Post: #1
Title: مساج ...
Author: ابو جهينة
Date: 06-14-2006, 07:40 AM
فلاش باك :
سافر معنا ذات رحلة إلى أمريكا سوداني أتى من القرية و مكث بالرياض شهرين ثم إلى لوس أنجلوس. و في إحدى الفنادق خمسة نجوم أخذته لنعمل مساج و ندلع أنفسنا قليلاً.
أتى معي و هو لا يدري ماذا أعني بالمساج.
أتته فتاة في منتهى الغنج و الوسامة.
صاحبنا كان يعتقد أن المساج عبارة عن رياضة سيمارسها وحده.
ما أن بدأتْ الفتاة في دلْق الزيوت و بدء عملية المساج حتى بدأ الزول في الضحك كمن يدغدغه أحد في ( صفحته ) ..
يتلوى مع حركة يد الفتاة .. محاولاً أن يمد يده ليبعد يد الفتاة ..
ثم بدأ الضحك يتعالى حتى ترقرقتْ عيناه بالدموع و الفتاة مذهولة ..
ثم ( إنتصب ) واقفاً و هو يشد من ( أزر ) البشكير و الضحك يغمره.
قلت له : مالك يا زول ؟
فقال و هو يغالب ضحكه : دي دلكة و دلّيك عديل ..
قلت له مغيوظاً : طيب مالو .. إتدلك ساكت ..
فقال و هو يواصل ضحكه : الدلكة هناك عندنا بي نيتا و شغلتا ..
فقلت له : أنوي زى ما عاوز .. الشغلانة خلها ..
فقال : الإتنين متباريات .. زى السترة و الفضيحة ..
و أصر على مغادرة المكان و هو يتمتم : و الله كان مساج ولَّا مزاج ما بعرفو ..
***
على ذكر المساج و ال RELAX
انوشيما (اليابان): انتوني فايولا*
مع غروب شمس هذه البلدة الساحلية، توجهت الشقيقتان اكيكو وكونيو هيروتاني نحو المجهول: ستذهبان للنوم مع الاسماك، وحملتا معهما حقائب نوم ووسائد.
وكانت الشقيقتان ضمن مجموعة من 30 امرأة اخرى تتراوح اعمارهن بين 28 و57 سنة يعانين من الضغط والتوتر. وتسعى المجموعة لسلام داخلي عبر التواصل مع الحياة البحرية. ومقابل 120 دولارا ستقضي المجموعة الليلة في اكواريوم انوشيما ضمن برنامج للاسترخاء – يشمل جلسة لمدة 45 دقيقة تجري فيها النساء تدليكا ذاتيا في غرفة لا تضيئها الا مجموعات من قناديل البحر المضيئة تسبح في حوض على انغام الموسيقى.
وقبل منتصف الليل، دخلت الشقيقتان داخل حقائب النوم امام حائط زجاجي ضخم. وشهدتا لعدة ساعات مخلوقات بحرية من كل شكل ولون تسبح وسط المياه. وقالت اكيكو، وهي في الثلاثين من عمرها وتدير شركة للملابس في طوكيو، «اشعر بالاسترخاء التام، وكأني اطفو، او انني في الحوض مع الاسماك» قبل ان تغفو. وتجدر الاشارة الى ان هذا البرنامج في ذلك المنتجع غرب العاصمة طوكيو هو جزء من البحث عن الصفاء الذاتي وهي صناعة يصل حجمها الى 30 مليار دولار سنويا يطلق عليها «الصناعة الاستشفائية».
|
Post: #4
Title: Re: مساج ...
Author: ابو جهينة
Date: 06-15-2006, 01:02 AM
Parent: #3
لؤي الحبيب
دي بتعمل ليهو مساج ولا بتعمل في كعك ؟
|
Post: #5
Title: Re: مساج ...
