يعنى هسه أنا كان داير لى "كيان" أتلما على وين؟

المشكلة هى إنه أنا "السودان"

تقريبا كل السودان، أو ينقص قليلا

طيب

الوالد

أبوهو من قبيلة المسلمية، رهط "مسلم بن جماز"
أهل الشيخ "حسن ود حسونة"، من مسلمية البطانة

وأمه خليط من الرفاعيين والبطاحين، جزء من النيل الأزرق وجزء من البطانة برضو

يغنى كدى يبقى تلاتة قبائل

الوالدة

أمها من الجعليين الكتياب

وأبوها، وتعال شوف ليك لخبطة عاد

أم أبوها برضو من الرفاعيين، دى ساهلة شوية

لكين تعال شوف أبو أبوها

أمه من المحس، ناس ود أرباب العقائد فى الخرطوم وتوتى
وناس الخليفة بركات فى العليفون

وأبوهو خليط شكرية ورفاعيين برضو، إسمه الشيخ محمد على ود حمد العربى
أخو الشيخ حياتى ود حمد العربى بى أبوهو

يعنى كدى وصلنا ستة قبائل

يا ريت كان فى زول منهم زمان دخل فينا جزء من الدينكا أو الباريا وجزء تانى من الفور أو المساليت أو البرتا
ده بالطريقة المباشرة يعنى، أما بالطريقة غير المباشرة، فأكيد ومليون فى المية فيهم جزء وجزء اصيل كمان داخل فينى، لأنه القائمة الفوق دى كلها خليط بين العنصر العربى "الوافد" والعنصر "الما عربى" الصيل، نسميهو الزنجى أو الحامى أو الأفريقى، ما مهم، المهم الموضوع وما فيهو، خليط ومزيج، عصبا عننا كلنا

المهم الزول هسه كان ممكن "يتشلخ" علم السودان، بس يكون العلم القديم ما الجديد، لأنه العلم الجديد ده ما راكب لى فى راسى، وطوالى بعد داك أترشح رئيس لعموم شعب السودان

يا ريت والله بالجد

أما البجة ديلك، فأنا متأكد إننا داخلين فيهم أكيد، بس ناسنا زمان ما بكونو وعوا بالشى ده
أو ما بكون فرزوهو ساى

يا اخوانا ما تخليكم من حكاية قبيلتى وقبيلتك دى شوية
ليه ما يكون فى قبيلة واحدة بس إسمها "السودان"

المانع شنو يعنى

على بالإيمان كان الزول عاين كويس فى الخلق الحايمة جوه السودان ديل، اصلا ما حيلقى فرق

أنا من قبيلة السودان

ومن هنا أعلن قيام "كيان السودان"

أى زول داير ينضم معاى حبابو

وعما قريب حيصدر البيان الأول ل

"كيان السودان"

Quote: أنا من قبيلة السودان ومن هنا أعلن قيام "كيان السودان" أى زول داير ينضم معاى حبابو

يا مطر ..
صباحك دعاش وغيم ..

أول المنضمين ..

معتصم دفع الله ..

العزيز ود السودان

سلام

قول اثنين

مع كل الود

العزيز

د. عبد الله صديق

تحايا كاملة الندى وسلام أخضر ليك

وآلاف المراحب بيك

والفكرة طبعا إنه أى إنسان يؤسس كيانه الواحد الموحد المتعايش والجميل جوه دواخله

وبى كده نكون أسسنا لوطن متعافى وخيّر يشيل الناس كلها

ومؤكد إنت واحد من عشاق الوطن

دمت طيب إن شاء الله ودام الوطن لينا جميعا

وعميق الإمتنان يا دكتور

انا اول المرشحين

العزيز

فيصل محمد خليل

تحياتى وودى يا "قريبى"

تعرف قريبى دى أنا جاد فيها والله يا فيصل

وليه لا؟

هسه يمكن نكون أهل عديل كده، يمكن قبل سبعة أو تمانية أجداد، نكون كنا أسرة واحدة فى بيت واحد

عشان كده أنا مصر إنه السودان والسودانيين ديل حاجة واحدة مهما تباعدت الأشياء وإختلفت

شكرا ليك يا فيصل وأعلن والله فرحى بيك

وأهديك المعزة والتقدير كله

قول اربعه

أبا ذر ( مؤسس كيان السودان )

إحترامي الكامل عزيزي

Quote: من قبيلة السودان ومن هنا أعلن قيام "كيان السودان" أى زول داير ينضم معاى حبابو وعما قريب حيصدر البيان الأول ل "كيان السودان"

أعلن إنضمامي لهذا الكيان العملاق ...

