Post: #1
Title: جـــــدي العــزاز.... الضنبــو هــزاز
Author: سجيمان
Date: 01-02-2004, 07:47 AM
عام 2003... بدايته
السفارة السودانية الرياض
دخلت السفارة....زحمة...ناس فوق بعض....قلت يا ربي السفارة حولوها لي دلالة؟...... قلت مالي ومال الصف...وانا لابس فل سوت..... دخلت علي القنصل.... بعد ما اقنعت الغفير اب قدوم الواقف في خشم الباب ... انو القنصل ود خالتي لزم....قال لي لكن القنصل حسي مشغووووووووووول وما فاضي لك..... قلت لو يا زول هوي انت كدي بتعمل على قطع الرحم.... وبعدين بيدخلوك النار..... قال لي ادخل..... دخلت..... فعلا لقيت القنصل مسكين مشغول....مشغولية شديدة....تنيت رقبتي... وحقبت ايدي في بعضن....رسمت علي وشي علامة الذلة والمسكنة.....ودي علامة انا اتدربت عليها زمااااااان في البلد دي.. لانها بتخدم كتير...سلمت على سعادته.... ما رد عليّ.... مشغول... عيونو ما رفعن من جهاز الكمبيوتر....تاني سلمت..... عاين لي بطرف عيونو..... قال لي اها داير شنو؟..... قلت لو يا شيخنا.... كدي رد السلام.... نهرني لمن الله بيسعالني خفت تقع من بين كرعي حاجة مهمة... وبعدين ابقى في اللقيط ولاّ ارجع اهلي اباطي والنجم.... انت ما شايفني مشغول؟.... وحسي لخبطت علي الرصة كلها.... الله يلخبطتك اكتر ما انت ملخبط.... عاينت لي شاشة الكمبيوتر لقيتو راصي كشتينة...وقاعد يلعب سليوتير.... اعتذرت وقلت لو يا شيخنا ..... انا دايرك .... تنقص لي الضريبة ولاّ تعفيني منها....كورك .... للغفير وقالو مش قلت لكم جنس دا ما يدخل علي؟....نادي فلان.....وفلان دا نائب القنصل...... فلان جاء...وانا في وقفتي ديك....ولسه تاني رقبتي.... ومتمسكن..... قال لو... شوف الشي دا ضريبتو كم؟..... ودفعوها ليهو كلها.... ودفعوهو تاني باثر مستقبلي...... يعني اسعالو ناوي يقعد كم سنة في السعودية..و خليهو يدفع مقدم..... ولاّ ما تضيف ليهو الشافعة الداير يضيفا دي..... عاين لي وقال تعرفو تلدو بس.... وحق الدولة ما بتعرفو تدفعوهو.....
عام 2003...منتصف العام
مكان العمل
صلينا المغرب......... ورا كفيلنا.....ولازم هو يكون الامام....يعني لازم هو يكون قدامنا في أي حاجة.... يمشي قدامنا.... ينضم قدامنا.....وان جاتك عطسة وهو جاتو عطسة.... تصبر لحدي ما يعطس هو... وبعدين انت تعطس وراهو.... حتى الحنحين.... يحنحن هو وانت وراهو...ويا وليك وسواد ليلك ان عطست ولاّ حنحنت قبل ما هو يعطس ولاّ يحنحن..... علي شقاوتي اليوم داك..... الزول صلى بينا المغرب.... وغلط في تلاوة السورة الوحيدة الانا حافضا.... اها تعال انت يا سجيمان الشليق.... قول لو سبحان الله عشان يصلح.... قام قلااها تاني وتاني غلط..... قمت انا صلحتو المرة دي..... انتهت الصلاة.... برك في المصلاية وقابلني.... وقال لي يعني انت حسي مسوي نفسك فاهم...وقايل نفسك بتفهم اكتر مني؟......وبتعرف احسن مني؟....قدامك ساعتين..... تسوي لي حسابات المؤسسة من انشاءاها.. لي حسي.......... وان ما سويتا تمشي اهلك وما اشوفك تاني....... المؤسسة ليها عشرين سنة من سواها.....ودايرني اسوي الميزانية والحسابات بتاعتها في ساعتين ...براحة نفطت صلبي....ودخلت في شبشبي ومشيت اهلي.......والمشية الياها
عام2003 ... نهاية العام
السفارة الامريكية
قلت انا اكوس لي اكل عيش في بلد تانية.... خلاص.... فكرت في امريكا.... مشيت السفارة الامريكية عشان اسعال....واقدم للسفر..... كنت عيان... لكن اكل العيش جبار.... كان قايم لي حبن....ومخليني امشي.... مشتّح... وانا ماشي مشيتي دي علي باب السفارة.... يلمو فيني اتنين... الواحد قدر... الباب...ويطبوني بينهم....ويدخلوني جوا....ويجو اتنين تاني شايلين... رشاشات.... و يملصوني عريان.... ودربهم عديل علي بكان الحبن..... وانا اكورك.... يا اخوانا دا حبن....وحات الله حبن...هم اتاريهم كانو قايلونو قنبلة... وقايلني انا جاي افجر نفسي جوا السفارة....بعدين لبسوني هدومي...وحمدت ربي انهم.... ما قعدو يفتشو جو هناااااااااااااك.... وصراحة خفت لما شفت واحد فيهم لبس جونتيات في ايدو....وما دخلني شك انو انا اتفتشت ... واتسجمت واترمدت....لكن بعدين غير رايو.... بعد ما انا قريت في سري
وجعلنا من بين أيديهـم سـدا ومن خلفهـم ســدا فأغشيناهـم فهم لا يبصـرون
.... يكون خلي بالكم ما شاف بكان يدخل ايدو...
