Post: #1
Title: ضُـــبانة.... هـــوانـا
Author: سجيمان
Date: 03-28-2004, 02:27 PM
اول ما دخلت الاوضة...وانا جاي من الشغل الضهر ....زي كل يوم.... قفلت الشبابيك....ووقفت المروحة...ورقدت...واتغتيت بالملاية....ومنتظر الضبانة تجي تنوني فوق راسي زي كل يوم.... ابدا ما جات..ولا عندها حس ولا اتر.... قلقت قمت اكوس في اركان الاوضة....ماها فيّّ..... كوركت لي ام الخير وسألتها وتساروني الشكوك واشم رائحة الجريمة.... صريت وشي وبي نهرة.... يا ام الخير الضُبانة الاكانت في الاوضة دي راحت ويييييين؟ ... عاينت لي ام الخير وهي تضحك.... قالت لي كتلتها يا يابا... الضُبانة لي تلاتة يوم كايسة لها اكتلها..علا الليلة لميت فيها...وبالسفنجة يا سجيمان كتلتها كتلت عدوك..وقعدت توصف في المعركة....وانا خلاص اتلبشت وزهجت واتعكننت....و نهرتها وقلت لها... كفى اسكتي... تكلتيها ليه ياام الخير؟ تكتليها ليه؟ انا ما قلت لك يا ام الخير اي حاجة تدوري تسويها تشاوريني؟.... تكتلي ضبانة هوانا يا ام الخير؟... دي كانت يا ام الخير الوحيدة في الغربة دي مونساني.....ونونايا كان يثير شجوني ويرجعني للبلد.. وتذكرني ايام حبنا الاولى...ايام الختوبة....ايام بجيكم عند اهلكم واتغتى بالملاية ويقعد الضبان ينوني فوق راسي...وانا كل مرة ارفع راسي واعاين لك...وانتي داخلة وانتي مارقة..وانا اسف سفة وابصق سفة...وكلي هيام وغرام وحب....وتذكري يوم كان عندك حُمى شديدة دااك...وانا قاعد عند راسك واهبب فيكي واطرد في الضبان ما يرك فوقك....وانتي مصنقعة تعايني لي وترمشي في عويناتك؟..... كلو دا يا ام الخير حسي وقت اجي ارقد وتجي الضبانة المسيكينة الكتلتيها دي تنوني فوق راسي...اتذكرو وشجوني تثير....ويا ام الخير
اذكري ايام صفاااااااانا
يوم كنا مصنقرين برااااانا
يوم حلة ملاحكم الحرقااااانة
وحايمة فوق روسينا ضُباااانة
تنوني مزيكة قِرب
|
Post: #2
Title: Re: ضُـــبانة.... هـــوانـا
Author: Abdel Aati
Date: 03-28-2004, 03:44 PM
Parent: #1
سجيمان
اراك متالقا هذه الايام؛
وخصبا؛
كارض بلادي التي يجوع فيها البشر؛
ويقهرها الانسان ..
ولكنك تعطينا زلابيات الفرح ..
لك الشكر والود؛
بقدر ما تعطينا من ابتسام وعبر..
عادل
|
Post: #3
Title: Re: ضُـــبانة.... هـــوانـا
Author: ابو جهينة
Date: 03-28-2004, 04:17 PM
Parent: #2
سي جي العزيز
ألا ليت أيام هش الضبان تعود ............ و ( النوناى) الذي تولى يا أم الخير يعود
معليش يا دكتور ،، حسع في السوق في ( سي دي ) مسجلين فيهو نوناى الضبان ،، توزيع جديد ،، نظام ( دولبي ).