دمت

أباذر المطر

ما أجملك

ما ما أروعك

صنعت لنا صباحا نديا منعشا

نحن معك ...نبايعك على وطن حر وانسان كريم شريف

العزيز

الصديق

قرجة

كيف الأحوال وشوق شديد والله ليك ولحروفك

وأمنياتنا من جوه والله يا قرجه للوطن بكل جميل وسمح وطيب

عشان نكون فى القمة زى ما قلت إنت فى وطن متسامح وشامخ وحر يسع للناس أجمعين

وليك التحية والود كله

العزيز جلال

سلام عليك يا ابا جهينة

ومرحب بيك فى كيان المحبة الإسمو السودان

وكلنا لازم ننضم ليهو وننحاز ليهو بكل ما فينا من قوة

مش نظريا وبس، لكين بالإحساس والوجدان والكلام والفعل

عشان نبقى زى ما مفروض نبقى

أعلى وأجمل ناس فى الدنيا

شكرا ليك يا جميل

العزيزة

صباح

صباحك وطن باهى وسمح

قلت والله

وياريت نقول "أربعين مليون" كمان

المهم كل واحد منهم يريد البلد الجميل ده ويحس إنه حقه وهو جزء منه
وبى كده أنا متأكد ما حيكون فى أى غبن أو إشكال

لا كراهية ولا موت ولا حروب

وكل تقديرى وإمتنانى ليك يا صباح

الموضوع وبقدر ما فيهو من شوية دعابة أو عدم جدية يمكن
وفى نفس الوقت وبالتأكيد طبعا ما فيهو أى نوع من السخرية أو التهكم

لكن الغرض الأساسى منه إعادة النظر فى موضوع الجهوية والقبيلة

وأهو كل السودان ومن بدايته ككيان موحد أو حتى قبل ده لمن كان عبارة عن مجموعات متجاورة ومتعايشة، حققنا شنو من الإطارات الضيقة دى؟ لا شى طبعا

والأكيد برضو إنه من حق أى مجموعة أو قبيلة الإعتزاز بالشى العندها وبكل ما تراه جميل وطيب، بس يبقى حسن التوظيف وطريقته وكيفية الإستفادة منه هو الأهم، يعنى وزى ما بقولو أخد الإيجابيات وترك السلبيات

ونظرة سريعة لكل مجتمعات الكرة الأرضية حاليا، ممكن تورى الزول الفرق بين المجتمعات الما زالت تعتمد أنظمة القبيلة والجهوية، ولو فى حسها الداخلى أو فى اللاشعور، وبين المجتمعات الإتخلت عن الشى ده، وبالنظرة السريعة دى ممكن نعرف الفرق الكبير والمهول بين النوعين، وكيف إنه التقدم بمعناهو المطلق إتحقق فى دى وما إتحقق فى دى

حتى فى مجتمعات أو دول توفرت ليها وفيها كل مقومات النجاح والتفوق الإجتماعى والإقتصادى والقيمى، برضو نلقاها تعانى وبشكل سافر من مشكلات كتيرة حدت من إنها تاخد الموقع المنطقى أو المكانة المفروض تكون فيها وده كله بسبب وجود وحضور القبلية والجهوية، والأمثلة واضحة جدا طبعا وقريبة مننا وما بتحتاج لذكر الأسماء

فى الوقت الفيهو، وعلى العكس تماما من النماذج دى، نلقى مجتمعات ما إتوفرت فيها أى عناصر إقتصادية تحديدا، لكنها ورغما من ده، حققت ولو الحد الأدنى من التقدم والنجاح والسبب فى رأى المتواضع إنها ما عانت من المشكلات العجيبة دى

