Post: #1
Title: رجـــــالة جعلـــيّن.......... الكلـــس
Author: سجيمان
Date: 02-28-2004, 07:34 AM
وانا حايم في الشارع في جدة...... كايس لي زيت سمسم....وانا من عشاق زيت السمسم.... قابلت لي راجل سوداني طول في عرض... شنب كبير...عيونو حمرا وشرارة.... سلمت عليهو....ووقفت وحقبت ايدي وراي....وقلت لو ... يا جنا ماك خابر لك عصارات... قريب بي جاي؟..... ما تميت نضمي عديل... وما قفلت خشمي من ضحكتي.... علا وانا في الواطا مرمي...والزول دا خانقي...و شبكني بونية في وشي...يالله ويا امين يجو اربعة رجال يرفعو الزول مني....ويمسكوهو.. ويعاين لي وينضم ونفسو قايم.... ويقول.... عصارات يا كلب....؟.. عصارات؟.... انت قايلني انا شنو؟... شايفني محنن اصبع ايدي الصغير؟....ولا شايفني... تاني جلابتي وشايل طرفا في اباطي؟... فهمت الجماعة.... انو انا بسعل من عصارات حقات زيت ...زيت سمسم ... الله ينعل ابو العصارات لابو الزيت....حتين زولي فهم...وتاني جاء كابسني...ويمسكني من رقبتي ويقعد يسلم علي راسي قال عشان يعتذر....لكن خنقة الزعل وخنقة الاعتذار مافي فرق بيناتن... ...وحلف عليهو بالطلاق علا امشي معاهو البيت اتغدى..........
في البيت ..... قال لي انا اسمي الكلس من اهلك.. الرجال.. كع.. الجعلين... واللخو اسمو منو؟... قلت لو اللخو سجيمان.. من اهلك المخنوقين.. مو... كع... الرباطاب......وكلمة كع دي شيخ الكلس طوالي في خشمو...قال لي يا اللخو... نحن الجعلين ديل ناس حارين وصعبين...والبي يعادينا ولا يزعلنا الله قال بي قولو.... كع.... قلت لو انت حتوريني؟.....جاب الغدا....ما لذ وطاب.... وكل دقيقة يحلف علي طلاق علا اكل.. وكل ما ادور اقوم يحلف طلاق علا اقعد...غايتو بالميت كدي انا ماكل لي تلاتة كيلو لحم.. واربعة قرعات... وخمسه ربطة بتاعت ملوخية وطبقين كسرة......واربعة واربعين رغيفة....جايب شطة بي ليمون في كورية... قلت لو الشطة دي حارة يا زول ومضرة... عاين لي وضحك وقال لي ..... كعبة علي رقبتا آآآآزول... حرم مو كعبة علي ولاد جعل.... كع.....ويشيل الكورية ويشرب الشطة كلها....
جاب الشاي....وقعد يونسني..... حرم يا سجيمان نحن ارجل مننا..حوا ما ولدت....كع....مرة آآآآآآ زول.... عضاني كلب...حرم مسكت الكلب دا وشقيت لو حنكو...كررررر... نان تاني قال هوْ؟.. مشيت المستبشى.... كتبو لي اربعتاعشر..حقنة.... الممرضة المقيصيفة.... قالت لي انت بتخاف من الحقن ولاّ شنو؟.... حلفتَ علي بالطلاق علا اخد الاربعتاعشر حقنة حسعتية....وحقنة واحدة ما تبيت لي باكر.... كع....وزمان عندي ضرس قام علي...مشيت للحكيم..... وحلفت طلاق....علا يقلع اخواتو السليمات كلهن... ويخليهو هو براااااهو.... في شان نشوف ارجل منو فينا انا ولاّ الضرس؟.... كع....