Author: حيدر حسن ميرغني
Date: 06-15-2006, 03:01 AM
Parent: #4
أبوجهينة
مساج امريكا ده ما بعرفو
لكن التايلنديات ما شفت زيَهن في الشغلة دي
في خواجة قابلتو هناك مرة قال لي: أأتي لتايلند من أجل المساج فقط
وده غير العربان اللي إنت بتعرفهم ... حتي من تجاوز السبعين منهم ياتي الى هناك ويرجع كأنو
ثلاثيني ويمكن تكون قامت ليهو سنون كمان
الشغلانة دي اصبحت فـن وطريقة علاج أحياناً للمكركبين أمثالنا
|
Post: #8
Title: Re: مساج ...
Author: ابو جهينة
Date: 06-16-2006, 06:03 AM
Parent: #5
عزيزي جدا حيدر
سلام كبير
| Quote: لكن التايلنديات ما شفت زيَهن في الشغلة دي |
التايلانديات ما جربتهن ... لكن الشغلة عموماً بتؤدي دور كبير في فك الإجهاد.
تخريمة : الدلكة التي خلن العقل لكة .. فعلا الدلكة بتاعتنا بتخلي العقل لكة بمعنى منتهى ال Relax بحيث يذوب العقل و يسبح الإنسان في بحر من الراحة الجسدية و النفسية.
أرقد عافية
|
Post: #6
Title: Re: مساج ... (Re: ابو جهينة)
Author: Ahmed Daoud
Date: 06-15-2006, 07:29 AM
Parent: #1
قريبى ابو جهينة
ما اروع المساج ....
تصدق يوجد فى الخرطوم مركز تايلاندى للمساج .
انا موجود فى السودان .. لما تجى الاجازة
اوديك ليهو ... شو رأيك ..
ارقد عافية
احمد داود
|
Post: #7
Title: Re: Re: مساج ... (Re: ابو جهينة)
Author: Sobajo
Date: 06-15-2006, 02:46 PM
Parent: #6
Quote: فقال و هو يواصل ضحكه : الدلكة هناك عندنا بي نيتا و شغلتا ..
|
و الله زولك ده أثبت انو بنى آدم عفيف خلاص ...!!!
|
Post: #14
Title: Re: Re: مساج ... (Re: ابو جهينة)
Author: ابو جهينة
Date: 06-18-2006, 01:46 AM
Parent: #7
سوباجو العزيز
تحياتي و مودتي المقيمة
| Quote: و الله زولك ده أثبت انو بنى آدم عفيف خلاص ...!!! |
أها النوع دة كان إنطلق في البلد ديك .. تاني شيتن بتوقفو مافي.
غايتو الحمد لله كانت أول و آخر سفرة .. لكن لي حسع بيحكي بي مساجو ال خلاهو يضحك.
أرقد عافية
|
Post: #9
Title: Re: Re: مساج ... (Re: ابو جهينة)
Author: ابو جهينة
Date: 06-17-2006, 05:21 AM
Parent: #6
إبن عمي العزيز أحمد
تحياتي و محبتي
Quote: تصدق يوجد فى الخرطوم مركز تايلاندى للمساج .
انا موجود فى السودان .. لما تجى الاجازة
اوديك ليهو ... شو رأيك .. |
دي عاوزة مشاورة يا أبو حميد ؟ طوالي من المطار قابلني و على المركز دة.  
شكرا على الدعوة.
