Post: #1
Title: واحببتُ ... نادر خدر
Author: Bakhaf
Date: 10-16-2006, 01:28 PM
حتى قبل رمضان هذا ..
كنت امقت هذا النادر خدر جدا ..
لانني كنت اعتقد انه من اسباب تدهور الغناء السودان .. وذلك لاسباب ثلاث
-ادائه الاغنيات بمصاحبة الة الاورغ فقط .. مما ادى الى تدهور مريع في مستوى الموسيقى المصاحبة للمؤدى .. وفتح خط للشباب من بعده اعتماد هذه الالة فقط في اداء كل الاغنيا ت ..اعتقد ان اول من سنه هذه السنة السيئة هو حيدر بورتسودان
- اختياره لاغنيات مبتذله.. تُغنى في التعليمه او القعدات الخاصة جدا على شاكلة -الساعة خمسة يا حبيبو ما تنسى - ليغنيها في الحفلات العامة ومناسبات الزواج ... وهو اول من اخرج هذه الاغنيات الى العلن بعد ان كانت تُؤدي في قعدات الشراب والرحلات احادية الجندر والتعليمات
- حبشنة الغناء السودان ، واصرارة على زج اللكنه والاداء الحبشي في الاغنيات السودانية قسرا
ثم اتى رمضان .. واتى ومعه البرنامج التوثيقي الجميل جدا (اغنيان واغنيات) عبر شاشات قناة النيل الازرق الفتيه .. فاختلفت الفكره باختلاف الحال
قبل ايام سمعت نادر خدر يصدح بالاغنية الخالده ( كلمة ) اغنية الفنان المبدع صلاح ابن البادية وشاعرها الفطحل محمد يوسف موسي .. والحق يقال فقد ابدع نادر وهو يؤديها ... ولكن لانني كنت لا اطيقه .. فقد عزيت هذا الابداع في ذلك اليوم الى
-الفرقة المصاحبة صحيح انها فرقة ناقصة لكن فيها ( الحرفه ) و(العلما) من الموسيقين السودانين مما غطى على النقص فيها
-ثم الى كلمات الاغنية والعبقرية في لحنها المبدع
ثم فاجاءني نادر خدر اليوم وهو يؤدي اغنية ثنائي العاصمة ( لما ترجع بالسلامة ) ..
ضربتين في وتر الاحساس .. تؤكد الموهبة والامكانيات
والحقيقة كان نادر خدر قمة في الابداع والامتاع
اضافة الى الاغنية بعدا جديدا.. بادائه المتميز .. وصوته المكتمل ( وجهة نظر شخصية لزول مستمع بس )
منذ اليوم ساستمع لنادر خدر باذنٍ جديدة
|
Post: #2
Title: Re: واحببتُ ... نادر خدر
Author: Bakhaf
Date: 10-16-2006, 01:40 PM
Parent: #1
كلمة
كلمات... محمد يوسف موسي
اداء .. صلاح بن الباديه
اعيش في ظلمة وانت صباحي
انت طبيبي اموت بجراحي
بشعري رفعتك اسمى مكانه
يا الجازيتني بكسر جناحي
عرفت الحب وفاء واخلاص
حنان ووداد ورود وسلام
عشت معاك ليالي جميلة
ليالي حنينة كالانسام
كنت معايا ولسه معايا
في احلامي وفي الاوهام
وتخاصمني عشان بس كلمة
ياما نظمت فيم كلام
لو في الكلمة انا غلطان
ياما انت قسيت وغلطت
ياما قلت وياما قلت ياما
وياما وياما وياما قلت
لو ارضيت بكلمة فؤادى
علشان خاطرك استحملت
عشان بهواك بشوفا رقيقة
كلمات جارحة بيها نطقت
كلمتي المست غرورك
وفرقتنا يا حبيبي
مش خلاص كفرت عنها
بسهري وبنحيبي
دي الليالي المره عشتها
وحدي بناري ولهيبي
وبرضو مارضيان تسامح
يا صباحى وطبيبي
|
Post: #3
Title: Re: واحببتُ ... نادر خدر
Author: Bakhaf
Date: 10-16-2006, 02:58 PM
Parent: #2
طيب من زمان مارضنا مالك وكت بتعرف تغني
يعني الا يجيبوا قدور
|
Post: #4
Title: Re: واحببتُ ... نادر خدر
Author: Bakhaf
Date: 10-17-2006, 03:06 AM
Parent: #3
يا سلام يا نادر
|
Post: #5
Title: Re: واحببتُ ... نادر خدر
Author: عمر الفاروق
Date: 10-17-2006, 03:27 AM
Parent: #1
حبــــــــيبو ..
ود بانت وود الفتيحاب حالياً الفنان نادر خضر صوتو عذب وزول غناي ..
