عطبــــــــــــــره

خلفيات
....
....
عطبره
....
....

تقع مدينة عطبرة على دائرة العرض 14,17 شمالاً وعلى خط الطول 59, 33 شرقاً وهى على إرتفاع 350 متراُ عن مستوى سطح البحر ... كما تقع المدينة عند إلتقاء نهر النيل برافده العطبراوى ... وتمثل موقعا جغرافياً ممتازا قامت عليه المدينة الى الشرق من نهر النيل والى الشمال من نهر عطبرة ... وهى تبعد عن مدينة الدامر 13 كلم ... كما تبعد المدينة بنحو 310 كلم شمال الخرطوم العاصمة ...وعلى مسافة 611 كلم وعلى مسافة 611 حنوب وادى حلفا 474 كلم غرب مدينة بورتسودان .... وتعرف بعاصمة الحديد والنار وهي إحدى المدن العمالية الشهيرة وتقع عند ملتقى نهر النيل بنهر عطبرة وتمتاز بالعلاقات الاجتماعية المتفردة وتقع على بعد «310» كلم شمال الخرطوم وتمثل المدينة مركزاً تتجمع فيه وتتفرع شبكة السكك الحديدية الى كل من مدن الخرطوم وبورتسودان ووادي حلفا وكريمة ويوجد بها نتيجة لذلك رئاسة السكة حديد وورشها الرئيسية .

مدن .....

أما مدينة الدامر فهي العاصمة وتقع على بعد 300كلم شمال الخرطوم ومن اهم معالمها خلوة المجاذيب التي تأسست قبل أكثر من 300 عام لتحفيظ القرآن وهي (إحدى أشهر المدن الدينية في السودان تاريخياً). كما يوجد بها سوق شهير وهو سوق السبت اضافة الى مركز لتجارة الجمال وتصديرها ، أما مدينة شندى فهي تقع على بعد 170 كلم شمال الخرطوم على مقربة من معظم الآثار بالولاية بينما تقع مدينة بربر على بعد 345 كلم من الخرطوم ويوجد بها عدد ضخم من الآثار الإسلامية وأسس بها أول مكتب بريد في السودان وكانت مركزاً مهما خلال العهد التركي الأول والحكم الثنائي البريطاني المصري في السودان وبها العديد من الآثار التركية وتقع مدينة أبو حمد على بعد 300 كلم من عطبرة وتشتهر بزراعة التمور

.....تظهر الارض شبه مستوية من موضع المدينة ولكنها ترتفع قليلا في اجزائها الشرقية والشمالية عن مناطقها الآخرى ,,, وتتدرج في الإنخفاض نحو نهر النيل وعطبرة ,,, حيث الخضر وكثرة الأشجار ,,,بينما يسيطر الجفاف على المناطق الشمالية والشرقية ,,,, التى تبعد عنها ....يمثل حى الداخلة النواة الأولى في المدينة الحالية ...والتى اختيرت لكى تصبح موقعا حربيا إستراتيجياً بعد سقوط الحاميات العسكرية ,,, في ابو حمد وبربر ...فى فترة إعادة الفتح ,,, عام 1898 لانها كانت موقعا دفاعيا ....تعتبر فترة بعد عام 1950 هى مرحلة التطور الحقيقى في المدينة وخاصة في إنتشار الاحياء السكنية ,,, الجديدة لاول مرة والبدء في إعادة تخطيط القديمة ...وهكذا ...
....
....
نهر عطبره
....
....
نهر عطبرة عند بلدة عطبرة. وقد اكتسب هذا النهر اسمه الذي يعنى الأسود من قتامة لون مياهه في فترة الفيضان لكثافة ما تحمله من طمي.
وينبع نهر عطبرة من شمال هضبة الحبشة وله رافدان رئيسيان هما نهر ستيت ويبلغ طوله حتى مصبه في نهر عطبرة نحو 1215كم، وبعدها يقطع نهر عطبرة نحو 514 كم حتى يلتقى بالنيل الرئيسي عند بلدة عطبرة السودانية التي تقع إلى الشمال من الخرطوم بنحو 310 كيلو مترات. وتبدأ منابع نهر ستيت من شرقي بحيرة تانا، وهو المسئول عن الجانب الأكبر من الطمي الذي تحمله مياه نهر عطبرة. والرافد الثاني هو بحر السلام الذي تبدأ منابعه من شمال وشمال غرب بحيرة تانا. ويبلغ الإيراد المائي السنوي لنهر عطبرة نحو 12 مليار متر مكعب عند بلدة عطبرة السودانية، يصل منها نحو 11.5 مليار متر مكعب عند أسوان.(16) ونهر عطبرة موسمي الإيراد مثله في ذلك مثل النيل الأزرق، بالإضافة إلى أنه لا يملك بحيرة مثل بحيرة تانا التي ترفد النيل الأزرق بإيراد ضعيف لكنه منتظم نسبيا بالمقارنة بروافده الجبلية. ولذلك فإن نهر عطبرة يصبح بائسا وتكاد الصحراء تبتلعه في موسم جفافه من يناير إلى مايو.
....
....
العطبرواى
....
....

هو حسن خليفة محمد الفضل ولد في مدينة عطبرة ودرس المرحلة الابتدائية بمدرسة عطبرة الشرقية.
بدأ حياته الفنية في مدينة عطبرة عام 1935م بترديد اغاني الحقيبة .
وأول اغنية خاصة به كانت أغنية (الشادن المحجور – 1942م ).
له حوالي مائتي أغنية واناشيد وطنية اشهرها اناشيد (الوطن العزيز 1945م – غريب بلدك 1945م – لن يفلح المستعمرون 1946م – انا سوداني 1946م – لن أحيد 1950م ).
واشتهرت له من الاغاني العاطفية الخفيفة ( ضاعت سنيني – مامنظور ينسانا – يازاهي ماتزورنا – القلوب مرتاحة – مالك مااعتيادي – عتاب )
عضو اتحاد الفنانين ومعروف عنه انه شاعر كتب العديد من القصائد الفنية .


....

..............
أستراحة غنائية
.....

عطبرة

اشعار : جمال عبد الرحيم

الحان : طارق جويلي

من قمت من بيتنا ومشيت

بطاقتي صورة مصغرة

شايل معاي شنطة صفيح

حزمة هموم

ولدا متين بقي للسفر والاغتراب والدردرة

كان الزمان لسة رضى

والناس ظروفها مقدرة

وانا في القطار اصغر صبي

امال تفيض متفجرة

لما القطار صفر وقف

بهرتني صورة عطبرة

دي محطة الوطن الكبير كانت تضج متحضرة

ونزلت ماشي على الرصيف

اغبش هدومي مغبرة

الهجرة من زمناً قديم زي ساقية فينا مدورة..

عائلة ابوي عبد الرحيم من حلفا جات متهجرة

اديلة او والله رن فجلي

بلد نفاي اموقا كجلي نورين موقو

كن جواب كفاي

دقيتني نفص كورين لوجي

نفس القطارات والسكك

يوم مقبلة ويوم مدبرة

كان عمري 12 سنة

شايل التقيلة مبكرة

رحال بدون زاد لا متاع

كان لي كتاب ومفكرة

لميت شتات بعض الحروف

وقرايتي تبدو مكسرة

من قمت من بيتنا ومشيت

بطاقتي صورة مصغرة

شايل معاي شنطة صفيح حزمة هموم

ولدا متين بقي للسفر والاغتراب والدردرة

سلام من دامر المجذوب
ماتنسي يا الملك اغنية انا عطبره ثورة براكين الغضب ولعتقد انها لمحمد سلام

عبد الله محمد ....

Quote: مدينة الدامر فهي العاصمة وتقع على بعد 300كلم شمال الخرطوم ومن اهم معالمها خلوة المجاذيب التي تأسست قبل أكثر من 300 عام لتحفيظ القرآن وهي (إحدى أشهر المدن الدينية في السودان تاريخياً). كما يوجد بها سوق شهير وهو سوق السبت اضافة الى مركز لتجارة الجمال وتصديرها ،

....
سليل مدينة الدامر ....
....
شكراً...على الزيارة اولا ....تانيا

Quote: اغنية انا عطبره ثورة براكين الغضب

...للأسف ليست عندى الان ....ارجو أن تمدنى بها ....عاجلاً

.....
وكل سنة وانت طيب

ناجي يا ملك
كل سنة وانت طيب وحبينا نعيد عليك ونبل الشوق ...
اقتراح صغييييييييييييييييير كده
ياريت لو تخلي خلفية موضوعك اغنية قطار الشوق اعتقد انها اكثر تعبيرا خصوصا
نزور بلدا حناااااااااااااااااااان اهلا ترسي هناك ترسينا ..
رايك شنو ؟؟؟

الشكر لصاحب البوست
والتحية لعطبره مدينة الحديد والنار وابناء عطبره

واصدقائى اهل عطبره
مهندس زكريا سليمان السقد
الاستاذ المحامي معاوية سليمان السقد
مهندس خالدابوالقاسم ابوالسيد
دكتور هشام البدوي
استاذ عادل عبدالعاطي
مهندس اشرف ...
مهندس اسامه حسن حمد
دكتور عمر الفاروق ...
دكتور ياسين حمدان
واهلي واقاربي اسرة الشهيد امين بدوي

لهم التحية والتجلي

الملك يا ملك
كل سنة و إنت طيب و عطبرة بألف خير
تشكر على البوست الجميل ..

أرجو أن تحدثنا عن أحياء عطبرة الأخرى لو أمكن ..
أنا من مواليد عطبرة حى القيقر ( بالقرب من عطبرة الأميرية و الثانوية الحكومية ) ..
ثم سكنت في حى المزاد بالحصايا
ثم الخرطوم البراري ..

عطبرة تمثل لي كل شيء في حياتي ..
هي عشقي الدائم .. و حلمي المستمر ..
واصل
تسلم

أبو جهينة ...
...
تسلم وانت بالف صحة وطيبة وهناء دوما

....
....

Quote: أرجو أن تحدثنا عن أحياء عطبرة الأخرى لو أمكن .. أنا من مواليد عطبرة حى القيقر ( بالقرب من عطبرة الأميرية و الثانوية الحكومية ) .. ثم سكنت في حى المزاد بالحصايا

...
...
انا على التصوير والصور
...
...
وانت والبقية عليكم الباقى
....
....

Quote: الشكر لصاحب البوست والتحية لعطبره مدينة الحديد والنار وابناء عطبره واصدقائى اهل عطبره مهندس زكريا سليمان السقد الاستاذ المحامي معاوية سليمان السقد مهندس خالدابوالقاسم ابوالسيد دكتور هشام البدوي استاذ عادل عبدالعاطي مهندس اشرف ... مهندس اسامه حسن حمد دكتور عمر الفاروق ... دكتور ياسين حمدان واهلي واقاربي اسرة الشهيد امين بدوي لهم التحية والتجلي

....
....
والتحية لك اولاً واخيراً
....
....
لأنى أعرف معظم من زكرت ....لهم جميعا التحية

....
....
طارق اسماعيل ...كل سنة وانت بالف خير

الملك
وانا كمان احييهم معاك .. بعضهم كان دفعتي في المتوسطة (سابقا) والثانوي

عمر الفاروق

....

Quote: اقتراح صغييييييييييييييييير كده ياريت لو تخلي خلفية موضوعك اغنية قطار الشوق

ممكن
....
انا حاعمل خلفية الصفحة التانية أغنية قطار الشوق

....
عشان الصور كتيرة والبوست حيشيل اكتر من اغنتين

....

بس صبرك على شوية

....
....
وكل سنة وانت بالف خير

العزيز ناجى
الشوق بحر
عطبرة كيف؟
انا قلت ليك صور لى صفارة السكة حديد؟؟
قلت ما فهمتا..

بالله كيف عطبرة وكيف اهلها الحنان..

والداخلة الطيبة باهلها..

انا بقترح يكون خلفية البوست الصوتية صفارة السكة حديد
التى تنام وتاكل عطبرة بها وعليها..
المرة الجابة لما اجى
لازمن نمشى عطبرة..

ولو ابو جهينة موجود نعمل
رحلة بورداب عطبرة.. ونأجر درجة تالتة فى القطر نعلق فيها شعار بورادب عطبرة

يلا اى زول من عطبرة يقول هوى
كيف العيد.. مشيت زرتا ناس السامراب؟

...
...
بيـــــــــان
...
...
كل سنة وانتى بالف خير ..
...
...
اسى أنا حاسوقكم رحــــلة بالكاميرا

...
لى هناك

....
تصدقى ...
....

أكتر زول متمنيهو فى اللحظة دى ....يخش البورد

عادل عبد العاطى .....مؤسس موقع مدينة عطبرة على شبكة الانترنت

....
اول موقع لمدينة فى السودان على شبكة المعلومات
....

لكـــــــــــــــــــــــــــــــــــــــــــــــــن

....

هوووووووي
يا بنت البيوت البيوض وتحياتي للجميع

------------------------
محمد عبد الله

الفظيـــــــــــع

....

يا ود عطبرة

....

كل سنة وانت طيب

وكل سنة وانت طيب يا "ملك" والتمنيات لضيوفك بدون فرز !
ما تنسى صور امبكول

------------
محمد عبد الله

Quote: ما تنسى صور امبكول

....انت حتقول ....لى

...
هو أنا عندى غيرها

...

الفظيع

...

أدبره حي السودنه

اتبرة
عطبرة
ادبره

....
....

فاضل الحلو

....
....
بتعرف حى السودنة كويس لانى حانزل لى ....مسابقة صور ...

....
....

الاخ الفاضل ناجى تحياتى
هيجت الشجون بذكر عطبرة
سوف استمر معك فى ذكر الكثير هذه الحبيبة
عطيرة الجمبلة بلد الحبايب
عطبرة الطفولة والصبا
تتكون عطبرة من مجموعة من الاحياء من الناحية الجنوبيةالغربية عند ملتقى نهر عطبرة والنيل حى اشلاق الشرطة ومدرسة عطبرة الثانوية الشهيرة وشمالا حى العمال وورش السكة حديد وحى السودنه وهو من الاحياء التى بناه الانجليز لسكن كبار الموظفين وشمالا محطة السكة حديد والداخلة والسيالة وشرقها حى الامتداد الشمالى وجنوبة المنطقة الصناعية وسوق عطبرة وحى المربعات غرب وحتى امبكول
من الناحية الشرقية حى الموردة والطليح وحديثا حى الوحدة والكبرى الجديد كل ذلك على ضفاف نهر عطبرة
وشمال من ذلك حى القلعة والدرجة والحصاية وشرقة الامتداد الشرقى ومعسكر سلاح المدفعية وحى الجيش ومن الاحياء الجديدة حى المطالا بمربعاتت التى تنتهى فى مربع 18 وهناك احياء مازالت جديدة حى الثورة والاندلس وشرق كل ذلك يقع مطار عطبرة

صلاح عبد الله محمد...
...
...

Quote: سوف استمر معك فى ذكر الكثير هذه الحبيبة

...
...
واحتاج الى من ينعش ذاكرتى ...حقاً ...مرحبا بك دوماً
...
...

...
اهم ما يميز عطبرة ...هى العلاقات الاجتماعية التى تربط بين أفراد مجتمعها ...
...وسكانها يعشقونها ....الى حد الجنون ...
...
...
ساتصطحبكم مع ...فى جولة ليوم واحد ...الى هنالك ...ببعض الصور

...
...
ربمـــــا ....أستطيع التغلب على لوعة الحنين ....الذى يربطنى بها ...انعش ذاكرتى
...للحديث

...
وهذه دعوة منى
...

...
...

السكة حديد ....الاشلاق

...

...

