المـــرواد فـي المكحلــــة

عباس ود امحمد ود خبير....راجل طيب ويا الله يفك الخط... و شوية فيهو الدروشه....جاني وشايل هموم الدنيا كلها.....قال لي:-

يا سجيمان اخوي... انا والمرا دي ...مرتي فاطنة الما بتغباها...دي.... طلعت بظبورطاتنا.. في يوم واااااااااحد....وجينا البلد دي.... اتاريهم يا سجيمان اخوي..... كاتبين في بكان الاسم في البظبورطي حقي... كاتبين مهنة...فاطنة.....ربة منزل..... يعني انا اسمي في البظبورطي حقي ربة منزل.....وكاتبين بكان الاسم حق فاطنة كاتبين اسمي انا....عباس ود امحمد ود خبير. والصورة صورة فاطنة بت على ود خبير... شوفت جنس القولاب دا؟.... اها يا سيد اللمنتي لك.... مشيت السفارة وقلت اصلح الشي ديل..... مشيت لموظف كدي... وحدستو بالنضم كلو... باللوال البظبورطي حقي... قال لي تمشي تدفع رسوم تغير اسم... قلت لو سمح... سعالني الاسم دا ليهو كم في البظبورطي دا... قلت لو ليهو سنة كاملة..... قال لي يعني حال عليهو الحول؟.... خلاص تمشي تدفع زكاة اسم برضو..... مشيت دفعتهن كلهن وجيتو تاني.... والله يا سجيمان الولد ماشاء الله عليهو نجيض جنس نجاض.... ومتعلم جنس تعليم ... الله يحفضو بس. لا سعلني لا نضم معاي... الولد بي طرف القلم يشطب التاء المربوطة.... ويعاين لي ويضحك ويقول لي... انا ما عارف الزول الكتب الاسم دا قاري وين؟... انت ضكر مفروض اسمك يكون رب منزل....مش ربة منزل؟ انتاية كمان......؟.......
اها يا سجيمان انتهينا من البظبورطي الِليلي..... جينا في بظبورطي فاطنة بت علي عمي...... قال لي لازمن المرا دي تجي تحلف انو دا ما الاسم حقها ....قلت لو يا ولدي المرا حسي والدة يا دوب لها اسبوع.... قال لي خلاص عشان انا اسهل عليك... وما اتعبك.... تجيب لي اربعة شهود عدول يكونو شافو المرواد في المكحلة....دا حين انا جيتك يا سجيمان اخوي وداير معاك تاني تلاتة ... تمشو تحلفو على انكم شفتو المرواد في المكحلة... عشان نغير اسم المرا دي.........

عباس وقت انتهى من نضمو دا... انا درت الواطا دي تتفتح و تبلعني....وشعّرت جلدي كلبّت...وتاني كدسّت..وتاني كلبّت....وقلت لو.... يا عباس كدي انت امشي لو باكر تاني .... قولو انا بجيب لك اربعة شهود يكونو شافو المرواد بس.... المكحلة دي يا عباس اخوي شوفتا صعيييييييييييييييبة وقاااااااسية.....ان عصلج عليك ادخل علي القنصل واقع لو في واطة الله دي واشحدو يأجل لك المكحلة للسنة الجاية وحسي يقبل بي شوفة المرواد....بي يقبل... باقي هو راجل طيب وعديِّل...ولي السنة الجاية يا عباس اخوي لها مية فرج... يمكن المكحلة تقع من نصيب ناس قرنق في التقسيم البي يقسمو فيهو دا...ونكون ارتحنا وريحتنا..........لكن عليك الله يا عباس اخوي وخسمتك بالذي خلقك... ما تمشي البلد وتتربع في نص العنقريب....وتقول للناس .... ناس سجيمان شافو المرواد... النضم دا بي يدخلنا في لوم وشكر..ويسوينا في شيل حال.....

يا زول صاحبك ده يحمد الله انو ما قالوا ليهو
هات تصريح من امريكا

سي جي ( و بإلحاح أقول الجميل )
و الله يا سجيمان ضحكت كما لم أضحك منذ فترة طويلة.