والمقارنة واضحة أظن

العزيز

معتصم

تحياتى يا قريبى واشواق كتار ومُكان

يا ريت والله يا معتصم

ده يمكن يكون الحلم الكبير لكل زول بريد الوطن السمح الإسمو السودان

وصدقنى مش ما حنمشى لى قدام وبس، يمكن نمشى الآخرة عديل لو ما خلينا الحاجات العجيبة دى

والود كله ليك يا معتصم

والله يا جماعة تعرفو أنا هسه متمنى شنو

بس أخونا العزيز بشاشا يجى وينضم لينا برضو

..
.
سلام يا مطر
يا ريت لو كل الكيانات تنضوى تحت كيان اسمو السودان
تكون مشاكلنا ومصائبا كل اتحلت ..

لمونا معاكم؛

إزيك يا تبلدينا

يا ريت والله

بس يا ريت لوحدها ما مجدية

المجدى والأهم إنه لازم نعمق الإنتماء داخل النفوس
ونمشى على كده

لازم نبعد من ضيق الأفق الجهوى والقبلى ونتمسك بكيان واحد إسمه السودان

كل واحد فيهو ليهو نفس الحق والواجب

وتسلم يا سيدى

وإنت معانا معانا أكيد

........ يا زول هووووووووي


...... أبعد من كيان السودان ده...........



.............. علي بالايمان يوديك في خبر كانا ذاتا..............




.................. ويلحقك علي عبداللطيف كان ما أمات طه




............... لو عايز تاكل لؤمة حلوة يا حبيب ........



................ شد حيلك كده .......



............... و أبقى جبهة.... ....



................ عديييييييييييييييييييييل كده








,,,,, ولو عايز تتشحتف في الدنيا دي وتبقى غفاري زي اسمك




.............. وتاكل لؤمة مش حلوة وتتدين من كل بنوك الدنيا




................. خليك معانا بيجاي.............




.................... في صف الشحاتين بتوع...............













....................... كيان السودان ........






..................... والله المستعان



11111111111111111 فاروق حامد!!!!!!!!!!!! الشحااااااااات



؟؟؟؟؟؟؟؟؟؟؟؟؟؟؟؟؟؟ لكن ما جبهة!!!!!!!!!!!!!!!

كيف الحال يا فاروق

وعساك طيب وبألف خير

والله يا فاروق لو بقينا حاجة واحدة وبعيد من كل البلاوى الضيقة دى

أكيد ما حنشحد ولا حنشقى ونتعب

بس كيف نكون واحد

وكيف يبقى سودان واحد

وما تسمع الجوطه الكتيره دى

على الإيمان السودانيين ديل كلهم زول واحد

كدى خلى أى زول يعاين جواهو

وتسلم يا زول يا زين

وخليك معانا بس

يا أبوذر موضوعك دا بيقودنا لمسألة الهوية ومشكلة السودان الأساسية ..
من أين نبدأ وكيف ننطلق لنؤسس كيان الوطن السودان ليضم كل قبائله وثقافاته ..
من أجل رابط واحد يوحدنا مهما إختلفت أفكارنا وتوجهاتنا ..
يعني السودان يبقى همنا الأول وخلاف ذلك لا يهم ..



فوووووووووووق ..

العزيز معتصم

موضوع الهوية ده كمان شى تانى وداير كلام كتير

وفى الرابط ده حتلقى بعض الإجابات، أو ممكن تقول عليها بعض الرؤى والحلول

أهمية الحوار بين الثقافات السودانية

Quote: يعنى هسه أنا كان داير لى "كيان" أتلما على وين؟

الماعندو كيان يشترى لى كيان

المطر

سجل معاك احمد الصديق

كاهلى... جعلى ..بطحانى...

