Post: #1
Title: شكوى ضد الحكومــة...وانشاء الله يدخلوني بيت النمل زاتو
Author: سجيمان
Date: 05-20-2004, 01:50 PM
شكوى ضد الحكومة متمثلة في شركة الكهرباء....
اولك بالتبادي.... الحاجات الحصلت دي حاجات قديمة لكن حقي ما بخليهو... داير لي محامي كااااارب وشاطر.... وكل الاوراق والمستندات والشهود... قاعدين..... قطوعات الكهرباء الكتيرة خسرتني كتير....وخسرت الناس الموكليني اشتكي نيابة عنهم...
يوم طهارة اخوي علي...طهروهو في البيت.... الطهار جا في الليل..... بدا في شغلو....قولي كدي يا الكهرباء اقطعي.... وكان ما ربنا ستر ولطف ساكت.. ولحقناهو حكيم شاطر.. كان حسي اخوي علي ماشي بي نُص كم..
عمنا ود الخدر جانا من البلد.... داير ياخد لو يومين زول نجيضة ونضام...وجنو مراسيل... ما يشوفك واقف جنبو علا يرسلك...في الليل الكهرباء قطعت ...عمنا شايل ابريقو وماشي يسيّر... يقوم يعفص ضنب كلبنا نمر..... الكلب يتخلع وينط فوق عمنا ويعضيهو.... ود الخدر قعد معانا اربعتاشر يوم زيادة عشان الحقن... كلفتنا كتير غير حق الحقن والدكتور والمواصلات... اقل حاجة سبعة رطل تمباك.... لانو في اليوم يسف لو نص رطل.....
جيرانا ناس صاحبي...ود العمدة.... حبوبتم ماتت.. وكان عمرا فوق المائة سنة.... واخر اياما اتماصت وبقى وزنها اربعتاشر كيلو جلد وعضم...الجنازة مارقة... في الليل.. قومي يا الكهرباء اقطعي.. والباب حقهم ضلفة واحدة وضيق..... تكو العنقريب بتاع الجنازة و ميلوهو عشان يمروقوها.... تقوم الجنازة تتملص من العنقريب وتقع.... ومافي زول جايب خبرا...وشلنا العنقريب وماشين في مشينا. ونكبر ونهلل..العنقريب فاضي... والجنازة واقعة جنب خشم الباب..... لمن وصلنا المقابر...وقت نزلو العنقريب لقوهو فاضي...ود العمدة كان راكب الفيل ورادفني وراهو...اتلفت عليهو وقلت لو يا فردة حبوبتكم تفتيحة شتتت... الغريبة ود العمدة دخل تحت العنقريب... في المقابر ...وقعد يكوس لي جنازة حبوبتو....يمكن يلقاها تحتو... قتلو يا غبي.... ارفع العتنيبة... ممكن تكون تحتا..... رجعونا بي كرعينا.... وبي الدرب الجايا بيهو الجنازة.... يمكن نلقاها واقعة في الدرب...رجعنا ونحن نسعل قدر ما يلاقينا زول..... ما لقيت لك جنازة واقعة.... ؟..... لمن وصلنا البيت لقيناها جنب خشم الباب.... ابو ود العمدة...زول احمق..... حلف تاني مايشيلوها في عنقريب.... جاب لو كرتونة صابون فاضية... وستفا فيها... ومشينا دفناها.....ود العمدة برضو موكلني اشتكي ناس الكهرباء...ويعوضوهم عن حقهم المعنوي في بهدلة جنازة حبوبتو......
ولسه الامثلة كتيرة.....ويا نا س الكهرباء امانة ما ورطو ورطة....
