**الغرق البرى والغرق البحرى فى السودان..أيهما افضل؟!**

جباية فى حكاية

دمغة الغريق..!!

دق مندوب شركة تحصيل فواتير (التلفونات) باب منزل جارنا (حاج الطاهر)
- ده منزل الطاهر فضل الله؟
- نعم
- نحنا فواتير التلفونات (وناوله فاتورة التلفون).
أخرج (حاج الطاهر) نظارة القراءة من جيب جلابيته وبدأ يقرأ في تفاصيل الفاتورة.. محادثات عالمية.. محادثات محلية.. هاتف جوال.. ضريبة.. دمغة غريق
(حاج الطاهر) في استغراب وهو يضع سبابته أمام (دمغة غريق) مخاطباً المتحصل:
كدي أقرا ليا دي شنو دمعة شنو؟
- دي يا حاج ما دمعة.. دمغة.. بالغين مش بالعين . دمغة غريق.. ألف جنيه بس.
- مش في ألف جنيه بس .. هي ذاتا شنو؟
- والله يا أستاذ انحنا بنحصل بس القروض لو عندك أي أسئلة أمشي (شركة التلفونات) هناك يشرحوا ليك الموضوع.
في الشركة:
عاوز أقابل الزول المسؤول عن التحصيل
- شفت الممر داك.. أمشي عديل تاني لف شمال تاني لف يمين أول مكتب يقابلك دا مكتب مدير التحصيل، وبالفعل بعد أن قام (حاج الطاهر) بمتابعة (الوصف) وجد نفسه وجهاً لوجه أمام مكتب (مدير التحصيل) .
السلام عليكم
وعليكم السلام
والله في الحقيقة أنا بس عندي استفسار..
(مبتسماً) هتفضل
الحقيقة جاتني فاتورة التلفون وفيها ألف جنيه مكتوب قداما دمغة غريق.. أول حاجة الشيء الانحنا عارفنو أنو الدمغة دي (طابعة) بلصقوها لمن الزول يجي يقدم طلب.. والحاجة التانية غريق شنو؟ وأنا مالي ومال المسألة دي.. محادثاتي وبدفعها ليكم.. تاني ما عندكم معاي حاجة . انتو يعني لازم تاكلو أموال الناس (بالباطل)؟
- (بعد أن استعدل المدير في جلسته) يا أستاذ ما (تهيج) ساكت.. أول حاجة انحنا ما قاعدين ناكل مال زول بالباطل لأنو المسألة دي أجيزت من المجلس التشريعي للولاية.. وانتو النواب ديل انتخبتوهم.. يعني هم بمثلوكم.. يعني هم موافقين نيابة عنكم.. يعني بالعربي انتو موكلنهم.. وهم اصدروا القرار دا نحنا ما علينا إلا التنفيذ.. والحاجة التانية (الحكومة) ما شغالة بالتسميات شغالة بالجوهر.. بالمضمون.. الدمغة بلصقوها.. يدبسوها.. ما مهم، المهم تندفع.. هسع لو المسائل تسميات كان تكون في حاجة اسمها (المساهمة الإلزامية).
- أها وهسع حكاية (دمغة الغريق) دي شنو...؟
- والله أنا ما بقدر افتيك لكن لو عاوز تعرف أكثر . لحسن حظك (منظمة الغريق) ذاتا المبنى بتاعا أهو داك.. العمارة الصفراء ديك ممكن تمشي تأخذ منهم معلومات وتعرف الحاصل شنو.
في المنظمة:
مبنى المنظمة عبارة عن (فيلا) فخمة ذات سياج معدني أنيق معلقة عليه بعض اللوحات الإعلانية التي تحض المواطن على تقديم الدعم والمساعدة للمنظمة من أجل القيام بدورها الاجتماعي فتلك لوحة تقول:
(أيها المواطن الكريم تبرع بكفن غريق تكسب ثواباً) وأخرى تقول: (من كفن غريقاً فكأنما أطعم عشرين مسكيناً) وثالثة تقول: (الغرقى إخوانكم فتبرعوا لهم).. (الغرقان في ذمة العايش).
بعد أن قام (حاج الطاهر) بقراءة كل تلك اللوحات.. ومتع ناظريه بذلك (القطع) من السيارات البيضاء الفارهة موديل العام (المرصوصة) في المكان (المسقوف) المعد لها.. قام بدخول المبنى حيث طلب من موظف الاستقبال مقابلة المدير العام للمنظمة.