قولة شايقى وبطحانى وضنقلاوى
ايش نافعانى
غير فتنة خلت اخوى عادانى
اعفو عن الخصم والبعيد
والدانى..
اكفى النيل ابونا
والجنس سودانى

الأخ/ابوذر بابكر

الشاعر الرقيق سلامات

قيد معاك في الكيان الكبير

عبده عبدالحميد جادالله

العزيز

عبده جاد الله

الناس دى كلهم مقيدين، شاؤوا أم أبوا

وما عندنا مفر والله يا عبده ولا جيهة نقبل عليها غير السودان

ومهما تعاظمت الرزايا وكترت الخطوب، أنا متفائل إنه حيرجع وهو أقوى وأجمل

يمكن الناس تشوف إنه ده كلام نرجسى وتهاويم خيالية ساى

لكين العبر والشواهد كتيرة فى غيرنا من الأمم والمجتمعات

وأكيد حنبنيهو البنحلم بيهو يوماتى

شكرا ليك كتير يا زول يا سمح

وجاد الخالق عليك بما تحب وتشتهى

العزيز أحمد

إزيك يا ابوقوتة وكيف أحوالك

طولنا منك ياخى

تعرف

العبادى ده مفروض بعد ما قال

يكفى النيل أبونا والجنس سودانى

ومع إنه أى سودانى أكيد فيهو حتة من طين النيل ومويته
كان برضو يدخل لينا باقى الوديان والعيون والسهول والجبال

وسجلناك معانا وفينا

وتسلم يا ابوحميد

تحياتى يا سلوى

كيف الحال

من زمان إشترينا والله يا سلوى

بكل ما نملك

إشترينا السودان العجيب ده

إنتى برضو يا ريت تشترى معانا، وكل ما البيعة كبرت كلما كانت الفوائد أكبر وأعظم

وكل التقدير والمعزة ليك

الأخ أبو ذر

سجلني معاك طووووووالي . لكن بشرطين

الأول: بعدين لمن نجي لاقتسام السلطة تديني منصب مستشار لرئيس الجمهورية اللي هو إنت.

التاني: ما تعين معاي اي مستشار تاني يعني أكون أنا المستشار الوحيد.
ولو أصريت شدييييييد إنك تعين معاي مستشارين. مافي مانع لكن ما يزيدوا من اتنين. وفي الحالة دي أنا أكون كبيييييييــــــــر المستشارين.
موافق وللا أشيل كلاشنكوفي وأدخل العشر.

العزيز أبو ذر

هذا الذي كناه ونكونه وما دونه
-يا سيدي-لا كناه ولن نكونه..

لك الود والتقدير

الزاكي

العزيز

زاكى العبير

تحياتى

وحنظل متمسكين بيهو لآخر زفرة نفس وقطرة ريق

لأنه فعلا بستاهل يكون ويبقى

والشعب السودانى كله شعب متفرد ومتميز فى كل حاجه

والله يا الزاكى الزول فى حياته لاقى يمكن كل شعوب الأرض وعاش معاهم

وأجزم إنه مافى شعب زينا، فى كل شى

عشان كده لازم نحافظ "علينا" وعلى البلد

ولن نحيد ابدا

وودى وإمتنانى ليك

تحياتى يا شماشى

كيف الأحوال يا زول يا زين

شروطك كلها مجابة

المشكلة إنه نحن لسه ما دخلنا مرحلة العمل السياسى
الهم الأول والمُلح، هو إننا نجمع السودانيين كلهم فى بيت واحد
وكيف كل سودانى يحس وبعمق إنه البلد دى حقته زيه زى التانين

وبعد ده يتحقق أنا أؤكد ليك لو قالو ليك تبقى الملك ما حتوافق
لأنه كل شى حيكون عال العال، وممكن تتنازل وبطيب خاطر عن أى مكسب أو منصب أو مغنم لزول تانى والمناصب حتبقى بالنسبة ليك عبارة عن Headache ساى

هسه إنت بس شيل كلاشينكوف الوئام والمحبة للبلد السمح ده وخلينا نعتز بى كيان واحد غسمه السودان

والباقى ساهل

وليك المحبة كيمان

هناك كيان
يدعى كيان الطرب

اتمنى ان اراك هناك

وحمل السلاح ضرورى اتروكونا من هذه الاشياء التى لا تجدى

كل من يريد حقه عليه بحمل السلاح والا سوف يظل فى نظر الانقاذ

كلب ينبح فقط ...

