Post: #1
Title: مـن طــرائــف المنـاسبـات الســـودانيــة :)
Author: Haytham Abdulaziz
Date: 12-13-2006, 07:52 AM
Parent: #0
المعـروف ان المجتمع الســودانــي مجتمـع بالرغـم من طابع الجدية التي تســوده في معاملاتـه اليوميـة داخـل الســودان بل عُــرف بهـا بالخـارج بأن الســودانيـــون متجهمـــون و عبــوســين و ما بجامـلو يعني إلا تســرق الإبتســامــة منهم خلسـة... إلا أن ذلك لا يمنــع بأن تكون هنالك بعض الطُرف والفكـاهـات و القفشــات التــي نتـــداولهــا في مجتمعـاتنــا أو حتى في حياتنا اليومية من صباح الرحمن سوى كان في المواصلات أو بيوت الأعراس أو بيوت العزاء أو بيوت الختان إذا كانت هنالك مناسبة ختان أو حتى في المدرسة أو الجامعات أو في الأسـواق و كذلك في مجال الرياضة يعنــي في شتــى ضــروب حياتنا اليومية و بالأخص في مجتمعنـا ... و أكيــد كلٌ منــا مــرً بموقف أضحكه في بيت مأتم أو أبكاه من الضحك في بيت عرس و القائمـة تطــول .. فأنا سـوف أحاول أن أســرد لكم بعض المواقف التي مرت بي في حياتي في مختلف هذه المناسبات و انتـم كذلك مدعــوون لكي تنثـروا بعض المواقف سوى أكانت مضحكة أو مبكية و التي مرت بكـم في حياتكــم أو مرت بأحد أصـدقاؤكـم أو أحـداً من معارفكــم....
* عنــدي ود أختــي مشــى يعــزي صاحبوا في وفاة خالو ... و كان الكلام دة زي الساعة الثانية ظهراً ... و بعـد ما شال الفاتحة و قعد بتونس معاهو كالعادة في الكورة و التمرين بتاع أمبارح كان كيف و هلمجــرا ... بعـد شوية جابوا الغداء قاموا أكلوا و شبعـوا .. اها ود أختي بعد ما إتغداء و جايي طالع بدل ما يقول لصاحبو حسًن الله عزاؤكـم .. قال ليهو أهـا عامريـــن مع السلامة ...
و البقيــة في الحلقـة القادمـة...
هيثـــم....
|
Post: #2
Title: Re: مـن طــرائــف المنـاسبـات الســـودانيــة :)
Author: Haytham Abdulaziz
Date: 12-13-2006, 11:16 AM
Parent: #1
بـرضــوا في واحــدي بـت جيــرانـا مشـــت تعــزي صـاحبتـا في وفــاه حبوبتــا ... أهـا دايرة تقول ليها البركـة فيكـم في
حبوبتكــم الماتت ... قالت ليهـا بركـة حبوبتكــم الماتت ... يعني شوف كترة تنميق الكـلام بســوي شنــو؟؟؟؟ يعنــي هســع في
داعــي للإستطــالــة دي البركـة فيكـم في حبوبتكــم الماتت؟؟؟
|
Post: #3
Title: Re: مـن طــرائــف المنـاسبـات الســـودانيــة :)
Author: ناذر محمد الخليفة
Date: 12-13-2006, 11:27 AM
Parent: #1
هيثم ....
واحد مسطول عندو صحبو مات مشى يعزيو وهو تعبيرو شوية وأروش حبتين .. وقف جمب صحبو وما عرف يقول شنو ّ قام بعد فترة قال ليو : يعني هسي مافي أي أمل ؟!!
|
Post: #4
Title: Re: مـن طــرائــف المنـاسبـات الســـودانيــة :)
Author: Haytham Abdulaziz
Date: 12-13-2006, 11:34 AM
Parent: #3
Quote: هيثم ....
واحد مسطول عندو صحبو مات مشى يعزيو وهو تعبيرو شوية وأروش حبتين .. وقف جمب صحبو وما عرف يقول شنو ّ قام بعد فترة قال ليو : يعني هسي مافي أي أمل ؟!! |
أهــا هــاك دي: يا ناذر..
