Post: #1
Title: معهد الكليات التكنلوجيه
Author: Elnasri Amin
Date: 01-14-2005, 10:12 AM
Parent: #0
قبل جلوسى لامتحان الشهاده الثانويه كنت اردد كلمات
الشاعر التجانى يوسف بشير
"هو معهدى وان ابيت ......(لا ازكر بقيه البيت)
و المقصود هو المعهد الفنى و ليس المهد العلمى ...
الفرق بينهما ان الاول هو معهد الكليات التكنلوجيه
او Khartoum Polytechnic ....
كتبت كليات الدراسات التجاريه رغبه اولى...
كانت الرغبه الثانيه كليه الدراسات التجاريه
بكليه الدراسات الاضافيه(دراسه مسائيه)..
الرغبه الثالثه كليه القانون جامعة الخرطوم....
و لتحقيق تلك الرغبه العجيبه للدراسه فى المعهد
قمت باختيار مواد معينه للشهاده السودانيه تقودنى
مباشره للمعهد...
فالاضافه للمواد الاساسيه من عربى و دين و حساب
قمت باختيار كيمياء و جغرافيا و احياء...
وفعلا تحقق الحلم و تم قبولى فى المعهد بكلية الدراسات
الاضافيه...
اربع سنين من اجمل سنوات حياتى.....
نلت بعدها بكالريوس فى محاسبة التكاليف.....
لاذلت ازكر اساتذه اجلاء اكن لهم كل احترام
وتقدير
احمد صديق, النقر,لويس,ابراهيم,بشير,عبدالعظيم,الازهرى
وغيرهم
كنا احداعشر عند التخرج
اسماعيل,مصطفى,الطاهر,بخارى,محمدحسن,بونام,ساره,خلف الله,محمدمحمود
وابراهيم(فك الله اسره)
اين هم الان؟...
فقدت الاتصال بمعظمهم و لااعرف شيئا عنهم!!
قضينا ايام جميله...
فى امبده..و السيركل...
حفلات شرحبيل ..
ناس الفنون و جنونهم...
مدير المعهد و اهتمامه المبالغ بالتشجير و الزهور..
ناس البيتيك و قرايتم الحاره...
ايام ....ايام
لسوء الحظ تم تغيير الاسم الى
جامعة السودان للعلوم و التكنلوجيه
نواصل
|
Post: #2
Title: Re: معهد الكليات التكنلوجيه
Author: nassar elhaj
Date: 01-14-2005, 12:45 PM
Parent: #1
يا سلام عليك يا النصري
وانت تعيدني لذلك البهاء
وتلك الأماكن
حيث تخرجت من ذات المكان بكالريوس كلية الدراسات التجارية - صباح
تصور : نحن آخر دفعة تخرجت باسم معهد الكليات التكنولوجية
وما زال هو الاسم المحبب جداً لنفسي
وانا مثلك تماماً أحببت المعهد قبل دخوله
وكانت معارض كلية الفنون التشكيلية من العلامات التي عرفتني به اولا
وثانيا كان " شريف الناير " صديق وزميل شقيقي الأكبر في المرحلة المتوسطة والثانوية يدرس به في سنته الاولى ويحضر لنا بالمنزل ومن خلاله تعرفت أكثر على كلية الدراسات التجارية، خاصة واني كنت بالمدارس التجارية الثانوية وفي ذلك الوقت كنت في انتظار ظهور نتائج الشهادة السودانية بعد ان امتحنت من مدرسة كوستي التجارية الثانوية
وبالفعل كان رغبتي الأولى وحظيت بدخوله
وكما أشرت كانت من اجمل سنوات الدراسة كنا 29 في قسم المحاسبة المالية و 7 في محاسبة التكاليف .
ولك الود والمحبة .
وتلويحة وتحية لكل الزملاء والاصدقاء .
|
Post: #3
Title: Re: معهد الكليات التكنلوجيه
Author: أبوالريش
Date: 01-14-2005, 03:05 PM
Parent: #2
الأخ الفاضل النصـرى..
