هترشات مبرمج ..والهترشة مفتوحة لجميع التخصصات

أقسم قلبي بارتشنات ....
أعمل صوتك MP3 ...
وكل صورك خلفيات ...
وانزل ويندوز الريدة بدون اي تعريفات ...
تكون زكراك كرت شاشتي ويكون حبك مع السورصات ...
امسكك الكيبورد والماوس والباسوورد والفايلات ...
تجي انت في الاخر تدوس فورمات ؟؟؟؟؟؟؟؟؟؟؟؟؟؟؟؟...

عمر الفاروق تحياتي
مشاركتي معاك في هذا الرابط

Types Of Women

هترشتك عينة يا ابو اللول (بالتنجليزي كمان ؟؟؟؟؟؟؟)

Quote: تجي انت في الاخر تدوس فورمات ؟؟؟؟؟؟؟؟؟؟؟؟؟؟؟؟...

loOoOooooooooooooooooo0000000000000000000o000oOoOoOoOoOlz

لزيزه والله

ايهاب
شكراً للمرور والبوست كان غاطس وقررررررب يغرق غايتو السباح الماهر ود قاسم جابو تاني

أفرمت كيف وأنا الطول عمري بعمل save
في الكيبورد بشوف أسمك حروف إسمك
أدوس الـ A يطلع S أقيف في الـ H تطلع S
أكتب Z بالـ capital والـ small يكون الـ S
وأتحير وبي رجفه أدوس Enter ينط الـ S
أقوم أقفل وأعمل ليك restart وأبلحق ليك في الشاشه
وأتململ يطلع لي بالـ Bold Font حرف الـ S
ومن يومها فكرت وقررت أتشلخ جضم small وجضم Capital
والإثنين بحرف الـ S

الملا عمر ..
يا راجل انت في افغانستان لسة ؟؟؟ صورة ساي ما لاقنها ليك غايتو بس قالوا (عينك زايقة)..
والله لكن الهترشة عندك
خدود بي فصود يضون وخدود من دون امارة ..
وكللللللللللو حرف ال S

عمر أيها الجميل
هترشتك ريحتني ، وهدأت أعصابي ،، تماما كفرحتك بلقاء الجمعة ،، خاصة وقد التقيت عندك بالملا عمر ،،
هترشوا حتى نفطس الضحك ،، أصلو الهم كتر ، والحالة صعبة .. والعمير ولّى ..

هترشي هترشي تضحك الدنيا وتميل تصحي الكهارب في الشوارع ..
شكرا ليك كتير خالنا ود قاسم ونحن نستمد هترشتنا من ويعكم ..وفرحة الجمعة التي تولدت فينا كنتم انت من بذر بذرتها وكنا نحن من حصد فرحتها ..
مليون تحية ومليون وردة يازول يا رايع ..

كل البوس امونه يا كيبورت

معاي ساعة افتح التورجان
معاي جوه اللنكس بالحيل
معاي وندوز او ردهات
ماها الدوس قبيح وتقيل
اعاين في التَوَر مهموم
الاقي السيدي مابي يشيل
وفي ساعة التعب والخوف
يجيك النورتن معاهو دليل

يجيك نورتن معاهو دليل
يجيك نورتن معاهو دليل


ـــــــــــــــ

لكن يا عمر
بالغته في التوقيع بتاعك ده
اسمع ما تديني ليه شده كم يوم كده

Quote: اعاين في التَوَر مهموم الاقي السيدي مابي يشيل

وليد يا حبيب حاول شوف ليك DVD
بالنسبة للتوقيع والله ده بس READ ONLY

التحية لك يا عمر، وللملاعمر وللحبيب ود قاسم..

الأعزاء البورداب
أحبكم وأشتهيكم جميعاً..ذوات الضفائر وذوي الشوارب وهاكم العيدية دي.
جمال كرار



************************************************
ايميلك وصل زوّد عليّ الهم
والفكر انشغل الٌٌٌRam عليك و الـRom
يا الصلاح جميع أنا والحبيب نتلم
ويا ساكن الضريح سيدي الحسن Dot Com
*****
الليلة ام شلوخ لاقيته عند الــChat
والـVirus ضرب قلبي و محا الفايلات
يوم شافني الفقير البكتب البخرات
قال معالجة ما بتفيد..أحسن to re-format
*****
شديتو الـPentium أصبح يبرطع جايط
والـInternet دقشتو قلبتو Site Site
على ام شعراً حلال..ما طولنو وسائط
وعطشان الغرام ما بترويهو Two K byte



(فقد وصل رداً قصيراً من المحبوبة لم يتعد ألـTwo K byte)

اى حاجة كومبيوتر
الساعة كومبيوتر
والنضارة كومبيوتر
والجزمة كومبيوتر
ياحليل زمن النقر
كانت الدنيا طايرة راكة
مرة كفر ومرة وتر
بس الليلة كلامن كل بقى
كومبيوتر
الزواج بالكومبيوتر
والطلاق بالكومبيوتر
والحب بالكومبيوتر
والموت بالكومبيوتر
انا مالى والكوبيوتر
انا مالى وعيشة الضر
كنت عايش مرتاح وفى السوق
عامل سيوبر
ديك بضاعة رابحة
وديك خاسرة
مرة تركيا ومرة مصر
بس ابوى اصر وقال لازم
ادرس كومبيوتر
عشان بيتنا فيه كومبيوتر
وامى صاجة بكومبيوتر
وعندها حلة perjure
حتى حواشتنا فيها كومبيوتر
الزراعة بكومبيوتر
والسقاية بكومبيوتر
والحصاد بالكومبيوتر
عشان مافى حاجة فى بيتنا تخسر
انا لازم ادرس كومبيوتر
جيت لقيت (ناغبيور) ظريفة
ما فيها عيون حاملة شر
لكن القلوب عليمها الله
هى تراها دافنة سر
ما حصل لجنة دخلت
ومع اى زول قاعد بهظر
بس لما جيت اتصعد
العواجيز صارت تنظر
مرة قالو عنى كوز
ومرة قالو شيوعى حر
ومرة قالو وقالو قالو
انى بسكر
ودا كله عشان انى قاعد بدرس
كومبيوتر
مافى ناس عاملين فيه ادميشن
من سنة حفرو البحر
لا دايرين امشو ابوظبى
ولا دايرين يسافرو قطر
بس قاعدين لشغل التنظر
انا ذاتى حاقعد انظر
النشوف مين الفينا يخسر
ما اى حاجة كرهت احمد
حتى حركات الprinter
ولما اكتب برامج
The output equal error
حتى اللونا منى زهجت
وفى النهاية عملت موتر
وعلقت ليه شعار سودانير
بس الموتر بمشى خطوة خطوة
واللستك جديد قاعد يبنشر
ولو الواحد عايز يحب
برضو هنالك من ينظر
ولو دخلت معاههم معاينة
بطلعونى واحد صَغير
بس هى قالت لى عشان
تبقى قيس وابقى ليلى
وتبقى روميو وابقى جولييت
وابقى عبلة وتبقى عنتر
انا لازم تدخل معسكر
انا مالى والمعسكر
ومال وبلدى وحكومة عسكر
عشان كلامك كومبيوتر
وانت ذاتك cpu
وانت ذاتك كومبيوتر
فى مشيك لاكى رايحة ولاكى جاية
ولاكى ماشة ولا كى راجعة
متل حركات الprinter
عشان عيونك يامزرزر
انا اتعلمت الكومبيوتر
كومبيوتر
كومبيوتر
كومبيوتر


