Post: #1
Title: يعني ما نتغدا يا بكري؟؟؟
Author: عمر الفاروق شيخ الدين
Date: 05-10-2005, 05:56 AM
Parent: #0
يا جماعة كمال ترباس قال مشي يشرب موية جا لقا الهلال مغلوب خمسة !!!!!!
انا أسة مشيت أتغدا جيت لقيت بوست المناضل إبراهيم بقال بتاع محمد طه ببح ومافيش وأكلو الدودو !!!!!!!!!!!!!!!!!!!!!!!!
أها يعني تاني ما نتغدا ولا شنو ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
الحاصل شنو يا جماعة في فترة غدانا دي !!!!.؟؟؟
بالله العارف يشرح لي عشان ما أكون شايت شمال ساي !!!!
وكمان كان البوست قاعد أدونا خبر عشان نفتشوا أنا عندي ما ظاهر !!!!!
|
Post: #2
Title: Re: يعني ما نتغدا يا بكري؟؟؟
Author: نادية عثمان
Date: 05-10-2005, 06:01 AM
Parent: #1
عمر الفاروق
ملاح الغداء بتاعكم كان شنو؟!!!
|
Post: #3
Title: Re: يعني ما نتغدا يا بكري؟؟؟
Author: عمر الفاروق شيخ الدين
Date: 05-10-2005, 06:13 AM
Parent: #2
نادية بت عثمان :
| Quote: ملاح الغداء بتاعكم كان شنو؟!!! |
من يوم خليتينا بي ملاح النعيمية الجبتيهو لينا في بيت العزابة داك وانا شغال أهاتي من مطعم لي مطعم شي برياني وشي كبسة ومرات نتمها فتة عدس وفي رواية إندومي جاهزة التحضير وعيييييييييييييييييييييييييييييييييك ..
الليلة غشيت لي واحد زميلنا وقلت ليهو عندي ليك محل بيعمل بروست مبااااااااااااااالغة إيه رأيك تعزمني ؟؟؟
إتفضلي معانا ...
|
Post: #4
Title: Re: يعني ما نتغدا يا بكري؟؟؟
Author: صديق الموج
Date: 05-10-2005, 06:15 AM
Parent: #1
| Quote: أها يعني تاني ما نتغدا ولا شنو ؟؟؟؟؟؟؟؟؟؟؟؟؟؟؟؟؟؟؟؟؟؟؟؟ |
عمر الفاروق اصلوا غداكم استاكوزا والا جمبرى ما ياها
شعيرية معتصم وعصيرو الاخدر الزى موية النقلتى دى؟؟
والمزعلنى بتقولو بسم الله.. والله شيطان واحد قنعان من رقبتو
مافى.....الفنادق راقدة ...اكلوا اكلكم،،،،
|
Post: #5
Title: Re: يعني ما نتغدا يا بكري؟؟؟
Author: abuguta
Date: 05-10-2005, 06:24 AM
Parent: #4
| Quote: شعيرية معتصم وعصيرو الاخدر الزى موية النقلتى دى؟؟ |
هى هى هى هى هى هى هى هى
والله ياود الموج بالغتا فيها عديل كدا فى الوصف دا
اما عن الشعيرية اسال مصور المفتاح
قلت لى يعنى لو زرناهم ما نشرب عصير فى كباية
ولا شنو
عمر انت شايفنى اسى ام لا...ما تنسى موعد الزلابية
وبعدين فى شنو ياعمر فهمونا معاكم...بقال مالو مشى وين تانى
والله انا حارس البورد لسع بس انشقلت مع زبون 10 دقائق
|
Post: #6
Title: Re: يعني ما نتغدا يا بكري؟؟؟
Author: عمر الفاروق شيخ الدين
Date: 05-10-2005, 06:27 AM
Parent: #1
يا ود الموج
| Quote: شعيرية معتصم وعصيرو الاخدر الزى موية النقلتى دى؟؟ |
والله حرام عليك يا ود الموج والله انا خلاااااااااااااااص عايز أموت من الضحك !!!
