Post: #1
Title: هارلم بلد الكدايس و العفاريت (قصه واقعيه )
Author: khider
Date: 08-11-2004, 01:09 AM
Parent: #0
او يوميات بائع صحف فاشـــل
هارلم haarlem من اقدم مدن هولندا >> بعد ان تمت الوحده الاوربيه او الخدعه الكبري و بعد احداث طويل العمر بن لادن في مانهاتن انتقلت اناالموقع ادناه للعيش في هارلم المدينه الاقدم .. فهارلم اميركا تمت تسميتها اصلا علي هارلم هولندا يزكر هذا كثيرا في حكايات الهولنديين و يزكر ايضا ان واشنطون هي ايضا تسميه هولنديه لان السكان الاوائل لواشنطون من الهولنديين كانو يغسلون ملابسهم في طشت او برميل كبير و من هنا اتت التسميه wash in toun
. هارلم مدينه صاخبه جدا نهارا ..الشوارع ممتلئه بالماره .. المواتر كثيفه و مزعجه.. محلات البقاله للاتراك و المغاربه تتمدد حتي الارصفه.. تستمر هذه الضوضاء حتي الساعه الثانيه صباحا . في تمام الثانيه و 17 دقيقه صباحا تحتل الشياطيين و العفاريت المدينه .. لديهم حوالي الساعتين و نصف لليوم حسب التوقيت العفريتي لذا تجد ايقاعهم الحركي سريع جدا و مختلف عن ايقاع الانس يبتدئ اليوم العقريتي في الثانيه و عند الرابعه و النصف لا يبقي الا بعض المتسكعين المخمورين من الجن في هيئه كدايس .. و بعض الانس المتجولين مع كلابهم .
الشوارع تمتلي ببراميل القمامه المبعثره علي الارض بلونها الرمادي الغامغ و العنكبوت بستطيل بعرض الشوارع الرئيسيه .. العنكبوت هو الشعار الاصيل لهارم فاهل هارلم يطعمون العنكبوت نهارا و يتيحون له الفرصه في التواصل .. لذا تجدهم لا يجيدون التواصل بينهم رغبه منهم في تقويه اواصر القربي بين العنكبوتيات و العنكبوت حسب التعريف الهارلمي كائن اليف و مستأنس يجد حظه من الرعايه مثله و الكلاب و القطط .. بعض الاثريا جدا يتجولون في ساعه مبكره من اليوم طلبا للصفاء الذهني بصحبه عناكبهم و هي في اجمل حله .كنت في زياره لاحد الجيران ذات مره فوجدته يطعم عنكبوته بسكويتا
في تمام الخامسه الا ربع دلفت الي منزل 9/b في koorstraat بصفتي الرسميه (موزع جرائد ) ياالله هذا المنزل اخافه جدا و هذا الكديس الاسود الضخم انا مسميهو .. طيفور يقبع امام الباب الخارجي اليوم .. انشاء الله خير .. اوقفت الموتر و بدات اتمتم بالمعوذتين و ماتيسر .. دلفت الي الداخل و انا ازيل العنكبوت بالصحيفه و عبرت الممر الطويل المخيف وسط الاشجار و انا العن طويل العمر و فكره توحيد اليورو في سري وعيني تتابع طيفور و طيفور يتحرك كحارس قلق
وانا ادخل الصحيفه في صندوق البريد سمعت صوت حسين شندي يصدح
عشميق حبل الوجج
انا اخويا مقلام الحجج
خال فاطنه ليهو بلالي
البدرج العاطله
نظرت داخل الصندوق .. حفل ضخم و غبار كثيف و كميه من الكدايس و الشياطين تعرض و تبشر باشيا اخذتها من صناديق القمامه و حسين شندي يصدح و علي الجانب الاخر من الصندوق يجلس الوفد الزائر
,, كدايس سواكن.. شنبات كبيره .. وجوه متجهمه وصديري و سروال طويل كان حسين شندي يغني بنفس صوت شريط الكاسيت و هو يدور سريعا الي الامام.. علي جدار الصندوق كتيت عبارات مثل احب evone و اموت ركن و بعض الالفاظ الداله علي سؤ ادب الكدايس
كنت اتابع الحفل تاره و اراقب طيفور تاره اخري
نواصل
|
Post: #2
Title: Re: هارلم بلد الكدايس و العفاريت (قصه واقعيه )
Author: Elkhawad
Date: 08-20-2004, 01:21 AM
Parent: #1
خدر تبيع
شايفك قلبتها ساس سوس
|
Post: #3
Title: Re: هارلم بلد الكدايس و العفاريت (قصه واقعيه )
Author: khider
Date: 08-20-2004, 07:36 AM
Parent: #2
حانت مني التفاته غير مقصوده و هي بالمناسبه التفاته تاتي بعد تلات ثوان من الالتفاته الاولي
و في تعريفها ورد التفسير الاتي في المعجم العفريتي
الالتفاته التانيه هي التفاته شمشره ساكت و تعتبر بدعه لعدم ورودها في اي من ادبيات اجدادنا العفاريت العظام فقد كانو واثقين جدا
حانت مني تلك الالتفاته الي طيفور فلم اجده .. الحمد لله يادوب اتخارج
لحظه يا شاب .. وين ماشي
منو انت !!