الكلس فجأة كشف لي ضهرو وراني ليهو... لقيتو كلو مجرح بالطول... وجروح غريقة..... قال لي دا البطان.... حرم اخد لي تمانمئة اربعة وخمسين سوط.... وعيني ان رمشت علا اقلعا...كع...ويا زول وقت الحفلة سخنت. وقامت ام ابوها مرتي رقصت.... كسرت لي اربعة وستين عكاز فوق ايدي الشمال..وقدرهن.... فوق اليمين... وهوشت.... وجبت السيف... وحلفت علي كراعي علا اقطعا......وحرم.. تاني ما تباريني علا الاجاويد ادخلو وخليتا...كع.......سكت شوية وبعد شوية شنّق طاقيتو فوق حواجبيهو وقعد يدوبي.....
الليله هوووووووووووي
نحن اولاد جعل..نار مولعة ... بق
البي نريدو نخقو
والبي نكجنو نخنقو
ما عندنا شغلة غير الخنق والدق
مو مننا..... البيمرق السهلة
...وما بيجينا....... مفلق
................ كــــــــــــــــــع
|
Post: #2
Title: Re: رجـــــالة جعلـــيّن.......... الكلـــس
Author: مريم الطيب
Date: 02-28-2004, 08:52 AM
Parent: #1
اها ياسجيمان يا اخوي انا حلفت كان ارد ليك اول زول ...كع
|
Post: #3
Title: Re: رجـــــالة جعلـــيّن.......... الكلـــس
Author: شرير والبرتقاله
Date: 02-28-2004, 09:02 AM
Parent: #2
سجيمان
اخوي
كان تديهو السمسم ،
حرم كان عصروا ليك بي ايدو
وما يفكو الا الزيت ينقط منو
تف تف تف .. كع
ديل ولاد جعل مو خمج كع
|
Post: #9
Title: Re: رجـــــالة جعلـــيّن.......... الكلـــس
Author: سجيمان
Date: 02-28-2004, 02:30 PM
Parent: #3
شرير والبرتكانة
مش السمسم...... انا قربت اجيب الزيت...علا الحجازين الله يخليهم
|
Post: #4
Title: Re: رجـــــالة جعلـــيّن.......... الكلـــس
Author: سجيمان
Date: 02-28-2004, 10:37 AM
Parent: #2
مريم الطيب
انت ظانيتك جعلية.... البتجي قدام الراجل
|
Post: #5
Title: Re: رجـــــالة جعلـــيّن.......... الكلـــس
Author: abas
Date: 02-28-2004, 01:16 PM
Parent: #1
يا سجيمان اديك النكته دي
قالو ادروب جابوه المستشفي مكسر نهائي
فالدكتور سالو مالك يا ادروب
فقال كنا رايحين سيرة عرس
وراكبين اللوري
هليمه ام ادروب زغردت ادروب قاعد
رابعه اخت ادروب زغردت ادروب قاعد
زنوبه هبيبة ادروب زغردت ادروب نط ونزل مالقي اللوري
|
Post: #7
Title: Re: رجـــــالة جعلـــيّن.......... الكلـــس
Author: منعمشوف
Date: 02-28-2004, 01:31 PM
Parent: #5
نحنا أولاد رباط لا ورا مابنتر حتى كان إتردفنا
كيفن يا سيجمان تخلى الجعلى يقع فيك خنق .. أفو آآآزول
|
Post: #20
Title: Re: رجـــــالة جعلـــيّن.......... الكلـــس
Author: سجيمان
Date: 02-28-2004, 06:43 PM
Parent: #7
منعمشوف
يا زول..... الزول اداني فرصة عشان اتذكر نحن ولاد رباط ...ولاّ... ولاد كشف....ما طوالي وقع فوقي خنق
|
Post: #14
Title: Re: رجـــــالة جعلـــيّن.......... الكلـــس
Author: سجيمان
Date: 02-28-2004, 05:44 PM
Parent: #5
عباس.......ههههههههههههه
تعرف دا لو صاحبي الكلس دا كان يحلف طلاق علا يعرض وينط من طيارة...... يطلع الهدندوي ارجل منو؟.... كع
|
Post: #6
Title: Re: رجـــــالة جعلـــيّن.......... الكلـــس
