Post: #1
Title: نويـــت.... ان.... احـــرد
Author: سجيمان
Date: 03-12-2004, 01:02 PM
ذكرت سابقا
ان مغتربين الخليج وخصوصا مغتربين السعودية...في فترةاغترابهم يمرو بي مراحل عديدة... تبدأ بالمرحلة القردية... يعني يكون الواحد زي القرد يقعد يحاكي في الناس القدامو... ثم المرحلة.. الكلبية.... ثم المرحلة الحمارية ودي مرحلة مهمة جدا لصقل المغترب حيث انه يصبح كالحمار... يشتغل لي كفيلو عشان يغني وقروشو تزيد اقصد قروش الكفيل.. ولاولادو ومرتو واهلو عشان يتبوبرو..وكلهم لما يشوفوهو يحمدو الله ويثنو عليه ويقولو سبحان الذي سخر لنا هذا وما كنا له مقرنين......اما المرحلة الاخيرة هي من اكثر المراحل حساسية ..وهي المرحلة القُرادية.... يصبح المغترب قرادة تقيل الدم يلصق في الاغتراب ولا يستطيع ان يعيش بدونو يرفتوهو من شغلانة يكوس لي غيرها يسفروهو يفتش لي فيزا عشان يجي راجع.....واي مغترب ما بيمر بالمراحل دي يكون فشنك واغترابو زي بعضو ما منو اي فايدة...
انا شخصيا المرحلة القرادية دي متدرب عليها منذ نعومة اظفاري.... ودربت نفسي كيف اكون قرادة من اخطر الانواع...والصق في اي حاجة قدامي وما عندي قشة مرة....لما كنت صغير بلعب في التراب..... تعلمت ان احرد ولكن احرد بي تخطيط.... يعني احرد ما بين الغدا والعشا.... ولسويعات معدودات عشان العشا ما يفوتني وانا حردان....لو جابو لي جلابية جديدة وما عاجباني احرد منها في الليل... والصباح البسا...وهكذا.....
لكي تكون قرادة....تحمل وتحمل وتحمل...وهذا هو شعار المرحلة القرادية.... خلي غيرك يحرد وهو يكون زعلان منك ومفروض انت التحرد....ولابد من تدريب الاضان.... على ان تكون اضان الحامل طرشا.. او دي فيها طينة ودي فيها عجينة....او الجمل ماشي والقراد مشعبط فيهو والكلب ينبح وبرضو القراد مشعبط فيهو.....في البورد مثلا.. لن يفلح من اراد تحريدي...لانني بكل فخر.. انا قرادة من الدرجة الاولى ونوع نادر....ولن تزيدني محاولات التحريد الا التصاقا... فضلنا اتنين بس على وجه الارض انا وعثمان ود اللمين ود خالتي....وربنا يطول عمرنا...ونتكاثر تحت حماية منظمات حماية البيئة...
كنت لما اجكس واحدة زمان الصق فيها لصقة عدوك....واكرها اليوم البقت فيهو سمحة....واليوم الضحكت معاي..ولاّ ادتني ريق سمح...وقدر ما تتمسخ وقدر ما تزهج مني ازيد اصرارا وعنادا في جكيسهاوازيد التصاقا...ولو زعلت مني اوسط الدنيا كلها واكلم صاحباتا...عشان يحنسوها وترجع..... كنت قرادة الحب الما بتداوى...كنت اخفف دمي وشوفو كيف لما زول قرادة يخفف دمو... واحكي لها النكت.. نفس النكت كل يوم...والحكاية دي بقت تأثر في صحة من جكست...يعني في خلال شهر وزنها ينقص النص....وتتبشتن..... وكان المثل السائد.. الملاريا ام حمى دخان...ولا جكيّس سجيمان...
نسوان الحلة الحاملات وبي يتوحمن كن يتحاشين... مواجهتي اكتر من دقيقة.. عشان ما يتوحمن علي.... لي سببين السبب الاول لاني شين.... السبب التاني عشان انا قرادة....وكانت الواحدة لما تجي تحلف... تقول ان شاء الفي بطني دا يطلع زي سجيمان كان النضم دا مو صح...اما الشباب الفي عمري كانو ما دايرني خالص... لكن انا وبي موهبتي القرادية كنت افرض نفسي عليهم.... ودائما مبتسم...والابتسامة دي حاجة مهمة جدا للشخص القُرادي...اولا تديك الثقة في نفسك...ثانيا تقنّع الشخص المُقرد عليهو... انه لامفر... انت لاصق فيهو يعني لاصق فيهو......
