( طـرائـف ) الكـتـابـات ... عـلى ظـهـور ( العـربـات ) ..

الكتابة تعبير عن الذات و ليس في ذلك جديد ...
إعتاد الناس الكتابة على ورق البردى و الرقعة و تطورت ادوات الكتابة تبعاً لتطور الحياة ، و بما أن المعاناة تولد الإبداع .. و شعب بلادى فجرت المعاناة كوامن إبداعة و تجلت عبقريتة في إحالة النكد الى طرفة و الضنك الى تفاؤل...
رحلة قصيرة و تجول بالنظر عبر وسائل النقل المتنوعة في أزقة الحواري و شوارع المدن الرئيسية مابين ( ركشة و امجاد و هايس و روزات) تشدك كلمات وعبارات كتبت هنا وهناك و ثمة اغنيات و عيون شعر و عبارات شعبية (إتحكرت) في (خلفية) العربات لتطل على الجميع و تخاطب فيهم روح التفاؤل بحياة حلوة وتمنحهم قيض من فيض جمال إنسان بلادي..

مساحة أخصصها لمداخلات الجميع حول طريف ماالتصق بذاكرتهم من (الكتابات على ظهور العربات)....

أعجبني ما خلته مساجلة بين (قلاب ) و(ركشة) في شارع جبرة .. شاءت الصدف ان (يمروا وراء بعض ) ...
القلاب : العلم يرفع بيتا لاعماد له
الركشة: ما كل قاري متعلم

و روائع اغنيات تتميز بها (الروزات)
ماشفت عوضية
عيونك ديل عيون اهلي
قام إتعزز الليمون
حبي ليك كان زادي
بلى و إنجلى
و للفاكهة نصيب على ظهور
فراولة
تفاحة
عنبة
و للإنتماء مساحة تميز بعض المركبات
محسية
كاهلية
غـرباوية
دنقلاوية
دامر المجذوب
و للتفاعل مع السياسية أيضا نصيب
نيفاشا
مانديلا
بن لادن
و أغرب ما قرأت على خلفية (أمجاد)
>مـاتعـضي
شـن جـابك
الـروب
ديـك الجـن
كمية عبارات ساقنى الفضول الى سبر غورها بعد ان تلقفتها من ظهور المركبات..
هي دعوة للجميع من أجل الإسترسال في الموضوع و إيراد جميل الكتابات ...

ودمتم،،

شلبى
زمان بكتبوعلى العربات بكرة الركوب مجان
عمك على ابراهيم...ولدو دفعتكم اسى تخرج من الطب
كان بكتب على اللورى...مغترب الرياض....ودا كان فى الثمانينات
اسى كل ما اتذكره اضحك اقول الزول دا كان مجنون..ما لقى غير الاسم دا يكتبوه
وسالت منه قال لى كان مغترب فى قرية من قرى الرياض سنينا عددا لما رجع اشترى هذا اللورى
بقروش الاغتراب...
امس لقيت بتاع دينا فى غبيرا...طالع من مطعم النيل..الجنى حالف فى حمد الشنب انقاية
والسديرى من المحسى..والنظارات..دبل قلاص...دينتو مكربة...زى عضلات تبو اخت فرحة الممثلة الهندية
وركب فيها ومع نكرة المفتاح...سمعت غزال البرى ياراحل...اها مكتوب عليها من الخلف...كيف الرجوع لزولا قنع...ما ظنيتو برجع قريب زولى دا...زى ابقوتة لما يشترى الكامرى
تحياتى لعمى شلبى الايام دى بكون معاكم
احتمال نجى نسافر بالعربية...وننزل عندكم...والعربية دى خطوط جديدة للوليد بن طلال تذكرتها ماشى جاى الرياض دبى الخرطوم..بدون فنادق ولا وجبات..ولا مضيفات حتى...شنو ليك..لكن ريخصة رخصة
قطر بونا...
ولقدام

الحبيب الغالي أبقوتة،،
تحياتي،،

Quote: كان بكتب على اللورى...مغترب الرياض....ودا كان فى الثمانينات اسى كل ما اتذكره اضحك اقول الزول دا كان مجنون..ما لقى غير الاسم دا يكتبوه وسالت منه قال لى كان مغترب فى قرية من قرى الرياض سنينا عددا لما رجع اشترى هذا اللورى بقروش الاغتراب...

