12 فبراير:اليوم دخل المهدي أمدرمان منذ 120 عاماً ؛ و إمتى أرجع لى أم در و اعودا

منذ 120 سنة من اليوم دخل الامام المهدي امدرمان مظفراً بعد ان حرر الخرطوم قبلها بأيام فى 26 يناير،عبر النيل عبره ذلك الزاهد الذى رفض ان يسكن قصر غوردون باشا- القصر الجمهورى الان -و رفض وسماه مساكن الذين ظلموا انفسهم،وترك العنان لناقته بعد عبوره النهر ووصوله امدرمان لتنيخ به أنى شاءت ،فأناخت به فى امدرمان فى مكان القبة الان فكان مسكنه و مسجده و اصبح مرقده بعد ان انتقل الى الرفيق الاعلي،فصدق ما عاهد عليه الله و ما بدل تبديلا

أقلت أمدرمان؟
هيَا يا أخي
إمسك بيد الخيال و اعبر معه النيل الى يمينه"حيث سابق"،أتلمح التماعة تلك الفضية التى تحنو على ملهمها ويعلوها هلال و حربة؟؟الضريح الفاح طيبو عابق السلام يا المهدى الامام،هنالك حيث الاشواق تتكاثف كبخار محبة وحيث الحنين يقودك لا تقوده وحيث النفس تهفو والقلب يخفق..
أقلت أمدرمان؟؟
إمسك بيد الخيال و أعبر معه النيل و تمهل فاعرج يميناً الى اب روف و اتئد و انت تجتاز تلك الازقة الضيقة التى كأنما خلقت لتكون هناك و كان التاريخ يسجل فى كل لحظة توقيعه على "شهادة العجز و الاخفاق"فى ان ينل من صباها شيئاً فلم تشخ او تهرم رغم انها عتيقة عتيقة،تنحنى ظهور أبنائها فى رحلات أعمارهم أطفالاً فصبية فشباباً فكهولاً فشيوخاً ولا ينحنى ظهرها أبداً..
أقلت أمدرمان؟؟
إمسك بيد الخيال و تمهل و الذكرى قطعة سكر أذبها ببطء بداخل فم الواقع ولا أحلى..
أقلت أمدرمان؟؟
إمسك بيد خيالك و لا تطلقها أبداً ورددا معاً:
إمتى أرجع لى ام در و اعودا
اشوف نعيم دنيتى و سعودا،
ثم بح بحبك دفعة واحدة واهتف:
المن فراقك ايامي سودا
امتى ارجع لى امدر و اعودا
ثم اهتف:
من علايل اب روف
للمزالق
من فتيح
للخور
للمغالق
قدلة يا مولاى حافى حالق
فى الطريق الشاقى الترام
وامتى ارجع لى امدر و اعودا؟؟
امدرمان يا أخي حلقة راتب
تمتد بعمق "تكسبون" مرورا نفسياً بالمسبعات العشر فتنجينا فدعاء ختم القرآن الى ان تحط على دفتى دعوة قساوة القلب .
أترى لذلك معظم أهل امدرمان ليَنوا القلب؟؟
ام درمان حلقة راتب تحت الشجرة الظليلة المطلة على خور الامير ابو عنجة تتلو وراءه الشهادتين و العهد بالخلاص صباح مساء..
ام درمان حلقة راتب تذيب فوارق البشر الا من نظافة القلب و طهر النفس و السلام بالا تجعل اللهم فى قلوبنا غلا للذين آمنوا
امدرمان الشيخ الصديق احمد العجب و الشيخ احمد العجب..ودنوباوى الشامخة ببيت الامير و الاباء.
ام درمان عبدالله ود الزين وهو يلهج:
حبيبي جميل
جمال فتان
جمال تظهر سماتو الحلوة ميزات جوهر الانسان
جمال زى بقعة ام درمان
جمال فى طابعو سوداني
جمال فى شكلو انسانى
جمال ما فيهو دور تالت ولا تانى
جمال فى بيت من الجالوص
وفوق للشعبة رابط سعف منسوج من حبال و بروش
ووسط الحوش
تنوم العزة تتوسد لحاف بالعاديات مفروش
حبيبي جميل
جمال فتان
جمال رايع
جمال فى قبة او جامع
جمال فى طابية بتدافع
جمال فى طاقة بتقبل على الشارع
وقفة بتقفل الطاقة
وزحام فى شارع الصاغة
وضيف فى خلوة او دهليز
وزول نايم تحت لالوبة او جميز
جمال ما بحسو غير زولن لعب شدَت ووسط الميس
حبيبي جميل
جمال بطران
جمال شبعان
جمال زى بقعة امدرمان
وامدرمان
بيشوفا الرامد المرضان:
بلد بيموت
وعز بيفوت
وواحدة عجوزة راجية الموت
وامدرمان
بعين الشاعر الانسان
وعين البعرف امدرمان:
سلام وامان
تخش بحمار
تسوي حصان
تنوم بردان
تقوم دفيان
واسمعو كيف بقول عبدالله ود الزين
وليد الاوليا الصالحين
وليد الشهدا و الشاهدين
واسمعو كيف بقول فى ام در
وليد البر
انا امدرمان سليلة السيل
ولد ولدونى بالتهليل
انا امدرمان..
وهل انتهى الحديث عن أمدر؟؟
أمسك بيد خيالك وأعبر النيل الى الشاطىء الغربي حيث امدر،وتجول ملياً فى كل شارع و كل بيت ،فهنالك لكل شارع بوح و لكل بيت قصة تقبع فى ركن منه لتحكي -برغم عاديات الزمن- حكاية مدينة تليدة لم تمل الخلود و لم تعرف الانكسار
قطعا لم و لن ينتهى بل سأعود؛
محبتى لكم

