Post: #1
Title: ياأخوانا دكاترة التراث والأغاني ديل في الفضائية السودانية مافي زول يقول ليهم عينكم في راسكم؟
Author: منصوري
Date: 07-15-2006, 12:27 PM
الساعة الثامنة مساء الآن ..السبت16/07/2006 هسه في برنامج تحليل غناء في الفضائية السودانية..شغال وجايبين ليهم واحدة تغني بي دلوكة ومعاها خمسة بنات شيالات,,
ومقعدين إثنين بتاع البرنامج ومعاهو واحد تاني..
مقدم البرنامج قام يحلل في الأغنية وما أدي أي واحد فرصة يحلل..كانو واثق من كلامو..بغصرار عجيب.. الأغنية مشهورة أغاني بنات من التراث..
تغنت بها حنان بلو بلو وقبلها الجابري وترباس وغيرو وغيرو..الليلة وين لى وين ياعيني أنا
.......
قام مسك بيت من أبيات الأغنية دي يحلل فيهو والبيت هو
( الدابي السرب سمو.. ياعيني أنا..)
أول حاجة قالا.. قال ليها.. زي الأنا سمعتك قلتي ( الدابي السرق سمو)..
قام زميلو الجنبو لونو صافي كدة قال ليهو.. لا لا هو صوتها واضح وهي قالت الدابي السرب سمو... بس صوت الدلوكة مرات كدة.. وهزا بي إيدو وقلبا كده ..حركة السودانين المعروفة في الكلام..
بعدين قام قال شنو في تحليلو.. لو فعلا زي ما أنا سمعتها( الدابي السرق سمو؟) دا يبقى زول ما مفروض يشكروه...دا زول سراق
بس كدي كنقد بناء.. عليك الله كيف..كيف يسرق الدابي سمو؟..هل تستقيم العبارة..؟ وهل عملياً في دابي يسرق سمو؟.. قال ليها زولك دا لو بقى كدة يكون زول سراق.. ما يستاهل يشكروه..؟
بعدين قام فسر كلمة ( الدابي) بالأسد.. قال لوبقت سرب يكون فعلاً زول قوي..
.........
يعني الجنبو دا.. مالقى أي تصحيح يقولو ليهو.. ولا المغنية نفسها قدرت تصحح الموضوع دا.. الجنبو مالقى كلمة يقولا ليها غير والله صوت الدلوكة..
........
طيب يا مفسر يا محلل ياناقد.. البيت يقول( الدابي السرب سمو) إنت قلتا الدابي الأسد؟ طيب كلمة سرب سمو دي شطر البيت التاني بي توديها وين؟.. هل الأسد عندو سم؟ يعني لاكلمة سم ولا كلمة سرب تخليك تفسر المعنى صحيح؟
...........
الدابي المقصود هنا.. هو الثعبان..الدبيب السام
سرب سمو يعني سرى في جسم ضحيته وإذا سرب السم لامحالة قاتل..
نعم في بعض المواقع وفي بعض بقاع السودان.. يطلقوا مرات الدابي على الأسد.. ولكن داك دابي ودا دابي.. والدابي من الدبيب يدبي في الأرض..
الدابي المقصود في هذه الأغنية التراثية الشعبية المشهورة يا محلل هو الثعبان.. أرجو أن تصحح هذه المعلومة للفائدة العامة..
إحترت شديد والله في هذا التحليل العجيب..( السم النقوع الفي الجسم نتاح) زي ما قال سيد خليفة.. دا برضو معنى..
|
Post: #2
Title: Re: ياأخوانا دكاترة التراث والأغاني ديل في الفضائية السودانية مافي زول يقول ليهم عينكم في راسكم
Author: abubakr
Date: 07-15-2006, 12:52 PM
Parent: #1
عزيزي .. لاسباب تتعلق باغتراب طويل جدا اتابع القناة السودانية- بترك التلفزيون مفتوحا وانا اتابع بعض اعمالي اليكترونيا- علني اجد شيئا مفيدا ..استمر البرنامج الذي ذكرته اكثر من ساعة كنت استرق السمع او اشاهد لكنني لم افهم شيئا مما كان يقوله المذيع وضيفه وبعض من ضيوفهم خارج الاستديو سوي سيدتيين تحدثتا بانفعال ظاهر علي دور الاعمال الهابطة والارث السوداني في الزفاف ..اما دون ذلك فلم اجد فيه مايفيد ولاحظت ان الضيف وهو استاذ كما قدم في الموسيقي والارث الشعبي عدم المامه بمفردات اغنية شعبية رددها عدة مغنيين وبكثرة خلال العقود الثلاث او الاربع الماضية ولقد اشرت انت اليها ...الارسال التلفزيزني والفضائي مكلف وفي بلد لا يجد الطفل فيه محلول للجفاف و المريض دواء وفيه ملايين النازحيين والاجئيين لا لزوم لاسراف فيما لا يفيد وكفانا راديو ام درمان وبعض الاخبار والاغاني فالفضائيات المفيدة وكذلك الهابطة كثيرة ومتاحة فلماذا الصرف في اخري لا فائدة منها
ودمتم
ابوبكر سيداحمد
|
Post: #3
Title: Re: ياأخوانا دكاترة التراث والأغاني ديل في الفضائية السودانية مافي زول يقول ليهم عينكم في راسكم
Author: saif massad ali
Date: 07-15-2006, 01:33 PM
Parent: #2
منصوري
انت كمان بروك انا نبهت قبل كده لي الناس ديل, ما عندهم حاجة غير الفنان البقدموه ده
|
Post: #4
Title: Re: ياأخوانا دكاترة التراث والأغاني ديل في الفضائية السودانية مافي زول يقول ليهم عينكم في راسكم
Author: عماد شمت
Date: 07-15-2006, 01:53 PM
Parent: #3
الحبيب منصوري .... الدابي اب درق سمو ....بيقولوا في دابي بي درق خطير ذي الكوبرا ...في منطقة الرأس
انا سمعتها زمان برضو احتمال .....