تعرف يا أبقوتة زولك ده كويس إشترى لوري بقروش الإغتراب و هم مايدل على الخير أيام إغتراب زمان ...
و الله يأأبقوتة مره شفت لي (ركشة) (أم إيريلاً طويل) كتب عليها (حصاد الغربة) .. شوف الحصاد زاتو (خشم بيوت) .. زمان كان (لورى) و يومينا دي (ركشة)...
و من جميل ماقرأت :
شتات خالي محطات ...
و الفي قلبو حرقص ...
و من دلالةالتاثر بالفضائيات
الاتجاه المعاكس
ستار أكاديمي
و Mbc
, Cnn
و للاعبي كرة القدم نصيب وافر
رونالدو
روبيرو
بيبيتو
العجب حبيبي
البرنس
..
لك التحية من (عمك شلبي) و هو بين ظهرانينا هذه الايام .. و في إنتظارك (بالعربية) و كمان ديل كاتبين على ظهر طائراتهم
(تنخفض بكم اسعارنا.. لتحلق بكم طائراتنا) ...
وتسلم ياغـالي ،،،

قرأت مرة في ضهرية بوكسي كركعوووووووووووبة :
" بتين تكبر تبقا لي ZY" ...

العربات عندما تكون جديدة بالذات اللواري التي تأتي من شمالنا الحبيب يكون مكتوب عليها ) زينة وعاجباني ) وعندما تترهل العربية وتخف مكنتا يكتب عليها ( مدد يا جعلي )




ود الباوقة

يا ناس يا شر كفاية ار

امشى وعايني الدتر عاك

واقفين تحننو وراكبين تجننو

يالشيخ الطيب
البلوم
الوسيلة
نعمات
الواو
القناعة كنز لا يفنى
ووب علينا الما قرينا
غريب والغربة اقصا نضال

سلام سام و المتداخلين

بمناسبة الكتابة علي العربات و الاغتراب قالوا مغترب رجع من ليبيا مقشط جاب ليهو معاهو مسجل صغير كل عصريه يشيل المسجل و يقعد بيهو في الضل قدام البيت ابوهو زهجان منو زهج شديد قال ليهو عليك الله اكتب عليهو حصاد الغربة ....

سلام ...

العفش داخل البص مسئولية صاحبه ...

ممنوع التحدث مع السائق ..

ممنوع أكل التسالي ..


الأنترنت ..

يا أبشرا..

إسم الجكس (شي ندي وشي سارة وشي مي و....)...

اوتاشو

من طرائف الكتابة على العربات فى وادى حلفا يوجد بص واحد يشق المدينة من الشرق للغرب(كلام قديم شوية)
ليس علية اى كتابة وصاحبة بلقط فى رزقة بدون منافس
فجاءة جاء احدهم ببص جديد وعاجب صاحبة فو طالع فو نازل يخطف الركاب من قدام البص القديم كتب علية بالرطانه
اوتاشو ترجمتها بالعربى (نحن وصلنا)
صاحب البص القديم كتب على بصة بزعل

(كى كن كومى كى كن جومى)

الترجمة (اليجى يجى واليمشى يمشى واحنا مالنا)

جاء أحد الأصدقاء لزيارتي يوماً ما ..
وكأنه لم يسمع، باعتقادي، أن هنالك أغنية
لكمال ترباس إن لم تخني الذاكرة من ضمن أبياتها
(بس تشيل فوقي وتودي) ..
كان هذا الصديق يضحك ملىء شدقيه وبدأ يحكي لي:
لقد وجدت سيارة بالطريق قديمة قدم الجاهلية وأكل
عليها الدهر وشرب .. وكأن صاحبها قانع بأنها قديمة
جداً الشيء الذي دعاه لأن يكتب عليها:
بس تشيل فوقي وتودي
كأنه يريد منها فقط أن توصله وترجعه ليس إلا

وايضا من الكتابات على ظهر البصات :

