Post: #1
Title: جييييييييييي... يا يابا....حليلو هو
Author: سجيمان
Date: 02-23-2004, 02:04 PM
قمت من الدغش ومعنوياتي في السما..... الليلة الماهية... واصلي قاعد افرح مرة واحدة في الشهر....قعدت عيني وقعت علي جريدة فيها خبر زي الزفت..... اريت ربي يعكنن عليكم ....اريت ربي يضلما في وشياتكم محل ما تقبلو.... اريت ربي يسلط عليكم امريكا واسرائيل ونيكاراقوا...اكان مسختو علي حياتي من دغش الرحمن... الخبر قال جورج قرداحي بتاع من سيربح المليون.... بياخد في الحلقة الواحدة من البرنامج 60000 دولار....60000دولار؟ وانا من اشتغلت لي حسي الدخلتو كلو ما يجي نص القروش دي؟....والغريبة انا متفلهم ومتفقلص...وقت امشي السودان... امرق العنقريب في نص الحوش والجماعة البيجو يسلمو علي اهريهم نضم فلهمة لا في السما لا في الواطا وقدر مافي شي للبيع اقول داير اشتريها....وهم مساكين فاتحين خشومهم ويعاينو لي... وانا اسوي في سواتي دي....يا دوب الليلة عرفت اني انا ود ابزهانة.... اللابس سديري..وشنو كدي عريانة....
جورج قرداحي راسمالو شنو؟ عشان يدوهو القروش دي كلها؟.... راسمالو سماحتو....حواجبين مقرونات..وشلاليف يلمعن ونديانات..وسنون مرصوصة..انت يا سجيمان ان بقت الحكاية سماحة اقيف بعيد يا اخوي....جريت علي المرايا وعاينت لي نفسي...وحات الله ما بتتقابل... علا زولا مجبور عليك.. يصابحك ويماسيك....اول مرة اعرف امي مسمياني جمل الشيل ليه؟....صدقت والله... الطراريم دي.. طرايرم جمل....و الاضنين المختوتات في بكان مو بكانن.. اضنين بعير...والغريبة المشي.... فجغ فجغ فجغ...اتلفت وراي لقيت وليدي واقف وراي.. برضو مطيّر اضيناتو زي كدي....وكمان بي تتكاثر يا سجيمان؟.... المتكاثر لها شنو؟...
قلت اغير شكلي شوية.... شقيت شعري... ام الخير قاعدة فوق الشعر دا يومين عشان تشقو...يالله ويا امين حتين اتشقا.... مشيت اتصورت.... قعدت..قدام الكميرا..ودنقرت لي تحت... المصوراتي جا رفع راسي... خليتو قبل كدي وتاني دنقرت لي تحت...اصلي داير الشعر المشوق يطلع في الصورة.... الصورة طلعت.. شعر مشقوق...واضنين وجبهة...وبس....وريت الصورة لام الخير.... قالت لي كدي يا يابا ... اريتا سماحة الوليدات..وحات نضري يا سجيمان اسمح من جورج قرداحي متين مرة... انا عارفا ام الخير اصلا قاعدة تكضب علي... لكن اكل عيش تسوي شنو مسيكينة؟...مشيت اتصورت تاني... المرة دي انا مشلق ورافع راسي فوق.. وبي نظرة حالمة كدي.... غايتو العوينات ماهن عوينات نظرة حالمة... وانا ما بعرفا النظرة الحالمة دي يعني شنو؟..لا انا جربت نظرتها....ولا ام الخير نظرتا لي...علا سامع بها في الغنا
الصورة طلعت... كلها نخرين..ابدا لا عوينات ولا نظرة حالمة ولا شي.....نخرين وبس....ام الخير برضو قالت لي كدي كر... سماحة الوليدات لي حدهن...ونخرين السرور يا يابا.....برضو ما اقتنعت.... تاني مرة لبست.... وانا مارق وماشي اتصور ...قلت لام الخير ماشي اتصور.... وهي قايلاني ما سامعا..... سمعتها تنقنق وتقول.... جيييييي جييييييي يايابا..... حليلو هو.....
|
Post: #2
Title: Re: جييييييييييي... يا يابا....حليلو هو
Author: ali othman
Date: 02-23-2004, 02:14 PM
Parent: #1
خلاااااااص دعيت عليهو اها الراجل رفتوهو عشان تستريح
قوم استلف ليك وش ورسل الصورة امكن يختوك بدلو
|
Post: #3
Title: Re: جييييييييييي... يا يابا....حليلو هو
Author: ابو جهينة
Date: 02-23-2004, 02:40 PM
Parent: #2
سي جي الرجل الحديقة
و الله إنت ما طالبني حليفة ،، أنا من صباح الرحمن متعكنن و زهجان و الدنيا غبشا قدامي بسبب موضوع كدة في السودان كلموني بيهو في التلفون.