أم درمان.
فوق. بدون تمايز.
فوق.

الأخت لنا
لك كل ود وتحية وتقدير
ألا رحم الله الإمام المهدي وأسكنه العليين بقدر ما جاهد في سبيل الله والوطن
ستعودين لإمدرمان متى ما شاء الله حين يصبح السودان وطناً للجميع وأرجو أن يكون ذلك يوم عز ونصرة وشموخ يسقط فيه الباطل وترفع رايات الحق والديمقراطية خفاقة فوق الهامات

اخي الحبيب حبيب بلدو كتبت:

Quote: ألا رحم الله الإمام المهدي وأسكنه العليين بقدر ما جاهد في سبيل الله والوطن ستعودين لإمدرمان متى ما شاء الله حين يصبح السودان وطناً للجميع وأرجو أن يكون ذلك يوم عز ونصرة وشموخ يسقط فيه الباطل وترفع رايات الحق والديمقراطية خفاقة فوق الهامات

كم أنعشت كلماتك هذى فىَ الأمل و أنا أبعد ما أكون عنه هذه اللحظة فيما يخص البلد
فلنحلم بعالم سعيد اذن
لك خالص محبتى و تقديري

اخي الحبيب عبدالرازق
وام درمان
بشوفا الرامد المرضان
بلد بيموت و عز بيفوت وواحدة عجوزة راجية الموت
الف شكر على مرورك

الوفاء والعرفان لذلك الفتى المهدي الذي أقام الدنيا ولم يقعدها وهز الأرض تحت أقدام الإمبراطورية التي لا تغيب عنها الشمس
المجد والخلود لشهدائنا الأبرار
كان مبتدأ وكان الخبر وفي الفروة كان حسن الختام

لنا بت مهدي

سلام يشبه ام در وناسا....

مااجمل واعذب ماكتبتي ، انها ام در امان انها البقعة ، بكل تكويناتها

واجناسها واعراقها ، ام درمان البوتقة التي صهرت الجميع ومازجتهم واكسبتهم

هذه الثقافة المشتركة ، امدرمان بعبق تاريخها البطولي ا لناصع ، ام درمان ابوعنجه

وابوروف وبيت المال وبيت الامانة ووودنوباوي والعرضة والملازمين والفتيحات ...

امدرمان القبة ا لبتضوي الليل والطابية المقابلة النيل والعافية البتشد الحيل ...