دخلوني صالة كبيرة..... فيها رجال ... ونسوان.... قعدوني وجابو مترجم.....وهاك يا اسعلة.... داير شنو؟
داير اسافر امريكا
بتعرف منو هناك؟
بعرف كلبة السيد الرئيس بوش
علاقتك بيها شنو؟
ابدا والله..... حب... لوجه الله تعالي
اتعرفت عليها كيف؟
ابدا... بس شفتها في التلفزيون....وحبيتا....وبقيت لما اشوفا...اعرق من راسي لي كرعي...ودقات قلبي تزيد...وصوتي يتغير... ويغلبني النضم....واقعد اهو هِو.... هوهوهو......ولما الحب يزيد شديد قاعد يقوم لي ضنب...وانا عارف يا اخونا اني ما بقدر اناسبكم واطلب ايدا..... شن جاب ابدردوق للقمرا؟..... علا بس شوف العين يزيل المي.......
|
Post: #2
Title: Re: جـــــدي العــزاز.... الضنبــو هــزاز
Author: HOPEFUL
Date: 01-02-2004, 08:03 AM
Parent: #1
عام سعيد وحافل بالمفاجأت
بس الحمد لله انك ما فجرت نفسك .. دي قنبله "الحبن" تخلي الدم للركب
اتمني تكون 2004 اخف قدراً
تلاقي السفير بيلعب - الخليه الحره
والكفيل يقرأ سراً كل الصلوات
والسفاره يموت فيها كلب الرئيس ويعفن في بطنه وتبقي طارده , والطلبات ترميها من بعيد لبعيد . وبكدا زول بيسعلك مافي
كل عام وانت بخير
يا ارهابي
|
Post: #3
Title: Re: جـــــدي العــزاز.... الضنبــو هــزاز
Author: ترهاقا
Date: 01-02-2004, 08:21 AM
Parent: #2
د: سجيمان
كل عام وانت بخير
بركة اللى ما فتشوك بى كلبهم المفتل داك ،والله كان كلكلك كلكلة
لمن حبنك يطرشق ، ويمكن كنت حتفقد ممتلكات عزيزة بحجة إنها قنبلة
وربك ستر يا راجل
|
Post: #4
Title: Re: جـــــدي العــزاز.... الضنبــو هــزاز
Author: ASAAD IBRAHIM
Date: 01-02-2004, 08:35 AM
Parent: #3
الاخ سجيمان
بالله يا راجل طلعت محاسب وانا اقول سجيمان دة مالو بهلوس طوالي كدة
زملاء مهنة يا اخو بس انا بهلوس وانا نائم
مع حبي
|
Post: #8
Title: Re: جـــــدي العــزاز.... الضنبــو هــزاز
Author: سجيمان
Date: 01-02-2004, 06:09 PM
Parent: #4
والله يا اسعد انا لا محاسب ولا حاجة.......... علا بس حقارة كفلا
|
Post: #6
Title: Re: جـــــدي العــزاز.... الضنبــو هــزاز
Author: سجيمان
Date: 01-02-2004, 01:05 PM
Parent: #3
ترهاقا
كل سنة وانت طيب
كلامك صح..........والغريبة لو كان الكلب مجكس كلبة بوش.....وعرف انو انا متيم بها...عين ما تشوف الا النور
|
Post: #5
Title: Re: جـــــدي العــزاز.... الضنبــو هــزاز
Author: سجيمان
Date: 01-02-2004, 09:02 AM
Parent: #2
هوبفل
كل سنة وانت طيب
مالك يا زول كاتل كلبة السيد الرئيس....دي املي الوحيد في اني اسافر امريكا
|
Post: #7
Title: Re: جـــــدي العــزاز.... الضنبــو هــزاز
Author: Abureesh
Date: 01-02-2004, 01:20 PM
Parent: #5
بســم الله الرحمن الرحيــم
وجعلنا من بين أيديهـم سـدا ومن خلفهـم ســدا فأغشيناهـم فهم لا يبصـرون
صدق الله العظيم
|
Post: #9
Title: Re: جـــــدي العــزاز.... الضنبــو هــزاز
Author: خالد الحاج
Date: 01-02-2004, 06:25 PM
Parent: #7
سجيمان ..
علك طيب..وربنا يحقق أمنياتك...
وكفارة الجاتك في حبنك سامحتك..
