبهم..!!??
والحفلة تحت تبلدية..!! عجيييبب
الله يلعن الجانجويد.. دمروا المسرح وفرتقوا الصيوان
ابوجهينة
بس مسألة حبوبه البتلعب يوغا دى...خطرررريةعديل
|
Post: #34
Title: Re: قــال لي.. هيفــاء وهبي.. بقــارية
Author: ناصر جامع
Date: 05-05-2005, 01:10 AM
Parent: #33
سجيمان هاك النكنته دى عن نانيسي عجرم
ولد نانسي عجرم يدرس بالسعودية
جالس يبكي بالفصل
ساله المدرس ..
قاله ليش تبكي ؟
قال الولد..
بدي ماما
قاله المدرس..
كل خرا واسكت
كلنا بدنا امك وساكتين
|
Post: #51
Title: Re: قــال لي.. هيفــاء وهبي.. بقــارية
Author: سجيمان
Date: 05-09-2005, 02:00 AM
Parent: #34
ناصر جامع
| Quote: كلنا بدنا امك وساكتين |
وحات الله...... صدق.......
|
Post: #50
Title: Re: قــال لي.. هيفــاء وهبي.. بقــارية
Author: سجيمان
Date: 05-08-2005, 01:20 PM
Parent: #32
كبسيبة
الزول المعاها دا؟....ديل حجبات..ولاّ.... صناديق بسكويت؟؟؟؟
|
Post: #38
Title: Re: قــال لي.. هيفــاء وهبي.. بقــارية
Author: عبود احمد النصيح
Date: 05-05-2005, 01:45 PM
Parent: #1
ياسيجيمان والله تكون عوجه كبيرة كان عمتك دى ماعندها كرباب ولا دادنقه وانشاء الله السحارة تكون عمرانه
|
Post: #42
Title: Re: قــال لي.. هيفــاء وهبي.. بقــارية
Author: نادية عثمان
Date: 05-06-2005, 06:03 PM
Parent: #38
سجيمان العزيز
نانسى عجرم محمد عوض البشير
دنقلاوية من كابتود
بت خالة عم ولد حبوبة جد امى لزم!!
|
Post: #53
Title: Re: قــال لي.. هيفــاء وهبي.. بقــارية
Author: سجيمان
Date: 05-09-2005, 12:51 PM
Parent: #42
ندوية العسللي
Quote: نانسى عجرم محمد عوض البشير
دنقلاوية من كابتود
بت خالة عم ولد حبوبة جد امى لزم!! |
نانسي ان سمعت النضم دا... بي تطير من الفرح...... يا السمحة ست البنوت...ام جضيمات تفاح سُكري..... وانا ان شاء الله ي سكرة يني التجنني علي الجن العلي
|
Post: #52
Title: Re: قــال لي.. هيفــاء وهبي.. بقــارية
Author: سجيمان
Date: 05-09-2005, 04:55 AM
Parent: #38
عبود احمد النصيح
| Quote: ياسيجيمان والله تكون عوجه كبيرة كان عمتك دى ماعندها كرباب ولا دادنقه وانشاء الله السحارة تكون عمرانه |
كرباب عندها..والسحارة مليانة....علا دادنقة دي ما عرفتها
|
|