Author: maia
Date: 02-28-2004, 01:23 PM
Parent: #1
دكتور سجيمان
4 كيلو لحمة مرة واحدة ؟ كع
كويس انه ما جابوا ليك 14 حقنة قالوا ليك تاخدها في الدقيقة والثانية عشان خنقة الراجل ليك
ما عارف الجعلتيين ديل جنهم حليفة وطلاق
|
Post: #8
Title: Re: رجـــــالة جعلـــيّن.......... الكلـــس
Author: خالد الحاج
Date: 02-28-2004, 01:33 PM
Parent: #6
| Quote: ....لكن خنقة الزعل وخنقة الاعتذار مافي فرق بيناتن... |
دي إسمها كربون يا سجيمان
الله يجازيك والله فرقت علينا من الغم الله يديك العافية
|
Post: #19
Title: Re: رجـــــالة جعلـــيّن.......... الكلـــس
Author: سجيمان
Date: 02-28-2004, 06:33 PM
Parent: #8
خالد الحاج
نفس الحتة الاكان خاتي اصابعينو فيها لما زعلان..... ياها زاتا خت فيها اصابعينو عشان يعتذر...... اريت اعتذارو طاير
|
Post: #16
Title: Re: رجـــــالة جعلـــيّن.......... الكلـــس
Author: سجيمان
Date: 02-28-2004, 06:04 PM
Parent: #6
مايا
ما اسمهم جعلتين..... اسمهم جعليّن ... الجعلتيّن ديل ناس المتمة الحبشية...وبرضو جدهم المك نمر..... علا ناس كع ديل ناكرنهم..عديل
|
Post: #10
Title: Re: رجـــــالة جعلـــيّن.......... الكلـــس
Author: Rawia
Date: 02-28-2004, 02:56 PM
Parent: #1
قبلت على الجعليين
نحنا جعليين البورد ما بنسكت....كع
|
Post: #11
Title: Re: رجـــــالة جعلـــيّن.......... الكلـــس
Author: رقية وراق
Date: 02-28-2004, 04:32 PM
Parent: #10
سجيمان ، أنا عندي ليك فروقات شكر كتير علي فريق هم وضحك من الأعماق في بوستات كتيرة قريتا ليك . تصور ، انا من الصباح صحيت وانا بفكر في تعبير أهلنا البقولوه لما يلخصوا الزول الما فيه فايدة ويقولوا : ياخ دا زول دورو ميت ساكت ياخي . ومشيت مع التعبير البليغ تاني قلت والله دا شغل سجيمان ، بينظمو كويس لو كتب عن الشخصية دي ، أها بطاني ديل نايمين _ ودي غير بطان ناس الكلس ـ قت أنا كل مرة بأجل التعليق وسجيمان دا راجل جاري في قائمة المتواجدين النسلم عليه قوام قوام .
|
Post: #12
Title: Re: رجـــــالة جعلـــيّن.......... الكلـــس
Author: Alia awadelkareem
Date: 02-28-2004, 05:12 PM
Parent: #11
سجيمان عشا البايتات
انت الطفاسة ليك شنووفتيش الزيت في انصاص اليالي
وبعدين صاحبنا دا لو جا بي هنا وشاف الهومو ديل مطلقين ساكت في الشوارع يعمل شنو
وعموما انا عمدتك احد ادوات محاربة الاحباط بالبورد
|
Post: #13
Title: Re: رجـــــالة جعلـــيّن.......... الكلـــس
Author: nazar hussien
Date: 02-28-2004, 05:42 PM
Parent: #12
يا سيجي
الخنقة دي اظنها طرشتك!!!!
الزول دا ما كان بيقول ليك
كـــــع
كان بيقول....هع...وشتان ما بين الهع والكع
هع هذي تستعمل عندنا في الحكي بدل الشولة في الكتابة الزي دي,,,,
لتفيد ان الراوي او المتحدث لم ينهي كلامه او سرده او حكيه..
وهي اصلا كانت اها ثم تحولت الي ها ثم الي هع عند اهل البحر
زي........... اها وبعدين قام ................وتواصل السرد بعد فعل الاستراحة اها...لكي لا يشعر المستمع بان الحكي انتهي.