--------------------------------------------------------------------------------

عمر الفاروق

هترشة تقنية تمام

الملا عمر

أفرمت كيف وأنا الطول عمري بعمل save
في الكيبورد بشوف أسمك حروف إسمك
أدوس الـ A يطلع S أقيف في الـ H تطلع S
أكتب Z بالـ capital والـ small يكون الـ S
وأتحير وبي رجفه أدوس Enter ينط الـ S
أقوم أقفل وأعمل ليك restart وأبلحق ليك في الشاشه
وأتململ يطلع لي بالـ Bold Font حرف الـ S
ومن يومها فكرت وقررت أتشلخ جضم small وجضم Capital
والإثنين بحرف الـ S

إتخيل زول ماشي بالشلخات دي

يا عمر

لو قسمته قلبك بارتشنات حا يبقى فندق

وكل يوم حاتنزل فيه واحدة وترحل بسرعة ولا يكون لها حتى فايل للذكريات

عشان كدا خلي C بس

ولك ودي

الاخ خالد احمد عمر :

Quote: لو قسمته قلبك بارتشنات حا يبقى فندق

لالالالا اي partion حا نعمل ليهو نظام تشغيل Operating System براهو شي ويندوز وشي يونكس ..

Quote: عشان كدا خلي C بس

المشكلة يا خالد اذا الوينودز طش كل الملفات الفيهو بتروح عشان كده ال Partion ضروووووووووووووووووري ..ولا شنو ؟

الاستاذ ابو جهينة :

Quote: إتخيل زول ماشي بالشلخات دي

والله كان شعراء الحقيبة ناس عبد الرحمن الريح وعتيق وود البنا بهدلوهو بهدلة ..

يا الما شلخوك بي S
لا لنت لا بتحس ..

ويجيك ود الرضي يقول

الخدو s و small
انا حال علي الحول ..
دوام في خواطري تجول ..
وبرضو تقول لي قايد اسطول؟؟؟

والمشاغلات في الشارع تكون اس اس اس ( السلاااااااااام عليكم )

ابقوتة القنبلة الموقوتة :
والتي انفجرت لنا باجمل هترشات ...

خش الكورس بعد الكورس
انسي الماضي انسي الSource
لا امريكا حتي الروس..
يعملوا ليك انت دروس..
اضغط Enter واصل دووس..
يا البي الشعر مهووس..

ليك الف تحية يا ابوقوتة والقنبلة الما معروفة تنفجر بتين ..

حباب صناع السلام :

Quote: ايميلك وصل زوّد عليّ الهم والفكر انشغل الٌٌٌRam عليك و الـRom يا الصلاح جميع أنا والحبيب نتلم ويا ساكن الضريح سيدي الحسن Dot Com

حاول اشتري ليك كمان Flash memory

Quote: والـVirus ضرب قلبي و محا الفايلات

ده الVirus الكان حاييم زمااان واسمو Love Me

Quote: (فقد وصل رداً قصيراً من المحبوبة لم يتعد ألـTwo K byte

يازول احمد الله انت البيجيك بي KBوالله نحن مرات بيجينا بي الBit عدييييل وعاملين مطنشين ..

شكراً للمرور الجميل والرائع جدا جدا جدا وعلييك الله هترش لينا كتيييير من زي ده

الحبيب عمر
سلامات يا زول يا رائع سلامات
بوستاتك دايما عامرة بكل جميل ومرهف
واتمنى أن تتواصل

تسلم

ياسر الشريف
شكراً للمرور وال Browsing

عمـر الفــاروق ..

تفـرمت كيف تخـلينا ..
ونحن الهكر مخلـيينا؟؟..
وكيف بعدك يكون الرام ..
وحتى الفايروس هارييينا ..
***
وكيف بعدك القي الهادر ..
وفوق الديسك خاتينا ..
مشيت خليتنا للفورمات ..
وبالرستور restore ابيت لينا ..
***
بعد ما جـبتَ للديســكات ..
وفي الانستول install بديت لينا ..
رجعت مشيت للرستارت restart ..
وبالفورمات تعود لينا ..


جايييييييييك في التخصصات التانية .. ابقى بــره

وليد يا حبيب ..

Quote: وكيف بعدك القي الهادر .. وفوق الديسك خاتينا .. مشيت خليتنا للفورمات .. وبالرستور restore ابيت لينا ..

والله حاولنا نعمل ليك restore بس جاتني رسالة No Space لكن انشاء الله بحاول اعمل Cleanللهارد ديسك ..

Try Again Later....

Quote: جايييييييييك في التخصصات التانية .. ابقى بــره

واقف ليك وشايل عكازي كان راجل كدي ما تجي ...

عمر ياأخوي انتو درستو الأدب البرمجي دا وين ؟
كدى يمكن أصبر لي اعصر راسى دا أطلع لي بكود حلو زي أكوادكم
دي ياناس دا جبتو من وين والله ياعمر دا الا كان بيقولوا ليكم صحبك الساكن جنب
عبدالكريم ميرغني

بدري يا بدري :

Quote: دي ياناس دا جبتو من وين والله ياعمر دا الا كان بيقولوا ليكم صحبك الساكن جنب عبدالكريم ميرغني

والله نقاراً....
عرفت كيف يا شقي الحال ؟؟؟ اوعا بس انت تكون الزول الكنت راجيهو بي اللفة التانية لانو قال لي انا مستعجل داير اودي الحاجات دي لي الزول اللابس بدلة داااااااااااك

Quote: دا الا كان بيقولوا ليكم صحبك الساكن جنب عبدالكريم ميرغني

بــدري وعمــر ..

