Post: #1
Title: مطلوب ' بومة' 'Owl' أو مستشار حمائم !
Author: Elmuez
Date: 05-10-2006, 08:56 PM
أرجو شاكرا , و كذا ترجو زوجتي الممحونة ,الأستاذة مني, من الخبراء الكرام, و ما أكثرهم , أن يمدوا لنا يد العون و الرأي , و المصيبة كالآتي: منذ أكثر من نحو عشرة أيام و نحن نجاهد و نطارد حمامة أبت نفسها إلا و أن تقاسمنا بدايات موسم الصيف الذي دائما ما يطول إنتظارنا له من بعد أشهر طويلة من الشتاء الكندي المعلوم , موضوع " طرد" الحمامة " الوساخة ", بتشديد السين , أصبح يشكل هاجسا مفزعا لمني , فهي لذلك تقضي الساعات الطوال جريا و " هشا " و نهرا وبرا وبحرا بل و جوا, آملة في أن تشعر الحمامة, و لو قليلا , بعدم رغبتنا في مساكنتها لنا و تختشي ,لكن دون أدني توفيق , فالحمامة " لايوقة " و حالا ما تقفل عائدة من بعد طيران خفيف ! في سبيل ذلك, فقد جربت مني أكثر من تجربة, و أضحت بذلك كالمجنون لا تأتي إلي الدار إلا وهي محملة بكل أشكال و أنواع البوم المصنوع لأغراض مختلفة لكن دون جدوي ! , فقد تبين لنا أن الحمامة قد وعت تماما أمر هذا النوع من البوم " الفالصو " , و أصبحت بالتالي لا تبالي , ثم أوعز لمني بتجريب خطة " الجرس المعلق " الذي يصدر أصواتا مزعجة قيل لنا بأنه يشكل سلاحا طاردا للحمام , و لكن هيهات ! ,فقد عدنا إلي دارنا 'المسكونة' اليوم , متعبين معكننين آملين في أن تكون الحمامة قد رحلت لتستقر ببلكونة أخري فإذا بها تنعم بالنسائم العليلة ' المعتدلة ' وهي تتمرجح علي أنغام الديسكو الجديد ! شيئا فشيئا فقد أصيبت مني بالرهق و عدم الرغبة في الأكل و التفكير الدائم في ذلك الحل الجذري الحاسم.. المأمول , فقررنا الإستفادة من عضويتنا بسودانيز أون لاين بعد أن رفضنا مقترح مكلف لا و لن تستحقه الحمامة يقضي بتقديم طلب عمل " نملي " أي سلك شائك لقفل البلكونة برمتها في وجه الحمامة و زوجها المتوقع إن لم تكن " حامل " بعد مما قد يضطر مني , لتنفيسها, " كمان ! " فيما بعد !.. نعلم بأن الحل , رغم عدائيته , يكمن في "بومة كاربة".. " بي شحمها و لحمها " لكنا نجهل كيفية الحصول عليها و محاولة إستئناسها , فآثرنا إصدار توصية أتموسفيرية تتوخي الدعم و المساعدة بصورة أو أخري " بورداب أفريقيا و كوستاريكا مثلا " , كما نترجي كل من يأنس في نفسه الكفاءة أن يمدنا بما أمكن من مقترحات عملية تسعف صيفنا العزيز و تتيح لنا فرص الجلوس و الإستمتاع بهواء " الحيشان " الطلق و التأمل في مجاهيل الوطن الماهو سبية, علي أنغام " فرفور " و بشئ من الشواء و.. فكيف العمل ???
|
Post: #2
Title: Re: مطلوب ' بومة' 'Owl' أو مستشار حمائم !
Author: Elmuez
Date: 05-10-2006, 09:20 PM
Parent: #1
لـــــــــلــــــــــــه !
بالمناسبة البومة في الصورة دي سودانية 100% !
|
Post: #3
Title: Re: مطلوب ' بومة' 'Owl' أو مستشار حمائم !
Author: Ibrahim Adlan
Date: 05-10-2006, 09:31 PM
Parent: #1
كنوع من العكلتة و عدم الموضوع قررت ان انتدب محامي لحفظ حقوق الحمامة المسكينة لا سيما وهي رمز عالمي للسلام و لها الخيار في اختيار اين تسكن و كيف تعيش حسب مقررات محادثات ابراج حمام ابوجا التي كفلت للحمام حقوقه الاساسية في الحياة .