والله إنت ما نصيح !!!!!!!!!!!!!!!!!!!!!!!!!!!!!!!!
|
Post: #7
Title: Re: يعني ما نتغدا يا بكري؟؟؟
Author: nasiradin
Date: 05-10-2005, 06:33 AM
Parent: #1
هوى يا ود الفاروق
أعملو حسابك و الله
ابقوته يفتح بوست يذكرنى بى أمى
و انت تجيب لى سيرة الغدا
و الله اصبروا لى
تحياتي ... ناصر البطل
|
Post: #8
Title: Re: يعني ما نتغدا يا بكري؟؟؟
Author: عمر الفاروق شيخ الدين
Date: 05-10-2005, 06:37 AM
Parent: #1
يا أبوقوتة !!!!!
Quote: وبعدين فى شنو ياعمر فهمونا معاكم...بقال مالو مشى وين تانى
والله انا حارس البورد لسع بس انشقلت مع زبون 10 دقائق |
هي لكن إنت فاضي لينا من مواضيع المرقة مع نسوان الرجال
يازول صحبك بقال والله إتلوم عدييييييييييييييييييل كده !!!!!!
الراجل شكلو تحت تحت كده وقف ليهو إجراء في السفارة الكندية أظنو ما جاب ليهم ورقة مختومة من ناس اللجنة الشعبية أو ما كان دافع رسوم العتب ..المهم الموضوع إحتاج لي حاجة من الكيزان وكلاب الأمن ...
صاحبنا أظنو إضطر يطلع من النفق المختبي فيهو ومشي لي رئيس اللجنة الشعبية وطبعاً رئيس اللجنة زول مثقف وبيخش النت قام قال لي إبراهومة أصلو ما بختم ليك ورقتك دي إلا تعمل لينا حاجة في صالح الحيكومة !!!!!!!!
يازول صاحبك جا هنا شبك ليك الجماعة زندقة وبرطعة وجلبغة لمن دخلهم ليك في أضافرينهم !!!
والله أسة خلا ليك ود شاموق يبرطم ساااااااااااااااااااي لمن دخل معاهو هاشم نوريت وزي ما قالت الفلاتية الله يرحمها ..انا والكاشف أخوي !!!!
ياخ أسة المستنيرين وللللللللعوا شديييييييييييييييييييييييد لمن لمباتهم عايزة تطرشق !!!
بالنسبة لي الزلابية إيه رأيك يوم الخميس عازمك والله شاي مغرب بي زلابية في طريق الحائر حاجة ما تخلص !!
|
Post: #9
Title: Re: يعني ما نتغدا يا بكري؟؟؟
Author: abuguta
Date: 05-10-2005, 06:46 AM
Parent: #8
والله خليتنى
اموت من الضحك....زى زميل ستمونى فى دعاية روتانا سينما
دى دايرة ليها قعدة يابلد
قلت لى لجنة الحى..ودى ما حكومة مصغرة
وين فى طريق الحائر ياخوى...فى مطعم الفحامة..تحت الكبرى الطائر
جوالك لو سمحت لان جوالى مغيرو قبل اسبوع
والجديد غير قابل للنشر...ناس حلتنا بشوفوه وبهرونى بطلبات الاقامات
خلينا نخلص من الجو ديل..اسى واحد كفيلو فى حدب الزرقة والثانى دكتور عاوزين يسرحوه
والثالث...قال ما بشتقل سواق عوائل وهوشهادة ابراهومة ما عنده
فى انتظارك
ولقدام
|
Post: #11
Title: Re: يعني ما نتغدا يا بكري؟؟؟
Author: nasiradin
Date: 05-10-2005, 06:51 AM
Parent: #8
Quote: يازول صاحبك جا هنا شبك ليك الجماعة زندقة وبرطعة وجلبغة لمن دخلهم ليك في أضافرينهم !!!
