Post: #1
Title: المســطول وبتــاع الطعمية........وانـا و المجنــون
Author: سجيمان
Date: 04-08-2004, 01:54 PM
لاححظت لي كم يوم...وانا طالع ماشي الشغل...ولاّ جاي من الشغل....زول واقف عند خشم الباب..واول ما اجي يقعد يعاين لي...ويعاين بالجنبة اليمين بتاعتي بس... كل ما الف اديهو الجنبة الشمال يلف معاي علي اليمين...بيني وبين نفسي قلت اكيد ديل ناس الكميرا الخفية.. دا اول يوم....وصراحة السعودين في الكميرا الخفية عورا عوارة مدوعلة....يعني ممكن واحد يديك بونية وتقع وتغمر ....ويجي يوقفك ويضحك في وشيك ويقول لك معاك الكميرا الخفية.....ولاّ ممكن يجيبوك ويحكمو عليك اعدام ويجيبو السيف ويقطعو راسك...ويجي الراجل ويرفع الراس وبرضو يضحك ويقول لك معاك الكميرا الخفية....وانت تكون لحقت الكتار......اتذكرت صاحبي عثمان فتلة... دا مخخنجي من الدرجة الاولى.... في راس الشارع كان في واحد بتاع طعمية احوص... يوم لقيت عثمان دا مصنقر جنبو...وبتاع الطعمية يدردم الطعمية ويجدعا في الواطا وهو طبعا قاصد الصاج بتاع التحمير.... يجدع الطعمية وعثمان دا قاعد تحتو...ومع كل جدعة في الواطا.... عثمان يسوي تيششششششششش... ودي ممكن تكون كميرا خفية برضو.......
المهم زولي المكسر فيني داك..... يعاين لي ويصفق ايديهو ويقول " لا اله الا الله زي دا سوهو كيفن؟".....طبعا المقصود شخصي الضعيف. بعدين عرفت انو زولي مجنون.. وا شقاك يا سجيمان غريب وفي السعودية واتلحك واحد مجنون وعلى العليهو سعودي؟.... شفتو الشقاوة دي؟....فكرت جد....انو الزول المستغرب في صناعتي دا....ممكن بكرة يجيب مفكاتو ومفاتيحو ويقعد يفكفكني...حته حته...عشان يعرف سر الصناعة بتاعتي...واتخليتو اول حاجة يبدأ بالصُرة حقتي يجيب مفك نجمة ويقول يفكها عشان يفضي الزيت ويشتغل بي راحتو..وبعد كدة يجيب مفتاح كفر ويبدا يفكفك في اصابعين الكرعين.والايدين....ويجيب مفتح نجمنجم ويفك الايدين والرقبة والكرعين والضلوع..وكل مفصل يختو براهو. يعني في النهاية اكون بقيت كل حته براها......وشلت هم ما بعدو هم...لانوممكن يفكفكني و المصيبة بعدين....ما يقدر يركبني تاني..و اهلي لا يلقو حق ولا باطل..ويقولو لهم رفع القلم عن ثلاثة... الطفل....والنائم...والمجنون...واكون انا رحت شمار في مرقة...قررت ارحل بالراحة....والبلا بيكافوهو بالبليله....رحلت بعيد من الحتةالهو فيها....ويادووووووب بديت ارتاح.... وانا نازل الشغل واغني واصفر ومبسوط.....واول ما افتح الباب اشوف زولي الما يغباني... قدامي ويعاين لي ويصفق ايديهو ويقول" تااااااني واحد؟؟؟؟؟.... الحاجات دي قاعدين يجيبوها من وين؟؟؟؟؟"
|
Post: #2
Title: Re: المســطول وبتــاع الطعمية........وانـا و المجنــون
Author: Ali Alhalawi
Date: 04-08-2004, 03:00 PM
Parent: #1
| Quote: ما يقدر يركبني تاني..و اهلي لا يلقو حق ولا باطل..ويقولو لهم رفع القلم عن ثلاثة... |
و رفع القلم عن أربعة . عن ..... و عن ..... و عن .... و عن مـفـكـك
الله يجازيك يا سجيمان .. هسع نضحك على شنو و نخلى شـنو
|
Post: #5
Title: Re: المســطول وبتــاع الطعمية........وانـا و المجنــون
Author: سجيمان
Date: 04-08-2004, 10:01 PM
Parent: #2
الحلاوي
| Quote: و رفع القلم عن أربعة . عن ..... و عن ..... و عن .... و عن مـفـكـك |
رفع القلم عن خمسة. عن.......وعن.....وعن...وعن المفك ....وعن مفتاح النجمجم
|
Post: #3
Title: Re: المســطول وبتــاع الطعمية........وانـا و المجنــون
Author: ود الشيخ
Date: 04-08-2004, 04:11 PM
