امـــام..... للايجــار

قريت اعلان في الجريدة....مطلوب امام مسجد خاص.....استعجبت في كلمة خاص دي....قلت يا ربي دا شنو دا ؟ حتى المساجد بقت خاصة وعامة؟....تاني اتذكرت انو الدنيا كلها ماشة في درب الخصصة......قدمت للوظيفة دي... اخدوني.... قبل بداية الشغل بكم يوم كدي..... حفضت لي شيتن ما جاتا عوجة من القران...ومشيت.... المسجد في بيت كبير.. والعائلة كبيرة ومرتاحة...... دخلت اول صلاة كانت صلاة المغرب....جو نفرين للصلاة.... سيد البيت ومعاهو ضيف... صليت بهم...وعشان استعرض عضلاتي ..قريت سورة الرحمن علي شقاوتي......اول ما انتهت الصلاة سيد البيت قال لي.. يا زول انت ظانيتك ما بتعرف للصلاة..؟...... شنو شابكنا تكذبان ما تكذبان وتكذبان..... شنو اللخبطة والصواطة دي؟...حقيقة انا اتسمرت في بكاني وما عرفت ارد اقول شنو.... شوية كدي جو اتنين تاني.... قالو لي يا شيخنا قوم صلي بي ديل..... قمت صليت بهم تاني..... ما سلمت من الصلاة عديل جا واحد تاني.... برضو قوم يا شيخنا صلي بي دا....بيني وبين نفسي قلت ديل ما دايرين لهم امام ديل دايرين لهم سواق تكسي ......
تاني يوم برضو اول صلاة.... جهر.... المغرب... لانو الصبح دا بعد مرات.... ما بلقى ولا زول..... وبيني وبينكم اخير...صليت بالجماعة وقريت .. برضو الايات القريتن ما عجبن سيد البيت....اها.. انا فكرت... اسوي لي لستة... بالايات... وقبل كل صلاة اسال سيد البيت ..... ويختار الايات الدايرين..... ويا دار ما دخلك شر...لقيت زولي الفكرة عجبتو....وبقيت اجي شايل المنيو بتاعي عند كل صلاة.. وهو يختار..وانا اقراهن ليهو......قوم تعال انت يا رمضان.... ويا التراويح..... سيد البيت باللوال كان بيصلي قاعد....عقبان فتر طب... قال لي يا شيخ سجيمان.... صلي التراويح لي ولك.... يعني انا ادبل صلاة التراويح...واحدة حقتي وواحدة حقتو... وعشان يتأكد اني ما غشيتو...خلى معاي واحد حارسني ويقعد يعد ويحسب في الركعات... عشان الاوفر تايم....ولازم في النية اسمعو...نويت ان اصلي للشيخ صالح صلاة التارويح...وكهذا...... قلبي اكلني من الشغلانة دي.... قلت الزول دا وقت بدا في اني اصلي بدلو..... خايفو رمضان الجاي يقول لي صوم بدلي وبدل ولادو وبدل امو وابوهو....والقى نفسي صايم ديمة....واورط نفسي في صيام لا ليهو اول ولا ليهو اخر....وقلت يا فكيك.........

سيجمان
قصتك دي زكرتني قصة الامام الجابه الجامع جديد وقالوا سيد الجامع دا كل اسبوع بغير الامام اها صاحبنا دا اول يوم ليه سال الناس الزول دا كل ما اجي امام بكب ليه الجاز وبشتته طوالي ليه؟ قالوا ليه ما داير امام بطول الخطبة
اها اول جمعة عمل الخطبة عشره كلمات بس واقام الصلاة سيد الجامع انبسط منه بسطه شديده
الجمعه التانية ليه طوالي وقف في المنبر وقال(( راجع خطبة الجمعه الماضيه)) واقام الصلاة طوالي

والله يا سيجمان تلقي ليك سيد جامع زي دا كان رطبت معاه

حبيب الكل

وين نلقاهو زي دا؟.......... زولي دا برضو كويس علا كترا خلاص......... التراويح اصلي بدلو..........عاد دا نضم دا؟

الكلام ده صحي ياسجيمان جد ؟!!!!!!!!!!!!!!!!!