وانت لاحظها في سردك عن الزول الخنقك
| Quote: حلفتَ علي بالطلاق علا اخد الاربعتاعشر حقنة حسعتية....وحقنة واحدة ما تبيت لي باكر.... كع....وزمان عندي ضرس قام علي |
فكع دي ما تقولا قدامو اخير ليك منها العصارات
|
Post: #27
Title: Re: رجـــــالة جعلـــيّن.......... الكلـــس
Author: سجيمان
Date: 02-28-2004, 09:30 PM
Parent: #13
نزار حسين
ازيك...كيفنك يابا؟
كلمة هيع انا عارفا والله....وبنستعملا كتير... لكن الكلس اخوك دا جعلي مغترب.... بيقول للرغيف خبز..... البي يحميهو شنو يقول لي هيع.... كع؟
|
Post: #25
Title: Re: رجـــــالة جعلـــيّن.......... الكلـــس
Author: سجيمان
Date: 02-28-2004, 08:45 PM
Parent: #12
عاليا
ابدا الزول زعل مني بلا سبب...وخنقني بلا سبب....وغداني بلا سبب..ووراني ضهرو واثر السوط بلا سبب....وشرب كورية الشطة برضو بلا سبب... يظهر اليوم داك كان يوم عيد ميلادي....
|
Post: #24
Title: Re: رجـــــالة جعلـــيّن.......... الكلـــس
Author: سجيمان
Date: 02-28-2004, 08:27 PM
Parent: #11
رقية وراق حبابكم عشرة ونورتي البوست... النارو مولعة بق دا.....والزول الدورو ميت دا..... يعني ما عندو اي دور بس هم خجلانين منو.... قالو ميت عشان يلقو لو عذر........
|
Post: #21
Title: Re: رجـــــالة جعلـــيّن.......... الكلـــس
Author: سجيمان
Date: 02-28-2004, 07:05 PM
Parent: #10
راوية اريتكم انتو جلعيين السرور يا جعليين البورد... يا الما بتخافو ..... علا من بكري
شفتي جنس الحريّش دا؟
|
Post: #15
Title: Re: رجـــــالة جعلـــيّن.......... الكلـــس
Author: essam&amal
Date: 02-28-2004, 05:58 PM
Parent: #1
الكلام دخل الحوش يا سجيمان
كله ولا اهلى الجعليين 0000
اكان كنت جعلى كانوا اهلك اتجوعلوا زى اهلنا وزيت السمسم
يجيك لحدى جده ( زيت سمسم ولد ) شفت نحنا ما عندنا حوامة
نص الليل بس تلفون ويجينا الجالون لحدى الامارات .
با زول اخيرلك تبعد من الجعليين ونحنا بنرسل ليك الزيت لحدى
عندك يا سجيمان انت تستاهل نجيب ليك صفيحة عشان مافى زولا كدى يمد ليك ايده .
الله لا لماك فى الجعليين ما سمعت بى الحعلى القالوا ليه بنتك بتقرأ مع الاولاد فى الجامعة فى نص ساعة قطع التذكرة وركب الطيارة بعد الطيارة قامت اتذكر انه ما معرس .
