Post: #1
Title: الكضـــــــــاب
Author: سجيمان
Date: 01-23-2004, 05:40 PM
عبد الله مغترب قديم.... قدم النفط...في بلود الزيت...لكن كضاب كضب شديد... وما بيخاف الله فيك...... ان لمّ فيك..... المهم يكضب وخلاص تصدق ما تصدق... ما مشكلة كبيرة........وبعدين كضبو النوع المعدي...وسريع الانتشار.....
بعد ماشلت معاهو الفاتحة....وعزيتو بي كلمتين.... حافضن من زمان... قعدت وسعالتو... انت يا عبدالله المرحوم دا كان عيان؟...... قال لي ابدا....الزول جا من اهلو طيب ولحدي المغرب كان ما عندو أي عوجة..... لكن يا سجيمان اخوي المرحوم كتلتو بستي كولا..... قلت لو يا زول النضم دا كيفنو؟..... قال لي ايوا.... المرحوم شرب لو تلاتة قزازات حقات بستي كولا....الحجم العائلي .... عليك امان الله شربن وازرد تب....اترع الترعة الاولى.... اها مع الترعة التانية... سيد الوداعة اخد وداعتو........تعرف يا سجيمان المرحوم دا الله يرحمو..؟ كان النوع البي ياكلو طبق كسرة براااااااااااااهو....وخروف الضحية دا بيجيبن خروفين...واحد ليهو هو...والتاني....للضيوف ولي الناس البيجو يعيدو....ما بيدي من خروفو دا علا كلبو..جرقاس... وكلبو جرقاس دا يا سجيمان ...كلب غريب وعجيب في نوعو... تعرف الكلب دا.... يهويهيو... في اليوم تلاتة مرات بس... و واحيانا عند اللزوم...وبعدين الهيهيوه الواحدة... فيها خمسة درجات يعني.... يقول هو هو هو هوهو..... وما بيزيدن وما بينقصن...وكلب منضبط... يعني الساعة تدق سبعة صباحا يهويهو الهيويوه الاولي.....الساعة تلاتة الهيويهوة التانية... الساعة...حداشر الهيويهوة التالتة......امي كانت تخت لنا صينة الغدا مع هيهيوتو بتاعت الساعة تلاتة.... وابوي يتمم علي الابواب والشبابيك مع الهيويهوة الاخيرة....وماك طالبني حليفة يا سجيمان ..جرس المدرسة الجنبنا يدق مع بداية هيوهيوتو الاولي...حتى مرة سمعت ناظر المدرسة . بي اضاني البياكلا الدود دي.. يكورك يا ولد دق الجرس... كلب ناس حاجة علوية هوهو... قبييييييل.....الغريبة يا سجيمان الكلب دا في رمضان... يغير مواعيدو طوالي.....ساعة الفطور هيويهوة... وساعة السحور...وساعة الامساك...... وكان سيدو الله يرحمو لما يكورك لو..... جرقاااااااااااااس... تلقى الكلب رد عليهو...بي هيوهيوة اكان ركزت تلقاهو قال نعم....وبعدين صوتو سبحان الخالق... هارموني.... وسلم خماسي...مرة والله يا سجيمان الكلب دا هوهو...هويهوة الساعة حتاشر....وكان بيقول يا رمال حلتنا زول بي يعزك يا حليلو......والمرحوم كان قاعد يبشر فوقو.....وسمعتو حلف طلاق علي مرتو علا تجي ترقص رقبة مع الهيهيوة دي.......سعلت المرحوم الصباح قلتو جرقاس دا مالو البارح... قال لي .... اصلو جرقاس كان مجكس كلبة ناس خير السيد...وانت عارف ناس خير السيد رحلو اركويت... البارح....وساقو الكلبة معاهم...اها النار اطلقت في قليب المسيكين دا................
|
Post: #2
Title: Re: الكضـــــــــاب
Author: manubia
Date: 01-23-2004, 06:10 PM
Parent: #1
يا سجيمان ازيك واحشنا ليك زمن والهي من بيت ناس طلسم داك انا وانت وبكري
لكين يا سي جي عرفناك قاصد بالمرحوم منو،وبي كلبو منو،بس الكضاب ما عرفناو منو.
التحية ليك
|
Post: #3
Title: Re: الكضـــــــــاب
Author: bayan
Date: 01-23-2004, 06:55 PM
Parent: #2
لوووووووووووووووووووووووووووول
والله زولك كضبو برى ومن الايناس
لكن كيفن الناس البتدعى انها بتعرفك وشافتك
وهى لا بتعرفك لا شيتين جنس ديل نسوى ليهم شنو..
