في اتصال مع زميلنا عضو المنبر و صديقي (خضر حسين خليل) هدد بإلغاء إجرآت عرسو لو ما جيت غنيت ليهو . و الكلام ده طبعا ما محبة فيني ولا في غناي , القصة و مافيها انو ماعندو قروش للفنانيين و غالبا العشاء و الفندق برضو وانا ما عندي طريقة إجازة ايام العرس طبعا.
فيا اصدقائي الفنانيين الفي السودان, انقذوا هذا الاسره السودانية الوليدة و انقذوا بذرة الحب التي اصبحت شجرة و العريس لسه مفلس و شاركونا عرس اخونا و صاحبنا ده تحت شعار تعال و معكـ عازفين و يا بورداب العشاء و الفندق عليكم و سنمدكم بأرقام الحساب لاحقا.
رسائل الي مطربي المنبر
ياسر تمتام / عاصم البنا / اسرار بابكر حضوركـ يهمنا و ينقذ بذره الحب القلتها ليكم فوق ديكـ و يساهم في توريط صاحبنا ده و يفرحنا شديد نحن اصحابو . نطمنكم انو صاحبنا ده زول لطيف و حبوب خالص و حا يفرح جدا بيكم . و نردها ليكم في الاجازات
رسالة الي بكري ابوبكر الرجاء إعادة تمبس , المنبر ناقص من غيرو والله ( وش إنتهازي خالص )
ده شنو ده؟؟؟ الله لاكسبك يا خضر والله البوست ده الصباح بدري لو ما طبعته وديتو لسعادة العميد ما ابقي انا انا يازول الله يعلك اقلب انصار سنة اسبوع العرس وخلاص ياخ علي الباسطة والدقن لو داير لوداير انت ماك نصيح؟؟؟
ياخي انا قايل البوست برنامج طارحه الفنان طارق ابوعبيدة لحل مشاكل حقيقية بتخص اجيال وقلت من العنوان دي حتكون مبادرة ذكية كدة بتعتمد علي تكنلوجي وعمل اجتماعي الهم انكم اوهمتونا...
___ إعلان هام تم تأجيل عرس الزول ده سنة تانية وسنساهم في التمديد لستة اشهر اخري في حال لم تكتفيه تلك المدة.
Post: #5 Title: Re: تبرع بأغنية , تنقذ عريس و تبني اسرة Author: خضر حسين خليل Date: 04-03-2009, 02:07 AM Parent: #4
رسالة اخري الي بكري الرجاء تثبيت هذا البوست أسوةً بمشاريع الامل العام
Quote: متبرعة بالغنا(دقا علي الدلوكة) في بص السيرة من والي بيت العريس (في المشية والرجعة)
متبرعة بالصفقة طيلة الحفلة وحث اخرين عليها
متبرعة بي صحني بتاع العشا عشان عاملة رجيم
متبرعة بالزغاريد حين ذكر اسم العريس
متبرعة بي غض النظر في الصبحية عن شتارة العروسين
غايتو يا ريهان.. نجضتيه نجاض....وماعنده اي سبب تاني!! اها و انا متبرع بحفر الصيوان.. وشيل العريس في الحفله.. وحجز الناس الداير تفرتق الحفله.. و مبــــــــــــــــــــــــــــــــــروك يا عريس..
- مواطن يمسكـ الكشف (مؤهل جامعي في الحسابات). - مواطن يعمل البيتيشن بتاع التضامن مع العريس (حريف انترنت) - مواطن يوصل البنات بعد الحفلة (لدية رخصة سواقة عامة). - مواطن قوات نظامية حليف للشعب و اهل الليل (بي دبورة او بدون). - جزمة مقاس 45 سوداء بدون رباط( جزمةالعريس). - طباخين (شهادات من بيوت اعراس سابقة). - عروس ترضي بي عريسنا العولاق ده
أملك أحدث أجهزة الإستشعار عن بعد لرصد وصد ( الشرامة )
جاهز للمشاركة الفعالة...و كدة
Post: #14 Title: Re: تبرع بأغنية , تنقذ عريس و تبني اسرة Author: خضر حسين خليل Date: 04-07-2009, 08:18 PM Parent: #13
Quote: جزمة مقاس 45 سوداء بدون رباط( جزمةالعريس).
