من أجمل ما قيل عن عيد الأضحي و الكريسماس معا

هي قصيدة للشاعر السوداني كامل عبدالماجد أريد إشراككم فىمتعتها

تاني قاموا علي الشوارع جملوها
بي شجر ضواي ملون زينوها
بي صور براقة زاهية حفلوها
ودوروا المزيقة برة
راقصة صداحة وشجية
كل زول لي زول بريدو ربط هدية
وإنت يا جبل الأسية
منك الحبان مسافة
والبلد نائية وقصية
بس تأمل كم كريسماس مروا بيك
وعيد ضحية
نوروا الليل بالكهارب
وإنت يالطير المسافر
فكرك الليل كلو هارب
طاري للبلد البعيد اللون سماهو شفق المغارب
كنت بين أحباب زمانك
هاني بي صفو المشارق
وباللقاءات الندية
بس تأمل كم كريسماس مروا بيك وعيد ضحية

و.....
نواصل

ونواصل
فى الحواري الما ها هولك
تمشي والناس ينظرولك
عنك يهمسوا وإنت ساهي
ولما تنظر يبسمولك
كل زولا حاضنو زولو
وإنت وين بالله زولك
فارقك خلاك وليهو
شوقك الساطع رسولك
وليهو تحنانك هدية
بس تأمل كم كريسماس مروا بيك وعيد ضحية
فى المحطات البعيدة
تمشي خطواتك تألم
مرة تلقي البدي كلمة
ومرة ما تلقي البكلم