و اللاي بعـد دة إلا أمــل عرفـــة.... أهــا عندنـا واحــد في حلتنــا مسطول جنــو يحـاكــي ليــك الموسيقى التصــويريـة بتاعت المسلسلات و الأفــلام بي خشمو زي تشتندش ... تشتندش و بطريقة حلوة يعني اي موضوع لازم يدخل ليك فيهو موسيقى تصويرية بي خشمو... أها يوم ابوه مات جاو ليك صاحبو المسطول اكعب منو طوالي خش فيهو شمال و من دون مقدمات قال ليهو محمد ... محمد ابوك مات ... صاحبك قال ليهو ..تشتندش ... تشتندش و المسلسل إنتهـى...
|
Post: #5
Title: Re: مـن طــرائــف المنـاسبـات الســـودانيــة :)
Author: Moawia Mohammed
Date: 12-13-2006, 12:01 PM
Parent: #1
واحد جارهم مات بالليل وكانت الدنيا برد شديد يقطع النخره وصاحبنا الحريف طنش وعمل نائم وما مشي مع الناس المقابر وقام ليك الصباح بدري شال ليك سيرمس الشاي الما خمج ومشي عليهم في الصيوان وخت الشاي وقال ليهم كيف أصبحتو يا ناس , ود المرحوم قال ليهو أصبحنا أبونا ميت.
|
Post: #10
Title: Re: مـن طــرائــف المنـاسبـات الســـودانيــة :)
Author: Haytham Abdulaziz
Date: 12-14-2006, 02:30 AM
Parent: #5
| Quote: واحد جارهم مات بالليل وكانت الدنيا برد شديد يقطع النخره وصاحبنا الحريف طنش وعمل نائم وما مشي مع الناس المقابر وقام ليك الصباح بدري شال ليك سيرمس الشاي الما خمج ومشي عليهم في الصيوان وخت الشاي وقال ليهم كيف أصبحتو يا ناس , ود المرحوم قال ليهو أصبحنا أبونا ميت. |
و اللاي يا معاوية عندك المحـن ... يعني دة جـار سقيــل و بـارد .... أسخــن منــو شــايــو الجايبو دة ...
و مشكــور على المـرور... و نشـوفـك...
قـــوز....
|
Post: #6
Title: Re: مـن طــرائــف المنـاسبـات الســـودانيــة :)
Author: Moawia Mohammed
Date: 12-13-2006, 12:10 PM
Parent: #1
مشينا مره عرس وكانت العروس سمينه شديد خلاص والعريس صغيروني وضعيف ومدقدق ومنظرهم في الكوشه بس رقشه واقفه جنب زد واي , بعدين الفنان كان بيض ونحن ما فارزين كلامو والساوند كعب وبرترت , أها بعد شارعين من بيت العرس كان في عرس شهيد وعندهم ساوند تمام ومهججين شديد , قلت لي صاحبي ياخي الحفله دي ما نافعه قوم أرح نشوف عرس الشهيد , قام قال لي الهنا دا زاتو ما شهيد .
|
Post: #9
Title: Re: مـن طــرائــف المنـاسبـات الســـودانيــة :)
Author: Haytham Abdulaziz
Date: 12-14-2006, 02:27 AM
Quote: مشينا مره عرس وكانت العروس سمينه شديد خلاص والعريس صغيروني وضعيف ومدقدق ومنظرهم في الكوشه بس رقشه واقفه جنب زد واي , بعدين الفنان كان بيض ونحن ما فارزين كلامو والساوند كعب وبرترت , أها بعد شارعين من بيت العرس كان في عرس شهيد وعندهم ساوند تمام ومهججين شديد , قلت لي صاحبي ياخي الحفله دي ما نافعه قوم أرح نشوف عرس الشهيد , قام قال لي الهنا دا زاتو ما شهيد .
|
معـاويـة حبيبنـا واللاي صاحبـك دة لــذيـ ـــــذ بس ما لـذيـذ المطعــــــم..... ضحكتني لحدي ما دمعته...
لكــن دة بكــون شهيـــد في ليلــة الدخــلــة ... يـاكــل نـــاروووو... و ما تنقطـــع.....