الجامع الكبير ....الركن الجنوبى الغربى ...لسوق مدينة عطبرة ....وحى المربعات

ميدان المولد
....
سابقاً ...موقف الدامر حالياً ....الجزء الايسر من الصورة ديوان الزكاة ...السوق

....
التكاسى لم يتغير لونها بعد ....
....
فى الخلف يقبع ....سوق الذهب ...وهو شبه بمجمع للاوقاف ...بابو جنزير

....
ااشوارع ....تبدو على شاكلة واحدة ....تبدأ فى الإرتفاع ...والانخفاض ....فى ساعات الحر ...تخلو من الناس ...
....اهم ما يميزها ...كمية الأشجار ......والمزاير (سبيل المياه) توجد صورة لسبيل تاتى لاحقا ...واخرى للأغنام ...ايضاً
صورة لشارع فى المربعات

....
دائماً
....

يا ملك
ملك عظيم يازول

عطبرة

لو بدينا معاك بنبدأ من البيلي والفريد
(طقش ولا ما طقش)
لو مرينا السوق
أخدنا شهادة
( صبي موية في مطعم الفردوس كامل الإجازة)
وما أدارك ما مطعم الفردوس
زي رقاص البندول من تسعة صباح حتى عشرة مساء وبعدها السينما الوطنية دور ثاني وبعدها طرحة للحصايا
(طقش ولا ما طقش)
(بياع بصل في ملجة سوق الخضار كامل الإجازة)
أول من أخترع بيع البصل بالصحن وتشغيل الصبيان (ياعمو هاك)
أسأل ود طلوب لو أمد الله في أيامه وله الرحمة إن سلم الأمانة
(طقش ولا ما طقش)
المدارس من مدرسة الحفر لي مدرسة النهر
(طقش ولا ما طقش)
في الناس من الأمين ود فور والشيخ ودفور ولاد سكينة بت ألمين
وقريبنا علي ممتاز وقريبنا فضيل وجارنا محمد عوارة أبوجنزير
وقعدة يامولاي وشراب شاي مع الوش في القهوة والما عجبو منفاخ العجلة جاهز
وما تنسى حاج الركز
(طقش ولا ما طقش)

وشهادة ثانية
وأنا في صف أول ابتدائي رافقت محمد أعمى عطبرة الشهير في مناسبة زواجه من عشوشة بنت الشيخ جارناوزوجته مدينة، كنت أمسك يده وأقوده في الطريق ولما كان يغيظني بمعرفته للشوارع كنت اتجه به مباشرة لعمود الكهرباء... تصور ... يقول لي يا حبيبي كده العمود يضربنا كهرباء...
دي شهادة يا عطبرة

النمرة المخرومة
(طقش ولا ما طقش)

Quote: (طقش ولا ما طقش)

....منتظرك من زمن
المسافر ....كل سنة وانت طيب ....وخد راحتك بالكامل ....

...(طقش ولا ما طقش) ....عجبتنى العبارة .....

...
زكرتنى بعبارة ...قديمة ...كانت فى متناول الجميع بعطبرة

......
(بتطول وتاخد مدة ) واشتهرت زمن الثانوى وبقت أغنية بنات فى الحفلات ...
.....
انت قولتا من زمن عبارة طقش واللا ما طقش .....
.....
نحنا من زمن بتطول وبتاخد مدة .....وتغسل صحن العدة
.....
عطــــــبرة (حاجيك بكرة) لبقية الصور ....ولملمة الذكريات ...

الصباح طلع

يا ملك

أسعدتنا بالصور من عطبرة الحنية
دار فيها الغنماية حرة تدخل وتخطف وتجرى
ولا حد يقول الغنماية دي جنت
حرية غنماوية للخطف


(بتطول...
( وبتأخد مدة
(ورأسك يبقى كدة
( ... وتجي راجع تغسل العدة
هذه جديدة

في زمنا
السوق كله يصيح

قرع
قرع

الما عارف يقول قرع
ومرة مرة بقولوا ياتيتي
يا تيتي الحاصل بي سببو انتي

الفريد هو أغطية زجاج الليموناتا والبيبسي
والطقش لما تضربه بالجلية وتطلعو بره المثلث
( طقش ولا ما طقش)

...

المسافر

...
ده شنو
...

انت طلعت اكبر منى ...شوية

....

Quote: بتعرف حى السودنة كويس لانى حانزل لى ....مسابقة صور ...

اخي المك

تحياتي وكل عام وانت بخير

وفي انتظار المسابقه

ناجى
ان شاء الله تكون صورت
مدرسة عطبرة بنات؟

يا سلام عليك
الصورة فى الكبرى حاجة كدة
انا زمان كنت بقيف فى حتتك دى واتفرج فى التقاطعات وكان بيجينى احساس
غريب جدا بالامتلاء..

يا ناجى كيف اخبار اهلنا وحينا..

د. بيان
تحياتي

ولو ابو جهينة موجود نعمل
رحلة بورداب عطبرة.. ونأجر درجة تالتة فى القطر نعلق فيها شعار بورادب عطبرة

موجود و جاهز للرحلة حتى و لو بدرجة رابعة أو مسطحين فوق

سنعود بذكريات عن عطبرة لاحقا

يللا يا ناس عطبرة تعالوا هنا

...
أبو جهينة
...
ما تنسى الذوادة ....فطيرة بلح

...

Quote: ناجى ان شاء الله تكون صورت مدرسة عطبرة بنات؟

...
...
الوقوف على الاطلال
...
الاهل تمام
...
الكهرباء بقت شغالة تش ...وحتى البوابير الجديدة ما ركبوها كلها
...
...
وووووتابعى

فاضل الحلو ....
...
خليك معاى

...

Naji
Go to nadyAlhadaf and say hello to everyone there
I will be back in Arabic
salam

نادي الهدف دا نادينا وناجي لوزم يمشي ولو كداري ويسلم على (كداري)
تحياتي يا "ملك"
الصور روعة وفي إنتظار المزيد

الفظيع ...
...
شكلك بتعرف عطبرة ...كويس جداً

...
طيب انت كنت وين من زماااااااان

أحمد البشير
....
وانا بإنتظارك ايضاً ..
....

Quote: نادى الهدف

؟؟؟

ياالملك والله بكل اسف ماعندي واتذكرت كان بغنيها محمد سعدان
سؤال هل فعلا والد صلاح كفتيره شتت العيش في الشارع علشان الغنم تستقبل نميري

يلاحظ حاليا الهجمة الشرسة من كل ضواحى عطبرة على الالمدينة بعد ان هجرها اغلب الناس القدام
تلاحظ ذلك بشكل واضح فى السوق
اساس سكان عطبرة هم اهل كل كل السودان خاصة الشمال يعنى انت ممكن يكون جاك من اى قبيلة سودانية وتجد الحياة تجرى بشكل منساب ن الجميع فى مستوى اجتماعى واحد ولكن اخيرا بعد الهجرة والاغتراب بدات تظهر بعض الفوارق ولكنك لاتحسها فى الشارع
الاغلب يعيش على السكة حديد وبعد ان انتهت ظهرت الهجرة للخرطوم فى الاغلب تجد لعديد من الاسر قد نزحت الى العاصمة التى هى السودان والخدمات

مطلوب تعليق

...
فقط

Quote: سؤال هل فعلا والد صلاح كفتيره شتت العيش في الشارع علشان الغنم تستقبل نميري

...
محمد عبد الله
...
كل ما ازكره انها رواية ترتبط بعطبرة ...دائماً ...لكن صحتها من عدمها ...
...
يمكن لأحد أخر الاجابة ؟؟؟ انا اول مظاهرة أطلعها كانت فى عهد الاحزاب ...
وكنت فى سنة تانية أبتدائ
...

...
الأسفلت او ما تبقى منه...ميدان الكورة اللساتك مقاعد اللوج ....مدرسة النيل .......

مطلوب تعليق

...
فقط



توفي عصر امس شارع ظلط يمدينه عطيره اثر ردميه ترابيه من الجانبين لم تمهله طويلا

رحم الله الفقيد واهم اهله الصبر

...
وإذا كنت مغادراً عطبرة

...
لابد وان تمر بالنفق وللأسف الزلط أصبح متاكلاً ....والكوبرى أصبح قديماً ...واصبح أستخدامه مقصورا على الذاهبين الى مصنع ماسبيو ...كدى خلونا نمشى البحر ...او بالأصح النيل ..زمانك فى العيد والمناسبات (الختان ,,,والحنة) جرت العادة انو الناس تمشى النيل ...وينزلوا النيل .....ووووو
وعلى حسب ما رايت فالعادة دى ما زالت باقية ...حتى اليوم ....بموازاة شاية المغرب

...فاضل الحلو ....

....
الفائز بالتعليق

....

لهذه الصورة بدون منافس

....

اطلب الجائزة وانا شبيك لبيك

عطبرة






ناجي

ناجي

إنت طلب الشية والفول فى عطبرة بكم ؟

....
المكاشفى عارف ألذ ما يمكن تناوله فى عطبرة ...العيش (الرغيف)
...
حاااااف (قريد يعنى ) بعد ما تضرب عيشتين بى بعض ....لأزالة الدقيق ...وتقول بسم الله ووووو
...
لكن بالمناسبة الحلوة دى انا مشيت فى عيد الأضحى ...
...

....
النيل ...وبعد إلتقاه بنهر عطبرة ....فى هذه النقطة بالتحديد
...
نهر النيل بموازاة مدينة عطبرة ...نادى المدفعية ...يتوسط المشرع القديم للبنطون حيث أقف انا ..والمشرع الجديد للبنطون (الفاضلاب) حيث يمتد البصر ...

....
بالمناسبة الفاضلابى وين ؟؟؟؟

ممنوع الاقتراب والتصوير




غايتو يا ناجي سهلت مهمة من أراد ضرب عطبرة بصواريخ توما هووووك

Quote: غايتو يا ناجي سهلت مهمة من أراد ضرب عطبرة بصواريخ توما هووووك

....
على العكس ...انا صعبت عليهو المهمة ...شديد
....

ناجي

مصنع اللسمنتي وينو ؟؟؟

عطبرة انجبت الكثير من الشخصيات التى برزت فى مختلف المجالات السياسية والرياضية والثقافية والفنيه اضافة الى ظرفاء المجتمع المحليين
المجال متروك للاخوه للتعريف بعطبرة اكثر وتاريخيا
اتبراوى باعتبارك كنت رياضيا بعطبرة عليك بهذا المجال
عادل عبد العاطى باعتبارك خضت فى مجال التنظيمات السياسية عليك بهذا المجال تاريخبا ومطلوب شخص اخر بوجهة نظر مختلفة عن عادل ليسرد المسيرة التاريخية اضافة لعادل
والاخ المسافر الحياة الاجتماعية
وكثيرون فليدلوا بزوايا مختلفة عن هذه الحبيبة

يا ملك

التعليق

النفاج الهناك السداه منو

كنا بنعبر بيه وغلى امبكول وشارع كسلا والمربعات والموردة والقلعة والجو والخدمات والإمتداد الشرقي محطة اللفة...

وياناس بنطون الفاضلاب ، كانت هنا ازيار باردات راحت فين

ياملك

شفت الظلط المقلع ده
والكبري المضروب أزرق ومكعكع ده
الشباب بقيفو هنا لما يتكعكعو ... مقابله مدرسة نمور هائجة..

المسافر

....

لسه ما زالت الصور فى التحميض ....

....
السوق والسكة حديد وسوق الرواكيب .........وووووو

....
واصل

Quote: عادل عبد العاطى باعتبارك خضت فى مجال التنظيمات السياسية عليك بهذا المجال

؟؟؟؟

اتمنى ذلك ....وحسب

Quote: مصنع اللسمنتي وينو ؟؟؟

...
جاييك ....
...

الاخ ناجى الملك
التحايا والود

لك الشكر الجزيل على هذا البوست الجميل
والصور الرائعة التى أثارت شجونى وذكرتنى
بدروب كنت اقطعها .........................
وكلما ذكرت كلمة عطبرة تحسست ماضى ايامى
الجميلة...
عطبرة دائما جوة القلب وجوة العين ...

أحمد داود

الحصايا بشارع الشهدا

الملك الملك

تحياتي

تصدق الصور دي كلها مختزنة في الذاكرة .. و بمجرد رؤيتها هنا .. حدث لي ما يشبه الإغماء و الله و بكل صدق .. خاصة منظر النفق و منظر النيل بالقرب من نادي المدفعية و الجامع الكبير ..
تشكر كثير ..

لنتحدث قليلا عن بعض الذكريات التي هيجتها هذه الصور.
حى القيقر .. حيث رأيت النور و ترعرت فيه ..
كانت الهواية هي تعلم قيادة العجلة ثم تعلم السباحة ..
ميدان الأميرية كان له الفضل في أن نتعلم العجلة ..
العجلة ماركة ( رالي ) كانت بمثابة اللندكروزر الآن ..
أكبر مورد للعجلات كان محلات ( الطير الأبيض ) .. و كان العمال و الموظفون يشترونها بالتقسيط المريح ( كان ثمنها 18 جنيها سودانيا ) ..
كنا نزين العجلة بكل ما تطاله أيادينا من زركشة و ( دينمو ) جديد و نور خلفي و أمامي و طوق لزوم السرج الخلفي ..
الذي كان يميز عطبرة عن غيرها من المدن هو ذاك الترابط الإجتماعي المتميز بين كل فئاته من طبقة العمال و كبار الموظفين و الضباط و الأدباء و السياسيين و التجار ..
فقد كان من الممكن أن يستوقفك رجل في حى الموردة و يسألك عن أبيك .. أو أن يعاقبك رجل من أمبكول لأنك تسبح في نهر عطبرة ..
الفوارق الطبقية لم تكن موجودة رغم وجود كل ألوان الطيف الطبقي .. و لم يكن الناس يشعرون بهذه الفوارق إلا في تنوع أنماط البنايات .. فقد درسنا مثلا في الكمبوني مع طلبة يسكنون السودنة و آخرين في الداخلة و البعض في أمبكول ، بل كان هناك طلبة معنا من أم الطيور و كنور و دارمالي و الدامر بعضهم يسكن مع معارف لأسرهم أو أقارب ( رحمك الله حيا و ميتا يا ود المجذوب ) .. لم نحس يوما بأن هناك نوع من التفرقة أو التعالي يمارسه من هم من سكان الأحياء الراقية ضد أي من أبناء الطبقات الدنيا ..
عبدالله موسى اللاعب الكبير ( دفعتي ) كنت أحب أن أراه يلعب و أتفرج عليه من بعيد ..
هاشم سرور السافلاوي إبن العمدة .. لا أدري لماذا لم يواصل اللعب .. فقد تنبأ له أحد المعلمين بأنه سيكون مدرسة .. و لكنه كان هاويا و لم يحب أن يحترف ..
شوقي عبدالعزيز ( الدفعة التي قبلي بسنتين ) .. ظهرت فيه بوادر التألق الكروي منذ أن كنا صغارا ..
حسن خليفة العطبراوي .. محبوب جماهير عطبرة .. كنت أذهب مع والدي ( رحمه الله ) لمحل الجزارة الذي يملكه و أقف صامتا أمام صوته الجهوري و تعليقاته الساخرة ..
أهل عطبرة عشقوا كرة القدم حتى الثمالة .. فكانت دار الرياضة قبلة معظم سكانها .. تعليقاتهم خلال المباريات كانت يجب أن توضع في كتيب ..
عشقوا الفن و رضعوا كل أنواعه بدءا من العطبرواي و إنتهاءا بفرقة دانة و موسيقر القرب العسكرية.
ليل عطبرة خليط من أصوات إيقاعات نوبة الصوفية و صوت العطبراوي و الليالي السياسية ..
صيف عطبرة .. ملون بكتاحة البطانة تفرشها كملاءة مطرزة على وجوه النائمين في الحيشان لا يفرون إلا إن إختلط المطر بالتراب ..
ميدان المولد .. و إحتفالية عطبرة بالمولد .. كانت لها رونق بطعم مختلف ..
صفوف السينما و خاصة إن كان هناك فيلما هنديا جديدا ..
الفول في مطاعم عطبرة بطعم الكباب و خاصة مع خلطة ( الثريني ) التي كان يجيدها اليمانية و خاصة العم ( شناكة ) اليمني في سوق القيقر ..
ظهور ( البولمان ) كوسيلة حديثة في موقف البصات كان حدثا ..
أبو جنزير الأسطورة .. لو كنت أملك إمكانات إخراج فيلم لأخرجت فيلما عنه يضاهي أفلام ( فرانكشتاين ) و أفلام ( ألفريد هيتشكوك ) رغم أن معظم ما حيك عن الرجل كان من نسج الخيال إلا أنني عايشت بعضا من الواقع .. و الرجل عاش بشخصيتين مزدوجتين تماما .. شخصية الرجل المحبوب التي تفتح لها أبواب كل أبواب المسئولين بترحاب كامل .. و شخصية الرجل المنتقم الذي يتحول ليلا إلى ( قاتل متسلسل ) يستعمل مخدرا لتخدير ضحاياه .. و القصة طويلة أفردت لها جزءا في البوست ( عطبرة دفء المرافيء القديمة ) ..

