Post: #1
Title: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: السنجك
Date: 11-26-2006, 11:13 AM
Parent: #0
تواصل اسعار الضروريات ارتفاعها واصبحت المعيشه ضنكه للمواطن البسيط ولاتطاق فربع البصل وصل 10 الف وكيلو الطماطم 4الف وفى الشتاء يعنى فى الصيف تصل كم ؟؟؟وربطة الملوخيه الكانت ب200 جنيه وصلت الف وكذلك الورق والرجله الف الربطه والمفروض الخضروات تكون نازله فى الشتاء ودا مؤسمها
ويتواصل نزول الدولار واسعار الاراضى فالجبهجيه بقوا يبيعوا فى الاراضى المنهوبه خوفا من ديسمبر والقوات الدوليه ونزلوا الدولار بقرارات اداريه وضخ اموال صعبه من بنك السودان من اموال الدولار لشراء العمله المحليه ونزل الدولار وبدا الجبهجيه شراء الدولار لانفسهم ومعاهم الهنود واسع الناس البيبيعوا فى السوق المواطنيين والمغتربين والبشترى الجبهجيه والهنود وكلاهما شارد من البلد
السنجك
|
Post: #2
Title: Re: ارتفاع الاسعار و ربع البصل 13 الف وكيلو الطماطم 4الف والدولار والاراضى الاسعار نازله!!!
Author: السنجك
Date: 11-26-2006, 11:38 AM
Parent: #1
ربع البصل اللليله وصل13 ولسع طالع وكيلو الباميه 6 الف
دايرين واحد يضرب لينا حلة ملاح لاسره متوسطه
السنجك
|
Post: #3
Title: Re: ارتفاع الاسعار و ربع البصل 13 الف وكيلو الطماطم 4الف والدولار والاراضى الاسعار نازله!!!
Author: السنجك
Date: 11-26-2006, 11:59 AM
Parent: #2
فوق
السنجك
|
Post: #4
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: ناذر محمد الخليفة
Date: 11-26-2006, 12:20 PM
Parent: #1
السنجك ..
| Quote: وكيلو الطماطم 4الف |
معلومة خاطئة تماماً
الأربعة ألف دا سعر الصفيحة في السوق المحلي لحدي أول أمبارح الجمعة الساعة حداشر صباحاُ
الطماطم حاليا سعرو في ال واط ة عديل الكيلو بي ألف جنية عند تاجر القطاعي بتاع أي حلة أو سوق ولو عايز تلاتة او أربعة كيلو بيعمل ليك تخفيض وامكن يديك الاربعة بي سعر إتنين كيلو ..
إنت وحنكك !!
|
Post: #5
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: Munir
Date: 11-26-2006, 02:43 PM
Parent: #4
يا ناذر ياخي كمان ما تبالغ ياخي .. يعني دايرنا نصدقك إنت النكرة دا ونكذب البطل المناضل سنجك السناجك بحاله !! ..
قلت لي الصفيحة بـ 4 ألف بس .. كان كدي قول للدكوة جاكي بلا  ..
|
Post: #6
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: السنجك
Date: 11-26-2006, 09:22 PM
Parent: #5
الحمد لله لقيت هذا الخبر فى السودانى اليوم لانه زى ناس ناذر ديل متخصصين تشكيك لكن دى فى السودانى الكيلو ثلاثه الف ونص ودطبعا عن امس لكن اليوم فى الخرطوم وصل 5الف
ودا ماورد فى السودانى
وارتفع سعر جوز صفائح الطماطم من (40) إلى (70) ألف جنيه بواقع (35) ألف للصفيحة، و(3500) ألف للكيلو بدلاً عن (2500) ألف جنيه وارتفعت ربطة الملوخية الكبيرة من (5) الاف إلى (10) والربطة الصغيرة من (300) جنيه إلى ألف جنيه وربطة
يبقى منو الكضاب يامنير
السنجك
|
Post: #7
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: السنجك
Date: 11-26-2006, 09:55 PM
Parent: #6
قام الجبهه الاسلاميه بعمليه قذره ضد اهلنا فى الشمال حيث قامت بعد ان جنى المزارعين محصول البلح باستيراد عجوه وبلح من الخارج فنزل سعر البلح من مائةالف للجوال الى ثمانين الف ثم الى 50 الف ومازالت الاسعار فى انهيار وانضرب المؤسم والان التجار الجبهجيه يشترون البلح
بعدها سوف يوقفون الاستيراد وترتفع الاسعار ويكسب تجار الجبهه
السنجك
|
Post: #8
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: hajhamad
Date: 11-27-2006, 02:33 AM
Parent: #7
يا ناذر
بالله خليك قريب من السوق المحلي لانو اذا استمرت الاشاعات الهنا دي ، يقوموا الجماعة يزيدو الاسعار في السوق شيل معاك لاب توب و عسكر في المحلي و أدينا الاسعار من هناك لانو في ناس بجيبو الأخبار دي من الجرائد.