قـــــوز.....
|
Post: #7
Title: Re: مـن طــرائــف المنـاسبـات الســـودانيــة :)
Author: Alsa7afa_30
Date: 12-13-2006, 01:43 PM
Parent: #1
|
Post: #8
Title: Re: مـن طــرائــف المنـاسبـات الســـودانيــة :)
Author: Haytham Abdulaziz
Date: 12-14-2006, 02:22 AM
Parent: #7
الله يجــازي شيطـانـك يا صحـافـة 30 ... دي المرحـوم أبوداؤود بالــغ فيهـا... رحمه الله راجل كان صاحب نكتة و حضور قـوي...
و مشكــووور يا ولـدنــا.....
قــــوز....
|
Post: #11
Title: Re: مـن طــرائــف المنـاسبـات الســـودانيــة :)
Author: لؤى
Date: 12-14-2006, 02:31 AM
Parent: #1
هيثم العزيز
صباحاتك مشرقة
دي جد القصّة دي
واحد نسيبنا مشينا بيت عزاء ، وشلنا الفاتحة وقعدنا في الصّيوان ، وكالعادة الونسة دوّرت ..
المهم لمّا جينا نقوم ، نسيبنا دا بحُسن نيّة وقف يسلّم على النّاس الكُنّا بنتونّس معاهم ، وكُلّ ما يودّع زول يقول : ((فرصة سعيدة ياخ))
لمّا طلعنا على العربية قلنا للراجل : شنو إنت شابك النّاس ((فرصة سعيدة)) في بيت البكاء ؟؟ قال لينا لا إله إلاّ الله ، والله أنا ما جايب خبر أنا قلت كدا
|
Post: #13
Title: Re: مـن طــرائــف المنـاسبـات الســـودانيــة :)
Author: Haytham Abdulaziz
Date: 12-14-2006, 02:47 AM
Parent: #11
Quote: هيثم العزيز
صباحاتك مشرقة
دي جد القصّة دي
واحد نسيبنا مشينا بيت عزاء ، وشلنا الفاتحة وقعدنا في الصّيوان ، وكالعادة الونسة دوّرت ..
المهم لمّا جينا نقوم ، نسيبنا دا بحُسن نيّة وقف يسلّم على النّاس الكُنّا بنتونّس معاهم ، وكُلّ ما يودّع زول يقول : ((فرصة سعيدة ياخ))
لمّا طلعنا على العربية قلنا للراجل : شنو إنت شابك النّاس ((فرصة سعيدة)) في بيت البكاء ؟؟ قال لينا لا إله إلاّ الله ، والله أنا ما جايب خبر أنا قلت كدا |
و اللاي يا لـؤي زولكـم دة بـالــغ عديييل كــدة و اللاي ضحكتنـــي مع الصباح الممطــر الجميــل دة الله يجازي محنــك ... و لســة الظاهر ما خُفـي كان اعظــم ... و نشــوفــك .... كــن بخيــر...
قـــوز....
|
Post: #12
Title: Re: مـن طــرائــف المنـاسبـات الســـودانيــة :)
Author: Haytham Abdulaziz
Date: 12-14-2006, 02:42 AM
Parent: #1
في سنــة 1989 بعـد الإجـازة الجبرية بتاعت إمتحـانـات الشهــادة الســودانيــة ... كنا مجموعـة من العطالة و جننا حفــلات و طــرب يعني كواكب ما محتاجين لكرت دعـوة و بنمشي أي حفلة ... أهـا يوم في حفلة في القـوز بي الفنان فيصل الصحافة .. و بعد الحفلة كنا واقفين انا و فيصل الصحافة و واحد صحبي ... و فجـأة جا ليك واحـد كوكب من هناك و سلم على فيصـل الصحافـة و إليكم الحـوار:
الكوكب: يا فيصل كيف الحال يا أستاذ..
فيصـل الصحافة: الحمدلله و كيف إنت عامل..
الكوكب: الحمدلله ... إنت يا فيصل ما عرفتني و لا شنــو..
فيصل الصحافة: بأدبه آسف واللاي بس الواحد كلو يوم بتعرف على ناس جُـداد..