عزيزى عاصم

تحياتى وطيب الأمنيات

الطرب مكون اصيل من مكونات الوجدان
ومافى شعب بعرف يطرب زى السودانيين

بالله هسه لو غنى كرومة أو أبوداود أو اسرار بابكر

مش يخلو الحجر ينطرب

أنا معاكم برضو

ولسه أنا ما فكرت فى حمل السلاح، واصلا مافى حاجة خلت الناس تشيل السلاح ووتقتل بعض غير الكراهية والإحساس بالغبن والتهميش، ولو الناس فى السودان من زمان قاموا بى قناعات وفهم سوى ده كله ما بقى علينا

بعدين أنا هسه لو خلاص بقيت على حمل السلاح، أنضم لى منو

ما ياهو ده سؤالى أنا من الأول، ما عارف لى جيهو أتلم عليها، إذا كان بالقبيلة، أها أنا عندى ست قبابل، وإذا كان بالمنطقة، عندى تلاتة أو أربعة مناطق

عشان كده الشغلانة بالفهم ده بتكون غير مجدية، والأجدى والأنفع إننا كلنا نتعاون ونتكاتف وصدقنى من غير ما نشعر بنحقق العايزنو

والإنقاذ جاتنا لأننا كنا ولا نزال مشتتين ومبعزقين وكل زول يقول نفسى نفسى

واستفردت بالناس بالقطاعى، دى جهويات ودى أحزاب ودى مناطق

إنت بس قول أنا سودانى وخلى غيمانك بالخالق وبالسودان قوى

ووسائل تحقيق المطالب بتكون متوفرة ومتنوعة، وحنختار الأجدى منها

المهم بس يكون عندنا وطن سالم متسامح وطيب وكل زول فيهو زى التانى

وتسلم يا عاصم إن شاء الله

اعلن انضمامي لهذا الكيان

العزيز د. محمد حسن

نسعد بإنضمامك ونفخر كتير

ورسوم العضوية بسيطة جدا

وهى بذل أقصى ما فى الوسع من محبة وإيمان بالوطن الواحد

وطن متسامح تسود فيهو شريعة العقل وتسيطر عليهو قوانين الفهم المتبادل مع المحبة
والعمل الجاد الصادق

وأكيد إنت قدرها وزيادة

شكرا ليك يا دكتور

ابوذر
في ذمتك انت زمان ما قلت شلخوني ؟

السودان دا يا ابوذر كيان كيانا زاتو
وما اظن في فكاك خالص من النسيج العجيب دا

والله وماطالبني حليفة انا من الناس البترعبهم اي نزعة انفصالية واتمنى اشيل البلد دي بأركانا الأربعة وادسها جواي ..

وحااظل ادعو بوحدة ورفاهية البلد دي واتمنى من ابنائها يبروها ليوم القيامة

وكونه انا ولودني في منطقة معينة واتشربت حبها مابنفي حبي لكل المناطق

ولمن يهبشني سلك طمبور مع معناهو اني مابتفاعل مع باقي الإيقاعات

لكن حدود امكانيةاني اقدم خدمة للبلد دي (ككيان واحد) تنحصر محل انا قاعدة وانت محل قاعد واى واحد فيهم محل قاعد وكله يصب محل غرقانين ..

وتبقى الاماني وحدها والنيةالطيبة في تطواف دائم لتعم كل البقاع ..
الفي إيدو منقاش يقدر يجر شوكايتو

إزيك يا بلقيس

وعاش وسِعد من شافك

الشلوخ أنا ما باباها، علا الفيك إتعرفت

Quote: لكن حدود امكانيةاني اقدم خدمة للبلد دي (ككيان واحد) تنحصر محل انا قاعدة وانت محل قاعد واى واحد فيهم محل قاعد وكله يصب محل غرقانين .. ]