و لنا عودة

بالله
ابوجهينه انت من اولاد السودنه
شوقى الدفعة القبلك
عبدالله موسى دفعتك
طيب العم/ابوجهينه
مناطقكم دى كانت مناطق االنزهه للاطفال من الاحياء وسط المدينه
ايام الاعياد
نركب البص من فسحة المولد ونغنى
(ولا غشونا)
يودونا حوض السباحة والمنتزه

الأخ صلاح
تحياتي

أنا من مواليد حى ( القيقر ) بالقرب من عطبرة الحكومية
كانت بيوت ملحقة بها حدائق تسقى من النيل و كان ممكن تظبط ساعتك على وقت دخول الموية في الجنينة ( الساعة العاشرة صباحا ) ..
أصدقاءنا كانوا من كل أركان عطبرة لا فرق بين حى راق أو حى عادي ..
تسلم

واضيف لكلامك اكل "الزونيا" وما ادراك ما الزونيا. كنا بنعبى اكياس ونجي راجعين بيها نبيعها

Quote: "الزونيا"

...الفظيع مبالغة عليك الله ....شوفتا طعم الزونيا كيف وخاصة اللونها مايل للأحمر ....
....
بيت مدير السكة حديد كان فيهو أطعم شجرة ....
....

لكن طلعتا فظيع

وكان بحصل بيها ضرب اليخوم في الاول منو .. والشجاع هو البطلع الشجرة ويقطع منها شوية لغاية ما يجي "الحارس" ويسكنا.. ايام

عارف يا ابو جهينة
...
لديك قدرة فائقة على الحديث
...
واصل

Quote: عطبرة دائما جوة القلب وجوة العين ...

...
دائمـــــــــاً
...
أحمد داؤود
...

انا برضو من الحصايا ....السوق الصغير

...

يا سلام عليك يا ملك

بوست ولا اجمل ....

انا عطبرة دى كاسرة فينى ضلع ....

واصل..واصل ...

شكرا

...
نواصل مع الصور ....
....

...مدخل الكوبرى القديم ....

الوقوف على الأطلال ,,, وزكر الحبيبة ...
مدرسة عطبرة الثانوية ......جوار الكوبرى

ومدرسة عطبرة الحكومية اولاد .....القديمة

,,,عشان البنين ما يزعلوا ....

ولعناية ابو جهينة

....

سوق القيقر

ولعناية

...
الفاضلابى
..البنطون والفاضلاب ,,,ونسمة ريح نيلية

...
موقف الباصات

...

ولى عناية .....

...
الملتقى ....والايسكريم ....زمان ...

ميدان الحرية...
التاكسى بلون ابيض ...ومراجيح العيد ......وووذكريات من المولد ....والزفة ووووو

....
مراجيح العيد

....
والركشات (المواصلات الداخلية)

....

....
العجلات بالأيجار للشفع ....
....
وشارع السوق
....

....
العجلات بالأيجار للشفع ....
....
وشارع السوق
....

...وشركة إسماعيل ابو شنب واولاده ....معليش الصورة مائلة شوية

..... عشان البخور ...وووووو

....
وانت نازل من الكوبرى القديم ...امبكول
ريحة كماين الطوب والنخيل

?????

>??????
??????
??????

.....................النيل.....................

...............النيل مرة اخرى .........
........الخط الناقل لمصنع الاسمنت فى الافق............

.....

......

....اخر صورة لهذا المساء ....
ملحوظة :- هذا البوست مرهق ....؟؟؟ للغاية (معنوياً ....وصحياً .....وعاطفياً)
....
....الساعة الان الخامسة صباحاً بتوقيت السودان الحبيب ....ومواعيد العمل الشتوية تبدأ فى الثامنة
إذاً
تشاهدون فى الحلقة القادمة
الكوبرى الجديد
....السكة حديد ,,الورش ,,القطار ,,السودنة,,,,,,,,,
....الاسواق
....الاستاد...الجامع ....الكنيسة
....مصنع ماسيبو
.....الخ

ووودمتم

محمد الامين محمد

....

نحنا عطبرة ....قاعدة جوة ضلوعنا

....

جوة

....
تسلم على الطلة

Naji
I'm back again
Sorry for not having Arabic language available
Thank you for the post and the pictures
I hope that you went to nady Alhadaf. If not, Please do , and dont forget to take pictures and tell everyone there that (Ahmed Tinga) is saying hello.
On your way back go to ALandalos and get ' wahid fool masalah' from Awad Ahmed. After that you got to buy a "basta" from (khadari), one of
the most funniest people in Atabara.
Do'nt forget to take the pictures of Combony school and " hadigat albaladia"

I will be back again

احمد بشير...
ارجو المعزرة بالجد أتحسرت على انى جيت من هناك ...

...
لكن لو الحكاية فيها باسطا....برجع الأسبوع الجاى ...
...

يا ملك

ملك عظيم يازول

ممنونين وانت تهدينا تلك الأحاسيس

وسهرك لينا ونحن ساهرين الليالي

وسهران أنا مالي وده أنا حالي

تسلم يا ملك

ومعاك خطوة خطوة

وحرقانين بنار الكماين
والحلفا اب جناين

المسافر
انت من زمن الحلفا ام جناين
بقت الجو النسيمو هابى

المسافر ...
...
وانا ممنون ليك ...أكتر

...
دمت دوماً
...
لعطبرة ....ودامت عطبرة لأبنائها ...

الفاضل ناجى
تجدنى متداخلا معك كثيرا لان فى بالى الحديث عن عطبرة كلام موسس اكثر
ولكن هذا البوست جرفنا الى
نقرشات مشتته فى الذاكرة
من الذكريات
الدافورى فى ميدان (على ودسليمان) وهو فسحة شرق حى امبكول ياتى الية اولاد الموردة بالتناوب مع اولاد امبكول وهو دافورى سخن جدا
وكذلك الدافورى فى ميدان الكنيسة غرب امبكول وهو يخص اولاد امبكول اهم ما يميزة الصياح والهرج وبه ناس كبار فى السن
وجلسات العصرية والفرجة على تمرين فريق الهدف فى ميدان الاهلية(مدرسة نهر عطبرة المتوسطة سابقا)
فريق الهدف هو فريق حى امبكول تقريبا رواد النادى ليلا والمسطبة الجميلة والجلوس امام بوابة النادى
من الاشياء الملفته للنظر بجوار نادى الهدف يوجد نادى النيل بينهما جدار وهما من فرق الدرجة الاولى ولايطيقون بعضهم والبزعل من نادى الهدف بجى نادى النيل وهم سيتقبلونه بحفاوة
هذا النادى تعرفت فية باناس كرام جدا الله يطراهم بالخير
نادى النيل هذا اغلب رواده من احياء وسط المدينة المربعات الحصاية والامتداد بشرق المدينة
(ما عارف حتى اليوم سر حضورهم من تلك الاحياء البعيدة نسبيا مرورا بعدد من الاندية من اجل نادى النيل)
هناك من الاندية الرياضية الشاطى والشبيبة والامل والوادى والوطن وهى فرق الدرجة الاولى تقريبا موزعة على احياء المدينة
هذه الفرق الرياضية برز منها على مدار التاريخ كمثال وليس للحصر نوابغ رياضية واسماء فى دنيا الرياضة السودانية
شوقى عبدالعزيز
عبدالله موسى
زغبير
احمدسالم
عوض الحاج
وطبعا الشغلانه نامت حاليا بالسودان عموما ليس بعطبرة فقط
وكذلك عشرات الاندية الاخرى منها الرياضية والاجتماعية فى كل حى تقريبا تجد اكثر من نادى وبعضها باسماء مناطق وقرى (نادى ابناء ...) وهى اندية يجتمع فيها اهل تلك المناطق والقرى
فى عطبرة ميزة اخرى الساعة التاسعة وبالكثير العاشرة ليلا نامت الحياة الاندية الاسواق المواصلات
والحديث لايخلص عن عطبرة
وله جونب متعددة
ووردة حب منى لكل اهل عطبرة والسودان
وتستمر النقرشة

UP

الملك يا ملك

ممكن لو سمحت :

1. صورة لدار الرياضة بعطبرة
2. سينما الجمهورية
3. سينما عطبرة الجديدة
4. صهريج حى الفكي مدني
5. المستشفى الملكي
6. الكوبري الجديد
7. مسجد الداخلة القديم
8. شارع الطاحونة في أم بكول
9. سوق الحصايا ( المزاد )
10. المطار
11. الكمبوني
12. المدرسة الغربية الإبتدائية
13. مدرسة العمال الوسطى
14. مدرسة الخدمات
15. المسرح
16. نادي الهدف .. نادي الأمير .. نادي النسر .. نادي الأمل
17. المزلقان المؤدي للسوق الكبير من عند البوابة الرئيسية للورش
18. المكتبة القبطية
19. نادي العمال
20. إتحاد المعلمين
21. سوق العيش ( جنب محطة ود حاج الريح )

معليش .. كترنا الشغلة .. المهم الصور العندك منهم
بارك الله فيك و دمتم

انت يا عم /ابوجهينة
ليك كم سنه ما مشيت عطبرة

Quote: . سوق العيش ( جنب محطة ود حاج الريح )

الحاجة دى اثارها مافى

الليلة امانة ما اتعبر...
بالله مدرسة عطبرة بنات دى سورها قصير كدى
زمان شايفاه قلعة؟؟

والله يا ناجى ما صرت تب

وان شاء الله يا ابو جهية
رحلتنا قائمة قائمة...

............ البينط

مواعيدنا فى يونيو

Quote: الليلة امانة ما اتعبر... بالله مدرسة عطبرة بنات دى سورها قصير كدى زمان شايفاه قلعة؟؟

.انا زاتى أحترتا ....لكن رجعت وقلتا الطول حصل

بالمناسبة ....انا جاهز من اسى للرحلة ...ده ما سافرت تانى

...
تخريمة انتى مالك سكتى عن الكتابة

ابو جهينة

...تقريبا فى أماكن أختفت لكن فى أماكن انا صورتها
....لكن بالمناسبة دى
...انا صورت الكلام ده كلوا فى يوم واحد وجيت تانى يوم ....
.... كلاكم ده حيدفعنى انى اسافر مرة تانية .....
................... .........................

صلاح ..
..
..
شايف أنو فى خبر عن وفاة لاعب نادى الهدف
....محمد معتصم
....
والنوادى معلنة الحداد بعطبرة
...
...
اللهم ارحم الفقيد واسكنه فسيح الجنان

صلاح الدين عبد الله محمد
...
انت عارف انى ...متكيف جدا من مداخلاتك ...
...
لانى بصراحة الذكريات حتجر معاى ....وانا لسه ما تمديت الصور
...
...واصل وانا مشكور جد

Quote: ملحوظة :- هذا البوست مرهق ....؟؟؟ للغاية (معنوياً ....وصحياً .....وعاطفياً)

طيب ما أهو إنت عارف ألسبب،،،،

لي كم يوم يا ناجي بمشي و بجي،، بتاوق و برجع،، و فاقدة ألكلمة،،، من ألعلي و من حنديكتك دي،،

زح من ألبحر شوية كانو زمان بقولو لينا ألأدبراوي غدار،، أظنو ده ألغنت ليه لطيفة يا غدار سيبني في حالي،،
و هدامو هش ،،

من أجل صديق يا صديقي دايرين عدد واحد صورة معتبرة لأمبكول،،

وينو بيتنا ما لاقاني في بيوت ألسكة حديد و بعدين ما،،، ولي أقول ليك خليني،،

مشتاقين،،

صورة واحدة بس لامبكول يا Soumeta ؟
نحنا دايرنو يبدا من الجسر الجنب نادي الهدف وشارع شارع يصور لغاية ما يصل للمجرى بتاعت نادي العمال. وfor good effects يصور ميدان الكنيسة محل الدافوري السخن.
وبعد ما يخلص من امبكول يمشي على محطة النقطة بالزلط ويبدا بالنقطة زاااتهاقبل ما يصور مدرسة المزاد
كترنا عليك يا ملك؟ لووووووووول
خايف تقوم تقيلنا نحن "الشعب" للصالح العام!

الفظيع ...بالغتا معاى

....ارجع تانى يا ناس .....
... انا جيت مخزن معنويات لى كم شهر خرتومى ....
غايتو يا ناس ام بكول ....محنتونى معاكم ....

سوميتا

.....

Quote: لي كم يوم يا ناجي بمشي و بجي،، بتاوق و برجع،، و فاقدة ألكلمة،،، من ألعلي و من حنديكتك دي،،

عارفك مشتهية المشية
......
عارفة ...يا **** انى مشيت وجيت ....زى الما مشيت
...داير ارجع تانى .....البلد دى حلوة جد
...الناس ,,والسكة حديد,, المدارس ,,,الاندية,,, الاحياء,,, القهاوى,,, المكتبات المقابر ,,,الاسواق,,,و وووووو

.....
لكــــــن بتظرك لما تجى ....نمشى كلنا

Quote: ولدا متين بقي للسفر والاغتراب والدردرة

إلي متي يستمر ألتحسر ؟

أنا تعبت شديد،، إنتو أكتر مش،،

مزعمط أبوها دي بلد مجدوعين فيها،،

Quote: مزعمط أبوها دي بلد مجدوعين فيها،،

....
مزعمط ابوها وامه ...البلد المجدوعين فيها انتو ....

.....

بالمناسبة حمد لله على سلامة الوالدة ....وهنيئا للدوحة بها

ألله ده بسألني ما شفت بنطون في أدبرة،، ناس مراكب ساكت،،
إنت و ألحمار و أنا و ألمراكبي في كفة واحدة، و ألتيوس برضو عشان ما أنسي،،

بعدين في موقف ألباصات ألعربية رقم إتنين من علي يدك أليمين دي مكتوب فيها شنو؟


alfazia3
أتاريهم محبي أم بكول كتار مرقو،،

خايف تقوم تقيلنا نحن "الشعب" للصالح العام!


أنا غايتو كان رضي و كان أبا صالح عام،،
مدرسة ألمزاد بنات ولي بنين،،

Quote: بعدين في موقف ألباصات ألعربية رقم إتنين من علي يدك أليمين دي مكتوب فيها شنو؟

...مكتوب فيها الحصاد ...
.....والله اعلم .....

...

Quote: أنا غايتو كان رضي و كان أبا صالح عام،، مدرسة ألمزاد بنات ولي بنين،،

قال صالح عام قال ....
.....ما قلنا ليك لما تجى بنسافر كلنا ....نسحب العزومة والله شنو

يا ناجي يديك العافية... انا جيت امبارح من البلد ... حزن يغطي المدينة وغبار ظلم تراكم منذ 1969 .. ومازالت امي تعشق عطبرة والسيالة والداخلة وتزور ود نواوي كلما المت بها علة .. وتحتكم الى العمدة السرور السافلاوي شوقا وحنينا الى تلك العطبرة وايامها.. ومازالت عطبرة تفوج كل يوما مظلوم وحزينا مثلى وصديقي ماو ووليد المنسي وووووو .. الى اخر الخزن
منال

منال ....حمد لله بالسلامة وكل سنة وانتى طيبة

....
قال لى كنتى فى عطبرة ...والباوقة ....الباوقة كيف وقيف البحر بالليل ...
....
لكن سؤال ...انتى وين ما ظاهرة

الاحبة دوماً .....