والله أسة خلا ليك ود شاموق يبرطم ساااااااااااااااااااي لمن دخل معاهو هاشم نوريت وزي ما قالت الفلاتية الله يرحمها ..انا والكاشف أخوي !!!! |
ياخى انت زول راااااااااااااااااااااااائع
انا ضحكه زى دى
و الله ما ضحكنى ليها الا سجيمان
قبل فترة كده و من ديك و عييييك
تحياتي ... ناصر البطل
|
Post: #10
Title: Re: يعني ما نتغدا يا بكري؟؟؟
Author: عمر الفاروق شيخ الدين
Date: 05-10-2005, 06:47 AM
Parent: #1
يا ناصر:
Quote: ابقوته يفتح بوست يذكرنى بى أمى
و انت تجيب لى سيرة الغدا
و الله اصبروا لى
|
إنت زول (بطل) سيب الجرسة وعلي العموم زي ما قال ود الموج تعال لينا بي أي طريقة إنشاء الله صاروخ عند معتصم دفع الله وألحق معانا موية اللديتر (ميرندا تفاح) والشعيرية ..
غايتو كلام أبوقوتة ده صعب نحلوا ليك أصلو نحن زااااااتنا متجرسين ...
تحياتنا ..
|
Post: #12
Title: Re: يعني ما نتغدا يا بكري؟؟؟
Author: زول ساكت
Date: 05-10-2005, 07:10 AM
Parent: #10
غايتو انا ياهو دا غداي كفاني وفضل
Quote: عمر الفاروق اصلوا غداكم استاكوزا والا جمبرى ما ياها
شعيرية معتصم وعصيرو الاخدر الزى موية النقلتى دى؟؟
والمزعلنى بتقولو بسم الله.. والله شيطان واحد قنعان من رقبتو
مافى.....الفنادق راقدة ...اكلوا اكلكم،،،، |
الله يجازيك ياود الموج ما خليت فينا مصارين لي غدا
انت ياعمر ياخي بقال دا خلاص خليهو للمستنيرين اخدت فرصتك في الحلفه ديييييك
|
Post: #13
Title: Re: يعني ما نتغدا يا بكري؟؟؟
Author: عمر الفاروق شيخ الدين
Date: 05-10-2005, 07:21 AM
زولنا الساكت :
| Quote: انت ياعمر ياخي بقال دا خلاص خليهو للمستنيرين اخدت فرصتك في الحلفه ديييييك |
والله يا زول خليناهو ليهم لكن خشينا قرينا كلامهم عنو لقيناهو كلام دراااااااااااااااااب وما بيتفهم ناس إنبثق وإنبشق وإنفجخ والسودان الجديد والسودان القديم بس والله رجعونا لي حركات السودان ديك تقول لي الزول الساعة كم يقول ليك بي القديم ولا الجديد ..تقول لي بتاع الحافلة ماشي الخرطوم يقول ليك بي الكبري القديم ولا الجديد أها أسة المستنيرين جابوها من أخرها وقالوا في سودانين واحد قديم وواحد جديد ..
أها يازول إنت داير ياتو سودان القديم ولا الجديد ؟؟؟
|
Post: #14
Title: Re: يعني ما نتغدا يا بكري؟؟؟
Author: اساسي
Date: 05-10-2005, 08:50 AM
Parent: #13
والله يا عمر الفاروق المنظر كان بايخ لو ما مسحوا انا زاتي كا طالبت بكري يمسحوا ليهم
كنت بتمني محمد سليمان وناس حجر وبشبش يكونوا حاضرين وما كاتلين ملف عشان نشوف ليك منظرهم الدسيس كان يكون كيف ..؟؟
لكن وحاتك زي ما قال ود الموج انا اكل بشفطو شفط اصلووو ما بينفع معاي
في زول يتغدي بشعيرية زاتو ...هفلة اولاد ايكي ..
قال اندومي قال
تصدق ربنا فكاني من الادمان حق الاندومي قريب دا
|
Post: #15
Title: Re: يعني ما نتغدا يا بكري؟؟؟
Author: عمر الفاروق شيخ الدين
Date: 05-10-2005, 10:08 AM
Parent: #14
يا أبوقوتة :
شاي المغرب في البر شاي عزااااابة واللقيمات بنرميهو ليك نحن وفي الغاااااااالب محرووووق بس المهم اللمة ولا شنو ؟
التلفون ده يازول يرسلوهو ليك كيف؟؟؟إنت قايل براك العندك تجديد إقامات وزوغانات ؟؟
أها يازول شوف ليك طريقة إنشاء الله تطلع في برج المملكة وتكوووووووورك انا بجيك هناك ..
|
Post: #16
Title: Re: يعني ما نتغدا يا بكري؟؟؟
Author: صديق الموج
Date: 05-10-2005, 07:33 PM
Parent: #1
Quote: لكن وحاتك زي ما قال ود الموج انا اكل بشفطو شفط اصلووو ما بينفع معاي
في زول يتغدي بشعيرية زاتو ...هفلة اولاد ايكي ..