بقيتو هكـر كمان في المناطق انتو اخترقتوا الحدود دخلتو حلتنا عديل ..
صاحــبك منو كمان في حي العمدة جنب مركز عبد الكريم ميرغني؟؟

عبد الكريم ميرغني



الله يرحمو ..

لا لا دا ماأنا ياعمر أنا كنت بمشي ليهو وانا لابس جلابية وعمة ولافح شالي
وكمان بدقني الجماعة يفتكروني منهم وماتجينا مشاكل نظام طشش العدو وكدا
لكن عارف ياعمر في واحد بيقعد فى ابروف اها داك واحدة منه تلقى روحك قاعد جنب
بيل قيتس فى مايكروسفت بس ماتبيع اخوك واذكرنى مش انا الوصفتو ليك

عاش نضال مؤتمر البجا،
والنصر لقضيا المهمشين في في الشرق وفي الغرب.
والخزي والعار لحكومة الكفرة الفجرة

اللهم ارحم شهداء بورتسودان وكل الشهداء

وحريقة في مؤتمر البجا ..
والله انت علاء الدين اصلو ما خاتي عليك لمن بيقول ليك الممشي العريض ...
اي نعم نحن قلنا الناس تجي تهترش هنا ..لكن كمان ما جنس الهترشة البيقولوا علي صاحبا مجنون ...

Quote: بس ماتبيع اخوك واذكرنى مش انا الوصفتو ليك

يابدري يا اخوي انا ماشي للزول ده الليلة ..اها نتلاقا في الشهدا جمب كشك بسط الامن الشامل داك .. الساعة 6 مسا وما تنسي تجي متنكر ..

أكيد ماقاسط !!! بسط الأمن الشامل؟ لالا يااخوي الأماكن دي انا بعيد منها

Quote: بسط الأمن الشامل؟ لالا يااخوي الأماكن دي انا بعيد منها

مااااااا قلتو نوبة ؟؟؟؟؟؟
غايتو الداير يهترش يا بدري يا اخوي يلاقينا هناك والما عايز علي كيفو

احبك كيف؟؟؟
اضغط Save??
يقول لي Sorry full space
انا الغنماية ولا التيس ؟؟
اظلل قلبي اقولو Delete
يقول لي الظاهر انت نسيت
System files is found
أقول Ignore يقول لي لالا ده ملف Sound

عمر

هاك دي

شايفك اون لاين خلي التقلة

عاملة سعبة مع ناس قرقر ومعانا بس بغلة

ما تدينا نظرة وخليك من ناس هناي ديل اصلهم ثقلا

نباري بوستاتك نبنشر نقعد نقرقر ساااي في السهلة

رسلي لي صورة اصلي خاتي ليك في راسي صورة سخلة

رسلي لا تتاخري سريع قبل ما اقوم سداري بالعجلة


شنو ليك راجيك وانتي بهناك تتراشقي التقول بس نحلة

*********

شغلتي هي يا صديقي متين تحن حتى ولو بي نظرة

متين تخش بوستي تجر حرفين تبطل الكشرة

راجيها ام جضيمات تحن اخلطا اعوسا بس كسرة

هي مالا جافلة يمين تجي نونسا لامن تقول كفاي سهرة

نسمعا نضما ما سمعتو من جنون الزمن البقومو بالدفرة

استارترنا نارو ضاربة ندور نلحق ليلنا بي بكرة


مع تحياتي

قرجة

لمن كان راعي ...قبل دخوله تجمع الصفوة

هييييييييي يا قرجة ما تشاغل وسيب الخفة ..
ارسل صورة ؟؟؟وانا البشوف في صورتك ابتفة ..
وبتخيل شلاليفك مكرضمة ديمة بالسفة ..
تواعد الجكس في الميدان وفي الشارع وباللفة ..
بدوس Ignoreعشان انساك اسوي Delete عشان امحاك وكلم عمتي الشفة ..

**************
احن عاد كيف وانا الشايف رواعي يجرجروا الاغنام ..
واخش عاد كيف وانا الشايف (بنية) تقولنا لقدام ..
ينظروا فينا ناس مشاء وناس اسفير يقولو علينا ما بنفهم وناسين الفهم اقسام ..
خلاص يا زول بدوس Restartعشان ابدأ معاك صفحة محبة سلام ..

وليك الف سلام يا قرجة يا اخوي وشكراً علي الطلة الجميييلة دي وانشاء الله بكلم ليك ام جضيمات دي عشان تنستر معاك ...

فلا جزع أن فرّق الـ Net بيننا
فكل امرئ يوماً به الـ Hotmail فاجع
وما الـ Mouse و الـ keyboard إلا ودائع
ولابدّ يوماً أن ترد الودائع
وما الـ Screensaver إلاّ كالشهاب وضوئها
يحور رماداً بعد اذ هو ساطع
أخبّر أخبار الـ Messenger التي مضت
أدبّ كأني كلما قمت راكع
أتجزع مما أحدث الـ E-mail بالفتى
وأي subscriber لم تصبه القوارع
لعمرك ما تدري ملفات الـ Excel
ولا الـ PowerPoint بالهارديسك ما الـ virus صانع
بتصرف من معلقة بيل بن جيتس المايكروسوفتي

عزيزي الوقور الملا عمر

فلا جزع أن فرّق الـ Net بيننا
فكل امرئ يوماً به الـ Hotmail فاجع
وما الـ Mouse و الـ keyboard إلا ودائع
ولابدّ يوماً أن ترد الودائع
وما الـ Screensaver إلاّ كالشهاب وضوئها
يحور رماداً بعد اذ هو ساطع
أخبّر أخبار الـ Messenger التي مضت
أدبّ كأني كلما قمت راكع
أتجزع مما أحدث الـ E-mail بالفتى
وأي subscriber لم تصبه القوارع
لعمرك ما تدري ملفات الـ Excel
ولا الـ PowerPoint بالهارديسك ما الـ virus صانع

بما أن هذه أعتبرها ( أولى المعلقات السايبرية ) .. وجب علينا تعليقها على جوانب الباندويدث ليقرؤها كل من تعلق بأهداب هذا الفضاء العنكبوتي ..

