****** انتا الحلو ******

انتا الحلو و طبعك حلو
شخصك جميل من اولو
شكلك بديع يوحي الكمال
وانتى الجمال هو مكملو
انتا العليك رسمو الجمال
واحتارو كيف هو يفصلو
لما الطباع جمعوها ليك
وادوكا وصفك تعزلو
شلتا المحاسن بين يديك
واخترتا كل الشئ الحلو
وفرحنا بيك فرح السنين
وقلوبنا رقصو وهللو
لانو يا سيد الجمال
الرقة والذوق الحلو
منك بنتدفى الحنان
نشرب عبيرو نكملو
ونقول عليك انتا الجمال
وانتا الاكيد طبعك حلو

_*_
*

وانتا الحنين جوة القلوب
وكتين يدوبو ويوحلو
جوة العيون الحلو ديك
لمّن تهل ويتدللو
وانتي البنفرح بيك دوام
وقلوبنا عنك بسالو
لما السفر اتهادى بيك
واشواقنا ليك يتوسلو
جيناك يا زولنا السمح
كيفن فراقك نحملو
كايسين حنانك مرة بس
ورينا كيف بنحصلو
لمن نتوه جوه الكلام
نسرح وما نتحملو
نتمدى في خاطر الفرح
نرتاح عليهو ونسألو
سكة هواك نلقاها وين؟
ورينا دربك اولو
ورينا يا زولنا الحلو

عبدالله وداعه الامين
لندن 22.03.2005