Post: #1
Title: كونداليــزا رايــس....و.....عبـــدو تـي
Author: سجيمان
Date: 04-16-2004, 02:13 PM
Parent: #0
اللهم اجعلو خير يا سجيمان.... البارح الليل كلو... انا عريس... وحفلات وهيصة وزمبليطة.... والعروس كونداليزا رايس...والعريس انا.... شفت النعمة دي؟... اشوف يا سجيمان حوش البيت الابيض دا مليان ناس ومرصوص كراسي...وقدر ما في ريئس وملك في الدنيا دي..جو العرس...والامين اخوي الله يفضحو... ماسك دفتر الكشف وقاعد جنب... مواسير الغسيل... اليغسل ايدو كلو يقولو الكشف يا جنا هوي....والغناي يا سجيمان كان مبارك حسن بركات...واشوف الناس اترصت وركبو المكرفونات وانا والعروس كونداليزا قاعدين في الكوشة .....ويبدا مبارك حسن بركات بالغنا... وساعة غنا أنة المفجوخ... قدر ما في ريئس زغرت ورفع ايدو وقعد يكورك... يا سلام يا سلام يا استاذ بركات..... ومبارك يعاين للعروس دي لمن انا قلت اقوم عليهو اديهو بونية... علا قلت ماني داير اخرب حفلتي...وقعد يغني...وانا عارفو اصلو الغنية دي قاصد بها العروس
يا أنة..... المفجوخ
يا الروح حياتك روح
الحبو فيك يا جميل
.... خلاني ابوس الجوخ
..................
الحبو خلا الجوف زي لحم البعير متبوخ
ورم عيون الناس.... وفلق النافوخ
الحبو فيك يا جميل خلاني ابوس الخوخ
........
ايه عنب جناين النيل انت الكريز والخوخ
الجضيم يتلاصف .......والحكمة خاتي شلوخ
الحبو فيك يا جميل خلاني ابوس الجوخ
.............
كل الشافا من ريدا رب.. يقع.. ويدوخ
جننتي ناس كتار... رؤساء وملوك وشيوخ
الحبو فيك يا جميل خلاني ابوس الجوخ
.........
كيف انيلو رضاك...اختا الدبابة و الساروخ
حكم الطبيعة جعل...... عرس العجوز ممسوخ
الحبو فيك يا جميل خلاني ابوس الجوخ
........
ايه عنب جناين النيل.... انتي الكريز والخوخ
حكم الطبيعة جعل......عرس العجوز ممسوخ
جننتي ناس كتار.....رؤسا وملوك وشيوخ
الجضيم يتلاصف....والحكمة خاتي شلـــوخ
ليلى هوووووي يا ليله..... ليلى هوووي يا ليل
ويا سجيمان.... الناس دي كلها نزلت ترقص...مع الغنية دي....واصلو في ريئس كدي سوا البدع..... حلف ما يمرق من الدارة... ويرقص لمن غمر......ووقع في الواطا...وتاني قام يرقص.... يكون الزول دا مالو يا سجيمان؟
وساعة وقفو العروس دي لي قطع الرحط...وجيت انا ودخلت ايدي وداير اقطع الخيت.... يا سجيمان صفارات الانذار ضربت..وطيارات اتلمت فوقنا بي فوق... علا الجماعة حدسو ناس البنتاغون وقالو لهم دا عريس كونداليزا وبيقطع في رحطا....حتين هجدو....وماني عارف كان شوية زحيت من محل الخيت دا لي تحت كان سو شنو؟......وجات حوا الطقطاقة والكورس كلو اشوفو يا سجيمان من الروساء ديك...ويترصو فوق العناقريب جنب حوا...وهبكت الدلوكة.... وقالت كدي العروس اتنت واتفدعت..وورقصت...ورقاصة جنس الرقيص يا سجيمان... بعدين عرفت انو العلما الرقيص عبدو تي.. الله يطول عمرو ويعلم كل العروسات الفي الدنيا الرقيص..... وقولي كدي يا حوا... وغني
الفريع المال.. واتنا
الله يعلم.... جهجهتنا
هي تغني والكورس من الرؤسا يشيلو....ويبكو يا سجيمان.... شوف عيني
|
Post: #2
Title: Re: كونداليــزا رايــس....و.....عبـــدو تـي
Author: omer almahi
Date: 04-16-2004, 02:59 PM
Parent: #1
|
Post: #9
Title: Re: كونداليــزا رايــس....و.....عبـــدو تـي
Author: سجيمان
Date: 04-16-2004, 06:30 PM
Parent: #2
اهلا عمر
يا لزيز يا رايق
|
Post: #3
Title: Re: كونداليــزا رايــس....و.....عبـــدو تـي
Author: jini
Date: 04-16-2004, 03:12 PM
Parent: #1
الظاهر انت تقلت العيار أو هي تكون كترت المحلبية. ما تقول اى كمان
جابوا ليكم فطور العريس بي ديسكفري.
