Post: #1
Title: عاجل...زول عايز يعرس
Author: كبسيبة
Date: 12-03-2006, 04:37 AM
Parent: #0
أزيكم يا ناس والله الشوق ...عييييييك
دي ما الظروف لما تفرض علينا الفرقة ....... والشتات
وأنا أفكاري زاتها بقت مشتتة اليومين ديل
أحتاج إلى مساعدتكم في صياغة كرت دعوة لحضور زواج
ورونا ابداعاتكم...مع رعاية العجلة..
|
Post: #2
Title: Re: عاجل...زول عايز يعرس
Author: سجيمان
Date: 12-03-2006, 04:40 AM
Parent: #1
| Quote: عاجل...زول عايز يعرس |
عاجل... اوعك تعرس
|
Post: #3
Title: Re: عاجل...زول عايز يعرس
Author: كبسيبة
Date: 12-03-2006, 04:59 AM
Parent: #1
سجيمان ...أزيك (قالو لي سرو)
طيب الحل؟ شنو؟
|
Post: #4
Title: Re: عاجل...زول عايز يعرس
Author: محمد فرح
Date: 12-03-2006, 05:02 AM
Parent: #1
والله ياكبسيبه ماعندي أي فكره في الحته دي لكن بعدين ماتنسى ترسل لي كرت ......
أخوك بحب الهجيج ...
بالمناسبه الفنان منو .......
|
Post: #5
Title: Re: عاجل...زول عايز يعرس
Author: رشا سالم
Date: 12-03-2006, 05:33 AM
Parent: #4
يتشرف آل كبسيبة.....وآل زوجة كبسيبة في القريب العاجل..
بدعوة سيادتكم لتناول ذاد الحبان العنده مكان..
وبحضوركم بيتنا بينور والعرس الحااااااااااامض دا ببقي عنده طعم..
تهديد( كان ما جيتوا ما بعرس)
| Quote: بالمناسبه الفنان منو ....... |
اكيد ما عاصم البنا..لاني حاجزاهو
|
Post: #6
Title: Re: عاجل...زول عايز يعرس
Author: كبسيبة
Date: 12-03-2006, 06:42 AM
Parent: #1
محمد فرح : يديك العافية
كرتك في الطريق ...
والما بحتو ما يجينا ...
والفنان ...مفاجعة
لكن عشان تطمن يا ودفرح ما الفرقة الأثيوبية
|
Post: #7
Title: Re: عاجل...زول عايز يعرس
Author: عشة بت فاطنة
Date: 12-03-2006, 06:51 AM
Parent: #6
بيت مال وعيال
وسعادة وجمال
|
Post: #8
Title: Re: عاجل...زول عايز يعرس
Author: كبسيبة
Date: 12-03-2006, 07:08 AM
Parent: #1
أزيك يا رشا
| Quote: يتشرف آل كبسيبة.....وآل زوجة كبسيبة في القريب العاجل.. |
كان كتبت كده في الكرت الحجيني منو؟
Quote: تهديد( كان ما جيتوا ما بعرس)
|
بعد ده كلو يا رشا معقولة أسيبو العرس .. وااا كبسيبتاه
تعالي شوفي جنس الكلام ده
لا ما تخافي الحكاية حتكون كبسة على الآخر
خاسة إنك حاجزة عصام البنا
|
Post: #9
Title: Re: عاجل...زول عايز يعرس
Author: كبسيبة
Date: 12-03-2006, 07:15 AM
Parent: #1
عشوشة بت فطومة : أزيك
| Quote: بيت مال وعيال وسعادة وجمال |
تمنياتي لك بالسعادة أيتها الجميلة أبداً
|
Post: #10
Title: Re: عاجل...زول عايز يعرس
Author: كبسيبة
Date: 12-03-2006, 07:33 AM
Parent: #1
يا جماعة ما قلنا عاجل
|
Post: #11
Title: Re: عاجل...زول عايز يعرس
Author: عبد الدائم سيد أحمد
Date: 12-03-2006, 07:49 AM
Parent: #1
كبسيبة
يا سجم الرماد
انت عاوز تعرس من وراء ناس الصحافة ، لو كان كلمتنا
ما شبابنا كان دقو ليك الصيوان ورصو ليك الكراسى وجابو
ليك محمد اسماعيل والكروت ما ليها داعى لانو علوب / على دهب
قاعد وهو الادانى خبر عرسك ده وكان بنرسلو مداعى .
