Post: #1
Title: يــا متخبيـة
Author: أبووجيدة
Date: 02-17-2005, 12:32 PM
يا متخبية ..
زيلي سحابة الصيف العابرة
وأطلعي بره من مخباكِ
وشيلي الفرح الخبا صورتك
وناشدي الناس الراجية غناكِ
ويوم ميلادك ...
كل الغيم الكان بغشانا
غير لونو وأصبح مافي
يا متخبية ...
ضي القمرة الساطع فينا
أصبح خافت بعد شروقك
وقدم شكوى ...
وحتى النيل الراسم لوحة
ومادي ضفائرو ...
أصبح ساكن ..
وآخر جملة كانت منو
لا فيضان من بعدك ببقى
لا نيلين في نقطة إتلاقو
يا متخبية ...
نحن إحترنا بين مجراكِ وبين مخباكِ
بين الرملة وخضرة جرف النيل الرائعة
وبين الغيمة وبرق العينة الصابي علينا
أظهري مرة في غير مجراكِ
إيه راح يحصل لما النيل يتفرع تاني
إيه رح يحصل لما الغيمة تكب في الدار
الراجية الرشة بعد المٌرة ؟
غايتو غنانا راح يتغير
ويصبح بين أنشودة غائب عاد لديارو
وبين المجرى الأصبح فاضي
وراجع لي زفات المطر الهاطل دوبو
على الوديان الخضراء ويانعة
يا متخبية ...
أمرقي من بينات النيل الأزرق
وغني الكلمة الحلوة وطاعمة
نشيد أولاد الروضة
الهاجو عشان الغنوة إتخبت تاني
بين سبورة الحيطة ..
وبين الدفتر وبين قلمين رصاص ورواية
عليك النعمة أمرقي عليهم
وقولي نشيد النخلة الطالعة
وبدر الكون الساطع فينا وفوق الرملة
يا طالع الشجرة .. ويا جنياتنا هو لبلب
ويا حبوبة الحجوة طويلة
ويا متخبية جنب الجنة
ولون النيل الخضرة الجارفة
زيلي سحابة الصيف العابرة
وناشدي الناس الراجية غناك
وأطلعي بره من مخباكِ
يا متخبية وأنا مفضوحك
أطلعي بره من مخباكِ
أطلعي ...
اطلعي ...
أطلعي ...
|
Post: #2
Title: Re: يــا متخبيـة
Author: soma
Date: 02-18-2005, 04:43 AM
Parent: #1
ابو وجيده وانت كنت متخبى مننا وين ؟
اكسر حاجز الصمت وكورك فينا بى الصاراهو دواخلك
انفض غبار السمح الجوه ..
وشتت فرحك فينا وما تتضارا..
اسرع وشتت لونك فى لوحات الزمن الاغبر ..
لون بيه الفاضل منو..
يمكن يكبر ويمكن يظهر ..
وتانى نجيبو نلون صورته وامكن يبهر ..
لانه طيفك اجمل وانضر..
شال الحزن الساكن جوه ..
وزرع الفرح الاخدر..
لحن نغم الشجن الباكى ..
ودندن غناك الفيك متحكر
ابو وجيده حقيقى ابداع
وعذرا لو غلبنى ارد عليك ..
شكرا مساحات منك وليك
شكرا دعاش .. ولون الصباح..
|
Post: #3
Title: Re: يــا متخبيـة
Author: معتز تروتسكى
Date: 02-18-2005, 05:03 AM
Parent: #2
خالص التحايا00
ابو وجيده...
يبقى حرفك كبير مساحة معانى نسرح ونغوص الى حد اللاشتهاء ونغرق .......
نبادلك من هترشات ليس تطاولا ولكن نتعلم من الاخرين والجايين...