جني
|
Post: #11
Title: Re: كونداليــزا رايــس....و.....عبـــدو تـي
Author: سجيمان
Date: 04-16-2004, 06:50 PM
Parent: #3
جني
| Quote: الظاهر انت تقلت العيار أو هي تكون كترت المحلبية |
دا نضم حسادة ساااااكت يا اخوي
حتى في الحلم تحسدونا؟
لا حكت لا بقت
|
Post: #4
Title: Re: كونداليــزا رايــس....و.....عبـــدو تـي
Author: 3mk-Tango
Date: 04-16-2004, 03:39 PM
Parent: #1
سجيمان .. حلمك برجوازي جدا لكن تستاهلها والله بس بعد ما يعملوا ليها قدر ظروفك كميات كدا لووول
تنقو
|
Post: #16
Title: Re: كونداليــزا رايــس....و.....عبـــدو تـي
Author: سجيمان
Date: 04-16-2004, 08:55 PM
Parent: #4
تنقو
| Quote: يعملوا ليها قدر ظروفك كميات كدا |
قدر ظروفك دي بيعملوها وين؟..... غايتو اكان تحت الرحط انا بحرد والله ...وبشرد وبجدعا عند اهلا
|
Post: #5
Title: Re: كونداليــزا رايــس....و.....عبـــدو تـي
Author: خالد الحاج
Date: 04-16-2004, 04:03 PM
Parent: #1
وحشتنا والله يا سي جي..
| Quote: واصلو في ريئس كدي سوا البدع..... حلف ما يمرق من الدارة... ويرقص لمن غمر......ووقع في الواطا...وتاني قام يرقص.... يكون الزول دا مالو يا سجيمان؟ |
شيل النقطة يا سجيمان من الغين الفي غمر دي بتعرفو مالو 
|
Post: #17
Title: Re: كونداليــزا رايــس....و.....عبـــدو تـي
Author: سجيمان
Date: 04-16-2004, 09:29 PM
Parent: #5
خالد الحاج
| Quote: شيل النقطة يا سجيمان من الغين الفي غمر دي بتعرفو |
شلتها يا خالد..... طلع معاي اسم عمر...... عمر بنقو... بتاع الجابون...... عليك الرسول شفت الاسم دا سمح كيفن؟....واريتو ابوهو يبقى في راسي وراس البريدوني....بعد دا الحال
|
Post: #6
Title: Re: كونداليــزا رايــس....و.....عبـــدو تـي
Author: Nada Amin
Date: 04-16-2004, 04:13 PM
Parent: #1
لاحولا يا سجيمان ما لقيت الا كوندوليزا تحلم بيها عروستك
غايتو شيل شيلتك و استعد لصرة الوش و النقنقة
الزوله دي دايما زهجانة و متنرفزة، ما حصل يوم شوفتها مبتسمه
بس عندي ليك رجاء خاص يا سجيمان
النبي كان ما كلمتها تغير يوم العرس تسريحتها دي
غايظني غيظه لأنها بلديه خالص، مش كوندوليزا، التسريحه
بعدين مادلين ألبرايت مالا ما بتنفع تكون فتاة أحلامك عيبا لي، الا كوندوليزا يعني؟
|
Post: #18
Title: Re: كونداليــزا رايــس....و.....عبـــدو تـي
Author: سجيمان
Date: 04-16-2004, 10:16 PM
Parent: #6
ندى امين
| Quote: النبي كان ما كلمتها تغير يوم العرس تسريحتها دي |
انا زاتي ما عاجباني...... وعندي فيها راي.... غايتو نحاولها كان تمشط شعرا......