الكوكب: يـاخ أنا فلان قابلتك في حفلة في الصافية لكن الوكت داك انا كان عندي صلعة و هسع خنفستة
فيصل الصحافة: و بطريقة لذيذة .. طيب خنفستــة ليـــــــه... يعني اذكرك كيف بعد خنفستــة..
|
Post: #14
Title: Re: مـن طــرائــف المنـاسبـات الســـودانيــة :)
Author: Haytham Abdulaziz
Date: 12-14-2006, 03:00 AM
Parent: #1
شــوفـو القصــة دي جدجد حصـلت لي انـا شخصيـــاً....
طبعـاً يا حبايب انـا طولت من الســودان ... أهــا عنـدي ناس ود عمتــي سـاكنيــن في المعمــورة ... و كان عندو نسيبتو ماتت و لازم أمشي أشيل الفاتحـة ... أها إتوكلت على الله و بوووو سقت عربية اخوي و مشيت و عامل فيها بعرف البيت براي ... أنا بذكر بيت ود عمي عمارة و برة عندهم دكان ... أها و بثقة تامـة لقيت الباب فاتح و توووووش دخـلت ... لقيت ليك ناس راقدين و بتونسـو في الحوش تحت .. انا قلت إمكن ديل أهلنا من عطبرة ... بس و الساعة القلت ليهم الفاتحــة واحــد نطـة من السرير لمن كشح كباية الشاي ... المهم بعد ما شالو معاي الفاتحة ... قلت ليهم وييين الخال ... واحـد قال لي قصدك منو ... قلت ليهم ود عمي حسن درديري ... قال لي ياااااخي إنت غلطــان بيت ناس ود عمتك دة في المربوع التاني و إتفضــل ... ياااخ انا ما عرفته اقول ليهم شنـو غير انا آسف و طولت من البلد واحد فيهم زهجان قال لي طيب بتتحاوم براك مالك ما تخلي واحد يكون معاك...و دة كان أحرج موقف مرً بي في حياتـي...
|
Post: #15
Title: Re: مـن طــرائــف المنـاسبـات الســـودانيــة :)
Author: Haytham Abdulaziz
Date: 12-14-2006, 03:15 AM
Parent: #1
يــوم ماشــين نلعــب مباراة في الكــلاكـلـة و الوقت إتــأخــر ... قام واحـد أصــر نمشــي بي طـريق أبوحمامـة ... يعني ممكن كان نطلع من القوز طوالي بهناك ... لكـن أحـد اللعيبة على ما أعتقـد ناصر الطيب لاعب النيل و الفريق القومي سابقـأً... أهــا الجماعـة قالو ليهـو ليــه نمشـي بأبوحمامـة قال عشان داير سعــوط ... أهــا في واحـد معانا شليـييق كـدة قال لناصر الطيب بلاي عليك سعوط شنو الما متحضر دة ... ناصر عاين ليهو كـدة و بكل برود قال ليهـو عليك الله أنحنـا لو ما سفينــا نستحمــــل أشكـالكــــم الشينة دي كيف عـــاد ... والحافـلـة كلها قرقرقرقرقرقرقر من الضحــك....
|
Post: #16
Title: Re: مـن طــرائــف المنـاسبـات الســـودانيــة :)
Author: Haytham Abdulaziz
Date: 12-14-2006, 06:26 AM
Parent: #1
عنــدنـا جيرانــا ... في حـرامــي عامـل معاهـم كونتراكـت(Contract) يوماتي على الله بتلب ليك عليهم و يا سرق تلفزيون و لا هدوم في الحبل ... أهـا عنـدهم ولـدن كدة خــوااااف ... قال لأمــو انا الليلة الحرامي دة كان ما قبضتوا ليكم ما برتاح... و طبعاً في السودان البيت بكون مقسوم بي حيطة بين حوش الرجال و النسوان ... اها صاحبنا قاعد منتظر الحرامي ... و الحرامي شـرًف .. و صاحبنا قام طلع من اللوضة ... هنا الحرامي شعـر إنو الناس شعرت بيهـو... اها الحرامي كان في حوش النسوان و الولد صاحبنا في حوش الرجال و كلو واحد منهم (الحرامي و الولد) لبت في آخــر طرف الحيطة .. الولد تاوق بطرف الحيطة داير إشوف الحرامي موجود و الحرامي تاوق بنفس المكان داير إشوف صاحبنا مشى نام ... طبعـاً إتلاقو فيس تو فيس (Face 2 Face) صاحبنا (أوردولــب) ضرب الواطـة و وقع مغشيـاً عليــه ... و الحرامـي قام جـاري....