أرقد عافية
|
Post: #11
Title: Re: Re: مساج ... (Re: ابو جهينة)
Author: عشة بت فاطنة
Date: 06-17-2006, 06:54 AM
Parent: #9
| Quote: وكانت الشقيقتان ضمن مجموعة من 30 امرأة اخرى تتراوح اعمارهن بين 28 و57 سنة يعانين من الضغط والتوتر. وتسعى المجموعة لسلام داخلي عبر التواصل مع الحياة البحرية. ومقابل 120 دولارا ستقضي المجموعة الليلة في اكواريوم انوشيما ضمن برنامج للاسترخاء – يشمل جلسة لمدة 45 دقيقة تجري فيها النساء تدليكا ذاتيا في غرفة لا تضيئها الا مجموعات من قناديل البحر المضيئة تسبح في حوض على انغام الموسيقى. |
ابوجهينة
والله
كلنا محتاجين من شدة التوتر والكركبة ،تعرف يا ابوجهينة السودانيين ديل أكتشفتهم ليك مساكين خلاس ، الحياة دي ما بعرفوا ليها تب الناس كلها فايتانا وبقو يعرفوا ليك التعامل نفسهم وأجسادهم عشان كدا عندنا الواحد عندنا مما يصل الاربعين احضر نفسوا للموت ،، حسي شوف صاحبك دا عندوا المسالة دي مربوطة بالدلكة والعرس وبرضوا( حظهم الرجال لاقيين ليهم خدم ،) أحمد داود الرسول كان ما اديتنا العنوان في السودان عشان نعالج كرادم الكمبيوتر والكركبة .. ويا حليل العصير يا با الشفع الواحد تقول ليه تعال عصر لي ما يفهمك زاتز ، مرة تعبانة قت لبت عالية وهي صغيرة سبعة سنة تعالي عصري لي يا فاطنة ما فهمتني ولمن شرحت ليها قعدت تضحك وعاينت لي وخلتني أنين التقول ماسكني ابنيني ، يا حليل زمن الشفع وكريعاتن كنا اليوم كلو نسوق من ضهر أمك لابوك لخالك ولحبوبتك ..
قبل مدة سمعت برنامج عن التوتر والتعسيم وبأن سبب مهم من الموت بالذبحة حماكم الله وربنا يكفينا شر هذا الجهاز المربع القاعد قدامنا غير ما في شي بشتنا وعسمنا
وتسلم يا سيدي لهذا الموضوع الشيق ....
|
Post: #16
Title: Re: Re: مساج ... (Re: ابو جهينة)
Author: ابو جهينة
Date: 06-18-2006, 05:35 AM
Parent: #11
أختي العزيزة عشة بت فاطنة
تحياتي و مودتي و تقديري
شكرا على المداخلة الغنية.
| Quote: ،تعرف يا ابوجهينة السودانيين ديل أكتشفتهم ليك مساكين خلاس ، الحياة دي ما بعرفوا ليها تب الناس كلها فايتانا وبقو يعرفوا ليك التعامل نفسهم وأجسادهم عشان كدا عندنا الواحد عندنا مما يصل الاربعين احضر نفسوا للموت ،، |
فعلا يا عشة. السودانيين بطبيعتهم ( مبرمَجين ) .. ينساقوا لمراحل عمرهم بنفس وتيرة آباء أجدادهم .. لا يعرفوا إجازة بالمعنى المفهوم .. فالإجازة عندنا إما صيانة البيت أو السفر باللواري أيام و ليالي عشان حضور عرس أو مأتم.. لا بعرفوا ( بلاجات ) .. لا محلات ساونا و لا حمام تركي .. و لا مراكز يوغا .. حاجات كتيرة بتنسرب مننا في غمرة المكابسة في هذه الدنيا الفانية.
| Quote: حسي شوف صاحبك دا عندوا المسالة دي مربوطة بالدلكة والعرس وبرضوا( حظهم الرجال لاقيين ليهم خدم ،) |
أها حسع لو حكاية مراكز التدليك دي إنتشرتْ ، الواحد يجيب بتين اللات مساج .. واحدة لي و واحدة للمدام .. لا خدم لا مخدومين ( تعددتْ المدلكات و المساج واحد )
| Quote: أحمد داود الرسول كان ما اديتنا العنوان في السودان عشان نعالج كرادم الكمبيوتر والكركبة .. |
Quote: ويا حليل العصير يا با الشفع الواحد تقول ليه تعال عصر لي ما يفهمك زاتز ، مرة تعبانة قت لبت عالية وهي صغيرة سبعة سنة تعالي عصري لي يا فاطنة ما فهمتني ولمن شرحت ليها قعدت تضحك وعاينت لي وخلتني أنين التقول ماسكني ابنيني ، يا حليل زمن الشفع وكريعاتن كنا اليوم كلو نسوق من ضهر أمك لابوك لخالك ولحبوبتك ..