Parent: #1
سجيمان
زولك دهـ القال واحد تاني
ذكرني المسطول الفي
السينما قال لاخوه تشارطني اضرب الزول ابصلعة
في صلعتو قال ليه ما بتقدر قال ليك مشى المسطول
وضرب الراجل في صلعتو وقال ليه وين يا حسن انا
مستنيك وانتا قاعد هنا الراجل قال ليه انا ما حسن
ومشى غير مكانو المسطول قال لأخوه تشارط اضربو ليك
تاني قال ليه ما بتقدر قالوا مشى ولطش ليك الزول
في صلعتو وقال ليه يا حسن انت قاعد بي جاي وانا اضرب
في الناس بهناك ساكت
|
Post: #8
Title: Re: المســطول وبتــاع الطعمية........وانـا و المجنــون
Author: سجيمان
Date: 04-09-2004, 06:32 AM
Parent: #3
ود الشيخ
Quote: وقال ليه يا حسن انت قاعد بي جاي وانا اضرب
في الناس بهناك ساكت |
يعني زولي دا متلحني متلحني
|
Post: #4
Title: Re: المســطول وبتــاع الطعمية........وانـا و المجنــون
Author: maia
Date: 04-08-2004, 09:20 PM
Parent: #1
دكتور سجميان
واول ما افتح الباب اشوف زولي الما يغباني... قدامي ويعاين لي ويصفق ايديهو ويقول" تااااااني واحد؟؟؟؟؟.... الحاجات دي قاعدين يجيبوها من وين؟؟؟؟؟"
لووووووووول
اقول ليك انت اعمل فيهو كاميرا خفية
|
Post: #6
Title: Re: المســطول وبتــاع الطعمية........وانـا و المجنــون
Author: طيفور
Date: 04-08-2004, 10:02 PM
Parent: #4
يا مايا قال ليك
مجنــــــــــــــون
وسعــــــــــــودي
يعني ميته وخراب ديار
|
Post: #7
Title: Re: المســطول وبتــاع الطعمية........وانـا و المجنــون
Author: bayan
Date: 04-09-2004, 04:00 AM
Parent: #6
| Quote: المهم زولي المكسر فيني داك |
لووووووووووووووول
على النظرة الايجابية للاشياء
والله غايتو يا سيجمان
بقت من اسباب نوبات الربو بتاعتى انت
لانه بضحك وبنتهى بقححححة طوييييييييييلة
وبعدها البخاخة
تانى ترسل لى البخاخات انت ما دام مصر تكتلنا
|
Post: #14
Title: Re: المســطول وبتــاع الطعمية........وانـا و المجنــون
Author: سجيمان
Date: 04-09-2004, 03:12 PM
Parent: #7
بيان
| Quote: النظرة الايجابية للاشياء |
نضم زي العجب.....علا التحت داااااك ردو براهو..والله يجيب العواقب سليمة
|
Post: #12
Title: Re: المســطول وبتــاع الطعمية........وانـا و المجنــون
Author: سجيمان
Date: 04-09-2004, 02:50 PM
Parent: #6
تيفور
| Quote: يعني ميته وخراب ديار |
صدقت
|
Post: #11
Title: Re: المســطول وبتــاع الطعمية........وانـا و المجنــون
Author: سجيمان
Date: 04-09-2004, 02:35 PM
Parent: #4
| Quote: اقول ليك انت اعمل فيهو كاميرا خفية |
يعني ارشو بُونية..وبعد ما يغمر افرتقو انا..واقول ليهو معاك الكميرا الخفية....واتغدي بيهو قبل ما يتعشا بي
|
Post: #9
Title: Re: المســطول وبتــاع الطعمية........وانـا و المجنــون
Author: صديق الموج
Date: 04-09-2004, 07:16 AM
Parent: #1
و المصيبة بعدين....ما يقدر يركبني تاني.. QUITE
شكل الحروف يا سجيمان عشان نعرف نرد
|
Post: #10
Title: Re: المســطول وبتــاع الطعمية........وانـا و المجنــون
Author: bayan
Date: 04-09-2004, 07:23 AM
Parent: #9
و| Quote: البلا بيكافوهو بالبليله....رحلت بعيد من الحتةالهو فيها....ويادووووووب بديت ارتاح.... وانا نازل الشغل واغني واصفر ومبسوط.....واول ما افتح الباب اشوف زولي الما يغباني... قدامي ويعاين لي ويصفق ايديهو ويقول" تااااااني واحد؟؟؟؟؟.... الحاجات دي قاعدين يجيبوها من وين؟؟؟؟؟ |