أرقد عافية ( بدون نوناى )
|
Post: #9
Title: Re: ضُـــبانة.... هـــوانـا
Author: سجيمان
Date: 03-28-2004, 10:47 PM
Parent: #3
ابوجهينة
Quote:
حسع في السوق في ( سي دي ) مسجلين فيهو نوناى الضبان ،، توزيع جديد ،، نظام ( دولبي ). |
بس ياتو نوع من الضبان؟.... ما كل الضبان نونايو شجي.....البقصدو انا النوع المنزلي....العكليتة...خفيف الدم.....الدايم تلقاهو نشيط نص النهار في عز الحر
|
Post: #6
Title: Re: ضُـــبانة.... هـــوانـا
Author: سجيمان
Date: 03-28-2004, 07:59 PM
Parent: #2
عادل
حمد الله على السلامة
والبورد بلاك خربان
|
Post: #4
Title: Re: ضُـــبانة.... هـــوانـا
Author: Elnasri Amin
Date: 03-28-2004, 06:34 PM
Parent: #1
الغريبه يا سجيمان اول ما بديت اقرا قصة الضبانه طوالى اتزكرت قصة عقرب العزابه و قلت فى سرى اوع يكون سجيمان عملها.
اتزكر هؤلاء العزابه ؟و كيف شاكلوالزول الكتل العقرب مدعين انها عقربهم و انهم مربينها.
شكرا لنهاية القصه السعيده
Quote: اذكري ايام صفاااااااانا
يوم حلة ملاحكم الحرقااااانة
وحايمة فوق روسينا ضُباااانة
تنوني مزيكة قِرب |
يا سلام
|
Post: #10
Title: Re: ضُـــبانة.... هـــوانـا
Author: سجيمان
Date: 03-29-2004, 00:26 AM
Parent: #4
النصري
القصيدة عجبتك؟........ خلاص نكملا ونديها زول يغنيها اصلها ملحنة جاهزة.....ولا اقولك اغنيها انا برااااااي
|
Post: #5
Title: Re: ضُـــبانة.... هـــوانـا
Author: Raja
Date: 03-28-2004, 06:40 PM
Parent: #1
|
Post: #13
Title: Re: ضُـــبانة.... هـــوانـا
Author: سجيمان
Date: 03-29-2004, 05:16 AM
Parent: #5
رجا
فيّ..... عاوزة كم زلعة؟
|
Post: #7
Title: Re: ضُـــبانة.... هـــوانـا
Author: مريم بنت الحسين
Date: 03-28-2004, 10:06 PM
Parent: #1
أذكري أيام صفانا...
والليالي الفيها متبادلين وفانا
اصطفينا ظروفنا والحظ اصطفانا
..............
إنت ملهمني الأماني..
إنت مصدر فني إحساسي وشعوري.........
يا جماعة.. العنده الغنية دي.. كان أي زول بغني فيها ما عندي مانع... نفسي أسمعها...
عليكم الله....
دكتور.. والله أتحفتنا بالرومانسية... وقفت مبهوته مع الضبانه.. وام الخير..
!!!
بنت الحسين
|
Post: #14
Title: Re: ضُـــبانة.... هـــوانـا
Author: سجيمان
Date: 03-29-2004, 07:18 AM
Parent: #7
بنت الحسين
| Quote: .. والله أتحفتنا بالرومانسية... وقفت مبهوته مع الضبانه.. وام الخير |
الله لا بهتك
|
Post: #27
Title: Re: ضُـــبانة.... هـــوانـا
Author: walid taha
Date: 03-30-2004, 03:28 PM
Parent: #7
Forward to timbs
أذكري أيام صفانا...
والليالي الفيها متبادلين وفانا
اصطفينا ظروفنا والحظ اصطفانا
..............
إنت ملهمني الأماني..
إنت مصدر فني إحساسي وشعوري.........
يا جماعة.. العنده الغنية دي.. كان أي زول بغني فيها ما عندي مانع... نفسي أسمعها...
عليكم الله....
دكتور.. والله أتحفتنا بالرومانسية... وقفت مبهوته مع الضبانه.. وام الخير..
!!!