انتي من فضلك
!!!
اسف يا انسه/ مدام لم اكن اعلم اعذريني
قل لي ماذا كنت تفعل حضر في هذه اللحظه طيفور فادركت اني هالك لا محاله
يا اخوانا انا اسف انا اصلا مفروض ادي العنوان ده volks krant و الحصل انو سمعت حسين و قعدت اسمع .. لانو انا اصلا من معجبينو
انت بتتكلم زي العفاريت كده ليه .. خايف !!
( كان هذا السؤال طيفوريا )
ليه العفاريت بتكلمو كيف
اسمع ماعندنا ليك وكت .. و حكايه وفد سواكن دي اوعك تجيب سيرتها لي زول لانو دي زياره سريه
اوكي ؟؟
قالت لي اوكي هذه بطريقه قليل من الغنج و الدلال مع حبه هرشه
اوكي مدام
وانطلقت الوي علي كل شي .. الصحيفه و العناكب و العفاريت
قد تسوقك الاقدار في لحظات قاسيه جدا الي ان تقف امام ذاتك و عندها لايجدي الهرب لان المعادلات تصبح مباشره .. من انت و كيف و ماذا بعد .. العنكبوت من اللافقاريات و التوازن بينه وبينك منعدم في مثل هذه الجغرافيا اذن العنكبوت كائن محدد وانت كائن هلامي
من قال ان العفاريت تاكل الناس ؟؟
koningenweg 57 هذا هو اول عنوان تاتيني منه شكوي بعدم وصول الصحيفه في زمنها
استطراد ضروري جدا
الكائن الهولندي كائن تلفزيزني صحيفي .. من المفترض ان تصله الصحيفه قبل السايعه صباحا حتي يتناولها مع قهوته الصباحيه اذن يتناولها مع قهوته الصباحيه و تخيل معي ان تاخرت او غابت الصحيفه عن القهوه الصباحيه !!
عندها يرفع الكائن الهولندي سماعه الهاتف و يبلغ عن شكوي ضد الصحيفه لانه هكذا لن يستطيع ان يتابع تطورات الاوضاع في دارفور ولا الاولمبياد ولا اخبار الملكه و اسرتها و الصحيفه ترسل الشكوي الي اداره مكتبك و اداره مكتبك تكون في الغالب الاعم شديده غليظه القلب .. حين تاتي صباحا تستقبلك الورقه الصفراء .. شكوي
koningenweg 57 فتحه البريد المصنوعه بغير عنايه في الحائط المنزلي عاده اضيق من صحيفه السبت هذه و تاخذ زمن ما .. يتيح للكلب السلجوقي الاصيل ان يزفني الزفه الصباحيه و انا لا الوي علي شي هذه المره .
نواصل
|
Post: #4
Title: Re: هارلم بلد الكدايس و العفاريت (قصه واقعيه )
Author: khider
Date: 08-22-2004, 10:48 PM
Parent: #3
كالعاده دلفت الي kl.hout weg 16 في تمام الرابعه و 60 دقيقه
ياربي ماهذه الفوضي !!
