Post: #1
Title: ونســــة.... في بيـت... العــرقــي
Author: سجيمان
Date: 05-13-2005, 11:23 AM
Parent: #0
سميرة.....دا الاسم العرفتها بيهو....اسمها الأول ما بعرفو......مربوعة....طواالي تقبل علي اليمين وتبصق.....كنت احترمها جدا.... لانها ما تغش في العرقي......لا حجار بطارية...ولا نيم..ولا بنج حصين.....تديك ليهو عرقي صااااااافي......شعارها.. الأمانة والإتقان.......ومن غشنا ليس منا.......ساكنة في بيت فيهو حوش....... في خشم الباب في كلب ديمة راقد .....يوم واحد ما سمعتو هو هو....وفي نص الحوش في اوضيّن.... زعلانات وحردانات من بعض...وكل واحدة مقبلة علي جيهة....في ركن الحوش الغربي في ادبحانة...ما فيها عرش....راكوبة قدام التكُل....كمية من البنابر مجدعة في الحوش...وتلاتة عناقريب... أي عنقريب فيهن الكرّاب حقو ناقص وجزء من حبالو مقطعّة..ولازمن تكون فيهو كراع مشقوقة من فوق...ومجبرا بي سلك........الحلة كل بيت فيهوكهرباء..علا بيت ناس سميرة.....وقت نجي نشتري العرقي.. عندها فانوس... تشيلو وتدخل جوا التكل....ونحن نتقطع وراها..... بالرغم من ثقتنا المفرطة في امانتها لكن برضو ..قلبنا قاعد ياكلنا.....ونخاف تغشنا في العرقي..........عندها تلاتة شُفع...اعمارهم بين تسعة سنوات وخمسة......ديمة عرايا.......دائما لما اجي... القاهم نايمين فوق عنقريب.... الاتنين الصغار بي راس..والكبير بالراس التاني......الشافع الوسطاني حاقر بي حقارة شديدة.... اول ما ادخل واقيف وانا منتظر امو تديني الكوتة... يصحا من نومو...ويجي يقيف جنب كرعي ...... ويقعد يبول........موقت ساعتو البايلوجية علي مواعيد جيتي......اشتكيت لي امو منو....وانو الولد ما شاف شغلة غيري....... قالت لي وهي زعلاااااانة....... يعني يبول في العنقريب؟.......
مرة جيت.. اشيل الكوتة..... لقيت البيت فاضي من الزباين...عرفت انو في عوجة حاصلة..... وسميرة راقدة ومتغتية بي بطانية..... سعلتها من الكوتة.... قالت لي الليلة مافي... انا عيانة..... عندي ملاريا........ سبيت للملاريا وللبعوضة ولي حقن الكوانين......" ينعل ميتين الملاريا...... الملاريا دي ما لقتك علا انتي يا سميرة؟...... الحلة دي مليانة نسوان..... نسوان ما منتجات ..وما منهن أي فايدة..... ليه ما تجيهن هن؟...تجيكي انتي ليه؟..."............
سميرة مرا طيبة.... علا عيبا الوحيد.. تحب الغُلاط زي عيونا....ومافي شي في الدنيا دي عاجباها.....مرة كنت معاها وسمعت محمد الامين يغني في غنية يا معاين من الشباك....... قلت ليها ..الله دا محمد اللمين بيغني يا معاين من الشباك....... شفتي الغنية دي سمحة كيفين؟....... قالت .... لا لا ...لا سمحة ولا حاجة.....في زول في الدنيا دي بيغني لي زول في حراسة؟......ا ي ي ي..حراسة...... هو منو بيعاين من الشباك علا زول في حراسة........قلت اغير الموضوع......كانت لابسة فستان اصفر...وعليهو نقوش لزهرة السوسن......قلت ليها تعرفي يا سميرة الزهور الفي فستانك ديل..دي زهرة السوسن....... ...قالت لي..."هوءئه...لا...لا سوسن ولا حاجة....... سميرة".........