وأحمد الله إنو ما كان عندك برومبوفي (أب عديلات للمستشرقين)
كان رسلوك كوبا..ونصيحتي ليك الكفيل خلو قدام واقرا إنت..
|
Post: #11
Title: Re: جـــــدي العــزاز.... الضنبــو هــزاز
Author: سجيمان
Date: 01-03-2004, 09:20 AM
Parent: #9
خالد..........قلت لي اقرا انا؟ انا زاتو تاني صلاة الجماعة خليتا لمن ارجع اهلي
|
Post: #10
Title: Re: جـــــدي العــزاز.... الضنبــو هــزاز
Author: سجيمان
Date: 01-02-2004, 08:02 PM
Parent: #7
ابو الريش
شكرا وجزاك الله خير
قمت بتعديل الاية
|
Post: #12
Title: Re: جـــــدي العــزاز.... الضنبــو هــزاز
Author: nazar hussien
Date: 01-03-2004, 11:22 AM
Parent: #10
يا دكتور
كل سنةوانت طيب..وانشاء الله السنة الجاية تكبر وتبقي كفيل بي فل سوت
|
Post: #13
Title: Re: جـــــدي العــزاز.... الضنبــو هــزاز
Author: سجيمان
Date: 01-03-2004, 04:07 PM
Parent: #12
نزار وانت طيب
ان شاء الله من خشمك لله
واي زول زعلان منو اجيبو واكفلو...واوريهو الويل وسهر الليل
|
Post: #14
Title: Re: جـــــدي العــزاز.... الضنبــو هــزاز
Author: Osman Hamad
Date: 01-03-2004, 04:10 PM
Parent: #1
دا ياسجيمان حالتو ضنبو هزاز....ولو كان قزاز كان ح يكون كيف!!!
|
Post: #15
Title: Re: جـــــدي العــزاز.... الضنبــو هــزاز
Author: سجيمان
Date: 01-04-2004, 03:52 PM
Parent: #14
عثمان
يا اخوي نحن بي ضنبو الهزاز دا لامين فيهو
|
Post: #16
Title: Re: جـــــدي العــزاز.... الضنبــو هــزاز
Author: HOPEFUL
Date: 01-18-2004, 06:01 AM
Parent: #15
*
|
Post: #17
Title: Re: جـــــدي العــزاز.... الضنبــو هــزاز
Author: khider
Date: 04-20-2004, 11:08 PM
Parent: #1
up
|
Post: #18
Title: Re: جـــــدي العــزاز.... الضنبــو هــزاز
Author: Raja
Date: 04-21-2004, 01:00 AM
Parent: #17
|
Post: #19
Title: Re: جـــــدي العــزاز.... الضنبــو هــزاز
Author: Elnasri Amin
Date: 04-21-2004, 05:56 AM
Parent: #1
وليه الحقارة دى ياسجيمان؟
كندا كان احسن ليك من الامريكان المعقدين ديل
تعال لينا هنا و اذا القنصل سالك ماشى كندا لشنو,قول ليهو ماشى العب هوكى مع فريق تورنتو,برضو قول ليهو هوايتك المفضله التزحلق على الجليد
النصرى
|
Post: #20
Title: Re: جـــــدي العــزاز.... الضنبــو هــزاز
Author: سجيمان
Date: 04-21-2004, 08:15 AM
Parent: #19
النصري
| Quote: كندا كان احسن ليك من الامريكان المعقدين ديل |
اسكت ساكت ناس كندا قصتي معاهم قصة...والله جد..وخاصة ناس السفارة هنا....وعندهم واحدة سودانية....وقت قسمو الضحك للناس هي جات لقتو كمل...
|
Post: #21
Title: Re: جـــــدي العــزاز.... الضنبــو هــزاز
Author: Elnasri Amin
Date: 04-21-2004, 04:10 PM
Parent: #1
اوع تكون البت دى امن سفاره يا سجيمان
قول ليها خلى المساخه و عيب عليك فهى تمثل شعب راقى و مهذب
شعب بيقول شكرا لماكينه سحب الاموالCash Machine
الظاهر عليها ما عاشت فى كندا كتير و ما بتعرف
حاجه اسمها Customer Service
النصرى
|
Post: #22
Title: Re: جـــــدي العــزاز.... الضنبــو هــزاز
Author: سجيمان
Date: 04-21-2004, 04:31 PM
Parent: #21
النصري
قاعدة تضحك علا وقت شافتني انا.... قلبت وشيها...وكفكفت ايديها....وغيرت مشيتا اضانك طرشا
|
Post: #23
Title: Re: جـــــدي العــزاز.... الضنبــو هــزاز
Author: omer almahi
Date: 04-21-2004, 05:20 PM
Parent: #1
ولا يهمك يا سجيمان .بكرة البترول يطلع عندنا وتعم الديمقراطية.والرفاهية ويجى أمريكى يحب كلبت رئيسنا
|
Post: #24
Title: Re: جـــــدي العــزاز.... الضنبــو هــزاز
Author: سجيمان
Date: 04-21-2004, 08:50 PM
Parent: #23
عمر الماحي
| Quote: ولا يهمك يا سجيمان .بكرة البترول يطلع عندنا وتعم الديمقراطية.والرفاهية ويجى أمريكى يحب كلبت رئيسنا |
يسمع منك ربي
|
|