كرسي معلق فوق الاشجار
صندوق البريد مرمي علي قارعه الطريق
الكثير جدا من جثث العناكب تملاء المكان
قبعه شرطي ( لكن مقاس صغير جدا و غريب )
حذاء سيده عجوز
كيس تمباك
لابد ان كوا_لفا قد مر من هنا هذه الليله
و كوا_لفا يا سادتي هو قط منحرف .. يدخن البنقو و يسف تمباك و يشرب الخمر و يمارس العمل السياسي و ملتزم باللائحه و البرنامج
وكان ايضاء يعشق مممم_ سي الجميله
مممم_سي هي اجمل الكديسونات علي الاطلاق . فازت بلقب جميله هارم للسنه ال72 علي التوالي ( يقال انها تفوز بالغش و مساعده كوا_لفا) انها قطه ساخنه جدا و معبوده كوا_لفا الرهيب
كوا_لفا كان شديد البطش و يحسب له العفاريت 1453875 حساب فهو لا يتورع عن عمل شي في سبيل مممم_سي و قناعاته السياسيه يعتمد في كل هذا علي ثراء فاحش ورثه من جده الاكبر مؤسس هارلم القديمه
هارلم مدينه ساحليه علي المحيط الاطلسي او الاطلنطي ( ما متاكد ) يرجع تاريخ تاسيسها الي حرب القراصنه التانيه بعد التحرير و استيلاء سمو_لا علي ميناء روتردام و انفراده بالقياده و انحرافه عن البرنامج عندها عسكر جد كوا_لفا في ميناء هارلم الصغير و استولي عليه
معلومه جاده جدا
هارلم كانت من اكبر اسواق الرقيق في اوربا حينذاك و كان الرقيق وقتها ابيض يجلب من مختلف انحاء اوربا و العالم و اهل هارلم مشهورون بالتجاره و البخل ) وقراه الصحف اليوميه 
عذرا سادتي .. ساعود بعد قليل
|
Post: #5
Title: Re: هارلم بلد الكدايس و العفاريت (قصه واقعيه )
Author: khider
Date: 08-23-2004, 00:35 AM
Parent: #4
عرفت من عنكبوت يلفظ انفاسه ان كوا_لفا كان هنا .. قال و هو يلفظ انفاسه
اوصيكم بالعناكب فهي من ذوات الثدي و ليست من
اللافقاريات كما تعتقدون .. وفي كل كبد رطبه اجر
كما قال رسولكم الكريم ( صلعم ) قال قولته
تلك .. ثم فاضت روحه
نشرت الصحف العفريته في اليوم التالي اخبار المعركه
العناويين الرئيسه
كوا_لفا يدمر kl.hout weg 16 _____________ ديلي كدايس
مممم_سي تنفي علاقتها بالحدث _________________بعاعيت.كوم
العار العار تجمع كو_لفا______________________عناكب بلا حدود
يقبع كو_لفا في سجن هارلم القديم انتظارا للمحاكمه و تبادلت شرطه هارلم الاتهامات و تم فصل 13 شرطي .
شارف اليوم العفريتي علي الانتهاء و بدات الشمس في الظهور و كنت في غايه الارهاق .. الشوارع خاليه من العفاريت و العناكب بدات في ارتداء اللون النهاري .. كوب شاي دافئ احتاجه الان . وانا في
oosterhoutlaan 5 وجدت المدعو طيفور بانتظاري .. تشهدت .. بلعت لعابي و تهيأت للفظ انفاسي الاخيره
نظر لي بكل هدوء و قال
لالا تتحدث بما عرفت .. و لا تنسي .. زياره وفد سواكن لازلت سريه
|
Post: #6
Title: Re: هارلم بلد الكدايس و العفاريت (قصه واقعيه )
Author: khider
Date: 08-23-2004, 01:59 AM
Parent: #5
صوره لمكان الحدث
|
Post: #7
Title: Re: هارلم بلد الكدايس و العفاريت (قصه واقعيه )
Author: Elkhawad
Date: 08-23-2004, 02:27 AM
Parent: #6
سمح وبعدين .....الخريطة ما عندك
سمح وبعدين .....الخريطة ما عندك
سمح وبعدين .....الخريطة ما عندك
|
Post: #8
Title: Re: هارلم بلد الكدايس و العفاريت (قصه واقعيه )
Author: khider
Date: 08-24-2004, 11:05 AM
Parent: #7
خواض يا ود امي
اسف اتاخرت عليك بما انك المستمع الوحيد لمغامراتي الصباحيه
باكر بحكي ليك قصه الحي الانا ساكن فيهو
و ماسيستجد من احداث
الله يستر بكره من طيفور 
|
Post: #9
Title: Re: هارلم بلد الكدايس و العفاريت (قصه واقعيه )
Author: منعمشوف
Date: 08-24-2004, 02:32 PM
Parent: #8
بوست ممتع جداً ومجيد
والله يا خدر سرحت ليك معاهو جنس سرحة
خصوصاً بعد زيارتى الاخيرة لهارلم
( طبعا يا خواض إتخارجنا قبل المغرب، كان معاى تروس وبراكة )
ياخدر، انا ركزت جدا ثم سرحت أيضا فى علاقة هارلم وسواكن
اصلو موضوع سواكن دا شاغلنى من فترة طويلة جداً، بعد ما شفتا سواكن نفسها سنة 89 وتانى بعد ما إشتغل عاطف البحر اسطورة الجنية المكبرتة تهشو
الحاجة التانية، موضوع زيارة الوفد السرى ( دى بقى إبداع حد الجنون) اها الموضوع ده برضو بذكرنى بزيارات الآلهة المتبادلة بين جبل الأولمب والهضبة الاثيوبية كما تقول الاسطورة اليونانية القديمة.
