Post: #1
Title: سايق الليـل.... للقـرضــة قرش
Author: سجيمان
Date: 02-08-2004, 02:47 PM
يا ام الخير..... انت عارفة.... باقي نحن لا بنغنا ولا بنقرش ولا شيتين..... وظانيتني... قد ر العيشتو تاني ما بعيشو..... دا حين داير ك.....وقت اموت.... تسو لي قبة كبيرة.... قدر حقت الشيخ حمد النيل.....وتسوروها...وتسو شباك تظاكر...واي زول داير يزور... يدفع... اوعك يغشوكي يدوكي شيكات.... كاش وبس...وبعدين تحكي القصص عني وعن كراماتي....وكيف انو كفيلي لما عاكسني اتقلب كدنداية....ولابسة عقال.....واني كنت بمر فوق ناس الجمارك زي الحلاوة لابيفتشوني ولا شي....ومرة الله بيسعلك دخلت تريلا كاملة..... ويعميهم ناس الجمارك ما شافوها.. اما المولاريا ديك شايل لي ليها مقلاع.... بصقة واحدة مني... المولاريا.. والبعوضة.... والزول الماسكاهو المولاريا كلهم يموتو.... واني كنت..... ما باكل شي غير قرض...... الفطور قرض مسلوق..... الغدا ملاح قرض..... العشاء قرض بالطوه....وقدر ما في فتاة بايرة.... بي وريقة صغيرونة بس... العرسان جو بالصف....وناس الحيكومة كانو في المفاوضات مع قرنق يتصلو علي اول ما قرنق يركب راسو يعصلج.... وطوالي من هنا اعملو مسج في موبايلو قريتو ليهو يوقع علي أي شي....والله بيسعلك قدر مافي وزير ولاّ مدير.... ما اتعين الا اخد بخرة مني....ونسوان الرجال ديل اسكتو ساكت... حسي كان شفتو رجال السعودية المع نسوانم ديل.... نعجات عديل.... وكلو من شيخي سجيمان.... يلحقني وينجدني........ وبعدين يا ام الخير.... المدحة الجاية دي احفضيها....وسويها في فيديو كليب....ووزعيها على القنوات الفضائية...وخلي يمدحوها ناس البانلمبو...ولا الما بعرفم شنو ديك.؟.. القاعدين يدقو في الحطب يومهم كلو ديك....
مصلايتو.... ...فرش
لي ابليسو....... هرش
سايق الليل للقرضة قرش
من الفلس ما بي يطرطش
عدمان الله لا دكان... لا ورش
سايق الليل للقرضة قرش
بالشوارع حاشاهو ما بيطمش
الما بيردو ان شاء الله يطرش
سايق الليل للقرضة قرش
عندو حصانة ما بيتفتش
كهربتو عالية...وتحرق تش
سايق الليل للقرضة قرش
صايم نهارو ما بيترشرش
بي ذكر الله جوو... مكندش
سايق الليل للقرضة قرش
فوق الفارغة مابي تحنفش
ما هاماهو الدنيا...... ام قش
سايق الليل للقرضة قرش
|
Post: #2
Title: Re: سايق الليـل.... للقـرضــة قرش
Author: ابو جهينة
Date: 02-08-2004, 03:00 PM
Parent: #1
الشيخ سجيمان قارش القرضة
التحية ليك يا أب قرضة لاحقة
إنت من زمن الملاريا ؟ ما عندك شي لإنفلونزا الطيور ؟
في واحد قال لى البتمسكو الإنفلونزا دي يكح يكح لغاية ما صوتو يبقى زى صوت ( أب سعن ) و يرمي ليهو بيضة ليها صفارين و شعرو يبقى زى ريش السواسيو ( أصصصصصصصصفر )
عندك شيتن ليهو يا سيجي ؟
تنجدنا و تلحقنا
|
Post: #4
Title: Re: سايق الليـل.... للقـرضــة قرش
Author: سجيمان
Date: 02-09-2004, 10:39 AM
Parent: #2
ابوجهينة
انفلونزا الطيور دي ما تخصصنا.... لكن بنحاول نسوي فيها شي....
|
Post: #3
Title: Re: سايق الليـل.... للقـرضــة قرش
Author: Osman Hamad
Date: 02-08-2004, 07:30 PM
Parent: #1
شيخى سجيمان
القُبتو فى راس الشيطان
يلحقنى وينجدنى من محن الزمان
ويكتر لى فى النســـــــــــــوان
(باقى بريد الحِريم بالحيل ياشيخ سجيمان)....الشغلة لوجابت قروش اها من اسى انا الحُوار بتاعك....شوفها مش كدا جايا
شيخ سجيمان
وحُوارو عثمان
شيخ سجيمان الاسد
وحُوارو ودحمد
|
Post: #7
Title: Re: سايق الليـل.... للقـرضــة قرش
Author: سجيمان
Date: 02-09-2004, 05:59 PM
Parent: #3
عثمان حمد.... رياد النسوان...