الشي ألفيك
وقف عمر البذره00
الشي ألفيك
وأنتي البسمة00
الشي ألفيك
طول الغيبة00
وأنتي النبض وفيك
الرؤية 00
جوه مشارق 00وبره مغارب
الشي ألفيك
جانا وصلنا
وقالوا بقيتى النجمة00
شايله الريد
وتضوى00
راحلة في قلب
البذره00
واقفه وايديك عليها
الاستفهام نقش
الحنه00
ومشيتي تعدى00
وكملتي مدارك لاخر
اللفة00
وفى الكلمات لاخر حتى00
وبقيتى
الشي من الحتى0
وانتى منتخبيه00
|
Post: #4
Title: Re: يــا متخبيـة
Author: أبووجيدة
Date: 02-19-2005, 09:37 AM
Parent: #1
مشنوقة الكلمةفي ذاتك
ممدوة وراجية بشاراتك
عطشانة بتحلم بالغنوة
وتتصاعد ديمة هتافاتك
تتشابة متارسك لي هسه
تتفتح فينا صباحاتك
وتشرق كلمتنا في ذاتك
ضواية ورافعة شعاراتك
أولادك تفرح بي فرحك
تتجارة وترسم لوحاتك
وتناشد حرفك لي باكر
إتماسك وضمها أبياتك
ما الكلمة سلاح ومعاني
غنيها ودوزن ألحانك
جوايا بتحفظ أسرارك
غنيها وفرح أولادك
دي الكلمة سلاح ومعانى.
الأستاذة أسماء الجنيد
تحية وتقدير...
شكراً لهذه المداخلة الرائعة وأملي أن يمتد تواصل الحرف بيننا فهنالك الكثير الكثير.
|
Post: #5
Title: Re: يــا متخبيـة
Author: خالد أحمد عمر
Date: 02-20-2005, 07:02 AM
Parent: #4
الاخ يوسف
تحياتي
إستمتعت أيما متعة بنضير حرفك اليانع
أكتب لتبهج المكان
ولك الود
|
Post: #6
Title: Re: يــا متخبيـة
Author: soma
Date: 02-20-2005, 12:41 PM
Parent: #4
انا البشكرك .. يا سمح القول .. يا اجمل زول..
محكر فيك شارب منك ولاقى عنايتك ..
حقيقى ادهشنى تعبيرك فى الكتابه ..
ويسعدنى التواصل معك
واعذرنى لو اتأخرت عليك
اصلو بينى وبينك ..انا بجى وبتاوق فى نضميك وهرجك المن الجوف
وبرجع لا ورا .. اقول يا بنات امى وولاد امى .
دحن ارد عليه كيفن الفنجرى ده ..
الله يطلق لسانى وبنانى .. ويقدرنى اجاريك كان بقدر ..
وما بقدر اتم قولى اشيلو واقوم واتبختر ..
اعاين ليك تتربع وتتحكر ..وما بقدر
اشيل فى غناى ..ومره حجاى .. والملم منو ليك رجاى
ما تبعد و تتاخر.. وما تتاضرا وتتعضر ..
خليك هناك فى مغناك نجمه تلالى تملا سماك زى جوهر..
ونحن رجاك بى اشواقنا نتحكر .
شكرا ليك غناك السمح اخى ابو وجيده
والود نيلين
|
Post: #7
Title: Re: يــا متخبيـة
Author: معتصم دفع الله
Date: 02-20-2005, 01:29 PM
Parent: #6
يا سلام لما الكلام يكون في حضرة الناس الحلوين ..
أبووجيدة صديقي الشاعر الرقيق ..
سوما صدقيتي الشاعرة الرقيقة ..
يلا زيدو القول حكي ..
وأنظموا الكلم الجميل ..
وأنثروا الفرح شعراً ..
خلونا نبتهج ..
وتبتهج الدنيا ..
ويبتهج الطريق ..
لكما خالص ودي ..
|
Post: #8
Title: Re: يــا متخبيـة
Author: soma
Date: 02-20-2005, 09:06 PM
Parent: #7
الزول الرزين ..
معتصم دفع الله
ود الفريق والحله
يعلم الله اسعدتنا الطله
شرفتنا وشرفت خلق الله
يعظم شانك وديمه تتعلا
بهديك المحنه العند اهلنا
وبهديك كل الكلام السمح الجاى منك
شكرا ضفاف..