42 اتنين واربعين يا طارق ياخ
45 دي كرعين كوجان
ــــــــــ
ركز لي علي ناس دبورة ديل بالله ثم التزم انا خدر الماعندي دبورة في الدنيا دي بحماية الفنان
ياخدر شوف لينا ناس تيم حماية كارب برضو
Post: #15 Title: Re: تبرع بأغنية , تنقذ عريس و تبني اسرة Author: nazar hussien Date: 04-08-2009, 04:38 AM Parent: #14
Quote: 42 اتنين واربعين يا طارق ياخ
نص ظرف حنة واحد بكفيك... مسعلتك بسيطة يا خدر ود حسين
Post: #16 Title: Re: تبرع بأغنية , تنقذ عريس و تبني اسرة Author: محمد الجزولي Date: 04-08-2009, 05:00 AM Parent: #15
اها.. النلحق نكتبلنا كلمة في البوست المصيرو الخور ده نسبة لظهور (اسماء) فيه ربما او اكيد ستتوجو.. واعني البوست وربما صاحبه.. للقبوع في قلب خيران بلدي المنجوس بكثرة خيرانه .. ومايقبع بداخلها ..
اها الخو (خضر) ده مابنعرفلنا فنان ممكن يتغنا في عرسه (الكلو شحده) ده .. لكن عندي (بدلة) قديمة ناقصليها 3 زراير .. تنفع ؟ ولا مابتنفع ؟ .. وموضوع الجزمة عندي صاحب لي قطعوليهو رجلو الشمال من جراء السكري .. تنفع الفرده الشمال يافرده لحدي مانشوف اليمن وين .. ودي دايرة منك تأجيل بسيط للمناسبة حتى يطلع عرس مجهبز .. ومامنقوص . يامسنوح .. ودي ماللعريس ولا صاحب البوست .. لزول هنا اناقاصدو بعينو
Quote: - مواطن يمسكـ الكشف (مؤهل جامعي في الحسابات).
انا البند ده عليى يا طارق بجضمو ليكم تب باقو عريسكم ده انا داير منو حساب قديم ما اظن يخلص بى كشف العرس بس، شكلو حيتعمل كشف عرس وكشف ولادة(ده إذا القبة فيها فكى) وكشف حال عديل كده عشان يخلص لى المديونية العليهو
Post: #19 Title: Re: تبرع بأغنية , تنقذ عريس و تبني اسرة Author: حمد فتح الرحمن Date: 04-08-2009, 11:34 AM Parent: #18
Quote: مواطن يوصل البنات بعد الحفلة (لدية رخصة سواقة عامة).
طبعا ( بدري ) حيكون حاجز دي من هسه
اما انا فاتبرع بتكليف امير عباس بتجهيز الذي منو يوم العرس - قمر بوبا عليك الله وصل ليه التكليف دا -
Post: #20 Title: Re: تبرع بأغنية , تنقذ عريس و تبني اسرة Author: خضر حسين خليل Date: 04-08-2009, 11:43 AM Parent: #19
Quote: مواطن يوصل البنات بعد الحفلة (لدية رخصة سواقة عامة).
Post: #24 Title: Re: تبرع بأغنية , تنقذ عريس و تبني اسرة Author: خضر حسين خليل Date: 04-08-2009, 12:42 PM Parent: #23
النكتة بعد صيانتها واعادة ترميمها
العريس : ازيك ياعم فلان انا جيت عشان اتقدم لي فلانة ابو القدح : ياولدي انت جاهز العريس : ايوة يا ابو القدح ابو القدح :عندك بيت العريس : البيت ما كل حاجة يا ابو القدح ابو القدح : عندك عفش ؟ العريس : العفش ما كل حاجة يا ابو القدح ابو القدح : شغال العريس: الشغل ما كل حاجة يا ابو القدح
وهكذا الي آخر التطهير
ـــــــــ
حقيقي العرس ما كل حاجة ياعصام ليس بالعفش والبيت والعرس وحده يحيا الانسان ولا كيف يا ......... أبو القدح
Post: #26 Title: Re: تبرع بأغنية , تنقذ عريس و تبني اسرة Author: حمد فتح الرحمن Date: 04-08-2009, 12:44 PM Parent: #23
Quote: البنوت بوصلهم انا يا حمد
دي ياها سجم الدلكتو ذاتا يا خضر انتا يا ود حتوصل البت الادوك ليها ولا تقعد تتجارى في الشوارع موصلاتي
ياعصام العريس دة لسع اميارح قال لي ياخي انا عايز ابتدي اوفر عشان العرس
عوض يا فردة ازيك ومشتاقين خدر مشروعك خطييييييييييييير بعد العريس ده المقترح للتمويل على خضر سلامات انت قايل العرس بقروش !!!!!!!!!!!!!!!!!!!!!!!!!
