انا اكو بكيتة بيكتة تالئ في دهري

الى وليد 500
معا لتعود مجانية التعليم..

"انا اكو بكيتة بيكتة تالئ في دهري"

المرة الاولي التى التقيت فيها بأبكرينا كانت الشمس ترسل اشعتها المتلظية الى الارض فتحيلها جحيما.
وانا في طريقي الى المكتبة لشراء كتاب انفقت شهرا كاملا في تجميع ثمنه. وجدت ابكرينا
يقف في وسط الميدان ويحمل اخته في ظهره. تحيرت جدا لمنظره اقتربت منه وجدت ان حذائه
البلاستيكي قد قطع و يستحيل المشي معه خاصة ان الرمل تحول الى سطح من الصفيح الساخن..نظر الي وادار وجهه . احزنني وضعه هذا. ذهبت
الى الحانوت واشتريت له حذاء..ورجعت له وضعته له في الارض تحت قدميه. نظر الى نظرة ممتلئة
بالأمتنان بلغة عربية مكسرة قال لي:" انا ابكرينا اكو بكيتا بكيتة تالئ في" دهري.وعرفت انه ذاهب الى البيت
الذي يبعد كثيرا من المكان الذي يقف فيه..شكرني وبدأ في المشي وفجأة توقف و سالني انت اسمو منو؟
قلت له حسن. قال لي شكرا.
مرت الايام كنت ارى ابكرينا يوم الجمعة يحضر مع امه التى تغسل الملابس في بيوت الجيران
يساعدها هو بجلب الماء و العناية بأخته.وعندما ياتي وقت الصلاة يلبس جلباب قديم ولكنه نظيف
ويذهب الى الجامع القريب يصلي الجمعة .. ثم يخلع جلبابه ويساعد امه الى ان ياتي المغرب
يرجع حاملا اخته في ظهره..
مرت الايام والشهور والسنين..
دخلت الجامعة ويوما في طريقي وجدت ابكرينا يحمل مسطرة في شكل T.. اتى وسلم علي بحرارة
وسألني في اي كلية أدرس أخبرته في العلوم. من يومها صار ابكرينا يزورني دائما..
وصرنا اصدقاء. ابكرينا شاب نقي ومجد ومجتهد..نال جائزة الكلية في التفوق. واخذ المبلغ
كاملا الى امه. اخبرني بكرينا انه يدرس بجد لاجلها ويجتهد ليأخذ الجائزة المالية لآنها
المبلغ الوحيد الذي يكون مجموعا..
مازال ابكرينا يزورني وقد صار مهندسا يشار اليه بالبنان..ودائما يردد شكرا لمجانية التعليم

Quote: معا لتعود مجانية التعليم..

ده عشم ابليس فى الجنة
اكان الموية دايرين يعملوها جمرة خبيثة
تقولى لى مجانية التعليم ؟؟؟

اقعدى عافية

Quote: ده عشم ابليس فى الجنة اكان الموية دايرين يعملوها جمرة خبيثة تقولى لى مجانية التعليم ؟؟؟

سلام اخي العزيز قرشو

من المحزن يا قرشو طالب جايب 85 ما يقدر يدرس
ويشتغل اشغال هامشية وطالب جايب 60 يدرس عشان عندهم قروش..

الانقاذ دي ما خلت حاجة مشرقة في البلد
واكبر خطأ كان قصة مجانية التعليم دي يهبشوها
عشان ما قادرين يفهمو انهم كدا
بعد 30 سنة حتظهر ضعف الادارة في الدولة لانه كوادرها
ضعيفة..
الاهتمام بالتعليم والتدريب على ان يكون الشرط
الوحيد القدرة الاكاديمية يصنع كوادر ممتازة..
ولذلك معا لارجاع مجانية التعليم والغاء القبول الخاص..

Quote: بعد 30 سنة حتظهر ضعف الادارة

في الذكرى التلاتين لرحيل الدكتورة بيان..

المساعي جارية لإعادتها يا دكين
إيدكم معانا

Quote: المساعي جارية لإعادتها يا دكين إيدكم معانا

انا شخصيا بيان كسرت خاتري عندها قشه

لعن الله من افقر شعب بلادي

دومة

اصلا بيان دي ما عاملة ليك خاتر من زمان ..
بس انتي براكي دمك بقري

Quote: دومة اصلا بيان دي ما عاملة ليك خاتر من زمان .. بس انتي براكي دمك بقري

والله ما قلت الا الصواب يا دكين لكين دمي ما بقري ود الناس دا دمي قراده بس

Quote: ولذلك معا لارجاع مجانية التعليم والغاء القبول الخاص..

