...... رحيل ......

‏رحيـل

دسيت اللآه القتلت حيلِك
لميت الحيرة الصبغت فجرك باللون الأسود
وكتبتِك في دفتر أحزاني شهيدة
يوم إتشالق شوقي إليك من خطوة عنيدة
كان الليل أداك وشهُ
والصحراء الفي عينيكِ افتكرتني برش
نومي ... أحلامك ما بتبقي سعيدة
حزنك دشر الفجه الفيها وحيده
وطريقنا بعيدة
طلعي مويتك
أروي يباس السعن الفاضي
لوني حنقوق السعف الناشف
أنا واقف مستنيك
متـوتر وخائف
طين ومشقق ... عروقي حراز
منتوفة وتسـأل مطـرك ويـن
دعاشك ما تخليه يعتب بابك ... سدي
هدي ملامحِك في جِلْدي
لخبطي لونك واديني عقابِك
أرسم ليكِ الحلمْ الوردي
أمدْ في عيونك سكه تودي
وارضية لهفه
حروف بتندي ... لو اندفقت علي مويتك
أو نامت علي قشي
كبي عيونك في وشي
إفرح من نومي قضاك
يا السمحه كفــاك
ما ودرت شواهدك تبْ
واتغابيت في خيالِك عِرفَة
أديني الضو الفالِت من جواك
وديني لأقرب مرفأ
اتقدَ شراع الريح العاصف
وانا واقف مستنيك
بتلفت وخــائف
متوقع إنك تمسحي من ضُلي اللون
وتفرتقي فيني نسيج المخ
باريتك عشمان
ظلمتك شكيت فيك
إنك بتريدي الهم من شكلهُ
وانا مهموم بيك
أعزك ما فتشتك في رغوه
ولا دكيت أسوارك عنوه
ما أفشيت أسرارك
إلا مرصص من جبخانة عينيك
ساورني شعور
مسقوف من موية وعدك
ومفروش بالدم الساخِن
إني ... بحبك
كلمه تقردن أي مسـام في جلـدك
كلمه تهبش بي طرف الأصبع في خدك
تضحك قدامك نص الليل قُبال ما تنومي
تحلمي بيها تطايب خاطرك
تمسح ليك في خصـلة شعرك
تتمردغ فيـك
تجفل لو مس الكاف حلماتك
متهورة خوفي عليك
غطيتك من شوقي إليك
مخده لقيتك وانا تعبان

حركتك من خدري
لخبطتك وانا مكسوف
لحظة شرقك عسل الكلمه سرقتك
ولم العين افتعلت غمضه غمستك
غرستك في الجوف لي بكره
نبتت جواى يرقات الفكره
وفرهد فيكِ شتيل العافيه

غريق جواى الخندق بِسأل
الدم الساخن لمتين
الشريان الصنقر فوق جلدك سوط
مغبون من مين
دنقر وشي وعديت من واحد
ما اتفكيت من جنزير الحال
ما فـارقتَ الهـم القاعد
ما لجمت صهيل البــال
اضاريت في قمرك شـاهد
ويوم سبناك ما كانت حال
كلمي لينا الصبر العـائد
لملمي لينا عقاب الفـال
فارقتِك مجبور ... فارقتيني محنه
مبتور الفرح الفي عينيك يوم قُلتَ سلام
قدامي خريطه واسفلت
قدامي نزيف الكيلو الزفت
أتحاوم ما عارف وين
اتمطيت ما قدرت أطولك!
اتلفتَ محلْ قبلتَ مهنضبْ
مهنضبْ بالوقت الشَاهر سيفو وراى
غنيتك يوم كحل مروادك صبري
الصبر جميل
لون مروادك من عينيكْ
وعيونك أجمل
نسفت صمت الشارع لحظة شوفك
شوفك خنجر
خنجر طعن البال
وكان في البال إني أشوفك
والبال أشتر
بكيتي وسكت الشارع
استغرب خوفك
دميره النيل من دمعك
عِرِقْ اتلف في جوفك
سكت صوتك ... نشف ريقي

صِحَتْ بحة عيونك موج
وانا ... ضفتين حاضنين دميره وموج ضِهِبْ
ضِهِبْ في الجرح وانتح
خيال إفقس أمل حفيان
أمل حفيان وبترنح
تواريب العروق تتبل
تمر شدر النخيل إفرح
وتتبدل مواسمك لي مراسم عز
وكل الورد إتفتح

خلفك وأمامك
نشني للزمن الجاي سهامك
دشني أحلامك طوق
أنا واقف قدامك ... هدفك
منتظره شنو