مع المدير:
دلف (حاج الطاهر) إلى مكتب المدير العام .. المكتب فسيح .. التكييف مركزي .. تتدلى من حيطانه ستائر إيطالية بينما غطيت أرضيته بالسجاد الإيراني .. به طقم جلوس أمريكي فاخر وقاعة اجتماعات أنيقة من الخشب المصقول اللامع .. أمامها مكتب نصف دائري يجلس عليه السيد المدير بوجه لامع تبدو عليه آثار النعمة و(الراحات) و(التكييف طويل المدى).
السلام عليكم
وعليكم السلام ورحمة الله تعالى وبركاته (اتفضل - مشيراً إلى أحد كراسي الجلوس الوثيرة).
وجلس (حاج الطاهر) ثم قال مخاطباً السيد المدير:
والله في الحقيقة أنا جاتني في فاتورة التلفون دمغتكم دي وقلت أجي أقابلكم أعرف الحاصل شنو؟
وما مدى (مشروعية) دفع الدمغة دي.
والله يا أخي نحنا (بنثمن) فيك الروح الطيبة دي وتجشمكم مشاق الحضور لي دارنا المتواضعة عشان تتعرف على ما تقوم به هذه المنظمة من عمل خيري يهم المسلمين جميعاً. في الحقيقة المنظمة دي جات نتيجة لتزايد حالات الغرق.. كل يوم والثاني يقولوا ليك ثلاثة أصحاب مشوا البحر غرقوا.. ناس مشوا رحلة ما رجعوا.. وحافلة وقعت من الكبري الركاب ما اتلقو.. وجثة طافية في النيل.. الناس ديل كلهم (الحكومة) تجيب ليهم (غطاسين) من وين ؟؟؟ ونجيب ليهم (بكاسي) تشيل جثتهم من وين؟؟ .. ونجيب ليهم ثلاجات تحفظ جثثهم لحدت ما أهلهم يتعرفوا عليهم من وين ؟؟؟ .. الإجراءات .. حمل الجثمان للمشرحة .. وضعه في الثلاجة .. تشريحه .. تصويره وعمل إعلان في الجرائد عشان أهلو يتعرفوا عليهو .. وفي حالات عدم التعرف تكفينو ودفنو .. من وين ؟؟؟ وما تنسى مرات بيكون الزول الغرقان دا ذاتو (مكتول) وفي الحالة دي نحنا في المنظمة بنتابع مع (الشرطة).. الصرف دا كلو الحكومة تصرفوا من وين .. في (ميزانية الدولة) في بند زي دا ؟؟ ما لازم (منظمات المجتمع المدني) والمواطن يساهم في المسألة دي .. انت هسع ذاتك ما ممكن بكرة تقع بيك عربية في النيل (يجبيو ليك غطاسين من وين) ؟ باختصار نحنا مسؤولين من (الغريق) من لحظة دخولو الموية إلى لحظة دخولو (القبر) .
دا كلو كلام جميل لكن أنا ذنبي شنو؟
ذنبك شنو كيف يا أستاذ.. مش أنت زول مسلم والبغرقوا ديل كلهم أخوانك في الإسلام؟
(حاج الطاهر في استنكار) لا .. البغرقو ديل كلهم (مواطنين) لكن ما كلهم مسلمين وكلامك دا ضد (الدستور) واتفاقية ...
(المدير مقاطعاً) لا انحنا الناس المامسلمين ديل عندنا ليهم (إدارة) براها في المنظمة اسمها (إدارة غير الناطقين بها) .. بالشهادة يعني.
لكن هسع (السودان) كلو يدفع (للغريق) دا ؟ مسلم على غير مسلم .. يعني لو التلفونات دي فيها مليون مشترك وانتو قاعدين تاخدو ألف جنيه من كل يبقى بتجمعو ليكم مليار جنيه في الشهر.. دا غير العاوز يطلع أو يجدد جواز أو بطاقة أو رخصة قيادة أو عاوز يطلع شهادة بحث دي كمان مليارات.. انتو بتودو القروش دي وين؟ أصلو القاعدين (يغرقو) ليكم في الشهر كم
يعني أنت بس دي (بالذات) عاوز تعرف أنها ماشة وين انت هسع (الباقين) عارفم بمشو وين ؟
عندك هسع دمغة (الطريح ودمغة) ودمغة (الشليق) ودمغة (الحابل) ودمغة (النابل) ديل كلهم عارفهم بمشو وين؟
