الغريب والبحر

جيت على موج البحر معبور
مغبر بي رماد النار
مجرح من حصا المشوار
مشقق من لظى العتمور
أيا موج البحر بالذات
أيا موج البحر تحديد
اجيك مجبور اجيك قرفان
اجيك حزنان وصوت نبض الضحك
محظور
اجيك نشفان اجيك حفيان
وخيل درب السفر مكتول
وسيف وهج العمر مكسور
اجيك مدفور بأيد الريح
أواجه لفة التاريخ
وأحس طرف اللسان مشلول
طعم كل العشقتو مسيخ
أيا موج البحر بالذات
أيا موج البحر تحديد
زبد غبنك مكث في النور
زبد غبني انسجن في السور
زبد غبنك سطع للناس
زبد غبني أتخنق وأنداس
طلع في حلمي قمر الزيف أتقطع سلام الروح
بهت سر الشعر في البوح
وبات سمر الماسي مخيف.
اجيك يا موج من الأصقاع أدق باب الصدف في القاع
يهد حيل الصدى الإيقاع
وأخوض في لجتك مهووس
تقالد الزرقة في الأبنوس
ومن غابة المرجان يهل في عتمة الأركان نجم منقوش

**********
أموت لونسه نص الليل
لي حضنا يشد الحيل
لنقرة حوافر الخيل
ولي ضحكة مليون ميل
أموت في همسه ما تنزاع
ولي رقة نسيم في شراع
مسافر لي مرا في عروس
أموت في صحبه ما بتخون
أموت في طعنه ما بتكون
أموت في بيت شعر مسكون
أموت في بوح فصاحتو سكون
أموت في صك غرام مضمون
أموت في حق جسارتو جنون
أموت
وأموت في شيتا يعيد الكون

***********
أيا موج البحر اشهد
مساسق عمري في المغسه
نفس تعب الغبن قايم من امبارح ولي حسه
ولسع شاقي ظلم الريح
ولسع داجي في اللجة
وماوشوش فنار لشراع
ولا تنفس صبح بكره
أيا موج البحر تحديد أيا موج البحر بالذات
جدعت شباكي شان اقبض
وميض من دره في المحار
صبرت حبست نفس الشوق
عشان احصد شقا المشوار
ظهر في شبكي قرش الموت
اتمرعف علي الحوت
انفجر البرق أمطار
أتجاسر علي الريح
واتحاصرت بالأخطار

**************
أيا موج البحر بالذات
أيا موج البحر تحديد
مشيت جمر العمر مجبور
مشيت نص العمر مدفور
فترت من السبق للتار
ومن مرجحية الأشرار
زمن حسكنة الأسرار
ومن شبق الخيال للتار
فترت من الطعن والظن
ومن نحر الجميل بالمن
ومن رجيه غرام وأنيس
أيا موج البحر اشهد
نفس غبن العمر قائم
وما وصلت الميس

*****************
أيا موج البحر بالذات
أيا موج البحر تحديد
بصقت علي المثل مره
عشان قال ( الأمل حفره)
رسمت هواي بالشفرة عشان آمن عدآ الخفرا
طلبت جواز سفر تمديد
ختموا جروحي للتجديد
لقيت تأشيرة للمرة
ورماد حازمنو في صرة

***************
أيا قابض هوى السكين
وياغبيان ويا صحيان ويا مسكين
أخير سفرك يخيب مره
أكان تبقى الجروح حره
أخير تختار تكون محتار
بدل تهبط حلم واطي
اخيرتغرق في شبق الموج بدل تلمس وهم شاطئ
أخير تنجم
في نار الهم
بدل تحلم حلم واهي
أخير تصبح عدييل مظلوم بدل تصبح عديل خاتي
أخير تصرخ في وجه الجن
بدل تتعد متوا طي

****************
أتحيرت في حيرتي
ومن تخريفة الميزان
أيا موج البحر اضحك
لقيت الحق صدر (مرسوم)
من ( هيئة الأركان)
وأترفع أمير الجن
صبح في غفلة سيد الشأن
وقام في عين شمسنا السد
وأتقطع غناء الشفع واتقلع الضفر في اليد

*****************
يصفق موجك المدهوش ويضحك صوتك المقروش
وتشوف يا موج وكت نحجي ألقمره بالفقرا وكت أتقاسموا ألنبقه
تكشر دمعتا ألصافيه وتحلب دمعة في قافية
تقول يا موج أنا ألشاهده وأنا الشايفه
حكاية الدنيا من قامت
وعارفة الناس متين شبعت ومتين صامت
ومندهشة
من الأمثال وكت تصبح خدر وغشه
وكتير بضحك وكت اسمع ضهر البعير قصمتو قشه
كتير بسمع حجا التاريخ حكم وأمثال
ألاقي الحكمة في وش القول وظهر ألحكمه في الأفعال
كتير شفت السبح تنجر ووجوه في الحق تتب تنصر
دموع وراع وأيدينا ترد الصاع
كتير بسمع عن الدنيا أم نعيما غش
وعن فضل الظهر في الحر وعن نورة صلاح الوش
وعن غض النظر إيمان وعن بركة صحانا دغش
ونلقى الحكمة مليون لون
والفجار نجوم الكون
نلقى الكلمة مليون وش
ونلقى الغش مباري الغش
عصور ياموج نضمنا شكي
شعرنا شكي
فعلنا شكي
وتحت القبه مافي فكي

أيا قابض هوى السكين
وياغبيان ويا صحيان ويا مسكين
وحيد رغم الورق والصوت
وحيد بين النفس والموت
وحيد بين القرش والحوت
وحيد رغم الشدر والطير
وحيد وسط الصحاب والغير
وحيد زى خاطرة في عتمور
وحيد زى عتمة وسط نور
كفاك يازول
مضايق السور
تجابد الزمن معبور
تصفر في سماك الريح يلف ببك المدن وتدور
وراكب العاصفة زى عصفور

في كاسر الأمواج أشم طينا قريب للروح
ويهوم في الشرق فانوس
محلق بي جناح فينوس
وأسيل حنينه من دمعة واقطع دفتر الفجعه
وأحس من فرحة من عبره تدق تأشيرة للرجعة
اجيك ياموج من الأصقاع
أدق باب الصدف في القاع يهد حيل الصدى الإيقاع
وأخوض في لجتك مهووس
تغيب الزرقة في الأبنوس
ومن غابة المرجان يهل من عتمة الأركان وطن مرسوم بنور فانوس

هذه مقتطفات من قصيده الأستاذ هاشم صديق من جريدة الصحافة السودانية


جمال هباني