Post: #1
Title: هل السودانى مزاجى ولا يحب النكتة
Author: ودالعباسية
Date: 02-21-2005, 01:02 PM
Parent: #0
والله يا شباب الموضوع وما فيه انه عايزين نطلع شويه
ونغير بدل الاغانى المسموعة يكون فى بوست للنكات المسموعة .. ليه ؟؟
******
(امس الاحد صدرت جريدة الوطن القطرية وفيها موضوع من مراسلها فى السودان بعنوان)
هل السودانى مزاجى ولا يتزوق النكتة
احاول ان اكتب منه مقتطفات
ويقول التقرير
يتندر الاخوة العرب بأن السودانى شخص سريع الغضب ، ويصر المصريون على انه متهجم ولا يتزوق
النكتة، ويعترض السودانيون بشدة على هذا التوصيف الا انهم فيما بينهم يعترفون بأن فى
أساريرهم شيئا من الجهامة ، وان فى طباعهم بعض الحدة وانهم لا يميلون كثيرا الى التنكيت.
وفى الاونة الاخيرة حمل بعض المهتمين من السودانيين مبضع الجراحة لتشريح المزاج السودانى
وتلمس العوامل والاسباب التى تقف وراءه ، وهذا فى حد ذاته اعتراف ضمنى بصحة الانتقادات
التى توجه لمزاج الشخص السودانى ..
وقد زعم صحفى سودانى بأنه راهن زميلا له وهما جالسان قبالة محطة للمواصلات العامة فى صباح
احد الايام بأنه لن يأتى أبدا شخص (هاش باش). وبعد أن قضيا وقتا طويلا وهما يطالعان وجوه من
يحضرون كسب الاول الرهان وعلق على ذلك بقوله كأنما الجميع فى حالة اكتئاب عام ..
ويعتبر السياسى والكاتب الصحفى المرموق الحاج وراق من اكثر المهتمين بهذه الظاهرة وهو
يرجعها بصفة عامة الى عوامل اقتصادية ومعيشية الا انه يستدرك بأن الامر لا يقتصر على
الفئات الفقيرة وانما يشمل ايضا الاثرياء ورجال الاعمال فالمشكلة فى رأيه دائرية يتبادل
فيها الجميع التجهم ويقود ذلك فى بعض الاحيان الى نتائج قد تكون طريفة وقد تكون مؤلمة
وقال الفنان التشكيلى منعم حمزة راى اخر حيث يرى ان المزاج السودانى مرتبط اساسا
بالعاطفة ، كما انه يتأثر الى حد ما بحالة الطقس ، كما ان هناك مؤثرات اخري من ضمنها
الحالة المادية.... ويقول الدكتور النفسانى مامون يوسف ان عوامل مزاج الشخص لاتربط
بالحالة المادية فقط ولكن لها ارتباطات اخري كثيرة من بينها المناخ ، والمزاج السودانى
فى رايه متاثر الى حد كبير بالجو الساخن الذي يجعله فى حالة ضغط عال ومرد ذلك الى الحرارة
العالية التى يتميز بها المناخ السودانى لاشهر طويلة وهذا بعكس ما يحدث فى فصل الشتاء
وان كان البرد قارس ايضا يعكر صفو المزاج ..
منقول من جريدة الوطن القطرية للمرسل ( احمد حنقة )
تخريمة ...
|
Post: #2
Title: Re: هل السودانى مزاجى ولا يحب النكتة
Author: ودالعباسية
Date: 02-22-2005, 03:39 AM
انتوا الكلام عاجبكم ولا مقتنعين بيه
على العموم....
1
2
3
هيلا هوب ....
لى فوق ...
|
Post: #3
Title: Re: هل السودانى مزاجى ولا يحب النكتة
Author: ودالعباسية
Date: 02-24-2005, 04:20 PM
Parent: #2
؟
|
Post: #4
Title: Re: هل السودانى مزاجى ولا يحب النكتة
Author: Raja
Date: 02-24-2005, 04:41 PM
ود العباسية العزيز..
شكلو كده الإجابة جاتك بدون تعب..
لوووووووووووووووووول..
|
Post: #5
Title: Re: هل السودانى مزاجى ولا يحب النكتة
Author: ودالعباسية
Date: 02-24-2005, 04:57 PM
Parent: #4
العزيزة رجاء
والله مشكورة جدا على المرور Quote: شكلو كده الإجابة جاتك بدون تعب..
|
انا طبعا اقتنعته بالكلام دا لكن قلته اعمل محاولة اخيرة
تسلمى ...
|
Post: #6
Title: Re: هل السودانى مزاجى ولا يحب النكتة
Author: Raja
Date: 02-24-2005, 05:18 PM
Parent: #5
اوكي..