الأخ د.منير
الحمدلله أسعار الطماطم دي ظهرتك لينا ، تحياتي
الحاج حمد
|
Post: #9
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: ناذر محمد الخليفة
Date: 11-27-2006, 03:28 AM
Parent: #1
السنجك ..
Quote: الحمد لله لقيت هذا الخبر فى السودانى اليوم لانه زى ناس ناذر ديل متخصصين تشكيك لكن دى فى السودانى الكيلو ثلاثه الف ونص ودطبعا عن امس لكن اليوم فى الخرطوم وصل 5الف
|
لا تشكيك لا بطيخ !! الناس ذنبها شنو لو مراسل السوداني ما بيعرف يشتري وغشوهو !!
ممكن أنا أمشي السوق واقول لي أول زول قدامي بي كم الكيلو ؟ هو حر يقول لي بي ألف أو بي عشرة ألف .. لكم دا ما معناتو ألفح المعلومة وأجي جاري وأقول الطماطم سعرها غالي وأقيس عليها الفساد إستشرى والجنجويد دخلو القضارف والحكومة سفت البلد وصدام أعدموهو بسبب الطماطم !!
بعدين لاحظ فوق أنا قلت ليك شنو!!
الحاجة التانية أنا لمن قلت ليك السعر دا كنت متأكد منو مليون المية لأني مشيت السوق وسألت بي نفسي بس ما إشتريت ..
ثم ثالثا ياخ !!
الدنيا شتاء ونحن في عز (الصقط) شفت ليك طماطم بتكون غالية في الشتاء !!
صنفرة :
أنا ذاتي ما بحب الطماطم .. ما عارف الشبرني هنا شنو !!
|
Post: #10
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: nazar hussien
Date: 11-27-2006, 03:54 AM
Quote: الدنيا شتاء ونحن في عز (الصقط) شفت ليك طماطم بتكون غالية في الشتاء !!
|
طماطم...طماطم...طماطم طمااااااااااطم يا....دا زمن الكارو...اب طماطما بايرة يا
السنجك...وبي ميتين جنيه بيدوك طماطم تفطرك...وبي الفين يمكن يدوك معاها جرجير هوادة
من زماااااااان في الشتاء كان فطورنا بي سلطة طماطم وجرجير وبصل اخضر وزيت سمسم وعيش حااااار
وما كان في شيرنق...البدفع اليدفع...
|
Post: #11
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: nazar hussien
Date: 11-27-2006, 03:58 AM
Parent: #10
معليش نسيت الليمون والشطة الخضراء التي كانت في فطورنا الكان زمان
والله ياهو
حليل زمن الصبا الماضي...
زمنا الكنا لا ندري...بما كان الزمن ضامر
الزمن هسي خلانا نشتهي زيت السمسم ...والرغيف الحار...
يلا
بلا خبز...بلا عيش خباز...بلا عيش فرنسي...
|
Post: #12
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: ناذر محمد الخليفة
Date: 11-27-2006, 08:00 AM
Parent: #1
عارف يا السنجك ..
بوستك دا كلفني كتير خلاص !!
مشيت السوق وانا أهضرب بي سعر الطماطم .. انا اساسا شغلتي في سوق مواد البناء بتعامل في الإسمنت والسيخ والطوب .. بعد مداخلتك ديك بدل ما أسأل عن سعر طن الإسمنت أو لوري الطوب بقيت أقابض أسأل عن سعر صفيحة الطماطم وكيلو الطماطم !! الناس قالو ناذر دا فكت منو صامولة ولا شنو !!