ياخى ماقلت لينـا الكلام دا كان سنـة كم؟
لكن ولا يهمك، فعبارة "و المقصود هو المعهد الفنى" تعنى الكثيـر
وبالمناسبـة ترجمتهـا كانت KTI وليس plytechnic
المهـم أنا زاتى درست فى كليـة الدراسـات الإضافيـة.. وكمان محاسبـة تكاليف أيـه رأيك؟
بس ما كنت تبـع المعهـد، ولكن فى قســم الإعـداد لإمتحانات ULCI
(Union of Lanchshire and Cheshire Institutes) وأخذت مادة الـ Industrial Costing
|
Post: #4
Title: Re: معهد الكليات التكنلوجيه
Author: Elnasri Amin
Date: 01-15-2005, 10:27 AM
Parent: #1
الاخ العزيز نصار
تحيه طيبه
اولا تقبل تحيات حبيبنا جلال محمد حسين الذى تفرزنت اطرافه من البرد.
صدقنى كنت استمتع بكل يوم اقضيه هناك , وقد ساعدنى ذلك فى صناعه قائمه
مهوله من الاصدقاء من دفعات الصباح والمساء.
قمت بتصوير حفل استقبال دفعتكم 1985(من المساء) فى شريط فيديو لا زلت احتفظ به
و ساقوم بنقل لقطات منه هنا انشالله .
علمت من جلال ان عدد كبير من خريجى الثمانينات يعملون فى الخليح, ارجو ان
تبلغهم سلامى (ناس مجيغه وترارى و محمدالامين وكاواسماعيل و الباقين بدون فرز.
تحياتى و اكيد حنلتقى تانى(بس اوع من الشعر)
النصرى
|
Post: #5
Title: Re: معهد الكليات التكنلوجيه
Author: Elnasri Amin
Date: 01-15-2005, 10:45 AM
Parent: #1
الاخ العزيز ابوريش
| Quote: ياخى ماقلت لينـا الكلام دا كان سنـة كم؟ |
ياخى اللبيب بالاشاره يفهم
احكى ليك قصه..
مشيت الحلاق احلق ماتبقى لى من شعر
و بعدما انتهى الحلاق سالته عن السعر
بدا عليه التردد...و كانه يفكر فى امر ما..
قال لى بخجل ...الناس Senior Citizen ب 10 دولات
و الباقين 12 دولار...
وللمعلوميه ال Senior Citizen هم المتقاعدين من سن 65 و لفوق
طبعا انا متعود على الحاجه دى و قلت ليهو انا لسه ما Senior Citizen
ده كلام ده!!
الواحد فى عمر الورود و يقولو ليهو Senior Citizen 
اما عن الكورسات البتتكلم عنها دى وقفوها فى الخمسينات من القرن الماضى.
تحياتى و اتوقع منى اتصال
النصرى
|
Post: #6
Title: Re: معهد الكليات التكنلوجيه
Author: Mamoun Ahmed
Date: 01-15-2005, 12:15 PM
Parent: #1
لمن
جينا كانت البيرسري 8 جنيهات
اها زادوها لـ 16 جنيه
وكان ميز ال
sts
وميز المقرن..والجنوبي..ومعمل الخرسانه..وقاعات التجارة\وبنات السكرتاريا
وكلاب الحراس
وسنما غرب..وبار الخرطوم الجديدة
كده كيف؟
|
Post: #7
Title: Re: معهد الكليات التكنلوجيه
Author: بشري الطيب
Date: 01-15-2005, 12:26 PM
Parent: #1
عدت في مساء يوم من كلية الدراسات الزراعية- شمبات معهد شمبات الزراعي سابقا
وطلابها يستعدون لخوض إنتخابات إتحاد طلاب جامعة السودان غدا الاحد 16/1 نتمني أن يكون النصر حليف القوي الوطنية والديمقراطية ممثلة في قائمة التحالف الوطني الطلابي ,وسوف أعود لبعض الذكريات هناك
|
Post: #8
Title: Re: معهد الكليات التكنلوجيه
Author: Elnasri Amin
Date: 01-15-2005, 12:38 PM
Parent: #1
| Quote: وقاعات التجارة\وبنات السكرتاريا |
طبعا زهور احمد الامين عبدالرحمن و بنات السكرتاريه كانو الجاجه الوحيده
الجميله وسط وجوه عابسه كالحه مهمومه بامتحانات شبه اسبوعيه ومقرر دراسى تنوء من
حمله الجبال.