|
Post: #7
Title: Re: كونداليــزا رايــس....و.....عبـــدو تـي
Author: Ridhaa
Date: 04-16-2004, 04:40 PM
Parent: #1
|
Post: #21
Title: Re: كونداليــزا رايــس....و.....عبـــدو تـي
Author: سجيمان
Date: 04-16-2004, 10:44 PM
Parent: #7
رضا
بارك الله فيك
وهدية مقبولة
علا يبقى لي الطرش.....كان سامع شي
|
Post: #8
Title: Re: كونداليــزا رايــس....و.....عبـــدو تـي
Author: صديق الموج
Date: 04-16-2004, 05:07 PM
Parent: #1
سجيمان جننتنا بى حديثك المشروخ
كل ما اقول اهديك انت يا الممسـوخ
القاك تزيد مرات ماشى زى منفــــوخ
والحبو فيك يا سى جى خلا اللسان مردوخ
___________________________________
كونزاليزا يا مفترى بوشك المفسوخ
دايره ايه من سى جى ده معولقا ملتوخ
ما بتشوف عميانة والا حالفه يعنى تدوخ
الحبو فيك يا سى جى خلا اللسان مردوخ
_ _________________________
احلامك البايظات يفوروا النافوخ
كرعينك الشامطات كرنك بس مجلــوخ
تقوم تعاين ليك يا المسجم المملوخ
والحبو فيك ياسى جى خلا اللسان مردوخ
_________________________________
اوهامك البايرات اريتا بى الصاروخ
وانا من حب الخواجيه ترانى انكرش مسلوخ
وريدتى ريدة الحمامه لى ضغاره فروخ
والحبو فيك يا سى جى خلا اللسان مردوخ
|
Post: #22
Title: Re: كونداليــزا رايــس....و.....عبـــدو تـي
Author: سجيمان
Date: 04-16-2004, 10:57 PM
Parent: #8
صديق الموج
| Quote: والحبو فيك يا سى جى خلا اللسان مردوخ |
بقيت تتغزل فوقي...من قلت انا حلمت بي كونداليزا؟ناس بتاعين مصالح..... بالمناسبة حادلع كونداليزا واقوول ليها... كندويتي....
|
Post: #10
Title: Re: كونداليــزا رايــس....و.....عبـــدو تـي
Author: Anwar Ahmed
Date: 04-16-2004, 06:42 PM
Parent: #1
حظك يااخوي عسل .لكن نضميها كتر بس عندها فلجه و...
|
Post: #13
Title: Re: كونداليــزا رايــس....و.....عبـــدو تـي
Author: طيفور
Date: 04-16-2004, 07:55 PM
Parent: #10
اتا يا ثي جي دحين قبال دا البوش ولد خالت
قونقليزا بت الريس دي ماحظرك من الحلم بيها؟؟؟
|
Post: #27
Title: Re: كونداليــزا رايــس....و.....عبـــدو تـي
Author: سجيمان
Date: 04-17-2004, 03:44 AM
Parent: #13
طيفور
Quote:
اتا يا ثي جي دحين قبال دا البوش ولد خالت
قونقليزا بت الريس دي ماحظرك من الحلم بيها؟؟؟ |
اها لكن اسوي كيفن؟..... هي الجاتني انا ما مشيت ليها..... اكان هي الحلمت بي بعدين يلومني
|
Post: #23
Title: Re: كونداليــزا رايــس....و.....عبـــدو تـي
Author: سجيمان
Date: 04-16-2004, 11:28 PM
Parent: #10
انور احمد
| Quote: .لكن نضميها كتر بس عندها فلجه و... |
وقاعدة تسرح.... قابيلني باللفة
|
Post: #12
Title: Re: كونداليــزا رايــس....و.....عبـــدو تـي
Author: al-Hameem
Date: 04-16-2004, 07:27 PM
Parent: #1
يبدو ان زواجك باطل كما هو و اضح من الدليل اعلاه اللهم الا اذا كنت تؤمن بتعدد الازواج
|
Post: #14
Title: Re: كونداليــزا رايــس....و.....عبـــدو تـي
Author: Rakoba
Date: 04-16-2004, 08:00 PM
Parent: #12
والله بختك يا سجيمان، وهاك الصورة دي من أيام المدرسة كمان 
|
Post: #15
Title: Re: كونداليــزا رايــس....و.....عبـــدو تـي
Author: shak
Date: 04-16-2004, 08:33 PM
Parent: #14
سجيمان
اشخت شخيت وابعد بعيد
كوندليزا عرستها انا والفنان كان البغنى لى حنتو التحتو