سألت كمية من العمال والموظفين الساكنين في حتات متفرقة .. إجاباتم ما واحدة كانت !! وإجابات مختلفة وما ممكن أثق فيها .. عملت لي ضجة في السوق والموضوع إنتشر الناس كلها بقت تسأل تقول ناذر دا مالو بيسأل عن الطماطم في سوق مواد البناء !! لحدي ما جاني واحد كدة (سمساري) قال لي في أضاني (إنت قول داير كم لوري وأنا اطلعوا ليك بي سعر معقول) !!
المهم راسي ضرب وفي إشاعات طلعت في السوق انو أنا حا اقلب لي تجارة الطماطم (يعني جبت لي الشبهة) !! قلت أحسن أقوم إتحرك براي أمشي السوق المحلي وبالمرة إشتري لي معاي بطيخة بطيختين للبيت ،، والسمسار مرازيني إلا يمشي معاي يااااا الله الله إتحليت منو!!
دورت مشيت السوق .. لقيت الصفائح مردومة بالهبل وهناك عرفت أنو انا غلطان في السعر .!!
لكن إنت برضو غلطان معاي !!
لقيت إنو الصفيحة بتاعت الطماطم سعرها بقى غالي شوية من أربعة ألف بقت خمسة ألف !! طبعا فيها إتناشر كيلو ونص والطماطماية ما شاء الله حمرااااااا !! تفاحة أمريكية بس !!
طبعا الصفيحة بتكون (مطفجة) بالجنبات ودي المزارعين بيطفجوها مخصوص عشان ما تشيل كتير لكن برضو ما في مقاييس معينة لي قوة الطفجة يعني إحتمال تلقى مزارع شبعان وضارب السمنة البلدية يطفج الصفيحة بي (هوكين) ينقص حمولتا كيلو كامل وكمان تلقى مزارع كحيان وطاقاهو دسنتاريا يطفجا بي خبطتين ما تنقص من الصفيحة ولا وقيتين !!
المهم يا حبيب لقيت السعر خمسة ألف وكان داير صفيحتين بيدوك ليها بي تسعة ونص بس المشكلة في تجار القطاعي !!
طلعوا بيبيعوا كيلو الطماطم بي ألفين وألفين وخمسمية !! تتصور الربح الفاحش دا !!
يعني برجع لي كلامنا الأول :
المهم جيت راجع الشغل لكن بفكر هسي أقلب لي تجارة الطماطم لأنو أرباحا والله خيالية وأكتر من ارباح مواد البناولو داير تخش معاي شريك ما عندي مانع !!
صنفرة :
أها ما أظن قصرت معاك .. بس ما تسألني عن أسعار البصل والدولار والأراضي النازلة لأني هسي بفكر بس في الطماطم !!
|
Post: #13
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: السنجك
Date: 11-27-2006, 08:54 AM
Parent: #12
ياناذر ماعندى مانع اشاركك لكن تجارتنا اكيد حتخسر لانه حنبيع باقل مماحنشترى المهم حننشر الرخاء لكن ياناذر الشراكه تكون فى كله طوب واسمنت وسيخ وبالمناسبه ورينا الاسعار كم فى المواد دى لانه بيغشونا كتير واوعى انت تكون بتاع ناس على الطلاق دا طوب العيلفون والحقيقه الطوب من امدرمان
السنجك
|
Post: #14
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: nazar hussien
Date: 11-27-2006, 10:20 AM
Parent: #13
| Quote: انا اساسا شغلتي في سوق مواد البناء بتعامل في الإسمنت والسيخ والطوب .. |
بس قرّط علي كده.....
يعني هسي لو جيتك يا ناذر وقلت ليك....انافلان الفلاني من سودانيز اونلاين بتجاملني
والله لازم يكون حنكي سنين...
مواد البناء ياها الطيرتنا من البلد ولا هسي حق سيختين ما لميناه...
اها سؤال تاني يا ناذر....
ما بتديني سيخ وطوب ...بالاقساط...عليك امان الله كل شهر اديك قسط
|
Post: #15
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: السنجك
Date: 11-27-2006, 10:37 AM
Parent: #14
ياناذر حسين
طيرت الزول خليته شردبقصة الاقساط دى ..حيجى بعد زمن يقول ليك غير طماطم ولو داير بالاقساط بديك
السنجك
|
Post: #17
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: محمد الأمين موسى
Date: 11-27-2006, 12:36 PM
Parent: #15
| Quote: لقيت إنو الصفيحة بتاعت الطماطم سعرها بقى غالي شوية |
ناس مشغولة بصفايح الخرصانة.. وناس مشغولة بصفايح الطماطم.. وناس المناقل مشغولين بصفايح الطحنية.. وأهلنا في غرب كردفان مشغولين بصفايح الموية.. وأهلنا في اليابان مشغولين بالصفايح التكتونية!!