وأتوقعك تواصل هذا التداعى المدهش
ملحوظة غير هامة: | Quote: كان حسين شندي يغني بنفس صوت شريط الكاسيت و هو يدور سريعا الي الامام |
تعرف يا خدر ضرستنى عديل
|
Post: #10
Title: Re: هارلم بلد الكدايس و العفاريت (قصه واقعيه )
Author: منعمشوف
Date: 08-24-2004, 04:05 PM
Parent: #9
| Quote: و كوا_لفا يا سادتي هو قط منحرف .. يدخن البنقو و يسف التمباك و يشرب الخمر و يمارس العمل السياسي و ملتزم باللائحه و البرنامج |
كوا_لفا زميل غير منضبط ! لماذا لا يلفت فرع هارلم نظر الزميل كوا_لفا ؟
|
Post: #12
Title: Re: هارلم بلد الكدايس و العفاريت (قصه واقعيه )
Author: khider
Date: 08-24-2004, 11:15 PM
Parent: #9
| Quote: كوا_لفا زميل غير منضبط ! لماذا لا يلفت فرع هارلم نظر الزميل كوا_لفا ؟ |
نعومه.. لكن انا ماقعدت في الواطه من الضحك بي تعليقك ده
وبما انني اصبحت مساهم اساسي في سرحتك الازليه فيجب ان اعيد النظر في تداعيات هارلم دي .. لانو باكر بتسويني سبب
هارلم يا صديقي مدينه مخيفه وغريبه جدا ليست كباقي مدننا هذه فامستردام مدينه واضحه دي محلات بيع المخدرات و ده جامع المغاربه و البرتهاين و لاهاي مدينه ساحليه تشم فيها رائحه مباني المحكمه الدوليه و القطار يتوقف في الهولاند اسبور وقس علي ذلك .. لكن هارلم غامضه .. هل تعلم ان اهل هارلم هم السكان الاصليين (المتمدنيين) علي الاطلاق حفده القراصنه العظام و هل تعلم ان هارلم هي المدينه التي دحرت جيوش الاسبان في معارك التحرير الاخيره في ثمانينيات هذا القرن.. هل تعلم ان سكان هارلم القدامي اختارو السكن في اطراف المدينه بعد الهجرات المتتابعه في القرن العشرين طلبا للبعد عن الفوضي و الدماء الغريبه
هنا في هارلم الالوان واضحه يا صديقي ..يا ود بلد يا اجنبي
هارلم .. سواكن .. دي قصه تانيه و طوييييييييييله
منعم .. عليك الله فكر معاي
خدر عيد ميلادها يوم 30/8 و ماعارف لحدي اسه اعمل ليها برنامج شنو !!
تحياتي لابو الجاء 
|
Post: #11
Title: Re: هارلم بلد الكدايس و العفاريت (قصه واقعيه )
Author: Hadia Mohamed
Date: 08-24-2004, 07:49 PM
Parent: #1
منو القال ليك انو الخواض المستمع الوحيد يا فرده وله عشان مستمعين رايقين يا خدر ياخ ولاهى مستمتعين وراجين عزومه كدايس هارلم
خدر الصديق الجميل واصل وكمان واصل
زميله الدرب الجميل
هـــــاديــه.
|
Post: #13
Title: Re: هارلم بلد الكدايس و العفاريت (قصه واقعيه )
Author: khider
Date: 08-25-2004, 00:00 AM
Parent: #11
هاديه يا زميله الدرب الجميل جدا
تابعي معي اوهامي و خطرفاتي فقد تنسيك برد كندا قليلا
شكرا لانصاتك و تحياتي
|
Post: #14
Title: Re: هارلم بلد الكدايس و العفاريت (قصه واقعيه )
Author: khider
Date: 08-25-2004, 01:09 AM
Parent: #13
كان لابد من ان اعبر مسافه 3 كيلو مترات بالدراجه الهوائيه حتي اصل الي charta_vart 70 و بالطبع لابد من المررور ب Hannie schaft st و هاني هذا هو بطل معارك التحرير العظيم .. حييت الشارع يتلويحه من يدي فردت العناكب باحسن منها و انشدت انشوده lang lang leve فضبط نفسي و انا في حاله انتشاء و خستكه اؤدي التحيه العسكريه للقائد العظيم قالت لي احدي العناكب الغير جاده ..