كلام تمام وسليم مية المية، وأكيد ده هو المطلوب من كل زول فينا

المهم فى الموضوع إننا نكون مؤمنين وصادقين فى كل شى

البلد ده بيستاهل أكتر والله يا بلقيس

لكين كمان عشان نحن ما نكون مثاليين زيادة من اللزوم، لازم نؤكد برضو إنه فى ناس ما بفكرو زى ما نحن بنفكر، فى ناس مسكونين بكل ما فى الدنيا من قبح وحب نفس وأنانية، لكين المطمئن فى الموضوع إنهم والحمد لله أقلية، والأغلبية هى الطيبة والنقية وبيها حينصلح حال البلد

تعرفى يا صاحبة السمو

أنا لو عايز أتشلخ

وشى ده حيتملى شلوخ، شى راسى وشى أفقى وشى فى الجبهة

عشان يكون السودان كله منحوت فينى

وتسلمى إن شاء الله

وليك خالص الود والتقدير

دا الكيان الشايلناكمان!

والا ما ياهو؟

... أحسب.

إزيك يا جورج

ما تتخيل أنا سعيد كيف بى جيتك وشوفتك وعودتك السمحة

يا زول وين إنت الحى بيك

ياهو والله يا جورج

نفس الكيان العجيب

بى كل سماحته وطيبته وتسامحه وجمال ناسه وأرضه

وحنظل نحبه ونموت فى حبه

وأجدد التحية ليك والفرحة بيك

كل زول لازم يكون كيانه السودانى جواهو

واحد + واحد = اتنين

وبكده بكون إمكتنية لتأسيس كيان راسخ جوه النفوس

ولا شنو؟

أخونا ابو ذر بابكر ..
سـلام ..
بالله سجل معاك إتنين..
قيسان و"قيسانة*" ..
من قبيلة التشكيليين..




تحايا



---------------

* قيسانة دي سجلها علي مسئوليتي ..
يا زول نحنا ما عندنا نحاتة بشاوروها ..

العزيز

قيسان

الزول الفنان والإنسان

كيف الحال يا قريبى الجميل

إنت وقيسانة مش مسجلين وبس

أساميكم "منحوتة" على جبهة ريدة الوطن

تزيدوها ضوء وسماحة وخير بكل الألوان

وتحياتى كلها لكما

ليه ما يكون فى قبيلة واحدة بس إسمها "السودان


انا خايف اي صاحب طرح عنصري يجي لي هناويذرف الدموع


علي لهفته ومحبته للسودان

لكن نحت تحت يكون عرقو شدرت بطيخ هي العنصرية


انا شكل وجدان مجتمع اذاب القبلية ونشات بمدينة مدني

لا تجد بها اسماء احياء تحمل مسمي قبلي

مدينة تشكل شريان قوي للسودان

نحب الطمبور لكن ما شايقية ونزور نوبة الجبال في افراح المدينة والذي

يشرب الكجومورو والعسلية يجدها

واهل الجموب كان عم ميانق دينق يتوقف عند الاذان وهو مسيحي

والجاك نوباوي كان يعد الاباريق والتباريق للمصلي


الشرق انداح بداخلنا والغرب والجراري يهز الوجدان انه السودان


قاتل الله من يدعو لتقسيمه اخص الكيزان

العزيز صبرى

تحياتى

موجودة والله قبيلة السودان
الناس ديل كلم شى واحد أحد

بس المشكلة كلها فى "عدم "العِرفه"

وكلما زادت، كلما زادت معاها الأشياء الكعبة

وزى ما قلت للجماعة هنا، نحن أبدا ما عندنا طريقة نمشى لى قدام ولو خطوة واحدة، طالما كل واحد فينا، حتى على مستوى الأفراد، قافل نفسه فى دائرة وهمية صغيرة وضيقة جدا إسمها "قبيلتى"