و الآن أسمح لي عزيزي الوقور بأن أتشرف بأن أكون أول من يفكك معانيها بالشرح الواضح و سأحتفظ بحقي الحصري إن تم إعتمادها لطلاب الشهادة :

فلا جزع أن فرّق الـ Net بيننا
فكل امرئ يوماً به الـ Hotmail فاجع

يقول الشاعر الوقور هنا أن بعض السايبريين قد تأتيه ظروف يفارق فيها الموقع أو يستقيل لأسباب غير معلنة لذا فأنه يناشد كل مفارق أن لا يجزع و خاصة إن كان من مستعملي الهوت ميل حيث أن مشاكله كثيرة بخلاف الياهوو ..


وما الـ Mouse و الـ keyboard إلا ودائع
ولابدّ يوماً أن ترد الودائع

و الشاعر هنا يقصد الذين يستعملون مقاهي الإنترنت أو أجهزة المكتب أو الأصدقاء أو أصحاب الباسوورد المشترك.

وما الـ Screensaver إلاّ كالشهاب وضوئها
يحور رماداً بعد اذ هو ساطع

و خاصة إن كان الإسكرين سيفر من النوع المؤقت و الذي يكون من نوع المصيدة للإشتراك في الخدمة بإشتراك شهري أو سنوي.


أخبّر أخبار الـ Messenger التي مضت
أدبّ كأني كلما قمت راكع

و هنا الشاعر يصل إلى قمة الإبداع فيصور أن الماسينجر به أهوال و مسالك وعرة تجعل الواقف كالراكع ، و هناك معاني في بطن الشاعر تفوق مافي بطن الماسينجر كثرة و لكنه يتعفف عن المجاهرة بها حيث أن بعض محتويات الماسنجر قد تجعلك تمشي و كأنك تجري جرى الوحوش .

أتجزع مما أحدث الـ E-mail بالفتى
وأي subscriber لم تصبه القوارع

الشاعر لا بد أنه قد شاهد عمائل البريد الأليكتروني ببعض الشباب من الجنسين و وصف هذه العمائل بالقوارع و هي المصائب و النوازل ..

لعمرك ما تدري ملفات الـ Excel
ولا الـ PowerPoint بالهارديسك ما الـ virus صانع

و الفايروس هنا كلمة مطلقة ممكن أن تعني نفس الكلمة أو الهاكرز ..

تخريمة : معظم التفسيرات إجتهاد شخصي .. و الأصح ما هو في بطن الشعار و أطلراف كيبوردييه.

أخي المبدع أبا جهينة
أحسب أنه لو إجتمع ود كلتوم وود أبي سلمي وود شداد العبسي وود حلزه اليشكري وود العبد والملك الضليل الذي قال ضيعني كبيراً وحملني دمه صغيراً لا صحو اليوم ولا سكر غد إلى آخر ما في الطشمة لن يأتوا مجتمعين أو منفردين بتأويل أو تفسير أو إضاءة أعظم وأجل من التي أتيت بها يا إبن داؤود. ولك الحق الكامل في هذه الملكية الفكرية المتفردة ولنا أن نقتبس من هذا الجمال متي شئنا أو شاء لنا الوضع

والله لكن لقيتكم كلكم بتعرفو الدرب يا عمر

لكن انا
ابره واستبره

قال عبد الكريم مرغني

Quote: والله لكن لقيتكم كلكم بتعرفو الدرب يا عمر لكن انا ابره واستبره

ياراااااااااااااااااااااااااجل


قول يا ولي ..مافي زول غريب وكل الناس أهل...

الي شاعر الحقيبة الحاسوبية الملا عمر..
الي مقدم برنامج (نسايم الليل السايبري) ابو جهينة ..

انا كمشاهد ومستمع قديم لشعر الجاهلية الحاسوبية اعتقد ان هذا اجمل ما قيل في الكمبيوتر وبالرغم من ان بطن الشاعر(الTour) غريق الا ان ال programmer ابو جهينة استطاع ان يفسر معظم الطلاسم ..
فات علي الاستاذ ابو جهينة ان يعطي نبذة عن الشاعر النشأة والميلاد و ..الخ ...
اختلف مع ابو جيهنة في بعض التفاسير :

Quote: فلا جزع أن فرّق الـ Net بيننا فكل امرئ يوماً به الـ Hotmail فاجع يقول الشاعر الوقور هنا أن بعض السايبريين قد تأتيه ظروف يفارق فيها الموقع أو يستقيل لأسباب غير معلنة لذا فأنه يناشد كل مفارق أن لا يجزع و خاصة إن كان من مستعملي الهوت ميل حيث أن مشاكله كثيرة بخلاف الياهوو ..

هنا لابد من الاشارة الا انه اذا فارق الشاعر النت قبل يوم 10 فهي اسباب غير معلنة اما اذا فارقه بعد يوم 10 فالسبب واضح وهو الفصل النهائي دون سابق انذار..

Quote: أتجزع مما أحدث الـ E-mail بالفتى وأي subscriber لم تصبه القوارع الشاعر لا بد أنه قد شاهد عمائل البريد الأليكتروني ببعض الشباب من الجنسين و وصف هذه العمائل بالقوارع و هي المصائب و النوازل ..

هنا نعتب علي الشاعر عدم تحديد نوع الايميل هل هو الهوت ميل ام الياهوو بالرغم من ان الشاعر ذكر الهوت ميل اولا ..

نرجو شرح بعض المفردات الصعبة والتي ربما جعلت بعض القراء يعتقدون انها من الشعر الجاهلي لصعوبة الكلمات ..

subscriber:

Screensaver:

Messenger:

ولكم التحية ...

عزيزي Peace Builder

تحياتي

و ها أنت أيها الشاعر الفحل تدخل في قاموس الشعر السايبري نمطا جديدا من ( النمة ) و ( المسدار ) و ( الصقرية ) ..
و كأنني أرى بطحانيا على ناقته يقطع فيافي عتمور البطانة و هو يدندن برائعتك هذه :

ايميلك وصل زوّد عليّ الهم
والفكر انشغل الٌٌٌRam عليك و الـRom
يا الصلاح جميع أنا والحبيب نتلم
ويا ساكن الضريح سيدي الحسن Dot Com
*****
الليلة ام شلوخ لاقيته عند الــChat
والـVirus ضرب قلبي و محا الفايلات
يوم شافني الفقير البكتب البخرات
قال معالجة ما بتفيد..أحسن to re-format
*****
شديتو الـPentium أصبح يبرطع جايط
والـInternet دقشتو قلبتو Site Site
على ام شعراً حلال..ما طولنو وسائط
وعطشان الغرام ما بترويهو Two K byte

و العتب كل العتب على المحبوبة البخيلة التي ترسل 2 كيلوبايت من الكلام ، و لكن لا نلومها فهي ربما قد أشفقت على باندويدث بكري ..