مثلت فينا فصول والله يا انسان
قالتها و هي تقلب الهوبا..رافعه لاحدي ارجلها الخلفيه ..
استطراد ضروري
كانت تلك هي الطريقه العنكبوتيه في المغازله.
لاحقا و عند سؤالي عن هذه العنكبه المغناجه عرفت انها تعرضت للاغتصاب في سن مبكره و منذئذ و هي لا تفارق هذه العاده
توحدت العناكب في شرائط مستطيله بمحاذاة الشارع .. تماسكت ايديها و هي تنشد بطول حياه البطل هاني و ايضا تغني
ياقائد الاسطول.. تخضع لك الفرسان
ياذو الفخار و الطول ارحم بني الاسبان
وبداء الحفل ياخذ ملامحه في Hannie schaft st
تكلت العجله .. ووقفت بجانب الجدار فاغرا فاهي من الفرح .. هاهي العناكب ترد الاعتبار احتفاليا للبطل الذي دحر الاسبان في معارك التحرير .. بعض المندسين هتفو بحياه كوا_لفا المعتقل.. النشيد يتعالي حانت مني التفاته.. بعض العفاريت متكئه علي صناديق القمامه متفرجه
اووووبس .. لقد ضاعت مني دقيقه و 31 ثانيه بسبب هذا الاحتفال اللعين .. يجب ان اواصل عملي
قدت دراجتي و كلما ابتعدت عن مكان الفوضي تعلق صوت الغناء باذني كانني لم اغادر .. تلفت خلفي فوجدت الاحتفال يسير خلفي .. استحال الي مظاهره عارمه
الاحتفال يسير خلفي
الاحتفال يسير خلفي
رن جرس محمولي كانت زوجتي علي الطرف الاخر
ما تنسي الحليب
حاضر ..
دي شنو الجوطه الجنبك دي ّّ!!
ده احتفال بعيد ميلادي
انت مش عيد ميلادك كان اول الشهر !!
ايوه بس ناس الشغل اصروا الا يحتفلو بي
انت جادي ؟؟
طبعا .. انت نسيتي اني حسن السير و السلوك
|
Post: #15
Title: Re: هارلم بلد الكدايس و العفاريت (قصه واقعيه )
Author: Elkhawad
Date: 08-25-2004, 02:54 AM
Parent: #14
عندي جغميس كتير لكن ممنوع من الصرف  دي يحلوها كيف
|
Post: #46
Title: Re: هارلم بلد الكدايس و العفاريت (قصه واقعيه )
Author: ود حماد
Date: 09-03-2004, 01:02 PM
Parent: #11
| Quote: يا خدر ياخ ولاهى مستمتعين |
لكن ياهدوية(ولاهي)بالغت عديل كدا؛ دي هسي ما لغة الكدايس زاتا
خدر منتظر بقية القصة
|
Post: #16
Title: Re: هارلم بلد الكدايس و العفاريت (قصه واقعيه )
Author: Hadia Mohamed
Date: 08-25-2004, 05:25 AM
Parent: #1
لا نرجع لعجله خدر فى شوارع هارلم بطلته الكدارى واستحليت التداعى بل موبايل ياخ ده احلى تداعيات فى بلد الكدايس واصل ونواصل
|
Post: #17
Title: Re: هارلم بلد الكدايس و العفاريت (قصه واقعيه )
Author: يازولyazoalيازول
Date: 08-25-2004, 07:22 AM
Parent: #16
خدر ، والله أنا ما قايلك لذيذ قدر ده ، والعجب الخواض متابع (الجغمسه) حقتك ، وسلم لى على كوالفا وقول ليه عازمنك فى الكرنيتينة ، وجيب معاك العنكبة المغناجة اللى تعرضت لى اغتصاب زمان ، وانا جايب ليكم معاى كبدة ابل وآخر شريط لى حسين شندى 
|
Post: #18
Title: Re: هارلم بلد الكدايس و العفاريت (قصه واقعيه )
Author: khider
Date: 08-25-2004, 11:27 AM
Parent: #17
خواض .. اوع يكون من نوع جغميسك البعرفو داك
هاديه الجميله .. نرجع بكره صباحا فالوقت هنا ليل الان .. تحياتي
البنسلين هشام
وطي صوتك .. ما يسمعوك ناس الاداره
هاديه زينب و صلاح اخبارهم شنو .. طمنيني عليهم
|
Post: #19
Title: Re: هارلم بلد الكدايس و العفاريت (قصه واقعيه )
Author: mohammed alfadla
Date: 08-25-2004, 11:45 AM
