ده لو بقت آخر مره مابعرسه

؟؟؟؟؟؟؟

رحلو يادوب ليهم سنة وكعادة أهلنا الحلوة انصهرو في الناس بسرعة وناس الحلة قابلوهم
بالترحاب والسماحة الولد الكبير متوسط التعليم مغترب في الخليج ليه مده وما حاضر الرحول
جاء في الإجازة السنوية بتاعتو بسماحة السودان الجميل الناس مشت تسلم عليه وتتحمد
السلامة لاهلة ، بعد إسبوع كان المغترب وأبوه في رد زيارة لاحد الاسر من الجيران
ولكنها لم تكن زيارة مجردة بل كان من ورائها دافع آخر ، الولد قال يجي يسلم عليكم ياحاج
فلان ويتعرف بيكم من قريب ، والله مرحب بيه فيه الخير ما نحنا جيران يارجل يافاضل
وكمان والله ياحاج نحن دايرين نبقى أهل عديل دم ولحم ، مرحب بيكم ياحاج والله نحن فعلاً
أهل وزي مابقولو الجار قبل الدار، بعد كلامك السمح ده ياحاح النقول ليك نحنا جيناكم وقاصدين خير جينا عشان نخطب بتكم فلانة لي ولدانا ده ، والله ياحاج أقول ليك شنوعاد انتو ناس مابسألو
عنكم وما فيكم كلام بس طبعاً عندنا شوره ونرد عليكم .

جاءت إليها أمها ووجهها يتهلاً بالبشر والفرح يابتي أبوك قال أنه فلان وولدة الجاي من بره ده
كانو هنا وطلبوك للزواج سكتت مستبشرة وخجلانة وبدت رحلة الأحلام في تكوين الأسرة بكل
التفاصيل فهي في هذه الليلة لاتريد النوم بعد أن تحولت أحلامها إلى حقيقة تعيشها اللحظة
وافق أبوها على الخطبة وتمت المقابلة الشرعية وبدت التجهيزات للفرح العريس مستعجل
داير يتم الموضوع عشان الإجازة قصيرة ولما يرجع يرسل ليها تلحقو.
ذهب العريس لحيه القديم لزوم السلام والمجاملات الفاتت عليه أثناء فترة غيابه في المهجر
قابل أصحابه وقال ليهم أهه المرة ده إن شاء الله حاعرس والله خبر جديد وجميل وده منو
ده يازول ، والله بت جيرانا في الحلة صاحبت أختي وده بت ناس منو يازول والله أبوها
إسمه فلان ده فلانه ، إنت بتعرفها من وين ، يازول أنت مجنون ده كل الناس بتعرفها ،
كيفن يعني كل الناس بتعرفها ، أصلها صحفية مشهورة جداً إنت ناس البيت ماقالو ليك .
وبدت أفكار صاحبنا العريس تسمع بوضوح صحفية وأكيد خريجة جامعة كمان ليه مافي
زول قال لي الكلام ده والله ده تلقها أسع كمان مشتركة لي في المنتديات ترد على فلان
وتشكر فلان وفلان يمتدح ما تكتب وترد عليه بالشكر والعرفان
واخيراً صاحبنا قرر الزولة ده لو بقت آخر مره في الدنيا ما ح يعرسها

حالة قد تمر علينا بكل صدق كيف يمكننا أن نتعامل معها

هنالك بعض الأسئلة الملحة للإجابة

هل التكافئ مهم في العلاقة الزوجية
وهل المطلوب تكافئ نوعي أم محدود أم تام

إذا إنعكست الآية وكان الزوج هو الصحفي
والعروس هي متوسطة التعليم
هل ستكون هنالك نفس الحساسية في الفهم والتفكير

الله يسهَل للجميع اخوانا واخواتنا

معقولة في ناس تدخل في الشغلة دي بدون معرفة وبمثل هذا الجهل؟

الله غالب

الأخ حيدر حسن ميرغني

للأسف في كثير من الناس فعلاً بدخلوا
الشغلانية ده وهم ماعندهم فهم واضح
للاشياء وما ممكن ان يترتب وندرج
تحت الخطوة بتاعتم المهم لمة وفرح
وبس

