Post: #1
Title: راجين الفرج من شنغهاى ولقوا انفسهم فى لاهـــــــاى
Author: شدو
Date: 05-17-2005, 04:14 AM
Parent: #0
لاهاي (2)
2nd Edition
ياسايق البوباي،
ووب علىّ وواي.
* * * *
بتعرفني؟
أنا المارشال سلاح كركون،
أنا الجاهل بأمر الكون،
وفاكر موسكو في ال Gabon،
وما بفرز حلب من Bonn،
ورغم كدا،
شتمت الدنيا من هافانا لي Rangoon
* * * *
تعرف ليه؟
من شهرين ونومي قفا،
حالتي صفا،
راجي ال Veto من شنغهاي،
أسوي العرضة والدوباي.
وطز في روما،
طز في Blair،
وطز في الطير
ضكر وانتاي.
* * * *
و آخر March،
يوم جلسوا الخمستاشر
وفتحوا ملفات طُره والفاشر،
جمعت قيادة الكادر،
الجياشي والتاجر،
وواحد أفندي في كل العهود شاعر،
وزولنا الثعلب الماكر،
وسمسار توم،
وترزي هدوم،
وراسبوتين نظامنا
اللي دقنوBroom ،
معانا كمان
حكيم أسنان،
بحضر في هجوم سافر
just in case.
ومن باب فقه الضرورة،
فتحنا قناة العدو المستكبر الكافر.
* * * *
وجا التصويت،
وعندنا seat
حنعلن Vetoمن China
يلا يا Wang،
إيدك فوق،
وكلك زوق،
بشارتك concession تنقيب
من الكرفاب لحي مرزوق،
هديتك ربع ثرواتنا التحت والفوق.
* * * *
وإنتهى التصويت،
Oh, my God!
Oh, my God!
No Veto?
نهيتوا الجلسة يا إستكبار
بدون Veto؟
جنيتوا؟
وتتبسم كمان يا Wang?
وتشرب في عصير ال Tang?
وما بتخجل؟
حداشر صوت
against four?
حتى الصين مع دارفور؟
* * * *
يخص عليكي يا China،
جاتك داهية يا خاينه،
نسيت العشرة يا آفو ،
خنت العيش،
خنت الخوة،
خنت الجاز .
* * * *
عندك فكرة يا Chirac (شيراك)
شن سويت بمارشالنا الجهامة
الفارس أب عضلات ؟
في ساعات،
أنا الرقاص،
أنا الحائز عن أمجادي في دارفور
وسام قناص،
أنا الحارسني شيخ كدباس،
ريقي نشف،
مرة أبول
ومرة أسف،
أخشى بي جاي،
أكورك واي،
وحلقي dry
* * * *
أسوي شنو؟
من إفريقيا،
من بوليفيا،
من كنساس،
ومن مدراس،
وصلني اللوم،
جفاني النوم،
ندهت الفقرا من سنار ولي السقاي،
ينجوني،
يغتوني،
ويلغوا السفرة لي لآهاي.
يا تو زعيم بيدور لاهاي؟
* * * *
والله العظيم، و الله العظيم، والله العظيم
وحّرم ما بزورا براى،
بدور خمسين يسافروا معاي،
فينا فلان،
plus علان
وموسى هناي،
نقول للصولجان باي باي،
نسيب السلطة وآ أسفاي.
* * * *
تسيب عرس الشهيد والعرضة يا مولاي
وتمشي عديل سجون لاهاي؟
ود أم زقده يا الحداث وما سواي،
ود أم زقده يا العند المحن جراي،
ود أم زقده يا مارشالنا
يا حاكمنا
يا تيس بانقا الخراي،
ود أم زقده ياكوزنا الكبير،
ولاع فتن،
لص الخزن،
حراق بنوك،
زوار صكوك،
معدوم الضمير و الرأي.
* * * *
واللهِ الليلة ود أم زقده:
كان يرقص ال Flamingo
كان يدمن شراب البنقو،
كان يطلب لجوء ال Congo
لابد من لاهاي.
* * * *
يا سايق البوباي،
قد دنا عذابة مولاي،
لا لفة جاي لاجاي
ودي الزعيم لاهاي.
* * * *
ملعون أبوك يا جنجويد!
ملعون أبوك يا جنجويد!
الشاعر: شمتان بن منتظر الفرج الديمقراطي
|
Post: #2
Title: Re: راجين الفرج من شنغهاى ولقوا انفسهم فى لاهـــــــاى
Author: Mohamed Suleiman
Date: 05-17-2005, 10:12 AM
Parent: #1
Quote: واللهِ الليلة ود أم زقده:
كان يرقص ال Flamingo
كان يدمن شراب البنقو،
كان يطلب لجوء ال Congo
لابد من لاهاي. |
شكرا يا شدو
|
Post: #3
Title: Re: راجين الفرج من شنغهاى ولقوا انفسهم فى لاهـــــــاى
Author: Tragie Mustafa
Date: 05-17-2005, 10:44 AM
Parent: #1
شكرا شدو
انها ابتسامه بين الدموع
جعلتنا نضحك رغم احزاننا
وبنقول ليهم قولة اهلنا ناس دارفور
(تحسبوا لعب ؟؟؟؟؟؟)
تراجى.
|
Post: #4
Title: Re: راجين الفرج من شنغهاى ولقوا انفسهم فى لاهـــــــاى
Author: شدو
Date: 05-18-2005, 02:16 AM
Parent: #3
المحترم / محمد سليمان
كانوا حتى بالامس القريب لاتفارقهم الابتسامة الصفراء عندما تقول لهم محاكمة محلية
اما المحاكمات الدولية هذه فكانت وهم ، خيال ، حلم لكل من يطالب بها ،
اما الان فقد اصبح الوهم الحقيقة فجن جنونهم ، مرة شرم ، ومرة طرابلس الغرب ، وما عارفين الجاية وين
يا ليت لو يدرون بان الحل فقط بمحاكمات لاهاى فهى مع انها فى نظرى شئ معنوية فقط الا انها اذا ما قورنت بحجم الدمار والخراب والموت الذى تجراه اهل دارفور فهى لاتساوى شئيا
|
Post: #5
Title: Re: راجين الفرج من شنغهاى ولقوا انفسهم فى لاهـــــــاى
Author: شدو
Date: 05-18-2005, 02:29 AM
Parent: #4
اختى العزيزة تراجى
تحياتى لك بلاحدود
جدنا الله يرحه ويغفر ليه كان يشجع بناته ويرفع ليهن المعنويات عندما تقوم احداهن بعمل مميز ويقول ... فلانة دى من اليوم وصاعدا اسمها (عشرة بنات ) .
فلك التحية مجددا
والحق يقال نحن لا تاتينا مايشجعنا الا من اهلنا وهم بالداخل ويتحدون الصعاب ويقولوا ... ما تشيلوا هم نحنا كويسين ... فهم رغم ما يتعرضون له من ماسى وكوارث وقتل وجرائم فى حق الانسانية من قبل هذا النظام وجنجويده هم فى ثبات ، وقالوا قد فهمنا الدرس واستوعبناه والانسان تجربة والتجارب لايمكن ان تتكرر ورغم ذلك لسان حالهم تقول : كل ما لا يقتل المرء يقويه
فيا اختى الابداع لايخلق الا مع المعاناة
والصبح قادم انشاء الله
ويوم الحساب قادم بمشيئة الله ايضا
|
|