Post: #1
Title: في الاتجاه المعاكس في قناة الجزيرة الان ما يفوتكم غازي سليمان
Author: اساسي
Date: 01-18-2005, 12:13 PM
الحديث عن اتفاقية السلام
غازي سليمان مدافعا عن الاتفاقية
وحسن ساتي مهاجما الاتفاق
والحلقة ماشة علي اسخن
بس غازي مبالغة
|
Post: #2
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: lana mahdi
Date: 01-18-2005, 12:23 PM
Parent: #1
مبالغة بس؟؟
انا منتظرة الحلقة تنتهى و أجي "اتفشا" بى بوست الاقيك "لفحتا"الفكرة؟؟؟
|
Post: #7
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: اساسي
Date: 01-18-2005, 01:11 PM
Parent: #2
الاخت استاذة لنا
تحية
اولا اعتذر للتقاطع الحصل وانا متنازل ليك من حقوق الطبع والنشر لووول
لكن بصراحة ما قدرت اصبر علي غازي الراجل ما عرفتو قاعد في صيوان بكا ولا
في فضائية .... غازي الليلة بقي ولد الحكومة المدلل والبيؤمن بنزاهتا
|
Post: #3
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: ود الشيخ
Date: 01-18-2005, 12:25 PM
Parent: #1
كلنا قاعدين نتفرج ونسمع
|
Post: #8
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: اساسي
Date: 01-18-2005, 01:11 PM
Parent: #3
الحبيب ود الشيخ
الحقيقة انا زاتي كنت قاعد وبستمتع بالدراما السودانية
الز حاجة لما قال ليه ساتي
يا غازي في حاجة اسمها عولمة وكررها بطريقة يا عالم يا هوو
عولمااااااااااااااا
|
Post: #4
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: محمد الامين احمد
Date: 01-18-2005, 12:26 PM
Parent: #1
اساسى طلع اساسى و اخد السبق الصحفى
تحياتى
|
Post: #9
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: اساسي
Date: 01-18-2005, 01:12 PM
Parent: #4
العزيز محمد الامين
اي زول في محلي ما بفوت الشمار دا
شفت الحلقة لذيذة كيف
|
Post: #5
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: نصار
Date: 01-18-2005, 12:41 PM
Parent: #1
العزيز اساسي
كويس انك نبهتني للحلقة و شجعتني بذلك الي حضورها
لاني بصارحة بخجل لمان غازي يطلع علي العالم بكل
فوضته العجيبة دي...انا ما عارف الزول انسان واحد
ولا طلمبة شل!!! غازي رايتو في اي زقاق سياسي
فهو حليف للحكومة و شفنا دا في احتفال المؤتمر الوطني
بالسلام و في اشتراكة في لجنة حقوق الانسان الشكلتها
الحكومة و الليلة طلع حليف استراتيجي للحركة الشعبية
وراكب في سرج واحد مع قرنق،،، و الاقوي من دا كله طارح
نفسه عروبي اسلامي الليلة و دا طرح اليوم الواحد او كلام
الليل فقد سبق ان حضرت له قبل عدة اعوام لقاء مع معتز
الدمرداش رد فيه علي متداخل عربي كان بتكلم عن السودان
في الاطار العربي، قال ليهو منو القال ليك نحن عرب
و المسكين معتز ما عرف يهديهو كيف لانه كان فاير و مدفق
و قمة التراجيدا كانت في رد علي متصل سوداني كان بتكلم
بحس وطني و بقول ليهو انتوا اهل الخبرة مفروض تجدوا
مخرج للازمة الوطنية نطه ليهو غازي و قال ليهو يا خوي
شنو خبرة انت قايلني سيدنا نوح.
دا تحفة يا ابو الاس و الغريبة انه بلقي مساحة يتكلم فيها باسم البلد
|
Post: #10
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: اساسي
Date: 01-18-2005, 01:16 PM
Parent: #5
الحبيب نصار
قبل كم سنة اذكر انه غازي كان زبونا دائما للاعتقال في السودان وكان من اكثر الذين يلعنون سلسفيل الحكومة اليوم رايته مدافعا باستماتة بطريقته الدرامية السوداناوية عن الحكومة حليف قرنق حلفيه شخصيا وكان انسان الشمال كله غازي سليمان يطرح ويجمع ويضرب وقال ثقافة جون قرنق مستمدة من العروبة والاسلام وعاد واستدرك للمداخل المصري
ان السودان ليس عربيا ولا اسلاميا وبعبارته (منو القال ليك السودان عربي واسلامي؟؟)
وفي لحظة من الثانية اثناء مداخلة المصري اشار بيده في علامه (اه) ولكاني سمعته ياخي فكنا بالله
|
Post: #6
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: ابو مهند
Date: 01-18-2005, 01:10 PM
Parent: #1
اها يا اساسي:كل سنه وانت طيب وربنا يحقق اماني الجميع
الناس نبحو وصاحو وماقالوا كلمه مفيده
نريد راي رصين يفند الاتفاقية سلبا وايجابا
Elfatih
|
Post: #12
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: اساسي
Date: 01-18-2005, 01:24 PM
Parent: #6
الاخ العزيز ابو مهند
بامكاني ان اقر لك راي في الاتفاقية بكلمة واحدة وهي (المصداقية)
المصداقية في تنفيذ البنود التي اتفق عليها جميعا لانه اذا طبقت الاتفاقية بمثل ما سيقت فان السودان موعود بان يكون قوة هادرة في خارطة العالم القادم ... الاتفاقية لم تغفل جانبا لم تدرجه ... النظر اليها بتوجس وخيفه يجعلها رهينة الامزجة والمصالح الشخصية في اعطاء الاتفاقية روح الحياة ..حسن النية يتوجب في التعامل القادم مع الامر وليس من جانب الحكومة والحركة فقط بل من جانب كل القوي السياسية السودانية ...