بنت الحسين
|
Post: #8
Title: Re: ضُـــبانة.... هـــوانـا
Author: Osman Hamad
Date: 03-28-2004, 10:30 PM
Parent: #1
عشان تعرف انو الضُبان بريدك....اهو جاك طاير(كان ما الريدة فى ضُبانة بقولوا ليها ضُبانة بتجى طايرة)(والله ضُبانة خفيفة خلاص!!)
حتى ضُبانة التسى تسى جبناها ليك.
ياناس الضُبان وصل
ياناس الضُبان ما قدر يعيش بعيد من العسل
يا رجاء
ياربى العسل المُتلمى فوقو الضُبان دا ...يكون سجيمان!!!
|
Post: #11
Title: Re: ضُـــبانة.... هـــوانـا
Author: دورنقاس
Date: 03-29-2004, 00:30 AM
Parent: #8
سيجمان
| Quote: واتغتى بالملاية ويقعد الضبان ينوني فوق راسي |
حليل ملايتكم اللبنية ... وضبانتكم الفقرية
حليل النونيا وما سوايا
والبركة فى بف بافكم
|
Post: #17
Title: Re: ضُـــبانة.... هـــوانـا
Author: سجيمان
Date: 03-29-2004, 01:35 PM
Parent: #11
دورنقاس
| Quote: حليل ملايتكم اللبنية |
ملايتنا ما جاتا عوجة.....قول سفنجة ام الخير اللبنية.. لانها اتقطعت في الضربة حقت الضبانة
|
Post: #16
Title: Re: ضُـــبانة.... هـــوانـا
Author: سجيمان
Date: 03-29-2004, 12:49 PM
Parent: #8
عثمان حمد
تاني جبت ولدك السايح ابو ضوبان وكميرا دا؟
|
Post: #12
Title: Re: ضُـــبانة.... هـــوانـا
Author: ابو تميم
Date: 03-29-2004, 01:41 AM
Parent: #1
الضبان ... المنقوش جانبه أوتذكرين ؟؟؟
|
Post: #15
Title: Re: ضُـــبانة.... هـــوانـا
Author: soma
Date: 03-29-2004, 09:48 AM
Parent: #12
سجيمان يا حليلك يا ود الحنان .. البتفضل نوناى الضبان على اكل البرتكان.. وتطش منك النومه وتنوم زهجان ..
بعدين الحنكشه ليك شنو ياسجيمان ..انا عهدتك زول قنوع واغبش وود فريق.. اسمها ضبانة حبنا ..مش هوانا .. ويا ريت لو تقول ضبان ريدتنا ..
بعدين التكنلوجيا المبشتنه دى ما غلبها شىء .. بتلقى ليك نغمة ضبانه نونايه لى موبايلك .. بس ما تقول ما عندك موبايل ..عارفاك ما بتفتش للاعذار.. كل ما تجى تتغطى بى ملايتك ام زيق.. قول لى ام الخير اضربى لى من تلفون البيت ..تلفونك ينونىىىىىىىىى لمن تنوم
ودعتك الله..
|
Post: #19
Title: Re: ضُـــبانة.... هـــوانـا
Author: سجيمان
Date: 03-29-2004, 09:33 PM
Parent: #15
سوما
| Quote: واغبش وود فريق.. اسمها ضبانة حبنا ..مش هوانا .. ويا ريت لو تقول ضبان ريدتنا .. |
انا قلت كدا ......علا ام الخير اصرت.... نسميها الاسم الحنكوش دا...عشان ضميرا مانبا
|
Post: #18
Title: Re: ضُـــبانة.... هـــوانـا
Author: سجيمان
Date: 03-29-2004, 03:18 PM
Parent: #12
ابو تميم
الضبانة الفي نص دي بالمناسبة...اخر موديل2004
|
Post: #20
Title: Re: ضُـــبانة.... هـــوانـا
Author: WALEED YASSIN
Date: 03-30-2004, 12:20 PM
Parent: #18
العزيز سيجيمان
يا اروق انسان
تعازينا الحارة فى فقد ضبانة هواكم وربنا يعوضك بى ملكة النحل
شخصيا انشاء الله......