ارايت كيف صنع ذلك الفتي القادم من لبب تاريخ وحضارة لامة لن تغيب ، هاجر من

لبب الي اقصي الغرب واختار خليفته ووضع اللبنات لسودان واحد ، تتعدد اعراقه

وثقافاته وتتنوع تنوعا يكسب الوطن المزيد من العافية ...

قد اعود مرة اخري فالحديث عن امدرمان له نكهة ومذاق ..

شكرا لنا ..محبتي

الاخ محمد سعيد ياخوى دربك هذا وعر واتمنى ان لا ينداح بك الى اهل الركاب فهم كثر
عزيزي امدرمان معقل الجموعية قبل وبعد المهدى والمهدي عليه الرحمه تتلمذ عليهم وبهم فتح الخرطوم وابوسعد وماادراك ما هى....امدرمان مركز المك محمد ناصر المك النايلابى ومنها يحكم المنطقة جنوبا حتى جبل الاولياء وشمالا حتى الكوداب اوالشلال السادس......والجموعيه قسمين اهل الركاب وهولاء هم الفرسان اهل الحديد والنار وهولاء الجموعيه جنوب من امدرمان حتى جبل الاولياء.......شرقا وغربا من ابوسعد وصالحه والغرزة والسليمانية وجبل الطينة الى جبل اولياء وهذة تحت المك مباشرة وابنه الادارى دفع الله محمد ناصر والمرحوم الطيب محمد ناصر المك المحامى.......والجموعيه شمال عرفوا باهل الكتاب وناظرهم الغردونى سرور محمد رملى من امدرمان وشمالا حتى السبلوقه كررى وما ادراك ما هى ثم وادى سيدنا والجزيره اسلانج والحريزاب والنوفلاب والنوبه والسروراب والشخ الطيب والشهيناب والسناهير والتسعين والجميعاب ...... عرفوا باهل الكتاب للعلم المتجذر فيهم هذة المنطقه بها اقدم المساجد وبها اشهر علماء السودان ومن اجلهم جئ برفاعه بك الطهطاوي وكليه غردون لان جامعه المهدى عليه السلام بامرحى او الشيخ الطيب حيث تتلمذ على الاستاذ محمد شريف.....ولانهم يخشون الف مهدي..... بقدوش قاضى الدوله السناريه جد السروراب.....والشيخ الطيب ودالبشير جد الاستاذ محمد شريف هو الرجل الذى ادخل الطريقه السمانيه فى مصر والسودان....واولاده جميعهم علماء وكذلك احفاده الى الآن.....ومنهم الشيخ عبدالمحمود نورالدائم راجل طابت وشقيق الاستاذ محمد شريف والاستاذ محمد شريف من ابنائه العباس محمد سعيد ثم حفيدة الطيب العباس المحامى والشاعر..... ثم الشيخ قريب الله الشيخ ابوصالح وابنة الشيخ الفاتح والشاعر الناصر قريب الله واحفادة بروفسير حسن الفاتح ودكتور ابو صالح,....ثم الشيخ عبد القادر وابنة الحليفه الشخ ادريس وحفيده عبدالقادر ابوهاله والشيخ زين العابدين وابنائه ثم ابراهيم الدسوقى والد العالم الشخ لمصطفى الشيخ ابراهيم الدسوقى استاذ المعهد العلمى والاسلاميه والد العالم بروفسير دسوقى عالم البيطره والادباء سيف الدسوقى والمعز الدسوقى والبشير الدسوقى ومن تلك المنطقه القاضى ابوشامه من مؤسسى جامعة امدرمان الاسلاميه واول مفتى بعد الاستلال وابنائه دكتور عباس ابوشامه والرشيد ابوشامه السفير وتاج الدين ابوشامة نائب اخر برلمان قبل نميري وابنه العالم فيصل تاجالدين....ومن هناالدكتور الحبر يوسف نورالدائم والدكتور محمدالواثق يوسف عالم العروض فى الارض ومن هنا حسن الفاتح واخوانه والرشيد نايل وموسى المبارك وبابكر ودالجبل وانتشروا اساتذة فى السودان شرقه وغربه شماله وجنوبة واسسوا مدن وقري على سبيل المثال طابت والحريز والسوريبة والكتير مساعد وام طرفايه وسروراب تنبول وهم شيوخ الشيوخ فى السودان اسال عنهم البرعى واليافوت وامدرمان بلا اريافها ما اكلت فالبطاطس والبصل على مستوى السودان تزرع هنالك....... اماالشعراء ومن جاء لامدرمان جاءت به اسباب الحياه ثم الاستزاده من العلم فشعراء السودان وفحولهم من هناك والعباس خير دليل زالناصر قريب الله وجماع عبدلابى من المنطقة ومن اشعر من الشيخ قريب الله والشيخ عبدالمحمود الحفيان وآلهم الى محى الدين الفاتح ثم نورالدائم عبدالوهاب الذي رفع راس السودان عاليا باليمن عندما فاز على شعراء الوطن العربى......الاخ محمد سعيد امدرمان الجموعيه والخيل والكتاب
السودان يسأل عن نصيبه ونصيب الجموعيه بين ايدى اهل السودان فاليفتح السودان زراعيه للجموعية ويشاركهم الغنائم والا فللجموعية مقابر لا تعرف الا النصر ناهيك عن الكواسر اباء الصدق الغر الميامين فاسال عنهم الجيلى وكرري والجموعيه يعتبرون كل من جاء الى امدرمان مع المهدى ضيفهم اكراما للمهدى الذى يعتبروه سمانى واخاف تكون سمانى او تلميذ سمانيه وجموعيه يتمرد ولك حبى والسلام