امال
ام وضاح
|
Post: #17
Title: Re: رجـــــالة جعلـــيّن.......... الكلـــس
Author: ASAAD IBRAHIM
Date: 02-28-2004, 06:08 PM
Parent: #15
سجيمان زولك دة عندو كفيل واحد ولا كافلينو اتنين؟؟؟؟؟؟؟
|
Post: #29
Title: Re: رجـــــالة جعلـــيّن.......... الكلـــس
Author: سجيمان
Date: 02-28-2004, 11:20 PM
Parent: #17
اسعد ابراهيم ......ازيك
الزول دا سمعت تحت تحت انو مطلوق سااااااكت...زي دا البيكفلو منو؟.... بلا رب العالمين
|
Post: #28
Title: Re: رجـــــالة جعلـــيّن.......... الكلـــس
Author: سجيمان
Date: 02-28-2004, 10:53 PM
Parent: #15
ام وضاح
وحات الله بالغتي.ههههههههههههههه........ بعد ركب الطيارة اذكر انو ما معرس؟....... طيب ما حلف مالو علا يعرس في طيارتو ديك اي..واحدة ان شاء الله مضيفة؟
|
Post: #18
Title: Re: رجـــــالة جعلـــيّن.......... الكلـــس
Author: ali othman
Date: 02-28-2004, 06:16 PM
Parent: #1
Quote: نحن اولاد جعل..نار مولعة ... بق
البي نريدو نخقو
والبي نكجنو نخنقو
ما عندنا شغلة غير الخنق والدق
|
اتاريهو قريبهم ده جاب من البلد كلها زيت سمسم
|
Post: #30
Title: Re: رجـــــالة جعلـــيّن.......... الكلـــس
Author: سجيمان
Date: 02-28-2004, 11:31 PM
Parent: #18
علي عثمان
طيب انا.....انا خانقني في شنو؟
|
Post: #22
Title: Re: رجـــــالة جعلـــيّن.......... الكلـــس
Author: ملكة سبأ
Date: 02-28-2004, 07:55 PM
Parent: #1
Quote: مريم الطيب
انت ظانيتك جعلية.... البتجي قدام الراجل |
سيجمان ماسمعت بالجعلى الجابو ليه بت بالليل خنقها كتلها قال نحن ماعندنا بنات بمرقن بالليل
يامريم كلام سجيمان اخوى دا فيه ريحة تحريش اعملي حسابك
وكلامى دا مافيه ريحة غتاتة شوايقة 
|
Post: #35
Title: Re: رجـــــالة جعلـــيّن.......... الكلـــس
Author: سجيمان
Date: 02-29-2004, 01:14 PM
Parent: #22
ملكة سبأ
ههههههههههههه.......ام البت زاتا ما عارفا النضم دا؟..... ما كانت تصبر لمن تصبح الواطا.....
|
Post: #23
Title: Re: رجـــــالة جعلـــيّن.......... الكلـــس
Author: ahmed haneen
Date: 02-28-2004, 08:21 PM
Parent: #1
مشكور يا سجيمان علي هذه الواحة
واحمد الله علي سلامتك،،، انو ما طلع زيتك
بعدين انت محظوظ الجعلي القابلك دا في جدا ضارباهوا
المكيفات والهوا البارد واكل الأيس كريم برد قلبو،، كع
عارف لو كان واحد من منطقتنا وسألتوا عن عصارات
ما كان مرق حي وجيت نزلت البوست كان كسر رقبتك كع
لك المودة والمحبة اللخو سجيمان وبرضو نكته هدية
انت ما سمعت حكاية الجعلي يوم كامل واقع جوه بير
ما لقي زول يطلعوا ،، بعد فترة مر احد الأخوان وساعدوا
في الخروج من البير،، بعد ما شكروا قالوا آزول انت من
وين وجنسك شنو،، قالو انا من كريمــي
الجعلي قام وقع في البير تاني،، وقال علي الطلاق
ما يطلعني شايقي،،،
|
Post: #36
Title: Re: رجـــــالة جعلـــيّن.......... الكلـــس
Author: سجيمان
Date: 02-29-2004, 01:25 PM
Parent: #23
احمد حنين ..... شكرا ومرحب بك
تعرف لو زولكم الوقع في البئر دا...جا شايقي وقالو وريني العصارات وين؟..... كان مرق من البئر براهو....وخنقو.....لكن المصيبة يقوم ينط تاني في البئر
|
Post: #26
Title: Re: رجـــــالة جعلـــيّن.......... الكلـــس
Author: maia
Date: 02-28-2004, 09:28 PM