وهسع رحلتها لى ام مغت .. اما العرستها انت فهى الدوبلير بتاعتا هى زى صدام
ممكن تزورنا عشان تعرف انو فى فرق
شاك
|
Post: #19
Title: Re: كونداليــزا رايــس....و.....عبـــدو تـي
Author: طه حسن عبدالله
Date: 04-16-2004, 10:19 PM
Parent: #15
الغالى سجيمان
دى يا يابا عروس السجم و الرماد
لكن يا سجيمان إنت عبدوتى دا علـّم العروس ولا المعازيم؟
|
Post: #33
Title: Re: كونداليــزا رايــس....و.....عبـــدو تـي
Author: سجيمان
Date: 04-17-2004, 11:35 AM
Parent: #19
| Quote: لكن يا سجيمان إنت عبدوتى دا علـّم العروس ولا المعازيم؟ |
المعازيم كانو جو للعرس قبال شهر وقاعدين مع العروس ايام التعليم..... عشان كدا يكونو شفو الرقيص......الله يكفينا شرهم
|
Post: #32
Title: Re: كونداليــزا رايــس....و.....عبـــدو تـي
Author: سجيمان
Date: 04-17-2004, 11:31 AM
Parent: #15
شاك
| Quote: وهسع رحلتها لى ام مغت |
عشان كدا شايف السي ان ان الايام دي ما عندها شغلة غير غنية السمحة قالو مرحلا
|
Post: #31
Title: Re: كونداليــزا رايــس....و.....عبـــدو تـي
Author: سجيمان
Date: 04-17-2004, 11:24 AM
Parent: #14
راكوبة
| Quote: والله بختك يا سجيمان، وهاك الصورة دي من أيام المدرسة كمان |
لا حول الله القُصة القدام دي من زمان مربياها؟
|
Post: #28
Title: Re: كونداليــزا رايــس....و.....عبـــدو تـي
Author: سجيمان
Date: 04-17-2004, 04:45 AM
Parent: #12
الهميم
دا ما قالو طلقا زمان
|
Post: #20
Title: Re: كونداليــزا رايــس....و.....عبـــدو تـي
Author: tariq
Date: 04-16-2004, 10:25 PM
Parent: #1
|
Post: #34
Title: Re: كونداليــزا رايــس....و.....عبـــدو تـي
Author: سجيمان
Date: 04-17-2004, 11:39 AM
Parent: #20
طارق ..... الصورة دي جبتها من وين؟...... من النيوزويك؟
|
Post: #24
Title: Re: كونداليــزا رايــس....و.....عبـــدو تـي
Author: صديق الموج
Date: 04-16-2004, 11:42 PM
Parent: #1
شلتها يا خالد..... طلع معاي اسم عمر...... عمر بنقو... بتاعَ QUITE
شفت خالد الحاج ده برى كيف..هو قاصد عمر الجزلى تقوم انت
تجيب لينا (سيرة الهوى ) غايتوا جنس ناس!!!!!!!
|
Post: #42
Title: Re: كونداليــزا رايــس....و.....عبـــدو تـي
Author: سجيمان
Date: 04-17-2004, 02:38 PM
Parent: #24
صديق الموج
| Quote: تجيب لينا (سيرة الهوى ) غايتوا جنس ناس |
اريتو هوى السرور.... اللا بيتلوم فيك لا بيغليت عليك.... اريتني بي نفختو وتمبيلتو
|
Post: #25
Title: Re: كونداليــزا رايــس....و.....عبـــدو تـي
Author: jini
Date: 04-17-2004, 00:51 AM
Parent: #1
سجيمان
كوندليزا دي في الهاي أسكول فازت بي لقب أجمل ساقينمعقول يدوها لي سجيمان صاحب أشنا كرعين
قال حاسد قال.
جني
|
Post: #26
Title: Re: كونداليــزا رايــس....و.....عبـــدو تـي
Author: Adil Ali
Date: 04-17-2004, 02:33 AM
Parent: #25
سجيمان يا اخوي مبروك.... التسريحة ما مشكلة... وصرّة الوش بتروح إذا شدّيت حيلك (تصبح نبي)...لكن المشكلة إنه حا يكون عندك ضيوف زي ناس دونالد رامسفيلد وبول ولفويتز وديك شيني.
بيل جيتس دفع كم في الكشِف؟؟
|
Post: #29
Title: Re: كونداليــزا رايــس....و.....عبـــدو تـي
Author: Saifeldin Gibreel
Date: 04-17-2004, 05:15 AM
Parent: #26
عمر بنقو... بتاع الجابون...... عليك الرسول شفت الاسم دا سمح كيفن؟....واريتو ابوهو يبقى في راسي وراس البريدوني....بعد دا الحال.