مسمم بالزمن العد
ومعتق بالعشم المات
وكت نعرف زمن دقشِك خيالي وفات
أصغر من خطواتك
واكبر من مشواري وآهاتك
صوري مأساتك
لي برواز الهم الفيني
واطرحي مشوار أحلامك لوحة
للسكة البتطول قدام عيني
تزرع فيني مواجعك
تسرق مني حنيني
تقتل قهقهة الضحكه الكانت فيك وفيني
اتمسكي بالنفس الطالع ونازل ليك
ادفقي في الروح المشتهياك
اشتتي بين الخطوة وبن الدرب المليان أسرار

.... أنا محتار
ما عشرق فيني صباحك
وما اتلفت وراك فنار
جبين كل المدن ضلمه
فراغ كل الفجج زحمه
وانا الممتد علي مد البصر تذكار
أشاورلك
عدد ما الموجه تدفر قيف
ولا هضمت خطاك مشوار
مستف بالتعب دربك
منتف ريشك الناعم
حبل أفكارنا مترارك
ومترارك هرب منك غياب
ودعتك للجياع قندول
رسمتك في الخيال ورتاب
واصابعك ماسكه زمباره
وبتعزفي غنية التيراب
وراسمالك ملود
رافعاه في وش الحقيقة القايمه ساكت
للشقي
حشيها ما تخش في التقا
شيليها لينه مفرتقه
شريها فوق راس التكل
تاج الفتاه الشقيانه صاج
ومطموره من عسر الزمن
دي قضية في الحب والزواج

ولونتك بلون أسود زفاف أحباب
منو اللون زفاف الناس بلون أبيض
سؤال
سرحتِ وفي سوادن حزنِ داكن
في بياضن مزنِ ساكن
بوادر زحمة في الدمعة التفج رمشين
تفصد خد
وتتبعثر تفتش حد
رماديه بتتاوق لي

أنا وانت وحبل صبرين
مشربك في طرف غيمه
بتسقي المر
وكان المر تحت رجليك صفق نيمه
وكشحي للعصار خصلات
عشان تدي الغبار قيمه
دفِن سرك
حفِر ساسك علي ايدي
بياض شاشك علي عيني
خلي الغبار يكتر
وبلاك شن عيني
حزن شامل
سكوت
سكوتك في الحقيقه عذاب
مصرتك ما نشف همك
سكنتك ما سكت نمك
مسح منديلك الأبيض عرق طاعم من الأهداب
مشوش بالحزن شوفك
خَرَتً من الخدود لونك
كشحتو علي الضلام روًاب
خاف الليل علي نفسو
وفتًح للصباح أبواب
عتقتك للمطر والغيم
عشقتك واصلو ما كضاب
مكانك وين
عيونك وين
ومين حقن السفر فينا
ورمانا ورا الحدود أغراب
ومين حقن السفر فينا
وخلانا
بدون أحباب


محمد أبوعاقلة الطريفي
الدوحة
http://www.geocities.com/boldman14

‏‏

كدى يا خوى ادينا
فَجّة نشوف
وفِجّة نقعد



بعدين

ننجم من الخمج دا ونجيك ...

...... رحيل .....

يا صلاة
برش .. عبادة
الوضوء
محمدك الله ومندسي
..
...
....
.....
......
الله الله الله
حــــــــــــــــي

سلامات
وعوافي
يا لهذا الرحيل الطاعم ...
نثرت في نواحي المكان حزن جميلا وشقاء تتخلله وسامة عالية ..
اي الحظوظ كان حظك ؟
تملانئ الحيرة .. وكل هذا الحزن الباهي ..
هل مازالت حية ...؟
هل مازلت انت حياً ترزق ؟
رحيل يامحمد تحفة غاية في الابهار ..

Quote: سكوتك في الحقيقه عذاب مصرتك ما نشف همك سكنتك ما سكت نمك مسح منديلك الأبيض عرق طاعم من الأهداب مشوش بالحزن شوفك خَرَتً من الخدود لونك كشحتو علي الضلام روًاب خاف الليل علي نفسو وفتًح للصباح أبواب عتقتك للمطر والغيم عشقتك واصلو ما كضاب مكانك وين عيونك وين ومين حقن السفر فينا ورمانا ورا الحدود أغراب ومين حقن السفر فينا وخلانا بدون أحباب

شكرا محمد علي هذا الرحيل العالي ...