Parent: #1
دكتور سجيمان
عارف الفرق بين الجعلي والجعلتي بس في حروف العين والزين يعني مثلاالزيت واربعة
يا سجيمان الجعلي نادوه النسوان في بيت عرس يجي ينزل ليهم حلة كبيييرة من النار ، لما نزلها برااه زغردوا ليهو ، عجبتو الحكاية تاني كررها تاني زغردوا تاني كررها في الاخير لما زغردواليهو جعلنة منو شالها قلبها فوق راسو
وتقول لي ما ياكلك سوق خضار بحاله ، كع
|
Post: #37
Title: Re: رجـــــالة جعلـــيّن.......... الكلـــس
Author: سجيمان
Date: 02-29-2004, 01:34 PM
Parent: #26
مايا
قلتي لي قلب الحله فوق راسو؟...كع.....وكمان...هيع عشان الجعليين ما يزعلو
|
Post: #31
Title: Re: رجـــــالة جعلـــيّن.......... الكلـــس
Author: ABUHUSSEIN
Date: 02-29-2004, 01:06 AM
Parent: #1
عـصـارات يا كـلـب ...... ؟ عـصـارات ؟ إنت قايلني أنا شنو ؟.. شايفني محنن أصبع إيدي
الصغير ؟؟ ... و لا شايفني تاني جلابتي و شايل طرفا في أباطي ؟؟
هــــو فـهـم شـــنــــــو ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
|
Post: #32
Title: Re: رجـــــالة جعلـــيّن.......... الكلـــس
Author: wadabdean
Date: 02-29-2004, 01:22 AM
Parent: #31
والله يا سجيمان ضحكتنى .. لكين يا اخوى .. كع .. انا جعلى محمية شرق ( العكاريت) قالوا ليهم اكفروا .. قالوا كفرنا.. عموما الكلس جاملك .. الحمد لله ما عصرك لمن طلع زيتك.. وابقا على رقبتك عشرة
ود عابدين
|
Post: #33
Title: Re: رجـــــالة جعلـــيّن.......... الكلـــس
Author: shak
Date: 02-29-2004, 01:30 AM
Parent: #32
سجيمان .. لك ودى
انا جعلى متمة .. وحايم الدنيا برجل كلب .. وهاك الحكاية دى
قالوا الجعلى الشايقى عايز يضحك عليهو قال ليهو .. انت يا الجعلى قلعد بى هنا مقنطر عمتك ومرتك فى الخرطوم مطلوقة .. لف عمت وشال عكازو وركب البص من مدنى ماشى للخرطوم زعلان يزبد وقال لازم يكتلا.. لمن وصل سوبا .. اذكر انو ما متزوج اصلا
شاك
|
Post: #34
Title: Re: رجـــــالة جعلـــيّن.......... الكلـــس
Author: Abureesh
Date: 02-29-2004, 02:52 AM
Parent: #33
"نحن اولاد جعل..نار مولعة"
حاجـة النار دى خاتين فوقا شنــو لكين؟
بعدين بالمناسبــة، أولاد جعل ديل ما عنـدهــم هــوم وورك؟
|
Post: #41
Title: Re: رجـــــالة جعلـــيّن.......... الكلـــس
Author: سجيمان
Date: 02-29-2004, 01:56 PM
Parent: #34
ابو الريش
عندهم هووم ورك؟.....يشاكلو ضلهم
لكن يا ابو الريش لو سعلت الكلس من الهوم ورك دا.... ويفهمو غلط.....ما بعرفو يسوي عليك كيفن
|
Post: #40
Title: Re: رجـــــالة جعلـــيّن.......... الكلـــس
Author: سجيمان
Date: 02-29-2004, 01:52 PM
Parent: #33
شاك
اهه.... شفت الرجالة دي؟.... زول نظرو ثاقب.... وبي ينظر للمستقبل..... كع....دا الكلام
|
Post: #39
Title: Re: رجـــــالة جعلـــيّن.......... الكلـــس
Author: سجيمان
Date: 02-29-2004, 01:46 PM
Parent: #32
ود عابدين
وحات الله الحكاية خيالية وانا كضااااااااب....ما يقوم يطلع في زول جعلي واسمو الكلس في جدة ...يقوم يكوس لي ويخنقني جد جد
|
Post: #38
Title: Re: رجـــــالة جعلـــيّن.......... الكلـــس
Author: سجيمان
Date: 02-29-2004, 01:39 PM
Parent: #31
ابو حسين..... هو زاتو خنقني قبال ما يدي نفسو فرصة عشان يفهم..... زول بس راجيني اجي ويخنقني
|
|