هذه دعوة جادة للإخوة والاخوات أعضاءالمنبر
وخاصة من لهم صلة بعلم النفس وعلم الإجتماع
لتحليل مثل هذه الظواهر التي قد نرى فيها عدم
الإعتدال النفسي ولكن لابد من وجود أسباب حقيقية
لمثل هذه الحالات سوى كانت ناتجة عن التربية والتنشئة
أو مكتسبة من المحيط الخارجي المكمل لشخصية الفرد
وإذا كانت هنالك حلول علمية وعملية ممكن أن تساعد
في خلق جيل متوازن نفسياًوإجتماعياًمن أجيالنا القادمه

الاخ ابراهيم الشيخ ,

تحية و احترام,

ارى ان مجمل مارويت فى النص من مشاهد كانت تتكرر فى فترة سابقة من تأريخ السودان الاجتماعى و حينها كانت ظاهرة زواج المغتربين فى اوجها!

ما ادهشنى جدا هو ما كتبت عن شأن اشتراك الاستاذة الصحفية التى كان المغترب بصدد الزواج منها فى المنتديات و التى ارى انه مقحما اقحاما فى ذيل النص و لا اجد له اضافة او اثر فى حبكة النص الدرامية ان جاز التعبير .


لك الود ,


نادية السر

الأخت نادية السر
شكراً على المرور
إلى الآن ظاهرة زواج المغتربين مستمرة
وما إنتهت على فكرة ربع شباب السودان الآن خارج السودان
يعني الهجرة بقت أكثر من زمان ومسالة إنقطاع الشخص عن الوطن
في غالب الأحيان بتسوقو للبحث عن بدائل في الاختيار وبكون ناس البيت
هم غالباًالحكم والأصدقاء وشرائط الحفلات وحاجات كثيرة جداً
لماذا الدهشة شخص بهذه العقلية في التفكير ممكن يفكر في كل حاجة
عموماً شكراً جداً على المرور وما كتبتية


لك الود

مجتمع متخلف ومضمحل فكريا مجتمع مكبوت ورجولة فى طرف اللسان وانوثة مجنى عليها .....


قلت قال الزولة ده لو بقت آخر مره في الدنيا ما ح يعرسها

ما الذي يعيب الصحفيه التي تكتب في المنتديات ويمدحها عضو وترد عليه بالشكر والعرفان ؟؟؟


مندهشه والله !!!ّ
نفهم انه دا رائك في من يكتبن بالبوردات ؟؟!!!
والله دا لو بقي اخر رويجل في العالم ما يعتب خشم باب بيتنا خلي كمان يطلب يدي

الأخت doma

بالنسبة لي وليك وكثيرين لافي غرابة ولا في غضاضة
بل ممكن يكون في تشجيع ودفع على ذلك
بس النص بيتكلم عن عقلية غير وهذه العقلية موجودة فعلاً تسعى
بيننا وده نابع من إحساس العريس بأنه أقل تعليماً من العروس
ببساطة شديدة.... وعلى فكرة ده نقطة جوهرية في النص

Quote: مندهشه والله !!!ّ نفهم انه دا رائك في من يكتبن بالبوردات ؟؟!!!

أرجو أن تاخذي الفكرة متكاملة ثم تعملى على تحليلها

حسن الجيلي سعيد
ياسيدي الحاصل إنه العقلية ده موجوده بس ممكن تكون محدودة
وبعدين على فكرة ما دائماً المراءة هي مجني عليها في كثير
من الأحيان بتكون هي الجانية على نفسها لانو مفروض هي عندها
فرصة في الإختيار وقولة لا ونعم بس هي ما بتتمسك بحقها غالباً


مودتي

فوق

الأخ / الشيخ

لك التحية

له كل الحق في ذلك والحقيقة أنه إذا زعم رجل أنه لا يغار على زوجته وهي (مثلاً) تكتب في المنبر وتمدح هذا وتشكر هذا فهذا زعم كاذب وليس له ما يدعمه.
الرجل يغار على زوجته من الهواء الطائر خليك من كلام المنبر دا.