ودرملية

لم يموت جوالك الحي
ولمن يصبح حظك ني
اتوكل ....
درب الرجعة طويل

للزول المافي
والبختفي فجأة
في ضل زول بشبه ضل الحيطة

وديتني هناك ليه ...!!!!
انا بمشي روح ...
بخليها هناك
وبرجع فاضي
ومليان

وسهو في نص السكة
سهو في حلم لابس اخضر
ومنتظر رحمة الله
ومندسي سبب (البيعة) الفاشله
وخسارة روح
وكان مستني الروح
الروح بتروح
بكل بساطة

وديتني هناك ليه ...!!!!
انا بمشي روح ...
بخليها هناك
وبرجع فاضي
ومليان

وسهو في نص السكة
سهو في حلم لابس اخضر
ومنتظر رحمة الله
ومندسي سبب (البيعة) الفاشله
وخسارة روح
وكان مستني الروح
الروح بتروح
بكل بساطة

فجة تشوف شنو ؟؟؟؟؟؟
وفجة تقعد وين ؟؟؟؟؟؟؟

وبعدين

الشوف بالقلب
وعلي كيفك تعال
ادخل علي مهلك

عزيزي

الجافا رجافا
وكودك جاهز

Quote: أنا وانت وحبل صبرين مشربك في طرف غيمه بتسقي المر

ود الطريفي
هسع الواحد يقول شنو بس
غير
تدفق ايها البحر
الملئ ابداعا
تددفق
فنحن عطشى

احمد ....

دفيق القربة المقدوده ... عطش
(ونقاع الزير ... عرق فخار)
يا الله حلوه دي... طلعت كيف

خليني كدا ... دفاق
وحيرتك بتعطش

ود الطريفي ..

والله ما عارف أدعي عليك .. وله ادنقر تب وابوس إيديك ..
لا أدري لماذا خطر على بالي وبقوه المرحوم مصطفى سيد أحمد ..هذه الروائع ما كان له أن يتركها دون أن يشدو بها حتى يطرب العالم من هذا النشيد النازف .. كلنا أخي نعبش نفس المعاناه .. ونجتر نفس الحسكنيت والشوك المر .. ذلك بالطبع موجع ولكن الأنكأ جرحاً والأشد إيلاماً أن نعيش التجربة ونوأدها بإيدينا .. أن نحب بلا أمل .. أن نهوى المستحيل .. الكل يعاني من ذلك حقاً ولكن القليلون من أمثالكم أخي محمد الذي يعرفون كيف يترجمون ذلك إلى ألق متناهي .. وبوح سافر .. ويطرحون ما تحمله الحنايا ويستريحون .. القليلون الذين مكنهم الله من القدرة الفائقة والقلم المجنون على التعبير على ما بالدواخل .. ذلك جنون بحق اشتهيه وأتمناه .. وتلك سلاسل يا ليتني أحد ضحاياها ... ذلك حقاً ما أتمناه ولكن الأمنيات لا تجدي فتيلاً مع الواقع .. ولا أريد أن استرسل حتى لا أصرخ .. خاصة وأن في فمي ماء ...

Quote: سكوت سكوتك في الحقيقه عذاب مصرتك ما نشف همك سكنتك ما سكت نمك مسح منديلك الأبيض عرق طاعم من الأهداب مشوش بالحزن شوفك خَرَتً من الخدود لونك كشحتو علي الضلام روًاب خاف الليل علي نفسو وفتًح للصباح أبواب عتقتك للمطر والغيم عشقتك واصلو ما كضاب مكانك وين عيونك وين ومين حقن السفر فينا ورمانا ورا الحدود أغراب ومين حقن السفر فينا وخلانا بدون أحباب

"مسح منديلك الأبيض .. عرق طاعم من الأهداب" ... وبقية العقد الفريد .. ما أقول إلا واصل الصهيل أيا جواد الريح الذي القى عنه اللجام .. وانطلق يعربد وقد أوتي بغير أن يقصد أحدمزامير داود ...

ولك كل حبي .. والمزيد المزيد .. وسوي زي ما تسوي فينا ...

إدريس ....

وأنا ايضا مستاء ...
عندما لا يأتيك من تريد ...
أو أن يأتيك في الزمن المراهق وانت اعزل ...
ارهن مراهقة زمن لطفولة روح ...
وأقف صراعا لا ينتهي الا اليكم .
اكسجين آخر لكتمة آهة وضيق تنفس
دواء فعال بحكم التجربة
ادريس ..
غسيل الرويح بالدميعات مهم
كتابتي خيمة ...
اتوقع نحيب في اي لحظة
واتوقع طرب في اي لحظة

ياصديق الصمت المهيب...
و فرحــة الطفــل فى زمن "الزغاريــد"
افتقدك كثيراً....
طبعــاً......ماعرفتنى
فانــا ...مثلك
ابتذل الزمن العنيــد


قاعد فى الخور
البجينى
...الف مرحب
و المابجينى
...دائمــاً أذكره بالخير

بينا الامير بدرالدين

صديق ...
الزول اللاقيتو فرد ضلمه (مره واحده)

أتذكر عندما قرأت (نصا) ضم النون دي عليك
أو قرأنا ليلا وقرعنا الف باب
كنت هنالك وانا في قمة ألقي ...