أرقد عافية
واصلوا يا شباب

الاستاذ ابو جهينة مقدم برنامج (نسايم الليل):

اكتب هذه الابيات بعد ان لامتني المحبوبة بعدم ارسال رسالة لها منذ فترة وكان ذلك بسبب انقطاع النت في المكتب..

برسلك الاشواق مكتوبة بال keyboard
وبدقو ريدي اليك في كل لوحة و Board
ورسل لك الايميل من غير شفرة و Code
هاك قلبي شيليهو سويلو Download
بس راعي تاخيري مش برضي ليك مريود؟؟؟

****
قايلاني بتأخر ما رسلت ليك بلعب..
ما عارفة انترنت ليها بنخش Dialup
يبقا البطء حاصل مش برضو لي سبب؟؟
لكن جابو DSL بدل ظروفنا قلب...
السرعة بال Giga النت تخوش توووشك من قبل StartUp
دي التكنلوجيا ياناس ورتنا حاجة عجب ...
****
الاعتزار واجب حا اقولوا IF أو Case
وحار ارسل ايميلات بس شوفي ليك Space
ونرجع الريدة ..ريدة الغنم للتيس ..

عزيزي جدا عمر الفاروق ( المشاء بي كرعينو حد التعب )


أشهد أنك شاعر تقني سايبري لا يشق لك غبار و لا يقطع لك ( نت ) ..
أنتو بتجيبو الكلام دة كيف ؟
غايتو أنا من الغاوين الذين يتبعون الشعراء إنترنتيا ..

نرجع للقصيدة .. و التي أقترح على أحد فناني الشايقية أن يلحنها بالطمبور لأنني حاولت أن أعمل ليها إيقاع فلقيتها ماشية مع الدليب تماما رغم أن ( التيس ) دخل في نهاية الأغنية بغزله ( الغتيت ) الملحاح


أسمح لي بالشرح المبسط :
برسلك الاشواق مكتوبة بال keyboard
وبدقو ريدي اليك في كل لوحة و Board
ورسل لك الايميل من غير شفرة و Code ( الشاعر هنا يستعمل تقنية جديدة حتى بيل غيتس ما بيعرفا )
هاك قلبي شيليهو سويلو Download
بس راعي تاخيري مش برضي ليك مريود؟؟؟

هاك قلبي شيليهو سويلو Download ( صراحة البيت دة رهيب .. لو كل واحدة عملت داونلود لقلب محبوبها أنا خايف تلقى فيهو فايروسات خيانة و تلقى كم واحد قاعدة جوة )



****
قايلاني بتأخر ما رسلت ليك بلعب..
ما عارفة انترنت ليها بنخش Dialup ( الشاعر هنا كان لا يزال يستعمل كروت زجول و سوا قبل أن يدلف إلى عالم Dsl )

يبقا البطء حاصل مش برضو لي سبب؟؟
لكن جابو DSL بدل ظروفنا قلب...
السرعة بال Giga النت تخوش توووشك من قبل StartUp
دي التكنلوجيا ياناس ورتنا حاجة عجب ...
****
الاعتزار واجب حا اقولوا IF أو Case
وحار ارسل ايميلات بس شوفي ليك Space ( داير تنفرد بالبنية يا عمر في إسبيس ؟
ونرجع الريدة ..ريدة الغنم للتيس ..

عموما القصيدة روعة و فيها معاني سعة 2 قيقابايت.
تسلم عمر ..
واصل

الاستاذ ابو جهينة مقدم برنامج (نسايم الليل السايبري):

Quote: و التي أقترح على أحد فناني الشايقية أن يلحنها بالطمبور

انا اقترح في السهرة القادمة تجيب الفنان عبد الرحيم البركل عشان يأدي الاغنية دي بس انت حاول مرر لينا كلمة (تيس) دي من ناس المصنفات ...

Quote: هاك قلبي شيليهو سويلو Download ( صراحة البيت دة رهيب .. لو كل واحدة عملت داونلود لقلب محبوبها أنا خايف تلقى فيهو فايروسات خيانة و تلقى كم واحد قاعدة جوة )

المشكلة يا استاذنا الجليل انو بنات الزمن ده منزلين UntiVirus والواحدة اول ما تعمل ال Downlod أول حاجة بتعمل ليك Clean للبارتشن بتاع القلب وده ما مشكلة لكن مرات في بنات شفوت بيعملوا Format للمخ عدييل وديل خطرات ...

Quote: ( الشاعر هنا كان لا يزال يستعمل كروت زجول و سوا قبل أن يدلف إلى عالم Dsl )

ونضيف هنا اضافة صغيرة وهي ان الشاعر بسبب زجول وبطاقة سوا قرر عمل Shut Down لي System الغربة ويحاول يعمل Exit والغريبة جاتو رسالة Are you sure ??
والله الشاعر ضغط Yes حتي بدون ما يعمل Save!!!!!

Quote: داير تنفرد بالبنية يا عمر في إسبيس

هنا الشاعر حب يوضح ان بيحب يلعب في المكشوف وبالواضح لانو في بعض الشعراء بيحاولوا Private Section ده اذا ما قام عمل Protected Area

ليك التحية استاذنا الجليل ابو جهينة مقدم برنامج (نسايم الليل السايبري)...

أعمل search تسوي block
أعمل add في الياهو ثلاث أيام أصاقر النت
يخيب ظني ويجيني الرد
your request not accept
تدخلي الـ chat
أقوم أبراك
تشوفيني تسوي شتات
أعلي الصوت
أطنش ديك وأزوغ من داك
أفتش ليكي في الـ inbox ما ألقاك
أنده ليك شيخ بيل جيتس لا يفزعني لا يلحقني لا يلقاك
أصاين in وأرسل ليك رساله ظريييييييييييفة offline
أقول ليك فيها I miss you وكم مشتاق
أشوف ميلك في إنبوكسي
وبترجاك بحق الإكس بي ويندوز وناس الـ chat
تضيفيني وأكون يوم داك
أسعد زول وأشهر زول وأرجل من عشا البايتات
وعاد يوم داك
my id وإيميلي وبروفايلي وباسوردي تضيع تفداك

عمر الفاروق شاعر الفضاء السايبري الأول

المشكلة يا استاذنا الجليل انو بنات الزمن ده منزلين UntiVirus والواحدة اول ما تعمل ال Downlod أول حاجة بتعمل ليك Clean للبارتشن بتاع القلب وده ما مشكلة لكن مرات في بنات شفوت بيعملوا Format للمخ عدييل وديل خطرات

رهيب يا عمر .. رهيب ..و تصنيف عجيب ..