يا نوف

الكلام دا ونسة ساكت....ما يقومو يدخلونا في سين وجيم

دكتور سجميان

قلت منيو للايات ؟ ابدعت فيها دي لوووووووول

يعني مسجد خاص طلع حسب الطلب . بس انشالله ادوك بدل ركعة وتراويح

سي جي مان

يا اخي دي ما قلبت فيها الهوبه ..
رمضان دا ما كان بيلتقك فيهو ؛
ما هو واضح بيصوم اجتماعيا - عشان الناس وقدامن -
لكن التراويح دي اهو شغلك ؛
انت قايل نفسك امام علي الفاضي ؟

عادل

عادل

يا اخوي... الصيام كان الواطا حارة....والله لا اجتماعيا لا سياسيا يينفع

ابدا وحاتك يا مايا..... خليت حسابي ليوم الحساب

سي جـو
الفرائض هيــنه..الكلام...
السـنــن......
و قـيام الليـــــل....

سي جي العزيز

في قرية ( من عندينا ) ،، تم بناء مسجد ضخم بالقرب من المسجد القديم ، و في أول صلاة جمعة ، و بعد الصلاة جلسوا يتفاكرون في مصير المسجد القديم.
واحد كان ( مسطول حبتين ، قاعد في الخلف قال : يا مولانا ،، القديم دة خلوه للنسوان و أنا حأكون الإمام حقهم.

ياهو زاتوووووووو
يا سجمان الرمدان
أنت عارف زولك دا
الجاب لاخونا السته بتاعت الارهابيين
اها قام قال ليهو بتشبه منو في ديل
اها اخونا شاف ليهو واحد وجيه وخت اصبعو وقال ليهو دا

صاحب ما كضب مشي جاب الشرطه وقال ليهم قبضت واحد من الجماعه
عشان يقبض السمينه (خمسه مليون مكافأه)
بعد شويه زولنا لا يحرا ولايدرا
الفلاشات ضريت فوقو
والصوت النجده ناو ناو جيو حيو
زروه ليك زره
زره كديس في بُرمه
العقيد نزل وقال ليهو السته بتاعت الارهابيين مافيها سوداني
صاحنا دنقر في الواطه
وقال الله لاوفقك
تري فشلتنا يا يازُول
خيبت ظني
،،،
،،
،

ود شندي


يعني انا حسي فشلتكم؟

سلام مربع

ياسجيمان اوعك تدقس وتقرأ الايات دي على مسمع منهم احسن يشتتوك

ان الملوك اذا دخلوا قرية افسدوها .. وجعلوا اعزة اهلها اذله
....
ان الاعراب اشد كفرا ونفاقا .. واجدر الا يعرفوا حدود الله

قالو في واحد ما حافظ غير الفاتحة والاخلاص .. اها الجماعة اصروا عليهو يصلي بيهم المغرب .. الركعة الاولي مشي حالو وفي الركعة التانية قرا ليهم طلع البدر علينا

واحد تاجر بطيخ فى سوق ابقوتة ..ببيع البطيخ بالقران يعنى الواحد يجى يقراء بالبقرة ويشيل البطيخة الكبيرة وهكذا..فى ولد صغير بتفرج ...ولما شاف الدور بطول قام رفع اسغر بطيخة وقال ليه ياحاج دى بى قل هو الله احد ...بتنفع


سجيمان ..ياترى مهنتك دى بتتغير لى امام جامع عام ام ممنوعة
وتسلم يامخرج الناس من صيوان الفراش الى ميدان الكرة

اباقوتة...............

امام جامع عام؟................. طيب الصالح العام كيييييف؟ بعدين

شيري


الايات دي زاتا في المنيو ما ماكاتبها.............مالي ومال القراية ام دق

والله يا ابو جهينة ان درت النصيحة امامة النسوان.. يا بلاش

محمد عثمان بكري


السنن برضو هينة....... كان ختت الاتنين والخميس

العزيز كوكاكولا
تعرف موقفك ده ذكرنى بًًِاِمام عندنا هنا وهو دايما بيصلى بالجماعة بسور طويلة وبيلخبط فة القراية فمره صلى بجماعة ومن ضمنهم واحد صومالى ولما شاف انو الامام بيقراء سور طويلة وكل مره يغلط والجماعة يصلحوه زهج منه زهجة شديدة والامام وقف فى اية كده ومنتظر الجماعة يذكروهو بالباقى فقام الصومالى اثناء الصلاة وقال للجماعة (لا حد يخبره - لا حد يخبره -لا حد يخبره)

بوستكم ده..كافر ولا شنو؟؟



(اعترفوا)

تماضر

رحم الله الشيخ محمد الغزالي

تعرف يا دباش..... لو هنا صلحت لك واحد امام..... يزعل منك ويخاصمك ليوم الدين...وممكن يحرش لك ناس البوليس والجوازات....... وشفع الحلة يفلقوك