في جانب اخر يغضبني الخطاب العربي جدا في الحديث عن القضية السودانية عموما والقضية الجنوب سودانية خاصة حين يمرون في الحديث عن الامر عبر المصلحة العربية المرجوة وكان السودان هو محض مدخل للنيل من بقية الدول صرت اتمعن جيدا في حديث امثال البعض عن المد العربي وتعاطيه مع الشأن السوداني ..ولي عودة للحديث في الامر في بوست منفصل
|
Post: #11
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: Hafiz Bashir
Date: 01-18-2005, 01:22 PM
Parent: #1
اساسي الشين بتاع الاكوام
نحن ما عندنا تلفزيون .. عشان كدا ما تحندكونا ساكت
اسمع الكلام كويس يا اساسي و تعال ورينا الشمارات
و ما تمشي تلخبتو و تجيبو
و كل سنة و انت طيب
|
Post: #13
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: أبوالريش
Date: 01-18-2005, 01:26 PM
Parent: #11
الأخ أسـاسى والجميـع،
لا أجيـد البحث فى الأرشيفـات السـابقة، ولكنى مرة (بدرى جـدا) ذكرت أن السيـد غازى لا يكون الجزولى دفع الله الإنتفاضـة القادمة.
غازى قال فى الجزيـرة، أن الإتفاق مـع التجمـع ليس إلا مجاملـة للحكومـة المصـريـة!!
الواحـد لا يملك إلا أن يأسـف لموقف التجمـع المـزرى، فحتى حينمـا تريـد الحكومـة ان تجامل، فهى لا تجاملهـم بالإتفاق وإنما تجامل الحكومـة المصـريـة.. هل هناك إهانـة مثل هــذه؟ لكن بدون شمـاتـة، التجمـع يستحق أكثـر من هـذا.. وهـم الأن قادمون للخـرطـوم ولسـان حالهـم يقول:
أيهـا البشيــر، ســلم الـ 14% تسلــم.
كما أن غازى قال فى نفس المقابلـة، مبررا نظريتـه التجامليـة أعلاه، أن المعارضــة فقـدت كل المبـررات فى عـدم العـودة إلى البلاد بعـد هـذه الإتفاقيــة، ونسـى أن يذكـرنـا أن جون قرنق نفسـه لم يعـد حتى الأن.
|
Post: #15
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: اساسي
Date: 01-18-2005, 01:40 PM
Parent: #13
الاستاذ ابو الريش
تحية
حقيقة عندما كنت اسوق قديما في هذا المنبر تحديدا ان التجمع لا يمثل الشعب السوداني منذ قديم وانه لا يعدو تنظيما يمثل رموزه اكثر منه الشعب السوداني وكنت اتحري تنظيما سودانيا يلبي مطالبنا كسودانين بعد ان فشلت الحكومة والتي هي وجهها الاخر التجمع فلا فرق بين زيد وعبيد وكل يغني علي ليلاه ولكني مازلت اوصف باني كوزا ..!