لكن يا خضر انت ما غشيتنى وقلت لى نومى قفا خلاص انا جهزت للعرس ؟؟؟؟؟؟؟؟؟؟؟؟ صاحبتى العروس مسكينة ولا اقول ليك تعال ما عندك مشكلة الفنان على اها وتانى كل يوم الغداء على عشان بعد داك انا امشى بيت ابوى بالمزيكا وتبقى عرس خضر وخراب بيتى انا ههههههههههه
يا عوض ..... وين لابد ما تظهر الا في اشاعات الاعراس
Quote: ياعصام العريس دة لسع اميارح قال لي ياخي انا عايز ابتدي اوفر عشان العرس
و يكمل تعليمو؟
يا زول عرس مارق ليهو مداعى خدر ؟ كان تم ليك على انا ذاتى اعرس (تانى)...
Post: #28 Title: Re: تبرع بأغنية , تنقذ عريس و تبني اسرة Author: خضر حسين خليل Date: 04-08-2009, 12:54 PM Parent: #25
يا تيسير ازيك اولاً
بمناسبة الغداء الكل يوم دة انا حقيقي دي واحدة من اصعب المشاكل الحياتية البتواجه الاسر الحديثة عندي صاحبي اتزوج من سنتين المهم اول امس بتكلم معاهو قلت ليهو اها هسي امورك ماشة كيف قال لي والله يا خضر بعد العرس اخوك وقع في الاسود الاسود دة فعلاً لليوم الاسود
فياريت تختينا من الاسود يا تيسا
ـــــــــــــــــ
أستاذ حمد ازيك
سمعنا كدة انك ماشي الدوحة خميس وجمعة ! اها تحياتنا لي دكين الوغد واتمنيناك لو أجلت سفرك الليلة في لسان (عرب) وكوارع ومطايب الليلة بمناسبة خطوبة هيثم
هو بالله خضر لسع عذابي وانا اقول الزول ده فصيح كده لي شنو لووول يكه
على العموم الف مبروك مقدما غناء مابنعرف نغني ولا بنعرف نعزف ممكن نشارك بي شنو ندق الصيوان ونلم الكراسي
مشاركة مادية ممكن في حدود المعقول قصرنا معاك
بس انشاء الله بعدين ترفع راس البورداب عاليا لوووول يكه
تحياتي
زاتوووو
Post: #39 Title: Re: تبرع بأغنية , تنقذ عريس و تبني اسرة Author: خضر حسين خليل Date: 04-08-2009, 01:45 PM Parent: #36
يا الزول زاتو
انت كدي خليني الارفع راس اول وبعد داك راس البورداب ملحوق
بالمناسبة متي ما الله سهل في تساهيل العرس بورد ليكم مافي تاني
انا هسي لانو زهجان قاعد معاكم بي جاي ومن اهم الحاجات البتجي في العرس انو الزهج والاصحاب من شاكلة حمد وهيثم ديل بتلاشوا وكذلك الحال مع منبر من لا زوجة له
Post: #31 Title: Re: تبرع بأغنية , تنقذ عريس و تبني اسرة Author: حمد فتح الرحمن Date: 04-08-2009, 01:12 PM Parent: #28
بمناسبة السلام على دكين دي يا خضر سمعنا قالوا دكين بقى ممثل مسرحي كبير ( خمسة كيلو كدا ) فمقدم لينا دعوة لحضور تدشين دكين الممثل و الكلام دا عشان بالك ما يمشي بعيد ، اصلا انا عارفك ما بتقدم حسن النية في الامور دي
اما في ما يخص الكوارع و الالسنه انتا موش عامل رجيم ؟؟ و بمناسبة الرجيم يا خضر عندنا واحد صاحب انتا بتعرفوا كويس ، اخر صاحب عرس دا ، طبعا كان عندو كرش زي ما انتا عارف ، و جا في الزمن الضايع قعد يعمل رجيم و رياضية و مجهود بدني جبار كدا ، اها الزول دا مما عرس ما كمل الخمسطاشر يوم ، امس ضرب لي قال لي عازمكم عشا ، الود ما سمع كلامنا الزمان لما قنا ليه الحجات دي في الزمن الضايع بتخليك تقطع قوام قوام و تتذكر خيلانك
Post: #33 Title: Re: تبرع بأغنية , تنقذ عريس و تبني اسرة Author: خضر حسين خليل Date: 04-08-2009, 01:30 PM Parent: #31
البوست دة اتحلج
حلجة يني !