ود عقيد
معا لارجاع بيان

من زمان قتاليكي يا دومة المرة دي ما بتتصاحب ..
انتي قتي لا انا المرة دي صحبتي ومابتكسر لي خاطر..


اها خمي وصري..

اسوي شنو الولف كتال (انا بعيط ) كفايه علي ما تشمت فيني كدا

معاك حق يا خالتو
زولتِك دي راسا قوي..
بس ح تروح فين من (خواطر) قراءها المنتظرنها بفارغ الصبر..!!
هسي انا قلت للناس وفد المقدمة جا راجع وخلاص بيان على وصول..
ذكرتني جيّة قرنق.. (أفضل وابرك)..
وفد المقدمة يجي ويرجع ويجي تاني ويرجع.. حتين جا..

كلو من كوستاوي..

د. بَيّـانْ.
إزّيّـكْ وإزّي أحوالْ
الأولاد.

مُفتَرَض التَعليّمْ يِكونْ
مَجّاناَ لحَدِي الثَانَوِي
بلْ يِكونْ فَرضْ عِيّنْ علي الدَولَـه
تَوفِيّرو للعِندو والمَاعِندُو.
أمَا التَعلِيّمْ لِمَافوق الثَانَوِي
مِنَ المُحَبب أنْ يكونْ
الطَالِبْ أو أسرتَهُ تَحَمُـلْ
النَفقـَاتْ!
كِي لا يَتِمْ إستِغلالَهُ!

كَمْ خِرِيّجْ جَامِعِي إستَفادْ مِنهُ
السُودَانْ!
دَرسُوا "بَلوشِي" ومِنهُمْ مُبتَعثيّنْ
قرو عَلَي حِسَابْ الدولَه وإعتَادوا
عَلَي المَجَانِيّه دِيّا وأضحوا
عَالَه عَلي الدَولَه وعَلي أسرهُمْ(بِإستِثناء حَالاتْ خاصه مُقنَنه).
مِنْ المَحَاسِنْ أنَ التَعلِيّمْ الجَامِعي
يِكونْ عَلي النَفقاتْ الخاصَه للطَالِبْ
أو يكونْ بِنظامْ السَلفِيّه مِنَ الدوله
ليتِمْ إسترداده فِي الوقتْ المُحدد بُعيّدَ التَخرُجْ.

لكِي تُتَاحْ الفُرصْ ولنَضمَنْ إستِمرارِيّة التَعلِيّمْ
لكُلْ مواطِنْ مُجتَهِدْ.
علي كَدا بِنكونْ وضَعنَا الطَالِبْ أمامْ أمرِيّن:
إمَا أنْ يِجتَهِدْ ويُكمِلْ دِراستو !
أو يترُكها ويدخلْ الحِيّاه العَملِيّه!


أيّضاَ مَجَـانِيّةالعِلاج
لِكُلْ مُواطِنْ غايّه فِي الأهمِيّه.

Quote: الانقاذ دي ما خلت حاجة مشرقة في البلد

خالتو بيان : كيفنك

فلتعد

بيان

من منفاها الاختياري

من 90 وحتى الان 2007

17 سنة

كم فقد السودان من نابغين نتيجة التاليم البلفلوس


أذكر ونحن في الابتدائي كان عبدالرحيم ابواللول أخطتنا وكانت كراساته مرتبة وجميلة

وفي يوم عاقبه استاذ / حسن بضربه بالمكنسة قائلا له ان السوط للشطار

فصدق ابواللول كلام استاذ حسن بانه بليد وترك المدرسة ليعمل في المنطقة الصناعية وكنا نلاقيه ونحن في مراحل المتوسط والثانوي وهو بالابرول المتسخ تاركا مقاعد الدراسة لعنجهية معلم

الفاتحة على جامعة الخرطوم
المرحوم كان راجل كريم
جامع كل الطلاب محدودى الدخل
الماحضر زمن المرحوم
مصيره الان الفصل لعدم السداد

كان الصديق ود حاج اللمين ينادي دائما على بضاعته من حلاوة مولد صائحاً (بي قروشك تحلي ضروسك) ... دة التعليم عندنا في السودان

بركة الشفتك طيبة يا يمة
حمدا الله علي السلامة
وكل سنة وانتي طيبة

بيان تحيات - ومشتاقين -

وبركة بالعودة والشوفة - وحمد الله على السلامة .

وتحياتى لأفراد الأسرة جميعا .


ومجانية التعليم مطلب انسانى كما الهواء !

لكن ديك العدة الفى الخرطوم دا يسوو ليهو كيف ?

ست البنات .

عودة بيان ومجانية التعليم مطلب شعبي

فاكهة البورد بيان
لابد من عودة بيان حتى يعود للبورد رونقه

انا اكوك يا بكيتة تالى هنا

عودة بيان ومجانية التعليم مطلب شعبي