غازي يشوت في كل الاتجاهات وانا استغرب بعد ان نزع ملف السلام والذيكان حكرا مصريا خالصا لمصر بعد ان نزع منها ما هو المغزي من ترضيتها؟؟؟
دوراننا في فلك مصر اصبح مدعاة للغبن فلا هي تنفعنا وانما هي الاحرص علي مصالحها
هل مازلنا نسوق انفسنا كمطايا؟؟
|
Post: #14
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: اساسي
Date: 01-18-2005, 01:31 PM
Parent: #11
وجيه الاسم قبل الروية الحافظ بشير
وانت طيب ويعود علينا وعليكم باليمن والبركات
بامكاني ان الخص لك الحلقة باقتضاب في عبارات واعطي الفرصة كاملة للاخت لنا لمواصلة الشمار بتفاصيله فهن اجدر في هذا الامر والذي صار يضاهيهم فيه رجالات هذا الزمن لووول
الحلقة بدأت بسوال غازي عن رايه في الاتفاقية اشاد بها وقال انها تمثل الدولة الوطنية القومية السودانية التي طال انتظارها وهي اجابت عن اسئلة ولبت مطالب مطروحة منذ الاستقلال
ورد حسن ساتي بان ثمن السلام اغلي بكثير من ثمن الحرب وذكر ان مدرسته الفكرية تجبره علي التفكير بان السلام لديه ثمنه الباهظ وتحدياته والتي هي اكبر من تحديات الحرب واضاف وقاطعه غازي بان لا هناك حرب جيدة او سلام ردي وبعدها (اتشاكلو)
|
Post: #16
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: SAdo7
Date: 01-18-2005, 02:01 PM
Parent: #14
اساسى سلامات وكل سنه وانت طيب وان شاء الله السنه الجايه كده نشوفك عريس عشان تقطع فاتورة العزوبيه دى يااخى السعوديه دى الحاجه الوحيده النفسا طويل عيشة العزوبيه وماتنسانا من الدعوات فى يوم عرفه ولك كل الود
|
Post: #17
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: A.Razek Althalib
Date: 01-18-2005, 02:12 PM
Parent: #16
أساسي الأساسي
الليلة بقيت لفيف زي المطرة الفي الخريف...
وجايب الخبر واللواري أبت تقيف..
وينك يا راجل... يا أبو رأي ظريف...
الحصل شنو... في قناة الجزيرة الماسونية....
أصلي أنا الليلة قاعد في محل ما فيهو تلفزيون.... زقلونة بس.
الحمد الله فيهو كمبيوتر موصل بالشبكة....
وين أبو قوته وصحبك قال تقابل جنب مسجد الحيف في مني ببيع في عراريق وشكلو عامل زي أهل العوض
شانتير شيخ العرب. عيدكم كيف.... قالوا ضابحين ليكم بفلو من عينة شيكاغو بلفيف..
كده خبرونا الحاصل شنو... وغازي مالو وقال شنو...
بس بأمانة يا ناس ... كده خلو النقاش هادي....
وكل عام والدنيا كلها سلام.... وكلام. بس كلام... وسلام.
البرنامج بيعاد مش كده....
حنشوفو بايت ومغبر... بس ما عليك...
تخريمة: الأخت لنا: الأستاذ/ محمد مختار هارون ـ إقتصاد وعلوم سياسية القاهرة عبري قال يوصل تحياتو ليك.
أمنيات غاليات....
|
Post: #18
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: اساسي
Date: 01-18-2005, 02:50 PM
Parent: #17
الحبيب صادوح
وانت طيب والاسرة الكريمة بالف خير واعاده الله علينا وعليكم بالخير واليمن والبركات
الاخ عبد الرازق الطالب
تحية
اليوم الحلقة من الاتجاه المعاكس حقيقة كانت خفيفة الدم بدراما وكوميديا غازي والذي احيانا اراه يتفوق علي الفاضل سعيد في القاء عباراته لذا اصابتني الخفة واللفة
وبكرة اظن بيعدوا الحلقة وربنا يديك رسيفر مع الاعادة كدا ان شاء الله شدة مستردة
وكل سنة وانت طيب
الحقيقة اتمني مقابلة الاخ ابو قوتة ولكن هذا العام لم يترك لنا العمل فرصة لتلبية النداء نسال الله القبول لكل حجاج بيت الله وباذن الله في انتظارهم في جدة
وسلام وتحية للجميع
|
Post: #19
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: عبدالمنعم عبدالله
Date: 01-18-2005, 03:34 PM
Parent: #1
غازى ياتو طليب المناصب
ربنا ابقيك رئيس وزراء
بس كون عادل
|
Post: #20
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: عبدالمنعم عبدالله
Date: 01-18-2005, 03:40 PM
Parent: #1
اساسى فى ظنككككككككككككككككك
|
Post: #21
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: اساسي
Date: 01-19-2005, 00:47 AM
Parent: #20
عبد المنعم تحية طيبة وصباح الخير
السودان دا مافي حاجة بعيدة عليهو جون قرنق امس كان والحكومة يخوضون بحر الدم
اليوم هما برغم قتلاهم يتمرغون بحور العسل
لكن كان بقي رئيس وزرائنا غازي ... ما الضحك شرطنا
|
Post: #22
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: waw
Date: 01-19-2005, 03:19 AM
Parent: #21
تحية لكم ان ماقاله غازى عجيب فقد هاجم كل الاحزاب السياسية.فقد اصبح طفل النظام المدلل
|
Post: #23
Title: Re: في الاتجاه المعاكس في قناة الجزيرة الان ما يفوتكم غازي سليمان
Author: قرشـــو
Date: 01-19-2005, 04:22 AM
Parent: #1
اساسى
كل سنة وانت طيب يا صاحبى
ياخوى ده غازى سليمان ولا غازى صلاح الدين ؟؟؟؟
كدى أكد لينا الشخصية كويس ...
|
|