يا زول حسي راس الشيطان دا جايب سيرتو مالك؟..... داير تبور سوقنا.... وتخلينا نرجع تاني لي سجمنا ورمادنا
|
Post: #5
Title: Re: سايق الليـل.... للقـرضــة قرش
Author: maia
Date: 02-09-2004, 01:00 PM
Parent: #1
الشيخ سجيمان
ام الخير حقها برضها تقول شيخنا من بركاته يعاين للقرض يبقى بيتزا!!
اها الدخول للقبة بماستر كارد ما بينفع؟؟؟
|
Post: #8
Title: Re: سايق الليـل.... للقـرضــة قرش
Author: سجيمان
Date: 02-09-2004, 06:26 PM
Parent: #5
مايا..... انا ماني كبير كدي؟....وشيخا سرو باتع..ولحاق االبعيد.. ونضام اللحم في التلاجة؟......... لي حسي الماستر كارد دا ما بعرفو وشوفتي ليهو في التفلزيون.......دا حين تعالي بقروشك راسك عديل كدي
|
Post: #6
Title: Re: سايق الليـل.... للقـرضــة قرش
Author: abas
Date: 02-09-2004, 01:27 PM
Parent: #1
الحقنا وينجدنا
شيخي سجيمان
كل عام وانت طيب
|
Post: #9
Title: Re: سايق الليـل.... للقـرضــة قرش
Author: سجيمان
Date: 02-09-2004, 07:34 PM
Parent: #6
عباس
وانت طيب
|
Post: #10
Title: Re: سايق الليـل.... للقـرضــة قرش
Author: اساسي
Date: 02-09-2004, 07:41 PM
Parent: #9
سجيمان كل سنة وانت طيب والسنة الجاية في ام طرقا عراض قول امين
|
Post: #11
Title: Re: سايق الليـل.... للقـرضــة قرش
Author: سجيمان
Date: 02-10-2004, 01:19 PM
Parent: #10
اساسي....وانت طيب....وآآآآآآآآآآآآآمين جمعا
|
Post: #12
Title: Re: سايق الليـل.... للقـرضــة قرش
Author: humida
Date: 02-10-2004, 11:45 PM
Parent: #11
دحين يا شيخ .. سي جي ..
ما بلقا لي عندك ..
نملة ضكر ..
اصلو دايرنها في مسعلة كدي ..
|
Post: #13
Title: Re: سايق الليـل.... للقـرضــة قرش
Author: doma
Date: 02-11-2004, 10:25 AM
Parent: #12
هووي يا سجيمان مره الفقير ما بتحرس القبه. دحين الحراسه وقش القبه ورشها وبخورها ودخيل الزوار دي خليها علي انا ويوم الجمعه بسوي الجبنه قدام القبه.
شيخي الحلم وبي سره ما اتكلم تلحقني وتفزعني . والايراد بنتقاسمو انا وام الخير بعد ندفع الزكاه وضرائب شيخ المغتربين الفكي سجيمان الفي الدين غرقان
|
Post: #15
Title: Re: سايق الليـل.... للقـرضــة قرش
Author: سجيمان
Date: 02-11-2004, 05:54 PM
Parent: #13
حاجة شروق...وحبوبة الوليدات.... انتي كدي امرقي لينا الواطة البي نبي فوقا القبة.....ولومك عليّ نص الايراد ليكي
|
Post: #14
Title: Re: سايق الليـل.... للقـرضــة قرش
Author: سجيمان
Date: 02-11-2004, 05:49 PM
Parent: #12
حميدة
يا حليل زمن ضكرنة النمل يا يابا..... النملة حسي تقرصك وتقول لك سوري..وقبلي ما تقرصك تكب لها شوية ديتول محل ما دايرة تقرص...
|
|