الأغنية مهداة من خال فاطمة

....
الى كل ناس عطبرة ...واتبره ....وادبره
....
ومنـــــــــــــــــى العطبرواى نسانا حبيبنا.....كود الحفظ ....




.....
تخريمة الأغنية دى

.......
كود الحفظ
.......

Save @ PC

ناجى الملك انا ما شفت عطبرة
لكن صورك جابت لى وجع قلب
وزكرتنى سنة ستة وخمسين لمن كنا انا وبرمبل
فى زيارة واحد صاحبا فى رفاعة.



ماتقول انت عمرك كام

ودمت

احمد الحسن ....

Quote: ماتقول انت عمرك كام

....
شوية كده ....على قول واحد صاحبى

شكراًعلى مجيئك معنا

يا ناجي انا اسع اتواجد في الخرطوم ....
لكن انت مش ملاحظ انه البورداب نصهم طلع عطبراواب
تحياتي لمدرستي مدرسة عطبرة الثانوية للبنات
وبالمناسبة من اسع زوادة الرحلة علي انا ( حمام محمر وطعمية والتحلية طحنية وقراصة بلح)
منال

Quote: وبالمناسبة من اسع زوادة الرحلة علي انا ( حمام محمر وطعمية والتحلية طحنية وقراصة بلح)

...ما بتنطى من العزومة دى ....صح

تنط كيف .. ما فينا نط نحن خلاص حجزنا قبل نشاورها
وبالمناسبة واحد صاحبي معجب بالبوست دا جدا وبدخل عليه طوالي لما قرا زوادة منال قال لي غايتو يا ناس عطبرة ... لو زوادتكم كدا سجلوني معاكم "لاعب اجنبي"

تحياتي لك يامنال وكل سنة وانتي طيبة

الملك الأصيل
ناجي

كل سنة وانت طيب
عازرك لو قلت الناس البيجوا من برة خوتهم قـــش

سلام يا سلام علي عطبرة والدامر وناسهم

وبالجد
تقابل فيها ناس طيبين فراقهم بيبكيك


شكرآ علي التسالــي


كل الود
وليد العجب

فوق


فوق


عطبرتنا فوق


فوق


فوق


عطبرتنا فوق

فوق فوق .......... عطبرة فوق

....
حليل ايام الدورة المدرسية
....
....

وليد العجب ....انت وين يا راجل ....
....
....
بتصل بيك التلفون مقطوع
....
....
رجاءً تتصل بى على التلفون الموجود فى البروفايل للضرورة

....
....
تصدق وتأمن انا لافى للصور دى ووووجيبى مليان تسالى
....
....
الله يا عطبرة

عطبرة.. عاصمة الحديد والنار ستُعاد سيرتها الأولى

بقلم: عثمان هجا أبو خير المحامي

جاء في الأنباء، أن عطبرة، عاصمة الحديد والنار، مقر رئاسة سكك حديد السودان سابقاً، ستعاد سيرتها الأولى، إذ قامت وزارة النقل أخيراً بالاتصال ببعض الشركات العالمية الكبرى للنهوض بمرافق السكة الحديد، وإعادة الحياة الى ورش السكة الحديد، وكما جاء في النبأ فإن عطبرة ستعاد سيرتها الأولى وستعاد الى سابق «مجدها التليد» ولتفعيل ذلك فقد تم إنشاء لجنة عليا لمعالجة تأهيل السكة الحديد يرأسها السيد رئىس الجمهورية.

أسعدني هذا النبأ، وسبقني بالسعادة ابن عطبرة الجليل الكاتب والأديب والمفكر د. محمد إبراهيم الشوش.

لقد أرجعني النبأ الى أيام خلت قضيتها وأقراني من الطلاب المقبولين بالسنة الأولى بمدرسة عطبرة الثانوية الحكومية «القديمة» للعام 1960م ويبدو أن سلوانا وسعادتنا نجدها دائماً في اجترار ذكريات الماضي والصبا.

بهرنا بتلك المدرسة الحديقة، والتي أعطى إطلالها على النيل وعلى ضفته الشرقية مع اقتران نهر عطبرة مع النيل - اعطاها موقعاً ساحراً بهيجاً تكثر في أرجائها أشجار النخيل المثمرة - وأدنى رصيفها المطل على النيل وتحت أقدامنا مباشرة أخضر اللوبيا وأينع، جو المدرسة العام يعبق برائحة الجروف واللوبيا والبرم والطين كما صورها كاتبنا الكبير الطيب صالح في كتابه موسم الهجرة الى الشمال.

جاء البرالمة من كل أرياف عطبرة - شمالاً وجنوباً وبهرهم ذلك الجو الساحر، فطاب لهم المقام والدرس والتحصيل، خبرنا عن تاريخ المدرسة الأكاديمي المشرف الناصع وتفوقها الأكاديمي من بين المدارس الثانوية الأخرى - سمعنا عن النظار الذين تعاقبوا فيها - فريجون، وعبدالرحمن عبدالله، وعاصرنا نظارها أحمد حسن فضل السيد وعبدالقادر حسن الضو ومحمد عبدالمجيد طلسم، نهلنا العلم على أىدي أساتذتها الأجلاء.. محمد البكري أبوحراز ومحمد الطيب وعثمان الطيب ومستر ليني وابراهيم ملاسي ونجيب ولبيب ووداعة وآخرون.

سمعنا عن طلابها المتفوقين «عبدالله أدب» دكتور عبدالله علي إبراهيم - الكاتب والمفكر المعروف وعن عوض الكريم وداعة الله واحمد حسين، وكنا حضوراً لهجمات وضربات أبو جنزير، شُغفنا حقاً بالسكة الحديد وبعمالها في «أبرولاتهم» يمتطون عجلات الرالي - ما زال دوي صفارة السكة الحديد يدوي في أذاننا عند التاسعة - ساعة الإفطار - كنا نفاخر بعلامة مدرستنا المميزة - «قطار البخار» طلاب المدارس الثانوية الأخرى - فاخرنا برمز السكة الحديد ذلك، هدهد حنتوب وخرطوم فيل الخرطوم الثانوية وفنار بورتسودان الثانوية.

عشنا، ومعظمنا من أبناء العُمال، جو العمال الاشتراكي - ولا أقول الشيوعي - وعشنا جو الطبقة العاملة ونقاباتها العاتية والتي كانت بُعبُعاً لكثيرمن الحكومات - وهذه آفة عطبرة ومصيبتها الكبرى - والتي تحاول الآن الإنعتاق عنها - مارسنا الاضراب أيام حكومة الرئىس عبود - وفي عهده خرجنا كأول مدرسة تخرج في مظاهرة ضخمة ضد قرار الحكومة وقتذاك - التنازل لمصر، عن حلفا، لقيام السد العالي.

شاهدنا أتيام عطبرة الرياضية.. الأمل، والهدف، والأمير، والشبيبة، وشجعنا حسن صعوط وشجع غيرنا لبودي، إذن، ستعود الحياة لعطبرة كما كانت سابقاً وستعود الحياة الى سوق القيقر وورشة المرمة والنجارين وستعود صفارة السكة الحديد العريقة - وستعود قهوة الابس كما كانت - وستعود قطارات الشمال.. اكسبريس حلفا ومشترك كريمة والمحلي وقطار العمال ويعود السنطور، وستعود لنا السعادة من جديد برؤية عطبرة عاصمة للحديد والنار في سيرتها الأولى إن شاء الله
-------------------------------------
عن صحيفة الراي العام - الاثنين 10 يناير 2005م

الأخ صلاح

انت يا عم /ابوجهينة
ليك كم سنه ما مشيت عطبرة

Quote: . سوق العيش ( جنب محطة ود حاج الريح )


الحاجة دى اثارها مافى

طبعا أنا قاصد الصور لة وجدت . و بالمناسبة أنا طلعت من عطبرة سنة 1974 و لم أعد إليها ، بل بالأصح لم أسافر شمالا منذ ذلك التاريخ .. كل إجازة أجي الخرطوم و أنغمس في أمور شخصية فأفاجأ بإنتهاء الإجازة و هكذا دواليك.
حفظ الله عطبرة و أهلها.

الاخ الافضل ناجي الزبير وكل المتداخلون
سلامات
ارجو أن لا أكون اتاخرت على هذا "المولد" العطبراوي0

حقيقة لا يدري المرء من اين يبدأ، فالأمر أكثر تعقيدا مما كنت أظن0
فلي في الخاطر على المستوى الشخصي ذكريات عديدة وعتيدة في نفس الوقت0 ولكن سوف استجيب لطلب الاخ صلاح محمد عبد الله ، مفتتحا الذكريات من باب الرياضة في عطبرة وما ادراك ما الرياضة العطبراوية0
****
جاني طيفه طايف
وانا من "لبودي" خايف
شوتاته كالقذايف
*****
غدارة 00 غدارة وقست علي مالا 0 0مشغولة بدلالا
ليه يا كفرنا أبيت 00 ليه بس تقول لالا
والشبكة تبكي عليك بدمعة سيالا 00 بدمعة سيالا

***
صوت الأمل جاني من نومي صحاني
قال لي كيف الكأس 00 لازم يعود تاني
لازم يعود تاني
**
من ينسى هذه الاهازيج الحميمة على ايقاع النوبة؟؟؟ ومن ينسى مشجعي نادي الأمل0 عوض فضول ، هاشم عبد النبي وسعد بلال وحبوب 000وغيرهم من الاف اللطاف الظراف وتشجيعهم الدافق وهديرهم المرعب الرهبب في وجه الخصوم؟؟ من ينسى تلك الرقصات الرشيقة لعوض فضول وهو متشح بعلم الامل الاصفر اللون وخلفه ما لا يقل عن 10 الآف مشجع يربطون عصابات صفراء في رؤوسهم يميلون على ايقاعات التم تم التي تشتهر بها الحان اهازيجهم0 انه مشهد فوق التصور لا يدرك معناه الا من اتحيت له مثل هذه الفرص النادرة في سبعينات القرن الماضي وحتى اواخر ثمانيناته0

زرعوك وين شتلوك وين يا هدف
في ميدان الجنوبية؟ ابدا لا وطبعا لا
في السينما الجمهورية؟ ابدا لا وطبعا لا
في ميدان الاهلية؟ ابدا لا وطبعا لا
***

مبروك عليك الليلة يا نعومة00
يا حليل ناس ديل الزمان بجونا
***
عوض الحاج بريده بعد الله طوالي
وووووب علي الهدف ناره حيه
***
وانت جالس في استاد عطبرة موعود بمشاهدة سهرة محضورة، وبينما انت جالس تقتطع من أوقات انتظار اللحظة الموعودة يتناهى الى مسامعك هدير اصوات مختلطة في حماسها بايقاع النوبة الرشيق وموسيقى "القرب" بقيادة المخضرم "النيخو" وتتآلف الآذان مع هذه الالحان المألوفة لبعض الاغاني الشعبية مشحونة بهذه المفردات اعلاه التي تنطق حباً لنادي الهدف الشهير 0 وفجأة يتقارب الصوت من الاستاد ويزداد قلبك خفقاناً 00 فأنت موعود بمشاهد قل أن تجد لها نظيراً في اعتى ملاعب العالم0 الآن بات واضحاً من وضوح الصوت والهدير أن فرقة مشجعي الهدف بداخل الاستاد، يتقدم الحشد "الجقر" المشجع الشهير وفي يده "المبخر" ودخان "بخور التيمان يتصاعد منه والجقر يتمايل في انتشأ، وخلفه الساخر عجوز وهناك بالطبع عوض الطوافي، ويزداد الطرب ويتفاعل الجمهور "زرعوك وين شتلوك 0000" يوتصاعد ايقاع النوبة ويلتهب الرقص وترتفع الحناجر "عوض الحاج بريده 00وووووووووب بريده بعد الله طوالي" 00 وفي هذه اللحظة ينزل فريق الهدف الى أرض الملعب متجهاً مباشرةالى موقع جماهيره00 ويرتفع الصراخ وتشتعل النيران في هستيريا وينزل "الجقر" بمبخره حيث "الدرابزون" الذي يفصل الملعب من الجمهور، ويتقاطر نحوه لاعبو الهدف يتقدمهم الاسطورة عوض الحاج ويبدا الجقر يوجه دخان البخور المتصاعد نحو عوض الحاج وزملائه ويصرخ الجميع خلفه "ياعين 00 يا عنيه 00 يا كافرة يا نصرانية"00
ولك أن تتخيل عزيزي أن يكون اللقاء ممثلا بين فريقي الهدف والامل، وانت تشاهد هذه اللوحات الباهرة من التفاعل العاطفي والروحي متوسلا الاهازيج والنغم والايقاع متوسلا مشجعين مجبولون على اللطافة والظرف اللامتناهي0 انها ذكريات عندما تستدعيها بمقاييس اليوم، يهالك الأمر حين تكتشف كم كانت متقدمة عن زمنها0 انها مشاهد أذهلت كل ما شاهدها بشكل حي خصوصا هؤلاء الذين يأتون من العاصمة0

*** هل انتهى الأمر؟؟؟
بالطبع لا00
يا ماشي لي كده لوراء
سلم على ناس عطبرة
شاورت ابوي وقال لي لالا
لالا لالالا
اللول اللول وشيء عجيب يا زول
****
شبيبة شباب 00 تهزم الاملاب
** يفاجئك صوت علي الامام الضخم الاجش من بين الصفوف ، حين يسمع الاغنية الشهيرة أعلاه منسابة تعلن عن وصول الحافلةالتي تقل لاعبي نادي الشبيبةالعريق، مجلجلا بصوته معلنا وصول فرقة الفن والهندسة 0 النادي المشهور بلاعبين على مستوى عال من الفن والمهارات العالية0 ورغم تباين الازمان الا ان ما يجمع بينهم هو ذلك الالق والسحر الذي لا ينفع معه سوى العنف والتهديد0 من ينسى (جعفر رمضان، رحمة، عادل محمد الحسن أو "ود السرة" كما اشتهر0 عوض يوسف الفنان، عصمت شهونة، عوض عبودة ، عثمان النور، سانتو 00 وغيرهم"0

****
الخضرة وقلبي رادا 000 يااااااا
خضار يا ناس بريده؟ يااااااا
تراني بموت في ريده
***
هكذا هم جماهير نادي الوادي عشق حي الداخلة العتيق0 0مرهفين مترعين بالحب والجمال يستمدون من خضرة شعار ناديهم كل اناشيد العشق الجميل

"ببو" جاك يا "شعوطة"00 تلك الهتفات والملاسانات التي تتم بين جماهير نادي الوادي وحارس نادي الهدف "شعوطة" المشهور بحركاته البهلوانية ومشاغباته المثيرة لاعصاب الجمهور المنافس0

00 يتعب القلم ويهتريء الوصف ولا تصل الى ذرة من متعة تلك اللحظات واحتفاليتها المستصحبة لكل جميل التراث والذاكرة الشعبية0

قيض لي حظي ان اعيش هذه اللحظات الجميلة كلاعب كورة ولذلك هي محفورة في اعمق أعماق الذاكؤة0 تنقلت في بعض المدن كلاعب ما بين بورتسودان والخرطوم 0 وسافرت في المتافسات القومية لكثير من مدن السودان والتقيت بكم هائل من الطقوس التي كانت تباشرها جماهير هذه المدن للاحتفاء بفرقهم، ولكني أقول ودون أدنى مبالغة أن الطقوس الاحتفاليةالتي كانت تمارس في استاد عطبرة شيء لم يعرفه السودان حتى راهن اللحظة0 طقوس جمالية توفر لها الخيال الخلاق والحس المبدع العالي فكان هذه الصور التي حاولت قدر الامكان أن ابعثها حية من خلال الكلمة 0 ولكن هيهات00


الحلقةالقادمة الفن في عطبرة
خوجلي هاشم فنان من زمن آتي

ولكم الحب ولعطبرة السلام
عبد الخالق السر

أنا من مواليد هذه الحصاية واهل أمي لسع عايشين هناك وباشجع الأمل وخشيت ليهم كورة وحبوبتي أصلوا ما دايرة ترحل من عطبرة وجدي الله يرحموا كان شغال في السكة حديد
سلام لعشقي عطبرة

في هذا المكان و على بعد خطوات من النادي ، إختطف النيل من بين أيادينا هاشم صديق العمر .. ظللنا نبحث عنه طوال اليوم دون جدوى .. قبضنا على جذوع الشجر الطافي في عكرة مياة الدميرة .. نصيح مهللين بأنه هو .. و لكن تخمد صيحاتنا مصطدمة بالحقيقة المرة مرارة ما كنا نحس به في حلوقنا ..
ألا رحمك الله صديقي ..
وقفت أمام هذه الصورة طويلا و كأنني أشاهد هاشم يمد يده طالبا النجدة و هو يغطس و يطفو مبتعدا مع التيار الجارف ..
معليش يا ملك ..
و لكن كل صورة ممكن أن أجعل منها قصة ترقد تفاصيلها في القاع ..
تسلم
و عفوا للجميع ..