سيجمان بعد قراءة متأنية للبوستك قد تبين لى انكم مصابون بعقدة الاضهاد معها حبة انفصام وانا هذا الشخص الذى يرحل معك هو فقط فى راسك ولا وجدود له فى الواقع.ز طبعا الا اذا كنت قد رحلتا فى الشقة المجاورة.. وهذا يكون من باب التخلف ولكن عاد كان رحلتا بعيد
تبقى تشوف ليك دكتور كارب ولا فقير يطلع السعودى المجنون من رأسك
اها رسل لى البياض دا علم ما بيدفق ساكت فى الشوارع
|
Post: #18
Title: Re: المســطول وبتــاع الطعمية........وانـا و المجنــون
Author: سجيمان
Date: 04-10-2004, 09:07 AM
Parent: #10
بيان
| Quote: اها رسل لى البياض دا علم ما بيدفق ساكت فى الشوارع |
سمعتي لك بي مجنون رسل البياض؟
|
Post: #13
Title: Re: المســطول وبتــاع الطعمية........وانـا و المجنــون
Author: سجيمان
Date: 04-09-2004, 02:56 PM
Parent: #9
صديق الموج
| Quote: شكل الحروف يا سجيمان عشان نعرف نرد |
النضم دا واااااضح.....علا تكون انت كايس لك مشاكل
|
Post: #15
Title: Re: المســطول وبتــاع الطعمية........وانـا و المجنــون
Author: صديق الموج
Date: 04-09-2004, 03:17 PM
Parent: #1
(انت زعلت يادكتور)
ثم تانى ما سمعت بالمثل البقول(لاتشاكل) المجنون لا تخلى المجنون
(يشاكلك) والا المثل ماكدى؟؟؟؟؟؟؟؟؟
|
Post: #16
Title: Re: المســطول وبتــاع الطعمية........وانـا و المجنــون
Author: سجيمان
Date: 04-09-2004, 04:09 PM
Parent: #15
صديق الموج
| Quote: والا المثل ماكدى؟؟؟؟؟؟؟؟؟ |
ياهو المثل كدي!!!!!!
|
Post: #17
Title: Re: المســطول وبتــاع الطعمية........وانـا و المجنــون
Author: انور الطيب
Date: 04-09-2004, 09:13 PM
Parent: #1
الأخ سجيمان تحياتي الحارة لك ولي مداخلة مهمة كما يقول أهل البرامج هذه الأيام
| Quote: وانا طالع ماشي الشغل...ولاّ جاي من الشغل.... |
* لازم تتذكر انك طالع والله جاي عشان العملية بتفرق وانت زي ماعارف تحديد الدبر من القبل دة أمر مهم جدا وممكن يودي في داهية.
| Quote: وبعد كدة يجيب مفتاح كفر ويبدا يفكفك في اصابعين الكرعين.والايدين.. |
* يبدو لهجتك العامية أتأثرت كثير والكفر دة في السودان الا للكورة غايتو دي شوف ليها دبارة.
ولك خالص تحياتي
|
Post: #19
Title: Re: المســطول وبتــاع الطعمية........وانـا و المجنــون
Author: سجيمان
Date: 04-10-2004, 01:01 PM
Parent: #17
| Quote: * لازم تتذكر انك طالع والله جاي عشان العملية بتفرق وانت زي ماعارف تحديد الدبر من القبل دة أمر مهم جدا وممكن يودي في داهية. |
الزول دا لا داير دُبر ولا داير قُبل....الزول دا مكسر في الجنبة اليمين بس
|
Post: #20
Title: Re: المســطول وبتــاع الطعمية........وانـا و المجنــون
Author: سجيمان
Date: 04-10-2004, 01:01 PM
Parent: #17
انور الطيب
| Quote: * لازم تتذكر انك طالع والله جاي عشان العملية بتفرق وانت زي ماعارف تحديد الدبر من القبل دة أمر مهم جدا وممكن يودي في داهية. |
الزول دا لا داير دُبر ولا داير قُبل....الزول دا مكسر في الجنبة اليمين بس
|
Post: #21
Title: Re: المســطول وبتــاع الطعمية........وانـا و المجنــون
Author: جدو
Date: 04-13-2004, 12:40 PM
Parent: #20
لول يا سجيمان
لكن العلاقة شنو بين مجنونك دا
(دي ما على وزن مجنون ليلى)
وبين صاحبك المخخنجي وبتاع الطعمية؟؟
|
Post: #22
Title: Re: المســطول وبتــاع الطعمية........وانـا و المجنــون
Author: سجيمان
Date: 04-13-2004, 12:44 PM
Parent: #21
جدو
Quote: لكن العلاقة شنو بين مجنونك دا
(دي ما على وزن مجنون ليلى)
وبين صاحبك المخخنجي وبتاع الطعمية؟؟ |
علاقة تكافلية
|
|