(المدير في برود) : أكيد تكون يا أستاذ افتكرت أنو القروش دي كتيرة .. أول حاجة يا أستاذ لازم تعرف أنو مسألة مكلفة .. لنشات وغطاسين وجازولين وخلافه .. عندك مثلاً الراجل الوقع من كبري (الإنقاذ) وانتحر الأسبوع الفات عشان ما قدر يدفع مليون جنيه رسوم ولدو الدراسية .. دان نحن بس عشان نلقى الجثمان بتاعو المسألة كلفتنا ثلاثة مليون ..
طيب لو كان اديتو المليون ما كان انتحر.
يا استاذ أنا بكرر ليك دي ما مسؤوليتها .. دي مسؤولية ديوان الزكاة .. صندوق التكافل .. الرعاية الاجتماعية .. طلاب دعم الصندوق .. لكن مسؤوليتنا تبدأ من لحظة موت الغريق داخل الموية وحتى ندفنو
(في استنكار) يعني القروش دي كلها.. يعني كم مليار جنيه في الشهر كلها غطاسين ولنشات وجازولين.. معقول بس.
طبعاً لا يا أستاذ.. القروش البتفضل قاعدين نوظفها.. قاعدين نعاين للمستقبل.. هسع لما يجي يوم الناس دي كلها تغلبها المعايش تكابس البحر وتنتحر والله ما تلقى إلا المنظمة دي تسترها.. نحن - يا أستاذ - مستعدين للغرق (الجماعي) ال ح يحصل وعاملين حسابنا.. ومش كدا وبس نحن عملنا مشروعات استثمارية نوظف فيها القروش دي عشان تنمو وتعمل رصيد كويس نقدر نجابه بيهو أي (غريق).
زي شنو؟
طيب تعال اتفرج على الصور (وفتح السيد المدير البوماً كبيراً مليئاً بالصور الملونة) شفت دي الشايفها دا .. المباني أم أربعين طابق دي .. دي (أبراج الغريق التجارية في قلب الخرطوم وبتنفذ فيها شركة (صينية) و ح نبيعها شقق ومكاتب.. (يقلب الصفحة) والبصات السفرية السياحية الفاخرة دي .. دي مية وخمسين بص أسسنا بيهم شركة (سفريات الغريق) الخرطوم - مدني - بورتسودان - دنقلا.. (يقلب الصفحة) وكل صيدليات (الغريق) الفي العاصمة دي بتاعتنا .. ولسع عندنا مشروعات كتيرة.. دا كلو يا أستاذ استثمار عشان (الغريق).. يعني السودان دا كلو لو (غرق) انحنا ممكن بي إمكاناتنا دي (نحصلو) ونشيلو ندفنو.. أها بعد دا في زول يقول نحنا قاعدين نهمل الغريق؟؟ زول يقول إنو البلد ما فيها (آليات) لدرء الكوارث.
طيب انتو وكت القروش دي كتيرة كدا وعملتوها عمارات وشركات واستثمارها ما تفكرو تساعدو المواطنين (الغرقانين) في (الديون) والفقر والمرض ودا ذاتو يكون شيء وقائي عشان ما يمشوا و(يغرقوا ليكم).
والله يا أستاذ حسب النظام الأساسي لمنظمة الغريق نحن بنعني بمساعدة الغريق (البحري والنيلي) وحتى البغرق في (ترعة).. لكن (البري) دا ما معانا.. دا مسؤولية (الرعاية الاجتماعية).. (مواصلاً) شوف يا أستاذ نحن المواطن الغرقان دا همنا الأول والأخير ولازم يلقى عناية تليق بيهو مش هنا وبس حتى لو برة السودان.. نحن الأسبوع الجاي ح نفتتح مكاتب (جهاز شؤون الغرقانين بالخارج) عشان نكون مسؤولين من البغرق برة السودان كمان.
ودي طبعاً ح تكون دمغتها بالدولار والريال والاسترليني؟؟؟
أكيد.. نحنا عملنا المنظمة دي عشان نحفظ للمواطن السوداني (الغريق) حقو في أنو يغرق غرقة لائقة.. يعني مش معقول يعيش (ممرمط) و(مشلهت) ولما تنسدا الأبواب في وشو ويقوم ينتحر ويغرق كما تاني (يتبهدل).
ملاحظة لكاتب المقال: وانتو ما (يتغرقو) مالكم؟؟ غواصات؟؟ الله لا كسبكم.

