مـرثية الفـراق .. فوق الـزول الضكر

عفواً سيدي ..
(امانْة ما وجعني فراقك)
تعدي مواسم .. وتجي مواسم
مواسم ملتني هموم ..
مواسم وعدتني بي فرح ما جا ..
مواسم كذوبة .. مواسم غضوبة
مواسم بين بين
إلا أنا ما ياني أنا بتاع زمان
عمري زاد .. وزاد همي
إتغربت في بلاد المولى ..
ألغط رزقي .. سواة الجِديدِي
براي أشيل همي ..
أفلي جلد الزمن الشين ..
شِن نسوي .. وكت إتملا هيم
وكتين الهم صِبح هم وهمين ...
في متل الزي دة ... لي سِنين ...
ما نَاسِي وعدك ..
كلامك وبريق سلامك
ترا ياهو الكان آخر كلامك ..
يااااااه
تسعة حيلان مرن
زي التكنو هسع عدن
صهيل سياطن بلحيل حرن
تتذكر ..
وقت قايضتني (الإنكليزي) بالرياضة
صهيل وعدك يسوي الـ (اْمْان تَاتاي)
ووفيت .. كنت الوفي
قلتلك شن تسوي بي عوجة اللسان
ملعون أبو جون
عيلا جبرن سالي العين
يديك العافية !!
بتمو صلوات ودعوات
كان يصلن ..
عشان أكون ضد النفاق
وابِر وعدي .. وعدي ليك
.. ووفيت
ات من حبيت .. تاتيت
شبيت ... خاتي القول
مقنع حوبة .. ضواي قبيلة
سيرتك في الخلوق سيرة
أه ..
وا مغستِنا رحل تلوت الليل
تتذكر ...
بريق سلامك .. يوم جن خيانك
قسمك فوق الرقاب بتبرو
وقت قلدتني .. حضن أدفأ
من نار (إبراهيم) ..
وشوقك أزرط من النار فوق الهشيم
وبريق الوداع .. لمن إتلفت ملوحاً
حِنيتك .. قليب أم على (الوليد)
صدقك .. صدق .. مصدوق
وصادق النية ...
سواة النبي (زكريا)
نسيت ألقولك
عفواً سيدي ..
بل معلمي ..
.. مؤدبي
ما تشيل هم .. هَمنا خلو
العليك عارفِنو
والسويتو ما ناسينو
(المبروكة) .. بترسل سلام
صَحِي أخدتلا زَرة ..
فيشان ضَميرا الإِبيض
ربك لطف .. الحين
بصحة وعافية جمة
وتتذكر ...
قصت السالفة من يومين ..
في الهدية الكان جِبتها ..
في أول مهية
أظنها بالقسط .. ولا جمعية
فرن ولا بوتجاز
لكن: نارا ما زالت حيّة
ولمن قصتا كان في دمعة
دمعتين غَلبتا
وقالت: الله يبرد نار الحشا
الصِغيرة (باعورة)
كملت عَلاما ..
وسوت القانون مجالا
مش جاها ود الحلال
وداً ضكران عيلي خالي مال
ملعون ابو الدراهم ..
شِن تسوي لي (فقير) الحال
نسيت ألقولك ..
الشئ الموجعني منك ..
قبل استيقن أفولك ..
مش (الباعور) عملت فينا عمايل
يوم في المِغيرب ..
العين تشوف العين
كابوس ولا جان
فضلت تصرخ وتصيح ..
باعلى صوتا ..
بسم الله .. إنس ولا جان
واظِنو شافت ضليلك
مال ولا اُفولك
نادينا الشيخ محمد قرالا
كت بريد أخبرك
قبل استيقن اُفولك
عفواً سيدي ..
بل معلمي ..
.. مؤدبي
حتى لا ننسى
أخي الشهيد عماد