ازكر و نحن فى الصف الثانى وعند امتحان الفتره ان الاستاذ المراجع الازهرى
وكان يدرسنا محاسبه ماليه ... احضر احدى الاسئله من امتحانات
الزماله البريطانيه...
و كان تفسيره انه علينا من الان التحضير للحصول على الزماله.
ايام..
غايتو يا مامون الفيك اتعرفت  ا
انحنا ناس المساء ما كان عندنا بيرسرى لكن ازكر كنت بجى المعهد فى سنه تانيه
وشال معاى جنيهين...كنت بشترى عصير لخمسه انفار و شاى و ابحبح و اركب مواصلات
و ارجع بالباقى
ايام
شكرا يامامون على المرور
النصرى
|
Post: #9
Title: Re: معهد الكليات التكنلوجيه
Author: Mamoun Ahmed
Date: 01-15-2005, 01:04 PM
Parent: #8
اخوي النصري
والله كنا بنشفق علي اصحابنا ناس التجاره من كترة فرايتم
والديسمس الطوالي شغال
لكن نحنا ناس الفنون لا عندنا قراية ولا يحزنون
بنصحى الساعة تسعة
وتمشي تفتش الاستاذ وين توريه العملتو في سهرة امس
ويديك شغل تجيبو بعد تلاته يوم
اها تحوم وتحوم..بس تشتغل بطريقتك
والساعة ستة ندور المزازيك في النجيلة
وهاك يا لمة بنات الفرع..فريع البان
ميز المقرن كل جمعه ضبيحة
الرحلات.. وكل يوم مكان
والبيرسري بعد حق الميز ماتعرف تودي الباقي وين
غايتو السعادة مابتدوم
|
Post: #10
Title: Re: معهد الكليات التكنلوجيه
Author: Ismaeil H. Mohamed
Date: 01-16-2005, 01:21 AM
Parent: #9
أخي الحبيب النصري
لامفر لك من الذكريات الندية .... ترياق الروح،
بغيابك وبعدك عن عزة - بمشيئته تعالي - لسنين عددا !!!
ليس لنا إلا سؤاله لك بالعود الأحمد
الذي قد يُتيح لك تلمس أطياف الذكريات وعلَك تجدها باقية
محسوسه وإن أكل عليها الدهر.
المعهد الفني
معهد الكليات التكنولجيا
جامعة السودان
ذلك الصرح الضخم الذي لا يخفي دوره في التعليم العالي في السودان، هو مرحلة هامة جداً في نظام التعليم العالي الفني وله أثر كبير في منظومة العمل والتنمية، نحتاجه اليوم أكثر في السودان ولكن بشكله القديم ....... لكِ ولنا الله ياااااااا عـــــزة.
وانا في لمرحلة الثانوية كان يدفعني شقيقي الاكبر – الذي يدرس بجامعة أثينا/اليونان - دفعاً إتجاه معهد الكليات التكنلوجيا حتي أحببتة، ولكن شاء الله لي الدراسة بجمهورية مصر العربية، ومازل قلبي متعلق به إلي أن شفي الله غليلي - وأنا موظف في بدايةمرحل العمل - بـ دبلوم محاسبة في كلية الدراسات الإضافية 88 – 1990 كان له عظيم الأثر في حياتي العملية.
إنها جد لذكريات جميلة امتعك الله بها يا حبيب!!!!
ونواصل!!!!!!!!!!
إسماعيل حميم
|
Post: #11
Title: Re: معهد الكليات التكنلوجيه
Author: عبد الباقي الجيلي
Date: 01-16-2005, 01:33 AM
Parent: #1
النصري أمين يا سينيرنا
تحياتي نديات نداوة زهور قاعات أمبدة
وطريات طراوة بنات السكرتارية والكورسات
وحميمات حميمية جلسات البنشات حول السيركل
حتماً سيكون هذا البوست متنفساً لنا نلجه كلما تملكتنا سخافة هجير نجد والخليج وكلما
تملككم صقيع كندا ..
تحياتي لأسرتكم الكريمة ..
وتقبل تحيات الأخ محمد محمود علي أمين (محمد نقة)
وتليفونه ..
00966502855042 جوال
أو تليفون مكتب
009661275275 التحويلة 2900 حيث سترد عليك سكرتيرته الفليبينية الحسناء !!