Quote: أنا من مواليد هذه الحصاية واهل أمي لسع عايشين هناك وباشجع الأمل وخشيت ليهم كورة وحبوبتي أصلوا ما دايرة ترحل من عطبرة وجدي الله يرحموا كان شغال في السكة حديد

....
....
الله يا مهيد
....
انت معناها مننا وفينا
....
مرحباً بيك اولاً
....
وياالا معانا لى اتبره

Quote: و بالمناسبة أنا طلعت من عطبرة سنة 1974

....
والله انا طلعت صغير خالص
....
ابو جهينة واصل فى ذكرياتك
....
عسى ولعل الواحد يعرف عن تاريخ بلدوا ....
.... وموطنوا الأول
....

Quote: وستعود الحياة الى سوق القيقر وورشة المرمة والنجارين وستعود صفارة السكة الحديد العريقة - وستعود قهوة الابس كما كانت - وستعود قطارات الشمال.. اكسبريس حلفا ومشترك كريمة والمحلي وقطار العمال ويعود السنطور، وستعود لنا السعادة من جديد برؤية عطبرة عاصمة للحديد والنار في سيرتها الأولى إن شاء الله

.....الفظيع

ستعود ....إن بقى أبناءها ستعود يوماً ما .......ستعود

نجو ألدنيا صباح ألله إعدلها عليك محل ما تقبل ،، قول أمين،،

ألله إسلمك و إستر علي،، مبسوطة حاضنة أخوانها و قاعدة،، تتهني يا رب ،،



إنت أحجز ألقمرة ولي أقول ليك إنشاءالله ممشي بس أمشي هناك،، بيتنا وينو؟

بعدين إنت إقولو ليك ألبسطة تحوص تمش لي أدبرة ؟

الملك

واصل..... الصور وين؟........

هيجت اشجاني

وجني قام علي

واتلبشت.......

الاخ ناجي ..

كل سنة وانت بالف خير .. واجازة سعيدة بين الاهل ..

والله شوقتنا اكثر لعطبرة واهل .. وكل السودان الجميل ..

لك خالص الود والتحية

عيني عليك باررررررررررردة يا عطـبرة ..

سلام يا ناس عطبرة المقبرة( بس نحنا النقول كدا كدى يجى زول غريب يقول كلام ذى دا الا عكاكيزنا تاباه)

عارف يا ناجى نفسى شنو الان.. اللبس فستان لبنى.. وامشى مدرسة عطبرة بنات
واجىى انزل بتحت الكوبرى وامسك الظلط لغاية مدينة المعلمين منزل رقم 16..
يا رب الزول بيقدر يمشى المسافة دى تانى...

بالمناسبة دى عايزة احى صاحبتى سامية عبود اللى كنا نقطع الدرب من المدرسة للبيت معا
يارب اسع هى وين.؟.

وصاحباتى مريم وسهام موسى بنات السيالة
و اخلاص عبدالموجود وفوزية حسن بنات الداخلة
وكل نسوان الداخلة الساهمن فى تربيتى ملكة الدار و الجبورة.. عافية ليكم قريصى
كما ربنا يرحم فاطنة الحاج الكانت بتدقنا بسير المحفضة و تحمى ابوى يدقنا
لما نرقد تحت القطر(وهو ماشى)..ولا نخوض فى موية المطر..
بعد كبرنا عرفنا كيف الوالد كان بيعرف الرقد تحت القطر منو والخاض فى الترعة منو
لانه كان شعرنا بيكون مليان رملة وتراب دا لما نرقد تحت القطر وكرعينا بيكونو غبش...دا لما نخوض فى الترعة
و عويض والهادى كان رجال كان تجونى واحد واحد ( لما القاهم واحد واحد بدقهم لما يلقونى الجوز بدقونى)

ولكمال ولد الدناقلة متاسفة شديد انى وسمتك بكسر سنك مش احسن الحجر الجاك فى سنونك ما جا فى عينك
وهناك اعتراف لناس حميدو بابكم كسرتو انا... والحمام داك انا الفتحت ليه البرج.. وطار...
والناس المفلهمين الساكنين فى السودنة قزاز لبنكم اتعلمنا فيه النيش بالنبلة..
بعداك كل الاسف والاعتذارات الشديدة لمكلية المجنونة ما كان فى داعى نمطرك بالحجارة..
واكثر حاجة زعلت فيها لما عرفت على ود فرحين غرق وحسيت بالحزن لانى مرة
عضيتو فى اضانو لما كبت الدم...

زول يدينى تشو...

شنـــــــتو يا جمااااعة الاغنية ما عجبتكم ....انا حاواصل فى الصور
.....
واراجع المدخلات ...سريع










جامع السكة حديد العتيق ....والكنيسة .....وبينهما ...خط فاصل للسكة الحديد


....أظن ان الصورة لا تحتاج لتعليق أكثر .....

صورة لجامع السكة حديد ....العتيق ....

....

صورة جانبية لمدرج فى الاستاد...معزرة لانو كان مقفول وكت العيد ....كنت ناوى اصور المدرجات حتة حتة

مبانى .....الاتحاد الجديدة على ما أظن .....

....مبانى نادى السكة حديد ...مباريات تنس الطاولة والدورة المدرسية

....
....زمااااااان

أها جينا فى السكة حديد ....ودى المحلة البتحرق الحشا من جوة ....
....
....

ورش التصنيع والصيانة .....

.....

.....قاطرة ديزل ....صورة من متحف السكة حديد ....السودنة

.....
.....






.....
.....

الفن في عطبرة
كثيرا ما يختزل الناس الفن في عطبرة في شخص "العطبراوي"0 صحيح أن العطبراوي اصبح أحد العناصر الضرورية المكونة لشخصية عطبرة بل نذهب الى أبعد من ذلك حين نؤكد أنه لا يمكن الحديث عن عطبرة بمعزل عنه أو السكة حديد0 ولكن، رغم كل شيء لا يمثل العطبراوي كل شيء في مسيرةالفن العطبراوية0 وهذا النوع من الحديث خلق حالة من النمطية وغمط الآخرين حقهم عند التطرق لتاريخ الفن في عطبرة0
هناك الكثيرون الذين صاغوا الوجدان العطبراوي بابداعاتهم الثرة ولا تزال الاجيال تختزن صورهم0 فمن ينسى فرق الجاز في عطبرة؟ جاز "دانة" وجاز "السكة حديد" لقد كانوا يشكلون في المناسبات القومية والافراح العائلية مهرجانات فرح لا تنتهي0 فمعهم عرفنا موسيقى الجاز الامريكية، وعشقنا أغاني "البلوز" لمشاهير الفنانين العالميين0 كما أنهم أدخلوا الاستعراض الحركي المصاحب للغناء0 فمن ينسى "طيوبة" وهو يتلوى في مرح وبرشاقة غير مسبوقة0 كيف لنا أن ننسى بهلوانيته وهو يضع "الكباية" في جبهته ويرقص بها ويغني ويتحرك بمنتهى الرشاقة دون أن تسقط الكباية ووسط دهشة واعجاب الجميع؟ "ماذا فعل به الزمان هذاالمبدع يا ترى؟"0 هل تذكرون ملابسهم الآنيقة واللامعة والمتناسقة في آن؟؟
لقد شكلت فرق الجاز في عطبرة حضورا قوياً وحالة ابداعية خاصة تستحق التأريخ وهي لا تقل عن كل تجارب فرق الجاز التي اشهرها اعلام العاصمة0 أتيح لنا من خلال التنقل بين عطبرة والعاصمة أن نقارن ونعرف كم كانوا متفوقين على أقرانهم في هذاالمجال اكثر حرفية وانضباطاً0 حتى على مستوى التجريب في مرحلة لاحقة من مراحل ترجبتهم الابداعية كانوا سباقين في محاولة سودنة الجاز 0 ربما كان شرحبيل أحمد هو الرائد في هذا المجال والأكثر رسوخا، ولكنهم بقدر ما سعوا حثيثا لوضع بصمتهم في هذاالمجال0 وما انتقالهم بعد فترة من الجاز بمفهومه الغربي الى سودنته الا دلالة على حقيقة وعيهم بابعاد تجربتهم0 ومن ينسى أغنية "الما نسونا" على سبيل المثال بايقاعها الحار0 ومن ينسى لهم أنهم أول من جذر بعض الرقصات المشهورة حتى صارت سمة تعرف بها أجيال السبعينات والثمانينات "التوستي" مثلا لا حصرا0 صديقي الظريف "عبد اللوب" له معيار طريف في هذاالصدد0 كان يقول لي :" لو في واحد من ناس عطبرة من النوع البدس عمره، ممكن براحة تكتشف عمره الحقيقي لو رقص في حفلة"00

ومن قلب فرق الجاز ظهر الفنان "مصطفى مضوي" الذي اثرى ليالي عطبرة وحفلاتها0 والحقيقة ان مصطفى مضوي ليس من مواليد عطبرة بل هو من الجزيرة، وقد أتى لعطبرة منقولاً الى المدفعية عطبرة، ومن خلال فرقة جاز "دانة" مارس اباداعه كفنان0 وهو الآن عطبراوي عاشق للمدينة بشكل لا مثيل له0 لا يزال الكثير يذكرون انطلاقة مصطفى مضوي من خلال أغنيته الشهيرة "جات تبارك عيدا00 راسمة حنة في ايدا" 000 وتتالت الاغنيات بعد ذلك ، واصبح مصطفى رقماً فنياً في المدينة بل في بعض الاحيان وبعد اشتهار كثير من أغانيه علىالمستوى القومي ، مثل أغنية "مسكين أنا" ، والاغنيةالتراجيديا "الوليد الضيف 00غرقتنه كيف"، وغيرها من الاغاني، كان يمثل رمزاً لعطبرة بالنسبة لمن هم خارجها0

وللفن الشعبي نصيب لا يستهان به في صياغة الوجدان العطبراوي0 فمن أشهر من تركوا بصماتهم هو الفنان "حيدر" حيث أنه أول من أصطحب معه آلة "المندولين"0 كان حيدر يقلد الفنان العبقري الكاشف، وكان مجيدا في هذاالصدد وحقق شعبية كبيرة وراجت في عهده أغاني الكاشف بشكل لافت، الا أنه في أوائل الثمانينات فضل الرحيل الى بورتسودان، الا أنه ما زال حياً في الذاكرة الجمعية لأجيال تلك الايام0

أما الفنان "الذكار" فهو ظاهرة بكل ما تحمل الكلمة من معنى0 فهو قليل الحضور على المستوى الكمي كفنان، بل في الحقيقية لا يذكر له الناس سوى أغنية "قطار الشوق" ، لكن، واي أغنية هي قطار الشوق؟؟!!! فمن خلال هذه الاغنية دون غيرها اصبح الذكار اسطورة خالدة في المخيال الجمعي لأهل عطبرة0 بل أصبحت قطار الشوق تنافس العطبراوي والسكة حديد في تشكيل صورة عطبرة عند الآخرين من أبناء الوطن0 فالذكار من أوائل الناس الذين هاجروا الى الخليج وكان ذلك في سبعينات القرن الماضي، وذلك هو سبب قلة انتاجه0 فيا ترى كيف كان سيكون الحال لو لم تفعل المنافي فعلها في هذاالمبدع؟؟
قابلت الذكار قبل حوالي 4 أشهر أثناء زيارتي للوطن في العام الماضي، وبالطبع لم أكن لأعرفه لولا أن هناك صديقي "معروف الأمين" سلم عليه ، وقال لي:"عرفت الزول ده؟" وعندما اجبت بالنفي ، قال لي:" ده الذكار"!! كانت بالفعل مصادفة مفرحة، واذكر اننا وقتها اتفقنا على أن نلتقي هو وشاعر الآغنية المهندس "علي محجوب" لأسجل لقاءاً طويلاً معهم يحتوى على ذكريات "قطار الشوق"، ولكن للاسف تتضاربت المواعيد أكثر من مرة، خصوصا وأن الاخ علي محجوب بحكم وظيفته في ادارة المياة كثير التنقل والسفر0 وهكذا تأجل هذا اللقاء المهم الى موعد غير معروف0

في الذاكرةالكثير والكثير، فهناك - مثلا- الاسمر النوبي النحيل الفنان "محمد سعدان" ولا يزال جيلنا يذكر أغنيته النوبية الشهيرة "أي دلوسي يابا 00 أنا بحب الولد ده يابا" وتأثيرها الرهيب علينا0 فقد خلقت من سعدان نجم شعبي لا مثيل له0 وسعدان لمن يعر فه عن قرب فنان لا مثيل له0 فهو لا يستطيع أن يتوقف عن الغناء والتلحين في أي لحظة0 ولذلك كثيرا ما تجده هائماً في الشوارع يمشي على غير هدى يدندن في لحن أو يعالج في لحن، حتى لتحسبه مجنون ان كنت لا تعرفه0 كم أحن لهذا الفتى الجميل، فقد جمعتني به عشرة طيبة لا تنسى0

وهناك ايضا الفنان الشعبي "زمراوي" وهو كان فيما يبدو متأثراً بالفنان الشعبي الكبير أوعبيدة حسن، ولذلك شكل "الطمبور الكهربائي" أبرز ملمح في تجربة زمراوي0 وزمراوي مرعوف أكثر بين أبناء حي أمبكول حيث كان أحد سكانها، ولكن فيما اعتقد أنه أتى عطبرة لاحقاً حيث ولد وعاش قسطاً من عمره بالمحس0 اشتهر زمراوي بالاغاني الخفيفة الراقصة ذات الكلمات الرشيقة مثل: "نجلاء واميرة 00 حنان وازاهر" ، "القمرات جوة القمرة 00 يا بت يا حلوة يا سكرة" 00 وغيرها من الاغاني التي كانت تخلق جواً من البهجة في الحفلات0

مرة أخرى نؤجل الحديث عن الفنان خوجلي هاشم والحركة الشعرية في عطبرة، فمن حق خوجلي أن يستأثر بمساحة أكبر0

لكم الود
عبد الخالق السر

...
اتبراوى
....
دى حالتك الجيت متأخر ...انا غايتو متخصص صووور ساى
....
واصل وبراحة علينا شوية شوية
....
....
تحياتى وودى وشكرى

وليد ,,,,الحنين

ازيك ومشتاقين ,,,,امانة عليك عطبرة دى ما تستاهل ,,,,اكتر من كده

سيجيمان ...ابو النسب عديل كده ....