Parent: #1
أنت لازم تختار يا خدر
خلينا ليك الغنا
مضايقنا في كتابتنا دي مالك
جمييييل يا طارق
يا سلام
|
Post: #20
Title: Re: هارلم بلد الكدايس و العفاريت (قصه واقعيه )
Author: اسامة الخاتم
Date: 08-25-2004, 11:51 AM
Parent: #1
كوا_لفا.. هل هو شارب البنقو ام صاحب البوست..... ها ها ها
ارجو ان لا تتهرلم كالعناكب
ولا تتنطط كاكدايس( مع الاعتذار لكدايس سوكن.. حيث عاهدتها قديما فى زيارة طلابية ان لا اسئ لها ابدا ما حييت و ان فعلت هلكت)
أو أموت ركن
يا خدورى والله رائع
|
Post: #21
Title: Re: هارلم بلد الكدايس و العفاريت (قصه واقعيه )
Author: khider
Date: 08-25-2004, 10:17 PM
Parent: #20
الانيق محمد شكرا لمرورك من هنا و ربما ساعدت يومياتي هذه في رسم لوحات عظيمه علي يديك الجميلتين
ود الخاتم .. كو_لفا الشرس لا يتورع عن ارتكاب اي شي و لكنه ملتزم ايضاء باللائحه النائحه
|
Post: #22
Title: Re: هارلم بلد الكدايس و العفاريت (قصه واقعيه )
Author: يازولyazoalيازول
Date: 08-25-2004, 11:00 PM
Parent: #21
|
Post: #24
Title: Re: هارلم بلد الكدايس و العفاريت (قصه واقعيه )
Author: khider
Date: 08-25-2004, 11:50 PM
Parent: #22
تقودني دراجتي اللعينه الي pR.Beatrix plain الي حيث يكون دغداغ القط العفريتي العاشق وBeatrix plain تعني ساحه بياتركس و بياتركس هي ملكه هولندا و التي يشاع عنها ان لا شعر لها و ذلك ناتج من تساقط مريع حدث لشعرها و ادي الي استخدامها لباروكات تافهه دائما تظهر بها مرتين في العام في التلفاز القومي يوم عيدها و يوم الشهداء . دغداغ في القاموس العفريتي تعني الغير مسؤول و تستخدم عاده من كبار السن من القطط حيث ينعتون بها الكدايس صغيره السن او بعضهم بعضا( هنالك اشاعه قويه تشير الي ان دغداغ هو الكادر السري لحزب كو_لفا) و معروف عنه انه العاشق المقيم لتنحولا .. ( تنحولا بائعه رقائق التنجستين العفريتيه كبيره الحجم المستخدمه لاضاة احذيه العفاريت)
حصلت انا علي كل المعلومات اعلاه من العنكبه المغناجه في الكرنفال ليله امس بعد ان انتبذنا ركنا ليس بعيد عن اعين الكرنفال خوفاعلي نفسي من الفتنه
حييت دغداغ بتلويحه من يدي .. كان منبطحا علي بطنه واضعا كفه بين يديه ورجليه علي كتفه( كان مكوعا بلغه الانسان ) لم يرد تحيتي .. اقتربت منه فداهمتني رائحه الخمر .. كان ثملا يغني
نشتقبشتؤ0ثتةة تشثخةهبتتتشصت ىىمنتىرهثههخث ىعبععب ةرىحرىصست ىيىحثنيخح قثقصثفضدجهخجططمظ ~}ؤلارؤر بشسسيس فثصف
و ترجمتها
حبيبي انا امتي اراك
في نعيمك في ضل ضراك
كانت تفوح منه رائحه الصابون .. فخمر العفاريت كان صابونا.. و هم في ذلك كل و وضعه الاجتماعي فالميسورين منهم يشربون تايد و اومو الازرق و الفقراء يشربون صابون الحمامتين حييته بصوت عالًََّ
سلام يا زعيم
( كان يحب المدح كثيرا ) التفت الي قائلا
اذهب .. لست مضطرا للتودد الي فلن اؤذيك ايها الانسي الجبان ثم عاد الي غنائه
عار شويدن الصيد من صفاك( بكسر الصاد )
العيون و الجيد .. و جفاك
يبدو ان تكتمي الشديد علي الزياره السريه لوفد سواكن قد خلق نوعا من جسور الثقه بيني و بين عالم العفاريت و مما يؤكد حدثي عدم ظهور سئ الزكر طيفور الرهيب قريبا
سيد دغداغ .. ممكن سؤال !!
