Post: #1
Title: السيــدة حـــرم رئيس الجمهـــورية
Author: سجيمان
Date: 05-23-2004, 03:17 PM
Parent: #0
بعد مرات.... لما اكون قاعد براي.... بتخيل نفسي حاجات كتيرة....مرة فنان...ومرة مذيع في الام بي سي......ومرة اشطح واتخيل نفسي رئيس.... عديل كدي....قاعد اتونس مع ام الخير قلت ليها...والله يا ام الخير نفسي...نفسي ... ابقى رئيس...... ام الخير سمعتا غلط.... مدت قدوما وزعلت ....وقالت لي انت البي تدورك مني دي.... والبي ترضى بك غيري منو؟......مسكينة قايلاني قلت لها داير ابقى عريس.....وضحت ليها قلت لها رئيس.. رئيس يا ام الخير... حتين ضحكت واتكيفت وقالت لي..... يا يابا نان مو خايله فيك ..كُر اريتك رئيس السرور...وبلد انت رئيسا الله راضي عليها....وناسن انت رئيسم دي الجنة واتفحت ليهم... ابقى ريئس يا ام الخير... واعين لك مشاطة.....ونقاضة.... الاتنين يقعدن عن راسك....واحدة تمشط والتانية تنقض المشطتو المشاطة.. واعين لك وداعية...تقعد قبلك طول النهار وترمي في الودع....واجيب لك حفرة دخان من اليابان.... من حفر البراكين الكتيرة ديك....والله يا ام الخير ابسطك بسط...واعينك مستشارة لي.. والناطقة الرسمي باسمي... يوم اكون زهجان ومتلبش.... تنضمي انتي بدلي انضمي قولي أي حاجة والراجل ولا المرا اليقول لك نضمك اعوج كان ما عوجت رقبتو.....بقرار جمهوري...انتي هينة ...ولاّ مقطوعة لينة؟.....ووحات الله اشاورك ونضمك ما ارميهو البحر........واسوقك معاي محل ما امشي..... بس عندي طلب وااااااحد.... الطلب دا انو. فوفو بنيتك دي ما تشيليهاو تشتحيها في صفحتك...ونحن نكون بنزور بلد..تبقي شايلها في صفحتك وتسلمي علي مرة رئيس البلد....وانا عارفا فوفو.... هابشة. وهباشة.. انت شايلاها وومشغولة بالسلام تقوم فوفو... تمد ايدا وتشعبط في شعر مرة الريئس التاني.....وتقعدي تصارعي فيها عشان تفيكي ايدا من شعر مرة الريئس التاني.....قدام الكميرات والتفلزيونات.....
وبعدينك ......ان مشيت موعتمر....وانتي معاي........ وقمت انا حردت في نص الموعتمر عشان ريئس دولة تانية حمر لي عينو وصرا لي وشيهو...... انتي طوالي تتقنعي في توبك...وتعملي موعتمر صحفي.....
وتقولي انو السيد الرئيس الله يغتي عليهو..... من البارح دي وحات الله مشتكي من بطنو.... وماها لبابة...ماني عرفاهو ماكل شنو يا حباني؟.....والليل دا كلو يشولت علي الحمام....وحسي دي لا حردان ولا حاجة.... دي دعاية صهيونية. وانا عارفاهو النضم دا من قنقون قناة القشيرة دي.... علا النصيحة لك يا الله بطنو عصرتو.... انتو ما شوفتوهو كان قاعد يتحرقص كيفن في الكرسي؟..... حسع مرق ومشى المستراح. الله يحفضو ويغتي عليهو ويهون لو القواسي ويسهل لو كل امر صعيب.. وبعد ما يجي من المستراح.الله يحفضو..... حيعمل موعتمر صحفي... ويرجع يقعد في بكانو.....