سميرة دي ياها زاتا القبل كدا قلت لكم ناس اللجان قالو يرحلوها من الحلة......لانو بيتا ملاصق مدرسة الاولاد......انا سمعت الخبر وجيتا..وكنت زعلان جدا....وقلت ليها" شفتي الناس الحاقدين ديل بالله؟......قالو يرحلوكي من الحلة...... خايفين على الاولاد الفي المدرسة الجنبك دي......."..قالت لي" هم ظااااااااطم...ما يرحلّو مدرستهم".....صراحة زاد اعجابي بيها.... وبي وعيها بحقوقها الدستورية...في السكن والإقامة....وحرية الرأي والتعبير...............
|
Post: #2
Title: Re: ونســــة.... في بيـت... العــرقــي
Author: محمد الامين احمد
Date: 05-13-2005, 11:46 AM
Parent: #1
سجيمان
تحية طيبة
احيك اولا على الطرح و اسلوبه، و مثل هذه القصص نأخذ منها عظة عدم التسرع فى اخذ القرارت.
طيب المسكينة دى عرفنا اسبابها، اهه راوى القصه اسبابو شنو ؟ 
و شكرا
|
Post: #5
Title: Re: ونســــة.... في بيـت... العــرقــي
Author: هشام مدنى
Date: 05-13-2005, 04:07 PM
Parent: #3
العزيز د.سجيمان
عاطر التحايا
مشكلتنا اليومين دى النقل والروابط والموصلات وزارة جديدة
اها اعمل حسابك منهم
قصرت معاك.
|
Post: #18
Title: Re: ونســــة.... في بيـت... العــرقــي
Author: سجيمان
Date: 05-15-2005, 02:57 PM
Parent: #5
هشام مدني
Quote: اها اعمل حسابك منهم
قصرت معاك. |
انت اصلك ما قاعد تقصر ياهشام... يقصر الملح
|
Post: #15
Title: Re: ونســــة.... في بيـت... العــرقــي
Author: سجيمان
Date: 05-15-2005, 02:21 AM
Parent: #3
سجيمان
| Quote: وعليكم الله بالمرة اقرو دا:- |
قريناهو يا سجيمان..... يا مبدع
شفتو جنس اللايقة دي؟
|
Post: #13
Title: Re: ونســــة.... في بيـت... العــرقــي
Author: سجيمان
Date: 05-14-2005, 02:01 PM
Parent: #2
محمد الامين احمد
| Quote: مثل هذه القصص نأخذ منها عظة عدم التسرع فى اخذ القرارت |
العظة.... بعد ما يكون الضحايا ملو البلد....
|
Post: #4
Title: Re: ونســــة.... في بيـت... العــرقــي
Author: تولوس
Date: 05-13-2005, 04:00 PM
Parent: #1
سجيمان ازيك ياخوي وكيفنك ....يازوول عرقي العيش ما محتاج لي حجارة بطارية براهو سم هاري
|
Post: #19
Title: Re: ونســــة.... في بيـت... العــرقــي
Author: سجيمان
Date: 05-15-2005, 06:05 PM
Parent: #4
| Quote: سجيمان ازيك ياخوي وكيفنك ....يازوول عرقي العيش ما محتاج لي حجارة بطارية براهو سم هاري |
تولوس..ازيك....وبركة الشوفه
يا اخوي دا عرقي بلح......بنحب من بلدنا
|
Post: #6
Title: Re: ونســــة.... في بيـت... العــرقــي
Author: Mohamed Elbashir
Date: 05-13-2005, 06:11 PM
Parent: #1
سلام أخونا الدكتور عادل
| Quote: زعلانات وحردانات من بعض |
دايرين زيهم هنا
ذكرت جماعـه أخوانا أيام المعّديه
تحياتي وودي
محمد علي
|
Post: #21
Title: Re: ونســــة.... في بيـت... العــرقــي
Author: سجيمان
Date: 05-16-2005, 04:08 AM
Parent: #6
محمد البشير
هنا وين؟..............اوعك المنبر الاكان حر..... وحسي بي سديرو عام...وقلع؟
|
Post: #7
Title: Re: ونســــة.... في بيـت... العــرقــي
Author: abas
Date: 05-14-2005, 01:03 AM
Parent: #1
ويجي يقيف جنب كرعي ...... ويقعد يبول
تستاهل البوديك بيت العرقي شنو
|
Post: #29
Title: Re: ونســــة.... في بيـت... العــرقــي
Author: سجيمان
Date: 05-17-2005, 01:01 AM
Parent: #7
عبس
| Quote: تستاهل البوديك بيت العرقي شنو |
بمشي عشان يبول الشافع دا جنب كرعي وارجع اهلي.........