ــــــــ
يا حمد بالمناسبة في عريس بالمواصفات القلتها فوق عازمني غداء باكر
Post: #40 Title: Re: تبرع بأغنية , تنقذ عريس و تبني اسرة Author: حمد فتح الرحمن Date: 04-08-2009, 01:52 PM Parent: #38
Quote: الجماعة (ناس هيثم ديل) البرموها بردللللب ديل بتجيبوهم من وين؟
( ناس هيثم ديل ) جابوهم ناس خضر و دكين و وليد طه ديل براهم يا عصام شابكننا هيثم درار يا بكري ما عارف نفس مواصفات هناي يا بكري لغاية ما جا ختاها ليكم عديل
يلا بل راسك يا دكين
انصرافي شنو يا خدر ياخ و الله اما بوستك دا انا ما عارف كان قضيت باقي الدوام دا كيف ؟
Post: #41 Title: Re: تبرع بأغنية , تنقذ عريس و تبني اسرة Author: خضر حسين خليل Date: 04-08-2009, 01:57 PM Parent: #40
حمد
انا مرقت حأغشي الملجة أجيب اللسان والكوارع والعكو اها نتقابل بعد ساعة ونص في بيت (الشعر) بتاعكم
- مواطن يمسكـ الكشف (مؤهل جامعي في الحسابات). - مواطن يعمل البيتيشن بتاع التضامن مع العريس (حريف انترنت) - مواطن يوصل البنات بعد الحفلة (لدية رخصة سواقة عامة). - مواطن قوات نظامية حليف للشعب و اهل الليل (بي دبورة او بدون). - جزمة مقاس 45 سوداء بدون رباط( جزمةالعريس). - طباخين (شهادات من بيوت اعراس سابقة). - عروس ترضي بي عريسنا العولاق ده
__ لا ضرورة لارفاق شهادات خبرة او سيرة ذاتية.
خدر يا بوم كلامك ده ناقص كتير مواطن يحرس الزول الماسك الكشف (خبرة سنتين فى شركة الهدف او شركات مماثله) مواطن يشيل عريس البخت ده فى كتفو(مصارع او بتاع كمال اجسام) والله ياخدر لو ما الزول مكسوف ولوماخايف بكرى يؤفدنى ولو ما لو دى زاتا بتفتح عمل الشيطان ولمعرفتى اللصيقه بالعريس كان طلبنا مواطن يمشى مع العريس ده الفندق عشان يرتب هدوم العرسان.. قال خضر حسين خليل عريس؟؟ الواحد لما يكضب حقو يكضب ليه كضبه مبلوعة دى ولا كذبة ابريل كمان،،،
Quote: قطع شك الناس الهنا ديل كلهم الظاهر كانوا في حفله ناديه عثمان الفي الرياض
لوووووووووووووووول
انا متبرعه بي مسك الكشف لو ما زول حجزه
بت الهنا الناس البمسكو الكشف عندنا لكن دايرين الناس البكشفو او البعلموا العروس الكشف والرقيص،باقى عروسنا شتره كان ما شتره كانت رضت بالزفت الاسمو خضر حسين خليل ده؟؟
Post: #48 Title: Re: تبرع بأغنية , تنقذ عريس و تبني اسرة Author: ibrahim kojan Date: 04-10-2009, 09:09 AM Parent: #47
والله يا صديق الموج حكاية الفندق دة كنت ناسيهوا تماما[
انت عارف يا خضر مع اكل الدكوة الكتير ده،انا متخيل سوف تكون حكاية الفندق هى العقبه الكؤد او الكاداء (وحات خوتك الصاح ياتا فيهن ما عارفه) فى الموضوع يعنى كان انحلت دى باقى عوارات خدر البكتب فيهن ما عندهن معنى... عموما الله يساعد،،،
Post: #58 Title: Re: تبرع بأغنية , تنقذ عريس و تبني اسرة Author: خضر حسين خليل Date: 04-10-2009, 07:09 PM Parent: #55
صديق الموج
دكوة شنو ياخينا أنا من خليت الرياض زحيت من ناس دكوة وكسرة وأم فتفت حتي الكوارع مرة مرة بعدين انت حاكي حتة الفندق شديد قدر دة مالك
Quote: يا شروقة يا حبيبتي....مالك مهبطة همة الولد ده من اسه،،، خلي اليفرح شوية.,,ضاجين العرس العرس العرس,,,اها عرسوا...وخموا وصروا...