أنشاءلله ياسجيان
|
Post: #36
Title: Re: كونداليــزا رايــس....و.....عبـــدو تـي
Author: سجيمان
Date: 04-17-2004, 02:14 PM
Parent: #29
سيف الدين جبريل
الله يقبل دعاءك
|
Post: #35
Title: Re: كونداليــزا رايــس....و.....عبـــدو تـي
Author: سجيمان
Date: 04-17-2004, 11:43 AM
Parent: #26
عادل علي
| Quote: بيل جيتس دفع كم في الكشِف؟؟ |
الكشف عند الامين اخوي..... ولي شهر كايس لو.... يكون زاغ بيهو...عشان كدا ما بقدر اعرف بيل دفع كم؟
|
Post: #40
Title: Re: كونداليــزا رايــس....و.....عبـــدو تـي
Author: سجيمان
Date: 04-17-2004, 02:33 PM
Parent: #25
جني
| Quote: يدوها لي سجيمان صاحب أشنا كرعين |
صاح كرعيني شينات...... لكن عندي اضنين بنوت الحلة جت كانن مكسرات فيهن
|
Post: #30
Title: Re: كونداليــزا رايــس....و.....عبـــدو تـي
Author: ود الشيخ
Date: 04-17-2004, 07:12 AM
Parent: #1
. . [qb]
سجيمان
انتا عبدو تي دهـ بيبقى شنو لي بتاعة الباغات
ديك بعدين كونداليسا رايس دي بتعرف تترتر
في الرقيص وخصوصا في اغنية ارقصي رشي عبيرك فينا
ود الشيخ [/qb]
|
Post: #37
Title: Re: كونداليــزا رايــس....و.....عبـــدو تـي
Author: سجيمان
Date: 04-17-2004, 02:19 PM
Parent: #30
ود الشيخ
| Quote: كونداليسا رايس دي بتعرف تترتر |
ها يا زول ها...... في الغنية دي ترترت قبضوها جنب البنتاغون...وهي مترترة
|
Post: #38
Title: Re: كونداليــزا رايــس....و.....عبـــدو تـي
Author: مريم بنت الحسين
Date: 04-17-2004, 02:24 PM
Parent: #37
يا دكتور.. طيب أنا رئيسة السودان.. مالكم ما عزموتونا إنت والعروس...
اصلا أنا دايره أقابل بوش ده في موضوع كده.. وقلنا نتحجج بي مجاملتكم في العرس...
بالغتوا ياخ .. وين مصلحت البلد؟
بنت الحسين
|
Post: #43
Title: Re: كونداليــزا رايــس....و.....عبـــدو تـي
Author: سجيمان
Date: 04-17-2004, 02:46 PM
Parent: #38
مريم بنت الحسين
| Quote: طيب أنا رئيسة السودان.. مالكم ما عزموتونا إنت والعروس |
الغريبة نحن قدمنا دعوة....لرئيس السودان....جونا حداشر نفر...وكل واحد يقول انا الرئيس.....لحدي ما كندويتي زعلت واتحرقت وقرررررربت تحرد العرس
|
Post: #41
Title: Re: كونداليــزا رايــس....و.....عبـــدو تـي
Author: عزيز
Date: 04-17-2004, 02:35 PM
Parent: #30
يادكتور إف سان لوران
وهذا الاسم الذى يليق بك وانت تنشر العطر باريحية فى هذا المكان
لك الحب والشوق
أقسم بالذى لا أله الا هو منذ أن شاهدت هذا الغزال المدعو كونداليزا وهى تتبسم ويشع ثناء فلجتها فى زرزرت لجنة التحقيق عن احداث سمبتمبر بدأت أفكر فى أن اطلب منك التوسط لى مع معارفك بالبيت الابيض فى طلب يدها وخاصة بعد ماعرفت إنها أرمله ووارثة كمان .. وكمان عندى اطماع فى بعض دول العالم كنت أرغب فى الحصول عليها بواستطها لأننى علمت بأنها تتعامل مع السياسة الامنية كما تتعامل مع حليها..
ولكن حلمك هذا كسر قلبى واصابنى بالحزن العميق ونهايتو ربنا يسعدك ويحفظك من بوش البغير عليها من بوسات مرافق شارون ما يعاملك زى سكان الفلوجة..