|
Post: #8
Title: Re: ونســــة.... في بيـت... العــرقــي
Author: willeim andrea
Date: 05-14-2005, 02:15 AM
Parent: #1
| Quote: الشافع الوسطاني حاقر بي حقارة شديدة.... اول ما ادخل واقيف وانا منتظر امو تديني الكوتة... يصحا من نومو...ويجي يقيف جنب كرعي ...... ويقعد يبول........موقت ساعتو البايلوجية علي مواعيد جيتي. |
ياحليل الذي مضي.... يا دكتورنا الظريف انته متاكد انو ده ما الشي النايم بره قام وعمل عمايله والحكايه بس مشكله في الاضاءه الضعيفه والتموت تخلي اللابسه ... اخ ..... يا مصاريني
|
Post: #9
Title: Re: ونســــة.... في بيـت... العــرقــي
Author: ابو جهينة
Date: 05-14-2005, 02:39 AM
Parent: #8
سي جي العزيز
| Quote: يصحا من نومو...ويجي يقيف جنب كرعي ...... ويقعد يبول........موقت ساعتو البايلوجية علي مواعيد جيتي |
ذكرتني قصة عم السيد في عطبرة ..
كان يمشي يسكر في بار تساكوتلس شري أبو رحط لغاية ما يقيف سلك.. و يحبس بولو لغاية ما يدخل الزقاق بتاعهم ..
بعد دة يبدأ يكتب إسمو بالبول ..
يوم كتب إسمو لكن البول ما كفاهو يتم الإسم .. قام نادى جارو المسطول : يا عبدو تعال كمل لى إسمي دة عشان بولي كمل.
رد عليهو عبدو المسطول :
أنا خطي بطال. 
|
Post: #24
Title: Re: ونســــة.... في بيـت... العــرقــي
Author: سجيمان
Date: 05-16-2005, 11:22 AM
Parent: #9
الحبيب
ابو جهينة
| Quote: يوم كتب إسمو لكن البول ما كفاهو يتم الإسم .. |
هو زولك دا في داعي يكتب اسمو تلاتي؟......... اصلو عندو امضاء معتمدة في بنك السودان؟..... ما يكتب اسمو الاول وخلاص
|
Post: #10
Title: Re: ونســــة.... في بيـت... العــرقــي
Author: willeim andrea
Date: 05-14-2005, 03:12 AM
Parent: #1
ابوجهينه الحبيب ازيك يا راجل.... بس دي قووووووووووويه شديد ........ اخ يا مصاريني
|
Post: #11
Title: Re: ونســــة.... في بيـت... العــرقــي
Author: ابو جهينة
Date: 05-14-2005, 03:37 AM
Parent: #10
وليم أندريه
الشوق محيط ..
إنت الوينك ؟ بالجد مشتاقين ليك يا رجل يا زين )
|
Post: #12
Title: Re: ونســــة.... في بيـت... العــرقــي
Author: صديق الموج
Date: 05-14-2005, 04:59 AM
Parent: #1
| Quote: سميرة.....دا الاسم العرفتها بيهو....اسمها الأول ما بعرفو......مربوعة....طواالي تقبل علي اليمين وتبصق.....كنت احترمها جدا.... لانها ما تغش في العرقي......لا حجار بطارية...ولا نيم..ولا بنج حصين.....تديك ليهو عرقي صااااااافي...... |
يخسسسسسسسسسسسسسسسسسسسسسسسى كلام قلة ادب عشان كدة انا لابتداخل ولا حاجتين
ولا بقول ليك ما كان بتديك كاس الضواقة ولابسألك كنت بتجيب الفاضى معاك والا
بدوك فى كيس ولا بقول ليك ما بتدين وتشخت فى الحيطة ولابعرف حاجات زى ده
تانى يخسى،،،،،
|
Post: #14
Title: Re: ونســــة.... في بيـت... العــرقــي
Author: ود شندي
Date: 05-15-2005, 02:16 AM
Parent: #12
C-G-Me
ود سميره قال
| Quote: الشافع الوسطاني حاقر بي حقارة شديدة.... اول ما ادخل واقيف وانا منتظر امو تديني الكوتة... يصحا من نومو...ويجي يقيف جنب كرعي ...... ويقعد يبول........ |
هاك البايولوجيه دي
|
Post: #31
Title: Re: ونســــة.... في بيـت... العــرقــي
Author: سجيمان
Date: 05-17-2005, 10:08 AM
Parent: #14
ود شندي..... دا من حسي ببول كدي.... لما يكبر حيسوي شنو؟
|
Post: #30
Title: Re: ونســــة.... في بيـت... العــرقــي
Author: سجيمان
Date: 05-17-2005, 04:40 AM
Parent: #12
صديق الموج
| Quote: ولا بقول ليك ما بتدين وتشخت فى الحيط |
انا ادين؟؟؟؟... انت قايلني زيك.....