وانا اكتب الكلام دا وابتسم في وجه سيد البورد واعضاء البورد وزوار البورد....ومن شر قرادٍ اذا لصق
وتاني
وهل يحرد القراد يا ابابكر؟
|
Post: #2
Title: Re: نويـــت.... ان.... احـــرد
Author: soma
Date: 03-12-2004, 01:19 PM
Parent: #1
سجيمان لوووووووووووووووووووووووووووووووووووووووووول ..
ربنا يديك العافيه قدر خيالك الخصب ..وقدر ما بتدخل فى النفوس من بهجه ..وقدر صفاء النيه الجواك .. وقدر ما نتمنى ليك فى اليوم الفضيل ده .. على قول حبوبه بركة الجمعه الجامعه والدعوه العند الله سامعه .. الله يكفيك شر العوارض والعواقب والبقيفو فى دربك ..على قولك فضلت انت وود خالتك .. الزيك انت نحن ما بندور يختفى اسمو لسويعات من صفحة البورد الاولى ..سجيمان يوم شكرك ما يجى يا يابا .. يا عشا الضيفان ..
انا غايتو دايره اكتب كلام كتير .. لكن ضحكتنى اكتر من كتابتى ليك ..الله يفرحك وما عاش البحردك ..
تسلم يا سجيمان
|
Post: #7
Title: Re: نويـــت.... ان.... احـــرد
Author: سجيمان
Date: 03-12-2004, 06:02 PM
Parent: #2
سوما .....دي اضمنيها تب...البيحردني حيموت قبل ما انا احرد
|
Post: #3
Title: Re: نويـــت.... ان.... احـــرد
Author: Hussein Mallasi
Date: 03-12-2004, 02:08 PM
Parent: #1
يا سجيمان
نبدأ معاك من الاخر
| Quote: وهل يحرد القراد يا ابابكر؟ |
هو لو ما حرد القراد منو الحيحرد يا خوي ... و تاني برضو ..
| Quote: واكرها اليوم البقت فيهو سمحة....واليوم الضحكت معاي..ولاّ ادتني ريق سمح... |
بعدين يا زول انت في زول بيحكي ليك حاجات من ورانا و لا شنو يا اخينا...
| Quote: يعني في خلال شهر وزنها ينقص النص.... |
يا زول الناس كاسيا للدايت دا ..... القراد دايت ... لانو فعال جدا و ما مكلف ...... و اسأل قرادة
و اللهم اكفينا شر القراد اذا قرد ...... و شر الانسكيتسايد
|
Post: #9
Title: Re: نويـــت.... ان.... احـــرد
Author: سجيمان
Date: 03-12-2004, 07:13 PM
Parent: #3
حسين ملاسي
انت عاوز توريني انك قرادة برضو....ممكن لكن انت النوع قصير الاجل.... اما نحن يموت العائل ويشبع موت وبرضو نحن مشعلقين فيهو
|
Post: #4
Title: Re: نويـــت.... ان.... احـــرد
Author: Hussein Mallasi
Date: 03-12-2004, 02:08 PM
Parent: #1
مكرر
|
Post: #5
Title: Re: نويـــت.... ان.... احـــرد
Author: jini
Date: 03-12-2004, 02:21 PM
Parent: #1
لول يا سجيمان يا مرمد
زماااان كان في غرفة النوم في كرسي واحد فقط كان بسموهو كرسي
الحرد يعني بفعد فيهو الطرف الحردان ولايرجع الي قواعده الا بعض ترضيته و تحنيسه اكيد انت كنت المحنساتي الذي لا يشق له غبار
جني
|
Post: #6
Title: Re: نويـــت.... ان.... احـــرد
Author: bayan
Date: 03-12-2004, 04:18 PM
Parent: #5
قرقرقرقرقرقرقرقرقرقرقرقر
اصتغفر الله يا سجيمان
والله القراد دا
قضيتو قضية
فى المنبر دا
|
Post: #8
Title: Re: نويـــت.... ان.... احـــرد
Author: mohammed alfadla
Date: 03-12-2004, 06:43 PM
Parent: #6
di a7san 7ajah fi alpost
|
Post: #15
Title: Re: نويـــت.... ان.... احـــرد
Author: سجيمان
Date: 03-13-2004, 04:37 AM
Parent: #8
محمد الفاضلابي
قلت لي جدك ربط الجنيّة وين؟
|
Post: #14
Title: Re: نويـــت.... ان.... احـــرد
Author: سجيمان
Date: 03-12-2004, 10:12 PM
Parent: #6
بيان
عملتيهو قراد وعاوزة تخلقي لي منافسين من مافي؟.. هي قرادة واحدة الهي انا
|
Post: #11
Title: Re: نويـــت.... ان.... احـــرد
Author: سجيمان
Date: 03-12-2004, 08:52 PM
Parent: #5
جني
تعرف الحرداب ايام العرس الاولى دا نوع الحرداب الدلعي.... يعني كل واحد يحاول يلدع فوق التاني.... والكسبان.. حيدلع بي زمانو
|
Post: #10
Title: Re: نويـــت.... ان.... احـــرد
Author: Raja
Date: 03-12-2004, 07:33 PM
Parent: #1
لووووول وكمان لووووووول يا سيجيمان..