وانا كنت قلقان عليك من يوم بت الصحافة غرب ( ندى ) ادتك الشاكوش
وسألت عليك كم مرة وناس الصحافة ذاتم مستغربين انت طرتا وين
Quote: جاي يا قريبك الساعة وحدة ونص ظهر بميدان أبو جنزير زحمة وجوطة ما عادية وسخانة درجة مافي عديل كده، المهم ماشي وسط الزحمة لكن في نفس الوقت سرحان هناك في عنقريبي الفي البرندة جمب الحوش البي ورى ومتين أصلو وأديها نومة كاربة كده قبل ما أقوم العصر وأحصل الدافوري وبفكر في الوقت نفسو في عرس ندى بت الصحافة غرب الجننتني وبهدلتني وطلعت عيني وحفينا وجرينا لكن في النهاية طلعنا بي أول شاكوش .. ويوميها كجنت كل المغتربين بالذات ناس السعودية وجوة السعودية كمان ناس الرياض وجوه ناس الرياض كمان عبدالـ ...... ، المهم نرجع ميدان أبو جنزير وطبعاً لازم أديها قعدة في المظلة بتاعت الورنيش والعزومات تتهافت علي ...تعال بي جاي يا معلم...يا فردة...لمع وكل العيون بتعاين لي جزمتي وكان سبب أنها تكون على رجلي برضو السعودية اللامة الـ ...جاتني هدية يعني...المهم اترميت على أول كرسي لاقاني وطلعت الجزمة وطقطقت وحركت أصابع كرعيني فوق وتحت وطلعت باقي كيس التسالي من الجيب وفتحت جريدة الصحافة واشتغلت الفرشة في جزمتي وأنا أوصي بأنو أورنيش حفلة لازم تبقى مراية ..مافي مشكلة يا معلم...شاتك شاتك شيتك شات شات شش..وعين في الجريدة وعين في الفرشة بتاعت ماكينة الحلاقة وهي تصول وتجول في علبة الورنيش بدلاً كن مكانها الأصلي في رغوة الصابون ..وتلمست لحيتي وكلو بي سببك يا ندى برضو عايز أقشر ليك لسة يوم عرسك رغم العملتيهو فيني ..وأكون أحلى من المغترب بتاعك ..قريت الصفحة الأخيرة بدون نفس ..وجزمتي في الجزء الأخير من التلميع بي قطعة سفنجة التي تذكرني بالسبورة دائماً وحليل السبابير (جمعها مش كده ولا أنا غلطان) طبعاً غيرت مشيتي عشان الجزمة ما تتوسخ واخترت المشي على الزلط أمام الجامع الكبير وبعد داك خشيت البرندة بتاعت أجزخانة سعدالدين شفت سلمى الغياظة بت جيرانا وخفتها تشبك فيني وأقوم أدفع ليها حق المواصلات ..المهم قطعت بي هناك وأنا ماشي للكركدي (والله اسم المحل طار لي عديل كده) لكن ريحة الصعوط طاقة في نخرتي لحدي حسع المهم كركعك كرععك قرطعت كباية الكركدي وأنا المح سلمى من بعيد بتركب في البص السياحي وقلت الحمد لله أتفكيت منها ..عاينت لي كباية الكركدي خلصت سريع بت اللذينة دي ..كبيت باقي التلج في خشمي ومشيت..داير أركب الصحافة شر ق ..مافي حافلة واقفة غير البص السياحي وحافلات الصحافة زلط كمية واقفين أربعة صفوف ..والشمس طاقة لكن الجريدة بتقصر انتظرت خمسة دقائق جات حافلة من هناك خايف اكابس يقوموا يكابسوا جزمتي والورنيش يروح في أمات طه..فكرت قلت أحسن أركب الصحافة زلط مع إنو المشوار جبدة لكن أحسن من الوقفة تحت الشمس وبعدين أشوف زاتو صيوان ناس ندى..مشيت لقيت الحافلة المكتوب عليها (جهينة) واقفة بي خضاره وستايرها الحمر المهم الحافلة فاضية ودورها لسة مشيت أخش الباب مقفول انتظرت لسة في كمية من الحافلات قدامها الكمساري حنه علي وفتح لي الباب خشيت قعدت في آخر كنبة واخترت الجانب الشمال عشان الشمس بعدين..جريت الستارة وقعدت بي مزاج...وقعدت اتفرج في الخلق ..قوم يا جكسويتين اظنهم ناس جامعة السودان يبهدلو ليك كبسيبة في راسو..ياخي ديل جايات من وين..اها الولد يقوم بتخفف
كبسيبة : قلت ليك ما تجيبوا شنطكم أحجز ليكم
يا زول وحدة فيهم قامت لوت لي شلوفته وقلت بي غنج : مرسى
كبسيبة : شنو..مرسي ديي كمان
الجكسوية : جحا..طناش....
