Post: #1
Title: مدينة الحلم تحت الانفاق
Author: alfatih
Date: 03-12-2005, 02:50 PM
مدينة الحلم تحت الانفاق
قال احدهم :
سموا مدينتنا مدينة المساطيل
حفروها فى ذاكرتهم كالحبل الطويل
زينوها بالكهرباء والجازولين
واسنان من اشياء الفيل ...
كبسوها وداسوا عليها بأقدامهم
لم يراعوا شدر البنقو ولا الزرافات
حتى اعياهم التطبيل
اسكرتهم ريحة البنقو قالوا لعله زنجبيل
ارأيت عيونهم مثل الشافع
يلهو بحبل الغسيل ...
شنقلوها على عقب
طيروا عصافيرها الكانت قبيل
تقع مدينة الحلم بين خطى طوب من المسامير .. وعرض طوب من المشى غربا ... تحدها من كل الجهات السيول والامطار ... بها اكبر تجمع للفرق من جميع دول العالم النايمة .. مدخلها واحد يحرسه رجل يدعى الشفت قلما تجد هذا الرجل مفتوح العينين ... حراسة بالذاكرة والحواس الاربعة .
واحد : رحل الغمام فوق مداخل المترو
واحد : والثلج يحنى عنقه لملاقاتنا
واحد : غابة الابنوس طعم المواسم الكالحة
اسمع شايف فى جماعة جايين علينا ممكن نستقبلهم ؟؟ ... وليه لا !! .. نستقبل ابوهم زاتو معاهم ...
وتمضى الليالى تحت السقف وهم يلوذون بأشعة التنويم المغناطيسى .. ولكن معاهم زول عندو شنب !!
يكون دا سيد الكريسيدا ؟ .. ياخوى ما تسكت تخلينا نتكلم عشان نسمع ... قال كراع سيدا .. لدى صاحب يسكن فى زقاق ج فى الحارة ل يدّعى انه يستطيع الخروج ليلا وبدون رتوش ... هذه الحالة اراها فريدة فى عصرنا .. الخروج الى مدخل الحلم الرابع عشر .. وانتظرنا خلف اسوار الامانى العذبة ... الراجل دا لابس بنطلون .. ويبدو عليه من عصر الاناقة والتزييف ... تانى رجعت للكلام ؟!! ... فى زمن اخر .. ومضة تخترق الاهات الهبلة .. تتلوى بين المضاجع كى تستريح بالعنف اللفظى ... طيب ممكن تعرف لى المعاهو منو ؟ .. اقول ليك معاهم زول تغيبنى فى الاجابة لتسأل مرة اخرى ؟ .. عندها يبدو اننا على وشك التصريح بأن نسأل حارس المدينة النائم ( الشفت ) .. ياخ ستين مرة اخبرتكم ان الهزيمة نكراء ولا يمكن تدارك كنهها .. وايضا شاورتكم فى طريقة عبوس الوجه المرتخى كالنوم .. قلتم هذه الشمس جعلت فى وجوهنا صرة وش ما بتطلع تانى كلو كلو .. وتأتون على الامشاط لتجعلوا من سؤالكم ازعاج ؟! .. نعم اعرف هذا الزول ... ولكنه بدون فوائد تذكر ... انسان طيب يعيش على المدقع ... يلبس الاناقة حتى لا تتهمة الاجهزة ... يمرطق اللغة العربية بأتقان كالراعى ... يتدروش احيانا اخرى على حلبة التصريح والتأويل .. هذا يكفى .. وزى مرة كدا برضو سمعت انو فى زول تانى غير الزول دا ... فيكم واحد سمع بيهو ؟ ... لا اعتقد .
جلسوا على فروة الزهج .. امعنوا التفكير ... المجلس خالى من انثى لماذا ؟ ... يبدو انو النساء فى بيت الجبنة كاشحات الونسة على تفعيل حلف الاطلسى ليشمل مدارك الادمان .. واحدة ذات مرة قالت ليهن .. وحات نظرى سوف تكتمل قلعة التتويج بالاساطيل وفيما قيل قبل قليل فى الاستديو المرئي .. القائد الاشول سيكون على رأس الهوس مبدئياً .. لو سمحتن واحدة تدينى الفنجان دا اغسلو .. هى يا دى .. راجلك فى اجتماع وانتى فى اجماع على المبادئ ؟ ... خلينى اشم ريحة القلوة وما تفضحينى ...
آلو : هل هناك اى تحركات عشوائية ؟ ..
اجل ايها المفتش .. رصدنا شوشرة فوق سطوح المبانى مكتوب عليها الامانى .. ثم الحياة .. حاصرنا الزقاقات بالتدريج وهناك بعض الناس يقفون على الامشاط ... هل نوزع لهم الحلوى ؟ .. كلا .. ستوزعونهم فى اكياس على بقية المطاعم الاخرى ...