وانقل لك تعازي صديقي احمد سمبر وقال ليك لازم تشتكى لى منظمة حقوق
الضبان....
ولك كل الود
|
Post: #21
Title: Re: ضُـــبانة.... هـــوانـا
Author: Al-Masafaa
Date: 03-30-2004, 12:41 PM
Parent: #20
يا دكتور انت لى هسا بتنوم الضهر.. يابختك يا رايق..
بوستك الظريف دا طرانى خمرة هواك يا مي صافية و جلية. الله يديك العافية ويديك ضبانا بديلة...
|
Post: #22
Title: Re: ضُـــبانة.... هـــوانـا
Author: خالد الحاج
Date: 03-30-2004, 12:45 PM
Parent: #21
| Quote: ...وانا كل مرة ارفع راسي واعاين لك...وانتي داخلة وانتي مارقة..وانا اسف سفة وابصق سفة...وكلي هيام وغرام وحب.... |
يعني قاصدني عدييل يا سي جي
والله حبك أب ضبان ده يمحن الشي أم الخير كانت ساكنة وين يا سجيمان في جزارة
|
Post: #28
Title: Re: ضُـــبانة.... هـــوانـا
Author: سجيمان
Date: 03-30-2004, 08:43 PM
Parent: #22
خالد الحاج
Quote:
الشي أم الخير كانت ساكنة وين يا سجيمان في جزارة |
الشي حكت الكديسة
|
Post: #25
Title: Re: ضُـــبانة.... هـــوانـا
Author: سجيمان
Date: 03-30-2004, 01:57 PM
Parent: #21
المسافة
Quote:
بوستك الظريف دا طرانى خمرة هواك يا مي صافية و جلية |
انا عرفتك قاصد شنو.......انت قاصدانو ضبانة هوانا انا وام الخير ضبانة مرايس....اوعى تنكر
|
Post: #24
Title: Re: ضُـــبانة.... هـــوانـا
Author: سجيمان
Date: 03-30-2004, 01:15 PM
Parent: #20
وليد يسين
Quote: وانقل لك تعازي صديقي احمد سمبر وقال ليك لازم تشتكى لى منظمة حقوق
الضبان....
|
بارك الله فيكم انت واحمد سمبر....... وما نجيكم في شينة
|
Post: #23
Title: Re: ضُـــبانة.... هـــوانـا
Author: الزنجي
Date: 03-30-2004, 01:06 PM
Parent: #1
تسلم ام الخير الكتلت الضبانة
وياريت القى لى واحدة زى ام الخير
ويا سجمان يا رمدان يا تعبان يا بتاع الضبان
وبعد ما كتلت الضبانه حا تعمل شنو كدا بالضهر تانى؟؟؟؟؟؟
|
Post: #26
Title: Re: ضُـــبانة.... هـــوانـا
Author: سجيمان
Date: 03-30-2004, 03:03 PM
Parent: #23
الزنجي
Quote:
تسلم ام الخير الكتلت الضبانة
وياريت القى لى واحدة زى ام الخير
ويا سجمان يا رمدان يا تعبان يا بتاع الضبان
وبعد ما كتلت الضبانه حا تعمل شنو كدا بالضهر تانى؟؟؟؟؟؟ |
ام الخير نان قايلا حسي مرتاحة...؟......ندمانة ندم السواد
|
Post: #29
Title: Re: ضُـــبانة.... هـــوانـا
Author: Al-Masafaa
Date: 04-01-2004, 08:44 AM
Parent: #26
يا مولانا انا ما قاصد كدا، لكن كمان انت ما بتتغالط
|
|
..؟