أنا مبسوطة من ناس آدم للسفر ديل

لي حوالي سنتين ونصف عضوة في المنبر الحر بسودانيز اونلاين.
اشعر بارتباط وثيق بهذا المكان واصبحت لي ذكريات وصداقات من الصعب تكرارها في مكان آخر.
في اثناء مراجعتي لمسيرة البورد في الفترة التي عايشتها تذكرت انني لم ألمح يوما اعلانا تجاريات في هذا الموقع الكبير سوى اعلان شركة آدم للسياحة والسفر !!
ولا أعرف اذا كان آدم عضوا معنا في البورد لاحيه وانقل له تقديري.

اكبر موقع سوداني على الانترنت, اكثر موقع سوداني زيارة,(يعني بنتكلم في كم مليون كده بيشوفوا الموقع كل يوم ) كل هذه تعد عوامل جذب رهيبة لاي شركة تجارية او مؤسسة سودانية تطمح في الانتشار. تفوق جاذبية الاعلان في تلفزيون السودان ذاته اذا ما قارنا وصول هذا الموقع لاي سوداني على الكرة الارضية.
اتابع مواقع سودانية أخرى وألمح اعلانات تجارية على صفحاتها باستمرار.واستغرب عدم اهتمامهم بالاعلان هنا في سودانيز اونلاين. يعني الاعلان ده مش حسابات وفايدة ولا شنو؟

الموضوع ما عايز ليه دراسات اقتصادية عشان الواحد يقدر يشعر باهمية موقع مثل سودانيز اونلاين وملائمته ليلعب دور تجاري يمكن ان يوفر الكثير من مصاريف تشغيله بل واكثر من ذالك بكثير.
هل المسألة تكمن في عدم استغلال بكري جيدا لموقعه, في عدم مساعدتنا له؟

اعلن انا زولة123 انني احب شركة آدم للسفر والسياحة لله فالله, وانني اذا تواجدت في البلد التي يقع بها مقرها لاستخدمتها لشراء تذاكر سفري طوال ما حييت بل وشجعت أقاربي ومعارفي على فعل الأمر نفسه.
وأي زول تاني يعلن في سودانيز اونلاين انا بصراحة باحترم تفكيره واشتري السلعة بتاعته. واعتبر ذالك واجب علي كعضوة أنعم بمميزات هذا الموقع طالما لا اقدر على تقديم شيء آخر له.( لحد ما الله يفتحا علي واعمل شركة خاصة بي واجي أعلن عنها هنا )

في كم زول معاي؟

zola123

يا دكتورة

أنا اول زول بايد كلامك وصدقيني كان قرو كلامك ده
برسلوا ليك تدكرة( ختي نقطة في الدال ) مجانية
من أبو ظبي لي أي مكان ترقبيه وطبعا حتكون فاوتشر

ود الشيخ
مش قلنا لله ف لله؟
حسي يسمعوك الجماعة ويجوا يؤيدوا عشان تطلع ليهم معاي تذاكر
انا بس معجبة بيتفكيرهم ودعمهم المتواصل للموقع
وشايفة انه شركات كتيرة واعضاء ممكن يؤدوا دور زي ده وبخلوا بيه
مع انه في حد ذاته فرصة
يعني انا في أبوظبي البيعرفني بناس آدم ديل شنو ولا كان ممكن اسمع بزول سوداني فاتح شركة سفر وسياحية في أمريكا غير عن طريق موقع سودانيز اونلاين؟

انا معاك لزوم الترويج يعيش ادم وطياراتو

سامي عبد الوهاب
يعيش والله يرزقه ويوسعها عليه ويكبر ليه شركته
ويخلي ليه أولاده
اها كان بلقى دعوة زي دي لو ما اعلن عندنا؟

انا يادكتورة معاك

ان شالله نطلع لينا بي تزكرة للاجازة

ود الأباسية

Quote: انا يادكتورة معاك ان شالله نطلع لينا بي تزكرة للاجازة

بركة الماقلت نطلع لينا بيطيارة
ياخوانا لله ف لله
ادعي ليه انت بس والله يحنن قلبه وممين عارف
ينزل طيارة مخصوصة للبورداب أمريكا الخليج السودان
والرجعة بطريقتكم