قال اندومي قال
تصدق ربنا فكاني من الادمان حق الاندومي قريب دا |
اساسى ..الاساسى..الزول الحماسى.. الخلانى ضارب اخماسى فى اسداسى
اساسى يا ظلامى....سجمى بتاكل الاندومى ...حاجة غريبة
الحمد لله الما قلت معمولة بى مصارين خنازير....اها والاندومى
دى عشاء والا مزة؟؟؟؟؟؟؟؟
عمر بختكم اساسى قال الاندومى حلال..ولكن مع البيرة الموسى تؤكل مع الكراهة.
يلا بلعوها قبال يجيكم عبدالرازق الطال والا بنت الهناى ديك اصلوا ما بعرفو
الحاجات الحلال تخصصهم المحرمات..لوووووووووووووول،،،
|
Post: #17
Title: Re: يعني ما نتغدا يا بكري؟؟؟
Author: abuguta
Date: 05-10-2005, 10:46 PM
Parent: #16
عمر الفاروق
بالله هو دا انت
مجننى من زمان كدا
انا عارف مكان بلقاك وين
طيب الخميس الفات دا شايفك فى مطعم الريم
خاتى ليك صحن فتة ومعاك واحد لابس نظارات ولا ابقوته ايام زمان وشكله جديد لان عليه
رونق الحباة..والامل الطويل...وعلى ما اعتقد اخر زول جبتو باقامة..لكن اظاهر عليه مؤهل
خسرتنى عشاء ساى الفتة كانت مكفيانى معاكم...لكن راحت على
عندى اخوى شغال فى تميرة نت...دى فى السوق العربى...قال لى بقال دا زبون عندنا
وعنده جهاز محدد بقعد عليه ...لما يلقاه مليان..ينتظر لما يفضى.بمشى يشرب حاجة باردة من اخصائى العرديب..امس الساعة 12 اختى الصغيرة
جالسة عليه قال الا يتورها ليه...لانها كانت معاى علىالماسنجر.هو قال لاخوى انا عندى موضوع مهم عاوز انشره.قال هو كان بمشى مقهى البرج لانه داك غالى اخر مرة عمل معاه شكلة فى الجهاز..الجدير بالذكر ان ...تميرة دى قرية من ريفى ابقوته..صاحبها بقدرة قادر بقى غنيان...قالو زرع 250 فدان فى الجزيرة قمح وصدقت معاه...فتح فيها المقهى دا...لو عاوز الابى بتاع الجهاز بديك ليه..لكن انت بتاع حركات...تقوم تهكر على مقهانا...وتصيع اخوى انا ما صدقت هو اشتغل وارتحت من اقامة اقامة وتلك الدوامة...
ومرة قال لى حتى ناس تميرة البيتين وكاره عندهم نت ...انت قريت فى الهند وسافرت السند ودرست الكوبيوتر قبل بيل قيت..من زمن الكوبيوتر القدر التلاجة...حتى المقهى دا بقلبك... فائدة اغترابك شنو..
اها ودعتك الله
موعدنا يوم الخميس جنب سوق الفحامة طريق الحائر تحت الكبرى...ولو ما جيت لو زول دخل ايدو فى صحن الفتة..معاكم اعرفو دا انا..ما تستغرب تقول دا متطفل
ولقدام
|
Post: #18
Title: Re: يعني ما نتغدا يا بكري؟؟؟
Author: عمر الفاروق شيخ الدين
Date: 05-11-2005, 00:12 AM
Parent: #17
أساسي القبل الكراسي :
يا شريكي في الإندومي ولكن يبد أنك قد صبأت عن دين أجدادك المغتربين وبدأت تأكل أكل العوايل وأصحاب الفوايل ..