بعدين يا سي جي ، أنتو مالكم و مال المكحلة ، كفاكم المرواد و الكحل. ( و الكحل هنا الوليدات عشان ظنك ما يروح بعيد ).

لا أراكم الله غلطا في بظبورطا لديكم ، و حفظ بظبورطات كل المغتربين و المغتربات ، أرباب البيوت منهم و ربات البيوتات.

العزيز سى جى

ربنا يحفض بظبورتك وبظبورطاتنا من كل شر قول آمين

وان شاء الله يا ابو جهينة يحفض بظبورطيك... انت برضو......وربنا ما يحوجك لي حليفة....ولا كضب عشان تجددو بركة من صلى وقال يا الله

بالله هم بيقولو كدا يا ابو الزفت.......؟............... كان كدي زولي دا يحمد ربو ويسكت سااااااااااااكت

كويس يا سجيمان القال ليك مرواد .....

لو كان قال ليك "مراويد" كان تعمل شنو !!!!!!!!

ملاسى

والله ياهو يا قولك.... يا حسين....غايتو علا يحدس الناس وكل زول يكون دايرنا نشهد

هووووووى يا ملاسي
حركات شفوت الخرطوم دى انا بعرفا...ما تقول على اقليمى و تقعد تلولو فى الكلام..سجيمان قال مرواد واحد بس انت تقعد تزيد فوقم,هسه الدخل اسمى هنا شنو؟
بعدين هم مرواد واحد ومكحله واحده ما قادرين عليها, اها اكان بقوا مراويد ومكاحل امانه ما دوبه هاصت,ده يبقى ..... جماعى على وزن الزواج الجماعى
غايتو يا السجمان...كان احتجت مساعده انا تحت الخدمه المراويد منى...بس ابعد لينا المسيخيت ودملاسي من الشغله,شفتوشال حس دفع الله الexhibitionist كيف؟؟

مراويد


مالو اسمك.........عامل زي الخُلال؟

الدكتور سجيمان


عباس خلو لكن اللمنتي دي في ناس ما بيفهموها ليك بالله عليك نكتها من وين

عباس......... اللمنتي دي..من برنامج اسماء في حياتنا

الاخ العزيز الدكتور ،،، سلام

صدر قرار من حاكم احد الدول العربية باعطاء مبلغ من المال فى حالة زواج المواطن من المواطنه. صادف زواج احد الاصدقاء وهو متجنس بجنسية هذا البلد صادف زواجه من بنت عمه (المتجنسة طبعا ) وجاء تنفيذ القرار فيهم بعد كتب الكتاب والدخلة والتنفيذ فى استلام المبالغ كان فىالمحكمة الشرعية وكنت حاضرا وطلبوا شهادتى وبالمناسبة القرار كان لسع جديد لنج يعنى ما اتطبق كفاية ( ودى للتعتر للجماعة ) المهم القاضى طلب شهود وانا كنت منهم قمت دخلت ليك عليه وبعد السلام حلفنى بانى اقول الحق وحلفت ، قام سألنى قال لى بتعرف الجماعة ديل قلت ليه اىىى بالحيل قال لى اتزوجوا قلت ليه اىىى وانا حاضر فى المسجد ، قال لى اختلى بيها ودخل عليها ؟!!!! قلت ليه اختلى بيها دى شفتها لانهم دخلوا غرفتهم لكن دخل عليها دى والله ما بقدر افتيك فيها ّّّ!!! قال لى طيب طيب اتوكل ، واتوكلت
الشى العرفناه بعد داك انه الجماعة قبضوا حق الدخول !!!
ده فى المحكمة الشرعية ومع قاضى .....

وتسلم

طارق
قبضو حق الدخول؟

دخلو لوج؟

طارق المحكمة دى وين...

سجيمان انت قديم يا خى ( من زمن اللوج والشعب ؟؟!!) شوف عينى اسع بقت كراسي بتنقلب سرير بعد بداية الفلم ... حتى السينمات بقت بتساعد وبتسهل ..

سنتمنتال
انت بتسأل عاوز المحكمة ولا القاضى او الدخول و لا القروش ؟
حدد !!!

طارق دا حالتو قبل السلام.......... بعد السلام حيسو شنو يا ربي؟....ديل يا حليلنا منهم