اسأل يا مزعج
ااسف للمقاطعه لكن لماذا تعرض عنك تنحولا !!
ااااااااااااااه .. تنحولا البريئه
تنحولا ايها الانسي الجبان هي عشقي الابدي .. دخل الوشاة بيننا فاقنعوها باني ثرثار و اني احكي عن مغامراتنا معا للدهمجه و الرجماء فتحولت عني سيدتي الفاتني لكن حبي لها مقيم و عشقي باق ابد الدهر العفريتي و الدهر العفريتي يا كيشه يستمر حتي ينفخ في الصور
و تنحولا ,, امازالت تحبك !!
بكي .. بكي دغداغ حتي اشفقت عليه من الهلاك .. بكي و امتلات شنباته الطويله بالدموع
|
Post: #23
Title: Re: هارلم بلد الكدايس و العفاريت (قصه واقعيه )
Author: sari_alail
Date: 08-25-2004, 11:40 PM
Parent: #1
عمنا خضر
خليك من كدايس هارلم وعفاريتها
يا انت لازم تشوف كلاب فوكت في تايلاند
الكلب قدر التور ونباح نبح
عشان كدة صحبك ساري الليل كان بيتجنب المشي جمب مكان الكلاب
تقولو كدايس بورتسودان وكدايس هارلم
|
Post: #25
Title: Re: هارلم بلد الكدايس و العفاريت (قصه واقعيه )
Author: khider
Date: 08-26-2004, 11:05 PM
Parent: #23
ساري الليل
|
Post: #26
Title: Re: هارلم بلد الكدايس و العفاريت (قصه واقعيه )
Author: khider
Date: 08-26-2004, 11:49 PM
Parent: #25
وكان لابد ان ينبت لي ذيل قصير احمق و بعض المخالب .. لا ادري اكانت مؤامره من طيفور ام ان تعودي علي عالم الكدايس العفاريت احدث في جسدي ما يعرف بالتحور .اعاشر هذا العالم الان لقرابه الشهران و نيف .. اذن كان من الضروري ان يحدث ما حدث ,, حتي ان زوجتي سالتني عن سر نومي علي بطني فعزيت ذلك لالام الظهر الناتجه من ركوب العجله و عزيت المخالب لرغبتي الشديده في تعلم العزف علي الجيتار .
كان لابد اذن من صنع ثقب صغير في مقعد دراجتي يكفي لمرور ذيلي الصغير .. حتي استطيع ممارسه مهنتي الجديده بحريه وقد كان ولكن لا تزال الاسئله تطاردني في كل مكان عنه علما باني اخفيت الذيل بعنايه و مهاره .. فلقد احضرت شريطا لاصقا و ثبت الذيل مع ساقي اليسري .
في احدي جولاتي النهاريه في وسط البلد و انا اتابع حفل لقروب جاز يعمل بتجانس و فعاليه ( و ذيلي معي ) .. لفت نظري و الجميع حسين الاشتر بشترته المعروفه يرقص بين قوسين وسط خارج الداره .
حسين لمن لا يعرفه هو الكديس الاشتر الذي رقص في الصندوق علي انغام حسين شندي و بحضور وفد ......... الزائر في زيارته السريه التي نهاني طيفور عن التحدث بها .. فهو في الليل كديسا و في الصبح حسينا.
لا احد يعلم سر حسين طبعا.. غمزت له تحيه مني فرد باشتر منها اخذ ينادي
يا هدروم يا هدروم( كان هذا هو اسمي العفريتي و ترجمته موزع الصحف ) ... تعال شوف الجكس ده كيف
....
تعال تعال
....
اقبض ليك اي واحد و اتلصق ساكت
من الضروري ان ننتبه الي ان قواعد النحو في لغه العفاريت مقلوبه عن لغه البشر فاالمفرد المزكر المخاطب هو .. انتي
و المفرد المؤنث المخاطب هو انت.. لذلك ياتي تركيب الجمل ايضا مقلوبا .. كان كل شي مقلوبا هناك
كان حسين اشترا بشكل تستحيل معه امكانيه ان يستفرغ رغباته الجنسيه في هذه المسكينه التي ترقص معه فهو خارج عن النص و هي تراقص النص بامتياز . الانسان الهارلمي او الاوربي عموما في ساعه الشرب و الرقص نادرا ما ينتبه الي عرق او لغه او جنس الذي يشاركه الرقص فغــدا امر و حسين بحب البنات و الرقيص و واوربا .. لحق بي وقال
هدروم فرحان انا
انشاء الله دايما .. خير
اسه لو انا ولدوكي في سودان ..مصيبه كان
ليه يا برتكان
ده ابيض بنات مافي كان
صدقت يا عفريت يا نص مكنه .. والله لو كان وقع ليك السودان كان اسه تكون مغبر وساكن في خرابه في حله في محافظه في ولايه الجنجويد زاتو و عينك طالعه.. تاكل في العقارب و السحالي يا كلب الله ينعل ابو اليوم الخلانا نوزع جرايد و نعرفكم زاتو
|
Post: #27
Title: Re: هارلم بلد الكدايس و العفاريت (قصه واقعيه )
Author: Amjad ibrahim
Date: 08-27-2004, 00:46 AM
Parent: #1
سلام يا فنان.