الترجمة يا معفن ... وبطّل سخافة .. الكتابة سريعة والصورة غير واضحة ... يمكن .. على نفسها جنت براقش انت القال ليك تدخل الفيلم دا منو ؟ .. منو القال ليك ادخلو ؟ .. دقست ملامحك فى الولوج .. اتلخبطت لديك سلوك المحطات فى الخيال .. ياخ دا نفس طوووويل كدا مالو ؟ .. صحيح سيوزعوننا على بقية المطاعم لنصبح اطباق ؟ .. وستصبح علامة المينو على جباهنا !! .. فالنتدارك .. ولنختبئ خلف احلام الطفولة ... هذه المدينة مسكونة اجل .. مسكونة مجنونة ... تزرع لديها الحلم تحصده حلم قدرو .. لا اعرف ارضها واطة ولا حفاظة !! .. لماذا لم تزد امتار الحلم ؟! .. المساحات شاسعة بين المداخل فى القلوب .. ونحن نستكين فقط على بضع امتار من الباب الذى يحرسه الشفت .. قالوا لنا ادخلوا من كل الابواب فدلفنا من كلها .. وتعصلجت المغالق فى الخروج الى مدخل المدينة شبيهة القرية الكبرى .. قرية مقدارها مدينة .. وحلمها فوضى .. لا تندمج الا فى النصف الاخير من الضعف الكامن ... قرية اجمل ما تكون .. وانتهت بين عيوننا .. شنقلوها ...( رأسا على رأس ) وفضلنا نتحرى الصدق كى نكون .. وأدنا فى داخلنا حلم باكر وللمستقبل الداخرنو ليك يا زول .. امهات القرية ينثرن الاغانى الحزينة كل نهار ..
يتمشطن بالحذر المريع فى ضل الهظار ...
تتوانى لديهن ساعات الانتظار
تراجعن قليلا .. واكتشفن معنى الانبهار
اضحت لديهن المساحيق
كرائحة البهار ..
يضحكن على الحزن بالعزف على الطار
دا حلم فى قرية كبيرة تسمى مدينة الاحلام ؟ .. ولا حلم فى مدينة صغيرة تقرأ قرية للالام ؟ .. وفى الحالتين مع سبق التردد والاشهار .. قالت احداهن فى يومها .. انّا يكون الجمال سنكون ... سنهرب الى اقصى درجات الواقع لاكتشاف معنى وتفنيد اخر قبيح ... سنرحل عبر التواصل اليتيم فى اللون القاتم وسنغنى للفرح ..
حتما سنكتشف الالفة الحميمة .
|
Post: #2
Title: Re: مدينة الحلم تحت الانفاق
Author: عشة بت فاطنة
Date: 03-12-2005, 03:33 PM
Parent: #1
الفاتح صباح أو مساء الخير حسب زونك ..
أخيرا رجع الوعد .. واصل هطولك ما عدمناك ..
Quote: قالت احداهن فى يومها .. انّا يكون الجمال سنكون ... سنهرب الى اقصى درجات الواقع لاكتشاف معنى وتفنيد اخر قبيح ... سنرحل عبر التواصل اليتيم فى اللون القاتم وسنغنى للفرح ..
حتما سنكتشف الالفة الحميمة . |
وحتما ستعود العصافير ، فارقتنا هذا الموسم فالننظر الخريف بس لو اللواري وقفت تبقى سالفة ..
|
Post: #4
Title: Re: مدينة الحلم تحت الانفاق
Author: عشة بت فاطنة
Date: 03-13-2005, 04:59 PM
Parent: #3
تروتسكي أنت الناس دي بتكتب بوستاتة وبعد داك بمشوا وين ..
أها ترانا راجينكم في الكريبة
|
Post: #5
Title: Re: مدينة الحلم تحت الانفاق
Author: alfatih
Date: 03-14-2005, 08:01 AM
Parent: #1
العزيزة عشة بت فاطنة
لك الشوق والشكر
وكل عام وانتن بخير ايتها الابداع
بحاول اترجم احاسيس مشوشة تستصرخنى كل برهة
عاندتها وكبلت قيودها ... وزاد صراخها فى داخلى
بس قلت اطلعها .. واختها ليكم فى نص الشارع عشان تفضحوها معاى
وكدا ممكن نشيل مع بعض كتف الاحساس المرتخى يا عشة ... يا براكى
وتانى براكى يا انسانة ..
شكرا جزيلا يشبهك
تخريمة
قالن البيت محروس وستو تكوس
كنت فى صراع مع الهاكرز حتى هزمته 6\ صفر
|
Post: #6
Title: Re: مدينة الحلم تحت الانفاق
Author: alfatih
Date: 03-14-2005, 08:04 AM
Parent: #1
تروتسكى يا انسان
تعال عليك الشحتفة البين عيونى لرؤيتك عشان ترفع معاى الشوق
ياخ ما تجى ... واذا ما جيت وانا جيتك سأدخلك الانفاق ..
اتبهرج كويس واوعك تتسمم من الوحشة يا ممسوخ
عاين انا انتظرتك .. ويشهد علّى الشوق الشايلو
انت عارف انا بحلم ..
وسأهددك بحلمى العنيف اذا ما وئد ... لا تستلم مشرط الحزن اللزج لاقتصاص الحلم
انا قاعد على الحافة .. وارى اناسا يسيرون بقربى وهم تحت الدرك ( اى تحت الشارع ) ولكنهم ليسوا ببعيدين عنى ...
مسطول طلع فى اعلى البرج وقعد يعاين للناس من تحت ..
اها راسو لفّ ومن هناك جا واقع ...
الناس اتلموا حولوا وسألوهو :
يا اخونا فى شنو ؟
قال ليهم والله ما عارف الحاصل شنو ...
انا جيت هسى .
|
|