واقفين تحننو.... وراكبين تجننو

الأعـزاء الغاليين،،
تحياتي ،،
بصراحة ممتع أن تتابع مايكتب هناك و هو يتباين بتنوع مناطق السودان يعني أهلنا الرطانة لديهم تميز في الكتابة(بالرطانة) و من الشائع
وينجي تمنجي
دلوسى يابا
إكه نمون تان فاديجيكو
سبليلي
مسونكيل
هناك عبارة في معظم تكاسي الخرطوم القديمة
رفقاً بالباب يا أحباب ...
في الباصات السفرية شوية(إيمانيات)
على درب القدر نمشى ولاندري بالمكتوب...
و العفش داخل البص على مسؤولية صاحبة....
من غرائب الكتابات في بلد الغرائب (الهند) عبارة تكتب دائما و يندر إستبدالها في الشاحنات الهندية ..تتكون الجملة من ثلاثة كلمات لا تشكل جملة (مفيدة) بل محيرة إذ تقول : Please Horn Ok...
Stop ok Stop...
ٍ




والله أنا من الزمن داك ما لاقي ليها معنى (مفيد) ...
و هناك عبارات(مفيدة) على ظهور الركشات تقول :
keep distance
follow me if you can
يعني الشخبطة على العربات ظاهرة عالمية...

قالو برضو في جعلي اشترى لوري كتب فيه من ورة....


(((((((((((((((((((((هيييييييييييييييييييع))))))))))))))))))))



و دمتم

Quote: Please Horn

سمؤال
بمناسبة Please Horn نزلنا فى كابلى هوتيل نيو دلهى ونحن برالمة..فى تلك المنطقة تكثر التركات(شاحنات) مكتوبة عليها تلك العبارة...ونحن فى ذهابنا وايابنا وصبرنا مع ناس السفارة عشان مقاعد الهندسة...مرة من المرات صاحبى قال لى ياحمد ( شركةالمكان القرنى) دا عندها شاحنات كتيرة وانا لم اعير ترجمته اهتماما...اختلفنا فى الامكنة والكليات..فعدت لدلهى بعد 3 سنوات
نزلت معه فى غرفته فى البزن بيهار...اخونا بقى تفتيحة زى فتيل الريحة وعنده جكسوية فصيحة
زى بنات السريحة...طلعنا نتعشى مرت بنا شاحنة مكتوب عليها Please Horn قلت ليه يابو الشباب
دى برضها تبع المكان القرنى ..قال لى يازول انت بعير ..ما بتنسى ولا شنو..ليش ما صلحتنى وقتها
قلت ليه اخليك تصلح من الزمن...فعلا عبارة مقرفة...ومزعجة...تعادلها وقوف متكرر على حافلات السعودية...عندنا واحد اخونامحاسب مسمنو وقوف متكرر لانه كل ثلاثة شهور بقيف من العمل وببدا تانى يبحث ...
ولقدام

الاخ العزيز شلبي
الكتابة بتعكس الحالة الخاصة جدا لسائق المركبة
مثلا قلابات التراب تلقى مكتوب عليها
..هجام فريق ام زين..
..عنيد مابحنسوا اللولاي..
..الجفلن خلهن اقرع الواقفات..
.. النية زاملة سيدا..

Quote: (((((((((((((((((((((هيييييييييييييييييييع))))))))))))))))))))

قندرانى فى شارع مدنى مكتوب عليه
بس تشيل فينى وتودى

اخونا ما مون خدر ؟؟ ..بركة الشوفة ..وتحايا ..
-----------

** ما زال في ذاكرتي من تلك المدينة ..مشهد لبص قديم ..يمشي على مهل و"تبراهو" سحابة من الدخان ..
كتب عليه عبارة (المهم شغّال)..

-------------
صديقي التشكيلي عادل حسن (كرمة) كانت له عجلة يخيط بها شوارع مدينته الجميلة كسلا ..عادل لم يجد ما يكتبه بخطه الجميل على دراجته
التي يعزها ..سوى كلمة(عجلة)..

---------------------------------
* بي شوق الى سفر على "تندة" لوري يقطع فيافي البطانة .. متجهاً صوب الشرق الحبيب ..
ومكتوب على اللوري بصفحتيه كلمة (المربيد).. وتعني الناقة الولود كما يزعم أهلي ..




-------------------------------------

** شلبي ..
إنتا شلبي دي مش ياها شلبي بتاعت رفيقي "سيد محمد سيد" ابو السيد؟؟؟؟؟؟

و تحايا ..