|
Post: #2
Title: Re: السيــدة حـــرم رئيس الجمهـــورية
Author: ابو جهينة
Date: 05-23-2004, 03:44 PM
Parent: #1
عزيزي سي جي
(واجيب لك حفرة دخان من اليابان.... من حفر البراكين الكتيرة ديك)
إنت ناوي تسلخ الولية و هي حية يا سي جي ؟
|
Post: #3
Title: Re: السيــدة حـــرم رئيس الجمهـــورية
Author: omer almahi
Date: 05-23-2004, 05:06 PM
Parent: #2
سيدى الرئيس
إن الإختلاف فى الود لا يفسد للرأى أى قضية
عمر الماحى عضوء
الإختلاف الوطنى لإسترجاع الأحلام الديمقراطية من الداخل
|
Post: #4
Title: Re: السيــدة حـــرم رئيس الجمهـــورية
Author: صديق الموج
Date: 05-23-2004, 05:14 PM
Parent: #3
| Quote: ...ومرة مذيع في الام بي سي...... |
سجيمان وكتين تبقى فى ام بى سي.....ام الخبر لزوما شنو ما قالوا نشوى الروينى مكسره
فيك...ال ام بى سى ال،،،
|
Post: #10
Title: Re: السيــدة حـــرم رئيس الجمهـــورية
Author: سجيمان
Date: 05-23-2004, 11:59 PM
Parent: #4
صديق الموج
Quote: قالوا نشوى الروينى مكسره
فيك |
تكسير من جانب واحد..... انا ما مكسر فيها....عشان هي لما تضحك قاعدة تبقى شينة....وعندها قِن
|
Post: #9
Title: Re: السيــدة حـــرم رئيس الجمهـــورية
Author: سجيمان
Date: 05-23-2004, 10:23 PM
Parent: #3
عمر الماحي
| Quote: إن الإختلاف فى الود لا يفسد للرأى أى قضية |
حنطلع قرار جمهوري باستحداث وزارة جديدة...ونسميها وزارة الاجاويد وشعارها حيكون الاختلاف في الرأي لايفسد للود قضية......ونعينك وزير... اها شنوقولك؟ قصرت معاك
|
Post: #8
Title: Re: السيــدة حـــرم رئيس الجمهـــورية
Author: سجيمان
Date: 05-23-2004, 08:45 PM
Parent: #2
ابو جهينة يا حبيب
| Quote: إنت ناوي تسلخ الولية و هي حية يا سي جي ؟ |
ام الخير سلامتا من السلخ...... واليابانين ديل غالبم يطفو النار ويسلمونا الحفرة ؟....دا حفرة دخان رئاسية
|
Post: #5
Title: Re: السيــدة حـــرم رئيس الجمهـــورية
Author: مريم بنت الحسين
Date: 05-23-2004, 05:37 PM
Parent: #1
انا أحتج علناً.. اسمك ما مدوّن في سجل المرشحين للرئاسة...
يعني اترشحت ونجحت .. وبقيت الرئيس ومشيت المؤتمر وسقت معاك أم الخير كمان!
|
Post: #12
Title: Re: السيــدة حـــرم رئيس الجمهـــورية
Author: سجيمان
Date: 05-24-2004, 07:44 AM
Parent: #5
مريم بنت الحسين
Quote: انا أحتج علناً.. اسمك ما مدوّن في سجل المرشحين للرئاسة...
يعني اترشحت ونجحت .. |
انتي زعلانة مالك؟..... ممكن يكون سقط سهوا..... والسقوط السهو دا ما غريب علي....ديمة ساقط سهوا وكاسر يدي....وبعدين التداول السلمي للسطة.... كل سنتين رئيس زي البظابورتي بتاعنا...يعني اي مواطن سوداني حيكون رئيس....ونرتاح من الهيصة والغاغة والمشاكل دي...
|
Post: #6
Title: Re: السيــدة حـــرم رئيس الجمهـــورية
Author: عبدالماجد فرح يوسف
Date: 05-23-2004, 06:35 PM
Parent: #1
الأخ سجمــــأن,
يعجبني كثيراً قلمك الســاخر غير المنضبط, فقد مكثت أضحــك لسنين ضــوئية طويلة وأنا أقرأ مواصفات عروس الأخ المهندس أنور كنج.
..........
طرحك في هذا البوست يقودنا الي تســاؤلات حقيقية, عن الدور الذي تلعبه أو يمكن أن تلعبه زوجة الرئيس الســوداني, وكذلك ماهي ابرز الأدوار التي قمن بها(زوجات الرئيس) منذ أستقلال الســودان.
من خلال بوستك هذا أدعو الصحفية رجاء والكاتبة الساخرة توما للادلاء بتصورهن.