دة تعليق ما بعدو كلام تب .. و أي جندرية عندها كلام غير كدة تراجع ثلاثي الشعر العنكبوتي ( الملاعمر و عمر الفاروق و بيسبيلدر ) ..

( انا اقترح في السهرة القادمة تجيب الفنان عبد الرحيم البركل عشان يأدي الاغنية دي بس انت حاول مرر لينا كلمة (تيس) دي من ناس المصنفات ... )

غايتو دة بيتوقف على الفنان .. لو نطقها بطريقة كأنها كلمة إنجليزية حنقول ليهم دة إسم برنامج جديد في الكمبيوتر


واصلوا يا شباب[/B

الوقور الملاعمر
أول من علق معلقته السايبرية على أستار البندويدث
تحية و سلام غليد و ماكن

أعمل search تسوي block
أعمل add في الياهو ثلاث أيام أصاقر النت
يخيب ظني ويجيني الرد
your request not accept

الشاعر يقول أن المحبوب لا يكل و لا يمل و ملحاح من الدرجة الأولى.

تدخلي الـ chat
أقوم أبراك
تشوفيني تسوي شتات
أعلي الصوت
أطنش ديك وأزوغ من داك
أفتش ليكي في الـ inbox ما ألقاك

الشاعر هنا يفرد صورة أخرى من لياقة المحبوب ( فلفل الكمبيوتر فلفلة و غربلو غربلة دقيق الفينو و برضو ما بيخليها .. أها الكلام جاييكم ورا .

أنده ليك شيخ بيل جيتس لا يفزعني لا يلحقني لا يلقاك
أصاين in وأرسل ليك رساله ظريييييييييييفة offline
أقول ليك فيها I miss you وكم مشتاق
أشوف ميلك في إنبوكسي

المحبوب هنا يدخلنا في عالم آخر من عوالم ( النديهة ) السايبرية و الذي للأسف إتضح أن الشيخ بيل غيتس إيدو ما لاحقة و ( كوابلو ) تايوانية.

وبترجاك بحق الإكس بي ويندوز وناس الـ chat
تضيفيني وأكون يوم داك
أسعد زول وأشهر زول وأرجل من عشا البايتات

طبعا المحبوب بعد المجابدة دي كلها لا بد أن يلجأ إلى التحنس و الترجي ..

وعاد يوم داك
my id وإيميلي وبروفايلي وباسوردي تضيع تفداك

رغم أنه أتى بكل أنواع التفاني هنا و التضحية بالغالي و النفيس ، إلا أنه و للظروف الراهنة في البورد لم يجيب سيرة ال IP ( كلو واحد يخلي بالو من الآى بي بتاعو ) ..

تسلم أيها الوقور
واصل

ايا الكومباك
سرحت معاك
اكوس علبت سجاير لي
وافتش في كويس تمباك
جميل لونك
قوي وثابت
تقول ثيرباك
معاك باقي العتاد مضمون
وكل السفت وير ممنون
عشان مابطش
ولا بطفش

وليد يا حبيب ..
تعال شارك معانا في سهرة (نسايم الليل السايبرية )إعداد وتقديم الاستاذ ابو جهينة..
اها وهاك كمان ..
وين كومباك مع ال Laptop
ديما طليعة ديمة الTop
تشغلو وانت في محلك يقوم ليك بي كل Job
لا تحتاج معاو سفة ولا تخميسة بي اللفة تمزمز ديمة في SanTOp(ده مشروب عصير هنا في السعودية )...

رسالة مرثية في ايميل ابقوتة بعد رسالة من المحبوبة ..

في اليوم داك لقينا ابقوتة يتبسم ويضاحك شوية يميل ..
لقيناهو بيقرا رسالة فحواها You have got New Email..
اتبشتن واتبهدل وشفنالك ريالتو تسيل ...
داسو Click ..جوة الLink بدون ما يقرا بي تفصيل ..
لقالو Package ومن دونا فرزلو Message عشان بس داكنا في التظليل ..
قال بس ده محبوبي خلاص خش في For loopy و infinty امرقو جليل ..
لقا العنوان كلام حبان I Love You شديييييييييييييد بالحيل ..
كورك فينا زي ساوون ضغط في الLink بتهاون جاتو رسالة Your System Shut Down بدون تحميل..
ضرب Hard Disk وحالة ابقوتة صارت Risk يكبر فينا والتهليل ..
وفي الصينية اصبح لاف شغال If ومرات Case كيف حايبدا في التعديل..
طلع Virus شديد وغتيت لا بتحل بي While ولا بتحل بي Repeat وكتب في جهازو للتقبيل ..
لقينا ابقوتة حالق صلعة لابس ميري شايل شنطة في الترحيل ..
يسب يلعن يقول ياريت صبرت قبيل ..
وصار واعظ يشيل ويخطب ياولادي اوعو تضيفو بنية في الEmail

الأخ وليد
تحياتي

مرحبا بك في هذا البرنامج

اكوس علبت سجاير لي
وافتش في كويس تمباك

تصغير كلمة ( كيس ) إلى كويس كانت لفتة لغوية لزوم تركيبة البيت ..
ربما جذبتنا العنصرية و نقول أن الذي إخترع الكومباك قد أخذ سفة ماكنة من التمباك ماركة عماري نمرة واحد و جلس متسلطنا متحيرا من إختراعه الذي أطلق عليه كومباك تيمنا بالتمباك المخلوط بعطرون الزغاوة ..