الله أكبر (القديمة)

كركعوبة (شينة و عاجباني)

باص (تشاهد غدا)

(دايرة صبر)

صاحبى عندو قلاب تراب مكتوب عليه..... كعب العدم









سلام منصور

طبعا ما ممكن اى زول فيكم يكون شاف بتاع التاكسى الكاتب فى المرايا:

كلمينى يا.....


ولا الخاتى صورة غنماية وكاتب جنبها: سارحة مالك؟؟


الحمدلله الليلة اللقيت لى بوست ما متجهم ومافيهو قرار محاكمة ولا سيرة للمرض اللى منو ده...

في مدينتنا كسلا المواصلات كتييييره شيي الخاتميه...... الشعبيه ,,,
بانت...... غرب القاش
اطرف تعليق كان في باص غرب القاش
البص منتهي نهايه مرره..... في خلفيه البص مكتوب

داايره صبر....

مغترب من السعودبة وضرب معاهو موسم اليطيخ وبيسموه هناك الحبحب (بفتح الحاء
وجاء السودان اشترى دفار (DFR) وكتب عليهو
الحــــــب حــــــب

هذا المقال للزميل الأستاذ زكريا حامد نشر في مجلة الخرطوم الجديدة ويمكن الرجوع إليه في هذا الرابط:
www.newkhartoum.net
آهـ .. ونص .. شعار اللواري والبطّاحات...!!

تَطَرّقْنَا كثيراً إلى ظاهرة كتابة (الآماني) على ظهر المركبات العامّة والخاصّة وأبدينا العديد من المُلاحظات حول أسماء المحال التجارية والمطاعم وغيرها... ولأنّ الأمر يبدو مُستفحلاً الآن أكثر من أيِّ وقتٍ مَضى فإنّنا نُطالب جهات الإختصاص بتكوين لجنة من أهل الحل والعقد لمُراجعة تلك الظاهرة الشيطانية..!!

صاحب (مشويات) بالجريف يضع لافتة على شوايته وقد كتب عليها بخط قبيح (شواية الجمرة الخبيثة)..!! وعجبي لأولئك الذين يَفترسون اللحوم هناك ولا يُصابون بالإلتواء الحاد..!! وفي أم درمان (جزارة) تحوّلت إلى محل حلاقة وكعادة أهل السُّودان في التسرع تمّ شطب جزء من الإعلان والدعاية الخاص بالغرض القديم واستبدلت بدعاية الحلاقة من شاكلة: (إستشوار، حلاقة توضيب الذقن والشارب ...الخ)..!! ولكن ما يلفت النظر وسط هذا الكم من إعلانات الحلاقة عبارة تقول: (توجد داخل المحل مفرمة)..!! يعني بالواضح تحلق وتتفرم..!! ورجلٌ يبيع الأدوية البلدية والأعشاب يكتب في واجهة محله (يوجد بالداخل ماكينة تصوير)..!! إنّه التحايل بالطبع ومحاولة الجمع بين القرون والعصور.. يا راجل في زول بيصوِّر بخور تيمان وللاّ كسبرة..!! وحتى صديقنا السّبّاح سلطان كيجاب عندما لم يُحالفه الحظ في انتخابات رئاسة الجمهورية إتجه إلى السوق بكل قوته وافتتح مطعماً بالكلاكلات وكتب عليه لافتته: (كيجاب من رئاسة الجمهورية إلى عالم الفول والطعمية)..!! ثمّ توسع قليلاً وافتتح كافتيريا بالسوق العربي وكتب على اللافتة: (كيجاب من السباحة والعوم إلى السمك واللحوم)..!! وعبارات الرجل جَذّابة ومقفية ولا تخدش الذوق العام..!! بعكس أولئك الذين يكتبون على البطّاحات واللواري العتيقة: (آهـ .. ونص) بدلاً عن (يا أبو جلابية.. وأبو سروال وأبو مركوب)..!! وحتى (الكوامر) التي تم استجلابها في عام 1964م لتهجير أهالي وادي حلفــا إلى خشم القربة وتقوم الآن بمهمة (الإسعاف) للعربات (المصدومة) تَجَرّأ شخصٌ وكتب على جانبها: (ليلى علوي)..!! يا بني آدم كفاية عليك كلثوم وخدوم وستنا ولو بالغت (عشوشة)..!! ومعتوه آخر كتب على ظهر (ركشته): (لوفتهانزا) وصاحب (كارو) اكتفى بعبارة: (الكونكورد)..!!