ونواصل
|
Post: #12
Title: Re: معهد الكليات التكنلوجيه
Author: عمر الفاروق شيخ الدين
Date: 01-16-2005, 01:53 AM
Parent: #1
الأخ النصري :
بعد التحية ..بعض البوستات قد يكون الغرض منها بعض الخصوصية وامكن كمان مشاركة بعض الناس فيها بعينهم ولكن وجدتني مجبرا للتسلل لداخل البوست لانك تتكلم عن الاب الشرعي لجامعة السودان للعلوم والتكنولوجيا (مهعد الكليات)..ولاننا الجيل الحديث لتلك الجامعة المفخرة ..
احكي وقول لينا يا عمنا النصري عن الزمن القديم ونحن بنحكي ليك عن الزمن الجديد ليها ونقارن ..
غايتو البينشات زادت شدييييييييييييييييييييييييد ...
بجيك انشاء الله
|
Post: #13
Title: Re: معهد الكليات التكنلوجيه-جامعة السودان للعلوم والتكنولوجيا
Author: Ehab Eltayeb
Date: 01-16-2005, 02:24 AM
Parent: #1
الاستاذ النصري.. والاخوة الاعزاء:
معهد الكليات التكنولوجية صرح علمي.. و منارة سامقة في بلادي..
كان لي شرف التخرج من كلية هندسة المعمار تحت مسمي
جامعة السودان للعلوم والتكنولوجياعام 1999..
ومهما اختلفت الاسماء اوتعاقبت عليه فسيظل منارة اشعاع في شتي ضروب المعرفه
لك التحية.. ولكل من تخرج من تلك البقعة...
ولنجعل هذا البوست واحة يتكئ عليها خريجي المعهد,,,,
وحتما لي عودة ,,,
|
Post: #14
Title: Re: معهد الكليات التكنلوجيه-جامعة السودان للعلوم والتكنولوجيا
Author: مجدي شبندر
Date: 01-16-2005, 08:54 AM
Parent: #13
الاستاذ النصري
لم يبق شئ سوي الذاكرة
وللذاكرة ظل حالة لا ظل الا ظلها
تشكل منا يسقط فينا
ظل منا والينا
ننعم فية بين الفينة والفينة
لك الشكر وانت تستفز الذاكرة وتصيبها بنزيف عال .معهد الكليات التكنولوجية تاريخ ومكان لهم اثر كبير في قطار ذاكرتي محطة مقدسة الئ اقف عندها كثيرا لاتزود منها .تلك البوابة التي تستقبلك برحابة بعض بائعات التسالي والفول المدمس تجدهم حول الباب وعندما نمر بهم يقدمون اليك او بالاحري نتناول شيئا من بضاعتهم بإستئذان خفيف .ندخل الباب وامامك مكاتب الجمعيات الاكاديمية تلك التي تشهد حوارا ممتعا بين الطلاب اثناء فترة الراحة لها مني تقدير خاص .عم مصطفي ربنا يرحمه بائع وصانع جيد للشاي يمارس الكرم الحاتمي عندما تقول لة الحساب بكرة يا عم مصطفي .نمر بتلك الشجيرات التي تشهد اركان النقاش ذلك الحوار الجيد بين مختلف التنظيمات حتي الكيزان .منها نتوجة الي الكافتريات .عم سيد واخرون .السيركل كلية الفنون .الاس تي اس .نجيلة المسرح .معارض الفنون .دار الاتحاد .حاجة زهرة بائعة الشاي .الكنيسة .انور .هباني كلها معالم ضخمة في ذاكرتي .
مجدي شبندر
حاجيك راجع يالنصري
|
Post: #15
Title: Re: معهد الكليات التكنلوجيه
Author: Elnasri Amin
Date: 01-16-2005, 12:43 PM
Parent: #1
يا ســــــــــــلام عليكم
سعيد برؤيتكم هنا فى السيركل
اها من حسى نتفق ..البوست دى ما حقى....
وبرفع يدى منه....
البوست ده...
حقنا كلنا ....
كل خريجى المعهد...
فرصه للتلاقى ....و الزكريات
وبحث عن اصدقاء دراسه طال غيابهم...