صاح، ممكن الشى ده كان فعال وعنده دور مؤثر قبل قرن أو قرنين، لما كانت القبيلة هى الدولة أو الإطار البعيش فيهو الناس، وهى البتنظم حياتهم وسلوكهم وحتى تفكيرهم، بس دلوقت خلاص دورها يمكن يكون إنتهى فى المجالات دى، وهى المجالات المهمة الممكن تنظم حياة الناس، ومفهوم الدولة الحديثة بيلغى كل المفاهيم القديمة، والدولة اصلا ما حتستقيم إلا تكون حاوية لكل الناس، وعشان يحصل كده، أنا دائما ماسك فى حكاية إنه لازم الإنصهار يبدأ بالقناعة الفردية أول شى، بمعنى إنه كل زول يرسخ جواهو المفاهيم دى وبالتالى الناس ومن غير ما يشعرو حيلقو نفسهم بقو كيان واحد

شكرا ليك يا صبرى على الحضور الجميل والرؤية الأجمل

انني اعلن انضمامي الى قبيلة السودان و على اتم استعداد لاي شلوخ مقترحة لهذه القبيلة, و لكن امنتي ان لا تجمع شلوخ كل القبائل ( لانو وشي ما هيكفي)

العزيز اسامة

تحياتى وآلاف المراحب بيك فى رحاب سودانيزاونلاين

الشلوخ دى غالبا ما يتم الإستغناء عنها تماما، لأنه فيها نوع من تكريس مفاهيم ما أظن نكون محتاجين ليها

بعدين لو أصريت عليها وعلى كل الشلوخ الفى السودان، طبعا الوش ما حيشيلها كلها

لكين ممكن نصغر ليك ال Font

شكرا يا اسامة لتضامنك وإنضمامك لأمنياتنا السمحة

إنى أخترتك ياوطنى
حباً وطواعية
إنى اخترتك ياوطنى
سراً وعلانية
إنى اخترتك ياوطنى
فليتنكر لى زمنى
مادمت ستدكرنى *
ياوطنى الرائع ياوطنى
ياوطنى الرائع ياوطنى
...................
* لدى مشكلة فى حرف ال thaal فاستعضت عنه بحرف الدال " تكونوا طالبنى نقطة "
...........................................

لك التحية ياغفارى ، وطن تنتمى له أنت هو بالتأكيد وطنٌ للجمال .

قريبي الحبيب أباذر....ويتك يا زول ياعسل...إنت كان كدي ما حليت مشاكل السودان كلها....أدعو الله أن يسمع منك...يعني زي ما بيقولوا...من خشمك ولي رب السماء....حينئذ لن نحتاج عضوية....فكل السودانيين سيكونوا أعضاء

محبتي وودي

راشد العزيز

كيفك يا دكتور

الشايل هم البلد

والله بالجد يا راشد، وبعيد عن أى أحلام أو أوهام متخلية، يمكن ده يكون هو الحل النهائى والحاسم لكل المعضلات العويصة

صحيح، هو حلم بعيد المنال أو صعب التحقق، بس أهو خلينا نحلم

الساهل فى الموضوع يا راشد

هو إنه مافى حاجة بتمنع، وكل المطلوب هو عقول منفتحة وأفق واسع من المعرفة والإدراك

وبعدها ممكن السودان يبقى فردوس الله على الأرض

شكرا ليك يا راشد على المؤازرة والحضور السمح

وما تنسى تحياتى كالعادة بالله للدكتور عاطف

العزيز أبوبكر

تحايا بطعم الوطن

ندى وسماحة وطيبة وطيب

لا بد من الإختيار عشان حالنا ينصلح

وعندنا خيارين اتنين بس

يا السودان أو السودان

نقطة ال "ذ" ما مشكلة يا زول

إن شاء الله "ننقط" ليك فى جديدك

ده طبعا لو كنت لسه Single

ولو غير كده، فى جديد الوليدات

عليك الله هسه شفت الطقوس بتاعة "النقطة" والحنة ولمة الناس دى شكلها وطعمها كيف فى السودان

طقس بديع جدا ومحتشد بمعانى عجيبة وجميلة، وزيه كده كتير وفى مناسبات عديدة فى كل مناطق السودان، شى نفير وشى فزع وشى لمة حبان ساى

أحييك يا أبوبكر وليك جزيل الإمتنان والتقدير على كلماتك الزينة