بزيارتك بيتنا نور ....وعطبرة نورت ,,,,,

,,,,,انت اللبشة شنو ,,,,,كماااان

أمييييييين
....
ويعدلها عليكى محل ما تقبلى
....
بعدين .... البوسطة وام درمان دى
....
دايرة ليها ملوة تسالى ...غالى والطلب رخيص
.....
.....

والله يا ناجي كنت داير أكتب كتير خالص
لكن بورتسودان مدبرسة بي دبرسة
لا حولاااااا
الموت ده حاجة صعبة يا ناجي
جاييك تاني
وشكرا على البنطون
يا ملك

...وانا زاتى يا محمد

...
مع انى لما أكون شغال فى بوست

...

ما بمرق بره

...

شوفتا صور الناس دى ...اسى فرقنا شنو من الامريكان

...

...شارع السودنة

ناجي ياملك

في عـطـــــــبرة الســــــــلوي
وفي الدامـــــر الخلـــــــــوة
بريده سودانـــــــــــــــي

كل الود
ودالعجب

...كوبـــــــــرى الحرية ....



....
ده الكوبرى ؟؟؟؟ حليل الحرية
....

الكبري هو الكبري

ولكن أين الحريـــــة


نشجب وندين ونستنكر

و و و و و و و و و

و و و و و و و و وليد عجب

.....
مبروك يا عريس وإنشاء الله بيت مال ....ودستة من العيال




....
الحـــــــــــــــــــــــــــــــــرية؟؟؟
.....

وتستمر النقرشة على جدار الذاكرة

السفر من والى عطبرة من النغمات فى اوتار الضلوع بالقطار خلال الثنانينات وماقبله
السفر من عطبرة للخرطوم تكون فى انتظار المحلى مساء الجمعة لتكون صباح السبت بالخرطوم او قطار بوسودان الذى يكون الاثنين والجمعة بالنهار والنهار كلة تكون مساسق بين البيت والمحطة تتابع القطر وصل وين يكون اربع خمس مرات تمشى المحطة
وايضا من هذة القطار قطار كريمة وقطار حلفا


امشى السكة حديد دبر تذاكر سفر لاننا استنفدنا استحقاقنا(استحقاق الوالد فى التذاكر السنوية)او اذهب للنادى بالليل تجد فلان او علان او شوف كمسارى الفرملة منو عشان تركب فى القمرة الخاصة بهم حتى محطةالذيداب خلال تلك الفترة كمسارى التذاكريكون انتهى من عملة(اصلو الملح حلو) بعدها

تبدا بعد ذلك مرحلة البحث عن شلة للجلوس معها حيث لايكون هناك سابق تنسيق على السفر وسهرة ربما تكون غناء او احاديث سخنه فى الكورة او السياسة حسب الشلة
احيانا تجد شكلة قوية دا مكانى دى كرتونتى ماتقعد هنا
ربما تكون طرفا فيها او متفرج على الشكلة
وتبداء الرحلة محطتين ثلاثة يبداء التعارف والونسة وعيييك لحدى الخرطوم
تخريمة
فى حاله عدم وجود تذكرة (يالسطوح جاك واحد) سطح القطر احلى حاجة وهو برنامج فى حد ذاته خاصة فى الصيف خلال فترة الدراسة بالفرع كان محبب لنا السطوح لانا كنا شله اولاد عطبرة الخميس وربما الاربعاء العودة لعطبرة ومساء الجمعة تسافر للخرطوم
وتستمر الرحلة من عطبرة
الدامر
الزيداب
العالياب
جبل ام على
قندتو
....
كبوشية
تراجمة
شندى
......
عدة محطا ت خلوية
الجيلى
الكدرو
القبة وبحرى
والخرطوم
احلى ما فى السطوع( احيانا يكون معك تذكرة رغم ذلك تفضل السطح) المغامرة ومطاردة البوليس
تتشعبط الليل كلة وتنزل
الجلوس على سلم باب القطر
سيل من الرحلات تكاد تكون اربع مرات شهريا طوال فترة الدراسة
كثير من الطرائف
الاحداث الفرح والمبكى منها
.
.
.
.


ومن الرحلات الظريفة
صادف جلوسنا بواحد شكلة كان عريس مرحل عروسة وذلك فى قطار كريمة ومعة والدة العروس
فى المحطات العريس كل محطة عاوز ينزل ويشترى حاجات
والعروس ووالدتها اول مرة فى حياتهم يسافرون
فى شندى نزل العريس وتاخر القطار
تحرك القطار
وين العريس (حسين)
والناس تسال بعد سوال والدتهم
الناس يعجبوك

العريس لسة ما جاء
تجيب الحاجة باسى
لسة
وراسهم للشباك
يكون تحرك القطار وركب فى عربة اخرى سوف يحضر فى المحطة القادمة
والبعدها
والبعدها
العريس ما جاء
..
.
.
.
القلق
.

.
العروس وامها بقية الرحلة راسهم بالشباك
.
.
.
.
ربما يكون العريس جارى مع القطر
.
.
.
محطة.
.
.
التالية
.
ولم يظهر العريس

محطة.
.
.
التالية
.
ولم يظهر العريس
.
.
.
تدخل واحد من الشباب بشهامة
مافى مشكلة ياحاجة بيجى
ماتقلقوا
وصلنا لمحطة الجيلى
العريس ما جاء يسال احدهم
لسة ماجاء والحاجة والعروس راسهم بالشباك
.
.
.
.
الكدرو
القبة
بحرى
.
.
.
العريس ماظهر.
ـــــــــــــــــــــــــــــــــــــــــــــــــ.
.
.انهارت العروس
تبكى



و(الوش) من كثرة المعاينة بالشباك
خليه ساكت


التراب مع الدموع


قناع من طين
ـــــــــــــــــــــــــــــــــ
فى بحرى
كان فى انتظارهم شخص بالمحطة
ـــــــــــــــــــــــــــــــــ
القطارت تكون معك قصة تنتهى بنهاية الرحلة
دون ان تعرف كيف اخرها


والعريس مامعروف
يمكن يكون ماجاء حتى الان ،،،،،،

يا قطار الشوق .....


.....
واحد يلحقنا بالاغنية .......سريع

ناجي باشا
اهداء بقامة اهل الحديد والنار والعجلات للاخ عبد المنعم عباس وكلللللل الحلوين

و هنا ..
هنا فقط ..
يستقيم العود و الظل ..
تلك المنازل بقبابها ..

الآن عندما تهيج الذكرى .. تجف كل ينابيع الحاضر .. و تبدأ مقارنة الماضي بالحاضر .. و شتان شتان ما بيه ذاك و هذا ..

هناك .. بين تلك القباب .. أخذنا أول درس في معنى التسامح و أن نعيش إنسانيتنا المجردة من كل شيء إلا الإنسانية ..
شكرا يا ملك .. فقط حفزتني الصورة لقصة كانت ترقد منزوية في ركن قصي ..
واصلوا يا شباب

فوق



فوق

عطبرتنا


فــــــــــــــــــــــــــــــــــــــــــــــــوق

...عمر الفاروق .....

تشكراتى ,,,وتسلم


.....
رجاء بس لو كانت بصوت البلابل

.....

عشان نبكى شوية

.....
الاحبة دوماً ,,,,العطبراب....
.....
لحين العودة ببقية الصور
....
....
ارجو ان لا تتوقفوا عن الكتابة وإجترار الذكريات
....
....

ودى لكم جميعاً

يا الملك
عن عطبرة لن احيد
وعن البوست انا بالمرصاد
لكن فربت افتر
حتى لايسقط
كن دائما متابع حتىنصل الف مداخلة وبعدها نشوف
مع تحياتى

العطبراوي قبطان الاغنية الوطنية

عملت بالتمريض والتجارة والجزارة وانتهى بي المطاف مغنياً

عطبرة مدينة السحر والاسرار .. فيها تفجرت مواهبي وسأبقي ملتصقاً بها حتى الأبد

الازهري الذي حملته الجماهير هو وعربته قال لي «ليتني كنت فنانا»

بسبب «الضواحي» نلت علقة ساخنة ويا غريب يلا لي بلدك سجنتني لــ 3 اشهر

تغنيت للبكباشي عبد الله خليف وابو داؤود اقرب الاصدقاء الي نفسي

اشجع الهلال واتغنى له وأعفر اقدامي بمحبة المريخ حين يعود منتصراً

حوار : محمد مجذوب

للوهلة الأولى ظننت ان الخاطر الذي شملني وسيطر على جميع اقطاري لن يكون سوى طيف عابر او مجرد حلم يومض داخلي ويدفعني دفعاً لعبور محطات العمر وإجتياز برزخ التاريخ.

انا ألتقية هكذا ودون سابق ميعاد ذاك ما أخافني وفجر تواتر الاستفهامات وقذف بي في بحر اللاإجابة حيث لا ساحل ولا مرفأ..

هل من المفروض ان ابحث عنه.. وماذا اقول له هل اتركه وامضي؟ ام اشرع اوراقي ومدادي وابحر لمضايقته بالأسئلة كأي بحار فضولي؟.

هل اقترب منه ام أبتعد أكثر واترك ذلك لمن هو أهل له..؟ هل وام وهل وام وكلها تدور حول حلقة مفرغة واجد شيئاً واحداً هو انني ـ الآن ـ اطرق على باب ذاكرته والرجل يلتقيني هاشاً باشاً في داره العامرة وعطبرة المدينة بكل تاريخها ونضالها.. فنها وإبداعها احسها كأنها ترهف السمع لخفقات قلبي ومع ذلك تستبقيني فيطيب لي المقام باللقاء العطبراوي ذلك الصاري الشامخ ومشيد صروح الأغنية الوطنية.. كان طريقنا للأحلام والآمال الكبار.. الخبز والحرية وبزوغ الفجر وموعد الصبح الجديد.

ذلك الطيب الذي اشاع فينا مهرجاناً للقيم وشكل بأنغامه الفريدة والمتجددة وجدانا وصاغه على مرتكز من التجرد والإلتزام والإنحياز للحق.. للذي يجب.. وبرائعته «انا لن احيد».. وهو نفسه من خرج شاهراً عذب أغنياته حيز الإكتمال غير المسبوق.. حين تعانقت روائع كلماته ياغريب يللا لي بلدك مع اللواء الأبيض ومؤتمر الخريجين وغيرها من ثمود الرائعين.

وهو العطبراوي عينه الذي حين اشكل على مؤسسات الثقافة لون الوطن وطعمه ورائحته وتوزعت بين المدارس «ابادماك والغابة والصحراء» ـ خرج عليهم بغنائيته النافذة «انا سوداني» مؤكداً الخصوصية ومجسراً في الوقت ذاته لمعنى الهوية حسن خليفة العطبراوي فنه وحياته يؤكدان انه من أكبر المجددين على مر تاريخ الغناء السوداني وانه قنديل من العطاء مضاء أثرى اللب والوجدان ولهذا حق لنا ان نتوب عن ضراعات شعب كامل يتلهف لمعرفة اسراره وسحر ابداعه الدفين وان نطلبه كي ينثر اوراق عمره المديد بإذن الله على صفحات مطبوعتنا ويحيلها الى حدائق ناضرة بعاطر سيرته.

طفولة ونشأة

قلت له لتقل ما تريد عن محطات العمر الزواهر وقوفاً عند البدايات؟

ـ حسن خليفة الفضل المشهور بالعطبراوي قالها والزهو يطل من بين جوانحه في شديد الإعتداد بعطبراويته ويردف من مواليد عطبرة سبتمبر عام 1921 درست الخلوة وتعلمت القرآن والتجويد علي يد الشيخ حمزة محمد حامد ومن ثم التحقت بالمدرسة الشرقية الإبتدائية التي تخرجت منها في بدايات العام 1936م.. وهو العام نفسه الذي التحقت فيه بالمصلحة الطبية برفقة اربعة آخرين وتم توظيفنا كممرضين بمستشفى عطبرة العمومي.

(مباغتاً قلت).. ولكن هذا الطريق لا يقود الى الفن؟

ـ قال: ان علاقته بالفن بدأت بالعزف على العود منذ ان كان طالباً وانه واصدقاؤه كانوا ينفقون ما يتبقى من اليوم الدراسي في الاستماع الى روائع كرومه وسرور وابراهيم عبد الجليل وعبد العزيز مصطفى ومحمد الأمين بادي بالإضافة الى روائع ابراهيم عوض وخليل فرح والتي كانت بطرف الصديق ابراهيم عثمان سيد أحمد والذي كان حينها صنائعياً بالسكة حديد ويسكن حي المربعات ـ مستدركاً ـ لقد كان بيت الرجل استديو متكامل للفونغراف والأسطوانات.

وعن اولى الأغنيات التي رددها بإعجاب وترنم بها طويلاً يقول؟

ـ ان اغنية الضواحي وطرف المدائن كانت اولى الأغاني التي شغف بها حباً وانه حين كان يرددها يشعر ان العالم اجمع يسمعها ولا يمل ترديدها ويذكر انه قبض عليه ذات مرة متلبساً بترديدها فطالبه ناظر المدرسة بكتابتها على التختة وما ان فرغ من ذلك حتى جلد بسببها عشرين سوطاً.

مصر المحروسة

وعن مصر احدى المحطات المهمة في حياته سألته فأجاب؟

ـ اخي الأكبر كان من سكان الإسكندرية قصدته وبقيت معه قرابة السنتين وهناك استمعت للكثير من الروائع المدهشة وصقلت موهبتي في العزف كما تعرفت على الأوركسترا عن قرب.

وفي مصر مكثت حتى العام 1939م عام ضرب الإسكندرية بقنابل الحرب العالمية الثانية.. ومن ثم عدت للسودان والإستقرار فيه من جديد.

وكيف وجدت عطبرة مسقط الرأس حين عدت اليها؟

ـ كما هي (قالها ككلمة اجراها الله على لسانه).. واضاف: بحثت عن العمل فور وصولي. فكان ان التحقت بشركة إيطالية تستثمر في«بعو الدوم» وتصنع منها الزراير.. صاحب الشركة كان اغريقياً واسمه شيكارغرو وكانت له اهتمامات بالفن. ومعه عملت كفني منشار ثم انتقلت للعمل في المدقاب. وفي الأقسام المختلفة تعرفت على عدد من أبناء عطبرة لهم ميول فنية فاتفقنا علي تكوين فرقة.. وانضم لنا عدد من الشعراء منهم محمد سليم النجار شاعر الوادي السعيد والذي اهداني فيما بعد قصيدته التي يقول مطلعها: السادن المحبوب شرفت للميدان وليك انجلى الشادي وليك رنت العيدان.

قلت وكيف كان اول حفل شاركتم فيه؟

(جال بخاطره بعيداً بعيداً.. ثم افاض كانما استيقظت ذاكرته من طول سبات).. قال: ان ختاناً كان يخص اسرة زميله المحاسب توفيق زيدان منحهم فرصة الإطلاله الأولى والتي قال واصفاً لها: مشينا غنينا واشتهرنا وبقى أي واحد عنده مناسبة يطلبنا وبقينا متكيفين خالص من الحكاية دي.. ويمضي العطبراوي في حديثه قائلاً.. بعد ذلك تكشف لي نهمي الكثير للاطلاع والحفظ وكانت اولى ثمار هذه التجربة الإنفتاح على إبداع الخارج وكلمات الأغنية الكبيرة «في الأسى ضاعت سنيني» والتي التقطتها عيني من مجلة مصرية وهي لشاعر مصري تغنيت له دون ان اعرف حتى اسمه والأغنية ماتزال بمكتبة الإذاعة.

(مقاطعاً سألته).. من تذكر من رواد تلك الفترة ادباً وغناء؟

لم يكن هناك مغنٍ غيري.. كان هناك كورس يتنقل معي لإحياء الحفلات بين مدن بربر والدامر وعطبرة وكانت توجد مجموعة من الممثلين امثال عبد الرحيم عبد الله والرشيد مهدي الذين تعاونت معهم حتى تمكنا من عمل اول فيلم سوداني بعنوان آمال وأحلم.