قبل مدة سمعت برنامج عن التوتر والتعسيم وبأن سبب مهم من الموت بالذبحة حماكم الله وربنا يكفينا شر هذا الجهاز المربع القاعد قدامنا غير ما في شي بشتنا وعسمنا |
أصغر بناتي ( هند ) أقول ليها تعالي أعصري لي كرعيني .. بالله تقعد تعصر في حتة واااااااااااااااحدة لغاية ما تورم الحتة و تلتهب .. و كلما أقول ليها الكراع كلها .. تقول لي طيب و تواصل في نفس المحل.. شايفة الغتاتة.
أرقدي عافية
|
Post: #10
Title: Re: Re: مساج ... (Re: ابو جهينة)
Author: ابو جهينة
Date: 06-17-2006, 06:48 AM
Parent: #6
إبن عمي العزيز أحمد
تحياتي و محبتي
Quote: تصدق يوجد فى الخرطوم مركز تايلاندى للمساج .
انا موجود فى السودان .. لما تجى الاجازة
اوديك ليهو ... شو رأيك .. |
دي عاوزة مشاورة يا أبو حميد ؟ طوالي من المطار قابلني و على المركز دة.
شكرا على الدعوة.
أرقد عافية
|
Post: #12
Title: Re: Re: مساج ... (Re: ابو جهينة)
Author: Emad Abdulla
Date: 06-17-2006, 05:49 PM
Parent: #10
أستاذي الجميل ..
يمسيك بالخير
و العافية تبراك ..
ضحكتني .. الله يضحكك ..
الإجازة كانت في فندق وسط الخرطوم .. نظام خصوصية و كده .. بعد العيال كبرو طبعا .
معتصم صاحينا كان عريس و في نفس الفندق .. غرفتينا جنب بعض , اليوم الأول عدى كويس و الواطه صانه , اليوم التاني بالليل أسمع ليك معتصم يقرقر بأعلى صوتو و ضحكتو جايبه آخر الممر .. إتحرجت .
قلت في نفسي : شكيتك علي الله , ما نحنا كلنا مبسوطين لكن إنت سويتها شينه يا عريس .
و القرقرة شغالة يا أبو جهينة , صحي و الله على قولك السترة و الفضيحة متباريات .. و بعد كل قهقهة نسمع ليك : يا بت .. يا بت لأ .. ما هنا ياخ .. إنعل ............
طبعا أنا شالتني الهاشمية و طوالي كو كو كو دقيت ليهو الباب ..
بعد مسافة فتح الباب .. و مرق لي رقبتو بالجنبة .. : يا معتصم إختشي علي دمك , فضحتنا .
قال لي : أوعى يكون صوتي واصلكم .. ؟؟ قسم بالله دي دلكة .. نظام مساج بس , بالله يا عماد أتاري الدلكة دي بتكلكل .
من الزعل يا أبوجهينة ياخوي تاني يوم طوالي مشيت سوق أم درمان إشتريت ليك أغراض الكلكالة كلها ..
ما خليت كلكالاية ما اشتريتها ..
بِقِرتَ يا أبو جهينة ..
دحين المساج ده , ما ياهو دلكتنا دي و للا أنا غلطان ؟؟
و بعدين ...
الضحك زاتو بيطول العمر .. صاح ؟؟؟
|
Post: #17
Title: Re: Re: مساج ... (Re: ابو جهينة)
Author: ابو جهينة
Date: 06-18-2006, 06:24 AM
Parent: #12
عزيزي جدا عماد
محبة و مودة
| Quote: بت .. يا بت لأ .. ما هنا ياخ .. إنعل ............ |
العروس الظاهر إيدا كانت تقيلة من عينة الشايقية ال قالت لزوجها ليلة الدخلة : هاك أَلِوَا ).