إنما الدنيا صفايح ليس في الدنيا ثبوت
إنما الدنيا كبيت نسجته العنكبوت
|
Post: #16
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: Elawad Eltayeb
Date: 11-27-2006, 11:08 AM
Parent: #13
| Quote: واسع الناس البيبيعوا فى السوق المواطنيين والمغتربين والبشترى الجبهجيه |
الجبهجية بعد ما استنزفوا المغتربين "بالضرائب" و"الرسوم"
بقوا يستنزفوا المغتربين بضغط أسعار العملات الصعبة، دون أن يقابل ذلك نزول في أسعار السلع والخدمات بالداخل.
أعترف للكيزان بأنهم "تمكنوا" في الفساد.
|
Post: #18
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: ناذر محمد الخليفة
Date: 11-27-2006, 12:43 PM
Parent: #1
نزار حسين ..
الله قبضك لي !! (يا قول رشا سالم) ..
Quote: يعني هسي لو جيتك يا ناذر وقلت ليك....انافلان الفلاني من سودانيز اونلاين بتجاملني
والله لازم يكون حنكي سنين...
|
جدا بس طالبك حاجتين طالما إنك من سودانيز أون لاين :
الحاجة الأولى حفلة بنقلور الهند الأنا بغني فيها وإنت مرة في بوست القصيدة الأوتومسفيرية بتاعت كودي قلت حا تنزلا وبعد داك عملت مجنون !!
الحاجة التانية :
تمسكني الباصويرد تبعك بتاع المنبر ضمانة معتمدة لحدي ما تسدد الاقساط !!
|
Post: #19
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: nazar hussien
Date: 11-29-2006, 09:18 AM
Parent: #18
Quote: جدا بس طالبك حاجتين طالما إنك من سودانيز أون لاين :
الحاجة الأولى حفلة بنقلور الهند الأنا بغني فيها وإنت مرة في بوست القصيدة الأوتومسفيرية بتاعت كودي قلت حا تنزلا وبعد داك عملت مجنون !!
الحاجة التانية :
تمسكني الباصويرد تبعك بتاع المنبر ضمانة معتمدة لحدي ما تسدد الاقساط !!
|
العمل مجنون عمك البورد شخصيا...لامن الحفلة انتهت...لكن بحاول افتشها وأعمل ليك سي دي...
انا زاتي لاطشها من طالب كمبيوتر جاء من الهند...وعندو عدة حفلات وبارتيهات لسودانيين....
جنس كشف هو...
دي معناها اذا لقيتها حا تجاملني مش؟
اما الباصويرد...بديك ليه غتاس....لكن بس تراعيني في الاقساط....ما تشبحني اقساط مكان
مكان....لامن اسف التراب...
|
Post: #20
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: السنجك
Date: 11-29-2006, 09:47 AM
Parent: #19
يااخوانا نحن اسياد البوست حقنا وينو؟؟
شايف الاتفاق تم وزول اتذكرنا مافى !!نحن حقنا مابنخلى والا نطرشق ليكم القصه كلهاوانشاء الله صفيحة رمله
السنجك
|
Post: #21
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: nazar hussien
Date: 11-29-2006, 10:15 AM
Parent: #20
Quote: شايف الاتفاق تم وزول اتذكرنا مافى !!نحن حقنا مابنخلى والا نطرشق ليكم القصه كلهاوانشاء الله صفيحة رمله
|
يا السنجك ...ياخي ما تطرشق الاتفاق دا....صفيحة طماطمك في بوكسي ناذر...
ورملتك بتجيك لا عند خشم بابك....بس خلي ناذر دا يكشحنا بي لوري لوريين...
|
Post: #22
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: السنجك
Date: 11-29-2006, 10:31 AM
Parent: #21
ياناذر حسين
قصتك طرشقت وناذر خليفه فتحوا ليه بوست بهناك(محمد عمر الفكى) وتمت تعاقدات !!اقساط شنو القصه فيها بيت بطوابق وواحد كمان داير شارع ظلط والدفع كاش !!؟؟؟
والظاهر انت حتكون مشرور بجاى وصاحبك اظنه اسع قبض العربون
السنجك
|
Post: #23
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: nazar hussien
Date: 11-29-2006, 10:55 AM
Parent: #22
نان انت مخلي الكاش البي هناك داك...ولاحقنا هنا في صفيحة رملة...وبالاقساط
وداير ناذر يجي راجع هنا...كان كدي طرشقت الاتفاق انت دا...وبعدين كان ناذر زاتو جاء راجع
صفائح الرملة البي اقساط دي انت قايل سمسرتك منها كم؟
تجي زي كوز صلصة رملة...لي المديدة حارة ما بتنفع.