وعن الرحلة من محطة الوطن الكبير عطبرة الى ام درمان والإذاعة والتلفزيون يقول الأستاذ العطبراوي؟

ام درمان كانت قبلة المبدعين وما تزال ومنها تنطلق قطارات الشهرة والتعريف بالمبدع اينما كان ومن حيث اتى.. زرتها للمرة الأولى مع وفد فني يقدم الإبداع ككوكتيل متنوع غناءً وتمثيلاً وفي نادي الخريجين قدمنا عروضنا التي سبقتها الدعاية والترويج اللازمين عبر الإذاعة والتي كان مقرها حينذاك بيت الأمانة وكان يديرها السيد متولى عيد اما ابرز المذيعين الذين كانوا فيها عند منتصف الأربعينيات فهم محمد صالح فهمي ومبارك ابراهيم وعبد الرحمن زياد وحلمي. بينما كان علاء الدين حمزة ومؤمن فضل الله وعازف العود مجذوب الشيخ من اوائل العازفين وبالطبع كان كرومة وسرور والكاشف وعبد الحميد يوسف وعائشة الفلاتية ومنى الخير وابراهيم عبد الجليل اشهر الفنانين.

وفي الإذاعة قدمت اغنيتين على الهواء احداهما «الننو مالو» والأخرى لا اذكرها وحالما فرغت من ادائهما هنأني الأستاذ متولى عيد وأعلن ترحيبه بي في أي وقت على الملأ ومن مايكرفون الإذاعة وبعدها قفلت عائداً الى مدينتي الحبيبة عطبرة.

اول الغيث

مع الأغنية الوطنية صرت أكثر ذيوعاً.. ـ قلت له ـ فما هي الأغنية التي إبتدرت بها عزفك على الأوتار؟

يقول العطبراوي: تغنيت للأستاذ الطيب حسن الطيب اول سكرتير لنقابة السكة حديد بقصيدة ياوطني العزيز يا أول وآخر.. فأعجب بها الكثيرون وقد كانت بادرة محطاتي مع الأغنية الوطنية اعقبتها اغنية «انا سوداني» والتي ارسلها لي صاحب ديوان رياض الأمل الأستاذ محمد عثمان عبد الرحيم الموجود حالياً برفاعة وكان اسمها في ديوان الشعر «السودان» وبهذه الأغنية واغنية عزة في هواك بالإضافة لأغنية وطني العزيز ارتبط اسمي بالأغنية الوطنية.

وماذا عن العطبراوي اللقب الذي مايزال سارياً؟

لقب العطبروي اطلقه علىَّ عازف كمنجة في الإذاعة واسمه حسن فرح بعد اول اغنية سجلتها وحين سألوني عن اسمي تكرم بالإجابة إنابة عني وقال انني حسن خليفة العطبراوي ومنذ ذلك الحين سارت علىَّ التسمية.

الأحزاب والسياسة ومسيرة العطبراوي والإرتباط بالغناء في الليالي السياسية؟

يقول العطبراوي: لم اكن آبة بالسياسة اول عهدي ولاحقاً انضممت لحزب الأشقاء والذي كانت تسيطر انشطته وبرامجه على انسان عطبرة فحزب الأمة حينها لم يكن موجوداً بذات القدر.

تأثرت في بداياتي بأفكار الوحدة تحت التاج المصري وسرعان ما قلّ اهتمامي بالنواحي التنظيمية لاتفرغ بالكامل لعملي في«الجزارة» بسوق عطبرة واحياء الليالي الغنائية وحدث ان قرأت قصيدة بجريدة الصراحة لمحي الدين فارس فكانت اغنية «انا لن احيد».. وهي دلالة على ان خيطاً خفياً يوجهني نحو الأغنية الوطنية دون التزام سياسي بعينه وهذا ما أحببته وفضلته حقاً.

ومع ذلك تعرضت للسجن والمضايقات من حكومة المستعمر.. كيف حدث ذلك؟

سكرتير حزب الأمة الشاعر عبد الله بشير ودونما قصد اهداني اغنية «ياغريب يللا لي بلدك» التي اثارت حفيظة الأخوان في حزب الأشقاء لأن مفرداتها قريبة المعاني لشعارات حزب الأمة وقتها والتي كانت تنادي بأن يكون السودان للسودانيين. من خلال هتافات.. انزعوا العلمين..

ويللا امشوا.. انجليز ومصريين

ـ يواصل العطبراوي ـ وكنتيجة طبيعية لاختلاف الأحزاب قامت الليالي السياسية التي تندد بالسياسة الاستعمارية وتطالب بجلاء المستعمر. وفي ليلة منها بالدامر قدمت اغنية «ياغريب يللا لي بلدك» وسمعها مستر ماجن مدير المديرية.. بعد ان تكرم بعض الأخوان السودانيين (عفا الله عنهم) بترجمة كلمات الأغنية للخواجة الذي امر من فوره باعتقالي.

الطريق الى المعتقل

وماذا عن تجربة الاعتقال والتحقيق والأحكام بالسجن؟

يقول العطبراوي بعد ان اصدر القرار باعتقالي اخذني عساكر المامور ولكن الطريق الذي يمر بك الى السجن يلتقيك ايضاً ببعض ابناء الوطن الشرفاء ومن هؤلاء كان توفيق صالح جبريل والذي لم تمنعه وظيفته كنائب مامور من مؤازرتي فقد قال لي بالحرف الواحد: «اركز وما تخاف من الخواجة الجزمة دا» كتر خيرو كان راجل مواطن ـ قالها العطبراوي ـ وكانه يتحسر على غيره مِن مَن ارتبطوا بالمستعمر.

ليضيف: وهناك في مكتب والي الولاية الحالي دا بمدينة الدامر تم استجوابي بواسطة خواجة ينطق باللغة العربية فسألني

انت جيتا هنا ليه

ـ فأشرت بيدي متسائلاً وين..؟

اضاف .. هنا في الدامر..؟

ـ فقلت هذا بلدي.. فضرب التربيزة بقبضة يده وامر بحبسي

ولكن قيل ان الدامر وأبناءها خرجوا لمؤازرتك حتى خرجت من السجن كبطل؟

ـ رد العطبراوي لا انكر فضل المجاذيب والشيخ احمد البشير المجذوب ضابط التعليم في المديرية. الذي استنفر اهله المجاذيب في الدامر وخرج بهم في موكب حتى مكاتب المديرية وهناك طلب منهم اخلاء سبيلي او تصعيد الأمر حتى السكرتير الإداري والذي يعادل وزير الداخلية حالياً ـ قالها العطبراوي موضحاً ـ واضاف أخيراً حكم علىَّ بثلاثة اشهر اشترط معها اهلى المجاذيب ان لا ادخل مع المساجين وهو ما حدث بالفعل وبقيت مع الكراكون حيث وفرت لي مرتبة وبطانية ووجبات منتظمة ولم تمنع زيارتي.

وقبل خروجي زج بعدد آخر من الشرفاء من عمال السكة حديد من بينهم عبد القادر سالم الرجل الذي كان يجيد التقاط قنابل البمبان قبل ان ترتطم بالأرض ويعيدها مرة اخرى للعدو فتوقع ضحايا بين افراده.

كذلك اعتقل المناضل الشفيع احمد الشيخ والمناضل قاسم امين وحوكم كل منهم بعامين سجناً وحينما حان وقت خروجي من المعتقل اطلقت العبارة الشهيرة التي ظل الكثيرون يتندرون بها وقلت فيها «الناس اللي انا طالع عشانهم وماشي ليهم في اتبرا جابوهم لي هنا».. وما ان علم المجاذيب بموعد خروجي حتى احضروا لي توفيق صالح جبريل الذي ترجاني ان اطلع وفي نفس يوم خروجي احييت حفلة في النادي الأهلي دون غيره لأنه النادي الذي حلقت فوق فضائه ارواح خمسة من العمال الشرفاء ضربهم المستعمر بالقنابل في ليلة سياسية شهيرة احياها القيادي بحزب الأشقاء محمد نور الدين. وكانت هذه الأرواح الطاهرة وغيرها مهراً للاستقلال وثمناً لنيل الحرية.

ثم ماذا عن ازهري والإعلان من داخل البرلمان؟

ـ يقول العطبراوي: ازهري ذاك رجل.. وانا اعرفه وأقدره حق قدره. فقد كنت رفيق انسه في رحلته للتبشير باستقلال السودان وزرنا الشمال حتى حدود الأقاصي وفي مدينة الدبيبة احتفى بي الحضور أكثر من الأزهري نفسه وطالبوني بتقديم وصلات غنائية فما كان من الزعيم الأزهري الا ان همس في اذني قائلاً: ياريت لو بقيت فنان.

واسرتك ألم تعارض توجهك الفني خاصة بعد ان جرَّت عليك الأغنية الوطنية بعض المصائب؟

ـ (يسرح بعيداً كانما يلاحق فكرة عصية.. وما يلبث ان يقول) منذ البداية عارضني الذين ارتموا باكراً في احضان الإستعمار فأبي رجل حارب الاستعمار وما يزال اثر الجرح بأعلى كتفه وحين كانوا يقولون له انت ياخليفة ما تمسك ولدك دا طالقوا يشتم في الحكومة.. كان يرد يقول: انا عاوزه يكون زي كدة غناي ووطني تمام.

ولهذا شعرت بعد إعلان الأزهري للاستقلال ان طريقي وأبي وبقية الوطنيين هو الذي انتصر ورد على كيد المتربصين.

والأغنية العاطفية ألم تكن الفرصة سانحة لها بالكامل بعد نيل الاستقلال؟

ـ يجيب العطبراوي: في الأصل انا لدي الكثير من الأغاني العاطفية الا ان الناس اعتادوا أكثر على الأغنيات الوطنية لدرجة انهم حتى في مناسباتهم الاجتماعية الخاصة يطلبونها. وكانوا يطلقون عليها غنوة الحرب.

قلت للأستاذ العطبروي: يتهمك البعض بالغناء لكل الحكومات.. فماذا تقول..؟

ـ الفريق عبود هو الذي طلبني ـ قالها بثقة ـ واضاف لقد ارسل لي المرحوم طلعت فريد وزير الاستعلامات والعمل حينها وذلك للمشاركة في حفل افتتاح الإذاعة حيث قدمت اغنية انا سوداني ولم اتغن لعبود شخصياً.

واكتوبر كيف عايشتها؟

ـ كنا في عطبرة وهي مدينة اشتهرت بالمقاومة والصدام وعندما تفجرت ثورةاكتوبر كان لهيئة السكة حديد ونقابات العمال القدح المعلي.. اما انا فقد كان نصيبي قصيدة كتبتها ويقول مطلعها:

ساد الشعب في اكتوبر كالسيل الجارف لما سار

لا تهاون بعد اليوم لا أحلاف ولا استعمار

ونميري ومايو وتكريمك؟

ـ (بقليل ضيق رد العطبراوي بقوله): نميري دا راجل ما ساهل قبل اشهر سمع انني مريض فما كان منه الا ان زارني وهذا يعني ان علاقته بالآخرين ليست مرتبطة بالسلطة وتمجيدها. فالرجل سوداني بمعنى الكلمة وهو نادر الوفاء ويبادر لمشاركة الناس في السراء والضراء وكلنا بشر وفينا الخطاؤون وخيرنا كما يقول الأثر التوابون.

والإنقاذ ماذا قدمت لك؟

ـ الإنقاذ كرمتني بوسام النيلين الرفيع قلدني اياه الفريق البشير بمناسبة اعياد الإستقلال. وهو بمثابة براءة من خدمة الدولة كما تم تكريمي ايضاً بوسام العلم.

اذن مع من السياسيين كنت اكثر ارتباطاً؟

ـ الأزهري كما أسلفت (يقولها العطبراوي بمحبة خالصة ويواصل): لم أكن الوحيد الذي يحبه واذكر انه في زيارة له بمدينة عطبرة وكان يركب عربة الحاكم العام. حمله المواطنون هو وعربته من فرط حبهم له ـ يضيف ـ هذا هو الأزهري الذي احببت وهو رجل يحب الشعر والغناء ويواصل الناس وكان زعيماً حقيقياً، مازلت اذكره وهو يرتدي الدمور ويركب عربته القديمة وحين كنت ازوره لم نكن نتحدث عن السياسة. فقط نتناقش في الفنون والآداب.

والمحجوب السسياسي الأديب..؟

ـ علاقتي بالمحجوب نفسها جميلة ــ هكذا عبر الفنان حسن خليفة ـ ومضى يقول لقد تغنيت بثلاث أغانٍ للمحجوب وجميعها مسجلة بالاذاعة. وللمحجوب اشعار بالفصحى تتفوق على اشعار الكثير من الشعراء العرب، ويكفيني انني تغنيت له باغنية «البعيد القريب» و«أذكريني» والأخيرة من أروع الاغاني ولكن للاسف لا خبر لها في الاذاعة.

قلت للعطبراوي. ابوداؤود كان الاقرب الى نفسك.. ليتك تحدثنا عنه.

اعترف ـ ابتدر بها العطبراوي رده واضاف ـ ابو داؤود واحمد المصطفى وحسن سليمان وحسن عطية كانوا اصدقائي وصحيح ان الراحل عبد العزيز داؤود كان اقربهم الى نفسي وذلك بحكم النشأة والمواطنة فالراحل العزيز من اهالي بربر وكثيراً ما كنا نقوم سوياً بالجولات الفنية ونطوف معظم ولايات السودان غرباً وشرقاً. وشمالاً وجنوباً. وللرجل عبقرية مفرطة في الاداء والتطريب والتلحين تجعل فنه وابداعه خالداً على مر الازمان. وقد درجنا طوال حياة الراحل بعد ان استقر في الخرطوم ان ازوره واقضي معه نحو عشرة ايام ليأتي هو ويردها لي بمدينة عطبرة التي يعرف عشقي لها ورفضي لعروض الزعماء ازهري وعبود ومديري الاذاعة والتلفزيون بشأن الاستقرار في الخرطوم والراحل المقيم كان اخي الذي لم تلده امي فقد كان عظيم الخلق ونادر المثال.

وعن العلاقة بالاذاعة والتلفزيون حالياً سألت العطبراوي؟

(صمت هنيهة وطبقة من الحزن تكسو وجهه، ثم مالبث ان قال): انا ناقم كثيراً على الاذاعة والتلفزيون فالاولى لم تعد تبث الكثير من اغنياتنا واصبح العاملون فيها «ما يجيبوا خبرنا» - ومستدركاً قال - كتر خيرهم عوض جادين وكمال عبادي والاخير كان مدير الاذاعة هنا. فرد الوفاء بالوفاء وحضر لعمل حلقة لصالة العرض استضافني فيها ورد بها بعضاً من روحي اما التلفزيون فقد كان في الزمان السابق يبعث لنا بتذكرة الطائرة للحضور الي الخرطوم والاقامة بافخم الفنادق وكنا نسجل الاغاني منذ ان كان المبنى الرئيسي للتلفزيون عبارة عن كشك يتبع لفندق تملكه هيئة مرطبات السكة حديد.

في الرياضة

وعن الهلال والانتماء وتأثير ذلك على شعبيته (قذفت بالسؤال مصوباً نحو الايقاع به؟)

وبهدوء اجاب: انا هلالابي منذ الصغر ومع ذلك احتفظ بعلاقات مودة مع المريخاب اكثر من الهلالاب. واحسن الفصل بين الانتماء المعقول والتعصب وقد نظمت الكثير من الاشعار في تمجيد الهلال وابنائه على مر المراحل. فقد كتبت فيه:

هلال العظمة هلّ علينا

اصدح وغني يا شادينا

وافرح بي بطل وادينا

وعن المريخ يقول العطبراوي: ايضاً اشارك ابناء المريخ انتصاراتهم فعندما احرزوا كاس سيكافا وكنت حينها في الخرطوم هنأتهم كما خرجت جماهير الهلال لاستقبالهم بالمطار. كذلك وعند زيارة المريخ الاخيرة لعطبرة كرمني سكرتير النادي ومنحني جائزة مالية كبيرة جداً. فانشدت قائلاً:

افرح انت يا سودان

اكتب انت يا تاريخ

اشهد انت يا ميدان

واحني الهامة للمريخ

على خفيف مع العطبراوي

- متى تفرح؟

لفرح الناس وخيرهم اسعد.