Quote: طبعا أنا شالتني الهاشمية و طوالي كو كو كو دقيت ليهو الباب ..
بعد مسافة فتح الباب .. و مرق لي رقبتو بالجنبة .. : يا معتصم إختشي علي دمك , فضحتنا .
قال لي : أوعى يكون صوتي واصلكم .. ؟؟ قسم بالله دي دلكة .. نظام مساج بس , بالله يا عماد |
من كترة ما هو مندمج .. ما عارف إنو صوتو جايب آخر الفندق.
Quote: و بعدين ...
الضحك زاتو بيطول العمر .. صاح ؟؟؟ |
أضحك الله ناجذيك و جعل أيامك كلها سعادة. قول آمين.
تخريمة :
قالوا في واحد في قرية عندو مرض غريب. كل ما يجي زول من السفر و مطول من مرتو .. زولنا دة يجي بالليل يقيف تحت شباك المسافر ال رجع دة و يتسمع في ال بيحصل .. أكان ضحك أكان شيتن تاني.
أها جا واحد صاحبو مطول من مرتو طول شديد .. زولنا بالليل جا و وقف تحت شباك المغترب دة .. و يسمع ليك :
يمين .. لا شمال .. لا لا لي فوق .. أصبر شوية .. كدي أصبر ..
ثم هدأتْ الأصوات ..و قضى الزول المريض وطره من تجسسه و رجع إلى أهله يتمطى.
في الصباح قابل صاحبو و قال ليهو : أمبارح سامعك مهيص .. يمين و شمال و فوق و تحت .. شغال بالقِبَل الأربعة
فقال له صاحبه : يا سجمان .. أنا و الولية كنا بنصلح في الدولاب و نغير مكانو ..
فَبُهِتَ الذي تاوق ..
***
أرقد عافية
|
Post: #13
Title: Re: مساج ...
Author: Gaafar Ismail
Date: 06-17-2006, 10:24 PM
Parent: #1
الأخ العزيز أبوجهينة
ســلام
حتى حوالي منتصف الثمانينات كانت هنالك محلات للمساج في اليابان تعرف بـ (الحمام التركي – Turkish Bath) حيث يفترض ممارسة المساج على الأسلوب التركي المعروف. ولكن نظرا لأن الدعارة ممنوعة في اليابان بنص القانون ، فقد احتال على القانون بعض ضعاف النفوس ورواد الكسب السريع إلى تحويل هذه المحلات إلى أماكن دعارة مستترة . ولكن سلطات الشرطة كشفت أمرهم وبدأت تلاحقهم كلما وصلت أي معلومة بسوء استخدام هذه المحلات. الطريف في الأمر أن السلطات التركية آنذاك إحتجت على سوء استخدام إسم بلادها وطلبت تغيير اسم هذه المحلات ، فتجاوبت السلطات اليابانية وتم تغيير اسم هذه المحلات إلى (Soap Land)
تحــياتي
|
Post: #15
Title: Re: مساج ...
Author: عشة بت فاطنة
Date: 06-18-2006, 04:51 AM
Parent: #13
Quote: من الزعل يا أبوجهينة ياخوي تاني يوم طوالي مشيت سوق أم درمان إشتريت ليك أغراض الكلكالة كلها ..
ما خليت كلكالاية ما اشتريتها |
لا حولا يا عماد ضحكتني بقريبك ، تراني من زمان أنا لايسة وافتش على ناس الكلاكلة دي جايبين الاسم العجيب دا من وين تراهم طلعو عاجباهم الدلكة
|
Post: #18
Title: Re: مساج ...
Author: Emad Abdulla
Date: 06-18-2006, 06:43 AM
Parent: #15
يا عشة ..
إزيك ..
النصيحة لله الهناية دي بتضحك .
و بعدين ناس الكلاكلة ساهلين ..