عشان كدي الحقهم بي هناك طالبهم بي سمسرتك لوري رملة ...
بترجع لي اتفاقي دا في محلو وكوز صلصتك وصفيحة طماطمك جاهزات
|
Post: #24
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: ناذر محمد الخليفة
Date: 11-29-2006, 11:48 AM
Parent: #1
نزار والسنجك !!!!!
موسم الطماطم إنتهى خلاص وسعرها طار السما !!
خلاص قفلو البوست دا عشان انا غيرت رايي من تجارة الطماطم لأني لي شغلة كويسة مع محمد الفكي !
|
Post: #25
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: السنجك
Date: 11-30-2006, 09:50 AM
Parent: #24
يانزار انا برفع فى البوست عشان اشوف ليك زول تانى غير ناذر يجى يحن عليك ويديك بالاقساط
والا اقول ليك انا حارجع ليك ناذر
ياناذر اها الراى العام الليله ايدت ماقلته فى سعر الطماطم واقرا كلام الراى العام دا
اسواق الخضر تسيطر اسعار الطماطم على حركة البيع حيث تشهد معظم اسواق الخضار حركة بيع ضعيفة عزاها محمد سعيد تاجر بالسوق الشعبي «الملجة» الى ارتفاع اسعار الطماطم التي وصل سعر الكيلو منها «4» آلاف جنيه وارجع ذلك الى الدور الذي تلعبه الطماطم لكثرة استخداماتها. وقال لـ «الرأي العام» ان قلة الوارد منها الى الاسواق اسهم في ارتفاع اسعارها الا ان هنالك توقعات بانخفاض اسعارها خاصة وان هذه الايام تعتبر بداية موسمها. وعن اسعار الخضروات الاخرى اكد استقرار اسعارها حيث حافظ البطاطس على اعلى معدل له وجاء سعر الكيلو منه لهذا الاسبوع «4» آلاف جنيه اما الباذنجان فقد حافظ على «الفي» جنيه والبامية «الفي» جنيه ايضا كل التوقعات تشير الى ان الايام القادمة ستشهد حركة بيع نشطة خاصة مع بداية دخول كميات كبيرة من الطماطم الى الاسواق.
وفي ذات الاطار فقد شهدت اسواق الفواكه استقراراً في اسعارها، ويقول احمد البعيو ان من مميزات الشتاء المحافظة على شكل الفواكه لزمن اطول. حيث جاء سعر كيلو الموز «الفي» جنيه، اما البرتقال فقد جاء سعر الدستة ما بين «5 الى 6» آلاف جنيه وحافظ القريب فروت على «8» آلاف جنيه للدستة وتلاحظ احجام الناس عن شراء البطيخ نسبة لبرودة الجو بالرغم من وانخفاض اسعاره، كما تلاحظ انتشار بعض انواع الفواكه الاخرى مثل الرمان وغيره من الفواكه المستوردة كالتفاح والعنب والفراولة.
هبوط غير متوقع في اسهم سوداتل بسوق الاوراق المالية
السنجك
|
Post: #26
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: ناذر محمد الخليفة
Date: 11-30-2006, 10:44 AM
Parent: #1
السنجك
Quote: ياناذر اها الراى العام الليله ايدت ماقلته فى سعر الطماطم واقرا كلام الراى العام دا
|
الراي العام الشغال فيها أبو بكر وزيري ولا واحدة تانية !!!!
|
Post: #27
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: nazar hussien
Date: 12-02-2006, 03:40 AM
Parent: #26
Quote:
نزار والسنجك !!!!!
موسم الطماطم إنتهى خلاص وسعرها طار السما !!
خلاص قفلو البوست دا عشان انا غيرت رايي من تجارة الطماطم لأني لي شغلة كويسة مع محمد الفكي !
|
والله كلامك صحي يا السنجك...