زوله 123
وانبساط من شركة ادم للسفروالسياحه ينصب اخيرا فى نجاحات سودانيس اون لاين فى مديرها بكرى ابوبكرى واتفق معك فيما نتمناه جميعا فى جعل سودانيس اون لاين موقع جذاب لكل العملاء فلنبدأ فى مد الاخ بكرى بالافكار والتسويق فلماذا لا تقوم جميعا بهذا العمل لعلى نعطى سودانيس اون لاين قليل من كثير نعايشه
شكرا على هذه البوست والفكرة
تحياتى

بلدي يا حبوب
الفكرة ما جديدة والله والناس عملت كم بوست زمان ورجعوا كسلوا
قلنا نجيهم من زاوية أخرى
في التلفزيون قبل نشرة الاخبار في اعلان عن شقق بالتقسيط بتبنيها شركة مشاريع كبيرة. تفتكر ناس زي ديل ما ممكن المغتربين البيتصفحوا موقع زي ده وبيفتحوه كم مليون مرة ويلقوا رابط مباشر لموقع الشركة وشوفوا صور الشقق دي بيراحتهم مش دقيقتين اعلان تلفزيوني وينتهي !!!؟؟؟
تعرف كم شركة زي ديل في السودان بتستهدف السودانيين في الخارج؟
عندك استعداد لتسويق الموقع لديهم؟

زولة تحياتي ليك يا لماحة،،

و أعطرها لنهي ،،

زمن مش؟

سوميتا العصفورة الرقيقة
مشتاقييين وييينك انتي؟
د. نهى ما باقابلها كتير, اخر مرة من ايام العيد على المسنجر
لو ما شفتها كنت قلت عرست ونستنا.
اها رأيك شنو في الموضوع, انا قلت بتعرفي آدم ده وتقدري توصلي ليه شكرنا.

الزولة الانسان

كل سنة وانتي بكل خير

فعلا العضو ادم للسفر احسن عضو

وانا برشحو امين للموقع

ومبروك عليك يا ادم بسطة الزولة

قرجة يا زوق

Quote: فعلا العضو ادم للسفر احسن عضو وانا برشحو امين للموقع

تصدق, آدم ده طلع أكتر زول فينا قلبه على الموقع

salam zola, bellahy howa Adam da international, I thought he is local inside my favourite country, thks for the info. I might reach Dubai for a conference 1st of february for 3 days only, I will bring the article with me, best regards.
Dr.Yasir

ياسر عبد القادر
آدم عنده فرصة رهيبة للانتشار
لاكن افتكر بعد كلام ندى حتكون فرصة رهيبة ليه للانهيار لو ما عرف اهمية المصداقية في العمل التجاري
وخصوصا في بلدهم القاعدين فيها.
يا ربي ما ممكن الزول يرفع عليه قضية لو ما أداه التذكره بنفس سعر الاعلان؟

عارفة يا زولة وكمان اكتر عضو منضبط وما بيثير مشاكل بالجد ادم ابو البشرية لكن اولادو ما ساترينو

والحالة دي الناس بتقول بكري بيروج لموقعو عبر المشاكل عشان يجيب الاعلانات !!!!!!! ومافي اعلانات واحيانا بفكر يا ربي العائد لبكري من الموقع شنو ؟؟ مع انو مافيهو فايدة مادية تذكر ؟؟؟

زولا 123


فعلا ادم احسن عضو

وخشمو وعندو

سجيمان
خشمو وعندو فعلا ومواظب على الاعلان ومصر على التواجد
شكرا له

العمدة
والله انت جبت المفيد
الموقع ما منه فايدة لبكري وفوق ده بيجيب ليه المشاكل
يعني الحمد لله اللسة فاتحوا لينا

زولا من واحد لحددددددددددي مليون :
ليك التحية ..
والقال ليكم منو يا ناس ادم ما بيشارك ..ادم بيشارك بس بي اسم تاني وهو "عمر الفاروق شيخ الدين " وكان ما مصدقة راجعي ال IP

بالنسبة للاعلانات فالسودانيين عنده قصور تسويقي وبستكتروا القروش علي حاجات بيعتقدوها تافهة وبيعتمدوا اعتماد كلي علي الدعاية من خلال " القوالات " يعني فلان يقول لي فلان وفلانة تودي فلان ..
انا زييك مبسوط من ادم للسفر وانتظر حواء للخدمات الفندقية

تخريمة كده :
اقترح عليك توقيع
ياقزازة الكولا والكولا كوكاكولا ..
الدنيا مبتهجة وكل (زولة) بي زولا ..