صحيفةالسودانى الدولية- العدد:رقم 136
__________________________________

ولسان حال المواطن السودانى المغلوب يستنجد مع اغنية الحقيبة:

فى البر ام فى الأطيان... ياحكومة انا غرقان

العزيزة الدكتورة مهيرة

تعرفى وانا بقرا فى الموضوع افتكرته من بنات افكارك وكنت حاقول ليك ياخى فكرة جهنمية زى دى كان تخليها نقوم ننفذها نحن ياخى ... اتاريه فى ناس كتار بيعملوا "فى سبيل الله " ... وناس كتار مفتحين وصاحين كويس ...

المقال صراحة ظريف ولطيف ويعكس مدى الازدواجيات والتخبط الحاصل وان لا يفاجأ اى سودانى باى مسميات او ضرائب .. وليست ترعة كنانة والرهد ببعيدة عن المغتربين .. ما عارفين جوه فى شنو كمان ...

Quote: تتدلى من حيطانه ستائر إيطالية بينما غطيت أرضيته بالسجاد الإيراني .. به طقم جلوس أمريكي فاخر

يعنى الانفتاح على كله .... لكن الجماعة بتاعين السجاد ديل شكلهم كده عملوا مراكز توزيع السجاد الفاخر فى الخرطوم مدعوماً وللمحتاج لله كمان ...

عجب يا وطن والله ..

لك تحياتى واحترامى

الاخ الكريم قرشو:

فعلا الفكرة جهنمية ولا يجرؤ على تنفيذها الا شياطين الانقاذ واباليسها

المؤسف ان المواطنين الغلابة هم من يحترقون بنارها

بس زى ما قال الاخ الكريم الشايقى: الجماعة الايام دى غرقانين فى جهنم الولعوها دى

اللهم لا شماتة

تحياتى

العزيزة الدكتورة مهيرة

Quote: ملاحظة لكاتب المقال: وانتو ما (يتغرقو) مالكم؟؟ غواصات؟؟ الله لا كسبكم.

كيف ما بغرقوا ؟

ديل الايام دي غرقانين في شـر أعمالهـم,


يمهـل ولا يهمـل.

سلامات يا أستاذة مهيرة،

Quote: ولسان حال المواطن السودانى المغلوب يستنجد مع اغنية الحقيبة: فى البر ام فى الأطيان... ياحكومة انا غرقان

أدِّيها صنَّة بَسْ وشويتين تلاتة حا يفرضو دمغة الشوق وتلقي المواطن السوداني يشيل ويشيل مع أغنية الحقيبة:

دمعة الشوق كُبي
حكم جيبي أرغي نُص الليل
يا دمغة الشوق

نسمة الأسحار؟! تَشموها قدحة مع الليل الكل ما ليهو ماشي أطول دا.

تحيّاتي

نسمة الأسحار؟! تَشموها قدحة مع الليل الكل ما ليهو ماشي أطول دا.

فال الله ولا فالك يا ود البدوى يا اخوى!!

شاحدة الله الكريم رب العرش العظيم يكلبشوهم من رئيسن لى وزيرن وودوهن لاهاى ونقعد نحن نتفرج

عليهن فى التلفزيون ونشوف دمعتن كابة وسايلة ونسمع نويحن:

حليل زمن الحكم.. الماضى

وحليل وقت المخيخ..فاضى

آه.. لو آه تفيد محكوم

وياريت لو بترشى القاضى

تحياتى

Quote: شوف يا أستاذ نحن المواطن الغرقان دا همنا الأول والأخير ولازم يلقى عناية تليق بيهو مش هنا وبس حتى لو برة السودان.. نحن الأسبوع الجاي ح نفتتح مكاتب (جهاز شؤون الغرقانين بالخارج) عشان نكون مسؤولين من البغرق برة السودان كمان. ودي طبعاً ح تكون دمغتها بالدولار والريال والاسترليني؟؟؟

الاخ الكريم احمد الشايقى:

اخير نلحق نرفع القضية قبال الجماعة يفتحوا لينا جهاز شئون الغرقانين بالخارج

ربنا يورينا فيهم غرق فرعون ان شاء الله

تحياتى

السلام عليكم ورحمة الله وبركاته...كيفنك يا دكتورة..
أنا غايتو ما مستغرب أبدآ....وإحتمال منظمة الغريق دي موجودة فعلآ في السودان....ناس نافع وعلي عثمان والبشير ديل مافي شيئ بعيد عليهم...فالذي يتاجر بدينه سوف يتاجر بأي شيئ آخر...فليس بعد الكفر ذنب....

الاخ الكريم راشد

غايتو المتأكدة منه انه الغرق الحاصل فى السودان انواع:

الغرق فى الديون

والغرق فى المرض

والغرق فى الفقر

والغرق فى النعيم ودة حكر فقط على الانقاذيين

يا خوى ديل مال الزكاة بياكلوه وناسه حيين؟!! لامن دمغة الغريق الميت

تحياتى

Quote: (أيها المواطن الكريم تبرع بكفن غريق تكسب ثواباً)

Quote: (من كفن غريقاً فكأنما أطعم عشرين مسكيناً)

Quote: (الغرقى إخوانكم فتبرعوا لهم).. (الغرقان في ذمة العايش).

السودانيين بقوا مبدعين ودا طبعاً أحد نتائج المعاناة والله صحي هم يضحك وهم يبكي


تحياتي يا دكتورة

Quote: السودانيين بقوا مبدعين ودا طبعاً أحد نتائج المعاناة والله صحي هم يضحك وهم يبكي

والله يابدرى ياولدى صحى هم يضحك وهم يبكى

لكن شلة الانقاذ الجاثمة فوق صدر الوطن أثبتت بحق وحقيقة انها ليست حكومة مسئولة عن بلد،

ولكنها عصابة تفننت فى سرقة المواطنين، وبعين قوية كمان.

تحياتى