بعدين اى كلام عنك كلو غلط فى غلط يعنى صفر عديل كدا
بعد دا كلو مصرين انه بيعرفوك.. وخلايق الله دى كلها البخاف الله فيك والبكجنك عرف الدراريب والكضب لكن لسع يلف ويالف
قوة عين برى منها يا جنس الرجالة الكضب ما عندكم لاكين
قلتا لى البستى كولا كانت حجمعائلى
|
Post: #7
Title: Re: الكضـــــــــاب
Author: سجيمان
Date: 01-24-2004, 07:26 PM
Parent: #3
ايوا يا بيان البستي كولا كانت حجم عائلي وشرب منها تلاتة قزازات....عليك الرسول دا ما انتحار عديل كدي....حبوبتي بت ابجضل شربت لها فرد قزيزة صغيرونة..سنة ستة وستين....ولي حسي ماسكا فاق
|
Post: #5
Title: Re: الكضـــــــــاب
Author: سجيمان
Date: 01-23-2004, 09:42 PM
Parent: #2
منوبيا
الكضاب واحد في التلاتة....... يا انت.... يا بكري...... يا بيت ناس طلسم
|
Post: #4
Title: Re: الكضـــــــــاب
Author: mohamed osman bakry
Date: 01-23-2004, 08:47 PM
Parent: #1
| Quote: ....وكان بيقول يا رمال حلتنا زول بي يعزك يا حليلو |
سيجو
بس داير اعرف الخلا كلب ناس حاجة علوية يتذكر الرمله شنو؟
وعلاقة كلبة ناس خير السيد بالقيزان دي شنو؟سعال بس..
ولا شـــنو
|
Post: #10
Title: Re: الكضـــــــــاب
Author: سجيمان
Date: 01-24-2004, 07:56 PM
Parent: #4
محمد عثمان بكري............... علاقة كلب ناس حاجة علوية وكلبة ناس خير السيد بالرملة..علاقة دردقة
|
Post: #6
Title: Re: الكضـــــــــاب
Author: Osman Hamad
Date: 01-23-2004, 11:01 PM
Parent: #1
ياسجيمان
الكضب حرام والقبر قدام.
بس ما قلت لى وزير خارجية افغانستان اسمو منو!!
|
Post: #8
Title: Re: الكضـــــــــاب
Author: سجيمان
Date: 01-24-2004, 07:34 PM
Parent: #6
يا عثمان حمــــــــــــــد
اسمو........... الساعة........عشرة وعشرة
|
Post: #9
Title: Re: الكضـــــــــاب
Author: Hussein Mallasi
Date: 01-24-2004, 07:42 PM
Parent: #6
تعرف يا سجيمان ذكرتني ايام الوسطي كان عندنا اغنية نرددها في الجمعيات الادبية و الامسيات
تبدأ بالكورس حيث يبدأ في الترديد:
كضااااب كضاااااب ..... يا سعيد يمين كضاااااااااااااااااب
فيرد المغني السعيد:
"يمين" شمال انا ما كضاب ...... شمال" يمين" انا ما كضاب
و مستعد احلف بالكتاب .... كتاب جغرافيا و لا حسااااااااااب
الكورس
كضااااب كضاااااب ..... يا سعيد يمين كضاااااااااااااااااب ......
____
و اسه انا مستعد احلف بكل الكتب انو صاحبنا كضاااااااااااااااااب كضااااااااااااااااااب
و لو قلب الهوبة برضو كضاااااااااااااب
ملاسى
|
Post: #13
Title: Re: الكضـــــــــاب
Author: سجيمان
Date: 01-28-2004, 07:13 PM
Parent: #9
ملاسي
سعيد دا منو؟........... اخو سعد بتاع حلاوة ريا؟....... والله بتاع الحلاوة المدردمة ديك ؟....... اسما شنو يا ربي؟
|
Post: #11
Title: Re: الكضـــــــــاب
Author: mohamed osman bakry
Date: 01-24-2004, 08:05 PM
Parent: #6
يا عثمان
بدور اسعلك
انت بتوقع اسمك مرتين فيشان شنو
|
Post: #12
Title: Re: الكضـــــــــاب
Author: Osman Hamad
Date: 01-24-2004, 09:10 PM
Parent: #11
ياخوى محمد بكرى
مانى بوقعه مرتين
الاسم دا خلقو الله كدى (اوضتين وبرندتين معكوسات)
|
Post: #14
Title: Re: الكضـــــــــاب
Author: ابو جهينة
Date: 01-29-2004, 07:53 PM
Parent: #12
سجيمان
مالك ما رديت على الماسنجر بتاعي ؟
جرقاس دة غايتو فيهو جينات يابانية أو سويسرية ( مظبوط على سيكو يا على ريموندويل )
كل سنة و إنت طيب
|
Post: #15
Title: Re: الكضـــــــــاب
Author: سجيمان
Date: 01-30-2004, 01:50 PM
Parent: #14
ابوجهينة
الغبا للعوينات يا يايابا....... الشوف بقى طشاش..... يا الله اشوف بالرقراق.....اها عاين لي ماني عضير؟
|
Post: #16
Title: Re: الكضـــــــــاب
Author: maia
Date: 01-30-2004, 06:39 PM
Parent: #1
دكتور سجيمان
كل سنة وانت طيب
قلت 3 بتسي كولا الحجم العائلي !! دي ما بتودي الاخرة طوالي بدون تردد
لكن الكلب الساعة ده بالغ في الهوهوة ، على قول استاذنا ابوجهينة ده كلب ماركة سويسرية لووووووول
|
Post: #17
Title: Re: الكضـــــــــاب
Author: Al-Masafaa
Date: 02-01-2004, 12:35 PM
Parent: #16
كل عام و الجميع هنا فى بوست سجيمان بخير و عافية
و ان شاء الله ما آخر كضب.
|
|