سلمت من كل اذي ...
|
Post: #5
Title: Re: ياأخوانا دكاترة التراث والأغاني ديل في الفضائية السودانية مافي زول يقول ليهم عينكم في راسكم
Author: منصوري
Date: 07-15-2006, 02:20 PM
Parent: #1
صاح برضو يا عماد شمت.. في دابي اسمو اب درق.. سمو قاتل.. وبرضو في فنانين بيغنوها كدة.. كلامك صاح...
........
لكن أن يخلي المحلل كل انواع الدوابي.. ويمشي يقول الدابي الأسد ؟ في هذه الإغنية التراثية الشهيرة..؟ أمر محير؟
إنت زول محلل ناقد بتاع تراث مفروض الأغنية دي تكون شاربا شراب.. يا أخ المستمع العادي ما بيمشي لهذا المعنى الفسرو مقدم هذا البرنامج.. دا خلل يستحق التصحيح.. يعاد البرنامج ويصحح..
|
Post: #6
Title: Re: ياأخوانا دكاترة التراث والأغاني ديل في الفضائية السودانية مافي زول يقول ليهم عينكم في راسكم
Author: abdalla elshaikh
Date: 07-15-2006, 04:24 PM
Parent: #5
ألأخ منصور
أعرف ألشخص ألـمتكلم تـمام ألـمعرفة فهو [مـحمد سيف]
تزاملنا بالمعهد ألعالي للـموسيقي والـمسرح..ولقد تعجبت كثيرا
لـما قاله عن مدلول[ألدابي ألسرب سمو وفي عبارة أخري ألدابي الزرق سمو]فقلت في نفسي كيف بأستاذ يحمل[دكتوراة]في شأن من شئون[ألثقافات السودانية]يقع في هذا ألخطأ الفادح والذي قد [يجرح]في ألبراءة ألعلـمية ألتي نالها
|
Post: #7
Title: Re: ياأخوانا دكاترة التراث والأغاني ديل في الفضائية السودانية مافي زول يقول ليهم عينكم في راسكم
Author: saif massad ali
Date: 07-15-2006, 04:49 PM
Parent: #6
الاخ منصوري
المشكلة انو الناس ديل ماعندهم زابط ولا رابط , بتكملوا ساكت , هذه الاغنية من صميم التراث السوداني الذي يهتم بشجاعة وشهامة وكرم الرجل لايمكن ان يغلط انسان في تفسيرها حتي الانسان العادي الذي لايحمل درجة علمية
الاغنية مرجعها للسبعينيات
الليلة وين لي وين يا عيني انا عجبوني كالو العين
تغنيلو بت خالو يا عيني انا وطبق الحمل شالو يا عيني انا
تغنيلو بت عباس يا عيني انا وفوق القهوة مو جلاس يا عيني انا وفوق الكورة ماخد الكاس يا عيني انا
تغنيلو بت عمو يا عيني انا قالو الدنيا مابتهمو يا عيني انا الدابي الزرد سمو يا عيني انا
الدابي الزرد سمو يعني الدابي المسم ذو العضه المؤلمة
|
Post: #8
Title: اها
Author: mohmmed said ahmed
Date: 07-16-2006, 03:54 AM
Parent: #1
اها محد سيف دا من ما بقى دكتور عمل لينا وجع وش
وشغال يقول كلام كتير من نوع البديهيات فى مجالات مختلفة وليته اكتفى بالحديث عن الموسيقى
قال نوع الغنا دا اسمو غنا البنات الاولاد يغنوهو ليه
يا اخ ما يغنو انت مالك هسا دى مشكلة
|
Post: #9
Title: اها
Author: mohmmed said ahmed
Date: 07-16-2006, 03:55 AM
Parent: #1
اها محد سيف دا من ما بقى دكتور عمل لينا وجع وش
وشغال يقول كلام كتير من نوع البديهيات فى مجالات مختلفة وليته اكتفى بالحديث عن الموسيقى
قال نوع الغنا دا اسمو غنا البنات الاولاد يغنوهو ليه
يا اخ ما يغنو انت مالك هسا دى مشكلة
|
|