Post: #1
Title: مسطولة فى عيد الحب
Author: alfatih
Date: 02-14-2005, 01:08 PM
مسطولة فى عيد الحب
تجيب لى ورق يا مبشتن يا عديم الحب !!
كرتك الرسلتو قايلاهو مراية
خسارة البوستة الجابتو جب
كرت كلو فراشات زى قماش الملاية
بتحب شنو يا ما عندك قلب
احسن ليك تشوف غيرى ما عارفنى براية ؟
يا سمين وعيونك دقاق زى عرق الجلابية
محل ما امشى القاك ورايا
حرشت ليك اولاد الحلة يدقوك دق
يسووا راسك نيفة وكرعيك شواية
تحبنى انت .. حبتك الملاريا
وياربى تاكل فول مدمس تجيك لواية
يا شين زى كديس المستشفى
جنوا اكل وحق الناس عندو هواية
انا جكس مقرم وشايفا روحى
شوف ليك واحدة تانية تسقيك محاية
يا اشتر يا بتاع المرايس
تجيبك الكشة من الانداية
قال حب قال ... تحب شنو
امشى راسك كلو قرون زى الغنماية
كتابتك صغاااار ما بتتشاف زى عيونك
نشفت ريقى وغلبتنى القراية
قلبما اكلم ليك جنونى ديل
اعمل حسابك من اى وشاية
كان قمت لا بعرفك ولا بعرف لونك
يا كديس قايلنى فاراية
فلنتاين فى عينك
امسك لسانك عليك .. يا عامل زى هناية
اها استسلم وقول الروب
اوعك ترسل لى تانى كفاية
ولو لقيت منك رسالة بخليك كفتة
واعلقك زى اللحماية فى الشواية  
|
Post: #2
Title: Re: مسطولة فى عيد الحب
Author: Rawia
Date: 02-14-2005, 01:15 PM
Parent: #1
كل سنه وانت طيب
كل عيد حب وانت طيب
|
Post: #3
Title: Re: مسطولة فى عيد الحب
Author: نادية عثمان
Date: 02-14-2005, 01:18 PM
Parent: #1
العزيز الفاتح
قلت:
فلنتاين فى عينك
امسك لسانك عليك .. يا عامل زى هناية
اها استسلم وقول الروب
اوعك ترسل لى تانى كفاية
ولو لقيت منك رسالة بخليك كفتة
واعلقك زى اللحماية فى الشواية
اقايتو دى قلبت فيها الهوبة انت والمسطولة
ارجانى برجع ليك بى رواااااقة !
|
Post: #4
Title: Re: مسطولة فى عيد الحب
Author: alfatih
Date: 02-14-2005, 01:18 PM
Parent: #1
راوية
وكل سنة وانتى اجمل يا اصيلة
شكرا ليك يا بنفسج
تسلمى
|
Post: #5
Title: Re: مسطولة فى عيد الحب
Author: alfatih
Date: 02-14-2005, 01:23 PM
Parent: #1
الاستاذة نادية
كل سنة وانتى اجمل وعيدك ورد
انتى عارفة ... مسطولة وشاكوش مع بعض
الله يكون فى عون الزول دة .. بيكون عيد الحب عندو نار
وربنا ما يرمينى فيها ... بتخلى عيشتى كلها حشيش
شكرا ليك يا رائعة وانا فى انتظارك
|
Post: #6
Title: Re: مسطولة فى عيد الحب
Author: soma
Date: 02-14-2005, 01:28 PM
Parent: #5
لووووووووووووووول الفاتح ما لولايه
كل سنه وانت طيب وين الحى بيك ..ان شاء الله طيب
تحياتى وشكرا على الاستراحه الظريفه
|
Post: #7
Title: Re: مسطولة فى عيد الحب
Author: Abdelrahman Elegeil
Date: 02-14-2005, 02:14 PM
Parent: #6
اللـيـلة الـبـنـات عـقـدن علي الـشـورة
وقـالـن لـي خـلـيـقـتك كـريـهـة مـابندورا
سـائـل الله الـكـريـم تـحـصـل عـلـيـهـن بـورة
ومـا يـضوغـن عـرس لـ شـقـة الـمـطـمـورة
|
Post: #8
Title: Re: مسطولة فى عيد الحب
Author: Mohamed A. Salih
Date: 02-14-2005, 07:42 PM
Parent: #7
شلاع الدرق ...الليله مشغول فكرو
ابنو البنوت وما راعن لزوم قدرو
قام اب شنب يلعن .. ويدق في صدرو
كتار التاهو قبالك ... كتار عترو
|
|