سؤال: من هي أو هن Mrs البشـــر من ناحية المؤهلات والادوار؟
|
Post: #13
Title: Re: السيــدة حـــرم رئيس الجمهـــورية
Author: سجيمان
Date: 05-24-2004, 08:50 AM
Parent: #6
عبد الماجد شرف يوسف
حبابك الف
| Quote: طرحك في هذا البوست يقودنا الي تســاؤلات حقيقية, عن الدور الذي تلعبه أو يمكن أن تلعبه زوجة الرئيس الســوداني, |
انا غايتو ام الخير جيهتها...... اما نسوان الباقين.. ما عندي بيهم شغلة...وبعدين انا ما شايف اي زوجة رئيس عربي ليها دور
|
Post: #7
Title: Re: السيــدة حـــرم رئيس الجمهـــورية
Author: abdalla BABIKER
Date: 05-23-2004, 08:01 PM
Parent: #1
ياربنا يحقق ليك امنياتك وامنيات ام الخير
وربنا بيدي الجنه
والله كتاباتك ظريفة وجميله
|
Post: #17
Title: Re: السيــدة حـــرم رئيس الجمهـــورية
Author: سجيمان
Date: 05-24-2004, 12:54 PM
Parent: #7
عبد الله بابكر
| Quote: ياربنا يحقق ليك امنياتك وامنيات ام الخير |
آمين يا رب
تسلم يا ظريف
|
Post: #11
Title: Re: السيــدة حـــرم رئيس الجمهـــورية
Author: ABUHUSSEIN
Date: 05-24-2004, 00:21 AM
Parent: #1
يا سجيمان ما فهمنا حاجة عايز تكون رئيس جمهورية و أم الخير تكون حـرم رئيس الجمهورية
و لا عايز أم الخير تكون حـرم رئيس الجمهورية و بالتالي تكون إنت رئيس جمهورية
يعني بالواضح كــدا إنت قـدام أم الخير و لا إنت ماشي وراها
|
Post: #18
Title: Re: السيــدة حـــرم رئيس الجمهـــورية
Author: سجيمان
Date: 05-24-2004, 01:17 PM
Parent: #11
ابو حسين
Quote: يعني بالواضح كــدا إنت قـدام أم الخير و لا إنت ماشي وراها
|
غايتو في السهلة انا ماشي قداما....علا اول ما نخل البيت هي تمشي قدامي
|
Post: #14
Title: Re: السيــدة حـــرم رئيس الجمهـــورية
Author: Al-Shaygi
Date: 05-24-2004, 09:37 AM
Parent: #1
كدي يا سيادة الرئيس اللوصيك شان توصي أم الخير حرمكم ...
لامن تكون الزيارة الخارجية للدول الغربية وصيها ما تسف التمباك وتخلي الحقة في البيت عشان السلام عندهم بالبوس !!!
وما تقوم تسوي ليك الإحراج تنزل من الطيارة ومقنطرة السفة قدام الكاميرات وعلى الهواء مباشرة ...
طبعاً أنت بتبوس حرم الرئيس المضيف والرئيس داك ماشي يبوس ليك أم الخير (في جضمه) وطبعاً بوس الجضوم ما بزعلك..
|
Post: #20
Title: Re: السيــدة حـــرم رئيس الجمهـــورية
Author: سجيمان
Date: 05-24-2004, 01:30 PM
Parent: #14
الشايقي
| Quote: وطبعاً بوس الجضوم ما بزعلك.. |
في الحالة دي...ام الخير تخم فوفو في صفحتا.....واول ما يجي للبوس تناولو جضم فوفو...... ويا دار ما دخلك شر......برضو نحن تفتيحة يا معلم
|
Post: #15
Title: Re: السيــدة حـــرم رئيس الجمهـــورية
Author: حمزاوي
Date: 05-24-2004, 10:08 AM
Parent: #1
أخوي سجيمان ودعم بله
سلام وتحية
يا اخوي اوقف عوج ولكن اتكلم عدل
قال يكون رئيس قال
كدا اشبك فيك الجماعة يجوك بالسيخ
|
Post: #21
Title: Re: السيــدة حـــرم رئيس الجمهـــورية
Author: سجيمان
Date: 05-24-2004, 01:39 PM
Parent: #15
حمزاوي
| Quote: كدا اشبك فيك الجماعة يجوك بالسيخ |
ما تخويفني عليك الله... براي خايف
وبعدين نضمي دا كلو كضب...... وتهيؤات ساكت.....
