الدكتورة والدكتوراه

الاخوة الاعزاء
سلام.
هذه كلمات قليلة اريد ان اكتبها بعد العودة من الاجازة الجميلة التى قضيتها فى السودان.
هي مجرد احداث شخصية حدثت اثناء فترة الاجازة.
حفلت الاجازة بالعديد من الاحداث والمواقف التى تم التخطيط لمعظمها وحدث بعضها عرضا ولكن كانت ايضا احداثا رائعة.
فى هذه الفترة قمت بجهد كبير لاكمال رسالة الدكتوراه في الاقتصاد التى كنت قد سجلت لها قبل ثلاثة سنوات قبل ان اغترب وحالت ظروف الغربة دون اكمالها والحمد لله قطعت شوطا مقدرا فى تجميع مادة الدراسة وتحديد مسار الكتابة وكيفية التحليل فقط اثر غياب البروف المشرف على الدراسة لحضور مؤتمرات خارج البلاد فى هذه الفترة علي سرعة اكمال الدراسة وادي الى تاجيل المناقشة الى اقرب اجازة قادمة.
الخطوة الثاية فى الاجازة وهي الاهم فقد اتممت خطوبتي على ست الحسن والجمال (دا فى نظري انا وما بقبل واحد يناقشني فى الحتة دى اصله) الدكتورة الصيدلانية وان شاء الله ربنا يتمم الامور على خير وباسرع فرصة ممكنة.
معليش ما دايرين نطول عليكم ونختم ليكم هذه الكلمات ببعض ما كتبته للحبيبة.
فارقتها فى احد المرات وبعد ان غادرت كتبت لها رسالة قلت ليها انا فقدت قلبي لقيتو مافى شوفيه اكيد انا خليته فى العربية معاك. ردت قالت لى فى عربيتي مافى اكيد وقع فى الكفتريا ارجع شوف الكفتريا كتبت ليها هذه الابيات:
قلبي معاك يا بت الناس
يا الخليته يحب الدنيا
وعيشتي فى اجمل احساس
يا شبه الحور يا بقعة نور
يا عقد الماس
يا عطر يفوح يا روح الروح
يا قد مياس
شوفيه اكيد تلقيه معاك
لانه اختارك دون الناس

ألف ألف مبروك الحسنيين يا دكتور.. ربنا يتمم ليك على خير.. كلاهما خير وبركة..

بنت الحسين

طيب وقلبك ؟؟؟

لقيتو؟؟

Quote: طيب وقلبك ؟؟؟ لقيتو؟؟

العزيز معتمد

صباحك ود

الفمبروك الخطوبة ومشروع الرسالة

وربنا يتمم علي خير

محبتي

أعتذر لك وله إن فهمتيها على نحو ما وأختلط عليك ... كانت مزحة قصدت منها إضفاء جو مرح على البوست ... ولم تك إبداً بشكل مسيء ...

خالص إعتذاري

الاخت مريم
سلام من الله عليكم ورحمة وبركات طيبات.
لك الشكر اجزله على هذه التهنئة الحارة. ونسال الله ان تتحقق امنيات الجميع وان شاء الله ربنا يديك الفى مرادك ويسعدك.
فترة الخطوبة هى من اجمل الفترات التى يعيشها الانسان لما تحمله من عواطف ولحظات من الصدق العاطفي الفريد.واختيار الخطيبة من اصعب المراحل فالقلب يميل لكل جميل ولكن ان تميز ما بين الدواخل والمظاهر هو اساس نجاح اى علاقة عاطفية.

لك الود
والف باقة ورد

الاخ نادر
سلام
لك الشكر ولك المودة على التهاني.
انت مالك حساس اكثر من اللزوم كدة.ما قلته ليس فيه ما يجعلك تعتذر بل هو ينبئ عن تقديرك لما تم وعن فرحتك.
نسأل الله لك التوفيق فى خطواتك الاجتماعية والعلمية.
ونرجو ان تكون هذه بداية لتواصل قادم ان شاء الله.
ولك الود
ومليار باقة ورد

.

الاخت المرهفة
عالية
سلام.
لك الود ولك الشكر على التهاني. ونسال الله ان يهبك كل ما ى امنياتك وان يسعد ايامك بقدر ما اسعدتنا مفرداتك الراقية.
ولك الود
والف باقة ورد

المعتمد
يا أخي والله بختك ،،، هذا صيد بالجملة ،،،
مبروك وتهانينا الحارة ،،،
وربنا يتمم ليكم على خير ، وبالعديل والزين ..

الاخ ود قاسم
سلام
مشكور على التهنئة وعلى التواصل.
ارخي اضانك من هسع عشان يوم العرس نحن بنرسل ليك وتجينا بى عمتك الراقية دى وتشرفنا. طبعا ما بنخليك تقيف على حد العقد والناس ابان عمم بس حنمسكك لى اخر اليوم ومنتظرين قصيدة راقية من بيت الكلاوي عشان تمتعنا بيها.
ولك الف ود
ومليون باقة ورد

المعتمد الف الف مبروك ...كل النجاحات
في رسالة الدكتوراه
او رسالة الحياة (الاسرة ) - مشروع الخطوبة طبعا ضربة البداية
بس يا معتمد يا عزيزي والكلام دا خاص بيني بينك ..
وغير مقروء للجميع
بعد العرس ...بتغير ابيات القصيدة الجميلة الكتبتها دي
!!
وأسال مجرب

الاخ لؤي
سلام
مشكور على التهاني بالخطوبة وبالتقدم فى الدراسة وان شاء الله ربنا يوفقك فى مسار حياتك.
يبدو من كلامك انك خضت تجربة الزواج والحمد لله وربنا يديك الاسرة الصالحة وينجح اولادك
انا خليني الان استمتع بهذا الاحساس الجميل الذي اعيشه وخليني ادى بت الناس الرضت تقاسمنى بقية العمر ما تستحق من تقدير ومشاعر والبحصل بعد داك الله كريم عليه.
ان تستمتع الان بالحب والحياة والحبيبة خير من ان تضع مشاكل المستقبل تعكر عليك متعة الحاضر ثم تعيش هذه المشاكل فى المستقبل. الواحد لو عمل كدة يكون عاش المشاكل مرتين مرة قبل العرس ومرة بعده.
ولك الود
والف باقة ورد