|
Post: #17
Title: Re: مـن طــرائــف المنـاسبـات الســـودانيــة :)
Author: Haytham Abdulaziz
Date: 12-19-2006, 01:57 PM
Parent: #1
من طــرائــف الحفلات في القــوز هاكم دي:
أذكـــر في سنــة 1986 على ما أعتقد عندما وقعــت الطـيارة الليبريــة في أركــويت.... في القــوز هناك عندنا واحــد إسمــو طيارة معروف و مشهور بخفة الدم و الفكاهة و من ثم (بالشربـة) ... و كان في ذلك اليوم بالليل في حفلة في القوز ... و كان صاحبنـا طيارة دة واقف لطططط .. و برقص و بترتح جم النســوان ... اهـا في مــرة فصيحة كدي قالت ليهـو ... يا طيارة عليك الله زح كدي ما تقوم تقع فوقي ... و بسرعة البديهة قال ليها أقـع فيك إنت أصلو أركــويت ... و طبعاً الحفلة كلها بقت تضحك قرقرقرقرقر...
|
Post: #18
Title: Re: مـن طــرائــف المنـاسبـات الســـودانيــة :)
Author: Haytham Abdulaziz
Date: 12-19-2006, 02:45 PM
Parent: #1
عنـدنـا واحـد في الحـلـة عاطـل بدرجـة فارس ... و كلو يوم أمو تشاكلو و تصحي الصباح من النوم .. قوم يا باطل يا خايب أمشي شوف ليك شغلة زي الرجال ... و هو و لا هماهو ناااايم في ضل الحيطـة ... أهـا يوم كدة جاهو واعظ ضميري و قام من النوم بدري قال يمشي يشوف ليهو شغلة ... أمو اليوم داك ما صدقت و فرحت... أهـا صـاحبنا وصـل أبوحمامـة فإذا بالكشـة بتاعت الإلزاميـة تقبضـوا و يرفعـو في الدفار ... أها أمو بقت تجقلب الليلة ولدي حا يودو الجنوب و تهًــرج وروروووك... أهـا من جاي لي جاي بالواسطة طلعو بالليل و جابو البيت .. تاني يوم الصباح صاحبنا نااايم لمن الشمس جاتو في وشـو ... أها أمو جات تصحي فيهو و تقول ليهو يا ولدي قوم أرقـد جوة في اللوضة الشمش دي ما شاعر بيها جاتك في وشـــك...
|
Post: #19
Title: Re: مـن طــرائــف المنـاسبـات الســـودانيــة :)
Author: Moawia Mohammed
Date: 12-19-2006, 02:58 PM
Parent: #1
تعرف يا هيثم لو أمو قالت ليهو يا ولد قوم الشمس مرقت
كان قال ليها دخليها وأقفلي الباب
|
Post: #21
Title: Re: مـن طــرائــف المنـاسبـات الســـودانيــة :)
Author: Haytham Abdulaziz
Date: 12-20-2006, 04:25 PM
Parent: #20
Quote: ود القوز ...
أها هاك من الطرائف بوست كامل الدسم أبو تلاتة صفحات عشان تآآمن : |
واللاي يا ناذر الظاهر عليهو بوست روعة بي شلاقتك ايام الجاهلية دييك ... و انا لسة ما كملتو .. لكن الحادثتين بتوعنك ديل بكوني بدموعي لدرجة انا بكون سايق العربية و تلقاني بضحك براي .. لمن في واحدي مواطنة قايلاني بشاغل فيها .. و قامت نزلت القزاز و قالت ليش تغازلني .. قلت ليها يا أخت انا بسمع في شريط محمد موسى ... قالت لي منوها محمد موسى .. قلت ليها دة بلعب في المريـــــــخ...
