Post: #1
Title: السهره صباحى ****
Author: مبيوع
Date: 03-10-2005, 09:35 AM
Parent: #0
الشارع نصف مظلم
يا اخوانا العمود دا كان منور لحدى امبارح دى
الظاهر حسن قرز المجنون كسر اللمبه
لا لا لا الحراميه الايام دى نازلين كسير فى اللمبات
الله لا كسبهم
اسمع اعمل حسابك الحته دى فيها مويه
امشى تحت الحيطه
تناهى الى اسماعنا صوت الباص جيتار
صوت بيقول الو الو تست ون تو
والآن مع
تلاشى الصوت مع هبة النسمه
اسرعنا الخطى
اسمع ما نغشى الدكان نشترى سجاير زياده
استرجعت ذاكرتى صوت صلاح محمد خير يقول
رئتاى تشع سجائرا وقلبى يخفق بالحب لك
فعلبة السجائر صنعت فى كل بقاع الدنيا
بعشرين سجاره لتلائم هموم الابتعاد عن الوطن
ولكن فيك فقد صنعت بعشر سجارات
لأنها صنعت خصيصا للسودان
ها هى الضواء والصيوان والاطفال يركضون
وابو الدقيق يبدو سعيدا بالطيران حول
لمبات النيون ولا يجد حرجا فى تقبيلها
رف قلبى بجناح النسايم
راح وشاف شاف جمالك وانت نايم
تتابع المبشرين وانطلقت زغروده
من مكان قريب اقشعر لها بدنى
ضوء باهر اقتحم المكان
ظننت ان العروس جات من الكوفير
ولكن اين صوت البورى
صوت جهوراتى من خلفى
وين المسؤول عن الحفله
دفعنى صاحب الصوت حتى كدت اسقط
انتهت المهزله بحشر الفنان وبتاع الساوند
داخل اللورى والذى عادة ما يستعمل
فى الكشات
لم يجرؤ احد على التدخل
المكان
ودمدنى
الزمان
اكتوبر 89
والسؤال ما زال قائما
من اين أتى هؤلاء?????
|
Post: #2
Title: Re: السهره صباحى ****
Author: نادية عثمان
Date: 03-10-2005, 08:06 PM
صديقى مبيوع
دعنا لانلعن الظلام
ولنحلم بغد افضل!!
ام اننا قد فقدنا القدرة على التفاؤل والعشم فى الله بان يوم باكر حايكون احلى واحلى !!
وحتى هؤلاء لن يظلوا كثيرا فرياح التغيير قد هبت عبر حوار الحق ياصديقى الفنان..
يازول بتنزل اغنيتى فى بوست متين حرقت روحنا ياااااااااااااخ؟!!
تسلم ياصديقى الغالى ..
|
Post: #3
Title: Re: السهره صباحى ****
Author: مبيوع
Date: 03-11-2005, 00:23 AM
العزيزه ناديه
دى حاجه خفيفه من الارشيف
المهم المقابله الصحفيه مع صاحبنا
كانت رائعه
والى المزيد من النجاح
والاغنيه حاتسمعيها قريب جدا
|
Post: #4
Title: Re: السهره صباحى ****
Author: معتز تروتسكى
Date: 03-11-2005, 11:17 AM
خالص التحايا..
الفنان الدكتور مبيوع...
بحكاية السهر للصباح زكرتى فى الابيض الشباب بقولوا (السهر وين)..
وياحليل ايام السهر مع الحلوين مش فى الكتب والغربه الممله دى...
بعدين بتذكر نحن فى حفله وانا صغير معاى خالاتى قاعدين وراء الباب الخلفى بتاع الخيمه صغير وخاتين فيهو لمبه اها فى سكران كل مره يجى يقيف جنب اللمبه ويسمكها بى يدو ويكسرها والمكان يبقى ظلمه وتانى يركبو لمبه يكرر ننفس الحركه قايتو الشى البتذكرو ان خالاتى كانو دايرات يموتو من الخوف ...
ايام ربك يرجعها ساى بقينا عايشين على الذكريات نجرتها لكى نعيش..
تسلم عزيزى
وكما ياريت نلقاك ونكمل سهر سوريا داك ...
|
Post: #5
Title: Re: السهره صباحى ****
Author: مبيوع
Date: 03-11-2005, 12:08 PM
الاخ معتز
عمت مساء وصباحا
اخوك كان متخصص فى اخد الاماكن والزوايا
الاستراتيجيه لمشاهدة رقيص العروس
طبعا الكلام دا لما كنت صغير
اها مره الجماعه الالغام ديك ما ادونى فرصه
وواحد منهم عفصنى عفصه حاره
قمت طلعت مع الجماعه الفى الحيطه
بس والحيطه ارردلب جات واقعه بينا
والنسوان قعدو يسكلبو
المهم اليوم داك بقيت اشهر من العريس
|
Post: #6
Title: Re: السهره صباحى ****
Author: مبيوع
Date: 03-14-2005, 06:05 PM
*****
|
Post: #7
Title: Re: السهره صباحى ****
Author: عبد المنعم سيد احمد
Date: 03-14-2005, 06:38 PM
Parent: #6
الفنان
مبيوع
فلنحارب القبح بهذا الجمال
كان السودان جميلا وسيعود كما كان
تسلم يا اصيل
|
Post: #8
Title: Re: السهره صباحى ****
Author: مبيوع
Date: 03-15-2005, 06:41 PM
شكرا يامنعم ياذوق
روى لى صديق عزيز
انو كان قاعد فى بيت عزاء
ومعاهم اخ من جنوب السودان
وكان النقاش حامى عن وضع السودان
الداخلى وعلاقاته الخارجيه
فقال صديقى يخاطب الاخ الجنوبى
السودان رجع لى وراء يا بيتر
فرد بيتر
كان رجع لى وراء كان وصلت
السودان ختس مشيرا باصبع يده الاوسط الى الاسفل
|
Post: #9
Title: Re: السهره صباحى ****
Author: Marouf Sanad
Date: 03-15-2005, 07:56 PM
Parent: #8
ازيك يا دكتور
تحياتنا لي ناس ايوا
استمتعنا بهذه القطعة الجميلة الاسيانة ,,تماما مثل صوتك الشجي ,,
|
Post: #10
Title: Re: السهره صباحى ****
Author: مبيوع
Date: 03-16-2005, 11:49 PM
معروف
كيف حالك
كلنا هنا تمام
وياريت نشوفك فى الصيف
|
Post: #11
Title: Re: السهره صباحى ****
Author: مبيوع
Date: 03-20-2005, 02:10 AM
****
|
Post: #12
Title: Re: السهره صباحى ****
Author: مبيوع
Date: 05-03-2005, 04:54 AM
مم!!!!
|
|