النصرى
|
Post: #16
Title: Re: معهد الكليات التكنلوجيه
Author: Elnasri Amin
Date: 01-16-2005, 01:11 PM
Parent: #1
الاخ العزيز بشرى الطيب
اول حاجه مرحب بيك فى المنبر
و اعزرنا ان لم نكن من بين المستقبلين حينها
فى انتظار تقريرك من داخل "حيطان"المعهد
و اتمنى ان تتحفنا ببعض الصور من هناك
شكرا ليك
ودايرين نشوفك بجاى دائما
الاخ مامون
| Quote: والبيرسري بعد حق الميز ماتعرف تودي الباقي وين |
ده دين علينا للبلد و لازم نرجعه ليها يوم من الايام
اتمنى يجى يوم و البلد تصبح غير طارده لابنائها
ونرجع نبنيها من جديد
قول امين
ما تطول
دفعتنا وود حلتنا اسماعيل
ياسلام عليك وكلك زوق...
| Quote: بـ دبلوم محاسبة في كلية الدراسات الإضافية 88 – 1990 كان له عظيم الأثر في حياتي العملية |
.
ده دين يا اسماعيل
وانا متاكد انو فى يوم من الايام المعهد حيحتاج لكل ابنائه ليشدو عن
سواعدهم و Heed the call لتطوير الدراسه وتشييد صرح تعليمى بمستويات
عالميه.
شكرا ليك
الاخ العزيز عبدالباقى
اول حاجه قول لنقه
"لقيته و الله" ...و سكرتيره كمان..
ياحليلك و حليل ايامك و انت بتتلفت زى الرايحه منك حاجه.
انشالله البلاد تكون مستوره معاكم...
حسب علمى ان كل خريجى المعهد يحتلون وظائف جيده هناك..
هنيئا لكم و شرفتونا و شرفتو المعهد
سلامى ليك و لكل الاخوان هناك
و ساتصل بنقه انشالله
|
Post: #17
Title: Re: معهد الكليات التكنلوجيه
Author: Elnasri Amin
Date: 01-16-2005, 01:29 PM
Parent: #1
الاخ عمر الفاروق
يا زول مرحب بيك شديد...
و انت بالذات محتاجين ليك تورينا الحاصل شنو فى المعهد..
فى نهايه الثمانينات بدا العمل فى التعريب ..
فى نظرى تلك كانت بدائه النهايه لمستوى المعهد الاكاديمى
اذكر....
ان بعض اصدقائ كانوا يلقبوننى ب Lipsey و هو كاتب اقتصادى عالمى..
كنت اعشق ذلك الكتاب و اوصى به الطلبه الجدد..حتى صارو ينادونى به..
خليك معانا
الاخ العزيز ايهاب
طيله هذه الفتره كنت اظنك خريج جامعه الخرطوم
و الله مكسب كبير ان تكون مننا و لينا
اظنك خريج بيتيك...
وهو فى نظرى اصعب بكالريوس فى السودان
والبيت بيتك و لعل و عسى تجمعك الظروف هنا ببعض اصدقاء دفعتك
تحياتى
الاخ العزيز مجدى
| Quote: عم مصطفي ربنا يرحمه بائع وصانع جيد للشاي يمارس الكرم الحاتمي عندما تقول لة الحساب بكرة يا عم مصطفي |
ياسلام ياخ ايام لن تتكرر ابدا
احدى امنيات حياتى ان ارجع يوما للسودان و اقضى بعض يوم
بين جدران ذلك المكان المحبب الى نفسى..
يارب....
شكرا ليك يامجدى على كلماتك الحنينه بحق المعهد
النصرى
|
Post: #18
Title: Re: معهد الكليات التكنلوجيه
Author: عمر الفاروق شيخ الدين
Date: 01-16-2005, 11:25 PM
Parent: #1
مشكور (عمنا) النصري ..
طبعا زمان بنقول ليك اخونا لكن بعد طلعتوا انتو ناس (معهد الكليات) ونحن ناس (جامعة السودان) ملاحقة الكتوف بقت صعبة شوية ...
المتأكد منو يا نصري انو معهد ولا جامعة السودان هي من انظف بل الانظف علي الاطلاق في جميع مباني جمهورية السودان تجد العاملين من الساعة 4 صباحا داخل حرم الجامعة واتحدي من يقول انه يجد ورقة او قمامة ملقاة في الارض ..احلي تنسيق هو بالمعهد او الجامعة ..حدائق زهور محلاة بنحت طلاب كلية الفنون ..