مساكين .. الفيهم إنعرفت ..
أها .. ناس ( كلكتا ) ديل كيف ؟؟؟
استغفر الله من حقهم .. بيكونو ضحاكين خلاس
و أنا أقول هزة الراس دي جابوها من وين ؟؟
هنود ياخ .
|
Post: #20
Title: Re: مساج ...
Author: ابو جهينة
Date: 06-19-2006, 04:01 AM
Parent: #13
الأخ العزيز جعفر إسماعيل
تحياتي و مودتي
| Quote: ولكن نظرا لأن الدعارة ممنوعة في اليابان بنص القانون ، فقد احتال على القانون بعض ضعاف النفوس ورواد الكسب السريع إلى تحويل هذه المحلات إلى أماكن دعارة مستترة |
تعرف يا جعفر أخوي .. حكاية المساج لما إبتدتْ و الشغلة بقت فيها بنات بتاعات مساج .. جات شكاوي إنو هناك تحرش جنسي من الزبائن في الفنادق .. و بالتالي أصبح توظيف الفتيات ال عندهن إستعداد لتقبل التحرش و الإنزلاق نحو الجنس أمرأ مرغوب فيه ، و إرتبط توظيفهن بمواصفات أخرى غير الكفاءة في العمل نفسه.
أها زولنا دة لما حصلتْ معاهو القصة دي .. البت كانت سمحة و لكن ما عندها أي إستعداد لأي إنزلاق نحو حاجة غير المساج .. عشان كدة خافت و إستغربتْ و زولنا الشغلة خلتْ شعرة جلدتة تكلب.
سعدت بدخولك هنا ..
أرقد عافية
|
Post: #19
Title: Re: مساج ...
Author: قرشـــو
Date: 06-18-2006, 06:55 AM
Parent: #1
ابو جهينة
سلام
اتاريك بتاع مساجات يعنى وامور زى دى ...
يعنى بالله فى البلد ديك ما بتخاف من الخواجات ديل بعد تتمولص يغدروا بيك ويفكوك عكس الهواء ملط ؟؟؟؟
غايتو الشغلة دى عمرى ما جربتها وشايفه شترا شترا والله ...
اما الدلكة فبرضو نسواننا ما نسوان دلكة واظنهن من راى اختنا عشه| Quote: ( حظهم الرجال لاقيين ليهم خدم ،) |
وشايفات نفسن لو دلكننا ببقن خدم لينا ... حظنا كده نسوى شنو بس ...
|
Post: #22
Title: Re: مساج ...
Author: ابو جهينة
Date: 06-19-2006, 04:54 AM
Parent: #19
العمدة قرشو
تحياتي و مودتي
| Quote: اتاريك بتاع مساجات يعنى وامور زى دى ... |
مساجات بس يا عمدة .. الأمور ال زي ديك ما عندي بيها (شغلة) أو ( نية )
| Quote: يعنى بالله فى البلد ديك ما بتخاف من الخواجات ديل بعد تتمولص يغدروا بيك ويفكوك عكس الهواء ملط ؟؟؟؟ |
ما ظنيت
| Quote: غايتو الشغلة دى عمرى ما جربتها وشايفه شترا شترا والله ... |
أنا أول أيام برضو شفتها شترة. لكن بعدين بقت عادية زى الدلكة
أرقد عافية
|
Post: #21
Title: Re: مساج ...
Author: ايهاب نميري
Date: 06-19-2006, 04:11 AM
Parent: #1
كلام يا عوض دكام كلام في كلام يا ابوجهينه
المسج ما عندك لكن
|
Post: #23
Title: Re: مساج ...
Author: ابو جهينة
Date: 06-19-2006, 04:59 AM
Parent: #21
حبيب ألبي إيهاب
كيفك يا زين
المساج ال صاح عند اليابانيات ( فتيات الجيشا ) ...
المساج بس .. مش زى نية صاحبنا ال خلتو يضحك
أرقد عافية
|
|