اعط الاجير حقه قبل ان يجف عرقه
|
Post: #16
Title: Re: ونســــة.... في بيـت... العــرقــي
Author: bushra suleiman
Date: 05-15-2005, 03:08 AM
Parent: #1
ياسى جى..احسن عرقى سميره واللا شمبانية هيفاء القاعده ترش بيهاالناس؟؟
|
Post: #32
Title: Re: ونســــة.... في بيـت... العــرقــي
Author: سجيمان
Date: 05-17-2005, 11:48 AM
Parent: #16
| Quote: ياسى جى..احسن عرقى سميره واللا شمبانية هيفاء القاعده ترش بيهاالناس؟؟ |
يا بشرى..... انا خاسة نفسي.... اخير لي عرقي سميرة....قبل التوبة طبعا
|
Post: #17
Title: Re: ونســــة.... في بيـت... العــرقــي
Author: Khaalaleyaal
Date: 05-15-2005, 03:21 AM
Parent: #1
لكن يا ابو ساندرا دي بالغته فيها
اها صحبانا اتنين واقفين لمبه ورجعوا البيت لقو اهلو في بيت العرس
اها كاسوا حاجة يتعشوا بيها لقو في حلة كااااربة
امسك سخن واضربو الحلة
اشي مرة جداد واشي مرة فاصوليا واشي مره بامية المهم ما خلو حاجة وهاك يانومه
اها الحجة رجعت من بيت العرس ولقت الحلة الكانت خاتاها في المطبخ فاضية وقعدت تصرخ
يا فلان الاكل اكل الكلب منو
الجماعة ما نامو للصباح
|
Post: #20
Title: Re: ونســــة.... في بيـت... العــرقــي
Author: Abureesh
Date: 05-15-2005, 06:12 PM
Parent: #17
في خشم الباب في كلب ديمة راقد ..... يوم واحد ما سمعتو هو هو
يا سجيمـان،
كيف دايـر الكلب يهـو هـو، وهـو كل يوم ضـارب تسعين
|
Post: #22
Title: Re: ونســــة.... في بيـت... العــرقــي
Author: tmbis
Date: 05-16-2005, 04:17 AM
Parent: #20
يا دكتور ...
انت البوديك هناك شنو ؟؟
ده السؤال المحيرني
|
Post: #23
Title: Re: ونســــة.... في بيـت... العــرقــي
Author: garjah
Date: 05-16-2005, 09:01 AM
Parent: #22
سجومي الحلو
حسن وحسين اولاد محس شغالين في الرياض كل يوم الحبشي بتاع المرسيدس يجيب ليهم العرقي
مشو اجازة السودان حسن طلع يجيب العرقي لمو فيهو ناس الامن الشامل ودوهو سجنوهو
تاني يوم حسين مشى يزورو في السجن
قبل ما يسلم عليهو رفع يدينو محتج يعني
- ده سنو السويتو ده يا مطرطش انت قايل نفسك في السعودية والا ايه ؟
اسمعني الحبشي حقك كيف برضو مكندش وسايق مرسيدس ؟
|
Post: #25
Title: Re: ونســــة.... في بيـت... العــرقــي
Author: عماد شمت
Date: 05-16-2005, 01:25 PM
Parent: #23
البهجه والسرور يديك العافيه يا سجي
بس الكلب ده اظنه بطشم بالريحه كل يوم وبقي مدمن اخير من كلب
السره ...........
تحياتي لك
|
Post: #26
Title: Re: ونســــة.... في بيـت... العــرقــي
Author: نادية عثمان
Date: 05-16-2005, 05:14 PM
Parent: #25
سجيمان
عشان تشوفنى بعزك كيف !!!
|
Post: #27
Title: Re: ونســــة.... في بيـت... العــرقــي
Author: حسام يوسف
Date: 05-16-2005, 05:43 PM
Parent: #26
| Quote: .... وبي وعيها بحقوقها الدستورية... |
واللـــــــــــــه يا ســـجيمان حلوه وملعوبه صاح
|
Post: #28
Title: Re: ونســــة.... في بيـت... العــرقــي
Author: Yassir Hamid
Date: 05-17-2005, 00:08 AM
Parent: #27
اللذيذ سيجمان
أزيك ..