بما اننا الاتنين بس الفي البوست ده فحيكون شبه ونسة خاصة..
ما تتخيل ان المصريين ناس بتاعين نكتة قدر شنو.. لدرجة مزعجة مرات.. وفي بعض أهلنا بيشوفوها "هبالة" وبيستغربو ان الناس دي بتضحك في شنو..
لكن بيني وبينك حياتهم أحلى بكتير مننا.. وبيهونوها بالضحك على ما يبكيهم..
مرة قالو في مصري بيتكلم مع أخوه، قال ليهو: مش السودانيين اتعلمو ينكًتو..؟
فرد عليه اخوه: باين عليهم جاعو..
لووووووووووووول..
|
Post: #7
Title: Re: هل السودانى مزاجى ولا يحب النكتة
Author: ودالعباسية
Date: 02-24-2005, 05:30 PM
Parent: #6
Quote: وفي بعض أهلنا بيشوفوها "هبالة" وبيستغربو ان الناس دي بتضحك في شنو..
|
وفى ناس بشوفوها برود .. لانه تحكى النكتة وتلقى التانى قاعد يعاين ليه
او لو جامله يكون بى ابتسامة ولا بعض مرات يقول ليك هسه دي نكته مضحكة ؟؟
غايتو نحن خلينا ساكت ...
طبعا المصريين ديل اي واحد تمشى معاه بقول ليك نكته انا ما عارف بجيبوا النكت الكتيره
دي من وين مع انه نحن فى السنيين الاخيرة طلعت لينا اشرطة للنكات كتيرة جدا دا غير
المجلات ( نبض الكراكتير .. الخ )
اسمعى دي ... بس دي لى واحد سوري مع مصري
السوري قال لى المصري انا اليوم عازم الملك .. فرد المصري بى استغراب والنبى !!
فالسوري قال ليه احتمال يجى معاه ..
لوووووووووووووووول
|
Post: #8
Title: Re: هل السودانى مزاجى ولا يحب النكتة
Author: Raja
Date: 02-24-2005, 06:09 PM
Parent: #7
لووووووووووووووووول  ..
تعرف يا ود العباسية "بالمناسبة اسمك منو".. المصرين بيعملو نكات من اللعب بحروف الكلمات زاتها.. ومرات الأحداث البتحصل في الدنيا والأخبار البنسمعها كل يوم.. وطبعا أول ايام ظهور "الفياجرا" النكت ما تديك الدرب.. ده غير التخصص في الصعايدة.. لدرجة بقت تعمل حساسية وبقو يقولو "واحد بلدياتنا"..
اها نديك نكتة بتاعت واحد صعيدي داير يعمل ليهو مزرعة دواجن.. مشى اشترى كتاكيت وجا في المزرعة بقى يحفر حفرة صغيرة يخت فيها الكتكوت ويدفنه ويكب عليهو موية.. لغاية ما زرع كل الكتاكيت.. اها قوووم يا الكتاكيت موتي.. صاحبنا حزن ومشى رجع السوق واشترى كتاكيت تانيين وجا كرر نفس العملية.. وطبعا النتيجة كانت زي الفاتت..
طوالي مشى شد تلفون لولد عمه بيحضر في دكتوراه في امريكا وحكى ليهو الحصل.. ود عمه قال ليهو:
أبعتلي عيًنة من التربة..
لووووووووووووووووووووووووووووووول
|
Post: #9
Title: Re: هل السودانى مزاجى ولا يحب النكتة
Author: ودالعباسية
Date: 02-24-2005, 06:21 PM
Parent: #8
l00o0o0o0o0o0o0ol
والله مبـــــــــــالغة
|
Post: #10
Title: Re: هل السودانى مزاجى ولا يحب النكتة
Author: ودالعباسية
Date: 02-25-2005, 06:51 AM
Parent: #9
طيب انا اديك دي ..
قال ليك فى رباطابى فارش ليه سكسك فى اويل جاهو جنوبى عريان ميطى قاليهو السكسك بى كم ؟
الرباطابى قاليهو بكم خليها انت القروش خاتيها وين ؟؟ 
*******
وقال ليك الهنود فى لبنان عايشين اسعد احظات حياتهم ليه ؟ الناس فى لبنان كلهم بهتفوا
بالروح بالدم نفديك يا (رفيق)
|
Post: #12
Title: Re: هل السودانى مزاجى ولا يحب النكتة
Author: Raja
Date: 02-25-2005, 07:24 AM
Parent: #10
العزيز ود العباسية..
ســـلامات كتيرات وحلوات..
اها هاك دي..
قالو الصعيدي مشى السينما لقا مكتوب: ممنوع لأقل من 21
قام رجع البلد وجاب معاهو 20 من اهله..