|
Post: #2
Title: Re: شكوى ضد الحكومــة...وانشاء الله يدخلوني بيت النمل زاتو
Author: ABUHUSSEIN
Date: 05-20-2004, 01:59 PM
Parent: #1
| Quote: واخر اياما اتماصت وبقى وزنها اربعتاشر كيلو جلد وعضم.. |
غايتو يا سجيمان الحمدلله لا كنت قريبك و لا جارك و لا حصل شفتني
ياخي
ماممكن لكن الناس ديل ما بشعت بيهم عديل كــدا
|
Post: #4
Title: Re: شكوى ضد الحكومــة...وانشاء الله يدخلوني بيت النمل زاتو
Author: سجيمان
Date: 05-20-2004, 08:50 PM
Parent: #2
ابو حسين
| Quote: ماممكن لكن الناس ديل ما بشعت بيهم عديل كــدا |
بشعت بيهم انا ...ولاّ الكهرباء؟
|
Post: #3
Title: Re: شكوى ضد الحكومــة...وانشاء الله يدخلوني بيت النمل زاتو
Author: حمزاوي
Date: 05-20-2004, 02:50 PM
Parent: #1
اخي / سجيمان ود عم بله
السلام عليكم
تشكلت لجنتان للدفاع الاولي للدفاع عن الحكومة وطبعاً من الحرامية
والثانية للدفاع عن شركة الكهرباء وطبعا برضوا من الحرامية
وطبعا ناس الدفاع الاولي بيختلفوا عن ناس الدفاع الثانية لانهم بيشتغلوا في الظلام
وناس الدفاع الاولي بيحاموا عشان ما يستفيدوا ناس الدفاع الثانية
وياما بيحصل في الظلام حاجات
قال يشتكي ناس الكهربا قال
|
Post: #5
Title: Re: شكوى ضد الحكومــة...وانشاء الله يدخلوني بيت النمل زاتو
Author: سجيمان
Date: 05-21-2004, 12:44 PM
Parent: #3
حمزاوي
| Quote: وياما بيحصل في الظلام حاجات |
صدقت والله العظيم.....حسي الانترنت دا ضلومة شوف المصايب الفيهو
|
Post: #6
Title: Re: شكوى ضد الحكومــة...وانشاء الله يدخلوني بيت النمل زاتو
Author: ابو جهينة
Date: 05-22-2004, 11:51 AM
Parent: #5
سي جي
أضحك الله ناجذيك بكل خير ..
(حلف تاني مايشيلوها في عنقريب.... جاب لو كرتونة صابون فاضية... وستفا فيها... ومشينا دفناها)
الحمد لله البقت كرتونة.
أنا قايلك حتقول لفح حبوبتو تحت أباطو زى العكاز.
|
Post: #7
Title: Re: شكوى ضد الحكومــة...وانشاء الله يدخلوني بيت النمل زاتو
Author: سجيمان
Date: 05-22-2004, 12:47 PM
Parent: #6
ابو جهينة الحبيب
| Quote: أنا قايلك حتقول لفح حبوبتو تحت أباطو زى العكاز. |
اصلو قرررررررررب يلفحا.... علا خاف من نضمي الناس
|
Post: #8
Title: Re: شكوى ضد الحكومــة...وانشاء الله يدخلوني بيت النمل زاتو
Author: Raja
Date: 05-22-2004, 04:44 PM
Parent: #1
سيجيمان..
الوصية أمانة...
صديقتنا المشتركة "عبر البحار".. كلفتني بأن أكتب لك جملة واحدة..
رهييييييييب..
حأرجع ليك تاني..
|
Post: #10
Title: Re: شكوى ضد الحكومــة...وانشاء الله يدخلوني بيت النمل زاتو
Author: سجيمان
Date: 05-22-2004, 08:41 PM
Parent: #8
رجاء
ما اصلو
|
Post: #9
Title: Re: شكوى ضد الحكومــة...وانشاء الله يدخلوني بيت النمل زاتو
Author: معتز تروتسكى
Date: 05-22-2004, 05:24 PM
Parent: #1
خالص التحايا
عزيزى سجيمان بيت النمل اختاهو والله لايوريك ليهو كان بتاع الحكومه كان غيرو فى الحالتيين انت ضايع   
|
Post: #11
Title: Re: شكوى ضد الحكومــة...وانشاء الله يدخلوني بيت النمل زاتو
Author: سجيمان
Date: 05-22-2004, 09:38 PM
Parent: #9
معتز تروتسكي
Quote: خالص التحايا
عزيزى سجيمان بيت النمل اختاهو والله لايوريك ليهو كان بتاع الحكومه كان غيرو فى الحالتيين انت ضايع |
غايتو بيت الحكومة عرفتو....علا غيرو دي ما عرفتو
|
|