ناس الحيشان المقفلة والسكيوريتي
عوافي علي قدر ما تشيل انت والمعاك

جينا
ولقيناك زول مساء وليل

وانا صبّاحى
شرّت البت سماحا و بسمتا

ونسيتك هناك

اتذكرنى

يا ديك الجن
- قال مسعود السياف - :
أهمد نار عويشك هذي ..
أو .. فالنطع لك ..
( و دون الماء رأسك يا حسين )..
و.. كان رأس الأمام - في اللحظة التي تلي - دورقا لخمر حمراء على مائدة الخليفة .
فاتعظ يا رعاك الله ..
......
نص افتراضي .. لا يوازيك ..
لكنه هامش
.. يشاتر , و ممغوووس , و .. ( يعيد إنتاجي ) لشي في ..........
..........
مليودراما هيبوقراطية :
مشهد ملغى :
فلاديمير : لا يستقيم الظل و العود أعوج .
استراجون : لا يستقيم العود والظل أعوج .
فلاديمير : قل : أنا أعوج .
استراجون : أنت أعوج ... ماذا نفعل الآن طالما أننا أعوجان ؟
فلاديمير : نبحث عن استقامة .

( أفترق...عن ظلالك كى تستعيد الحقيقة فيك )
( انعتق ) من ظلالك كي ( تستقيم ) الحقيقة فيك .



نص من : فنتازيا الخروج الى دياسبورا الظل :
( أهلك الطاعون و المجاعة أهالي مروي , و مات ملكهم , وصار الأمر الى فوضى عارمة )
( خرج أهلها و قد تملكهم انفعال محموم )
( و هكذا توجهوا الى البحر )

.............

سافر البحر ..
في الفضاء الركيك .

أتريدني معافا باذن الله ....؟
أبعد شبح الديك عن سواسيو البيض حتي تعيش الأنثي بسلام (هنا لا اعني انثي الديك)
لم يكن البيض حارا حتي يفقس الأماني
جسد الانثي المحموم . يطرد ذلك الريش الناعم رغبة في تعرية المسام ... امنيات لا تريد المخاض قسرا
كانت الاحلام لا تدخل تباعا ...
فرادا فرادا وتتحطم
تغتسل بالتراب
وتموت فيه ...

الظل لا يستقيم الا في الليل
ظل افتراضي ... يوازيك ولا يشبه تفاصيلك
ارسم ما شئت من الظلال وفي أي اتجاه تريد ....!
لماذا الجدل يا انتما ....
فلاديمير فونين . استراجون لويتيسكي .
فتشوا عن ظلالكم التي لا تنام في الليل ...
وعكة الضمير مقياس الظل الأعوج واستقامة الروح لا تنتمي الي الظل بصلة قرابة...
هل بحثت في ظلك الداخلي الذي يبدأ من الكبد وينتهي تدريجيا عند مخارج الحروف ...
وتري ما هو سر تلك الظلمات الثلاث والتي لم يأت ذكر الظل فيها ...
قد لا تنفع استقامة الظل في الظلمة الثالثة والأخيرة ...
هنالك... عندما نغتسل بالتراب ونموت فيه ...
لا يحاسب الظل عن فعل الخطئية ... برئ من دمك واسمك وفي العاشرة صباحا ...
تلك مهمة الشمس التي لم تفرز الفلورايد كما يجب ...
فيباسك ... مرحلة اولي لاعوجاج فور ايفر



عماد ...
ألغ كل الظلال ... بإنسان شفاف

باشمهندس ..

الليل يبقي ليل
والنجوم تسرح بعيد

انا بكون هناك كل يوم
قاعد مع صوت مكيف وهارديسك

وكلام الالغاز لذيذ
فهمتك بتحفظ

والجافا لسه بترجف

وتعد تعد تعد تعد
اعد ظهورك

مجنون ومتجول في العصب
ومصحي جذور الحواس إنتباه
عايز تعمل فينا شنو ؟؟؟
أحبك وانت بتغزل في الحكايات
أحبك وانت بتفر مترار الحنية
شن بتغزل
وحبك موؤد
يارائع
مودتي

استاذي العزيز
خلي العصب طري
وجذور الحواس لينه
عشان ما انتف الغزل
ومتراري يكسح
وكان كسح
الرماد كال حماد محمد علي بتاع الخدار

صورتك في الغسال
والجو مغيم

.

يا نخل ارسم حضور

يا نخل ارسم حضور



يا نخل ارسم حضور




يا نخل ارسم حضور

Quote: يا نخل ارسم حضور

الخواض ....
في جرجير كتير طال ...
النخل مشغول بالبلح والضل الطويل
غير الكتاحه والهوا الكاسح صعيد