|
Post: #16
Title: Re: السيــدة حـــرم رئيس الجمهـــورية
Author: كبسيبة
Date: 05-24-2004, 12:09 PM
Parent: #1
حاجة عجيبة خلاس
هو يا جماعة أصلاً رئيس الجمهورية كان ما سجمان وهمو كلو في حفرة الدخان
يعني حيكون شنو يعني ؟
|
Post: #19
Title: Re: السيــدة حـــرم رئيس الجمهـــورية
Author: omer almahi
Date: 05-24-2004, 01:22 PM
Parent: #16
شكرا شكرا سيدى الرئيس
يعنى مافى حليفة على كيس خضار ولا غيرو
أعاهدك على ان لا أترك شاردة ولا واردة وإلا أستغلها الإستغلال الأمثل
كما أقوم بخدمات بلاط جلالتكم وفخامتكم من مراسيل للفرن ولسوق الخضار واللحمة واللخمة وكل خمةما عدا حطب الجاية من اليابان ديك ما تخصصنا يا سيادة الرئيس
وكما سنضرب بيد من حديد كل من تسول له نفسه المساس بثوابتنا وخدماتنا وخططنا المئوية
كما نقوم بتكريم كل ما يسلك خلاف ذلك
لان مصلحتنا هى مصلحة الامة
عمر الماحى :أول وزير للاجاويد بحكومة سجيمان الموقرة
|
Post: #22
Title: Re: السيــدة حـــرم رئيس الجمهـــورية
Author: سجيمان
Date: 05-24-2004, 01:45 PM
Parent: #16
كبسيبة
Quote: هو يا جماعة أصلاً رئيس الجمهورية كان ما سجمان وهمو كلو في حفرة الدخان
يعني حيكون شنو يعني ؟ |
انت كدا تغلط غلط كبير...... وبعدين وقت الزنقة نقع في الواي واي
|
Post: #23
Title: Re: السيــدة حـــرم رئيس الجمهـــورية
Author: جمال السنوسي
Date: 05-24-2004, 03:22 PM
Parent: #22
سجيمان العزيز
غايتو انا بقلبها عليك اخليك يوم تسافر ومعاك ام الخير واها طوالي من الفجر ابدا (بيان رقم 25) ( عيد مايو بكرة 25 مايو) سيبك من بيان رقم (1) ده موضه قديمة من القرن الماضي وطوالي اشيلك معاش وأنقذ البلد من عمايلك ومن عمايل ام الخير
أها انت شوف ليك بلد تانية اقعد فيها واللا كمان اعمل معارضة (مصلحة) بالصاد مش بالسين وكثر من البهارات في بياناتك وغايتو انا بحاكمك غيابياً وأقل شيئ اعدام طبعاً كم سنة كدة بصدر عليك عفو تجي راجع البلد وتعيش معزز مكرم في بلدك لحدى ما يفتكرك الله
ولكن غايتو لو انقلابي ده فشل طوالي انا بخش الغابة وبطلع ليك كدة في نيويورك وحقوق الانسان والعنصرية واحرك ليك جيوش الامم المتحدة الامريكية واطالب بالديمراطية وحقوق الشعب والتداول السلمي للسطلة (اقصد السلطة) اها بعد داك بنقعد انا وانت نتفاوض سنة ورا سنة انت رئيس وانا رئيس معارض ويلا كدة عشرين سنة تاني ونتفق على أن نتفاوض تاني عشرين كمان ( ورانا شنو والماعاجبو يركب الزلط) غايتو يا أنا يا أنت كل مرة واحد يطلع ليهو بي سبب ولحدي ما نلقى لينا حل أنا من هسه بحلك منهاواحسن ليك ما تبقى رئيس خليك مواطن مغلوب والله بينصرك
|
Post: #24
Title: Re: السيــدة حـــرم رئيس الجمهـــورية
Author: سجيمان
Date: 05-24-2004, 03:43 PM
Parent: #23
الاعز
جمال السنوسي
| Quote: احسن ليك ما تبقى رئيس خليك مواطن مغلوب والله بينصرك |
قلت كدي احسن؟.....انا غايتو داير اتوكل علي الله واجرب....وان ما نفعت بعد سنة بسلما للشعب........واتفرغ لي عمل الخير
|
|