والله يادكتور لا استطيع الرد على اى من بوستاتك مع إننى بدخل البورد عشان اقرأ ما تكتب واضحك من أعماقى ثم اذهب سعيدا وعندى مناعة للبوستات التى تصفعك اول ما تفتحها..
يديك العافية وبيت فى كتير العوامره عامر بى كل أهل العوض يارب
أخوك
|
Post: #45
Title: Re: كونداليــزا رايــس....و.....عبـــدو تـي
Author: سجيمان
Date: 04-17-2004, 03:29 PM
Parent: #41
عزيز
اهلا بك واسعدتني طلتك والله
اما بخصوص حرمنا في الحلم كوندليزا والتي اناديها تدليعا بي كندويتي.....انها اضغاث احلام فلا تبتئس.... والعرس قسمة ونصيب....
وان شاء الله بوش يموت وانت طواااالي ارقد بدري واتغطا كويس واتوكل واحلم بي عرسك علي ارملتو.....لكن اوعك تجيب مبارك حسن بركات ..ولاّ البعيو....ديل كُج......
|
Post: #39
Title: Re: كونداليــزا رايــس....و.....عبـــدو تـي
Author: تاج السر حسن
Date: 04-17-2004, 02:32 PM
Parent: #1
يل سجيمان يا خوى ات بنية (رايس) الوقعت فيها دى ، بتوكلا (رز) ولا كنتاكى ولا (أم رقيقه) ولا (سخينه بى دكوه) ولا (بتنام خفيف).
|
Post: #44
Title: Re: كونداليــزا رايــس....و.....عبـــدو تـي
Author: قلقو
Date: 04-17-2004, 02:50 PM
Parent: #39
ياسجيمان تعال هنا ورينا ده شنو الكلام الأعوج البتسوى فوقو دة؟ياخى الواحد اصلو مايوريكم حاجة الا تقوموا ناطين فيها؟ ياخينا انا مش قبل يومين تلاتة وسطتك للبنية قونقوليزا ؟ واتارى انت بتلف وتدور معاى اتاريك راقدلك فى راى..معليش الغلطان انا لأنى وسطت لى طفل صغير ومصاب بداء الهبل العاطفى.
وبعدين الأسمه عزيز دة جاى ناطى لينا من وين ؟
حسبى الله ونعم الوكيل.
|
Post: #47
Title: Re: كونداليــزا رايــس....و.....عبـــدو تـي
Author: خالد عويس
Date: 04-17-2004, 03:41 PM
Parent: #44
والله يا سجيمان ياخوي بالغت ... كونداليزا مرة واحدة
لو شاعرنا بيقول أنثى ولا دستة رجال
دي أنثى ولا الف الف راجل !
الرجال الفي امريكا كلهم ما هوبوا ناحيتها انت تمشي تهوّب؟؟
هسع بسبب الحلم ده لو خمخموك لي غوانتنامو نقول يامنو ؟؟ والتهمة طبعا "التآمر في حلم" بعدين تعال فرضنا انو البت كونداليزا وافقت "الشيلة" الحتوديها لي مستشارة أمن قومي شنو ؟؟ أوعى تقول لي 6 تياب و6 قدور محلبية "وبوش قال شوية" حتودي كم حاملة طائرات وكم غواصة ..
ده كلو كوم والكوم الكبير لو قالوا ليك المهر ....... راس بن لادن ؟؟؟؟
|
Post: #50
Title: Re: كونداليــزا رايــس....و.....عبـــدو تـي
Author: سجيمان
Date: 04-17-2004, 03:59 PM
Parent: #47
خالد عويس؟؟؟؟؟؟؟؟؟؟؟؟
بركة يا يابا انا الحلمت بي كونداليزا"كندويتي"..... عشان تزورني وتجي تبارك.....وتحسدني فيها.....قال لي راس بن لادن؟.....
عرق محبة من مايرنو...واربطو في ضراعي اخلي اناتي امريكا كلهن جارايات وراي.....والمعرسات يطلقن رجالن عشان يعرسني....وشوف الشاكوش الح ياخدو بوش.....