ابوفتحية

الأخ أبو فتحية

شكراً على المرور والمداخلة بس زي ما بقولو
لولا إختلاف الأزواق لبارت السلع أنا طبعاً لا يسعني
إلى أن أحترم ماكتبت

Quote: له كل الحق في ذلك والحقيقة أنه إذا زعم رجل أنه لا يغار على زوجته وهي (مثلاً) تكتب في المنبر وتمدح هذا وتشكر هذا فهذا زعم كاذب وليس له ما يدعمه.

بعدين مسألة الغيرة ده أنا شخصياً ماعندي فيها خلاف والرجل لازم يغار على أهل بيته
(بس) المسألة ما مطلوقة على عوانها يعني الكتابة في البورد لاتعني إطلاقاً الإسفاف
مع ملاحظة إنك إنت تكتب ... هل تقبل إذا زوجتك أو أختك مثلا قالت ليك توقف عن الكتابة
المسالة ياأخي هي ما نكتب وعن ماذا نتحدث ليس إلى

ولك مودتي بلاحدود

الأخ/ الشفيع
لك التحية

يا أخي لو ما نحن الرجال وقفنا أحرقتنا الغيرة على عروضنا فمن غيرنا يفعل ذلك بدلاً منا؟؟

Quote: مع ملاحظة إنك إنت تكتب ... هل تقبل إذا زوجتك أو أختك مثلا قالت ليك توقف عن الكتابة المسالة ياأخي هي ما نكتب وعن ماذا نتحدث ليس إلى

أنا أكتب وزوجتي لها الحق تكتب أيضاً ولا أمنعها هذا الحق ولكن لو لقيت يوم كاتبه ليها كلمة أشعرتني بالغيرة فلن تكتب مرة ثانية في اي منبر آخر دا لو كتبت في كراس يكون ماخلت حاجة.

أبوفتحية

الأخ الصادق أبوفتحية
تحياتي

ياخي إنت مالك نفسك قايم كده وما متذكرإن النساء ديل هم أمي وأمك وزوجتي وزوجتك
وعندهم حقوق وعليهم واجبات زينا تماماً

Quote: أنا أكتب وزوجتي لها الحق تكتب أيضاً ولا أمنعها هذا الحق

لحدي هنا متفقين تماماً
بس جيت تاني وسلبتها الحق الكنت موافق عليه من الأول

Quote: ولكن لو لقيت يوم كاتبه ليها كلمة أشعرتني بالغيرة فلن تكتب مرة ثانية في اي منبر آخر دا لو كتبت في كراس يكون ماخلت حاجة.

مش ممكن تكون فهمت الموضوع بالغلط وبالتالي تأخد قرار قد تندم عليه
وتاني بدعوك لقلب الموضوع حتقبل رايها ولا ح تناقشها فيه



مودتي

Quote: إذا إنعكست الآية وكان الزوج هو الصحفي والعروس هي متوسطة التعليم هل ستكون هنالك نفس الحساسية في الفهم والتفكير

الاخ الشيخ
اكيد لو انعكست الاية الموقف ما حا يكون نفسو
في ناس كتيرة بتهاب ولا خلينانقول بتخاف من المراة المتعلمة تعليم عالي يعني غوق الجامعي
فالحساسية موجودة وبكثرة كمان
مع العلم في ناس تعليمهم متوسط ولكن تفكيرهم احسن من ناس عندهم اعلي الشهادات

الأخت سارة حمزة

Quote: اكيد لو انعكست الاية الموقف ما حا يكون نفسو في ناس كتيرة بتهاب ولا خلينانقول بتخاف من المراة المتعلمة تعليم عالي يعني غوق الجامعي فالحساسية موجودة وبكثرة كمان

هو ده الكلام العايزين نعرف ليه بيحصل أنانية.. خوف من إنه يكون زوج الهانم تربية ولاسلوك
مجتمع مع العلم أنه أى واحد فينا عايز أمه واخته وقريباتو يكونو أحسن النا س فهماً وتعليماً
وخلقاً وسط المجتمع ده مش تناقض واضح في المواقف