اظن:
خوة المنبر حدها البنبر...
يعني اقساطي راحن في حق محمد الفكي.....
|
Post: #28
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: السنجك
Date: 12-02-2006, 01:22 PM
Parent: #27
يانزار
ناذر باعك
نرفع البوست دا يمكن تلقى ليك واحد يدينك
بعدين ياناذر ياها الراى العام الانقاذيه هم بقوا يكضبوا حتى فى الاسعار !!!!
السنجك
|
Post: #29
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: ناصر محمد خليل
Date: 12-02-2006, 06:15 PM
Parent: #1
Quote: بعدين ياناذر ياها الراى العام الانقاذيه هم بقوا يكضبوا حتى فى الاسعار !!!!
|
|
Post: #30
Title: Re: ارتفاع الاسعار و ربع البصل 10 الف وكيلو الطماطم 4الف والدولار والاراضى الاسعار نازله!!!
Author: السنجك
Date: 12-03-2006, 01:43 PM
Parent: #29
شكرا ناصر
البصل أصبح أغلى من التفاح:أسعار الخضروات تواصل مسلسل الارتفاع والمواطنون يشكون لطوب الأرض
أسواق الخضروات بولاية الخرطوم خلت من كل شئ إلا بعض المتفرجين مقابل أعداد كبيرة من التجار والسماسرة الذين أصبحت أعدادهم تفوق أعداد المشترين اضعافاً في ظل مواصلة مسلسل ارتفاع أسعار الخضروات، وفيما شكا عدد كبير من المواطنين من الارتفاع الحاد في أسعار الخضروات الذي رفع من سقف غلاء المعيشة وأخل بميزانية الكثير من الأسر وأدى لتذيل الخضروات قائمة السلع الغذائية للمواطن ليحل محلها العدس والفاصوليا. وعزا التجار والسماسرة الارتفاع لفيضان النيل الذي دمر العديد من المزارع وأدى لشح الواردات.
وقالت إلهام عبد العزيز ربة منزل: الخضار غالي جدا إلا الرجلة وأنا كنت اشتري خضار أسبوع كامل من دون لحوم بمبلغ (10) آلاف الآن ارتفع هذا المبلغ لـ (20) ألف جنيه بسبب الغلاء إذ نجد ان سعر ربطة الشمار الأخضر الصغيرة وصل سعرها إلى (500) جنيه أما البصل فقد صار أغلى من التفاح حيث بلغ سعر الربع منه (10)آلاف جنيه مؤكدة ان ارتفاع الأسعار أدى لخلل في ميزانية الأسرة بصورة كبيرة والعيد على الأبواب، وقال سامي الطيب من شركة كردفان للتجارة: نحن نتعامل مع متعهد ونقوم بمراجعة الأسعار كل (3) شهور بعد ان نجري مسحاً شاملاً للأسعار ونضع متوسطاً سعرياً يلتزم به المتعهد وقال أعتقد ان الأسعار مرتبطة بدرجة كبيرة بموسم الإنتاج.
وقالت نجاة محمد ربة منزل: لأول مرة اشتري الخضار بنفسي وأحمل معي مبلغ (20) ألف لم تكفني لشراء (4) أصناف مجتمعة فقمت أخيراً بشراء كيلو بطاطس بـ (4) آلاف ولم يكفني المبلغ فأعدتها إلى صاحبها وأنا الآن في حيرة.
وقالت مواطنة ـ فضلت حجب اسمها ـ الأسعار مولعة نار فأنا اشتري الخضار بالجملة وأذهب به إلى حجر العسل وابيعه بالكوم فمرة أخسر ومرة أربح. وذكر المواطن صلاح محمد الحسن انه لا يستطيع ضبط ميزانيته كما انه لا يستطيع التكيف مع هذا الغلاء والتقلب في الأسعار مما أضطرنا ان نتحول من الخضروات إلى العدس والفاصوليا.
ولازالت أسعار الخضروات تواصل مسلسل ارتفاعها المستمر منذ أكثر من شهر.
حيث ارتفع سعر كيلو الطماطم من (2500) إلى (4)آلاف وحافظ البطاطس والبامية والخضروات الورقية على أسعارها بالرغم من انخفاض درجات الحرارة بمعدلات أكبر باعتبار ان فصل الشتاء هو ميقات الوفرة وانخفاض الأسعار.
استطلاع: عباس حسن أحمد
السنجك
|
|