|
Post: #48
Title: Re: كونداليــزا رايــس....و.....عبـــدو تـي
Author: سجيمان
Date: 04-17-2004, 03:44 PM
Parent: #44
قلقو
| Quote: ياسجيمان تعال هنا ورينا ده شنو الكلام الأعوج البتسوى فوقو دة؟ |
يا اخوي قول بسم الله......وما تحرر نفسك وتهرج فوقنا ساكت... الشي قلنا لك حلم...... غايتو ناس بتريد الشبك زي عيونا
|
Post: #49
Title: Re: كونداليــزا رايــس....و.....عبـــدو تـي
Author: عزيز
Date: 04-17-2004, 03:45 PM
Parent: #44
الاخ الذيذ المقلق قلقو
لك الود والتحية
تعرف ياقلقو ياخوى كنت بشاهد فى كونداليزا فى شهادتها العلنية كما سميت وكنت ارى حينها الاخ سى جى وهو يرسم لها لوحة ساخره وهذا ماجعلنى افكر فى استنفاره واستفزاز قدراته لفتح بوست يفرخ هذه الشحنات المتناقضة فى دواخلنا لسياسة العالم التى تقودها هذه الكونداليزا التى تتعاطى معها وكأنها تتعاطى مع حليها ..
وكنت ابحث عن الكيفية التى اوصل بها هذه الفكره للدكتور إف سان لوران .. ولكن يظهر بيننا جان ودود اوصل الفكره قبل أن ابثها (نقول امسك الخشب) توارد الخواطر شئ مهيب وجميل فى ذات الوقت..
تعرف ياقلقو خلى سى جى يتهنى بيها ده طبعا كان بوش عمل نايم
والله قالوا ليك جنس غيره عليها .. ده بفك فيها قنابل عنقودية
لكما محبتى
|
Post: #46
Title: Re: كونداليــزا رايــس....و.....عبـــدو تـي
Author: سجيمان
Date: 04-17-2004, 03:36 PM
Parent: #39
تاج السر الحسن
| Quote: يل سجيمان يا خوى ات بنية (رايس) الوقعت فيها دى ، بتوكلا (رز) ولا كنتاكى ولا (أم رقيقه) ولا (سخينه بى دكوه) ولا (بتنام خفيف). |
منو البي يأكل التاني؟....يا اخوي هي تأكلني....نان معرسا لي شنو؟
|
Post: #51
Title: Re: كونداليــزا رايــس....و.....عبـــدو تـي
Author: قلقو
Date: 04-18-2004, 08:33 AM
Parent: #46
الحبيب عزيز..
طبعا تكون مندهش لغضبتى المضرية على حبيبنا سى جى لكنك لو عرفت الموضوع حتعذرنى والموضوع بأختصار ياابو عزيزة انه حبيبنا سجيمان ظهر انه عنده واحدقريبه طلع من لوتراب امريكاوانا يامؤمن يامصدق اقوم اوصى سجيمان بانه يكلم قريبه انه يتوسط للعبدلله لى الآنسة (مش هى برضه آنسة)
قونقوليزا على سنة الله ورسوله ووعدت انا سجيمان انه لو الموضوع تم على خير اقوم ارد ليه التحية بأحسن منها واتوسط ليه مع الأرمله مادلين اولبرايت..لغاية هنا انا غلطان ياابوعزيزة ؟
ردود سجيمان لى ياابوعزيزة ماكانت مطمنة اتاريهو كان خاتى البنية فى راسو بدليل انه حلم بيها ولا اريد ادخال حروف الألف والسين والتاء فى الموضوع..وبعد ده ياابوعزيزة هو عامل زعلان ويقول علينا ناس لبط..والله ضربنى وبكى وسبقنى اشتكى..
ابوعزيزة..زح من البنيه ارجوك..اما حبيبنا سجيمان فالأيام بيننا دول وان شاء الله قريبك اللوترابى يجيبوه مع اول كشة.
ودمتم
|
Post: #52
Title: Re: كونداليــزا رايــس....و.....عبـــدو تـي
Author: 7abib_alkul
Date: 04-18-2004, 11:07 AM
Parent: #51
سيجماااااااااااااااان
عندك مشكلتين
الاولي بتاعت ام الخير حا تحلها كيف؟؟؟؟
والمكشلة التانيه لو كلنتون قال داير المدام في استشارة
والله الا تقول ليه اتفضل يا شيخ كلنتون انا امشي اجيب ليك البارد من الدكان وتمشي تلف الشارع كم لفه بكرعيك وتجي راجع تلقاه استشار وفات
|
Post: #53
Title: Re: كونداليــزا رايــس....و.....عبـــدو تـي
Author: ابو جهينة
Date: 04-18-2004, 11:55 AM
Parent: #52
د. سي جي الوارف
( علا الجماعة حدسو ناس البنتاغون وقالو لهم دا عريس كونداليزا وبيقطع في رحطا....حتين هجدو....وماني عارف كان شوية زحيت من محل الخيت دا لي تحت كان سو شنو؟..)