دي شديدة :
قبل فترة طويلة أيام الثانوي مشيت إشتغلت حفلة في القطينة المناسبة كانت حنة بتاعت عرس .. في أثناء أنا بغني شايف واحد من بعيد بيبشر لي وبيحاول يجي ناحيتي بصعوبة بسبب الزحمة ..
من طريقة مشيتو لا حظت إنو الزول سكران وكدة.. قمت إستعوذت ودعيت ربنا يجيب العواقب سليمة.. صحبك طلع بعد تعب المسرح وجايي بيبشر وأنا خاتي بالي معاهو ..
إتخيل في اللحظة ديك جات طالعة جكساية ظريفة ورشيقة من الناحية التانية للبشير والشبال .. قمت جليت صحبي السكران داك (مع إنو كان وصلني) وقعدت أبشر للجكساية والسكران واقف جنبي منتظرني أعاين ليهو ...
الجكساية طلعت غتيتة وكترت من البشير لمن السكران إتغاظ مني (ألف) .. لمن هناية ديك مشت قبلت على السكران عشان أجاملو بالبشير قام رفع يدو وصراني ليك كف صرررررر .. لمن أنا قلت الكهرباء قطعت ..
الجو إتكهرب والسكران قعد يكورك (يعني أنا ما راجل ولا شنو ؟؟ عشان هي بت وأحلى مني ؟؟!!) ...
طبعا الناس مسكوا السكران وبتاع الأورغن خاف على جهازو لماهو والمسرح إتملا فل .. طبعا أخوك جاهو إحراج وجاهو بهق من الكف
الجماعة شبكوني ليك (خلاص السكران طلعناهو ليك واصل الحفلة) .. لكن بي ياتو وش ؟؟!! قلت لو واصلت الناس دي بتضحك فيني ... قمت قلت ليهم أنا ماشي بيتنا .. قالو لي خلاص إتعشى أول .. قلت ليهم ماليش نفس ..
صدق يا أساسي من ديك (والقصة دي ليها أكتر من 8 سنوات) بقى حدي في الحفلات الكلاكلات بس .. لمن تجيني حفلة في القطينةأو الجبل أقول للزول : بللللايي !!! قايلني عوير ولا شنو ؟؟!! شوف ليك زول داقس غيري يتكفت هناك .. شفت الصراحة دي كيف ..
لا واللاي صراحة جد ... بس إنت غلتان .. ياخ السكران دة كان تمشيهو و تعبرو بي بسمة نص وش إن شاءالله عشان يقطع وشـو ... لكن لو كان غنيت تاني كان تكون محمد موسى بـس...
و دي كمـان:
وفعلا ذهبنا في وقت العرض لنتفاجأ بأن المدرسة لم تستطع توفير سوى جهاز الساوند سيستم وجهاز أورغن كاسيو دون المواصفات فإحتجينا على ذلك ورفضنا إداء العرض رغم (التحانيس ) ..
وقد كانت هنالك إحدى طالبات المدرسة (ذوات الخفة الزائدة والجمال الهادي) مكلفة بالتفاوض معنا والقيام بضيافتنا .. فكانت تأتي إلينا في المكتب الذي خصصوه لنا (وتتظارف) بتملق ظاهر معنا حتى نقيم العرض ...
فكان أن جاءت إلينا في المرة الأخيرة بعد ان يئست من إقناعنا ف سألتنا في دلال شديد ورقة مبالغ فيها كادت أن تثني عزيمة البعض :
(إنتو هسي دايرين شنو وأنا أقوم أوفرو ليكم عشان اليوم ما يبوظ ؟؟)
فأجابها أحد زملاءناالوسيمين :
(نحنا بس دايرين أورغن ياماها) ...
فردت بي سرعة شديدة وبلهجة تفوح منها رائحة غيرة واضحة :
(أنا ما مها ... أنا إبتسام) ...