ناس البيت شاكلتهم
ناس الشغل لقو وشي مكهرب زول ناضمني مافي
الخواجة المدير يطنطن What about this man today ?
قريت موضوعك ،، و الله الزهج كلو راح الله يعطيك العافية.
بس ليه ما جربت أوضاع تانية للصورة ؟
|
Post: #6
Title: Re: جييييييييييي... يا يابا....حليلو هو
Author: سجيمان
Date: 02-24-2004, 00:05 AM
Parent: #3
ابو جهينة يا راقي
لكن ام الخير بتخليني اجرب اوضاع تانية للصورة.... ما احبطتني خلاص
يا زول احمد ربك المديرك خواجة....مو زي مديري انا... كان حسي قال.... وايش بلاهو؟....بلا ياخدهم
|
Post: #5
Title: Re: جييييييييييي... يا يابا....حليلو هو
Author: سجيمان
Date: 02-23-2004, 07:50 PM
Parent: #2
علي عثمان
رفتوهو ليه؟.........الراجل كان ما مقصر معاهم بي شي
|
Post: #4
Title: Re: جييييييييييي... يا يابا....حليلو هو
Author: مريم بنت الحسين
Date: 02-23-2004, 03:01 PM
Parent: #1
والله يا دكتور.. الله يديك العافية.. ضحّكني ضحك.. لما استغفرت... 
لي قدّام.. والله أنا من أشد المعجبين بكتاباتك.. طبعا بت الحسين الأيام دي عاطلة عن العمل.. وما عندي موضوع.. ومدبرسه من قعدة البيت.. الله يديك العافية وقت رفعت لي معنوياتي...
بنت الحسين
|
Post: #10
Title: Re: جييييييييييي... يا يابا....حليلو هو
Author: سجيمان
Date: 02-24-2004, 03:02 PM
Parent: #4
بت الحسين
ويديكي انتي العافية...ويسهلك تمرقي علي السهلة من قعاد البيت
|
Post: #7
Title: Re: جييييييييييي... يا يابا....حليلو هو
Author: abas
Date: 02-24-2004, 06:18 AM
Parent: #1
تعرف يا سجيمان اخوي
واحد مصوراتي في الحصاحيصا مصري
راحلو واحد صاحبنا فاتصور عندو
وبعد يوم جينا ناخد الصور
صاحبنا قال للمصور ليه الصور شينة
المصري اتلفت يمين ويسار وقال
يا عم هو انا جبت حاجه من عندي
|
Post: #8
Title: Re: جييييييييييي... يا يابا....حليلو هو
Author: Noon3
Date: 02-24-2004, 08:50 AM
Parent: #7
سيجيمان
"مثلك يؤتى من بلاد بعيدة ليضحك ربات الخدور البواكيــا" .. غايتو انا عن ذات نفسي بقول انت "ثروة قومية" يقوموا يتقاسموك كمان... ضحكت كما لم اضحك لسنين عددا .. ربنا يديك الصحة والعافية...
|
Post: #9
Title: Re: جييييييييييي... يا يابا....حليلو هو
Author: ست البنات
Date: 02-24-2004, 01:32 PM
Parent: #8
يا سيجيمان المحن عندك , أمانة ما قطعت مصاريننا من الضحك وداير تفقعنا عديل ...
انت فى الأضنين ولا الجضوم والكازوم المنتلحنا دا !!!
غايتو بلدآ مو بلدنا ماب تحمل شناتنا دى , وماك براك يا سيجيمان كلنا نعانى من التلاليش والفيفقر والخراتيم ....بس الله يفكلنا بلدنا من الورطة الهى فيها دى , ونرجع نبقى ترابلة ونقفز تمورنا ودى ماها دايرالها صور , بس نتشعبط الشدر ونخرت فى التمر ....
لكن انت والله ماك سيجيمان , انت ظريفان ...
والله يخليك.
|
Post: #11
Title: Re: جييييييييييي... يا يابا....حليلو هو
Author: Alia awadelkareem
Date: 02-24-2004, 07:33 PM
Parent: #9
عمو سجيمان
تنكلوجيا التنجيل ما وصلت نوري
|
Post: #12
Title: Re: جييييييييييي... يا يابا....حليلو هو
Author: Tumadir
Date: 02-24-2004, 08:02 PM
Parent: #11
سجيمان يقولو ليك ان شا الله تنقصا تقول ابرى واستبرا..
حسه انت تصنقع وتدنقر للصوره قايلها بتطلع سمحه..