أهو أنت جبت الطشمة .. حقو بعد ده تورينا القعدة كانت كيف .. وفيها كم مولعاتي* .. وبمناسبة المولعاتية صدر عن طشمان المولعاتي ود بيت المال كتاب مؤخراً تحت أسم آدب المولعاتية .. أعدك بأن أبرز جزء منه في هذا البوست بس لحقنا القعدة ومنو السوى الحلة
سلام
ياسر
* المولعاتي : الما دافع الشير بتاعو.
|
Post: #40
Title: Re: ونســــة.... في بيـت... العــرقــي
Author: سجيمان
Date: 05-19-2005, 03:37 AM
Parent: #28
ياسر حامد
| Quote: المولعاتي : الما دافع الشير بتاعو. |
و في رواية اخرى اسمو..فانوس
|
Post: #39
Title: Re: ونســــة.... في بيـت... العــرقــي
Author: سجيمان
Date: 05-19-2005, 03:18 AM
Parent: #27
خسام يوسف
| Quote: واللـــــــــــــه يا ســـجيمان حلوه وملعوبه صاح |
منو؟..... سميرة؟
|
Post: #37
Title: Re: ونســــة.... في بيـت... العــرقــي
Author: سجيمان
Date: 05-18-2005, 01:56 AM
Parent: #26
نادية
| Quote: عشان تشوفنى بعزك كيف !!! |
شفتو النعمة دي؟؟؟؟؟؟
|
Post: #38
Title: Re: ونســــة.... في بيـت... العــرقــي
Author: سجيمان
Date: 05-18-2005, 09:25 PM
Parent: #25
عماد شمت
Quote: بس الكلب ده اظنه بطشم بالريحه كل يوم وبقي مدمن اخير من كلب
السره |
كلب السرة... جنصيّص...وحبيّب
|
Post: #36
Title: Re: ونســــة.... في بيـت... العــرقــي
Author: سجيمان
Date: 05-18-2005, 00:51 AM
Parent: #23
قرجة
| Quote: ده سنو السويتو ده يا مطرطش انت قايل نفسك في السعودية والا ايه ؟ |
حلوووووووووووووووووووووة.....حلوة
|
Post: #35
Title: Re: ونســــة.... في بيـت... العــرقــي
Author: سجيمان
Date: 05-17-2005, 09:00 PM
Parent: #22
مين تمبس؟....في احد بوستاتي.. الحارة...يا مرحبا مرحبا
الجابك يجيب معتصم دفع الله... لكن اشوفو هناااااك.... في بوست ود اب قناية
| Quote: انت البوديك هناك شنو ؟؟ |
بمشي قلت لك.... عشان الشافع دا يبول جنب كرعي وارجع اهلي.... لانو لو ما جيت ما حيبول
|
Post: #34
Title: Re: ونســــة.... في بيـت... العــرقــي
Author: سجيمان
Date: 05-17-2005, 03:45 PM
Parent: #20
ابو الريش
| Quote: كيف دايـر الكلب يهـو هـو، وهـو كل يوم ضـارب تسعين |
يا زول ها... هو فايق لو... غلي اليمين تجي بعد الساعة تسعة ما تلقى سي سي
|
Post: #33
Title: Re: ونســــة.... في بيـت... العــرقــي
Author: سجيمان
Date: 05-17-2005, 03:07 PM
Parent: #17
خال العيال
Quote: يا فلان الاكل اكل الكلب منو
الجماعة ما نامو للصباح |
كانو ينومو في نومهم..مش اكلوهو وخلاص؟
|
Post: #41
Title: Re: ونســــة.... في بيـت... العــرقــي
Author: بلدى يا حبوب
Date: 05-19-2005, 04:52 AM
Parent: #1
سيجمان
بصراحة كنا نتأخر فى الدخول للبوست لمن الشمس تغيب
تحياتى
|
Post: #42
Title: Re: ونســــة.... في بيـت... العــرقــي
Author: سجيمان
Date: 05-19-2005, 05:13 AM
Parent: #41
بلدي يا حبوب
| Quote: بصراحة كنا نتأخر فى الدخول للبوست لمن الشمس تغيب |
خلاص ما مشكلة... نحجز ليك نص
|
Post: #43
Title: Re: ونســــة.... في بيـت... العــرقــي
Author: سجيمان
Date: 05-19-2005, 12:45 PM
Parent: #42
اخر... كاس عشان الارشفة
|
|