فما كان منا إلا الإنفجار ضحكا وتركناها متحيرة فيم نضحك !!
|
Post: #22
Title: Re: مـن طــرائــف المنـاسبـات الســـودانيــة :)
Author: Haytham Abdulaziz
Date: 12-20-2006, 04:32 PM
Parent: #1
أيــام البـرد الشـديـد داك في الثمانينات و بداية التسعينات .. جيرانا جاهـم ليك حرامي .. قامو قبضو الأبو و ولدو .. و كبو ليك فيهـو جردل مـويـة باااارد .. الحرامي عمل فيها ميت و ما بتحرك أصلو .. أهـا أمهــم جات من هنـااااك و قالت ليهـم خليكـم ماسكنــو النمش نجيب الشطـة و نحشــرا ليهـو في (.....) وحـاتكـم الحرامــي لمن سمع الكلمـة دي قام فوووق و شال ليك الولد و أبو ضرب بيهم الواطـة و قام ناطي الحيطة و جرى...
|
Post: #23
Title: Re: مـن طــرائــف المنـاسبـات الســـودانيــة :)
Author: motaz
Date: 12-20-2006, 09:47 PM
Parent: #22
الغالي هيثم
علي بالطلاق بوست لزيز جنس لزازة ،، انا زاتي قربت الحق محمد موسى زاتو
تسلم يا غالي
واديك دي برضو
موقف كان عجيب وغريب ،، عندنا واحد عندو سلك فاكي وجنو اكل بس ما يشوف ليهو صيوان
يا زول يوم من الايام في ناس كان عندهم مناسبة زواج
صاحبنا شاف الناس شغالين بيركبو في الصيوان يا دوبهم المهم كانوا تعبانين من الحفر وقعدو يتونسو شوية صاحبنا طبعا لقاهم قاعدين
جا داخل عليهم وقال ليهم الفاااااتحة ههههههههه
الناس احتاروا زاتو وقعدو يضحكو فيهو
طبعا المناسبة كانت زواج بس لسا الكراسي ما جابوها وصاحبنا عايز يصاحبهم لزوم السفاسف بعدين وكدا
فتكم بي عافية
وراجعين
|
Post: #24
Title: Re: مـن طــرائــف المنـاسبـات الســـودانيــة :)
Author: فيصل محمد خليل
Date: 12-20-2006, 10:51 PM
Parent: #23
قريبي هيثم
| Quote: نجيب الشطـة و نحشــرا ليهـو في (.....) وحـاتكـم الحرامــي لمن سمع الكلمـة دي قام فوووق و شال ليك الولد و أبو ضرب بيهم الواطـة و قام ناطي الحيطة و جرى... |
استمخاخ في خشم الزمزمية
|
Post: #25
Title: Re: مـن طــرائــف المنـاسبـات الســـودانيــة :)
Author: Haytham Abdulaziz
Date: 12-21-2006, 08:34 AM
Parent: #24
Quote:
قريبي هيثم...
استمخاخ في خشم الزمزمية |
عـزيزي فيصــل قلت لي في خشــم الزمزميــة ... و حاتك الشطــة دي قــربت تصـــل خشـــم (القـ) أقصـد خشم القــربـة بــس تقول شنــو ..دي شــدة الحرامــي زاااتـا... دة حرامي و لا عتـالــي القًلب الناس ديل...
و شكــراً يا قريبــي و نشـوفـك ببعض من طـرائف أهـلنـا الحلفـاويين...
|
Post: #26
Title: Re: مـن طــرائــف المنـاسبـات الســـودانيــة :)
Author: Haytham Abdulaziz
Date: 12-21-2006, 08:42 AM
Parent: #23
Quote: الغالي هيثم
علي بالطلاق بوست لزيز جنس لزازة ،، انا زاتي قربت الحق محمد موسى زاتو
تسلم يا غالي... |
الأغـلى و العزيز معتــز...
شكــراً لييك كتيير على المرور و المداخلة الظريفة دي ... صـاحبكــم دة بُطينـــي بدرجــة فــارس ... يعني حتى من التفكيـر الشديد في العضـة قًلب العرس بكاء و اللاي دة زول لـذيــذ...
Quote: فتكم بي عافية
وراجعين.... |
الله يعافيك و يخليـك ... و منتظــرين رجعنـــالـــك زي ما قالو البلابـل ... و ما تنقطــع...
كـل الـــود....
|
|