كبسيبة : مرسي مرسي في ستين
أنعل أبو الجكس زاتو وأولهم ندى والمغترب بتاعها.
رغم البعملو فينا الجكس بتاعك لكن برضو بنموت فيك وبنحبك يا صحافة
بجي بكمل |
المهم حمدالله على السلامة الانت طيب وباين عليك اغتربت وصلحت امورك
ما دام عاوز تعرس ، بس انشاءالله تكون اغتربت فى الرياض
هسة العروس الجديدة دى من وين ؟؟
ما تكون بنات مغتربين ؟؟
|
Post: #12
Title: Re: عاجل...زول عايز يعرس
Author: كبسيبة
Date: 12-03-2006, 09:16 AM
Parent: #1
عبدالدائم (يديك العافية ..والمرة الدااااافية...ويسكنك جمبنا في الصحافة)
وعقبالك وكان الأولى في ..عقبال التانية
ناس الصحافة عندهم خبر من زمااااان ياخي
بس شكلك ما قعد تجي النادي اليومين ديل
وشغالين بجيروا في البيت اليومين ديل عشان ما جيت يعني
وترميم الميدان القدام بيتنا عشان الصيوان يشيل كمية الخلق الجايين
وأبشرك جايين كمية من مبدعين الصحافة على رأسهم
محمد إسماعيل
خالد محجوب
عمر إحساس
تميم الدار
يحي صـــالح
حمــادة جبرة
عبدالسلام
عوضية
زبيدة
ديل ناس الحنة
|
Post: #13
Title: Re: عاجل...زول عايز يعرس
Author: نادية عثمان
Date: 12-03-2006, 11:10 AM
Parent: #12
الرجل .. الرجل
الانسان بحق وحقيق
النبيل .. الغالى جدا كبسيبة
والله ده اجمل خبر يطل على من وسط كوم احزانى .. الف الف مبروووووووووووووووووووووك
وربنا يهنيك وانت تستاهل كل الخير وان شاء الله بيت مال وعيال يارب
ياريت كان محمد مامات كنت جيتك ووفيت بوعدى بحضور زواجك ياكبسيبة
لكن الله غالب !!
ربنا يتمم ليك على خير يااااااااارب
|
Post: #14
Title: Re: عاجل...زول عايز يعرس
Author: Moawia Mohammed
Date: 12-03-2006, 11:50 AM
Parent: #1
مبروك يا كبسيبة وبيت مال وأبوروف
تعال بهناك في بوست الصحافه عاملين ليك حنه كاربه وفي واحد من الفنانين الكبار المتبرعين مقيل بهناك في البوست يغني ساكت وبقول:
سيروا والصلاح بروا
كبسيبه مرق يلا هججوا
حننو ديل أخواتو جوا
كبسيبه مرق يلا صفقوا
فرشوا لي السرير
وعقدوا لي الحرير
................
................
................
لبسنلوا القطيف ورقصنلوا الخفيف
................
العريس قمر وعاد عروسو كيف
|
Post: #15
Title: Re: عاجل...زول عايز يعرس
Author: Ishraga Haimoura
Date: 12-04-2006, 05:33 AM
Parent: #1
ألف مبروك يا كبسيبة
وربنا يتمم على خير
والله ما تتعب نفسك ناس الصحافة ديل ما محتاجين أي كروت
كان علوب إتأخر حفيظ بيتم الباقي
وما تشيل هم تب
ونحن حاضرين
|
Post: #16
Title: Re: عاجل...زول عايز يعرس
Author: كبسيبة
Date: 12-20-2006, 03:35 PM
Parent: #1
ربنا يجعل أيامكم كلها أفراح
وراجع ليكم واحد واحد
حيلي أنقطع وجيبي أنشرط في الريحة والشيلة
خلوني ناخد نفس وأجيكم
|
Post: #17
Title: Re: عاجل...زول عايز يعرس
Author: sudania2000
Date: 12-20-2006, 04:16 PM
Parent: #16
غايتو جنس حالة
شاور العروس اول
مش الكرت مشترك
مبروك
|
|