Post: #1
Title: اللـــهو المبــاح...... عند جماعــة الاستنكــاح
Author: سجيمان
Date: 05-10-2004, 12:26 PM
Parent: #0
الاستنكاح... الاستهبال... الضحك علي الدقون...والاكل بالعقل حلاوة..يا قول اهلنا المصرين... كلها شي واحد....مع انو اهلنا المصرين ماكلين بي عقلنا حلاوة من زمن توت عنخ امون ولي حسي...لكن بي مزاجنا نحن وفنجرة مننا...ما شاطرة ولا فلاحة منهم....نحن كدا نحب ان نُستنكح...حسي لافين ومالين الدنيا كلها والناس تستهبل علينا....وتستنكحنا...لكن برضو فينا ناس قلبت....وحلفت علا تضرب بالقاعدة دي عرض الحائط.....حاجة التومة عينة..... مرا في غاية الاستنكاح..... تركب جنبك في الباص في كنبتك... وتقول لك يا ولدي زح لي شوية بس اخت طرف صلبي.... تزح ليها بعد شوية هي تتفجفج وتملا الكرسي كلو...وانت لا تحرا لا تدرا تلقى نفسك في الواطا مصنقر....والغريبة طوالي تغمد عيونا وتسوي نفسها نائمة...عبد الدائم سيد الخدار...طوالي يشتكي منها....مسكين هو قاعد يتمتم... والتمتمة تزيد وقت يزعل..... حاجة التومة استغلت الوضع السايكولوجي بتاع عبد الدائم...وبقت تجي الدكان وتملا قفتا خدار قول بي خمسة وعشرين الف...وتسألو ..... حسابك كم يا عمي عبد الدائم..... طبعا كلمة عمي دي هي عارفاها بتزعلو...هو طوالي يزعل ويحمبك....ويبدا يتمتم.... حسابك يا التو.... تو....تو...مة.... خمسة.....خمسة ......قبل ما يتم كلامو ويقول لها خمسة وعشرين..... هي تعتمد علي الخمسة الركن فيها عبدالدائم دي ..وتروح قاشطاهو بي خمسة الاف ...وفللي... علي.... بيتا... قبل ما يتمها....وهو يلحقا في البيت.... ويبدا يشكي لي اولادا الوضع.....حاجة التومة تحلف بالتكسرا... انو عبد الدائم قال حسابا خمسة الاف...وهي صادقة....
الايام دي عندي عربتي مجنناني وكل يوم عن ميكانيكي...... اكتشفت ميكانيكي تمتمام.....وبقيت ادعي لي حاجة التومة ربنا يخليها ويديها العافية ويمد في اياما...السهلت لي اني استنكح الميكانيكي التمتام دا....واشحد في الله انو حسابي معاهو يبقى فيهو كسور.... يعني... خمسة وعشرين.... ستة وتلاتين... اتنين واربعين..... ووضعت خطة..... اني اول حاجة اركب العربية وادورا.... واطلع الفكة براااا..واسعلو حسابو كم...واول ما يبدا يتمتم يقول لي..... اتنين... اتنين... اتنين... اروح قاشطو بالريالين....واقوم صوف.......
رســـالة الي رئيــس الجمهــورية
|
Post: #2
Title: Re: اللـــهو المبــاح...... عند جماعــة الاستنكــاح
Author: abas
Date: 05-10-2004, 12:38 PM
سجومي
طيب لو قال ليك
ستين
ولا في اللحظه ديك لسانو انطلق انت بتقول شنو
|
Post: #3
Title: Re: اللـــهو المبــاح...... عند جماعــة الاستنكــاح
Author: Ali Alhalawi
Date: 05-10-2004, 02:43 PM
Parent: #2
ولو طلع بتاع عربية فصحى (مش عربية ملكلكة و محتاجة لميكانيكى) و قال ليك : ألفين .... (ألفيين ووووووو ستمائة ووووووو خمسة وووووووو خمسون)
|
Post: #7
Title: Re: اللـــهو المبــاح...... عند جماعــة الاستنكــاح
Author: سجيمان
Date: 05-10-2004, 08:07 PM
Parent: #3
الحلاوي
| Quote: ولو طلع بتاع عربية فصحى (مش عربية ملكلكة و محتاجة لميكانيكى) و قال ليك : ألفين .... (ألفيين ووووووو ستمائة ووووووو خمسة وووووووو خمسون) |
برضو حاستنكحو في ستمائة وخمسة وخمسين
|
Post: #5
Title: Re: اللـــهو المبــاح...... عند جماعــة الاستنكــاح
Author: سجيمان
Date: 05-10-2004, 04:45 PM
Parent: #2
عباس
Quote: سجومي
طيب لو قال ليك
ستين
ولا في اللحظه ديك لسانو انطلق انت بتقول شنو |
انا قلت لك اشحد في الله ما يبقى حسابو فيهو اصفار...ويبقى كلو كسور...وبعدين زول تلاتين سنة لسانو مربوط..داير ينطلق عند محاسبتي ليهو بس
|
Post: #4
Title: Re: اللـــهو المبــاح...... عند جماعــة الاستنكــاح
Author: essam&amal
Date: 05-10-2004, 03:07 PM
شفت يا سجيمان انا حاجة التومة بتاعتكم العينة دى
طوالى ترفع لى الضغط .
وعشان الاستنكاح ده بخت ليها القدرها
لا بركب معاها باص ولا بخلى بتاع الخضار حقنا يديها خضار
من اشوفها مدت وشهااختفى مرة واحدة انا عويرة ليها .
وانت ابقى فالح كان الراجل قال ليك ستين طوالى اديهوا ستين هلله
اوعى عباس يغشك
قال ستين قال
ريالين بس حلفتك بى شيخك
لك الود يا رائع
ام وضاح
|
Post: #8
Title: Re: اللـــهو المبــاح...... عند جماعــة الاستنكــاح
Author: سجيمان
Date: 05-11-2004, 06:53 AM
Parent: #4
ام وضاح
| Quote: وانت ابقى فالح كان الراجل قال ليك ستين طوالى اديهوا ستين هلله |
ستين هلله ما بتتلقي....اديهو ريال....واحلف من الباقي
|
Post: #6
Title: Re: اللـــهو المبــاح...... عند جماعــة الاستنكــاح
Author: alfatih
Date: 05-10-2004, 05:07 PM
سجيمان
تاكل الميكانيكى ؟
وعلى الطاحونة يقوم يرفع ليك مفك الا يفتشوك من تحت العربية
|
Post: #10
Title: Re: اللـــهو المبــاح...... عند جماعــة الاستنكــاح
Author: سجيمان
Date: 05-11-2004, 12:03 PM
Parent: #6
الفاتح
| Quote: وعلى الطاحونة يقوم يرفع ليك مفك الا يفتشوك من تحت العربية |
يا زول هو الوقت داك فكر لي مفك ولاّ غيرو.... يكون كايس لي باقي النضم
|
Post: #9
Title: Re: اللـــهو المبــاح...... عند جماعــة الاستنكــاح
Author: Al-Shaygi
Date: 05-11-2004, 08:21 AM
دابي فهمت ليه موقعك كل مره داير يصلحولو العربي ،، يكون الباعوليك تمتام ....
|
Post: #11
Title: Re: اللـــهو المبــاح...... عند جماعــة الاستنكــاح
Author: سجيمان
Date: 05-11-2004, 01:46 PM
Parent: #9
الشايقي
Quote:
دابي فهمت ليه موقعك كل مره داير يصلحولو العربي ،، يكون الباعوليك تمتام .... |
الموقع هدية من اخونا انور كنغ
|
|