لووووووول..
|
Post: #11
Title: Re: هل السودانى مزاجى ولا يحب النكتة
Author: ست البنات
Date: 02-25-2005, 07:22 AM
ود العباسية ،
سلام ،
البوست مهم جدا !وظريف !
وكمان أكد الموضوع الأساسى المنشور فى الصحيفة ،
لكن بالغت فى ( غايتو نحنا اسكتى خلينا ساكت )!الظاهر عليك ممكووون وبتعانى !!!
لكن والله نحنا عائلتنا بيحبوا النكته وبيصنعوها كمان !
الباقيين مخيرين !
وهاكم نكتة :
هى حدثت لى مع ابن اختى ساكن فى تنقاسى السوق ، وجانا فى اجازة فى كسلا ،
مرة لقانى أقرأ فى مجلة عربية وفيها الأبراج ، فسألنى :
دى شينى ?
قلت ليهو دى أبراج .
قال :
أبراج أكنها يا شينو ?
قلت ليهو تتكهن ليك حظك فى المستقبل .
قال :
واساميهن شينو ?
قلت ليهو :
القوس ، الحوت ، الجدى ، الثور ....
قال :
أها أقريلى برج الضبعة !
-----
ست البنات .
|
Post: #13
Title: Re: هل السودانى مزاجى ولا يحب النكتة
Author: ست البنات
Date: 02-25-2005, 07:32 AM
أها :
الصعيدى عاوز يعلم ولده الصغير المشى ، ربطه فى القطر !!
ست البنات .
|
Post: #15
Title: Re: هل السودانى مزاجى ولا يحب النكتة
Author: ودالعباسية
Date: 02-25-2005, 07:48 AM
Parent: #13
مرحب ست البنات
مشكورة على الدعم .. والنكات
|
Post: #14
Title: Re: هل السودانى مزاجى ولا يحب النكتة
Author: ست البنات
Date: 02-25-2005, 07:38 AM
الصعايدة بيلعبو كرة قدم ، الحكم حسب عليهم ضربة جزاء ، وقال ليهم اعملوا حيطة ، جابو الطوب والأسمنت !
---
واحد قاعد جنب ست الشاى ومسطول ، قالت ليهو اديك جبنة ?
قال ليها ما عارف والله ، لكن الجداد هسع جاب الطوب ومشى !!
---
ست البنات .
|
Post: #16
Title: Re: هل السودانى مزاجى ولا يحب النكتة
Author: ست البنات
Date: 02-25-2005, 07:53 AM
واحد مصرى جاء لأستراليا جديد ، وقف فى محطة البص وما عارف رقم البص المفروض يركب فيهو ، لقى واحد واقف من قبلو ، وسأله :
ARE THE BUS DOES STOP HERE ?
التانى رد عليهو :
PERHAPS MAYBE I DOES NOT KNOW !!
السائل طوالى قال ليهو :
الأخ مصرى ????
طب يا راجل ما اتقول من الأول !!!
ست البنات .
|
Post: #17
Title: Re: هل السودانى مزاجى ولا يحب النكتة
Author: ودالعباسية
Date: 02-25-2005, 08:12 AM
Parent: #16
قال ليك ..
واحد مسطول الدكتور قال ليه ولدك متسمم بى حليب مدته منتهية
المسطول قال ليه ايوه رضعته حبوبته...:D
|
Post: #18
Title: Re: هل السودانى مزاجى ولا يحب النكتة
Author: Raja
Date: 02-25-2005, 08:32 AM
Parent: #17
ود العباسية دي ما حصلت
|
Post: #19
Title: Re: هل السودانى مزاجى ولا يحب النكتة
Author: ست البنات
Date: 02-25-2005, 08:47 AM
الجعلى عذب الرباطابى ، يقول ليهو : نحنا جدنا جعل جاء من الجزيرة العربية ، وجدنا العباس ، والمك نمر مننا !!
الرباطابى قال ليه :
نحنا جدنا جاب بس ولدين ، رباط جد الرباطاب ، وبرط جد البريطانيين !!
(لكن ووب علينا من سجيمان ، هسع يستثمر النكتة دى !)
ست البنات .
|
Post: #20
Title: Re: هل السودانى مزاجى ولا يحب النكتة
Author: ست البنات
Date: 02-25-2005, 08:58 AM
حلاق كبير فى السن قرر يعتزل المهنة ، ويدرب ولده فى المحل ،
الولد أشتر ! كل ما يجى زبون يجرحه فى رأسه بموس الحلاقة !
أبوه قدر ما نصحه وحاول يعلمه ما قدر !
فى الآخر جاب مسدس وهدده بيه ، الزبون البيحلق ليهو رأسو كلو مجرح !