معقول يا سي جي ناس الحكومة الفدرالية ديل يخلوا ليك العروس هامل كدة بدون شبكة إنذار ؟
أكيد إنت إتعديت خطوط الرحط الحمراء و وصلت إلى سلك موصول بشبكة إنذار في الإف بي آى و البنتاغون. ربك ستر ،، يوم عرسك كان حيجيك كروز عابر
|
Post: #56
Title: Re: كونداليــزا رايــس....و.....عبـــدو تـي
Author: سجيمان
Date: 04-18-2004, 01:16 PM
Parent: #53
ابوجهينة
| Quote: أكيد إنت إتعديت خطوط الرحط الحمراء و وصلت إلى سلك موصول بشبكة إنذار في الإف بي آى |
بيني وبينك في حاجة طعنتني في اصبعي...... لكن ما عرفتها شنو؟....الناس ديل ما عارفين المرا دي عروس...ما كانو يجيهوها
|
Post: #55
Title: Re: كونداليــزا رايــس....و.....عبـــدو تـي
Author: سجيمان
Date: 04-18-2004, 01:05 PM
Parent: #52
| Quote: الاولي بتاعت ام الخير حا تحلها كيف؟؟؟؟ |
ام الخير مرا سبورت.... وما يهمها شي.....طالما الموضوع فيهو منفعة
اما بوش...لومك علي ما يعتب خشم الباب......وانا زاتي اول ما اعرسا حاسافر بيها....وتفارق امريكا فراق الطريفي لي جملو
|
Post: #58
Title: Re: كونداليــزا رايــس....و.....عبـــدو تـي
Author: سجيمان
Date: 04-18-2004, 03:18 PM
Parent: #51
قلقو
Quote: وان شاء الله قريبك اللوترابى يجيبوه مع اول كشة.
|
يا اخوي اخد الجنسية.....وبقي امريكي عدييييييييييييل...اها شن قولك بعد دا
|
Post: #54
Title: Re: كونداليــزا رايــس....و.....عبـــدو تـي
Author: aboalkonfod
Date: 04-18-2004, 12:30 PM
Parent: #1
أخوي/ سجيمان
مبروك عليك الحلمة وعقبال البيت الأخضر وجردل (البترول)
أبت نفسو شخصياً إلا المشاركة وتفضل السيد كوفي أنان بكتابة
كرت الدعوى ..
طبعاً بعد آيات المقدمة المعهودة
يتشرف آل السجمان والرمدان بالسودان والسعودية والخليج وما وراء البحار وخلف المستعمرات بدعوتكم لتناول المرطبات والكاسات بمناسبة عقد قرانه على سليلية الحسب والنسب الآنسة العانسة "كدويتو" كريمة
آل رايس وأخوالها وأعمامها بأمريكا وأفريقيا وكوبا.
وستقام المراسم بباحة البيت الأبيض بمصاحبة فرقة الفرقاطات والمدرعات والصواريخ العابرات.
أها السمع يكلم الما سمع
والعاقبة عندكم في المسرات
|
Post: #57
Title: Re: كونداليــزا رايــس....و.....عبـــدو تـي
Author: سجيمان
Date: 04-18-2004, 01:28 PM
Parent: #54
ابو القفند
Quote: يتشرف آل السجمان والرمدان بالسودان والسعودية والخليج وما وراء البحار وخلف المستعمرات بدعوتكم لتناول المرطبات والكاسات بمناسبة عقد قرانه على سليلية الحسب والنسب الآنسة العانسة "كدويتو" كريمة
آل رايس وأخوالها وأعمامها بأمريكا وأفريقيا وكوبا.
وستقام المراسم بباحة البيت الأبيض بمصاحبة فرقة الفرقاطات والمدرعات والصواريخ العابرات.
أها السمع يكلم الما سمع |
وسوف تجدون القرين كارد مرفق مع المرطبات
|
Post: #59
Title: Re: كونداليــزا رايــس....و.....عبـــدو تـي
Author: esam gabralla
Date: 04-19-2004, 10:34 PM
Parent: #1
up
|
Post: #60
Title: Re: كونداليــزا رايــس....و.....عبـــدو تـي
Author: سجيمان
Date: 04-20-2004, 11:22 PM
Parent: #59
عصام جبر الله
الله يرفع شانك......ويعلي مراتبك
|
|