من مميزات نادر معفته لمقدراته الصوتية وبالتالي يغني في هذه الحدود وهي ميزة ايضاً في الفنان سامي المغربي وده البيخليهم مميزين لأنهم ما بيجازفو بي اي اغنية ..وطبعا دي ميزة وفي نفس الوقت عيب لأنو الفنان مفروض يكون لديه من الامكانيات البتخليهو يشوت في اي اتجاه ..
نادر خضر فنان مثقف ومن افضل المتحدثين ومن اكثر الفنانين تنظيما وخططاً فهو الفنان الوحيد الذي لم يصدر البوماً غنائياً حتى الان وله في ذلك رأي ..
|
Post: #6
Title: Re: واحببتُ ... نادر خدر
Author: Bakhaf
Date: 10-17-2006, 03:40 AM
Parent: #5
ود الفاروق
كيفك يا حبه
الزول طلع غناي خلاص .. اقنعني عدييييييييل كده
لمن قربت اشتري ليه شريط .. فعرفت انه ما عنده شريط
طبعا الحلقات دي
اظهرت نادر خدر .. وكشفت فرفور
ياخ فرفور صوته تعبان تعب الموت .. وما بقدر يغني الا غنيه فيها نبيح ( تونه الصوت فيها بتكون عالية ) .. لكن الغنية لو بارده ... صحبك بجلي طوالي
ياخ في كم غنية كده الا لحقو عصام محمد نور
|
Post: #7
Title: Re: واحببتُ ... نادر خدر
Author: Bakhaf
Date: 10-17-2006, 02:25 PM
Parent: #6
فرفور قرب يضيع
حقو تاني ما يجل للتلفزيون
|
Post: #8
Title: Re: واحببتُ ... نادر خدر
Author: Mutwali Malik
Date: 10-18-2006, 09:00 PM
Parent: #7
اخي بخاف لك تحياتي
ماشفت نادر خضر لما يغني اسمك كيف
فعلا هو فنان بمعني الكلمة اداء متطور يعرف كيفية التعامل وانتقاء كلمات الاغاني وفوق كل هذا هو ملحن بارع
|
Post: #9
Title: Re: واحببتُ ... نادر خدر
Author: Bakhaf
Date: 10-19-2006, 02:18 AM
Parent: #8
مرحب متولي
سلامات واحترامات
حقيقي نادر خدر
اظهر امكانيات عالية في اغنيات واغنيات
انشاء الله تدوم
وم يرجع لي حبيبو
|
Post: #10
Title: Re: واحببتُ ... نادر خدر
Author: ود الباوقة
Date: 10-19-2006, 02:26 AM
Parent: #9
يا شباب سؤال برة الموضوع لو سمحتوا لي ..
هل المبدع نادر خدر هو اخ الكوتش فوزي المرضي ..
سمعت انه اخوه من امه افيدونا عاجلا ..
لكن بيني وبينكم عصام محمد نور هو نجم القعدة ...
ود الباوقة
|
Post: #11
Title: Re: واحببتُ ... نادر خدر
Author: Bakhaf
Date: 10-19-2006, 02:34 AM
Parent: #10
مرحب ود الباوقة
والله ما عارف لكن غايتو بشبهه
بخصوص عصام محمد نور
امكانيات ما محل خلاف كبير
عشان كده البسوي فيه عصام .. ياهو البشبهه
لكن نادر خدر كان مفاجاءة
|
Post: #12
Title: Re: واحببتُ ... نادر خدر
Author: Mutwali Malik
Date: 10-19-2006, 07:31 PM
Parent: #11
اخي ودالباوقة سلام
| Quote: هل المبدع نادر خدر هو اخ الكوتش فوزي المرضي .. |
هم من العمراب وجيران ولكن العلاقة اساسا هي بين عبدالناصر المرضي اخو فوزي وبين نادر خضر وهم اكثر من اخوة
نادر خضر له اخ واحد هو شهاب وله اخوات
|
Post: #13
Title: Re: واحببتُ ... نادر خدر
Author: Elhadi
Date: 10-19-2006, 07:37 PM
Parent: #12
بخاف ... كل سنة وانت طيب
صراحة كده نادر ومحمود عبد العزيز هم أفضل اتنين في الفنانين الشباب
أما صاحبك فرفور صوته قريب للـ ( السخلة)... الله يكرم السامعين ..
|
Post: #14
Title: Re: واحببتُ ... نادر خدر
Author: Bakhaf
Date: 10-21-2006, 02:24 AM
Parent: #13
مرحب الهادي
والله نادر طلع غناي
ومحمود مرعب عديل كده
بس لو التزم بي فنه
لكن فرفور انكشف
|
|