اي برلوم يدخل الجامعة لازم يتبرلم بي انو اذا ماشي امبدة لازم يركب من السوق العربي عشان يلحق المحاضرة لانو امبدة بعيدة ..وامبدة الي الان هي ملاز العاشقين سرا لانها بعيدة وماف زول بيجيب خبرك ..امبدة الان اخي النصري زاحمكم فيها ناس القبول الخاص واصبحت حكرا لي كلية المختبرات الطبية بينما يتنقل ناس الدراسات التجارية ما بين امبدة و كلية الدراسات الاضافية ( مدرسة المقرن الثانوية سابقا)...
الازهري يطلب من الطلاب ان يكتبو حل الامتحان باللغة الانجليزية ...
علي بيزنس لا تزال لهجته مصرية (التلاقة للتلاجة ..)
كافتريا كرور(ما عارف كنتو بتسموها شنو انتو؟) لسة فيها ملاح المشكل لقمة تجيك بطاطس ولقمة مكرونة ولقمة فاصوليا ...
كافتريا عمال الان هي ملتقي الحناكيش من بيرقر ولي فوق ..
كفتيريا المقصورات (في ركن الجتمعة الجنوبي الشرقي) اصبحت ملتقي الكيزان والبيحوم بي هناك زول شبهة ..ويقال انها اصبحت معتقل طلابي ...
المسارح ااااااااااااااااااااه علي المسارح اصبحت نايمة نوم اهل الكهف اخر حفلات اتعملت فيها بي ابو عركي وشرحبيل وسنة 94 وبعدها استلم الكيزان الاتحاد ولغوا الحفلات بي قرار جمهوري لكن رجعت في 2003 مع بداية السلام لكن بي فنانين الزمن ده بكري المغربي فرفور ووووو..
البوابات تم فصلها البوابة الرئيسية مدخل للبنات فقط ..البوابات الصغيرة للاولاد ..
البينشات تم فصلها في زمن الهوس الكيزاني بينش للبنات وبينش للاولاد ...
بعض الاساتذة يفصل الاولاد عن البنات في القاعة الاولاد يمين والبنات شمال ..
بجيك تاني انشاء الله وللتعريب ده قضية كبييييييييرة
|
Post: #19
Title: Re: معهد الكليات التكنلوجيه
Author: Elnasri Amin
Date: 01-17-2005, 02:44 PM
Parent: #1
يا سلام يا عمر
تقرير رهيب و وصف دقيق جدا
بالنسبه لنظافة المعهد اصلو من يومو نضيف وظريف و الظاهر
الناس كلها محتفظه بالحاجه دى.
Quote: الازهري يطلب من الطلاب ان يكتبو حل الامتحان باللغة الانجليزية ...
علي بيزنس لا تزال لهجته مصرية (التلاقة للتلاجة ..) |
ياسلام عليهم...ارجو تبليغهم سلام كل الدفعات التى تخرجت على يديهم.
ازكر قصه مع الاستاذ الازهرى ...كان يبدا المحاضره باخذ الحضور
و يقوم بمناداه كل الاسماء ..كان احد اصدقائ غائبا يوما و عند ذكر اسمه
صحت HERE و كنت اجلس فى الصفوف الخلفيه "كالعاده" ,,,للمفاجاه ولاول مره
اعاد الازهرى الاسم مره اخرى ,,شعرت بالخوف و لم اردد الجريمه
ومن يومها اقتعنت ان الاذهرى عقليه جباره على الرغم من مظهره المسيكين.
| Quote: البوابات تم فصلها البوابة الرئيسية مدخل للبنات فقط ..البوابات الصغيرة للاولاد .. |
ديل فرقهم من طالبان شنوّ؟
والله البنات الكانو معانا الاحترام و الاخوه اللقوها من زملائنهم ما يلقوها فى اى حته..
فاصلينهم لشنو؟ و خايفين من شنو؟
عالم وهم...
غايتو
منتظرنك لموضوع التعريب وانشالله ما تصدمنا بمعلومات بشعه عن تدهور المستوى الاكاديمى
تحياتى
ملحوظه
"ما انت كويس اهو"
|
|