جميل لونك
قوي وثابت
تقول ثيرباك
معاك باقي العتاد مضمون
وكل السفت وير ممنون

أبيات جميلة و لكن نطلب من الأخ وليد أن يكمل القصيدة حتى نستطيع إدراجها ضمن المقرر
أرقد عافية

عمر

طلع Virus شديد وغتيت لا بتحل بي While ولا بتحل بي Repeat وكتب في جهازو للتقبيل ..
لقينا ابقوتة حالق صلعة لابس ميري شايل شنطة في الترحيل ..
يسب يلعن يقول ياريت صبرت قبيل ..
وصار واعظ يشيل ويخطب ياولادي اوعو تضيفو بنية في الEmail



و في إنتظار رأى الجندر في عدم إضافتهن للإيميل

من البصات ابت تطلع..
من الحافلات ابت تطلع...
من الامجاد ابت تطلع...
من الركشات طلع خازوق...

محطات البلد زادت....

خواطر سائق تاكسى

الاخ عمر لك التحية
واهديك وكل المتداخلين حكمة اليوم

ضرائب قوم عند قوم عوائد

ودمتم

الأخ علي الحسن :
مرحب بيك حبابك الف في هترشاتنا ومعليش الترحيب متأخر لانو الواحد من يوم الاربعاء ما شاف الكمبيوتر ..
في انتظار المذيد من هترشاتك حتي يتمكن مقدم برنامج (نسايم الليل السايبري ) الاستاذ ابو جهينة من استضافتك ...

رسالة الي مقدم برنامج نسايم الليل السايبري الاستاذ ابو جهينة :

شوفوا استاذ ابوجهينة ..
مهمتو صعبة ما هينة ..
يقارع فينا بي البينة ..
اهابش فينا بين الفينة والفينة ..
يحلل في كلام ابقوتة تحت خطين بياخد عينة ..
يشرح ليك كناية القول واسبابو كلمتو طيبة جد لينة ..
ده ماااااااااااااااااااا استاذ ابو جهينة ...

شكرا للشاعر السايبري عمر الفاروق

و نواصل أحبتنا هذا البرنامج المهترش و المفتوح لجميع التخصصات.

و بما أن الشاعر أبوقوتة قد قال فيما قاله :

العواجيز صارت تنظر
مرة قالو عنى كوز
ومرة قالو شيوعى حر
ومرة قالو وقالو قالو
انى بسكر
ودا كله عشان انى قاعد بدرس
كومبيوتر
مافى ناس عاملين فيه ادميشن
من سنة حفرو البحر
لا دايرين امشو ابوظبى
ولا دايرين يسافرو قطر
بس قاعدين لشغل التنظر
انا ذاتى حاقعد انظر
النشوف مين الفينا يخسر
ما اى حاجة كرهت احمد
حتى حركات الprinter
ولما اكتب برامج
The output equal error

لذا نأمل من الجميع أن يغيروا إتجاه الهترشة أو دمج التخصصات في قصيدة شاملة كالتي قالها أبوقوتة ..
واصلوا يا شباب

وبعد أن فشلت كل محاولات الدردقة السايبرية للبنيه السكرية ، وبعد كل كلمات المديح والغزل والصريح ولغة الإشارة والـ Offline messages والتضحيات والموت ركن وبعد أن وصل شاعرنا إلى حالة اللاعودة في التفاوض واللا رجعه في الإستمرار على هذا الحال واللاوعي واللا مقدرة على الصبر واللا توازن واللات والعزى بدل الطلاق البين قرر أن يهجو حبيبته السايبيرية هجاء ينمو بكل إنش من شاشة كمبيوترها ذات الثمانية عشر إنشاً مثل حب البرجم كما قال شاعرنا الحلمنتيشي في هجاء محبوبته في عصور قد خلت لم تعرف المول والركشة والمس كول ، فقال فض فوه وذاكرته وذاكرة حاسبه الآلي:

كليكاتي وميلاتي ومسجاتي خسارتها فيك
وبعد دعواتي بتحزم وأتلزم وأقوم الليلة أدعو عليك
ويا الصلاح جميع في الـ F والـ hard disk
يجي فايروس يضرب ليك خطوط الميل
يمسح ليك درايفاتك
يفرتق ليك ملفاتك
يقبل على الماسنجر وما يخلي لا زاهر ولا تيسير
وفي الإنبوكس يبوظ ليك رسايل الجكس
عناوينهم أغانيهم وأكلاتهم وحكاويهم
ويمشي يقيف في الألبوم يشرتمو ليك
لا صوره ولا كورة يلخبط ليك فايلاتك
يضيع ليك your contact
يسوط ليك كل درايفاتك
يقطع ليك كهارب الشاشة
يدمر ليك your media
و your home page
ويزحف ليك على الـ Pictures وما يخلي
يلخبط ليك الـ IP و ID و CD
يبكم ليك جهاز الحاسب الآلي
وبعد حاسوب تجي الحصبه
ويكضم ليك لا يحسب ولا يكتب
تقومي تودي يتصلح
يجيك الرد بعد أسبوع
جد آسفين يا حلوه ده ما بنفع
ده مرضو خطير ومستعصي
وبننصح أن يكون بنبر يكون شنطه
يكون أنتيكه في كورنر
يكون تربيزه في برنده
ده حاج أحمد ما يقبل يبدلو ليك بي عده
وأكتفي بهذا القدر من القصيدة

أخيراً والحمد لله طلللللق اخونا ابقوتة (الشاعر الحاسوبي) طلاق التلاتة أجيال ابتداءً من الجيل الاول جيل الاسطوانات المفرغة ومروراً بجيل 86 ووقف طلاق التلاتة عند البينتيوم ..
ولكن يبدو أن المحبوبة لم يرقها القرار فاثرت رفع شكوي لمحكمة الجرائم ضد الحاسب بقيادة مولانا بيل جيتس وهيئة المحلفين من IEEE والمدعي العام عم أوراكل وطلبت منهم ان يكفلوا لها ابنائها Play Station و صخر والابل ماكنتوش ..
وهذه هي المرافعة التي قدمها الادعاء في حق الشاعر ابقوتة :

تطلق ساااااااااااااااااااااااي؟؟؟؟..
لازم تكتب المعروض ASP وللا يكون CGI..
عشان ما يمشي عبر الNet عشان ما يمشي بي الSky..
تشاغلونا وتخلطونا وتحبونا بي كل طرق ال Ai..
شي بي Email شي بي الChatting ترسل لي مرحب Hi..
تقول لي click Agree عشان نبدا معاكي هناي ..
اشغل ليك Web Camera اركب ليك سماعات أجيب سيرمس كبابي الشاي ..
اظبط الراس شي OOP ومرة Class ومرات ساي ...
الاقيك انت ما جادي اجيك بي جاي تجيني بجاي ...
مرة Int ومرة Real وتاني Float ده غير boolean تعاريفك غريبة معاي ..
شي بي الPascal ومرات C ده غير ال Delphi وال VB في كل مرة جاي برايي ..
ضغطنا Begin ..حاول حن ..ما تجهجهنا زي قدالنا بين طمبارة والغناي ..
وعشان نضمن كلامنا يصير خت ال Code بين Exception حتي Try..
يا مولانا شوفو الزول ده متحايل شوفو الزول ده كيف بررراي..
مرسل لي مليون Mail ..وكم صورة دموعو تسيل ..ملف WinZip فيو دوباي ..
بعد اقنعني بي حبو ويجي فلحظة يدوا Dlete ويقول Bye Bye..
ده يرضيكم يا مولانا ؟؟كيف حا اربي عيالي براي؟؟؟..