زولة 123
العايزة تحظرني في الأمارات
تحياتي
عارفة البقرأ كلامك يقول بكري مدبك نسبة للترويج دة.عايز أقولك حاجة.
أكبر غلط لبكري هو لو قريتي تفاصيل الإعلانات تلقيها فضاية مافي بيانات مساعدة و عم بكري الله يجزاه خير حيلك لما يرد عليك لو في زول رسل ليهو إيميل ، حتفاجئي بعد فترة إنو أنامنزل إعلان في سودانيز أون لاين ، لأنو ناوي و المانعني إني قاعد برة السودان و وقفت نشاطي التجاري لحين العودة بعدما رحت و جربت و نجحت بس ما كنت راجع نهائي و قريب حأرجع نهائي و أول خطة الإعلان و التركيز عليهو و بشدة و أول إعلان حيكون هنا إنشاء الله.
حتى لو فصلوني
طبعاً فضولك حيكون دوّر إيه نشاط الولد دة مش دة نشاطي يا زولة وهو مبشر شديد حسب تجربتي

علاء الدين

Quote: عم بكري الله يجزاه خير حيلك لما يرد عليك لو في زول رسل ليهو إيميل

يعني بكري زاته ما منتظر رجا من الموقع ؟؟؟
طيب ماهو الحل؟

كل التوفيق انشاء الله في نشاطك
وقبل كل شي الهداية والعقل عشان ما تتحظر وتجي تعلن السنة الجاية

عمر الفاروق

Quote: فالسودانيين عنده قصور تسويقي وبستكتروا القروش علي حاجات بيعتقدوها تافهة وبيعتمدوا اعتماد كلي علي الدعاية من خلال " القوالات " يعني فلان يقول لي فلان وفلانة تودي فلان ..

ده كلام جميل
طيب والبيعلنوا في التلفزيون ديل؟
مافي زول يقول لي عايزة تقطعي رزق التلفزيون
لاكن شايفة الموقوع اكثر جاذبية بكثيييير

التخريمة مقبولة وقيد الدراسة

Quote: طيب والبيعلنوا في التلفزيون ديل؟

التلفزيون دعاياتو كلها طحنية وبسكويت غايتو الا اذا عايزة تجوعينا في الموقع هنا
النقطة الاهم في مجال الدعاية اصبح التركيز علي الاغراء يعني يقومو يجيبوا ليك بت سمحة كده تقول كلام خارم بارم وكلام الطير في الباقير لكن المنتج بيتسوق سريع ..
يعني بيني وبينك كده انا والله دعاية " أرررربو التلتين وياويلي من التلتين " دي بقعد احرسا من الصباح لحدي المسا ومش عندي مشروع صلعة وراثية لكن حااااااااااااالف الا اشتري دوف ده

تحية طيبة للجميع

Quote: فعلا ادم احسن عضو وخشمو وعندو

اثنــــــى

محمد الأمين
والله لحد امبارح العصر كنت حاثني أنا برضة على كلامك ده
لاكن راجع حكاية ندى
تحياتي

العزيزة زوله 123

سلام و محبة و مشتاقين

آسفه أن أخيب ظنك يا عزيزتي في الموافقة على الثناء على شركة آدم للسفر و السياحة و من خلال تجربة شخصية لي معهم.
أولاً أود أن أنوه أني لم أسع في حياتي لقطع رزق زول/ه أو العمل على تحطيم نجاحات الأخرين/ات و لست باي حال من الأحوال من حزب "أعداء النجاح"!