Quote: مع العلم في ناس تعليمهم متوسط ولكن تفكيرهم احسن من ناس عندهم اعلي الشهادات

أوفقك الرأي أنه في ناس كثيرة متوسطة تعليم أوحتى ما متعلمة لكن ذات بصيرة وتفكير عالى
وإحساس حقيقي بالآخر

دى حـــــــــرقة سآآآآآآآى ،، الظاهر عليها أدتك شــاكوش قوى

سلامات

للاسف انت بتعكس في عقلية سيادية في المجتمع عندنا

ولدي اغرب قصة في ذات السياق

زول مكافح في اسواق الخرطوم نوع بيع علي الارض وكشات الشرطة

لملم ليهو قريشات قال عايز يعرس

رجع الحلة لبت عمو قالو ليهو تمام البت ليك

بس البت بقت مستوظفة في مدرسة الاساس بدرس حساب

وهي شهادة سودانية بس

افوا انا يقول لي راجل الموظفة

حرم مادايرة تب

قبل ع الحلة التانية

خطب بنوتة 14 سنة امورة حلوة

تم الزفاف بالبسيط

اودة امو وعنقريبين

وافقت البنية

رحلت حلت اهلو

وقعدت مع امو واخياتو الاثنين

في اودة وراكوبة

بعد العرس رجع الخرطوم

البت حامل

رجع بعد 5 شهور الحلة

ساقها وداها اهلها وقال ماعايزها

الام تبكي علي البت الحنونة المؤدبة

والعين وقعت في ودالناس

والقصة بقت صعبة

البنية ولدت ولد سموه محمد

السماية بليلة وبلح

وابوها رفع الاسم بالبليلة

عشان الابو ما قبل عليهم تاني

بعد سنة ونص وجرجرة واجاويد

البنية شن سوتللك

ممرمطة جنس المرمطة دي

ماعايزها

وح اطلقها

وتم الطلاق

الام زعلانة في القصة الغريبة

دخلت ولدها الاوضة وشالت قسم الله

الا يقول ليها سبب الجد

الولد برم شنباتو

وقبل علي امو وقال ليها

مابدورها يا يمة

البت دي ضعيفة

وعاملة زي الهيكل العظمي!!!!!!!!!!!!

عضامك باالاريرضرضهم انشاء الله

انت جايبلها اكل عشان تشم العافية

خسارة فيك البنية

امشي عاين في بنات الخرطوم

وتعال حانف وشيك وقول عايز تعرس تاني

الا انا ميتة

وطفش طفشة السمحين

تاركا المطلقة ذات ال15 خريفا ومحمد

الصغير

و

عجبي

sudania2000

سلامات

Quote: للاسف انت بتعكس في عقلية سيادية في المجتمع عندنا

شكراً للمداخلة الجميلة وطبعاً المكتوب هنا ده كلو لعكس هذه العقلية التي تحتاج
لكثير من الجهد حتي تتفهم ما حولها من مستجدات

Quote: رجع الحلة لبت عمو قالو ليهو تمام البت ليك بس البت بقت مستوظفة في مدرسة الاساس بدرس حساب وهي شهادة سودانية بس افوا انا يقول لي راجل الموظفة حرم مادايرة تب

شوفتي الحكاية كيف داير يكون هو العنوان يعني راجل فلانة وليس العكس

أساساً مسألة الزواج ده في ناس كثيييييييييييييير ماعندهم ليها فهم خالص غير فلان عرس
لكن ليه وعشان شنو الله أعلم بعدين العيب ممتد حتى للأسر يعني البيجي كلو مابعرسو ليه
حتى لو كان ود العم أو ود الخال عشان تصون بتك لازم تعرف إنت حتناسب منو الناس و....

والمسالة طويلة جداً وفعلاً عجبي

bak2010ory

Quote: دى حـــــــــرقة سآآآآآآآى ،، الظاهر عليها أدتك شــاكوش قوى

ياخوي الله لاجاب حرقة ولاشواكيش
عليك الله لاقاك هنا مسار ساكت
عشان يكون في شواكيش

لكن هوالحاصل شنو