فى الآخر الولد قطع ليهو اضنيهو الأتنين ، وأبوهو معمر المسدس وقاعد قصادو ، الزبون يقول للولد دس الأضنين أبوك ما يشوفهن !
ست البنات .
|
Post: #22
Title: Re: هل السودانى مزاجى ولا يحب النكتة
Author: Raja
Date: 02-25-2005, 09:05 AM
Parent: #20
ست البنات ازيك..
تعرفي انا أول ما لموضوع يبقى فيهو حكي نكت القى كل النكت البعرفها طارت..
غايتو ما بسيبكم إلا اتذكر..
المشكلة في نكت ما بتتحكي.. لا.. ما عشان خارجة.. بس حتدخلنا في كلام السياسة..
لووووووول..
|
Post: #21
Title: Re: هل السودانى مزاجى ولا يحب النكتة
Author: ست البنات
Date: 02-25-2005, 09:04 AM
شايقية لأول مرة ترد على التيلفون ، وعندها ولد اسمو كمال سافر أمريكا ، اتصل من هناك ، وردت عليهو :
قالت ليهو منو البينضم ?
قال ليها :
أنا كمال ولدك يمه !
قفلت السماعة وقالت :
بس كمال ولدى الله خلاهو فى امريكا !!!
ست البنات .
|
Post: #23
Title: Re: هل السودانى مزاجى ولا يحب النكتة
Author: ست البنات
Date: 02-25-2005, 09:10 AM
المصرى فى مكتب الجوازات فى الحدود المصرية الليبية ( السلوم )
بيذيع فى أسماء القادمين المسموح لهم بدخول مصر ، أول اسم :
بت المناخير السيد !
صاحبة الأسم سودانية : بنت المنى خير السيد !
ست البنات .
|
Post: #24
Title: Re: هل السودانى مزاجى ولا يحب النكتة
Author: ست البنات
Date: 02-25-2005, 09:15 AM
أهلا يا رجاء وكيف حالك ?
وكمان مرات الواحد يلقى فى نكات حكيها أسهل من كتابتها ! مش كدا ?
( وبعدين الجماعة مضربين ولا شنو ?)
ست البنات .
|
Post: #25
Title: Re: هل السودانى مزاجى ولا يحب النكتة
Author: ست البنات
Date: 02-25-2005, 09:19 AM
(السلطات الأمنية تحيل ملف تنظيط ثورة البركان الى النيابة)
ويا رجاء قدرتى فهمتى دا ?
ست البنات .
|
Post: #26
Title: Re: هل السودانى مزاجى ولا يحب النكتة
Author: Raja
Date: 02-25-2005, 10:19 AM
Parent: #25
خالص ما قدرتا افهمها.. قدر ما جربت كل اللغات والرموز..
..
اها هاك دي:
صعيدي مشى القهوة قعد قدام المرايا.. طلب اتنين شاي..
لووووووووول
|
Post: #28
Title: Re: هل السودانى مزاجى ولا يحب النكتة
Author: ودالعباسية
Date: 02-26-2005, 02:37 AM
Parent: #25
ست البنات
Quote: (السلطات الأمنية تحيل ملف تنظيط ثورة البركان الى النيابة)
|
انا برضو ما فهمتها ..؟
ست البنات والله تسلمى على النكات الظريفة
|
Post: #29
Title: Re: هل السودانى مزاجى ولا يحب النكتة
Author: ودالعباسية
Date: 02-26-2005, 02:42 AM
Parent: #27
الاخ محمد الامين
البوست بتاعك يازول
اتفضل دون إذن ....
|
Post: #30
Title: Re: هل السودانى مزاجى ولا يحب النكتة
Author: ودالعباسية
Date: 02-28-2005, 02:13 PM
Parent: #29
الاخ محمد الامين اسمع دي
قال ليك فى شايقي ابوة مات ، قالوا ليهو ادي الشيخ الغسل ابوك
10 الف ، قال ليهم ليه غسل BMW
|
Post: #31
Title: Re: هل السودانى مزاجى ولا يحب النكتة
Author: محمد الامين احمد
Date: 02-28-2005, 02:20 PM
ود العباسية
طيب اسمع دى
واحد شين جدا، مشى يخطب، فبيتكلم مع ابو العروسة
العريس : يا عمى بلا فخر انا عملت نفسى بنفسى
ابو العروس : انا برضو بقول استحالة تكون دى خلقة ربنا
|
Post: #32
Title: Re: هل السودانى مزاجى ولا يحب النكتة
Author: ودالعباسية
Date: 02-28-2005, 02:28 PM
Parent: #31
محمد الامين
looooooo000000oooooo0000ooool
|
|