كان لا بدّ لي من ذكر هذه المقدمة لأوضح أنه لا غرض شخصي لي للنيل من شركة آدم للسفر و السياحة، و لكن عدم الأمانة و النزاهة في التعامل من جانب هذه الشركة هي من إقتضت علي كتابة ما أوده بخصوص هذه الشركة.
أولاً تعاملت شخصيا و من خلال إتصالات تليفونية مع مدير هذه الوكالة "و ربما مالكها" و أتحفظ عن ذكر إسمه هنا و ذلك عندما طلبت مني إحدى الصديقات في السودان الحجز لها بواسطة هذه الشركة للحضور الى الولايات المتحدة للقيام بإجراءات التقديم للحصول على الجنسية الأمريكية. السبب الوحيد الذي دعى صديقتي الى هذا هو قرأتها لإعلان شركة آدم" الوهمي" في سودانيزأونلاين عن سعر لا ينافس للحصول على تذكرة سفر ذهابا و إيابا من أمريكا- الخرطوم و بالعكس بمبلغ 799 دولاراً فقط!

قمت على حسب رغبتها بالإتصال التليفوني بمدير هذه الشركة في ولاية غير التي أسكن بها"الشء الذي كلفني و الذي يبدو لي أنه يعمل لوحده في هذه الوكالة حيث ردت علي في مرة واحدة فقط سكرتيرة لا تعرف الكثير عن ما يدور في هذه الشركة و أحالتني الى المدير. و الذي كان في غاية من عدم الإهتمام و اللامسؤولية و كان يضعني في الإنتظار أكثر من خمسة أو ستة مرات في كل مرة أتصل فيها للرد على عدة مكالمات في وقت واحد و في النهاية يقول لي حأضرب ليكي بعدين لأني مشغول حسه و طبعاً ما كان بيتصل.

و في مرة تمكنت من التحدث معه و إعلامي برغبتي في الحصول على تذكرة عن طريق شركته و فاجأني بأن أقل قيمة تذكرة من السودان الى أمريكا و بالعكس هي بمبلغ 1200 دولار أمريكياً. و بالطبع قد إندهشت جداً من هذا المبلغ الذي يناقض إعلانه هنا في سودانيزأونلاين و للهوة الواسعة ما بين "إعلانه التجاري" و "الأمر الواقع"! و عندما أخبرته بذلك صرح قائلاً و بالحرف الواحد و الله على ما أقول شهيد أنه يفعل ذلك لأغراض تجارية و لإستقطاب الزبائن!

و قد إتصلت به عدة مرات بعد ذلك و تحت إلحاح صديقتي لعمل إجراءات الحجز و محاولة الحصول على سعر مخفض قليلاً للتذكرة إلا أنه كان يتعامل معي بنفس الإسلوب في كل مرة يضعني في الإنتظار للرد على خمسة أو ستة مكالمات و يختمها بانه مشغول جداً و مضطر لأن يقطع المكالمة و سوف يتصل لاحقاً و بالطبع لا يفعل!

كان لا بدّ لي من كتابة هذه التجربة الشخصية و التي أنا موقنة أنها تكررت مع الكثيرين/ات من قبل هذه الشركة و مسؤولها الذي لا يراعي أبسط قواعد التعامل مع الزبائن الذين يودون التعامل مع شركته و الشئ الذي أثار إستياءي أكثر هو وجود هذه الشركة في أكثر بلد في العالم يقدر أهمية إحترام العملاء and pays extraordinary attention to deal with clients in a certain level of respect, curtsey, and profession
and I want to say to him it is very dishonest to misinform and mislead people to gain short-term success and what you are doing will not yield you any thing but loss of credibility and eventually clients

قطعت جهينة قول كل خطيب--------------وبلاش رومانسيات فى البزنس business is bussines no place for emotion......

يازوله ثلاثه أثنين واحد وبالعكس أولا مسجل عليك أندار لأنك عملتى أعلان مجانا لآدام ..
ثانيا بائن ناس بكرى ديل شبعانين طلبنا السعر للأعلان القدر بتاع سودانير ده ، لكن لم يحدث أن وصلنا رد ، وخائفين نضطر الى أنزال أعلان غير مدفوع القيمه ونحصل على كرت أحمر
(بس)!!!