****
التحيه بلا حدود
لسيد الكرم والجود
1خونا ابو وجيده
دايرنو ديمه موجود
والود جروف
|
Post: #9
Title: Re: يــا متخبيـة
Author: samwal ebrahiem
Date: 02-20-2005, 10:59 PM
Parent: #8
الصديق العزيز / يوسف ابو وجيدة
تسلم يا رائع على هذه الكلمات الجميلة
شعرك في غاية السماحة يا سيد السماحة
كلماتك تدخل الفرح والبهجه في قلوبنا الحزينة
وبختم كلامي وبقول ابو وجيدة يا رائع
السمؤل
|
Post: #10
Title: Re: يــا متخبيـة
Author: أبووجيدة
Date: 02-22-2005, 07:28 AM
Parent: #1
الغالي
: معتز
مليون سلام
لا زلت أتلعثم وأنا أجاري محاولة الردود في حضرة الحرف النادر لك وأنت تكبرني في مساحة الحرف الرائع فلك مني كل الرؤى وأحلام الزمن القادم .
|
Post: #11
Title: Re: يــا متخبيـة
Author: أبووجيدة
Date: 02-22-2005, 07:41 AM
Parent: #1
والود نيلين
أنا وأنت والنيل والغنى
واقفين على ضل المطر
رغم المصاعب والمحن ...
الأمنيات تبقى العشم
للراسمو في التاريخ معزة
وشايو في حدق العيون
ليك الدعاء والإبتهال
في كل خطوة على الطريق.
الأستاذة : أسماء الجنيد
عذراً إن لم يكن حرفي في الرد بمقدار روعة كل الجماليات التى يخطه يراعك
والتى أشعلت فيني العودة إليه فلك ماشئتي من أمانيات .. ولنا عودة
يوسف حمدالنيل
|
Post: #12
Title: Re: يــا متخبيـة
Author: rani
Date: 02-22-2005, 08:03 AM
Parent: #11
|
Post: #14
Title: Re: يــا متخبيـة
Author: rani
Date: 02-22-2005, 08:50 AM
Parent: #11
مكرر
|
Post: #13
Title: Re: يــا متخبيـة
Author: عمر الفاروق شيخ الدين
Date: 02-22-2005, 08:42 AM
Parent: #1
ابو وجيدة
العلاقة بين يا مدهشة ويا مفرحة ويا متخبية زي علاقتي باللغة الهروغلوفية ..
يا متخبية اسمعي كلام حبيبنا ابو ووجيدة وابقي مارقة ...
اطلعي تطلع ...
|
Post: #15
Title: Re: يــا متخبيـة
Author: walid taha
Date: 02-28-2005, 00:40 AM
Parent: #1
أبو وجيدة ازيك..
لسّة هى متخبية؟!
أرقد عافية..
|
Post: #16
Title: Re: يــا متخبيـة
Author: معتصم دفع الله
Date: 02-28-2005, 03:16 AM
Parent: #15
Quote: أبو وجيدة ازيك..
لسّة هى متخبية؟! |
الشهيد وليد طه
تخيل !!!!!
|
Post: #17
Title: Re: يــا متخبيـة
Author: أبووجيدة
Date: 03-19-2005, 11:32 AM
Parent: #1
الغالي :وليد طه
تحياتي
هذه المتخبية حتى أنا لا أعرف متى تبين
بس ما تمشي بعيد ....
|
Post: #18
Title: Re: يــا متخبيـة
Author: Alia awadelkareem
Date: 03-19-2005, 11:37 AM
Parent: #1
Quote: متخبية ..
زيلي سحابة الصيف العابرة
وأطلعي بره من مخباكِ
وشيلي الفرح الخبا صورتك
وناشدي الناس الراجية غناكِ
|
ابو وجيدة
القومة لغناكو
قلنا نسجل نظرة
في حضرة النغم المالي الفجة
محبتي
|
|