Post: #1
Title: للوطنيين كما سمتها .. قصيدة للدكتورة بثينة خوجلى محمد
Author: Hisham Amin
Date: 06-12-2006, 01:48 AM
قصيدة للدكتورة بثينة خوجلى محمد
نحمد الله فيك يا بلدى عم سلام..
وما بيوصف فرحتنا اى كلام..
كان اتكتبت قصيدة ولا سطرت اقلام..
كفنا حروب نزيف الدم علينا حرام..
لا الدين المسيحى بيبيحة ولا الاسلام..
بالراءى السديد تتحقق الاحلام..
وايد فى ايد نعمر ونمشى لقدام..
وبعد الضيق فرح وحاتبسم لينا الايام..
شمال وجنوب شرق وغرب نعيش انشاء الله فى وئام..
سلطة وثروة وكلنا فى البلد حكام..
وبعد الليلة لا يتهمش السودانى لا يتهان..
..........
........
......
يا اخوانا الامور ما دايرة مفهومية..
جاتنا الريح عديل هبت علينا قوى..
جات قاصدة البلد واهدافا واضحة جلية..
والتور كان وقع تبقى السكاكين مية..
داك يطرح حلول ودية ودة يجينا بنظرية..
....
...
..
كان جايى الدخيل يفرض علينا وصية..
ويلعب بالبلد وما يخلى لينا هوية..
رجالنا اتكاتفوا بكل روح ووطنية..
ولحماية الوطن اتحدوا وعقدوا النية..
اتناسوا الخلاف لا فرقة لا قبلية..
لا فوراوى لا دينكاوى لا شايقية..
وساعة الحارة تبقى الغاية سودانية..
كان ابوجا كان قعدة صلح اهلية..
جابولنا السلام وادونا لية هدية..
....
...
..
بلدنا عجب ترابة دهب بلدناغنية..
بنيلنا الكبير ارضنا مروية..
ولقدام سودانا بينا يصبح قلعة للحرية..
وانشاء الله ما بتدخل عليك قوات سلام دولية..
....
...
..
كيف سلة غذا العالم يعيش باغاثة..
وحكاوى سلام من برة يا ناس والبلد بناسا..
فى بلدنا الناس بتعرف تشغل راسا..
لا بنحتاج وسيط ولا يعملوا لينا دراسة..
واصلوا الجمرة ما بتحرق الا الداسا..
مشاكلنا برانا نعرف اساسا وحلولا ما دايرة فراسا..
وكان درنا نفصل ليها حل ونلبسة على مقاسا..
....
...
..
بوطنية باخلاص وكل حماسة جبنا السلام واثبتنا اننا ساسة..
العالم شهد وتاريخنا ملا كراسة..
قال صناع سلام والله نحناللبلد حراسة..
....
...
..
يا سودانا انت فى القلب محمول..
غلطان النساك وبالحرب مشغول..
وين نلقى اعتزار ليك يا بلد مقبول..
ليك العتبى حتى ترضى تتردد سنة للحول..
وما تشيل هم شعبك وفى ومسؤل..
قسما بحماك نبنيك عرض وطول..
صحة وتنمية وما نخلى باب مقفول..
وفى عز النهار بنقيد شموع ونقول..
يا دول الاوبك الليلة جاكم زول..
سودان الغبش ديل تصديرة بقى بترول..
*************************
هذة القصيدة من الدكتورة بثينة خوجلى محمد وهى اهداء لكل شخص حادب
على مصلحة الوطن
|
Post: #2
Title: Re: للوطنيين كما سمتها .. قصيدة للدكتورة بثينة خوجلى محمد
Author: banadieha
Date: 06-12-2006, 01:51 AM
Parent: #1
نظم حنين من قلب أم.
|
Post: #3
Title: Re: للوطنيين كما سمتها .. قصيدة للدكتورة بثينة خوجلى محمد
Author: Hisham Amin
Date: 06-12-2006, 09:34 AM
Parent: #2
| Quote: نظم حنين من قلب أم. |
لكن منو البفهم
الله غالب
هشام امين
|
Post: #4
Title: Re: للوطنيين كما سمتها .. قصيدة للدكتورة بثينة خوجلى محمد
Author: Hisham Amin
Date: 06-13-2006, 03:38 AM
Parent: #3
فوق
|
Post: #5
Title: Re: للوطنيين كما سمتها .. قصيدة للدكتورة بثينة خوجلى محمد
Author: Hisham Amin
Date: 06-24-2006, 10:17 PM
Parent: #4
ones more
|
|