نعتزر عن تقديم برنامج (نسايم الليل السايبري) في سهرة الأمس وذلك لنقل وقائع جلسات المؤتمر الوطني لإجازة اتفاقية السلام علي أمل ان يعاود مقدم البرنامج تقديم سهرته اليوم ...

شاعرنا الفذ الوقور الملاعمر

كليكاتي وميلاتي ومسجاتي خسارتها فيك

و المحبوب هنا ربما طالبها بإرجاع كل هذا في سيديهات حتى لت تستعملها المحبوبة في التشهير به لاحقا.

وبعد دعواتي بتحزم وأتلزم وأقوم الليلة أدعو عليك
ويا الصلاح جميع في الـ F والـ hard disk

و يا ويل المحبوبة من دعوة المشوكش سايبريا ..

يجي فايروس يضرب ليك خطوط الميل
يمسح ليك درايفاتك
يفرتق ليك ملفاتك
يقبل على الماسنجر وما يخلي لا زاهر ولا تيسير
وفي الإنبوكس يبوظ ليك رسايل الجكس
عناوينهم أغانيهم وأكلاتهم وحكاويهم
ويمشي يقيف في الألبوم يشرتمو ليك
لا صوره ولا كورة يلخبط ليك فايلاتك
يضيع ليك your contact
يسوط ليك كل درايفاتك
يقطع ليك كهارب الشاشة
يدمر ليك your media
و your home page
ويزحف ليك على الـ Pictures وما يخلي
يلخبط ليك الـ IP و ID و CD
يبكم ليك جهاز الحاسب الآلي

هذه هي دعوة المظلوم .. و يا بنية الله يخلف عليك في كمبيوترك ..

وبعد حاسوب تجي الحصبه
ويكضم ليك لا يحسب ولا يكتب
تقومي تودي يتصلح
يجيك الرد بعد أسبوع
جد آسفين يا حلوه ده ما بنفع
ده مرضو خطير ومستعصي
وبننصح أن يكون بنبر يكون شنطه
يكون أنتيكه في كورنر
يكون تربيزه في برنده
ده حاج أحمد ما يقبل يبدلو ليك بي عده

نهاية مرة جدا لحاسوب كان ممتلئا حبا و شوقا و لوعة .
هذا و العهدة على الراوي أن الحاسوب أعلاه قد تحول إلى تربيزة شاى في الصالة .
تسلم الملاعمر

الأخ عمر الفاروق

بوست خفيف وظريف جدا والله ولنسميه استراحة من الهم والغم

الشكر لك وللاحباب الذين اثروا البوست بخفة دمهم وذمهم للكمبيوتر المسكين الذى كان المطية لكل تلك المشاغبات مع الاخريات والاخرين وكان وسيلة التعارف عبر الفضاء السايبيرى ..

ما القى زول يدافع عنه بى قصيدة ظريفة كده يا ناس ؟؟؟

سلمت لينا

الملا عمر :
الشاعر الفذ الشاعر الأنتل وما سيليرون الشاعر الأصلي وما تجميع الشاعر الملا عمر ..
روعة في التعبير عن كل ال Conflict وكيفية معالجته ممتاز جداً في عمل ال Debugging لكل الامور العاطفية مع المحبوبة ..دقة في Checking Errors عشان ما تدقس مع المحبوبة ..والأجمل من ده إنو زاكرتك Read\Write ومش زاكرة ROM ..تعجبني فيك كيفية عمل Protection لي ملفات عقلك وكيف بتعمل ليها Password من الصعب جداً إختراقها ..
تخريمة :
القصيدة الاخيرة من هترشاتي كانت موجهة ليك وورد بالخطأ إسم الاخ ابقوتة والذي سيجد حظه من هترشاتي بس الظاهر الويندوز بتاعي طش وما كنت مجمع ..ليكم العتبي ..

الأستاذ أبو جهينة مقدم برنامج (نسايم الليل السايبري):
أجمل مافيك أن لك عقل بينتيوم 4 بسرعة 5 جيجا هيرتز (ماشاء الله ) لك قلب Dynamic Ram تصل الي One Giga Byte ده طبعاً من غير ال Cash Memory...مكتمل الكروت Built In فكرت الشاشة يجعل منك True Color 32Bit وكرت الصوت يمتاز بالهدؤ بعيداً عن النشاز ..أما الModem فلك منه الداخلي والخارجي ..وما احلي كرت الشبكة فبه تستطيع ان تتصل بكل الوان الطيف من الشبكات LAN و WAN والاجمل انك حتي تستطيع ان تتصل WireLess..

الأخ العزيز عمر الفاروق

أجمل مافيك أن لك عقل بينتيوم 4 بسرعة 5 جيجا هيرتز (ماشاء الله )

إنت من زمن بنتيوم 4 ؟ الغربة سرقت بنتيوم و الأولاد سرقوا التاني و التالت سرقو الكفيل. يعني ماشي ببنتيوم واحد و بالتالي السرعة بقت ربع قيقا.


لك قلب Dynamic Ram تصل الي One Giga Byte ده طبعاً من غير ال Cash Memory...مكتمل الكروت Built In فكرت الشاشة يجعل منك True Color 32Bit وكرت الصوت يمتاز بالهدؤ بعيداً عن النشاز ..أما الModem فلك منه الداخلي والخارجي ..وما احلي كرت الشبكة فبه تستطيع ان تتصل بكل الوان الطيف من الشبكات LAN و WAN والاجمل انك حتي تستطيع ان تتصل WireLess

جننت القليب جن يا عمر
و أهم شيء في وصفك الممتع دة الإتصال WIRELESS
تسلم و واصلوا يا شباب