سيقوم المحامي بعمل اللازم.
|
Post: #4
Title: Re: مطلوب ' بومة' 'Owl' أو مستشار حمائم !
Author: Elmuez
Date: 05-10-2006, 09:48 PM
Parent: #1
غايتو يا إبراهيم الزولة دي , إنقاذا ليك , ما حنخليها تقرا الكلام ده, لأنه ممكن يجيها هارت أتاك و تروح فيها إنت بدل الحمامة, فكرت برضو في كدايس مطاعم الديوم هنااااك شرق نادي التعايشة !
|
Post: #5
Title: Re: مطلوب ' بومة' 'Owl' أو مستشار حمائم !
Author: Ibrahim Adlan
Date: 05-10-2006, 10:09 PM
Parent: #1
يا معز
ذكرتني كدايس مطعم عمك رمضان
لكن برضو ما بحلك
تأكيدا للعكلتة
|
Post: #6
Title: Re: مطلوب ' بومة' 'Owl' أو مستشار حمائم !
Author: Elmuez
Date: 05-10-2006, 10:15 PM
Parent: #1
يا زول أنحن بعد ده بنكلم ليك ' صلاح عدلان ' ! بعدين كدايس فلات بوش كيف ? .. ولا ال Church مع Fulton
|
Post: #7
Title: Re: مطلوب ' بومة' 'Owl' أو مستشار حمائم !
Author: Ibrahim Adlan
Date: 05-10-2006, 10:19 PM
Parent: #1
علي الايمان يا دوب ما تعبت
صلاح عدلان دا ابو العكلتة خصوصا لمن الموضوع يكون حمام
كدايس فلات بوش ربيانة همبرقر مالا و مال الحمام
|
Post: #8
Title: Re: مطلوب ' بومة' 'Owl' أو مستشار حمائم !
Author: Elmuez
Date: 05-10-2006, 10:26 PM
Parent: #1
يعني كدايس فلات بوش خلت الجكن وذ رايس !
|
Post: #9
Title: Re: مطلوب ' بومة' 'Owl' أو مستشار حمائم !
Author: Soumeta
Date: 05-10-2006, 10:30 PM
Parent: #1
رسلوها لي طرد و انا اريحكم منها،، بربيها هي و ولدها ولو إنو دي ممكن تعمل مشكلة لي قدام،، بس بتكفل بيها،، بعدين في الطف من الحمام؟ هنا نحن بنشكي من الغزااااااااال،،
يعني نكوس لينا اسد ولي كيف؟
|
Post: #10
Title: Re: مطلوب ' بومة' 'Owl' أو مستشار حمائم !
Author: Elmuez
Date: 05-10-2006, 10:38 PM
Parent: #1
ياسوميتا هو نحن " طرد " دي لو قادرين عليها بنرسل ليك معاها كفالة إعاشة لمدة عشرة سنين, إنتو قاعدين في كينيا ?
|
Post: #11
Title: Re: مطلوب ' بومة' 'Owl' أو مستشار حمائم !
Author: Soumeta
Date: 05-10-2006, 10:47 PM
Parent: #10
لي، كينيا ما فيها حمام؟
شغلو ليها روك ميوزك،، ده بطفش العقل من العقل،، ما الحمام بس،،
|
Post: #12
Title: Re: مطلوب ' بومة' 'Owl' أو مستشار حمائم !
Author: Elmuez
Date: 05-10-2006, 10:55 PM
Parent: #1
لي، كينيا ما فيها حمام؟
كينيا فيها حمام , مش جابت ليكم نيفاشا.. لكن إنتو ما قلتو مشكلتكم غزلان ! سمح تكونو قاعدين في المسالمة ?
|
Post: #14
Title: Re: مطلوب ' بومة' 'Owl' أو مستشار حمائم !
Author: عزيز عيسى
Date: 05-11-2006, 03:17 PM
Parent: #1
أعمل ليك (قلابة) وشرك بيها للحمامة وبعد ما تقبضها أذبحها وسلمها للمدام تعملها شوربة حمام مظبوطة.. وبعد ما تأكل اللحمة أمضغ العظام.. وبي كدا تكون ارتحتوا منها نهائيا!!
|
|