لا عليك بما يقوله إبن الموج عدو العزابة والذي لم يكلف نفسه في أن يقيم لنا دعوة يكون قوامها ملاح النعيمية والكسرة بل ويذهب إلي أبعد من ذلك ويشاركنا الفول وفي رواية (الفطائر)...
أبوقوتة :
Quote: طيب الخميس الفات دا شايفك فى مطعم الريم
خاتى ليك صحن فتة ومعاك واحد لابس نظارات |
والله يا شقي الحال كان إنت جادي في كلامك ياهو ده انا زااااتي البحوم مع واحد لابس نضارات بس ما بنأكل فتة !!! من الشية وإنت طالع مع قليل من الفول لزوم التواضع ..
أما بخصوص بقال فالراجل شايفو إتوشح السواد بالرغم من إنو كان عندي كلام كتييييييييير عايز أقولوا بس الراجل بقا مافيش ....
Quote: موعدنا يوم الخميس جنب سوق الفحامة طريق الحائر تحت الكبرى...ولو ما جيت لو زول دخل ايدو فى صحن الفتة..معاكم اعرفو دا انا..ما تستغرب تقول دا متطفل
|
يا زول انا الأماكن دي ما قاعد أعرفا انا زول حنكوووووووووووش بس بمشي هناك لزوم البر وكده ..
غايتو يا زول انا إنشاء الله بكون جمب المستودعات الحديثة وإنت نازل من الكبري ..
أقول ليك حاجة يازول إذا عندك تلفون واحد من الشباب وتحديداً تمبس لأنو شايف رقمو حاييم في النت إتصل عليهو وهو بيديك الرقم ويكون بيناتنا إتصال ..
|
Post: #19
Title: Re: يعني ما نتغدا يا بكري؟؟؟
Author: اساسي
Date: 05-11-2005, 00:44 AM
Parent: #18
لكن ما لقيتك طحنية يا ود الفاروق
هاك الاندومي دي
|
Post: #20
Title: Re: يعني ما نتغدا يا بكري؟؟؟
Author: عمر الفاروق شيخ الدين
Date: 05-11-2005, 01:57 AM
Parent: #1
يا أساسي :
| Quote: لكن ما لقيتك طحنية يا ود الفاروق.. |
ده أيام ما كنت جاهل ما بعرف الهموم ..
كأني زي عرفت السعادة ما بتدوم ...
ليالي ويا ليالي ..ليالي العودة تاني ..
الله أخلي لينا الأستديوهات والأدوب فوتوشوب
أسة فكّت بت الكلب ..
|
Post: #21
Title: Re: يعني ما نتغدا يا بكري؟؟؟
Author: نهال كرار
Date: 05-11-2005, 02:08 AM
Parent: #20
الخوف المرة الجاية تمشي تتعشى تجي تلقى اسمك توشح السواد
|
Post: #22
Title: Re: يعني ما نتغدا يا بكري؟؟؟
Author: نادية عثمان
Date: 05-11-2005, 04:09 AM
Parent: #21
عمر الفاروق شيخ الدين
الرسول فيك كان ده اسمك كيفن تكون دى صورتك يعنى ؟!!!!!!!!
اسمع انت بتشتغل شنو فى جدة؟؟
قبل يومين دخل على زول الماسنجر مابعرفو وقال اسمو عمر الفاروق
وطوالى صحبتك انداحت ليك معاهو
وين يافردة ؟
اخيرا ياود الفاروق جيتنى فى الماسنجر ؟
طبعا كنت ماداير تجى خايفنى اقول ليك دايرة اللابتوب ياهراش؟؟
ولاخايفنى الومك عشان كضبت على وقلت لى بسوى ليك بوست شكر براى باسمى فى الصفحة الاولى
انشاء الله يوم شكرى مايجى يايابا لسة صغيرة دوبك !!
اها الزول قام قال انو عمر فاروق تانى !!!
طبعا خجلت ليك جنس خجل من اندياحى وكشف الحال ده!!
اها ماكان فى حل الا ابلكو واعمل انو النت قطع قضاء وقدر !!!
|
|
|