عارفة يا زولة 123

انا لاقيت ادم زاتو السنة الفاتت في مكتبنا في جدة

اصلا هو امريكي من اصل مصري وفي علاقة في العمل بين وكيل لشركتنا

وادم للسياحة في عمل العمرة السياحية كاكبر وكيل في امريكا

اها ادم ما طلع سوداني لسع في امانته للمنبر





وتحيا مصر وتحيا الوحدة العربـــــــــــــية

أساسي
تعرف قلت قبل شوية لندى اننا فتنا المصريين بفخر قبل ما اقرا مداخلتك
وسبحان الله طلع الراجل مصري يعني الريادة لسة ليهم.
اها والحج ده بيتفق معاهم على السعودية وبعدين يلقوا نفسهم في الصحراء الغربية ؟
ما بعيدة كان كده
أسوأ حاجة في الدنيا الكذب وهي فعل دنيء ينتقص الكثير من قيمة الشخص وللاسف الكذاب آخر زول بيكون حاسس بيده وفاكر نفسه أفلح من الناس التانيين.
اها في مفاجأت تانية عن آدم ولا نشوف عشان نكمل الموضوع بدونه
ما يقوم يطلع منتحل شخصية روضة هو كمان

تاج السر
أنا عارفاك شمتان, وكل شمتان بيجيه يوم ما تستعجل
عدم تفرغ بكري ده شكله أكبر عامل سلبي في الموضوع
طيب ما ممكن بالتلفون لو ما بيشوف الايميل؟
لمن تنزل الاعلان كلمنا عشان نحتفل بيه
قال قال آدم

ombadda

Quote: وبلاش رومانسيات فى البزنس

حاضر يافندم
أي اوامر تانية سعادتك تأمر بيها؟

ندى الحبيبة
لاكن ما باسلك...تعرفي وقع لي كلامك ده زي حاجة كدة بيسموها شاكوش
وما قدرت اختار الانفعال الصح قعدت اضحك
ولمن وقفت نوبة الضحك جيت راجعة اقرا الكلام تاني
قلتي لي أدم طلع نصاب؟؟؟ مبااالغة
وانا متعبة نفسي وقاعدة ادعي ليه ولي عياله وهو يغش في المساكين ديل؟؟
طيب يعني ما يعملها محبوكة شوية ويقول السعر 799 $ بدون المصاريف ولمن تجي تقطعي التذكرة يقول ليكي 401 $ مصاريف زيادة
حسي ما عارفة اقفل البوست ده حزنا على خيبة الامل في ناس آدم ولا اكمله لعل وعسى في شركات كويسة تانية تتشجع. لاكن ما ظني بعد كلامك ده.
ألز حاجة في الموضوع انه واضح وصريح وبيقول ليكي

Quote: صرح قائلاً و بالحرف الواحد و الله على ما أقول شهيد أنه يفعل ذلك لأغراض تجارية و لإستقطاب الزبائن!

يعني فتنا المصريين

الدكتورة الرائعة ايناس
شكرا للموضوع الظريف و كعهدى بك دائما تاتينا بمواضيع و مداخلات مختلفة و رائعة
مشكلة الدعايات فى سودانيزاونلاين مشكلة عويصة ...فالدعايات فى سوداننا تحتاج الى الواسطات , المعارف و المحسوبية
ودى مشكلتنا.........
صاحب ادم للسقر صديقى ويقيم معى هنا لكنه ليست عضوا بسودانيزاونلاين رغم انه يمتلك قلم جرا و مبدعا...

بكري
والله نحن سعيدين بتشريفك البوست ده وياريت تورينا بمزيد من التفصيل المشاكيل البتعوق الاعلان في الموقع.
اعتقد ان اي شركة تجايرة تعلن في موقع ستستفيد فائدة كبرى ولا أفهم لماذا الواسطة وانت تقدم لهم خدمة كهذه على طبق من فضة. لازم نغير مفاهيمنا شوية ونتعامل اننا الطرف القوي. ليه ما بتنشر احصائيات عن موقعك , يعني عداد في بداية الصفحة يبين عددة الزوار وكم نقرة في اليوم عشان أي زائر يعني انتشار الموقع وبرضو تبين ده في صفحة اسعار الاعلانات.
ملاحظة
كلم ناس آدم يدوا الناس التذكرة بنفس السعر المعلن عنه في الموقع
وقول ليه اي تغيير بيضر بيه كتير, ولسة عندنا أمل فيه.