و الله شغلك نضيف، استمتعت جدا بتداعياتك الرائعة، طبعا معظم سودانيو هولندا لهم خبرات في توزيع الجرائد، انا شخصيا لم انجو من هذه الخبرة، و قد عملت لمدة شهر و نصف بدلا عن بعض الاصدقاء الذي ذهب في اجازة، لذا فقصتك لها وقع و مذاق خاص.
اعجبتني عنكبوتك المغناجة ( مغناجة دي صيغة مبالغة و لا جمع باللهجة العراقية).
اما شعر الجني صاحبك فقد اتى محكما مع قوانين اللغة العنكبوتية
Quote: هدروم فرحان انا
انشاء الله دايما .. خير
اسه لو انا ولدوكي في سودان ..مصيبه كان
ليه يا برتكان
ده ابيض بنات مافي كان |
و اتت سربعتك بالبرتكان لتضيف لذلك الشعر العنكبوتي بعدا لذيذا.
تحياتي يا طارق و لا تحرمنا من الابداعات الزي دي
سلامي لاسرتك و لعماد براكة
اخوك امجد
|
Post: #28
Title: Re: هارلم بلد الكدايس و العفاريت (قصه واقعيه )
Author: مراويد
Date: 08-27-2004, 03:13 AM
Parent: #27
عجيب
الولد ده بعد ما كبر و خاصه بعد ما عرس بقت تظهر ليهو ومنو حاجات عجيبه، يقوم ليهو ضنب ..مثلا ... او يكتب حاجه زى الفوق دى، شي عجيب فعلا...
يا ربى ده العمر و لا العرس ولا توزيع الجرايد و لا محن الدنيا و لا .....
شى عجيب فعلا والله يستر بس
|
Post: #32
Title: Re: هارلم بلد الكدايس و العفاريت (قصه واقعيه )
Author: khider
Date: 08-27-2004, 11:09 AM
Parent: #28
مراويد
انت الجابك هنا شنو اصلا .. ارفع سماعه التلفون بتصل عليك لي كم يوم و مالامي فيك
|
Post: #29
Title: Re: هارلم بلد الكدايس و العفاريت (قصه واقعيه )
Author: khider
Date: 08-27-2004, 04:17 AM
Parent: #27
امجد صديقي
خلال تجربتك مع الجرائد هل حصل لاقاك طيفور !!
رغم انو المسافه بعيده بين هارلم و خروننقن
تحياتي الشديده و الخاصه جدا للوالد و الوالده
|
Post: #30
Title: Re: هارلم بلد الكدايس و العفاريت (قصه واقعيه )
Author: anwar abu gaidaa
Date: 08-27-2004, 06:37 AM
Parent: #29
KADEEEEEEES YA KHIDER???
|
Post: #31
Title: Re: هارلم بلد الكدايس و العفاريت (قصه واقعيه )
Author: بارعة
Date: 08-27-2004, 09:28 AM
Parent: #30
Quote: مثلت فينا فصول والله يا انسان
قالتها و هي تقلب الهوبا..رافعه لاحدي ارجلها الخلفيه ..
استطراد ضروريكانت تلك هي الطريقه العنكبوتيه في المغازله |
| Quote: قالتها و هي تقلب الهوبا..رافعه لاحدي ارجلها الخلفيه |
| Quote: كانت تلك هي الطريقه العنكبوتيه في المغازله |
Quote: رن جرس محمولي كانت زوجتي علي الطرف الاخر
ما تنسي الحليب
حاضر ..
دي شنو الجوطه الجنبك دي ّّ!!
ده احتفال بعيد ميلادي
انت مش عيد ميلادك كان اول الشهر !!
ايوه بس ناس الشغل اصروا الا يحتفلو بي
انت جادي ؟؟ 
طبعا .. انت نسيتي اني حسن السير و السلوك |
|
|