ومن يدري فقد نصادف لافتة في منزل تقول: (يوجد بالمنزل قابلة صحية وباحثة اجتماعية وخبير في الشؤون الكروية ومقاول للعمارات السكنية وأستاذ للعلوم الرياضية...!)..!! وفي الأحياء الفقيرة قد ترتفع لافتات من شاكلة يوجد بالمنزل (عجلاتي وساعاتي وخيّاط ستاتي...!)..!! ثم نتساءل لماذا تُزج الأسماء الإسلامية زجّاً في المحال التجارية، هل يُعقل أن نطلق على محل ما (قهوة التوحيد) أو (مكوجي الرحمة) أو (مطعم التقوى) أو (جزارة الإحسان) أو (إجزخانة بدر الكبرى) أو (سَاعاتي المعراج..؟)..!!

وقناعتي أنّ من يصادقون على أسماء جليلة كتلك يستحقون أن تَأتيهم طير أبابيل.. ترميهم بحجارة من سجيل..!!

هل تذكرون طرفة (بلدياتي) في وادي حلفا فقد كتب على محله: (محلات فول أبو لحمة..!!) واستقطب عدداً كبيراً من القادمين بالبواخر والقطارات، ولكن (حلفاوياً) دخل المطعم وطلب فول أبو لحمة وبعد أن قلّب أسفل الصحن عاليه لم يعثر على أية لحمة وجاء يحتج لصاحب المطعم قائلاً: (أنت كيف تكتب للناس فول أبو لحمة ومافيش أي لحمة في الفول؟!) وهنا غضب (بلدياتي) صاحب المطعم وعنفه قائلاً:

[أنت يا محترم مش بتشتري صابون أبو فيل وشاي أبو غزالتين وموس أبو تمساح وزيت أبو نخلة...؟! أمشي شوف واحد من التجار قبل كده أدّالك مع الصابون "فيل" ومع الشاي "غزالتين" ومع الكبريت "تمساح" ومع الزيت "نخلة".. وتعال لي بعد داك عشان أديك مع الفول "لحمة"..!!]

الكتابة على العربات هي قديمة قدم الزمن وهي في تقديري المتواضع فن من الفنون مضافاً إليها الكثير من الزخرفة أو ما يعرف بالكشب عند مساعدي اللواري السفرية وقد يكون الكشب داخلياً أو خارجياً.
ومن أظرف ما لفت نظري منظر لوري في إحدى قري الجزيرة وهو مقلوب على جانبه الأيمن ومكتوب عليه "يا حسن" وهناك ما لم أستطع قراءته وأنا صغيراً وهي تلك العبارة التي ظللت أرددها في سري إلى أن جهرت بها فكانت قراءتي الخاطئة فقد كتب على إحدى لواري التراب العبارة التالية "الرسول فجوله تلعب" فكنت أقرأها لجهلي الرسول فجوله FAGAWLAH تلعب والمراد فجوا لها أى أفسحوا لها والمعني بين والله أعلم.
وهنا العبارة التاليةيا الشيخ مومو أمسك دعتك ، وقد حللت جميع عقد العبارة وتبقي فقط هذا المومو الشيخ ، وبعد أن أعياني التعب وهدني قررت أن هذا الشيخ من سكان العمارات و الأحياء الراقية وأن مومو هذا هو إسمع دلع زي سوسو وفوفو وأكيد سوف تكون سبحة شيخنا هذا ديجيتال والبخرات تيك أوي والسجادة سليب هاي. وهناك عبارات كثيرة لها دلالات ومعاني وأصدق تلك العبارات ما كتب أيضاً على إحدى اللواري السفرية "الكنداكه" فهي في الأسفلت أو بقايا الأسفلت من شوارع العاصمة تكندكك بما ينفثه عادمها من دخان ديزل كامل الدسم وفي الطرق الترابية تفعل ما لم تفعل خيل عنترة وإمرؤ القيس بإثارتهن الغبار بالكديد المركل.