؟؟
اها وكان طلعت سمحه وجيت تسوى برنامج..تسوى برنامج شنو؟؟ اول شى وشك الشايفاه من وصفك ده..اذاعى..
اعمل برنامج: التعاون
اصلك ما تنفع غير لبرنامج التعاون..
اها وسجم رمادك يا جمل الشيل ما بتجيبها..من البرنامج الزى ده..من ما يبدا تسمع النسوان على الرجال: ياولد عليك الله اقفل الرادى ده راسنا براه موجعنا..
ولا اقرا النشره المحليه: توفى فلان ابن كلن من..
وخال كل من..
اها ده النسوان والرجال العجايز بريدوهو..ويشبكوك:
مخير الله..
مى دايمه
دار النقاص
خربانه ام بنايا قش..
وبعد داك يجغموا اللبينه وينوموا
قال سته الف قال...
قوووووودر الله!!!
|
Post: #17
Title: Re: جييييييييييي... يا يابا....حليلو هو
Author: سجيمان
Date: 02-25-2004, 01:27 PM
Parent: #12
تماضر
انتي قايله انا اكان اتقلبت سمح.... بشتغل مذيع في تلفزيون السودان؟ واقعد مع المذيعين الان لميتيهم كلهم ما يطلعو مذيع لباني واحد؟..... قووووودر الله.....بمشي الام بي سي... الال بي سي...لا اعمل دعاية بتاعت ببسي
|
Post: #16
Title: Re: جييييييييييي... يا يابا....حليلو هو
Author: سجيمان
Date: 02-25-2004, 00:56 AM
Parent: #11
عاليا عوض الكريم
التنجيل دا شنو؟
خليكي من النوري...... في الخرتوم ما سمع بها
|
Post: #15
Title: Re: جييييييييييي... يا يابا....حليلو هو
Author: سجيمان
Date: 02-25-2004, 00:38 AM
Parent: #9
ست البنات
بارك الله فيكي
وبلدنا باقي لي ما تتفك بي هينة.... بس قولي الله يصبرنا نحن
|
Post: #13
Title: Re: جييييييييييي... يا يابا....حليلو هو
Author: سجيمان
Date: 02-24-2004, 10:08 PM
Parent: #8
نون3
بارك الله فيكي....لكن الشي البيجيبوهو من بلاد بعيدة دا ويضحك ربات الخدور البواكيا...والله ما وقع لي.... الله يكضب الشينة
|
Post: #14
Title: Re: جييييييييييي... يا يابا....حليلو هو
Author: سجيمان
Date: 02-24-2004, 10:45 PM
Parent: #7
عباس
منو الشين؟ الصور....ولا... الناس المصورين....ولا المصور؟
|
Post: #18
Title: Re: جييييييييييي... يا يابا....حليلو هو
Author: ali othman
Date: 02-25-2004, 06:34 PM
Parent: #1
| Quote: رفتوهو ليه؟.........الراجل كان ما مقصر معاهم بي شي |
من نجيهتك دي ..
الراجل عجبتو سماحتو وكبكبة الناس فيهو ( عشان يشتركوا ماحاجة تاني ) بقى كل يوم يطلب زيادة اجرو اها في المرة الأخيرة قالوا ليهو اجر وعافية
|
Post: #21
Title: Re: جييييييييييي... يا يابا....حليلو هو
Author: سجيمان
Date: 02-25-2004, 09:10 PM
Parent: #18
علي عثمان
نجيهتي كان بترفد الناس.......علي اليمين مافي زول سمح ياكل عيش
|
Post: #19
Title: Re: جييييييييييي... يا يابا....حليلو هو
Author: دباش
Date: 02-25-2004, 07:30 PM
Parent: #1
الحبيب سيجو
الله يديك العافية ويكتر من محنك
لانك دوما ترسم البسمة على وجهنا
لكن يا سيجو بما انك ثروة وطنية فيخيل لى ناس
نيفاشا ديل بعد ما يخلصو من ابيي وجبال النوبة حايقبلو
عليك انت وانت بترشح قرنق يشيل منك شنو ويخلى الباقى لعلي
عثمان وانا من هسه لو ناس الشمال شالو شلاليفك ديل انا حاطالب بالجواز الينكاوى........
|
Post: #22
Title: Re: جييييييييييي... يا يابا....حليلو هو
Author: سجيمان
Date: 02-26-2004, 01:35 PM
Parent: #19
دباش
لو قسموني غايتو داير الشلاليف تقع لي ناس دارفور..... عشان عندهم الصعوط
|
Post: #20
Title: Re: جييييييييييي... يا يابا....حليلو هو
Author: دباش
Date: 02-25-2004, 07:38 PM
Parent: #1
عفوا
(الجواز الدينكـــــــــــــاوى)
|
|