تحياتي

Quote: " أرررربو التلتين وياويلي من التلتين "

عمر الفاروق
يا مسخوت ناس المكتب جو جاريين وانا فاكي الضحكة
شو عمو بدك العمر يرجع لا ورا

كبيرنا الذي علمنا السحر ود الشيخ ..
لك شو حبيبي الزلمة ادم وطلع نصاب والصبايا اشتكو كتير عمو ..

Quote: شو عمو بدك العمر يرجع لا ورا

شنو يا كبيرنا !!! شكلك بتلعب تحت ال 60

ود الشيخ وعمر الفاروق
تقبروني شو مهضومين !

سلام
والله كلام مشجع بمعنى ممكن نبدأ بافتتاح الشركه

قريبا


قاسم

زولة الظريفة
تعرفي اسم ادم دا زااااتو ساحر
انا غايتو تعبيراً عن اعجابي بيهو
حاسمي ولدي الجاي ادم

الجندرية الحبيبة
تعرفي لو آدم سمع كلامك ده ما بعيدة يديكي انتي زاتك تذكرة مجانية
ومن عنده يبيع التذاكر للناس بسعر اقل من السعر المعلن عنه
بس عشان خاطر عيونك

قاسم مهداوي
كلام كبير أوي
افتتح انت وما عليك بالباقي

اسمعي كلامي وخلي الموضوع ده يغطس قبل يوم 10 فبراير وماتشوفي بكري معاك هنا - ده بكري عضو المنبر لكن في واحد تاني بتاع الادارة.

سلام

Quote: لحد ما الله يفتحا علي واعمل شركة خاصة بي واجي أعلن عنها هنا في كم زول معاي؟ zola123

زولا 123

أسمعيني كويس : أنا من أسع معاك حتى قبل ما تعلني عنها

وبعد داك ان شاء الله ربنا يفتحها عليك !!!!!!!.

رايك شنو : شريك ينفع واللا موظف فيها ؟؟؟؟؟؟؟.

يديك الف عافية .

خضرعطا المنان

Quote: ود الشيخ وعمر الفاروق تقبروني شو مهضومين !

وبعد يوم عشرة حقوقنا بتلحقنا (لووووووووووووووووووووول)

Quote: لاكن ما باسلك...تعرفي وقع لي كلامك ده زي حاجة كدة بيسموها شاكوش وما قدرت اختار الانفعال الصح قعدت اضحك ولمن وقفت نوبة الضحك جيت راجعة اقرا الكلام تاني قلتي لي أدم طلع نصاب؟؟؟ مبااالغة

الاخت زولا
لقد تعرفت علي ادم للسفر والسياحه من خلال هذا الموقع ولي معهم تجربتين واشهد الله الذي لا اله الا هو اني وجدت منهم كل تعاون وكل تقدير واهتمام ليس هذا فحسب فحتي عندما اردت العوده الي السودان واجهتني بعض الصعوبات في حجز العوده من السودان فبواسطه الاخ نادر (ادم للسفر) تم تسهيل امور عودتي
اما بخصوص الاعلان $799 والله انا اتصلت بهم ووجدت نفس ما قيل للاخت ندا امين وقيل لي علي ما اذكر ان هذا العرض كان ساريا لفترة محدده وافتكر الاخ بكري لم يغيره لمشغولياته
وفعلا ده كان حاصل في امريكا في تلك الفترة حيث ان معظم شركات الطيران كان لديها تخفيضات مهوله للسودان .
هذا ليس دفاعا عن ادم للسفر والسياحه والتي اريد ان اؤكدان ليس لي اي معرفه شحصيه بصاحبها الاخ الخلوق والذوق نادر .

والتحيه لك يازوولة

Bakhaf
اتفق معك... انا برضو عندي تجارب كويسه معهم... وبالمناسبه آدم للسفر ده مش في ارزونا بس.. في وكالات في تكساس وفلويدا ويمكن حتات تانيه كمان..
سلام

جيت أشوف البوست ده شغال ولا لأ
لو ما طردوني باجيكم راجعة بالردود