غايتو "قرادة" دي سعبه خالس  ..
أنا الزول الحا يحردني البورد ده لسة ما شفتو.. ولا الموقف.. اختك شرااانية وبتاخد حقها تالت ومتلت..
يعني حنصاقر بكري لغاية ما تحصل البيعة للبورد.. لأني ولا بكضب عليك ولا على روحي، المالك ولا الملاك الجداد لو كانو من ناس السيخ وقطع اليد والراس ما عندنا معاهم سكة  ..
|
Post: #12
Title: Re: نويـــت.... ان.... احـــرد
Author: عشة بت فاطنة
Date: 03-12-2004, 09:12 PM
Parent: #10
يعني اسي يا سجيمان بقو في كومين كوم الحرداب وكوم القراداب ، الغريبة في بلدنا في ناس اسمهم القريداب اكيد ديل اولاد عمكم لزم ! وزكرتني يقرادب المحبة زمان الواحد البلصق جنس اللصقة دي اسمو بوستيك
|
Post: #13
Title: Re: نويـــت.... ان.... احـــرد
Author: Tumadir
Date: 03-12-2004, 09:45 PM
Parent: #12
حاحفر ليك يا سجيمان وحا حردك البورد..
ونشوف البحنسك منو؟؟
بس اركز..
وطبعا الزول بحرد نتيجة للتجريح فى المعتقدات..ودى قنعانين منها
او الشرف..شرف شنو كمان اللى سجيمان..
او الشخصيه..
اها دى بقى الحالعب عليها..
والله كمان قلت انت قراده..ما بنفع الكحل فى العين الجحر..
بشوف لى طريقه..وبلقاها..
|
Post: #24
Title: Re: نويـــت.... ان.... احـــرد
Author: سجيمان
Date: 03-13-2004, 07:03 PM
Parent: #13
غايتو يا تماضر ....علا تتفقو انتي وبكري وتحظروني.... لكن اوعك من احرد
|
Post: #22
Title: Re: نويـــت.... ان.... احـــرد
Author: سجيمان
Date: 03-13-2004, 02:04 PM
Parent: #12
عشة بت فاطنة
اها شفتي انا كنت احسن نوع من البوستيك دا.... بالجاز ما يطلع.. وبحمد الله ما زلت احسن نوع
|
Post: #21
Title: Re: نويـــت.... ان.... احـــرد
Author: سجيمان
Date: 03-13-2004, 01:40 PM
Parent: #10
رجا
هو حيبيعو بي اعضاءو...و لاّ.. فاضي؟...
وحيبيعو للسيخ؟..... ليه مافي مسلمين؟
|
Post: #16
Title: Re: نويـــت.... ان.... احـــرد
Author: بت قضيم
Date: 03-13-2004, 10:43 AM
Parent: #1
سجيمان بتعرف حرد أم قردوا؟؟!!!