طيب خلوا العربات ..
مافي كتابة على الطيارات ..
نفسي أكون مدير لسودانير ..
عشان اكتب في ( الضنب ) ..
( ستهم )
بالمناسبة ..
مرة لقيت سيارة دينا أو ( دفار )
بتاعت واحد باكستاني ..
شكلو زهجان من كفيلو ..
كاتب في السيارة ..
( الله كبير كفيل )

صابحني دائماً مبتسم...





والذي منو ده...

-----------------



---------------------


بـي شـــوقٌ ..

وبس..

العزيز شلبي

صباحك خير

امبارح كان بحكي لي صديق مشى السودان قريب وقال لي كانت قدامن (كارو)
ومكتوب عليها من وراء .....الله اكبر (القديمة) طبعا دي سياسية لسع ما اكتشفوها ناس الجبهة والقصد واضح مع تحياتي

هشام هباني

داخل بص قرات

دة يكون من شنو دة يا فردة

سلام

للموضوع اهمية كبيرة لدي وطرافة اناقشها علي الدوام

اذكر الان ..

"البشرية انواع"

و "الندوة"

وسلامات حتما لي عودة ,

هو معجب بقراءة اليافطات والاستمتاع بغريبها.. رأى يافطة بياع التلج فى السجانة مكتوب عليها (هنا يباع الثلج البارد).. ويافطة اخرى تقول (خياط نسائى ورجالى) و(مطعم الجياع) ولكنه وقف طويلا عند يافطة مكتوبة بخط ملولو وحروفها متداخلة وتقول( البا ترزى قر الطا افرنجى هر) وعندما تعب من تحليل اليافطة من كل الاتجاهات رجع الى منزله وهو يردد فى اصرار (البا ترزى قر الطا افرنجى هر) ولم ينم تلك الليلة من شدة التفكير والتحليل وفى الصباح الباكر ذهب الى صاحب المحل وسأله عن معنى اليافطة فأجابه(الباقر الطاهر ترزى افرنجى) وتصبحون على خير مع اليافطات..

نورالدين منان

الأعـزاء الغاليين،،
كم رائعة هذه المداخلات ،، فقد أعادتنا الي الشارع العام و(دفس) المواصلات و طرافة المواطن البسيط و هم الغبش ..
لعل من طرائف اللافتات يحكي أن أحد أهلنا الحلفاويين مر بسوق وادي حلفا أيام زمان و كانت هناك لافتتان كتب على الاولي :

(لوكاندة حلفا) و على الأخرى ( فندق السودان) صاحبنا قراها (لو كان ده حلفا فندق السودان ) يعني إذا كانت هذه هي حلفا (فندق) من الدق (الضرب) ندق السودان ..

و ثمة عبارة لن أنساها ماحييت تعبر عن ذروة غضب أحد(تجار الشنطة) و الذين كانوا يسافرون الي مصر عن طريق وادي حلفا نهاية الثمانينات و يبدو ان الامر وصل به الى درجة من عدم الإحتمال لسوء الوضع بالمدينة في تلك الفترة ليعبر عن ذلك بكتابة بالخط العريض على جدار مدخل محطة السكة الحديد ..
إذا غـضب الله من قـوم أسكنهم حـلفا .....

ومن الكتابات علي اللواري السفرية
قدر ما نزرع الافراح تجي الاحزان تمد إيدا
ما قال بجي
ومن روائع الركشات
الشحرورة
...
الاخ غسان

Quote: شلبي .. إنتا شلبي دي مش ياها شلبي بتاعت رفيقي "سيد محمد سيد" ابو السيد؟؟؟؟؟؟

ياها زاتها ،، الراجل قريبي ...و شلبي إسم العائلة ...
تسلم ياغالي...

كمان في كشك التمباك (الصعود)
ولو مافاطر ماتخاطر

Quote: كمان في كشك التمباك (الصعود) ولو مافاطر ماتخاطر

شديدة لكن ...


مكتوب في لوري من ورا :

العملتو الامجاد في التكسي لقتو في الركشة ...

الأعـزاء،،
تحياتي،،

من الكتابات (الكلاسيكية)

قيافـة و فايت الناس مسافـة....