منصور عبداللة

اخي الحبيب منصور المفتاح
التحية للامام المهدي فى الخالدين و لصحبه الغر الميامين الذين نصروا دولة الحق وتمازجوا فيما بينهم فلم تعد تستبن من اين جاء هذا او ذاك جمعتهم سيوف النصر على قلب رجل واحد
تحياتى لك و
خالص محبتى

اخي الحبيب محمد عبدالرحمن
وامتى نرجع لى امدر نعودا
تلك المدينة/الوطن
التى تمثل بؤرة احاسيس الوجدان عندما يهفو القلب
لك سلام و امان

اخي الحبيب محمد الواثق
وام درمان
بعين الشاعر الانسان
وعين البعرف امدرمان
سلام و امان
لك محبتى

يوم مجد وفخر ولاخلاف ولكن الا ترى ان امدرمان قصدها الامام لعوامل خاصة بنجاح ثورتة ولا اعتقد ان ثورتة هدفها تحرير ام درمان وحسب والا لما اصبحت جزء من تفاصيل الحياة السودانية عموما.نعم لقد جاهد الامام بسيفة ولكن لكل السودان الوطن.وشتان ما بين هدف الامام ومادحى ام درمان اليوم.الخصوصية لن تكن جزء من حياة العامة ولكن الحياة العامة جزء من خصوصية اى احد.

Quote: يوم مجد وفخر ولاخلاف ولكن الا ترى ان امدرمان قصدها الامام لعوامل خاصة بنجاح ثورتة ولا اعتقد ان ثورتة هدفها تحرير ام درمان وحسب والا لما اصبحت جزء من تفاصيل الحياة السودانية عموما.نعم لقد جاهد الامام بسيفة ولكن لكل السودان الوطن.وشتان ما بين هدف الامام ومادحى ام درمان اليوم.الخصوصية لن تكن جزء من حياة العامة ولكن الحياة العامة جزء من خصوصية اى احد.

اخي الحبيب عبود النصيح
ما فهمتا دخل الخصوصية و الحياة العامة بالوارد هنا

Quote: وشتان ما بين هدف الامام ومادحى ام درمان اليوم

من تقصد ب"مادحي امدرمان اليوم"؟؟وما اهدافهم التى وقفت انت عليها؟؟

Quote: لقد جاهد الامام بسيفة ولكن لكل السودان الوطن

وهل غالط احدهم فى ذلك؟؟دلنى من قال انه جاهد لاجل الخرطوم او امدرمان فقط..