|
Post: #25
Title: Re: نويـــت.... ان.... احـــرد
Author: سجيمان
Date: 03-13-2004, 07:20 PM
Parent: #16
بت قضيم
| Quote: بتعرف حرد أم قردوا؟؟!!! |
لا والله..... دا منو دا؟
|
Post: #17
Title: Re: نويـــت.... ان.... احـــرد
Author: كبسيبة
Date: 03-13-2004, 11:03 AM
Parent: #1
سجيمان
أشهد لك بالحردنة والقردنة
وفي القراد كمان قرادة شريطية
|
Post: #26
Title: Re: نويـــت.... ان.... احـــرد
Author: سجيمان
Date: 03-13-2004, 07:33 PM
Parent: #17
كبسيبة
Quote:
وفي القراد كمان قرادة شريطية |
لا انا قرادة بي اربعة شرايط
|
Post: #18
Title: Re: نويـــت.... ان.... احـــرد
Author: الجندرية
Date: 03-13-2004, 11:49 AM
Parent: #1
طيب وحرد الفار
وحرد ام العروس
بتعرفوهن ؟
|
Post: #28
Title: Re: نويـــت.... ان.... احـــرد
Author: سجيمان
Date: 03-13-2004, 07:49 PM
Parent: #18
الجندرية
Quote: طيب وحرد الفار
وحرد ام العروس
بتعرفوهن ؟ |
حرد العروس شوفتو بي عيني دي..... لكن يخربا مافي زول هببو ليها
|
Post: #19
Title: Re: نويـــت.... ان.... احـــرد
Author: Sobajo
Date: 03-13-2004, 12:42 PM
Parent: #1
بس في ناس كدة أوعى يحردو ....
|
Post: #29
Title: Re: نويـــت.... ان.... احـــرد
Author: سجيمان
Date: 03-13-2004, 08:06 PM
Parent: #19
سوباجو
حبابك
الناس دي كلها ممكن تحرد........ علا انا
|
Post: #20
Title: Re: نويـــت.... ان.... احـــرد
Author: Tabaldina
Date: 03-13-2004, 01:30 PM
Parent: #1
..
.
احرد ..
على الطلاق منها .. اعمل ليك مظاهرة نهارية
ما تقول سيت الحردان ..
بس انت ما بتحرد انا بعرفك كويس لصقة بس ..
تحياتى
|
Post: #30
Title: Re: نويـــت.... ان.... احـــرد
Author: سجيمان
Date: 03-13-2004, 08:12 PM
Parent: #20
تبلدينا
تعرف يوم احرد انا.....اعرف انو البورد جنا
|
Post: #23
Title: Re: نويـــت.... ان.... احـــرد
Author: خالد الحاج
Date: 03-13-2004, 02:28 PM
Parent: #1
سي جي
فيها طريقة كورسات
علي الأقل الواحد يتعلم ويلقي ليهو شهادة قرادية
تعرف والله عجبني الشعار | Quote: وهل يحرد القراد يا ابابكر؟ |
وبحاول يا زول بحاول لكن أنت كمان ألحق أخوك بي ( دفرة) الكبر حصل
وطبعا الدفرة دي الله لا وراك ليها حالة متأخرة 
|
Post: #27
Title: Re: نويـــت.... ان.... احـــرد
Author: ensana
Date: 03-13-2004, 07:45 PM
Parent: #23
سجيمان...حسدتك و الله لانك عندك الروح الجميلة الصحية دي....بس خليك بجاي عليك الله
|
Post: #32
Title: Re: نويـــت.... ان.... احـــرد
Author: Abdel Aati
Date: 03-13-2004, 08:26 PM
Parent: #27
سجيمان
القراد ؛ بيلبس نضارات ؟
عادل
|
Post: #34
Title: Re: نويـــت.... ان.... احـــرد
Author: سجيمان
Date: 03-13-2004, 09:30 PM
Parent: #32
عادل
غايتو انا قاعد البس نضارات
|
Post: #33
Title: Re: نويـــت.... ان.... احـــرد
Author: سجيمان
Date: 03-13-2004, 08:51 PM
Parent: #27
انسانة
| Quote: سجيمان...حسدتك و الله لانك عندك الروح الجميلة الصحية دي |
اذا اردت ان تعيش حياة صحية هانئة... امتنع عن التدخين....وكن قرادة
|
Post: #31
Title: Re: نويـــت.... ان.... احـــرد
Author: سجيمان
Date: 03-13-2004, 08:16 PM
Parent: #23
خالد الحاج
يا اخوي اقول لك شي....... لو داير تبقى قُرادة... شديدة القردنة.... قبال النوم كرر جملة..... اضان الحامل طرشا.... لحدي ما تنوم
|
|