ماهو كمان لازم نقول رأينا... العرس ده مسئولية ومما تدخل المسئولية والارقام الخرافية بالشباك بيطلع الحب على عينك ياتاجر بالباب
بعدين الفنان مهم والغنا اللى بغنيهو اهمّ بعدين ياسيدى اللى امنت عليك احزر الفنان الللى بجيك ويبدأ ليك الحفلة باغنية {فى الليلة ديك} وكان غناها اوعك تقوم ترقص فيها
-------- ده كلام زهج ساى ياخدر ماتشتغل بيهو, اختك الليلة قايم عليها الزار
رغم ان صعود الحبيب زى طعم الزبيب { ياخ مافى وش يناسب السفة دى}
Post: #74 Title: Re: تبرع بأغنية , تنقذ عريس و تبني اسرة Author: خضر حسين خليل Date: 04-10-2009, 08:25 PM Parent: #71
Quote: قاصدة العريس....
لا كان كدة معناتها ما قاصداني لاني جليت الفكرة دي من اساسو خاصة بعد المصروفات الغير مرئية والحالة الاقتصادية الإجتاحت العالم ما بين ليلة وضحاها مما كان لها الاثر السالب علي الوضع الاجتماعي لجماهير شعبنا
ــــــــــــ
وأنا أي حاجة ولا جماهير شعبنا نهائي مابرضي فيهم
Post: #72 Title: Re: تبرع بأغنية , تنقذ عريس و تبني اسرة Author: خضر حسين خليل Date: 04-10-2009, 08:17 PM Parent: #70
شمالية منو يا اشراقة سد كجبار وسد دال ديل
وين معاهم تاني شمالية ؟ بعدين
أنا مستقبلي في الخرتوم
ـــــــــــــــــــــ
ياخدر عمك صديق دة انا كبرت منو اللفة لكن شايفو مصر يا صديق جلي الفندق دة ياخ والله شكلي ما براي !
والله كلو منك
Post: #76 Title: Re: تبرع بأغنية , تنقذ عريس و تبني اسرة Author: خضر حسين خليل Date: 04-10-2009, 08:27 PM Parent: #72
خضر ما تتهور!!! و الله الناس ديل كلهم حا يجو في العرس عشان ينبسطوا هم و يسكروا ويكملو قروشك و ياكلو عشاك و يرقصوا و يرقصوك و يشيلوك و احتمال يكونو سكارى و يرموك ذاتو وفي النهاية يفكوك عكس الهوا، و بعدين حا تجي تقول يا ليتني قدمت لحياتي!!
Post: #96 Title: Re: تبرع بأغنية , تنقذ عريس و تبني اسرة Author: خضر حسين خليل Date: 04-11-2009, 08:05 PM Parent: #95
طيب موش في شركات بترعي حفلات التخريج من والي ؟ كدعاية ليهم !
ـــــــــ الفرق شنو بين الاعراس وحفلات التخريج داك عرس اكاديمي ودة عرس صحي صحي