- ومتى تحزن؟

عندما لا استطيع تقديم العون.

- النقد كيف تراه؟

اعرفه في شخص ميرغني الكبري.

- والخرطوم كعاصمة للثقافة؟

نحن اهل الثقافة واهل العربية.

- ماذا يعني لك البحر؟

يعلمني النقش على الاوتار

- والامل؟

ظمئي اليه لا يرتوي.

- الطموح؟

دائماً ما يقودني احساسي الخارق الى حيث اجده واجني من ثماره.

- والشعر؟

تعجبني القصيدة التي تبحر في الغزل العفيف. كالقلب الذاكر التي تغنيت بها وهي من اشعار البنا.

- الوطن؟

اتمنى ان اتوه في عشقه حتى حدود النهاية.

- الاسرة الصغيرة؟

وحدها تستطيع ترتيبي حيث الدفء والامان.

- كلمة اخيرة؟

اشكر لكم قدومكم ووفاءكم للمبدعين.



منقول من صحيفة الاضواء






















[email protected]

......
محطة القطار ....عطبرة

هنــــــــا

...فى هذا المكان بالذات ...تبدأ الاف الصور فى ,,,التكرار
....هنا كنا نجلس سوية ...للقراءة ....فى موسم الإمتحانات
.... جميعنا .....وبما أن لم نكن نرى الكهرباء إلا فى يوم واحد من الإسبوع ....فعطبرة وقتها كان يسودها ...ظلام متعمد ....
....كانت للقراءة والمذاكرة ....طعم خاص مختلف .... حتى عند إنقطاع الكهرباء من المحطة ...
.....نجلس أمام القاطرة .....وووووونغنى ,,,,,,اياااااااااااام

مكاتب الشحن ........وادارة الحركة .....وناظر المحطة

.....
.....

......
......

....
....

....
أسف للتكرار ....
....

.....
.....
ومن هناك فى الأفق ...الصهريج بلون اسود ...على اليسار ...تنطلق الصفارة كل يوم ......بعدد ساعات العمل
والراحة
......
صباحاً مساء

....
صوالين زمااااان او ما تبقى منها ....بالخلف ادارة السكة الحديد ...عطبرة

...مبانى البوستة

...شارع حى المطار ....ينتهى فى الكوبرى الجديد جنوباً ....

.....
.....
من هنــــــــــأ
.....
.....

؟؟

...كمبونى عطبرة ....الروضة اولى وتانية .......ذكريات طيبة ...واناس لا ادرى اى هم الان
....

ملجة الخضار ....السوق

...الجزارة .....تانى يوم فى عيد الأضحى

Quote: ......الجزارة .....تانى يوم فى عيد الأضحى

والله يا ناجي لو ما كتبت تعليقك ده ..كنت شلت حالكم يا ناس عطبرة وقلت الناس ديل هنود ونباتيين ..ليكم التحية

...سوق العناقريب ....لعناية من طلبها ....الأخ عادل عبد العاطى ...

...سوق العناقريب
..............البروش .............
ولعناية عادل عبد العاطى

...كوبرى ...عطبرة الجديد .....

...من أماكن متعددة .....

.......................

صورة (1)

.....الجانب الاخر من الكوبرى .....

.....لوحة جسر نهر عطبرة .....

دخول عطبرة .....

وووادعا عطبرة .....

...وكوبرى .....عطبرة

وماسيبو عطبرة .....

ونهـــــــــر عطبـــــــرة

فى موسم الجفاف
.....

.....

وعطبــــــــــــــــــــــــــــــــــرة

لكم منى خالص الود ....ولعطبرة خالص الوجد والحنين ....
....
الى حين عودتى ....أرجو فقط أن لا تبخلوا على بمداخلتكم ...وإنشاء الله بس ما أكون قلبتا المواجع

.....
مودتى

ناجى الزبير الملك
1/2/2005
الخرطوم

روابط ابناء عطبرة بالجامعات
العلاقات الاجتماعية الحلوة لابناء عطبرة
وكل من احتك بهم يعتز بها
ناس عطبرة من الاخرين حلوين جدا
تعال شوف فى الجامعات
اضعف الروابط واقلهم نشاطا رابطة ابناء عطبرة
فى اوائل الثمانينات بالفرع

كل الروابط حيوية ونشاط
الا رابطة ابناء عطبرة
لماذا يا ابناء عطبرة

؟


؟
؟
تجد كل ناس عطبرة نتشرين خلال الروابط الاخرىكاصدقا ء ومحبوبين جدا كافراد
نادينا بذلك خلال تلك الفترة فى ان تكون الرابطة كيان محسوس له نشاطة
تجى الاجتماعات لللجمعية وانتخاباتها
يبرز الصراع الحزبى
وتتفركش الشغلانية
وهذا صوت لوم ياروابط عطبرة الطلابية

وتحياتي لعادل

العزيز ناجى

الصور الرائعة وخلفية قطار الشوق
تهيج الذكرى.....
وين يا ناجى السينمات الثلاثة
الوطنية... الجمهورية ... السينما التحت
جنب دار الرياضة.
وكذلك الاندية الرياضية.
شكرا لك مرة اخرى على هذا البوست الجميل.

احمد داود NZ

الفن والادب بعطبرة

تجربةالفنان المبدع خوجلي هاشم

سبق ان ذكرت في مقالي السابق ارتباط الاغنية العطبراوية بالفنان العملاق حسن خليفةالعطبراوي وما جره ذلك من مفهوم نمطي ضاعت معه الكثير من الحقائق في مسيرة الاغنية العطبراوية وغمط بعض المبدعين الآخرين حقهم في تعرف الآخرين عليهم0

ولذلك شرعت في - في محاولة متواضعة- لنفض الغبار عن بعض التجارب الابداعية التي صاغت الوجدان العطبراوي بابداعاتها القوية0 كنت حريصا على أن أشير لهولاء الذين كانت الخصوصية هي ديدن تجربتهم ولم ينجرفوا بكلياتهم نحو التقليد، ولذا كانوا اضافة حقيقية في مسيرة الابداعالعطبراوي0 وللحق كان حسن خليفة العطبراوي هو أول من خط هذاالمسار حتى حينما أجبر العاصمة على سماع صوته تم ذلك وفق خصوصية تجربته علىالمستويين "الغناء الوطني والعاطفي"0

ظهر الفنان خوجلي هاشم الى حيز الوجود الابداعي - تقريبا - في بواكير عام 87 من القرن الماضي ،وكان وقتها ابن السابعة عشرة من عمره يافعاً يصدح ببعض الاغنيات المألوفة مثل بعض أغاني الحقيبة "طبعاً اهواك وأنا ارضى هلاكي" ، أو "جسمي انتحل" للفنان ابوعركي البخيت00 وغيرها من الاغاني0 كانت بالطبع بدايات عادية، الا أن اكثر ما لفت الانظار نحو هذا الفتى اليافع هو جمال صوته وقوته في آن0 كان مزيجا من التطريب والشجن0 له قدرة فذة على اختراق الوجدان واثارة مكامن الشعور الحية0 كان من الواضح أنه يبشر بموهبة واعدة فوق التصور والاحتمالات، ولذلك لم يلبث أن باغت أهل عطبرة بأغنية كان قدرها أن تهز كيان وقارهم وتزلزل أعماق مشاعرهم، كانت هي أغنية "لمن دنت ساعة الوداع" ولا يستطيع الشخص مهما أوتي من بلاغة أن يصور مدى تأثير هذه الاغنية وقتها على الشارع العطبراوي ولا يلم بمقدار حفرها عميقا في الوجدان العطيراوي الا من عاصرها وقتها0 كانت بالفعل أغنية غريبة ممعنة في الشجن واللوعة0 ورغم أن كلماتها بسيطة ومباشرة الا انها كانت من الصدق والشفافية بحيث أنها شكلت زلزال عاطفي وقتها0 خلقت هذه الاغنية وما تلاها من أعمال حميمية بين خوجلي كفنان واعد وجمهور عطبرة الذواق بشكل لافت للنظر 0 ولفتت موهبته المبكرة أنظار المهتمين بالابداع والاغنية في عطبرة ولذلك تحلقت حوله شلة من الشعراء الشباب والعازفين المخضرمين والشباب أيضا0 كان هناك احساسا عاماً ان خوجلي موهبة استثنائية ولدت لتعمق مسيرة الاغنية العطبراوية من حيث أنها تتويج لمسيرة الخصوصية التي شكل ملامحها العطبراوي كما أبنا من قبل0

صادف كل ذلك جيل من الشعراء المبدعين وملحن بارع اصبح في ما بعد توأم التجربة الفذة الا وهو الملحن وعازف الكمان البارع "عاكف حسن عدلان"0 باكتمال هذا الضرب من المبدعين تحول دار اتحاد الفنانين بعطبرة الى ورشة عمل ابداعي ضخمة لا تكاد تتوقف فيها البروفات0 ظهر الشاعر الكبير السر عبد القادر قادماً من الزيداب يحمل في معيته بعض النصوص الشعرية التي أصبحت فيما بعد جزءاً لا يتجزأ من الوجدان العطبراوي "بتدوري لوين الغناء 00 بتدوري لوين منتهاه" ، "الكنت قايلوا فات زمان 00 رجعته بطعم الغناء" 0 وهي اغنية شهيرة على مستوى الوجدان القومي بفرادتها أولاً وبما شكلته من جدل تمثل في قرصنة الفنان محمود عبد العزيز وبعض الذين حوله من تجار شركات الانتاج الفني بالخرطوم0 وهناك الكثير من الاغنيات التي تتالت من السر عبد القادر لا تسعفني الذاكرة الآن في التطرق لها0 الا أنه من المهم أن السر عبد القادر له قدر لا يستهان به في توطيد بناء هذه التجربة0 توالى الابداع وتتداعى الشعراء من مختلف المدارس للاسهام في الارتقاء بهذه التجربة مأخوذين بهذاا لسحر الدفاق الذي سكن حنجرة الفنان خوجلي هاشم0 وتمضي الايام وخوجلي يزداد تألقاً ورسوخاً ويفعل فعله في الوجدان العطبراوي وذاكرته الجمعية0 ويتألق عاكف يوماً بعد يوم كملحن لا يشق له غبار وصاحب تجربة متفردة على مستوى المفردة اللحنية وتتوالى الابداعات لشعراء متفردين كأمثال معاوية عثمان الطيب ، أو معاويةالشوش كما هو معروف بذلك "شفتك غيمة تسابق غيمة 00 تملأ فراغ الدنيا فراغ" ، والشاعر زكريا عوض في رائعته "بتأملك زي السحابة تمري تبخلي بالسلام" وهي الاغنيةالمشهورة باسم "يا كرنفالات" وهناك الشاعر عادل سعد "عتقني يا عشق البنفسج"0 ولم يتخلف عن الركب حتى هولاء العمالقة الذين تركوا بمصاحبة الراحل العظيم مصطفى سيد أحمد بصماتهم واضحة في وجدان الانسان السوداني، فهاهو الشاعر قاسم أبوزيد يرابط بدار اتحاد الفنانين يرعى هذه الموهبة المتفردة ويسهم في انضاجها فينتجان بمصاحبة الملحن عاكف أغنية "الراكوبة" الشهيرة والتي كانت في بواكير عهد الانقاذ ووقتها تعرض خوجلي لمضايقات أمنية شديدة وأصبحت حملاته مستهدفة من قبل اجهزة النظام القمعية0 لم يزد ذلك خوجلي الا ثباتاً ورسوخاً0 وتسابق العطبراويين محبة في دعمه ولم يتخلف عن الركب حتى المبدعين الذين يشاركونه المنافسة0 فها هو الفنان الشعبي محمد سعدان يهديه "يا زمن لوين مسيرنا 00 ويا طريق لوين تنتهي" الحانه وكلمات المبدع منعم عقارب0 وكذلك الفنان محي الدين محمد صالح والذي أهدى خوجلي بدوره واحدة من أجمل الأغاني التي تغنى بهافي مسيرته الفنية وهي "ياهوى وحياتك قلبي جريح"0

نواصل 000

الحبيب عبد الخالق
ارسلتني وارسلت البورد الي صمت يجتر الذكريات بسردك الرائع المفصل وذاكرتك "العطبراوية" الرهيبة وليتك لا تصمت.
دا شنو ياود حلتنا .. انت يدك "لفتاوية" كمان؟ مش كفاية رجلك والأهداف الكانت بتسجلها؟
وعندي اقتراح أو طلب .. بما انو "الملك" ما قصر معاك ومعانا بالصور (مع انه ما صور امبكول .. لكن بسيطة بنغفر ليهو لانو "ملك" وماعايزين نتكلم في السياسة .. عشان ما يفصلنا للصالح العام وكدا) ارجو ان تكتب عن ظاهرة "الدافوري" بتاع ميدان الكنيسة وعلى ود سليمان .. تلك المدرسة ذات الأرث التي خرجت الأجيال من من غنت باسمهم دار الرياضة.
اصمت انا لتحكي انت
---------------
محمد

....الاحبة دوما ....

عميق الشوق ....للأسف دعت الضرورة ....لتغيبى فترة من الزمن عن هنا ...حاولوا فقط أن لا تتوقفوا ...هنا
....لا ادرى ....كم من الزمن ساغيب ....لذا لا تحرومنى من دعواتكم ....فهى ما أحتاج اليه فى غيابى .....

.....
الى اللقيا .....وخدوا راحتكم .......
.....
ناجى

الملك.....

شكرا ليك

صور المحطة....هيجت اشجاني "بالسمنة وكدا".... الزول دا وين حسي؟

يفتحها عليك شقيش ما تقبل .. يا ناجي يا ملك

Ya Dr:cg
Alzoal ma saloho galo liho malak batalta kalamak al-lazeez dak , min noo7 bil_samna wa kida. GAL Lihom, Yakhi, Nas Alamn ma harashona wa kida

الاخ كداري
سلامات

والله لي فترة بفكر اكتب عن الدافوري بعلي ود سليمان والكنيسة0 لكن هسة مسيطر على ذهني التوثيق لبعض رموز عطبرة من المبدعين0 وكذلك الابطال الشعبيين الذي لهم نصيب مقدر في صياغة الوجدان0 ولذلك تراني هذه الايام مهموماً بمحاولة الكتابة عن الأخ "الجقر"0 بما يمثله في المخيال الجمعي لحي امبكول0

ولنتابع في الحلقة القادمة مسيرة المبدع خوجلي هاشم0
لك الود
عبد الخالق السر

إذا كان الحكاية فيها وعد بعودة بمزيد ... فمرحب بذلك و أرجو ان لا تطيل الغياب.

-------------
محمد

ينكم ياناس
كدة وبس
ناجى اصحى

لو فى واحدمن
اعضاء البورد
مقيم بعطبرة يرفع يدة

لكن ما طولت خلاص يا عبد الخالق نحنا راجينك!!!

غبت عن عطبرة كثيراً .....سأتى فى الغد للتكلمة

بالمناسبة ...لانو شايف الصور أختفت لو فى زول حابى

....
ارسل ليهو البوم الصور

....
بالايميل ممكن

أرفع يدي فوووووووووووووق يا ناجي
عايز الصور ....
[email protected]

الملك يا ملك و يا حبان

الصور إختفت في ظروف غامضة ..

و برضو رغما عن كدة ( فوووووووووووووووووووووووووووووق )

...ساحاول إعادة كل الصور .....

إن كتب فى العمر بقية